22 August 2019

RSS Facebook

سوداگریز


تازه خبرونه

جمهور ريیس غني د احمد وفي امین او عبدالرحمن عطاش کارونه وستایل

جمهور ريیس غني د احمد وفي امین او عبدالرحمن عطاش کارونه وستایل

کابل\ باختر \ د زمري ٣١ مه د افغانستان د اسلامي...

 په روزګان کې د شلو وسله والو طالبانو وژل کېدل

په روزګان کې د شلو وسله والو طالبانو وژل کېدل

کابل / باختر/ د زمري ٣١ مه شل وسله وال طالبان...

Youtube Player

khantry design

سوداگریز

سوداگریز

کابل \باختر\ د زمري ٣١مه
لس وسله وال طالبان په قندهار کې  له پوځيانوسره په نښتو کې ووژل شول.
دغه جګړې  تېره شپه د سپين بولدک  او خاکريز ولسواليو کې هغه وخت ونښتې چې وسله والو طالبانو د پوځيانو د سپرلۍ پر کاروان ډزې وکړې.
په يوبل خبر کې ويل شوي دي، چې په قندهار کې  د يو لړ چاودنومخه ونيول شوه.
امنيتي مامورينو د قندهار په ګڼ مېشتو لارو کې ٩ ماينونه کشف او شنډ کړي دي.
که څه هم د ماين ښخولو په تور څوک نه دي نيول شوي، خو سيمه ييز چارواکي وسله والو طالبان د دغه کار عامل بولي.
  ختم_ عطاالله _ اکرم

 

کابل \باختر\ د زمري ٣١مه
د وسله والو طالبانو يو قوماندان تېره شپه له پنځو ملګرو سره په فراه کې په هوايي بريد کې ووژل شو .
د ملي دفاع وزارت مطبوعاتي دفتر باختراژانس ته خبر ورکړ، چې تېره شپه هوايي ځواکونو د بالابلوک ولسوالۍ په تودنک سيمه کې د وسله والو طالبانو پر موټر بريد کړى.
سرچينه زياتوي چې په بريد کې د وسله والو طالبانو قوماندان حافظ قدرت الله له پنځو ملګرو سره وژل شوى دى.
  ختم_ عطاالله _ اکرم

کابل \باختر\ د زمري ٣١مه
په فارياب کې  ١٧٧ بې ځايه شويو کورنيو  مرستې ترلاسه کړې.
د باختر اژانس د سيمه ييز خبريال د خبرله مخې، دغه  کورنۍ چې د ناامنيو له امله  له نا امنو سيمو څخه ميمنې  ښار ته ګډه شوې دي د نړۍ د خوړو سازمان د دفتر له لوري ورسره د اوړو، غوړيو، بورې، نخودو، بسکويتو، شړۍ، د ښځينه او د ماشومانو د جامو مرسته وشوه.
بې ځايه شوې کورنۍ له حکومت څخه غواړي  چې د دوى د سيمې امنيت تامين کړي څو دوى بېرته  خپلو مېنو ته ستانه شي.
ختم _ عطاالله_ اکرم

- کابل/باختر/ د زمري٣١مه
په نړيوالو بازارونوکې نن يو انس سره زر په ١٥٠٤ډالرو پلورل کېږي.
د پښتنې بانک د سرو زرو د مارکېټ يوه پلورونکي قاهرخان د دغه خبر په تاييدولو سره باختر آژانس ته وويل چې نن د کابل په بازارونوکې يوګرام الجزايري سره زر په ٣٧٠٠ افغانيو يوګرام مصري سره زر په ٣٦٠٠ افغانيو، کويټي په٢٩٥٠ افغانيو، سنګاپوري په٢٩٥٠ افغانيو، بحريني په٢٩٠٠ افغانيو، عربي په٢٩٠٠ افغانيو، ايراني په٢٦٥٠ افغانيو او يو ګرام روسي په ٢١٥٠افغانيو پلورل کېږي.     
پاى/سعيده

کابل \باختر\ د زمري ٣١مه
انسان تښتوونکو يوماشوم په بغلان کې وواژه.
د باختراژانس د سيمه ييز خبريال د خبرله مخې، يو لس کلن ماشوم چې يوه مياشتې مخکې په نهرين ولسوالۍ کې تښتول شوى و پرون يې مړى موندل شوى او کورنۍ ته يې سپارل شوى دى.
لس کلن ياسر د نهرين ولسوالۍ د زاړه ښار د مسجد شريف له کلي ناپېژاندو وسله والو کسانو تښتولى و .
د نهرين ولسوال فضل الدين مرادي باختر اژانس ته وويل، چې انسان تښتوونکو د دغه ماشوم له کورنۍ  څخه شپږ سوه زره افغانۍ غوښتې وې، خو پلار يې د دومره پيسو توان نه درلود، نو ځکه يې لس کلن ياسر په بې رحمانه ډول وواژه.
د ماشوم کورنۍ له حکومت څخه غواړي  چې د پېښې  عاملين  وپېژني او په مجازاتو يې محکوم کړي .
په ورته وخت کې د بغلان پوليس وايي چې د ماشوم د قاتلانو د پېژندنې او نيولو لپاره يې هڅې پيل کړي دي.
  ختم_ عطاالله _ اکرم

کابل \باختر\ د زمري  ٣١مه
پنځه وسله وال طالبان پرون په فراه کې د پوځيانو په ګډو عملياتو کې ووژل شول.
د فراه د امنيې قوماندانۍ وياند محب الله محب د باختراژانس خبريال ته وويل، چې دغه عمليات  د پشت رود ولسوالۍ د شېرانو، زيارت، ګجلين  افغاني او د چين فارسي په سيمو کې  د وسله والو طالبانو د ځپلو په موخه ترسره شوي دي.
سرچينه زياتوي،  چې په عملياتو کې پنځه وسله وال طالبان وژل شوي او شپږ ماينونه هم کشف اوشنډ شوي دي.
د يو بل خبرله مخې، د ملي پوليسو درې سرتېري  پرون د فراه په پشت رود ولسوالۍ کې  د وسله والو طالبانو په غلچکي بريد کې شهيدان شول.
  ختم_ عطاالله _ اکرم

مهتر لام\ باختر \ د زمري ٣١ مه
د خپلواکۍ د سلمې کاليزې په وياړ په لغمان کې د ۲۵۵ ميليونو افغانيو په لګښت د مهترلام حلقوي سرک ( غازي امان الله خان واټ ) ګټې اخيستنې ته وسپارل شو.
د باختر اژانس د سيمه ييز خبريال د خبر له مخې، د ياد سرک د پرانېستې په مراسمو کې د ټرانسپورټ وزارت تخنيکي مرستيال حامد حلیمي وويل چې د مهترلام حلقوي سرک چې له جوړېدو وروسته  ولایتي ادارې د غازي امان الله خان واټ په نوم نومولى دى، ۳ اعشاريه ۵ کليو متره اوږدوالی او ۲۴ متره عرض، لري چې د ۲۵۵ ميليونو افغانېو په لګښت د دوه کلونو په موده کې رغول شوى دى.
هغه زياته کړه، چې د يادې پروژې په بشپړېدو سره په مستقيم ډول د ګڼو کليو کرنې او پيداوارو ته ګټه رسېدلې او په غيرې مستقيم ډول د سيمې دوه سوه زره اوسېدوونکي له ګڼو اسانتياوو څخه برخمن شول.
حليمي د ولسونو څخه غوښتنه وکړه، چې د غازي امان الله خان واټ په ساتلو کې خپل مسووليت په سم ډول ترسره کړي.
په ورته مهال د لغمان والي محمد اصف ننګ د ټرانسپورټ وزارت له تخنيکي مرستيال حامد حلیمي څخه مننه وکړه، چې د مهترلام حلقوي سړک ( غازي امان الله خان واټ) د ګټې اخيستنې په مراسمو کې یې ورسره ګډون وکړ.
هغه زياته کړه: په پلان کې لري، چې په مرکز مهترلام کې د ګڼو نورو سرکونو د جوړېدو ترڅنګ د ۵ کيلو متره سنګ فرش سړکونو د جوړېدو چارې هم ژر پيل شي.
ننګ زياتوي د مرکز مهترلام او پنځه ګونو ولسواليو ترمنځ ټولې لارې وصل شوي او ټول ولسونه پرې تګ راتګ کوي.
هغه د لغمان ولسونو ته زېری ورکړ، چې له مهترلام څخه تر سرخکانو پورې د سرک د جوړېدو چارې به هم ډېر ژر پيل شي.
ننګ وويل، د بادپښ( نجات) ولسوالۍ په سړک باندې هم کار په چټکې سره روان دی او زياته يې کړه، چې په راتلوونکي کې به د سلطان غازي بابا په ښارګوټي کې ټول سرکونه په پاخه او اساسي ډول ورغول شي.
د ولايتي شورا رييس عتيق الله عبدالرحيمزي وويل، د لغمان ټول ولسونه د خپل حکومت سره همکار دي او له ټولو کړنو يې هرکلی کوي.
په همدې حال کې د سیمي یو شمېر اوسیدونکو هم د غازي امان الله خان واټ په جوړېدو خوښي وښوده او له ولایتي ادارې څخه د ورته نورو پروژو د پیل غوښتونکي شول.
پاى\ وصال

کابل\ باختر \ د زمري ٣١ مه
د لوګر د برکي برک ولسوالۍ په بابي سيمه کې د يوه سيمه ييز قوماندان په ګډون درې وسله وال طالبان ووژل شول او شپږ نور يې ونيول شول.
ځايي چارواکي وايي چې تېره شپه افغان کومانډو ځواکونو د لوګر په برکي برک ولسوالۍ کې عمليات ترسره کړي دي.
د لوګر د والي وياند شمشاد لاروي باختر اژانس ته وويل، چې په دغو عملياتو کې د يوه سيمه ييز قوماندان بابو په ګډون د حقاني وسله والې ډلې درې غړي وژل شوي او شپږ نور  نيول شوي دي.
ويل کېږي په عملياتو کې ملکي وګړو او فغان ځواکونو ته زيان نه دى اوښتى.
پاى\ وصال

کابل\ باختر \ د زمري ٣١ مه
د افغانستان د اسلامي جمهوریت جمهور ريیس محمد اشرف غني پرون مازیګر د افغانستان او اسټرالیا د دیپلوماتیکو اړیکو پنځوسمې کالیزې په مراسمو کې ګډون او وینا وکړه.
د جمهور رييس د وياد دفتر باختر اژانس ته خبر ورکړ:
په دې مراسمو کې چې لومړۍ مېرمن او د مشرانو جرګې ريیس هم حضور درلود، لومړی د بهرنیو چارو وزارت سیاسي معین ادریس زمان پخپلو خبرو کې وویل، نن اسټرالیا د افغانستان یو له مهمو او پایداره شریکانو څخه ده او موږ به په بېلابېلو په ځانګړي ډول په افغانستان کې د سولې او ثبات تامین، اقتصادي او سوداګریزو او ولسي اړیکو په برخو کې خپلې همکارۍ پراخې کړو.
وروسته په افغانستان کې د اسټرالیا سفیر جییف تود پخپلو خبرو کې جمهور ريیس او د افغانستان ملت ته د هېواد د خپلواکۍ سلمې کالیزې د مبارکۍ ترڅنګ وویل، نن موږ د دیپلوماتیکو اړیکو پنځوسمه کالیزه نمانځو، خو د دواړو هېوادونو د خلکو ترمنځ د اړیکو مخینه له یوې نیمې پېړۍ اوړي.
هغه وویل، اسټرالیا غواړي د کانونو، کرنې، سوداګرۍ او روغتیا په برخو کې له افغانستان سره نږدې او لا زیاتې همکارۍ ولري.
وروسته د اسټرالیا د پارلمان غړي اندریو والاس چې د یوه پارلماني پلاوي په مشرۍ کابل ته راغلی، د افغانستان او اسټرالیا د اړیکو تاریخي مخینې په اړه پخپلو خبرو کې وویل، تېره اوونۍ د افغانستان او اسټرالیا د دیپلوماتیکو اړیکو د پنځوسمې کالیزې په مناسبت د اسټرالیا په یوه ښار کې د عکسونو نندارتون جوړ شوی و.
هغه د غوڅ ملاتړ ماموریت په چوکاټ کې په افغانستان کې د خپل هېواد د سرتېرو یادونه وکړه او ويې ویل، اسټرالیا په تېرو ۱۸ کلونو کې له افغانستان سره ۱.۴ میلیارده  ډالر مرسته کړې او هیله لرم دغه هېواد تلپاتې سولې او ثبات ته ورسېږي.   
وروسته جمهور ريیس غني پخپلو خبرو کې د افغانستان او اسټرالیا د دیپلوماتیکو اړیکو د پنځوسمې کالیزې د مبارکۍ ترڅنګ وویل، د بودجې، پوهنې، روغتیا، ټکنالوژۍ او په ځانګړي ډول بشري پانګې په برخو کې له افغانستان سره د اسټرالیا مرستې مهمې وې.
جمهور ريیس وویل، د اندریو والاس په مشرۍ د اسټرالیا د پارلماني پلاوي سفر د دواړو هېوادونو ترمنځ د اړیکو نږدې والى ښیي.
د هېواد جمهور ريیس همداراز د غوڅ ملاتړ ماموریت په چوکاټ کې په افغانستان کې د اسټرالیایي ځواکونو له خدمت مننه وکړه او د هغو ۳۴ اسټرالیایانو د کورنیو ستاینه یې وکړه چې له ترورېزم سره په ګډه مبارزه کې قرباني شوي دي.
پاى\ذ

متون\باختر\ د زمري ٣١ مه
په پاکستان کې د افغانستان لوی سفیر شکر الله عاطف مشعل د یوه پلاوي په ملتیا پرون د اسلام اباد څخه د غلام خان بندر ته سفر و کړ، ترڅو د یاد بندر د ټرانزیټ، د خلکو د تګ راتګ او سوداګرۍ د پیاوړتیا په برخه کې لا پرمختګونه رامنځ ته شي.
مشعل وايي د جلالتماب جمهور رييس په لارښوونه له ياد بندر څخه کتنه کوي، تر څو څنګه کولای شي، د غلام خان بندر د ټرانزیټ، د خلکو د تګ راتګ او د سوداګرۍ لپاره چمتو شي.
په همدې حال کې د خوست والي محمد حلیم فدايي وویل چې د غلام خان بندر یو له مهمو او اساسي پروژو څخه دی، چې افغانستان پر څلور لارې د بدلولو لپاره مهم قدم ګڼل کېږي.
غلام خان بندر په ۲۰۱۴م کال کې په شمالي وزیرستان کې د پوځي عملیاتو پر مهال تړل شوی و، په ۲۰۱۸ م کال کې بيا ځل د محدودې سوداګرۍ لپاره پرانیستل شو، خو اوس د هر ډول کاروبار لپاره پرانيستل شوى دى.
د یادونې وړ ده، چې د زمري په ۲۸ مه هم ۵۰۰ ټنه وچه او تازه مېوه د غلام خان بندر له لارې له افغانستان څخه پاکستان هېواد ته صادره شوه.
پاى\وصال

 

Page 2 of 7979