20 August 2019

RSS Facebook

سوداگریز


تازه خبرونه

د طالبانو د سرې قطعې يو قوماندان ووژل شو

کابل/ باختر/ د زمري ۲۹ مه د طالبانو د سرې قطعې...

په ننګرهارکې د نشه يي توکو د يوه پلورونکي نيول کېدل

کابل/ باختر/ د زمري ۲۹ مه يو سړى له لسګونو انډيو...

په غورکې طالبانو درې ملکي وګړي وتښتول

کابل/ باختر/ د زمري ۲۹ مه طالبانو په غورکې درې ملکي...

Youtube Player

khantry design

سوداگریز

سوداگریز

_ کابل\باختر\ د زمري ٢٧ مه
د افغانستان د اسلامي جمهوریت د جمهور ريیس محمد اشرف غني په مشرۍ د وسله وال پوځ د اعلی سرقومندانۍ غونډه نن له غرمې مخکې په ارګ کې جوړه شوه.
د جمهور رييس د وياند دفتر باخترا ژانس ته خبر ورکړ:
په پیل کې د امنیتي او دفاعي ځواکونو مسوولینو د هېواد د امنیتي وضعیت په اړه خپل راپور وړاندې او تهدیدات یې تشریح کړل.
وروسته جمهور ريیس غني د کابل ښار په شپږمه ناحیه کې د واده پر مراسمو تروریستي برید په کلکه وغانده او ويې ویل، طالبان د دې تروریستي برید په غندلو سره ځانته برائت نشي ورکولای ، ځکه همدوی تروریستي فعالیتونو ته زمینه برابره کړې ده.
جمهور ريیس زیاته کړه، طالبان په هېواد کې د ملکي وګړو د تلفاتو اصلي عاملین دي او زموږ خلک به هیڅکله هم د دغې پردۍ ډلې جنایتونه هېر نه کړي.
جمهور ريیس غني د هېواد د امنیتي او دفاعي ارګانونو ترمنځ پر لا زیاتې همغږۍ ټینګار وکړ او ويې ویل، باید د تهدیدونو په ځانګړي ډول د ودونو په سالونونو او ټولو ولسي غونډو کې مخنیوی وشي، په مرکز او ولایتونو کې دې د تروریستي شبکو پر ضد عملیات زیات او د کابل امنیتي پلان دې په دقیق ډول عملي شي.
جمهور ريیس محمد اشرف غني د هېواد د خپلواکۍ د بېرته ترلاسه کولو سلمې کالیزې د جشن امنیتي تدابیرو ته په اشارې وویل، باید د خپلواکۍ جشن د امنیتي پلان تطبیق ته لا زیاته پاملرنه وشي.
دغه راز جمهور ريیس وویل، د وروستۍ تروریستي پېښې او نورو ټولو پېښو قربانیانو ته درناوی زموږ لپاره مهم دی او د هېواد د خپلواکۍ د سلمې کالیزې جشن د نمانځنې ځانګړی کمېسیون باید د خپلواکۍ جشن په برنامو کې  بدلون راولي.
پاى\جهانيار

 

کابل \باختر\ د زمري ٢٧مه
د هېواد د خپلواکۍ د سلمې کاليزې  په وياړ د کابل په مرکز کې د امير عبدالرحمان خان مقبرې ته څېرمه جومات له  مرمت او بيا رغاونې وروسته نن د اطلاعاتو او فرهنګ وزارت د فرهنګ اوهنر د معين پوهاند محمد رسول باوري په واسطه پرانېستل شو.
د باختراژانس د خبرله مخې، دغه جومات د اطلاعاتو او فرهنګ وزارت له پرمختيايي بودجې څخه د څه دپاسه  څلور سوه  زرو افغانيو په لګښت  بيا رغاول شوى دى.
د غه جومات د پرانېستلو په مراسمو کې پوهاند باوري په لنډو خبرو کې وويل چې د تاريخي څلو او د لرغونو  اثارو ساتنه او مرمت د اطلاعاتو او فرهنګ وزارت له اساسي دندو څخه دي.
هغه دغه راز وويل چې د هېواد په ګوټ ګوټ کې يوشمېر تاريخي څلي او اثار د هېواد د خپلواکۍ د سلمې کاليزې د هرکلي په خاطر ترمرمت او بيارغاونې لاندې دي.
د پوهاند باوري د څرګندونوله مخې، اميرعبدالرحمن خان د ده د وصيت پربنسټ د کابل په بوستان سراى کې خاورو ته وسپارل شو او د امير عبدالرحمن خان زوى امير حبيب الله خان دغه جومات د خپل پلار مقبرې ته څېرمه جوړ کړى دى.
  ختم_ ف _ اکرم

 

کابل \باختر\ د زمري ٢٧مه
د هېواد دخپلواکۍ د جشن په مناسبت سبا د دوشنبې په ورځ د کابل د کرکټ په لوبغالي کې د کرکټ لوبه کېږي.
د هېواد د کرکټ بورډ وياند باختراژانس ته وويل چې د افغان ځوانانو او د افغان اتلانو ټيمونه په دې ورځ لوبه کوي.
د افغان اتلانو په ټيم کې د سميع الله شينواري، رحمان الله ګربز او د شاهپور ځدران په ګډون مشهور لوبغاړي  لوبه کوي او د افغان ځوانانو په ټيم کې د نور علي ځدران، محمد نبي، حميد حسن او د نجيب  ترکي په ګډون  پيژندل شوي لوبغاړي  شامل دي.
  ختم_عطاالله _اکرم

کابل \باختر\ د زمري ٢٧مه
د لوى څارنوالۍ وياند جمشيد رسولي نن له  بند څخه د کابل بانک د يوه پوروړي خليل فيروزي د خلاصون په اړوند په يوه ګډ خبري کنفرانس کې وويل چې هغه د ناروغۍ په خاطر له بند څخه خوشې شوى دى.
د باختراژانس د خبرله مخې، رسولې په دې خبري کنفرانس کې وويل، چې د بشر د حقوقو د موازينو په رعايتولو سره څرنګه چې فيروزي په سختې ناروغۍ اخته دى په همدې دليل هغه له جېل  څخه خوشې شوى دى.
په همدې ترتيب  د ملي امنيت د روغتيايي خدمتونو رييس حشمت الله نوابي وويل چې فيروزي د شکرې او د وينې د لوړ فشار په ناروغۍ اخته دى او د هغه درملنه وخت غواړي له همدې امله  هغه د ديارلس  کسيز موظف هيئت  د پريکړې پربنسټ  له بند څخه خوشې شوى دى.
د کابل بانک د تصفيې مدير روح الله حبيب وويل  فيروزي ژمنه کړې ده چې تر شپږومياشتو پورې خپل پنځوس سلنه پور ورکوي.
د هغه د څرګندونوله مخې، فيروزي له کابل بانک څخه ١٣٧ مليونه ډالره پوروړى دى او تر اوسه پورې  يې خپل درې دېرش ميليونه پور ورکړى دى.
په کنفرانس کې  دغه راز طرحه شوه چې هغه  په کور کې تر څارنې لاندې دى اوبهر ته سفر نه شي کولاى.
ختم_ف _ اکرم

 

کابل \باختر\ د زمري ٢٧مه
د شهر دوبۍ د واده د سالون د پېښې د شهيدانو د جنازو د ښخولو مراسم نن د کابل په لويديځ کې پرځاى شول.
باختراژانس د کورنيو چارو وزارت د مطبوعاتي دفتر له خولې ليکي چې د تېرې شپې  په لسو بجو او دېرشو دقيقو د کابل ښار په شپږمه امنيتي حوزه کې د شهر دوبۍ د واده په يوه سالون کې ځانمرګي بريد وشو چې په پايله کې يې درې شپيته تنه شهيدان او يوسلو دوه اتيا تنه نور ټپيان شول.
يوې اړوندې سرچينې وويل، چې د دغې خونړۍ پېښې  قربانيان ټول ملکي وګړي وو
دغه راز  شپږ ورونه  د دغې پېښې  په شهيدانو کې شامل وو چې په ډله ييزه توګه خاورو ته وسپارل شول او د يوې بلې کورنۍ ٧ غړي هم د پېښې  په قربانيانو کې شامل دي.
په واده کې د يوه برخه وال د څرګندونوله مخې چاودنه د نارينه وو په سالون کې وشوه او زياتره وژل شوي کسان نارينه وو.
سرچينې زياته کړه چې ښځې او ماشومان هم په شهيدانو او ټپيانوکې شامل دي.
  ختم_ عطاالله _ اکرم

 کابل \باختر\ د زمري ٢٧مه
د هېواد لومړۍ ميرمن بې بي ګل رولاغني وايي، موږ ټول له جګړې څخه ستړي شوي يو او داسې سوله غواړو چې خوشحالي راوړي.
د هېواد لومړۍ ميرمنې دغه څرګندونې د يو نندارتون د پرانېستلو په غوڼده کې چې (تاريخ د ښځو له کمرې څخه )  ترعنوان لاندې  نن په کابل کې جوړ شو وکړې.
د باختر اژانس د خبرله مخې،  دغه نندارتون د هېواد د خپلواکۍ د سلمې کاليزې په مناسبت د سولې لپاره د بشر د حقوقو د رواجولو موسسې په همکارۍ جوړ شو.
د سولې لپاره د بشر د حقوقو د رواجولو موسسې رييسې  ليلا جعفري د نندارتون د پرانېستلو په غونډه کې وويل، د خپلواکۍ د درناوي په خاطر زموږ موسسې د لسو نجونولپاره دعکاسۍ درې مياشتنى زده کړه ييز  پروګرام جوړ کړى او هغوى په مسلکي ډول دعکاسۍ فن زده کړ.
هغې وويل هغوى له زده کړې وروسته  له لرغونو څلو او اثارو څخه عکسونه واخېستل چې د دارالامان ماڼۍ، د جبل السراج ماڼۍ او د پغمان ماڼۍ پکې شاملې دي چې له چاپولو وروسته يې هغه د هېواد د خپلواکۍ د سلمې کاليزې په خاطر نندارې ته وړاندې کړل.
هغې د سولې خبرو ته اشاره وکړه او ويې ويل رښتينې، تلپاتې او ارزښتناکه سوله هغه وخت رامنځته کېږي چې په هېواد کې د بشر حقوق پراخ بنسټ شي.
وروسته په غونډه کې د هېواد لومړۍ ميرمنې بې بي ګل رولاغني  خبرې وکړې او ويې ويل تاسو نجونې دعکاسۍ په زده کړې  سره کولاى شي ټولنې ته خدمت وکړ‌ئ.
هغې وويل: عکاسي د خپل چاپيريال او ټولنې يو شاهد دى او تاسې کولاى شي واقعيتونه دعکس په واسطه منعکس کړئ.
هغې د سولې د خبرو په باب وويل، سوله ډيره مهمه  ده اوموږ ټول له جګړې څخه ستړي شوي يو او موږ د داسې سولې غوښتونکي يو چې خوښي راوړي.
رولاغني وويل، د طالبانو په زرګونو کورنۍ په هېواد کې ژوند کوي خو ښه ژوند نه لري او هغوى سوله غواړي.
هغې زياته کړه،  موږ حاضر يو چې له طالبانو سره سوله وکړو خو هغوى ازاد نه دي او واک نه لري.
لومړۍ ميرمنې څرګنده کړه چې د سولې تامينول زيات وخت ته اړتيا لري چې بايد په دې برخه کې خبرې وشي څو خلک  قناعت وکړي او د لنډ مهالې سولې په تامينولو کې بيړه دهيچا په ګټه نه ده .
په پروګرام کې د افغانستان د ملي مشارکت د شبکې رييس عبدالله فايز او دعکاسۍ دوو تنو زده کوونکو هم خبرې وکړې .
  ختم_عطاالله _اکرم

کابل \باختر\ د زمري ٢٧مه
د برېښنا شرکت عمومي اجراييوي رييس امان الله غالب پرون د ايران له توانير شرکت سره په غونډه کې چې د هېواد د برېښنا رسونې د پروژو په باب جوړه شوه ګډون وکړ.
باختراژانس د برېښنا شرکت د خبرپاڼې له خولې خبر راکړ، د دې غونډې په پيل کې امان الله غالب د افغانستان په سرحدي ولسواليو د برېښنا د ويش، د ګډې تخنيکي ډلې د جوړولو، د افغانستان د برېښنا انرژۍ په برخه کې د پانګونې د فرصتونو د تشريح او په لنډ مهال او اوږد مهال کې  د کار دعملي نقشې د برابرولو په باب خبرې وکړې.
  دغه راز په غونډه کې د هرات، فراه او نيمروز ولايتونو ولسواليو ته د برېښنا رسونې خدمتونو د پراختيا او د راتلونکي هجري لمريز کال لپاره د يادو ولايتونوته د ١٣٢ او ٢٠ کيلو ولټ مزو له لارې د برېښنا انرژۍ د پېرودنې د قرارداد د تمديد، د opgw په سيستم  د تربت جام _ هرات د ١٣٢کيلوولټ اوسني مزي د سمبالولو او دغه  راز د کيبل د ډول او مشخصاتو د انتخاب او د ايران د برېښنايي تجهيزاتو او د سترو توليدي صنايعو له کارخانو څخه د برېښنا د تجهيزاتو د پيرودنې، د تربت جام،  - هرات او د قندهارد ٥٠٠ کيلوولټ  مزي دغځولو د طرحې د مطالعاتو، د زرنج او د زابل ( فراه د ٢٢٠ کيلوولټ مزو دغځولو د طرحې او د زرنج او فراه د ٢٢٠-٢٠کيلوولت سب استيشنونو، د ايران د خواف او زابل  په سيمو او په افغانستان کې د هغو په ګاونډيو سيمو کې د بادي او لمريزې برېښنا انرژۍ د توليد دستګاو د جوړولو په وړاندې دواړو هېوادونو د خصوصي شرکتونو د ګډو همکاريو، له ايران څخه د برېښنا انرژۍ د اوږدمهال قرارداد _ ترلسو کلونو پورې  پېرودنې، پلورنې، ترانزيت او تبادله، له ايران څخه افغانستان ته د برېښنا انرژۍ د صادرولو د تعرفو د کمښت، د افغانستان د برېښنا شرکت له لوري ايران ته د وارداتي برېښنا انرژۍ د صرفيې د بيې  د لېږدونې او ورکړې په وړاندې د هر اړخيزې طرحې د رامنځته  کولو د کاري تجربو د شريک کولو، د افغانستان برېښنا شرکت د کارکوونکو لپاره د زده کړه ييزو دورو او د تخصصي ورکشاپونو د جوړولو او په هېواد کې د برېښنا رسولو چارو د ښه والي لپاره د نورو موضوعګانو په باب خبرې وشوې.
د يادونې وړ ده چې دغه غونډه دوې ورځې نور هم دوام مومي او په پاى کې به ديادو موضوعګانو په باب د دوه اړخيزو همکاريو هوکړه ليک لاسليک شي .
  ختم_ ف _ اکرم

 

کابل \باختر\ د زمري ٢٧مه
په کابل ښار کې د واده په يوه سالون کې د ځانمرګي بريد په پايله کې  ٦٣ تنه شهيدان او يو سلو اتيا تنه نور ټپيان شول.
د باختراژانس د خبرله مخې، پېښه د تېرې شپې په لسو بجو او دېرشو دقيقو د کابل ښارد شپږمې ناحيې د چهاردهي په چارقلعه کې د شهر دوبۍ هوټل د واده په سالون کې رامنځته شوه.
پوليس وايي چې پېښه د يوه ځانمرګي بريد زيږنده وه، ځانمرګي بريدګرځان د بلل شويو کسانو ترمنځ وچاوه.
په سالون کې د ميرويس په نامه د کابل د يوه اوسيدونکي د واده مراسم روان و.
  ميرويس يوعادي ګنډونکى دى هغه په دې نه پوهېږي چې ډار اچوونکو په څه نامه او په کومې انګيزې  سره د هغه د واده پر مراسمو چې يوغريبکار او له سياست لرې شخص دى بريد کړى دى.
د کورنيو چارو وزارت وياند نصرت رحيمي وايي چې په پيښه کې ٦٣ تنه شهيدان او ١٨٠ نور ټپيان شوي دي .
شپږ ورونه د دې پيښې په وژل شويو کسانو کې شامل دي چې جنازې يې نن په ډله ييزه توګه خاورو ته وسپارل شوې.
دغه راز په پېښه کې د يوې بلې کورنۍ اووه غړي وژل شوي دي.
د پېښې شاهدان وايي چې ځانمرګي بريدګر ځان د نارينه وو په سالون کې ټيک هغه وخت وچاوه چې د ميرويس د نکاح تړلو مراسم پاى ته رسيدلي و او هغه د خپلو ميلمنو په لور د نارينه وو سالون ته ستنېده.
د مراسمو هنرمندان او د سالون يوشمېر ګارسونان هم په وژل شويو کسانو کې شامل دي.
دغې پيښې د خلکو غبرګون راپارولى دى .  د پېښې يوشمېر شاهدان وايي چې دغه پېښه ټيک په داسې وخت کې رامنځته کېږي چې د هېواد د خپلواکى د بېرته ترلاسه کولو د سلمې کاليزې د نمانځنې لپاره په کابل کې امنيتي تدبيرونه لاپسې جدي کېږي، د پېښې ځاى د دارالامان له ماڼۍ  سره دومره واټن نه لري.
دغه مانۍ او د هغې شاوخوا سيمې د هېواد د خپلواکۍ د سلمې کاليزې د جشن لپاره په ځانګړو تدبيرونو کې دي.
يو شمېر کابل ښاريان وايي چې د کابل په ډير امن ځاى کې دغه شان يو ناتار رامنځته کېږي نومسوول يې څوک دئ؟
د افغانستان د اسلامي جمهوريت  جمهور رييس محمد اشرف غني، اجراييه رييس ډاکترعبدالله عبدالله او د هېواد پخواني جمهور رييس حامد کرزي پېښه وغندله چې په همدې ترتيب د اروپا اتحاديې، د امريکا سفارت او په کابل کې د بهرنيو هېوادونو يو شمېر سفيرانو د تېرې شپې پېښه وغندله او د دغې انساني ضد پېښې دعاملانو په مجازاتو يې ټينګاروکړ .
د بخښنې نړيوال سازمان دغه پېښه د بشريت پرضد جنايت وباله او ټينګار يې کړى دى چې د پېښې عاملان بايد د خپلو عملونو سزا وويني.
تراوسه پورې هيڅ ډلې د پېښې مسووليت نه دى منلى.
طالبانو د پېښې له رامنځته کېدو څخه وروسته په لومړيو شيبو کې هغه وغندله او دغه بريد يې وحشيانه وباله او ويلي يي دي چې په ملکي وګړو بريد توجيه کيداى نه شي.
له لسو ورځو څخه په لنډه موده کې دا په کابل کې دوېيمه تروريستي پېښه ده، کابو لس ورځې مخکې په کابل کې د پوليسو د شپږمې حوزې قرارګاه ته څېرمه په يوه موټر کې د ځاى پرځاى شوي بم په چاودنه کې کابو يوسلو شپيتو تنو ته مرګ ژوبله واوښته او د دغې پيښې د قربانيانو غوڅ اکثريت ملکي وګړي وو.
طالبانو چې د تېرې شپې پېښه يې وحشيانه بللې خو د شپږمې حوزې د چاودنې مسووليت يې په غاړه اخېستى و.
  ختم_ عطاالله _ اکرم

کابل \باختر\ د زمري ٢٧مه
په بلخ کې د اوبو لګولو د يوې شبکې د بيارغاونې کار پاى ته ورسېد او پرون پرانېستل شوه .
د بلخ د کرنې، اوبولګولو او مالدارۍ رياست سرپرست کاتب شمس باختراژانس ته وويل، چې دغه شبکه د پنځو کيلومترو په اوږدوالي د اوبو د تنظيم له پروژې څخه د شمال زون د ساحوي دفتر د څه د پاسه دوه ويشتو ميليونو افغانيو په لګښت د بلخ ولسوالۍ کې بيا رغاول شوې ده.
هغه زياته کړه، چې د دغې شبکې په جوړولو سره په ياده سيمه کې د څه دپاسه  درې زره جريبه کرنيزې ځمکې د خړوبولو زمينه برابره شوې ده.
  ختم_ عطاالله _ اکرم

 

پل علم / باختر\ د زمري٢٧مه
د پوهنې د ترانې د ملي ډلې د انتخاب د جشن برخه وال پرون په لوګر کې وستايل شول.
د هېواد د خپلواکۍ د بېرته ترلاسه کولو د سلمې کاليزې په وياړ د لوګر د ښوونځيو هغه زده کوونکي چې د پوهنې وزارت د ترانې د ملي ډلې د انتخاب په جشن کې يې ګدون کړى وو  د اطلاعاتو او فرهنګ رياست له لوري وستايل شول.
په هغې غونډه کې چې په همدې مناسبت د ملکي او نظامي مسوولانو او د دولتي ادارو  د رييسانو په شتون  په پل علم کې  جوړه شوې وه  د لوګر والي محمد انور خان اسحق زي د لوګر د پوهنې د تراني د ډلې د هغو غړوچې د پوهنې وزارت د ترانې د ملي ډلې د انتخاب په جشن کې  ګډون کړى وو  قدرداني وکړه او له ټولو خلکو څخه يې وغوښتل چې د هېواد د بيارغاونې او سمسورتيا لپاره په يو موټي توب سره حرکت وکړي او دعلم او معرفت د ډيوې  د لا روښانولو لپاره اغيزمن ګامونه واخلي.
د لوګر د اطلاعاتو او فرهنګ رييس عبدالرحمن تسل د پروګرام د جوړولو موخه د هڅونې د فرهنګ پراخ بنسټه کول وبلل او زياته يې کړه چې په بېلابېلو برخو کې د لوګر د پوهنې  د زده کوونکو ترمنځ ښه  استعدادونه شته چې بايد وستايل شي.
د لوګر د پوهنې رياست تدريسي مرستيالې مينې سادات رسنيو ته وويل، چې د پوهنې د ترانې د ملي ډلې د انتخاب په جشن کې له لوګر څخه لسو هلکانو او اوو نجونو ګډون کړى وو  او د يوې نجلۍ په ګډون درېيو تنو يې ملي ډلې ته لاره وموندله.
د پوهنې د ترانې د ملي ډلې د انتخاب په جشن کې د هېواد له څلور دېرشو ولايتونو څخه د نجونو اوهلکانو د ترانې ډلې په اوويا ګروپونو کې کابو اته سوه زده کوونکو ګډون کړى وو، چې د سياليو له پاى ته رسېدو وروسته سل زده کوونکي د پوهنې د ملي ترانې د ډلې په ګروپ کې انتخاب شول.
پاى \ ف\ ذ

 

Page 6 of 7974