24 June 2019

RSS Facebook

سوداگریز


تازه خبرونه

په سمنګانو کې لومړنى خصوصي  ټلويويزن په  خپرونو پيل وکړ

په سمنګانو کې لومړنى خصوصي ټلويويزن په خپرونو پيل وکړ

کابل/باختر/ دچنګاښ ٣مه : د رستم په نامه لومړني خصوصي ټلويزيون...

دکابل پوليسو دوژنې يو تورن ونيوه

دکابل پوليسو دوژنې يو تورن ونيوه

کابل/باختر/ دچنګاښ ٣مه : پوليسو دجنايي جرمونوپه اړوند درې تورن په...

په فراه کې ددريو ډاراچوونکو وژل  کېدل

په فراه کې ددريو ډاراچوونکو وژل کېدل

فراه /باختر/ دچنګاښ ٣مه : دفراه مسوولين وايي ؛ په بکوا...

Youtube Player

khantry design

سوداگریز

سوداگریز

کابل/ باختر/ د چنګاښ لومړۍ
د اطلاعاتو او فرهنګ وزارت د فرهنګ او هنر معين پوهاند محمد رسول باوري، د يونسکو او آيسيسکو له ملي کمېسيون سره د دغه وزارت پر همکاريو ټينګار وکړ.
د باختر آژانس د خبرله مخې: په هغې غونډه کې چې نن د يونسکو او آيسيسکو له ملي  کمېسيون سره د بلدتيا په موخه په اطلاعاتو او فرهنګ وزارت کې جوړه شوه؛  پوهاند محمدرسول باوري وويل چې د اطلاعاتو او فرهنګ وزارت په څلورو برخو کې له يونسکو سره همکاري لري.
د پوهاند باوري د څرګندونو له مخې: د يونسکو او آيسيسکو ملي کمېسيون په افغانستان کې د پروژو لپاره د مرستې جذبولو اسانتياوې برابروي.
پوهاند باوري زياته کړه: په نږدې راتلونکي کې په هېواد کې د دغه کمېسيون په مرسته د ماشومانو لپاره کتابتونونه جوړېږي او ټينګار يې وکړ چې د دغو سازمانونو له ظرفيتونو څخه بايد زياته استفاده وشي.
د يونسکو او آيسيسکو د ملي کمېسيون سکرټر جنرال محمد شاکر حبيب يار وويل: د دغه سازمان د اساسنامې له مخې، هر هېواد په دې برخه کې د يو کمېسيون په  جوړولو مکلف دى او په همدې موخه دغه  کمېسيون جوړ شوى دى.
د هغه د څرګندونو له مخې: د دغه کمېسيون رول په نړۍ کې له سولې او امنيت سره  د مرستې په مقصد د نړيوالو همکاريو برابرول دي.
وروسته په پروګرام کې د يونسکو او آيسيسکو د ملي کمېسيسون استازي حيات الله  مهريار د کمېسيون د جوړښت، هدفونو او دندو په باب هر اړخيزې څرګندونې وکړې.
د غونډې په پاى کې د باختر آژانس رييس نجيب الله شينواري د غونډې موضوعګانې راټولې کړې او د يونسکو او آيسيسکو له ملي کمېسيون څخه د مننې په څرګندولو سره  د فرهنګي او اطلاع رسونې په برخوکې يې له اطلاعاتو او فرهنګ وزارت سره  د کمېسيون د همکاريو پر پراختيا ټينګار وکړ.پاى\ ج\ ذ

کابل/ باختر/ د چنګاښ لومړۍ
د اطلاعاتو او فرهنګ وزارت سرپرستې حسينې ساپۍ نن د دايکنډي د اطلاعاتو او فرهنګ له رييس سره په کتنه کې د دغه ولايت د ستونزو او فرهنګي حالت په باب خبرې وکړې.
د باختر آژانس خبريال د خبرله مخې: په کتنه کې د دايکنډي د اطلاعاتو او فرهنګ رييس محمد حسين سيرت، د دغه ولايت يوشمېر ځوانان او د مدني ټولنې او فرهنګي بنسټونو مسوولين هم حاضر وو او د دغه ولايت په فرهنګي برخوکې يې خپلې يو لړ غوښتنې او ستونزې د اطلاعاتو او فرهنګ وزارت له سرپرستې سره شريکې کړې.
دوى د دايکنډي د فرهنګي حالت په باب معلومات ورکړل او د تاريخي آبداتو د ترميمولو، د فرهنګي مجتمع ودانۍ د جوړولو، له لرغونو ساحو څخه د تاريخي آبداتو د تفکيک لپاره د تحقيق او د دايکنډي د اطلاعاتو او فرهنګ په رياست کې د ٣٠ سلنې پربنسټ د ښځو د استخدام او ځوانانو ته د پاملرنې غوښتنه وکړه.
حسينې ساپۍ د دايکنډي د فرهنګي برخو د ستونزو او د هغوى د غوښتنو له اورېدو وروسته، د تاريخي آبداتو د ساتنې او ترميمولو په لاره کې د اطلاعاتو او فرهنګ وزارت د پروګرامونو په باب معلومات ورکړل او زياته يې کړه: د اطلاعاتو او فرهنګ وزارت يوه مهمه دنده د هېواد تاريخي آثارو او فرهنګي ميراثونو ته پاملرنه ده.
د اطلاعاتو او فرهنګ وزارت سرپرستې څرګنده کړه چې د هغوى ستونزې او غوښتنې به وڅېړي او له امکاناتو سره سم به په دې برخه کې لازم اقدامات وکړي.
پاى \ ج\ ذ

کابل/ باختر/ د چنګاښ لومړۍ
د غزني د ملي امنيت موظفينو نن دوه تنه په دغه ولايت کې د جرمونو د ترسره کول په تور ونيول.
د غزني د والي وياند محمدعارف نوري باختر آژانس ته وويل: د دغه ولايت د ملي امنيت منسوبينو يو ډار اچوونکى چې د غزني په خوږياڼيو ولسوالۍ کې د قاري سليم   د تروريستي ډلې غړى دى، له جنګي وسايلو سره يې په غزني ښارکې ونيو.
د يو بل خبرله مخې:
د غزني د ملي امنيت رياست موظفينو يو جعلکار له لسګونو جعلي تذکرو او انتخاباتي سټيکرونو سره د غزني ښار له مربوطاتو څخه ونيو.
پاى \ذ \

 

کابل/ باختر/ د چنګاښ لومړۍ
په نړيوالو بازارونوکې نن يو انس سره زرپه ١٤٠٠ډالرو پلورل کېږي.
د پښتنې بانک د سرو زرو د مارکيټ يوه پلورونکي قاهرخان نن د دغه خبرپه تاييدولو سره باختر آژانس ته وويل چې نن د کابل په بازارونوکې يو ګرام الجزايري سره په زر٣٦٠۰ افغانیو، يو ګرام مصري سره زر په٣٥٠۰ افغانيو، کويټي په٢۸٥٠ افغانيو، سنګاپوري په٢۸٥٠ افغانيو،  بحريني په٢۸٥٠ افغانيو، عربي په٢۸٥٠ افغانيو، ايراني په٢٥٥٠ افغانيو او يو ګرام روسي په ۲۰٥۰ افغانيو پلورل کېږي.     
پاى / سعيده

 

Saturday, 22 June 2019 13:14

تبصره

کابل/باختر/ د چنګاښ لومړۍ
د جمهوري ریاست ټاکنې او د خلکو ملي مسوولیت
د باختر آژانس مفسر لیکي:
که هر څه له ټاکل شوي پلان سره سم پر مخ لاړ شي، نو د روان کال د تلې په لومړیو کې د جمهوري ریاست ټاکنې تر سره کېږي. د افغانستان په څېر جګړه ځپلیو هېوادونو کې د انتخاباتو د ترسره کولو پر مهال څو اندېښنې تل شتون لري: تر ټولو ستره اندېښنه دا ده چې آیا خلک په ټاکنو کې ګډون کوي او که نه یې کوي؟ هرڅومره چې په ټاکنو کې د خلکو ګډون پراخ وي، همغومره د انتخاباتو د پایلو مشروعیت هم پیاوړی او پراخ وي. برعکس، که په انتخاباتو کې د خلکو ګډون پیکه او کمزوری وي، نو همغومره یې پایلې هم پیکه او کمزورې وي. دویمه اندېښنه دا ده چې خلک به په ټاکنو کې پراخ ګډون وکړي، خو آیا د ملي یووالي په روحیې سره به د رای ورکولو مرکزونو ته لاړ شي او که د قومي، سمتي، مذهبي او ژبنیو ملحوظاتو تر اغېزې لاندې به خپلې رایې وکاروي؟ که د ملي یووالي روحیه واکمنه وي، نو طبیعي ده چې د انتخاباتو پایلې به په ټولنه کې د یووالي د لا پياوړتیا سبب شي، خو که قومي، سمتي، ژبني او  نور ملحوظات لومړیتوب ولري، نو بیا د انتخاباتو پایلې په ټولنه کې نوی درز او انقطاب رامنځ ته کوي او دا هغه څه دي چې د ټولنې امنیت او ثبات ګواښوي. درېمه اندېښنه دا ده چې آیا خلک به سم انتخاب وکړي او که نه؟ له سمه انتخابه مو مطلب دا دی چې آیا تر ټولو غوره کاندید ته به رایې ورکړي او که نه؟
افغانستان په خورا کړکېچنو شرایطوکې د جمهوري ریاست ټاکنو ته تیاری نیسي. دا ټولې اندېښنې چې پورته یې یادونه وشوه، شتون لري. د همدغو اندېښنو په رڼا کې باید انتخاباتو ته د تیاري چارې پر مخ یوړل شي. تر هر څه وړاندې باید خلک وهڅول شي چې په ټاکنو کې پراخ ګډون وکړي او د دې لپاره تر ټولو لومړی ګام باید د نوم لیکنې د بهیر لا پیاوړي کول وي. له بده مرغه په دې برخه کې لا ستونزې شته او د ټاکنو خپلواک کمېسیون باید د تقویتي نوم لیکنې لپاره د خلکو د هڅولو په موخه د عامه پوهاوي ګڼ پروګرامونه په مرکز او ولایتونو کې عملي کړي. د هېواد په ګڼو سیمو کې پر امنیتي ستونزو سترګې پټېدای نه شي، خو د دې مانا دا نه ده چې اړوند مسوولین د دغو ستونزو د شتون په پلمه لاس تر زنې لاندې کیني. پر پوځي تدابیرو سربېره باید د قومي مشرانو، دیني عالمانو، ډول ډول ولسي جوړښتونو او نورو ټولو اغېزمنو کانالونو له نفوذ څخه ګټه واخیستل شي او د خلکو لپاره د نوم لیکنې اسانتیاوې برابرې کړای شي. په دې برخه کې د رسنیو ونډه د پام وړ ده. تلوېزیونونه دې یوازې د ټاکنو په اړه د عامه پوهاوي د سوداګریزو پیغامونو په خپرولو بسنه نه کوي، بلکې د خپل ملي رسالت له مخې دې نور پروګرامونه هم تر لاس لاندې ونیسي. همدارنګه کاندیدان، سیاسي ګوندونه، مدني ټولنه، علمي او اکاډمیک مرکزونه او نور- دوی ټول باید خلک وهڅوي چې د نوم لیکنې مرکزونو ته لاړشي او په راتلونکو ټاکنو کې د رای ورکولو لپاره په اړوندو مرکزونو کې نومونه ولیکي. ټول خلک باید د جمهوري ریاست د انتخاباتو ارزښت درک کړي.
هېواد د یوې سترې تاریخي پرېکړې په درشل کې دی. دا د هر افغان ملي او تاریخي مسوولیت دی چې په راتلونکو ټاکنو کې فعال ګډون وکړي، د ملي یووالي په روحیې سره خپله رایه وکاروي او تر ټولو غوره کاندید ته دا تاریخي امانت وسپاري.
پاى - شینواری

کابل/باختر/ د چنګاښ لومړۍ
د پکتیکا په سروبي ولسوالۍ کې د پولیسو او وسله والو طالبانو ترمنځ نښته کې درې وسله والو طالبانو ته مرګ ژوبله اوښتې ده.
چارواکي وايي چې وسله والو طالبانو تېره شپه د سروبي ولسوالۍ په هیبتوکې د پولیسو پر پوستې ډله ييز برید وکړ.
د پکتیکا د امنیې قوماندانۍ ویاند شاه محمد آرین د باختر آژانس سیمه یيز خبریال ته وویل چې په نښته کې یو وسله وال طالب ووژل شو او دوه نور یې سخت ټپيان شول. پای/وصال

کابل/باختر/ د چنګاښ لومړۍ
څوارلس وسله وال طالبان پرون په غزني کې ووژل شول.
د غزني د والي وياند محمدعارف نوري باختر آژانس ته وويل: وسله وال طالبان  د دغه ولايت د اندړو ولسوالۍ په مربوطاتوکې د کومانډويانو په عملياتوکې ووژل شول.
نوري زياته کړه: په خواجه عمري او ده يک ولسواليوکې هم په عملياتو او جګړو کې وسله والو طالبانو ته د سر زيان اوښتى دى، خو دقيق شمېر يې معلوم نه دى.
پاى \ج \ذ

کابل/باختر/ د چنګاښ لومړۍ
امنيتي ځواکونو پرون د وسله والو طالبانو د ماليې د راټولولو مسوول د فارياب په پښتونکوټ ولسوالۍ کې ونيو.
د فارياب د امنيې قوماندانۍ د امنيت آمر باختر آژانس ته وويل چې امنيتي ځواکونو قاري غلام يحيى چې په پټه ميمنې ښار ته راغلى و، له يوې وسلې او مهماتو سره يې ونيو.
پاى \ذ

کابل/باختر/ د چنګاښ لومړۍ
په کونړکې د داعش د استخباراتو د مسوول په ګډون د دغې تروريستي ډلې اووه غړي د ملي امنيت ځواکونو په عملياتوکې ووژل شول.
د ملي امنيت د لوى رياست ځانګړو ځواکونو د کونړ په نورګل ولسوالۍ کې د داعش تروريستي ډلې پر قرارګاه او د سوق او ادارې مرکز هدفمند عمليات ترسره کړل.
د ملي امنيت د لوى رياست مطبوعاتي دفتر باختر آژانس ته په رااستولې خبرپاڼه کې ليکلي دي: په عملياتو کې د داعش د استخباراتو د مسوول په ګډون اووه داعشيان چې پر امنيتي ځواکونو او تاسيساتو د ورانکارو او تروريستي بريدونو د ترسره کولو پلان يې جوړاوه؛ ووژل شول.
دغه راز څو جنګي وسايل او پوځي تجهيزات په عملياتوکې د شاملو ځواکونو لاسته ورغلل او د دښمن يوه قرارګاه، د وسلو او مهماتو يوه زيرمه او يو موټر له منځه يوړل شول.
پاى \ج\ ذ

 

کابل/باختر/ د چنګاښ لومړۍ
د بغلان د عالمانو شورا غړيو پرون د جګړې پر ختمولو او د سولې بهير پر پرمختګ ټينګار وکړ.
د باختر آژانس خبريال د خبرله مخې: په هغې غونډه کې چې د دغه ولايت د عالمانو شورا غړيو، قومي مشرانو او د ټولنې مدني فعالانو جوړه کړې وه؛ په هېواد کې د سولې بهير د پرمختګ او د جګړې او وينې توييدنې د بندولو ملاتړ وکړ او له دولت څخه يې وغوښتل چې د سولې په پرمختګ کې محتاطانه عمل وکړي او د ټولنې بېلابېل قشرونه په کې شريک کړي.
د بغلان د عالمانو شورا رييس مولوي احمد فريدون فروتن په خبرو کې له طالبانو څخه وغوښتل، هغه فرصت چې دوى ته برابر شوى دى، ترې ګټه واخلي او په هېواد کې د جګړې او وينې توييدنې په بندولو کې خپل رول ولوبوي او په دغه بهيرکې د مفاهمې له لارې د افغانستان له خلکو او دولت سره يوځاى عمل وکړي.
ختم- عطاالله -اکرم

Page 6 of 7793