23 June 2017

RSS Facebook

سوداگریز


تازه خبرونه

اعلاميه

کابل باختر د چنګاښ دويمه : دافغانستان داسلامي جمهوريت داجراييه رياست...

د ډاډ ګيرنې او غمشيريکي پيغام

کابل باختر د چنګاښ دويمه : دافغانستان دعالمانو دسراسري ...

Youtube Player

khantry design

سوداگریز

سوداگریز

Friday, 23 June 2017 11:38

اعلاميه

کابل باختر د چنګاښ دويمه :
دافغانستان داسلامي جمهوريت داجراييه رياست اعلاميه
په ژورې خواشينۍ  سره مو خبر ترلاسه کړ چې  سخت زړو او تور زړو تروريستانو په  هلمند ولايت کې دکابل بانک په دفتر  په بريد سره   زموږ يو شمير مظلوم  هېوادوال شهيدان او يوشمير نور يې ټپيان کړي دي .
دسږ کال روژه زموږ خلکو دهېواد په ګوټ ګوټ کې خونړۍ او دردونکي وه په بيګناه  روژتيانو  ډار اچوونکي بريدونه ،  په جنوب کې دخوست له ولايت څخه پيل شول او دننګرهار  ، کابل ، پروان ، جوزجان ، فارياب ، او دتخار دولايتونو په ګډون دهېواد په څلورو څنډو کې دوام وموند .
  جنايتکار تروريستان چې زموږ  د زړورو امنيتي ځواکونو او سرتيرو په وړاندې دجګړې  په ډګرونو کې له ماتې سره مخامخ  شوي دي په ځانمرګو  او چاوديدونکو بريدونو سره بې دفاع ملکي وګړي او خلک په نښه کوي. تروريستان په دغه شان ړندو  او ناځوانمردانه بريدونو سره دخپلو ناکاميو او ماتو د جبيره کولو په لټه کې دي .
هغوى داسې  فکر کوي چې په ترور ، ډار اچونې او وحشت سره کولاى شي مخ په وړاندې دافغانستان ديون مخه ونيسي خو دافغانستان خلکو ثابته کړې ده چې ترور او تاوتريخوالي  ته به تسليم نه شي .
په هلمند کې دکابل بانک په دفتر دمزدورو  طالبانو دبريد دغندلو په ترڅ کې دپيښې شهيدانو ته دفردوس جنت او ټپيانو ته دبيا روغتيا هيله کوو.
دهلمند امنيتي ځواکونو اومسوولينو ته لارښوونه کوو چې ددغې وحشيانه پيښې عاملان ونيسي او دقانون منګولو ته يې وسپاري .

کابل باختر د چنګاښ دويمه :
دافغانستان دعالمانو دسراسري   شورا د ډاډګيرنې او غمشيريکي پيغام .
په ژورې خواشينۍ  سره ددين او هېواد دښمنانو دروژې په مبارکه مياشت کې يوځل بيا په ستر جنايت لاس پورې کړ او دهلمند ولايت په لښکرګاه ښار کې دکابل بانک دنمايندګي په وړاندې ځانمرګي  بريد ترسره کړ او زموږ دڅلورو ديرشو تنو بې ګناه او روژتي   هېوادوالو دشهادت او داته پنځوسو تنو نورو دټپي کيدو سبب شول .
اناللله و انا اليه راجعون
دافغانستان دعالمانو سراسري شورا ددغه غير اسلامي او غير انساني وحشيانه عمل  په کلکه غندي او دلوى خداى( ج )  له  دربار څخه شهيدانو ته دفردوس جنت ، ټپيانو ته دبيا روغتيا او دشهيدانو پاتې کسانو خپلوانو او دهلمند ولايت پتمنو خلکو ته دجميل صبر هيله کوي .
شورا له مسوولو امنيتي ارګانونو څخه غواړي  چې ددغه ستر جنايت عاملان وپيژني او دقانون منګولو ته يې وسپاري  چې دخپلو عملونو سزا وويني .

کابل باختر د چنګاښ دويمه :
دهېواد اجراييه رييس ډاکتر عبدالله عبدالله دروژه ماتې په هغه پروګرام کې ګډون وکړ چې دسوداګرو ،. پانګې اچوونکو او دافغانستان دسوداګرۍ  او صنايعو دخونو دغړو په وياړ په اجراييه رياست کې جوړ شوى و .
  داجراييه رياست مطبوعاتي دفتر باختراژانس ته خبرورکړ . په دې مجلس  کې اجراييه رييس په افغانستان کې دپانګې اچوونکو درول او مثبت شتون او دکار دبرابرولو او دملي ودې او پراختيا دملاتړ  له امله قدرداني  وکړه او له ستونزو او مشکلاتو  سره سره يې  دپانګې اچوونکو په هراړخيز  ملاتړ کې دحکومت ژمنه  څرګنده کړه .
دسوداګرۍ دخونو مرستيال خان جان الکوزي دهېواد دسوداګرو په استازيتوب داجراييه رياست دميلمستيا له امله د قدرداني  په څرګندولو سره دوزيرانو په شورا ، کابينه ،  په اقتصادي عالي شورا اودوزيرانو شورا په اقتصادي  کميټه کې له سوداګرو او پانګې اچوونکو سره داجراييه رياست دهراړخيزو ملاتړ له امله  قدرداني وکړه او دحکومت تر څنګ يې ، ملي وده او پراختيا کې دسوداګرو دشتون ډاډ ورکړ .

کابل باختر د چنګاښ دويمه :
دهلمند ولايت  په ګرمسير ولسوالۍ کې  له درې سوه يو ويشتو مستحقو او اړو کورنيو سره  پرون  مرسته وشوه .
  دګرمسير ولسوال  ايوب عمر عمري  باختراژانس ته وويل چې د نړۍ دخوړو دپروګرام  دسازمان له خوا په هرې کورنى  سل کيلوګرامه اوړه ، وويشل شول
دګرمسير ولسوال  ددغه سازمان  له مسوولينو څخه  دقدردانۍ په ترڅ کې  ددغې جګړې ځپلې ولسوالۍ له اړو کورنيو سره د مرستندويو موسسو او دسوداګرو د زياتو مرستو او همکاريو غوښتنه وکړه .

کابل باختر د چنګاښ دويمه :
  دوه تنه وسله وال طالبان پرون  دفارياب ولايت په المار  ولسوالۍ کې ووژل شول .
  دفارياب ولايت دامنيې قوماندانۍ  دمطبوعاتو آمر  او وياند عبدالکريم يورش باختراژانس ته وويل چې  وسله والو مخالفينو  دالمار ولسوالۍ په بخاري قلعه کلي کې په امنيتي پوستو بريدونه وکړل چې له امله يې  دوه تنه ډار اچوونکي ووژل شول او درې تنه نور  ټپيان شول .او نور ډار اچوونکي له ساحې څخه وتښتيدل .
  ده زياته کړه  چې د قاري ګل اغا په نامه  د ډار اچوونکو ديو سرګروپ  مړى  چې دالمار ولسوالۍ اوسيدونکى و ، له وسلو او تجهيزاتو سره  يې دجګړې په ډګر کې  پاتې شوى دى .

کابل باختر د چنګاښ ٢
د کرکټ په نړیواله شورا کې د افغانستان د بشپړ غړیتوب په مناسبت دپخواني جمهوررييس حامد کرزي د مبارکي پیغام

په ژورې خوشحالۍ سره مې خبر تر لاسه کړ چې  د افغانستان د کرکټ ملي لوب‌‌‌‌‌‌ډلې، د کرېکټ نړیوالې شورا بشپړ او دایمي غړیتوب ترلاسه کړ.
د دغې سترې لاسته راوړنې په مناسبت خپل د زړه له کومې مبارکي د افغانستان ټولو خلکو، د کرکټ مینه والو او په ځانګړې توګه د افغانستان کرکټ بور‌‌‌‌‌‌ډ او د ملي لوب‌‌‌‌‌‌ډلې لوبغاړو ته چې په خپلو نه ستړې کېدونکو هلو ځلو یې دغه ستر ویاړ افغانستان ته ور په برخه کړ، وړاندې کوم او د دوی د هڅو د ستاینې ترڅنګ د لوی خدای له درباره دوی ته د لا زیاتو بریاليتوبونو هیله کوم.

کابل باختر د چنګاښ ٢
په نيمروز ولايت کې پرون دوه تنه د غلا په تور ونيول شول .
د نيمروز ولايت د امنيې قوماندانۍد  مطبوعاتي دفتر مرستيال محمد حسين هاشمي باختر اژانس ته وويل چې  په دغو دووتنو د سپرليو او د کورونو د مالونو د لوټولو تور لګول شوى دى  چې د نيمروز ولايت د امنيې قوماندانۍ د پوليسو له خوا ونيول شول .
هاشمي زياته کړه چې  نيول شويو کسانو په لومړنيوتحقيقاتو کې په خپل جرم اعتراف کړى دى

کابل باختر د چنګاښ ٢
د هوا تودوخه او د روغتيا ساتنې نه رعايتول په بلخ ولايت کې  د ناروغانو  د کچې  د لوړيدو سبب شوي دي .
په مزارشريف ښار کې د ابوعلي سينا د ماشومانو د برخې مسوول  ډاکتر محمد شفيق شايق باختر اژانس ته وويل  چې  په مزارشريف ښارکې د سانتي ګراد په کچه څلويښتو درجو ته د تودوخې د اندازې رسيدل ددې سبب شوي دي چې  هره ورځ څه نا څه دوه سوه تنه  ماشومان  د نس ناستې او کانګې  د ناروغيو له امله  دغه روغتون ته ولږدول شي .
ده زياته کړه د هوا د تودوخې ترڅنګ د چاپيريال دروغتيا ساتنې د اصولو نه رعايتول  هم د دې سبب شو ي  دي  چې ماشومان زياد  په دغو ناروغيو اخته شي .ده له کورنيو څخه وغوښتل چې  دخپلو ماشومانو روغتيا ساتنې ته متوجه واوسي چې په ډول ډول ناروغيو له اخته کيدو څخه وژغورل شي .

کابل باختر د چنګاښ ٢
د جوزجان ولايت په درز اب ولسوالۍ کې د داعش د ‌ډلې جګپوړى قوماندان  مفتي نعمت له دووتنوساتوونکو سره يې د پوځيانو په ناڅاپى بريد کې ووژل شو.
دغه ډار اچوونکى په درزاب ولسوالۍ کې د وروستيونا امنيو او په دغې ولسوالۍ کې  دداعش د ډلې د فعاليت د پرختيا اصلي عامل بلل کيده .
د جوزجان ولايت درزاب ولسوالۍ ته د کواندو د لسګونو تنو ځواکونو له رسيدو سره سم ، پرون د داعش دډلې د ځپلو لپاره ځانګړي عمليات پيل شول او دغه عمليات د ملي اردو ، ملي پوليسو او د ځانګړو ځواکونو د لسګونو تنو پوځيانو په ګډون دوام لري.
د کوماندو د ځواکونو وياند احمدجاويد سليم د باختر اژانس خبريال ته وويل  چې د مفتي نعمت په وژل کيدو سره  دداعشيانو له شتون څخه  په بشپړه توګه  د درزاب د پاکولو لپاره لاره پرانستل شوې ده او په عملياتو کې شامل پوځيان د پرمختک په حال کې دي

کابل باخترد چنګاښ ديمه نيټه
افغانستان د کرکټ د نړيوالې شورا دايمي غړيتوب ترلاسه کړ.
د هيواد د کرکټ بورد رييس  عاطف مشعل تير ماښام وويل  : افغانستان د کرکټ د نړيوالې شورا په  کلنۍ غونډه کې ددغې شورا دايمي غړيتوب او هم د تست مچ دريځ ترلاسه کړ.
مشعل څرګنده کړه چې په دې غونډه کې  ايرلند هم ددغې شورا دايمي غړيتوب  و ګاته او له دې وروسته افغانستان او ايرلند په پنځوس اوره او شل اوره لوبو کې او هم  په پنځه ورځني تست مچ کې  ګډون کولاى شي .
مخکې له دې هند ، بنګله ديش ، سريلانکا ، انګلستان ، پاکستان ، ويست انديز ، د کرکټ د نړيوالې شورا دايمي غړيتوب ترلاسه کړى دى .

Page 1 of 5292