20 June 2019

RSS Facebook

سوداگریز


تازه خبرونه

په بلخ کې څه د پاسه ٢٥٠٠ تنو د انتخاباتو لپاره نومونه ثبت کړي دي

په بلخ کې څه د پاسه ٢٥٠٠ تنو د انتخاباتو لپاره نومونه ثبت کړي دي

کابل/باختر/دغبرګولي٣٠مه د بلخ د انتخاباتو د خپلواک کمېسيون مسوولين وايي...

په غزني کې د يوې چاودنې مخه ونيول شوه

په غزني کې د يوې چاودنې مخه ونيول شوه

- کابل/باختر/دغبرګولي٣٠مه د غزني د ملي امنيت رياست منسوبینو تېره شپه...

لويه څارنوالي د برېښنا پوروړي تر عدلي تعقيب لاندې نيسي

لويه څارنوالي د برېښنا پوروړي تر عدلي تعقيب لاندې نيسي

کابل/باختر/دغبرګولي٣٠مه د افغانستان برېښنا شرکت او لویې څارنوالۍ ترمنځ د...

Youtube Player

khantry design

سوداگریز

سوداگریز

 کابل/باختر د غبرګولي ۳۰ مه
د مور نړيواله ورځ پرون په لوګرکې ونمانځل شوه.
د باختر آژانس خبريال د خبرله مخې: په غونډه کې د لوګر والي محمد انور اسحاق زي د مور د مقام په باره کې خبرې وکړې او زموږ په ټولنه کې یې د مور مقام ستر وباله.
په غونډه کې د لوګر د ښځو چارو رييسې شيما زرګر او بلقيس سادات په همدې مناسبت د هېواد د لومړۍ مېرمنې او ښځو چارو د وزيرې پيغامونه ولوستل.
په غونډه کې د لوګر يوشمېر دولتي مسوولينو او مخکښو ميندو ګډون کړى و.
پاى \ذ\

ـ کابل/باختر د غبرګولي ۳۰ مه
امنيتي مامورینو په لغمان کې هغه سړى ونیو چې د څو مرګانيو ډار اچوونکو بريدونو پلان جوړوونکی و.
ملا عبدالصمد د لغمان د مرکز مهترلام ښار په بابا کمپ کې په ځانګړو عملياتوکې ونيول شو.
د لغمان يوې امنيتي سرچينې باختر آژانس ته وويل چې ملاعبدالصمد په لغمان کې د څو مرګانيو ډار اچوونکو بريدونو په پلان جوړولو تورن دى.
هغه د امنيتي مامورینو په لومړنيو څېړنوګې د طالبانو په ډله کې په غړيتوب او دلغمان په څو سيموکې د مرګانيو بريدونو په پلان جوړولو اعتراف کړى دى.
پاى \ذ

ـ کابل/باختر د غبرګولي ۳۰ مه
د ننګرهار په مرکز جلال آباد ښار کې د بم د چاودنې له امله يو تن ووژل شو او  ١٤تنه نور ټپيان شول.
بم د طالبانو او داعشيانو په وړاندې د وګړني پاڅونونو د قوماندان ملک دهقان د سپرلۍ  په موټرکې ځاى پرځاى کړاى شوی و او په جلال آباد ښارکې وچاوديد.
د ننګرهار د والي وياند عطاالله خوږياڼي باختر آژانس ته وويل چې په دې چاودنه کې يو ملکي وګړى ووژل شو او ١٤تنه نوريې ټپيان شول.
ملک دهقان هم د پېښې په ټپيانوکې شامل دى.
په همدې حال کې په جلال آباد ښارکې د ننګرهار په مرکزي روغتون کې ډاکترانو د شپږو ټيپانو روغتيايي حالت خراب وباله.
ملک دهقان د ننګرهار د نازيانو ولسوالۍ د وګړني پاڅونونو قوماندان دى، هغه سړى چې په لسګونو ځوانان يې د ډار اچوونکو په وړاندې يو موټي کړل او د دې سبب شو  چې په نازيانو کې طالبان او داعشيان له ماتې سره مخامخ شي.
پاى \ ذ

 کابل/باختر د غبرګولي ۳۰ مه
د ترانسپورتي عوايدو د راټولولو په موخه د کابل د شمال او لويديځ په ترانسپورتي ترمينل کې د افغان ملي بانک لومړنۍ نمايندګي پرانستل شوه.
د باختر آژانس د خبرله مخې: د ترانسپورت وزارت دغه اقدام په روڼتيا سره د ترانسپورتي عوايدو په راټولولوکې د برېښنايي سيستمونو د رامنځته کولو لپاره لومړنى بنسټ وباله.
د دغې نمايندګۍ د پرانيستلو په مراسموکې د ترانسپورت وزير يما ياري، په روڼتيا سره د ترانسپورتي عوايدو د راټولولو د برېښنايي سيستمونو د عملي کولو په باب د اړوندو ادارو پر همغږۍ او همکارۍ باندې ټينګار وکړ.
په همدې حال کې د افغان ملي بانک لوى رييس عبدالعزيز بابکرخېل د هېواد د مرکز او ولايتونو په بندرونوکې د افغان ملي بانک د نمايندګيو له لارې د ترانسپورتې عوايدو د راټولولو بهير د عملي کولو په برخه کې د دغه بنسټ هر اړخيزه همکاري څرګنده کړه.
دغه بهير لومړى د ځمکني ترانسپورت د لوى رياست له مرکز څخه پيل شوى او وروسته د هېواد په ولايتونوکې ټولو ترانسپورتي بندرونو ته پراختيا ورکول کېږي.
پاى \ذ

 کابل/باختر د غبرګولي ۳۰ مه
دوه تنه په خوست کې د جنګي وسايلو د قاچاقو په تور ونيول شول.
امنيتي مامورینو دغه دوه تنه نن د قلندر ولسوالۍ په مربوطاتوکې ونيول.
د خوست پوليسو يوه مقام باختر آژانس ته وويل چې نيول شويو کسانو د کلاشينکوف  ١٢٤٠ ګولۍ او د توغندي ويشتونکي څو ماينونه نامعلوم ځاى ته قاچاق کول.
تر اوسه پورې روښانه شوې نه ده چې دغه کسان د جنګي وسايلو پلورنکي وو او يا يې له ډار اچوونکو ډلو سره اړيکې لرلې؟
د خوست پوليس وايي چې له نيول شويو کسانو څخه څيړنې دوام لري.
پاى \ ذ

ـ کابل/باختر د غبرګولي ۳۰ مه
د اسټرالیا د کرکټ ملي ټیم نن د کرکټ په ۵۰ آوریز نړیوال جام سیالیوکې د بنګه دېش له ملي ټیم سره لوبه کوي.
د باختر آژانس د خبرله مخې: دغه لوبه د افغانستان په وخت له غرمې وروسته په دووبجو پیلېږي.
د اسټرالیا ملي ټیم د دغوسیالیو په ډلبندۍ کې د جدول په درېیم او د بنګله دېش ملي ټیم په پنځم مقام دي.
ختم/ع

ـ کابل/باختر د غبرګولي ۳۰ مه
د پکتیا په احمدآباد ولسوالۍ کې د څه دپاسه څلورو میلیونو افغانیو په لګښت د لنډي سربند چارې بشپړې او ګټې اخيستنې ته وسپارل شو.
چارواکي وايي چې دغه سربند ۲۱ متره اوږدوالی، ۱۲ متره پلنوالی او ۳ متره ژوروالی لري چې په رغول کېدو سره یې سلګونه جریبه ځمکې د سیلاوونو له ګواښ څخه وژغورل شوې.
د پکتیا د والي مرستیال عبدالولي سهي د باختر آژانس سیمه يیز خبریال ته وویل چې د دغه ولایت په ځینو نورو سيموکې هم د ورته سربندونو عملي چارې روانې دي چې يو په بل پسې به ګټې اخيستنې ته وسپارل شي او د بزګرانو زیاتې ستونزې به ورسره لرې شي.
پای/وصال

ـ کابل/باختر/ د غبرګولي ۳۰ مه
د زابل په مرکز پورې اړوند کاکړانوکې د پولیسو او وسله والو طالبانو ترمنځ نښتې له امله دواړو لورو ته مرګ ژوبله واوښته.
چارواکي وايي چې په نښته کې ۹ وسله وال طالبان وژل شوي او زیات شمېر نور یې ټپيان شوي دي چې کره شمېره یې نه ده معلومه.
د زابل د والي ویاند ګل اسلام سیال د باختر آژانس سیمه ييز خبریال ته وویل چې د تېرې شپې په نښته کې درې سرتېري هم شهیدان شوي او دوه نوريې ټپیان شوي دي چې روغتیايي وضعیت یې د ډاډ وړ دی.
پای/وصال

 کابل \ باختر\ د غبرګولي ۳۰ مه
مرکزي بانک ۳۰ ميليونه ډالره د ليلام په ډول پلوري.
د دغه بانک په ليک کې چې باختر آژانس ته لېږل شوى دى؛ ويل شوي دي:   د افغانستان بانک د روان کال د چنګاښ په لومړۍ د شنبې په ورځ ٣٠ ميليونه ډالره د ليلام په ډول پلوري.
په شرايطو برابرهغوصرافانواوتجارتي بانکونوته چې پخوا يې يو ميليون او ٥٠٠ زره افغانۍ د تضمين په ډول دافغانستان بانک د بازار د عملياتو په لوى مديريت کې تحويل کړې دي؛ بلنه ورکول کيږي چې په دغو داوطلبيوکې ګډون وکړي او د داوطلبۍ ګټونکي مکلفيت لري چې خپل حسابونه د ورځې تر پايه پورې تصفيه کړي.
هغه صرافان چې تر اوسه پورې يو ميليونو پنځه سوه زره افغانۍ په داوطلبۍ کې د ګډون په مقصد د تضمین په ډول نه دي تحويل کړي؛ کولاى شي له داوطلبي څخه يوه ورځ مخکې دخپل تضمين پيسې تحويلې اوپه راتلونکو داوطلبیو کې دې ګډون وکړي.
د يادونې وړ ده چې د معاملــو قسمي تر سره کول مجاز نه  دى، د ليلام ګټونکي دې د خپل ذمت پيسې ټولې يوځاى نغدې او یا هم په حوالــــې سره په ټاکلې موده کې په بانک کې تحويلې کړي.
يادونه: مزايده کوونکي نه شي کولاى له ټولو اعلام شويو پيسو څخه په سلوکې له درېيو زياتې پيسې وغواړي.
پاى \سعيده

۱۲- کابل/ باختر/دغبرګولي ۳۰مه
په نړيوالو بازارونوکې نن يو انس سره زرپه ١٣۸۰ډالرو پلورل کېږي.
د پښتنې بانک د سرو زرو د مارکيټ يوه پلورونکي قاهرخان نن د دغه خبرپه تاييدولو سره باختر آژانس ته وويل چې نن د کابل په بازارونوکې يو ګرام الجزايري سره په زر٣۵۵۰ افغانیو، يو ګرام مصري سره زر په٣۴۵۰ افغانيو، کويټي په٢۸٠٠ افغانيو، سنګاپوري په٢۸٠٠ افغانيو،  بحريني په٢۸۰٠ افغانيو، عربي په٢۸٠٠ افغانيو، ايراني په٢۵٠٠ افغانيو او يو ګرام روسي په ۲۰۰۰ افغانيو پلورل کېږي.     
پاى / سعيده

 

Page 2 of 7784