21 June 2018

RSS Facebook

سوداگریز


تازه خبرونه

په نيمروز کې داوربند له اعلام سره ملاتړ وشو .

کابل باختر د غبرګولې دمياشتې ٣١ نيټه: دنيمروز ولايت...

د داعش ديارلس تنه ډار اچوونکي ووژل شول

کابل \باختر دغبرګولي دمياشتې٣١ نيټه : ...

Youtube Player

khantry design

سوداگریز

سوداگریز

کابل باختر د کب اتلسمه :
د افغانستان لپاره د ملګروملتو د سازمان دسرمنشي ځانګړي استازي يانکوبيش د جمهوري رياست د لومړي مرستيال مارشال محمد قسيم فهيم د مړينې له امله  د افغانستان د اسلامي جمهوريت جمهور رييس حامدکرزى او د هيواد خلکو ته د ډاډګيرنې اوخواخوږۍ مراتب څرګندکړل .
د باختر آژانس دخبريال دخبر له مخې: د يانکوبيش په هغه پيغام کې چې د رسنيو له لارې خپور شو؛ د سولې، امنيت او د ملي يو والى په تامينولوکې د مارشال رول ستايل شوى دى.
په همدې ترتيب په کابل کې دبريټانيا سفيرهم د مارشال محمد قسيم فهيم دمړينې له امله د ډاډګيرنې مراتب څرګندکړي دي.

کابل باختر د کب اتلسمه :
دجمهوري رياست دلومړي مرستيال مارشال محمدقسيم فهيم دمړينې په مناسبت دجمهور رييس د مرستيال محمدکريم خليلي د ډاډګيرنې او خواخوږۍ پيغام!
په ژورې خواشينۍ اوخپګان سره خبر شوم چې د جمهوري رياست لومړۍ مرستيال مارشال محمدقسيم فهيم وفات شوى دى. دى دجهاد او مقاومت د دورې يوه ستره او مهمه څيره اوشخصيت و چې د هيواد د خپلواکۍ او آزادۍ په لاره کې يې زيات کړاونه اوستونزې وګاللې.
ده خپل عمر هيواد ته دخدمت په لاره کې تېر کړ. کلونه کلونه او له نورو مجاهدينو سره اوږه په اوږه له پرديو سره د مبارزې په لاره کې وجنګيد. وروسته په هغه دوران کې چې تروريزم اوتورتم  په هيواد سيورى غوړولى و؛ د وحشت او ترور له لمنې څخه د هيواد د ژغورنې لپاره په ميړانه ودريد.
دى د هغوڅيرو او شخصيتونو له جملې څخه و چې له هيوادسره يې زياته مينه لرله؛ هيله يې د يوه آزاد او آباد افغانستان شتون و.
په نوى دوران کې هم مارشال محمدقسيم فهيم د جمهوري رياست د لومړي معاونيت د مسووليتن په منلو سره خلکوته د زياتو سياسي، ټولنيزو او اداري خدمتونو جوکه شو او د نويو ارزښتونو او برياليتوبونو د ټينګښت اوساتنې په لاره کې يې هلې ځلې وکړې.
په داسې شيبوکې چې افغانستان برخليک ټاکوونکې ورځې تيروي؛ د مارشال محمد قسيم فهيم نشتوالى د افغانستان مسلمان ملت او هيواد ته يوه ستره ضايعه ده.
له شک پرته افغانستان خپل يو زړه سواند اوسرښندونکى شخصيت له لاسه ورکړ.
زه دمارشال محمدقسيم فهيم د ناڅاپي مړينې له امله د هيواد جمهور رييس حامدکرزي، د افغانستان خلکو د ارواښاد يارانواو د سنګر ملګرو په تېره بيا د ده کورنۍ، دوستانو او پاتې کسانو ته د ډاډ ګيرنې مراتب څرګندوم او د لوى خداى  (ج ) له دربارڅخه ارواښادته د فردوس جنت او پاتې کسانو ته يې د جزيل صبر هيله کوم.

کابل باختر د کب اتلسمه :
يو شمېر سياسي او جهادي شخصيتونو، د جمهوري رياست نوماندانو او په پارلمان کې د خلکو استازو د جمهوري رياست لومړي مرستيال مارشال محمد قسيم فهيم له رسنيو سره په خبروکې د جهاد او مقاومت ميړنى او د ملي يو والى سمبول وباله.
د افغانستان د خلکو د وحدت ګوند مشر او د جمهوري رياست د نوماند ډاکتر عبدالله عبدالله دويم مرستيال حاجي محمد محقق وويل: مارشال محمدقسيم فهيم  په طبيعي ډول د جهاد او مقاومت په دوران کې خپل شخصيت څرګندکړ.
دى د جهاد له ارکانوڅخه و. دجهاد اومقاومت په دوران کې يې اساسي رول درلود. دملي اتل احمدشاه مسعود له شهادت وروسته يې د مقاومت رهبري په غاړه واخسته. مارشال په ټولو دوروکې زموږ نږدې همکار و. مړينه يې د افغانستان خلکو ته يوه ستره ضايعه ده.
مارشال محمدقسيم فهيم د ځانګړتياوو خاوند و. په جهاد اومقاومت کې يې کلکه اراده لرله. په ذهن کې يې د ماتې مفکوره نه پيداکيده.
د باخترآژانس دخبريال دخبر له مخې: د مارشال محمدقسيم فهيم د سنګر يو ملګرى امرالله صالح ويلي دي: مارشال محمدقسيم فهيم د خلکوپه جهاد او مقاومت او د طالبانو په دوران کې د خلکو دمقاومت په رهبرى کې کليدي رول په غاړه درلود. ز ده د ملي يو والى او د دموکراسۍ په ټينګښت کې ستر رول ولوباوه.
دجمهوري رياست نوماندانو محمد شفيق ګل آقا شيرزي او داوودسلطانزوى ويلي دي چې مارشال محمدقسيم فهيم له خلکو څخه سرپورته کړ او د ملي يو والى په تامينولوکې يې مهم رول ولوباوه.
دغه راز د جمهوري رياست نوماندانو ډاکتر عبدالله عبدالله او ډاکتر زلمي رسول د ډاډګيرنې په هغو پيغامونوکې چې ليږلي يې دي؛ مارشال محمد قسيم فهيم مړينه د افغانستان ملت ته يوه ستره ضايعه بللې ده.
په پارلمان کې د خلکواستازي ډاکتر سيد علي کاظمي ويلي دي چې خلک له مارشال محمدقسيم فهيم اودهغه له استثنايي مفکورو سره بلدتيا لري. ده داوسني نظام په ټينګښت کې مهم او اساسي رول ولوباوه؛ د رڼو اوعادلانه انتخاباتو ترسره کول يې يوه هيله وه.
په همدې ترتيب په پارلمان کې د خلکو استازي، احمد بهزاد، د سياسي مسئلو کارپوه احمد سعيدي، سيد حسين عالمي بلخي، نظري پرياني، ډاکترې حبيبې سرابي او محمد يونس قانوني له رسينو سره په خبروکې د مارشال محمدقسيم فهيم د سياسي اونظامي  ژوندانه له بېلابېلو اړخونوسره اړيکې ونيولې او هغه يې يو ميړنى او زړور شخصيت وباله چې د خپل ژوندانه تر وروستۍ ورځې پورې  دخلکو په خدمت کې و.

کابل باختر د کب اتلسمه :
ديارلس تنه وسله وال طالبان د هلمند ولايت دګرشک ولسوالۍ په مربوطاتوکې د امنيتي ځواکونو په چاڼيزو عملياتوکې ووژل شول.
د هلمند د والي ويندوى عمرځواک دباخترآژانس خبريال ته وويل: دغه عمليات دګرشک ولسوالۍ په نا امنو سيموکې د امنيت د ټينګښت په مقصد د امنيتي ځواکونو له خوا ترسره شول چې له امله يې ديارلس تنه وسله وال طالبان ووژل شول.
د ځواک د څرګندونوله مخې: ددغو عملياتو په بهيرکې دګرشک ولسوالۍ د ميرمنداب ساحه د وسله والو طالبانو له شتون څخه پاکه شوه او ددغوعملياتو په بهيرکې درې سوه پنځوس ماينونه هم  په دغې ساحه کې کشف اوترلاسه شول .
يوه اړونده خبرځاى وويل: په دغو عملياتوکې چې څلور ورځې يې دوام درلود؛ دولتي ځواکونو ته زيان نه دى اوښتى .

کابل باختر د کب اتلسمه :
دکابينې ځينو غړو او د دولتي ادارو منسوبينو او د سياسي ګوندونو او د ټولنيزو سازمانونومسوولينو د پيغامونو په ليږلو سره د هيواد د رښتينى اومجاهد بچى، د جمهوري رياست د لومړي مرستيال مارشال محمدقسيم فهيم د مړينې له امله د افغانستان د اسلامي جمهوريت جمهور رييس حامدکرزي او دافغانستان ټول ملت ته د ډاډګيرنې مراتب څرګندکړل.
د باخترآژانس دخبر له مخې: په پيغامونوکې جمهور رييس او د افغانستان ملت ته د ډاډګيرنې او خواخوږۍ دمراتبو دڅرګندولو ترڅنګ ويل شوي دي: دافغانستان د خلکو دجهاد او مقاومت اتل، د سياست ميړنى، د آزادۍ او د ملي يو والى سمبول او د آزادو، رڼو او عادلانه انتخاباتو د ترسره کولو مينه وال په خواشينۍ سره وفات شو.
هغه ميړنى چې د ځوانى کلونه يې د خلکو او د ملي نواميسو، پت او عزت  د دفاع په سنګرونوکې تېرکړل او د خپل عمر تروروستيو شيبو پورې د خلکوپه خدمت کې و؛ مړينه يې ضايعه ده.
دغه پيغامونه دکار او ټولنيزو چارو، شهيدانو او دمعلولينو د چارو د وزيرې آمنې افضلي او ددغه وزارت د مشرتابه هئيت، د اقتصاد د وزير عبدالهادي ارغنديوال او د دغه وزارت د مشرتابه هئيت، په پارلماني چاروکې د دولت د وزير ډاکتر همايون عزيزي، د سوداګرۍ او صنايعو د وزير محمد شاکر کارګر او د دغه وزارت د مشرتابه هئيت، دماليې د وزير ډاکترعمر زاخيلوال او د دغه وزارت د مرتابه هيئت، د مهاجرينو د راستنولو د چارو د وزير ډاکتر جماهيرانوري او ددغه وزارت دمشرتابه هيئت، د لوړو زده کړو د وزير پوهاند ډاکتر عبيدالله عبيد او ددغه وزارت د مشرتابه هيئت، د سرحدونو او قبايلو د چارو د وزير ډاکتر محمد اکرم خپلواک او ددغه وزارت د مشرتابه هئيت، د فوايد عامې د وزير ډيپلوم انجنير نجيب الله اوژن او د دغه وزارت د مشرتابه هيئت، له نشه يي  توکو سره د مبارزې د چارو  د وزير مبارز راشدي او ددغه وزارت دمشرتابه هيئت، د حج او اوقافو د وزير ډاکتر محمد يوسف نيازي او د دغه وزارت دمشرتابه هيئت، سلاکار وزير  وحيدالله سباوون، پروفيسر علي احمدجلالي، سلاکار وزير امان الله ځدران، د سمنګانو د والي خيرالله انوش، د لوګر د والي نيازمحمد اميري، د قندهار د والي توريالي ويسا، د لغمان د والي ډاکتر فضل الله مجددي، دکابل د خلکو سراسري شورا، د لوګر د خلکو د سراسري شورا، د حق او عدالت ګوند، د افغانستان د سوداګرۍ او صنايعو د خونې، د ترکمنانو د سراسري شورا، د کسبګرو د ملي اتحاديې د مرکزي شورا او د ميوند بانک د مشرتابه هيئت له خوا رسيدلي دي.

کابل باختر د کب اتلسمه :
دهلمند ولايت د بريښنا رياست دوه تنه قراردادي مامورين نن ددغه ولايت په يوه واټ کې دښخ کړى شوي ماين دچاودنې له امله شهيدان شول .
دهلمند ولايت دامنيې قوماندانۍ ويندوى سمونوال عبدالاحدچوپان دباخترآژانس  خبريال ته وويل: د هلمند د بريښنا د رياست دغه دوه تنه قراردادي مامورين کله چې د لمانځه د اداکولو لپاره جومات ته روان وو؛ دکجکي ولسوالۍ په مربوطاتو کې په واټ کې په ښخ کړي شوي ماين وختل او د چاودنې له امله يې شهيدان شول .

کابل باختر د کب اتلسمه :
درې تنه ښوونکي د وسله والوطالبانو له خوا دغور ولايت په شهرک ولسوالۍ کې شهيدان شول.
دغور ولايت د پوهنې رييس صبغت الله اکبري دباخترآژانس خبريال ته وويل: په دغوښوونکو په شهرک ولسوالۍ کې د طالبانو له خوا بريد وشو او شهيدان شول .
دغور ولايت دپوهنې رييس ددغوښوونکو وژونکي په کلکه وغندل او له امنيتي ځواکونو څخه يې وغوښتل چې هغوى ونيسي او د قانون منګولو ته يې وسپاري .

کابل باختر د کب اتلسمه :
په قندهار ولايت کې نن د پښګرۍ په دوکان کې د چاودنې له امله ديوې کورنۍ دوه غړي شهيدان شول .
دقندهار ولايت د امنيې قوماندانۍ ويندوى ضيا دراني دباخترآژانس خبريال ته وويل: دغه پيښه دسپين بولدک ولسوالۍ په مربوطاتوکې هغه وخت رامنځته شوه چې يوه اندازه چاوديدونکي توکي دپښګرۍ په يوه دوکان کې وچاوديدل او له امله يې ديوې کورنۍ دوه غړي چې په دې دوکان کې يې کار کاوه؛ شهيدان شول .
يوه اړونده خبرځاى وويل: ددغې پيښې قربانيان پلار او زوى دي او په دې پيښه کې يوتن بل ټپي شوى دى. 
دپيښې ټپي د درملنې لپاره روغتون ته ليږدول شوى دى.

کابل باختر د کب اتلسمه :
څلورتنه ماين ښخوونکي طالبان نن په پکتيا ولايت کې دپوليسوله خوا ونيول شول.
دپکتيا ولايت امنيه قوماندان مل پاسوال اوراخيل دباخترآژانس خبريال ته وويل: څلورتنه وسله وال طالبان کله يې چې غوښتل د څمکنى ولسوالۍ په مربوطاتوکې په يو واټ کې ماين ښخ کړي؛ دپوليسو دمنسوبينوله خوا وپيژندل شول او ونيول شول .

Sunday, 09 March 2014 13:52

د ډاډ ګيرنې پيغام

کابل باختر د کب اتلسمه :
د سردار محمد نادر نعيم د ډاډ ګيرنې اوخواخوږۍ پيغام!
په ژورې خواشينۍ سره مو د جمهوري رياست د لومړي مرستيال مارشال محمد قسيم فهيم د مړينې خبر واوريد. له دې امله دخپلې ډاډګيرنې اوخواخوږۍ مراتب د ده کورنۍ او خپلوانو ته وړاندې کوم. 
مارشال محمدقسيم فهيم زموږ د خلکو د جهاد ستر شخصيت و او د جهاد او مقاومت په برياليتوب کې يې ستر رول ولوباوه .