26 March 2017

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل \ باختر د وري  دمياشتې  ٦ :
په پنجشيرولايت  کې  دتيرکال په پرتله په دولتي ادارو کې  دښځو شتون زيات شوى دى.
د پنجشير د والي مرستيال محمدامين صديقي باخترآژانس ته وويل :  يوازې په  ١٣٩٥ کال کې څه ناڅه  سل تنه نجونې د آزادو سياليو له لارې ددغه ولايت دولتي ادارو ته لاره  موندلې ده.
دده دڅرګندونوله مخې :  په هرراز شرايطو کې  دولتي ادارو  ته دښځو دلارې موندنې په باب لومړيتوب ورکړ شوى دى.
صديقي زياته کړه : د دغه ولايت په دولتي ادارو کې د  ښځو داستخدام لپاره هيڅ راز خنډ  نشته .

Sunday, 26 March 2017 12:06

د اسعارو بيه

کابل\باختر\ دوريد مياشتې٦
د کابل د شهزاده سراى د صرافانو د رييس د معلوماتو له مخې، نن له غرمې مخکې د بهرنيو پيسو په مقابل کې د افغانۍ ارزښت په دې ډول دى:
يوامريکايي ډالر پيرودل په 75/67  افغانۍ
يوانګليسي پونډ پيرودل په 84/00افغانۍ
يوه يورو پيرودل په 72/90 افغانۍ 
يو سعودي ريال پيرودل په  18/00افغانۍ
د اماراتو يو درهم پيرودل په 18/45 افغانۍ
زرپاکستانۍ کلدارې پيرودل په 630 افغانۍ
زر هندۍ کلدارې پيرودل په 1010 افغانۍ
زر ايراني تومان پيرودل په 17/55 افغانۍ
يو روسي روبل پيرودل په 1\24 افغانۍ        

کابل – باختر د وري دمياشتې ٦
دوسله والو طالبانو له خوا پرون په فراه ولايت کې ديوهاوان دلګيدو له امله دوه تنه ملکي وګړي شهيدان شول او يو تن ټپي شو.
دفراه ولايت دامنيې قوماندانۍ وياند اقبال باهر دباختر آژانس خبريال ته وويل دوه تنه ملکي وګړي دفراه ولايت په بالابلوک ولسوالۍ کې دوسله والو طالبانو له خوا دهاوان دلګيدو له امله شهيدان او يو تن بل ټپي شو.
ده څرګنده کړه ټپي شوى سړى روغتون ته ليږدول شوى خو ډاکترانو د ده روغتيايي حالت خراب بللى دى.

Saturday, 25 March 2017 04:33

ايزديار روسيې ته لاړ .

کابل باختر د وري پنځمه :
دمشرانو جرګې لومړى نايب محمد علم ايزديار نن  ديو هيئت په مشرى  له نړيوال تروريزم سره دمبارزې په باب  په  پارلماني کنفرانس کې  دګډون په مقصد فدراتيفې روسيې ته  روان شو .
  دمشرانوجرګې  مطبوعاتي دفتر باختراژانس ته  خبر ورکړ  محمد علم ايزديار او ملګري هيئت يې په دې کنفرانس کې  دټولګټو خپلواکو هېوادونو  دبين الپارلماني اتحاديې  دټولنې او داروپا  دهمکاري او امنيت  دسازمان له خوا  دروان کال  دوري دمياشتې له پنځمې نيټې څخه تر اتمې نيټې پورې  د روسيې  په سنت پيترسبورک کې جوړشي  ګډون کوي .
   دمشرانو جرګې لومړي نايب  په دغه کنفرانس کې  دوينا په کولو برسيره  له روسي مقاماتو او له برخه والو هيئتونو له رييسانوسره هم  کتنه وکړي او دعلاقې وړ  موضوعګانو په باب به  خبرې اترې وکړي .
  ددغه هيئت په ترکيب کې  صالح محمد لالاګل او رحمت الله  اڅکزى  شامل دي .

کابل باختر د وري پنځمه :
دمشرانو جرګې  دويم نايب  ډاکتر محمد اصف صديقي نن  په يوه غونډه کې دافغانستان دښوونکو داتحاديې  شکايتونه واوريدل .
دمشرانوجرګې  مطبوعاتي دفتر باختراژانس ته وويل  په دې غونډه کې چې  په ملي شورا کې  دخلکو يوشمير استازي او د منشي نايب  ډاکتر فيصل سامع هم حاضر و  يو تن  دنورو په استازيتوب خبرې وکړې  او ويې ويل له دې امله چې  جمهور رييس دبست له په پام کې نيولو پرته دهېواد  دښوونکو دترفيع په باب دملکي خدمتونو دکارکوونکو  دقانون  په ځينو موادو کې رامنځته شوي تعديلونه  توشيح کړل  خو له مياشتو مياشتو راپديخوا  دماليې او پوهنې وزارتونه  او داداري اصلاحاتو او دملکي خدمتونو خپلواک کميسيون  ددغه قانون دتطبيق په باب  دطرز العمل په جوړولو  نه دى بريالى شوى . 
دمشرانو جرګې دويم نايب  دهېواد ښوونکي دهر راز  امتياز  مستحق وبلل او موضوع يې  دڅيړنې په مقصد  دشکايتونو داوريدو ، ديني ، فرهنګي او دپوهنې  دچارو کميسيونونو ته راجع کړل .

کابل باختر د وري پنځمه
د حاجي محمد حنيف حنفي په مشرۍ د شکايتونو د اورېدو د کمېسيون په غونډه کې پايوازانو سره د څرخي پله زندان د ساتونکو د ناسم چلند، په نشه يي توکو د روږدو کسانو د زياتوالي، د زيات عمر لرونکو او ناروغو زندانيانو شتون،د څرخي پله جېل درياست له خوا د بي برخليکه زندانيانو د نوملړ د نه لېږد او ځينو نورو مسايلو په اړه د زندانيانو د لوی رياست له محاکمو سره د اړيکو له رئيس او د ياد رياست د ساتنې قطعې له قوماندان سره مطرح شول.
دمشرانو مطبوعاتي دفترباخترآژانس ته خبرورکړ.
په پيل کې يادو مسئوولينو له پايوازانو او په ځانګړې توګه شکايت کوونکې شخص سره د ناسم چلند څخه بخښنه وغوښته، ډاډ يې ورکړ چې خپلو منسوبينو ته به لازمې لارښوونې وکړي تر څو د دا ډول چلند له تکرار څخه مخنيوي وشي او هم کمېسيون ټينګار وکړ چې بايد د جيلونو منسوبين نيک چلند خپل کړي او هم به په نږدي راتلونکې کې د بي برخليکه زندانيانو او ناعلاجه ناروغانو ليست د کمېسيون په واک کې ورکړل شي. دغه راز د کابل ولايت د شکردرې ولسوالۍ د کوچکين کلي د ملک په ټاکلو کې د اختلافونو په اړه د ياد کلي د يو شمېر اوسېدونکو غوښتنې د کابل ولايت والي، د ولايتي شورا يو شمېر غړو او د شکردرې ولسوال سره تر بحث لاندي ونیول شوې، کمېسيون د دواړو لورو د څرګندونو په اورېدو سره پريکړه وکړه چې د يادې سيمې د اوسېدونکو د يووالي ساتلو په موخه دې تر دوو اونيو پورې د قومي مشرانو په حضور دغه مسله حل او فصل شي. همدا راز د پوليسو اکاډمۍ د يوويشت تنو افسرانو د منفکۍ په اړه شکايت واوريدل شو او وپتييل شوه چې د کورنيو چارو وزارت اداري معين او د پوليسو اکاډمۍ قوماندان دې د کمېسيون په يوې غونډه کې څرګندونې وکړي. همدا راز تحصيلي بورسيې ته د اوو تنو د لېږد په اړه د اداري اصولو خلاف اقداماتو څخه د تراسپورت او هوايي چلند وزارت د ريسانو څخه د يو تن شکايت واوريدل شول او وپتييل شوه چې د ترانسپورت وزير او د ياد وزارت د داخلي تفتيش رئيس دې د کمېسيون په يوې غونډه کې د سناتورانو پوښتنو ته ځوابونه وړاندې کړي.
همدا راز په غونډه کې د دارالامان ماڼۍ په مخکې د بې حده موټرو د ګڼې ګوڼې څخه شکايت چې د ملي شورا پر وړاندې يې ګواښ متوجه کړي او د جعلي پليټونو څخه راغلي شکايتونه او ځينې نور مسايل واوريدل شول او وپتييل شوه چې د ترافيکو عمومي رئيس، د ترانسپورت وزارت عمومي رييس دې د کابل ولايت د ترانسپورت رئيس، د ترافيکو مدير، د ګارنيزون لومړي مرستيال او د کابل ښاروالۍ معين سره يو ځاى په راتلونکې غونډه کې ګډون وکړي. په پاى کې د جنايي جرمونو او په ځانګړې توګه تښتونو، وسله والو غلاو، کابل ښار کې د غير مسئولو وسله والو د تګ راتګ او ځينو نورو مسايلو د زياتوالي څخه راغلي شکايتونه مطرح او وپتييل شوه چې د کابل د امنيه قوماندان دې د يولسمې او اوولسمې حوزې له امرينو سره يو ځاى په راتلونکې غونډې کي ګډون وکړي.
د الحاج لطف الله بابا په مشرۍ د مواصلاتو او مخابراتو د کمېسيون په غونډه کې د مخابراتو وزارت مالي معين او د اترا ادارې رئيس د مخابراتي لس سلنه محصول د راټولولو، د کريډټ کارتونو د لګښت د لوړوالي، د نه راجستر شويو سيمکارتونو د شتون، د مخابراتي ٢٧٠ ستنو د داوطلبۍ کار د ورسته پاتې کېدو چې ټاکل شوې وه تېر کال ګټې اخيستنې ته وسپارل شي، د پکتيا ولايت د جاني خېلو ولسوالۍ کې د مخابراتي ستنې د نه شتون او ځينو نورو مواردو په برخه کې څرګندونې وکړي، ويې ويل چې شاوخوا پنځه اعشاريه اته ميليارده افغانۍ دمخابراتي لس سلنه تر اوسه راټولي شوي او ټاکل شوې د ياد وزارت له خوا نوې کمپيوټري سيستم چې د مخابراتي شرکتونو سيستم سره وصل وي، رامنځته شي ترڅو ددې عوایدو روڼوالي ډاډمن شي.
په غونډه کي یادومسئولانو زياته کړه چې په مخابراتي شرکتونو ټينګار شوي چې د اړيکو په بيه کې شل سلنه کمښت راوړي او د مخابراتو وزارت هڅه او زيار باسي چي د غوره خدمتونو زميني برابري کړي تر څو مخابراتي شرکتونه وکولاي شي بيې راټيټي کړي،همدارنګه دوي وویل چې د بريښنايي پيژندپاڼو د وېش بهير له پيل سره به د نه راجستر شويو سيم کارتونو ستونزوه حل شي، مسئولينو د مخابراتي ټاورونو د داوطلبۍ د کار د ځنډېدو علت تدارکاتي ستونزې وبللې، ډاډ يې ورکړ چې تر څلورو راتلونکو اونيو به دغه ستونزه حل شي او زياته يې کړه چې د افغان تيلي کام مخابراتي شرکت د هېواد په کچه شاوخوا ٨٧٠ مخابراتی ستنې لري اوډاډ يې ورکړ چې په روان کال کې به په جاني خېلو ولسوالۍ کې دوه مخابراتي ستنې نصب کړي.
کمیسیون ددوی څرګندوني دقناعت وبللي او تاکید يی وکړچې ياد مسئولين دي د خپلو کاري اجرااتو رپوټ په رسمي توګه کمېسيون ته راوليږي.
د قاري مير حاتم تره خېل په مشرۍ د ولايتي شوراګان، مصئونيت او امتيازونو د کمېسيون په غونډه کې د ملکي هوايي چلند اسلامي شورا اساسنامه او د مصئونيتونو او امتيازونو په برخه کې د اسلامي همکاريو سازمان موافقتنامه ولوستل شوه او د کمېسيون د غړو له خوا تاييد شوه.
د غونډې په بله برخه کې د لغمان ولايت د پوهنتون د وضعيت د ښه والي په اړه د ياد ولايت د پوهنتون د يو شمېر استادانو غوښتنې او وړانديزونه واوريدل شول او د اجرااتو په موخه اړوندو ادارو ته واستول شول.
د غه راز د ننګرهار، کنړ او نورستان ولايتونو سره د مرستې او ژمنو په موخه د سويډن هېواد سفير سره د يادو ولايتونو د ولايتي شوراګانو د ريسانو د کتنې په اړوند د ننګرهار ولايت د ولايتي شورا د راستول شوي رپوټ په اړه بحث وشو او د دا ډول کتنو دوام د هېوادوالو په ګټه وبلل شو، په پاي کې د انګلستان پارلمان مقر سره نږدي تروريستي بريد په کلکو ټکو وغندل شو.
د کمېسيون د مرستيال سيد صفي الله هاشمي په مشرۍ د نړيوالو چارو د کمېسيون په غونډه کې د نوي لمريز کال د رارسېدو له امله ټولو هېوادوالو ته مبارکي وويل شوه او هيله څرګنده شوه چې د افغانستان خلک په نوي کال کې د هېواد د پرمختګ او ترقۍ شاهد و اوسي او هم دي مخالفين د تاوتريخوالي لاس واخلي او د سولې بهير سره دي يو ځاي شي تر څو خلک نور د جګړې او ناامنيو شاهدان ونه اوسي.
د غونډې په بله برخه کې د افغانستان د امنيتي وضعيت د څېړنې په اړه د کنفرانس د جوړېدو د څرنګوالي په اړه چې ټاکل شوې په نږدې راتلونکې کې د مسکو په کوربه توب او د دولسو هېوادونو په ګډون کې جوړ شي، بحث او خبرې اترې وشوې، غوښتنه وشوه تر څو د دي کنفرانس ګډونوال په خپلې ناسته کې د افغانستان د جګړې مسئله د بېلا بېلو اړخونو سره تر څېړنې لاندي ونيسي اود تروريزم پر ملاتړو هېوادونو لازم فشارونه وارد کړي،همدا راز د امريکا متحده ايالاتو د استازي د ګډون او د هغو آوازو په اړه چې د طالبانو ځينې مشران هم په يادې ناسته کې ګدون کوي، خوښي څرګنده شوه او په پاي کې د انګلستان شاهي هېواد د پارلمان مقر ته څیرمه تروريستي بريد غندنه وشوه.
د ډاکټر محمدآجان منګل په مشرۍ د قومونو، قبايلو، سرحدونو او کوچيانو د چارو د کمېسيون په غونډه کې د اسلامي همکاريو سازمان له پاره د مصئونيت او امتيازونو په برخه کې د موافقتنامې په اړه چې د يوې مقدمې، اتو فصلونو او شپږدېرو مادو کي تربحث لاندي ونیول شوه او د رايو په اکثريت تائيد شوه. د غونډې په بله برخه کې د هلمند ولايت کډوالو ته د مرستو د وېش په اړه د ياد ولايت د کډوالو د ستونزو په اړه بحث وشواوپريکړه وشوه چې د روان کال د وري د مياشتې په څوارلسمه نېټه دي د هلمند ولايت کډوالو سره د مرستو د وېش، د ١٣٩٥ کال د کړنو او د ١٣٩٦ کال د پلانونو په تړاو د ياد ولايت د طبيعي پېښو رئيس او د کډوالو چارو رئيس دي د کمېسيون غړو ته معلومات وړاندي کړي.
د کمېسيون د مرستيالي طيبې زاهدي په مشرۍ د شهيدانو او معلولينو چارو، عامه هوساينې او چاپيريال ساتنې د کمېسيون په غونډه کې د ملکي هوايي چلند اسلامي شورا اساسنامه او د مصئونيتونو او امتيازونو په برخه کې د اسلامي همکاريو سازمان موافقتنامه ولوستل شوه او د لا زياتو بحثونو په موخه راتلونکې غونډې ته وځنډول شوه. د غونډې په بله برخه کې د کوهدامن معلولينو او معيوبينو اتحاديې د ستونزو په اړه خبرې او پريکړه وشوه تر څو راتلونکو غونډو کې يادو ستونزو ته د رسيدګۍ په برخه کې د يادې اتحاديې د استازي په حضور خبرې وشي. په پاي کې د موټرو کرايې د نه ورکړې په اړه د نه ليدونکو د مسلکي ليسې د يو شمېر کارکوونکو د شکايتونو په اړه خبرې او د راتلونکو اجرااتو په موخه اړوندو ادارو ته واستول شول.
د مولوي غلام محۍ الدين منصف په مشرۍ د تقنيني، عدلي او قضايي چارو د کمېسيون په غونډه کې د ملکي هوايي چلند اسلامي شورا اساسنامه او د مصئونيتونو او امتيازونو په برخه کې د اسلامي همکاريو سازمان موافقتنامه ولوستل شوه او د کمېسيون د غړو له خوا تاييد شوه. همدا راز په غونډه کې راغلو عريضو ته هم رسيدګي وشوه.
د حاجي صالح محمد لالا ګل په مشرۍ د ملي اقتصاد، مالي او بودجې د کمېسيون په غونډه کې د کمېسيون د کاري پروګرام سره سم د اقتصاد وزارت د راستول شوي بودجوي واحدونو د پراختيايي پروژو د پلي کېدو تفصيلي رپوټ او ١٣٩٥ مال کال کې د طبيعي سرچينو او بنسټونو سکتور رپوټ مطالعه شول، چې په رپوټ کې يادونه شوې چې د ٢٠٤ پروژو له جملې څخه څلور څلويښت د بېلا بېلو دلايلو پر بنسټ ځنډيدلي او درې پنځوس پروژې تر اوسه نه دي پيل شوي چې کمېسيون وپتييله چې د بودجوي واحدونو مسئولان دي د کمېسيون په راتلونکو غونډو کې د خپلو ځنډول شويو پروژو د څرنګوالي په اړه څرګندوني وکړي او هم وپتييل شوه چې د بنسټونو سکتور اړوند ټولې انتقالي پراختيايي پروژې چې تر څېړنې لاندي نيول شوي دي، د دوي د عملي کېدو په موخه دي اړوندو مسئولانو سره بحث وشي.

کابل باختر د وري پنځمه :
دبهرنيو چارو وزارت سرپرست  ډاکتر نصير احمد انديشه  نن دترکيې  دمهاجرت ادارې دلوى رييس  اتيلا توروز په مشرۍ  ددغه هېواد له لوړ رتبه هيئت سره  چې دکابل په سفر بوخت دى  په داسې حال کې چې په کابل کې دترکيې سفير  علي سيد اکين  هم حاضر و  ، وکتل .
  دبهرنيو چارو وزارت مطبوعاتي دفتر باختراژانس ته خبر ورکړ ،  په دې کتنه کې لومړى  دبهرنيو چارو وزارت معين  دترکيې جمهوريت داړيکو او لرغونو اوتاريخي ، دوستانه او دورور ولي  اړيکو اوهمکاريو، له افغانستان سره دترکيې جمهوريت د سل کلنې  ملاتړ په تيره بيا  په تيرو شپاړلسو کلونو کې په افغانستان کې دترکيې  دمرستو  او قربانيو له امله قدرداني وکړه.
دبهرنيو چارو وزارت معين  زياته کړه  چې افغانان تل  ترکيه  خپل دويم کور او ترکان  خپل نږدې  او صميمي  ورونه بللي دي . 
وروسته توروز وويل  چې ترکان هم  افغانستان  خپل دويم کور بولي .  او افغانان دترکانو په زړونوکې ځانګړى ځاى لري .
  ددغې کتنې په بهير کې  دواړو لورو  ترکيې ته دافغانانو دغير قانوني مهاجرت  دمخنيوي او په دغه هېواد کې افغانانو ته د تګ راتګ او استوګنې ، زده کړې او سوداګرۍ  دزمينو په برابرولو سره ، دغير قانوني سوداګرۍ او دانسان دقاچاقو په مخنيوي سره  په ترکيه کې  دمهاجرت په برخه کې دزياتو اسانتياو دپروګرامونو ، مقرراتو او پاليسيو او ددغه هېواد دمهاجرت  دنوي  جوړې شوې ادارې دمسووليتونو اوصلاحيتونو ، دمهاجرينو د الکترونيکي ثبت او راجستر  دبهير ، دبايميتريک  او دديتابس دپړاونو او افغانانو ته دترکي  استوګنې  دصادرولو، سياسي قضيو دڅيړنې  ، دمهاجرينو دکورنيو د يو ځاى کولو د ردو شويو اتباعو او مجرمينو ايستل او دتروريستي ډلو په تيره بيا دداعش له ډلې سره دمبارزې په باب  هراړخيزې خبرې وکړې .
دکتنې په پاى کې  دبهرنيو چارو وزارت سرپرست  په ترکيه کې   له افغان مهاجرينو سره  دترکيې جمهوريت دمقاماتو د ښه چلند او هلوځلو له امله  دقدرداني تر څنګ  ژمنه وکړه چې  ددغه هېواد دنويو ګټورو پلانونو اوپاليسيو  له په پام کې نيولو سره چې په ترکيه کې دافغان مهاجرينو دچارو دتنظيم او ښه څيړنې  دښه مديريت په لاره کې  مرسته کوي په ګډه ددواړو هېوادونو داړوندو سکتوري  وزارتونو او ادارو سره هراړخيزې همکاري ترسره کړي .

کابل باختر د وري پنځمه :
دمصر  دالازهر پوهنتون  دشهيد سردار محمد داود خان په روغتون دتروريستي بريد په غندنې سره  طرحه کړې ده .
ټول ځواکونه د جنايتکارانو دله منځه وړلو لپاره  يو موټي شي .
  دباختراژانس دخبرله مخې دمصر  دالازهر ټولنې  دافغانستان دخلکو په نامه د ډاډ ګيرنې پيغام  په ليږلو سره  ددغه غير انساني جنايت  په اړوند ويلي دي  دغه ډارن عمل ښيي چې دهغه  عاملين  دانسانيت ،  عطوفت او رحمت  هيڅ کومه درجه نه لري .  او ټول ځواکونه  ددغو جنايتکارانو دله منځه وړلو لپاره بايد  متحد شي .

Saturday, 25 March 2017 04:30

دبزګر ورځ ونمانځل شوه .

کابل باختر د وري پنځمه :
دبزګر ورځ نن  په ميدان وردګو ولايت کې د نيالګيو دايښودلو دپروګرام  په پيل سره  ونمانځل شوه .
  دميدان وردګو والي  باختراژانس ته وويل  ټاکل شوې ده ددغه ولايت په مرکز  او ولسواليو کې  څه دپاسه  يوسلو شپيته زره نيالګي  کيښودل شي . چې  دايښودل شويو نيالګيو دساتنې لپاره  دمدني ټولنې په همکارۍ يو کميسيون  موظف شوى دى  چې دنيالګيو دخړوبولو او دساتنې بهير  وڅاري .
  ويل کيږي دنيالګيو دايښودلو بهير  دمدني ټولنې  دميدان وردګو  دهمغږي دمرکز ، دکوچيانو دشورا دژوندانه دچاپيريال ساتنې دادارې  او دميدان ښار  دښاروالۍ  او دکرنې دادارې  داستازو په ګډون  په رسمي ډول  د څو ميوه لرونکو نيالګيو په ايښودلو سره پيل شو .
  ددغه ولايت بزګران او اوسيدونکي  هم  ژمنه وکړه چې  ددغه ولايت  دسمسورتيا  په ساتنه کې  ونډه اخلي .

کابل باختر د وري پنځمه :
څه دپاسه دوه زره تنه نوى زده کوونکي سږ کال دميدان وردګو په ښوونځيو کې  جذب شوي دي .
  دميدان وردګو ولايت  دپوهنې رييس  باختراژانس ته وويل  اوس  په دغه ولايت کې څلور سوه  اووه شپيته ښوونځي فعال دي  چې په هغو کې  دنجونو او هلکانو په ګډون يوسلو پنځه پنځوس زره تنه  زده کوونکي  په زده کړه بوخت دي  چې پنځه څلويښت زره تنه يې نجونې تشکيلوي .
  دميدان وردګو والي  چې د نوى تعليمي کال په لومړى ورځ  د حامدکرزي ليسې ته تللي و  له ميندو اوپلرونو څخه يې وغوښتل چې  خپلو نجونو ته هم دخپلو زامنو په شان  ښوونځي ته دتګ او زده کړې  اجازه ورکړي .
دغه راز ده  دعامه پوهاوي  دپروګرامونو په جوړولو ټينګار وکړ او زياته يې کړه چې  دجوماتونو دمنبرونو او دقومي مشرانو له لارې  کورنيو ته  پوهاوي ورکړى شي چې خپلې نجونې  له زده کړې څخه لرې پرې نه ږدي .
والي زياته کړه چې په دغه ولايت کې هيڅ ښوونځى  تر ګواښ لاندې نه دى .

Page 4 of 5033