20 August 2018

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل باختر د لړم دمياشتې لسمه :
د دايکندي ولايت دنوي هوايي ډګر د جوړولوکار په نږدي راتلونکې کې پيليږي .
د دايکندي والي وايي چې د ترانسپورت او هوايي چلند او دفوايدعامي  وزارتونو ددغې پروژې د کار دپيل لپاره  موافقي ته  رسيدلي دي .
د دايکندي والي عبدالحق شفق باختراژانس ته وويل  : نوى هوايي ډګردترانسپورت  او دهوايي چلند د وزارت له بودجې څخه جوړيږي .
ده  ټينګار وکړ،  چې اوس د ښار جوړولو د وزارت انجنيران دساحې د سروې او څيړنې په خاطر دغه  ولايت ته راغلي دي .
خبرځاى زياته کړه :   دايکندي ولايت دهيواد له امنو ولايتونو څخه شميرل کيږي خو په دې وروستيو کې ديو شمير جنايي پيښو  ډګر و .
ددايکندي والي وويل :   دهوايي او ځمکني ترانسپورت  خدمتونه ددغه ولايت دمرکز او ولسواليو داوسيدونکو له مهموستونزو څخه دي چې  د دغه ولايت دسړکونو دنه جوړولو په دليل  دهغه په لسګونو تنه  اوسيدونکي په ترافيکې پيښو کې  وژل کيږي او د ځمکنې ترانسپورت دستونزو دلرې کولو  لپاره تر اوسه  پورې هيڅ  پروګرام ترلاس لاندې نه دى نيول شوى .
عبدالحق شفق وويل  :  په اطلاعاتو نه  لاسرسي هم  د دغه ولايت دخلکو له محروميتونو څخه دي ځکه اوس دوه خصوصي راديوګاني په نيلي ښار کې فعاليت کوي چې يوازې سيمه ييزي پيښې تر پوښښ لاندې نيسي  او  زياتره اوسيدونکي يې  په  ټلويزيون ، راډيو ، چاپي  رسنيو ، ويب پاڼې  او ورځپاڼو لاسرسى نه لري او له دغو ستونزو څخه ځوريږي .
ددايکندي والي  زياته کړه ،  له شهرستان ولسوالۍ څخه  دمعروف ترغاښي او تناب  په لور دسړک دجوړولوکار به  ډير ژر پيل شي  ځکه ددغه ولايت يوشمير خلک له کلونو کلونو څخه راپ دې خوا ددغه سړک دجوړولوپه  هيله  دي .
دغه سړک به دفوايد عامې د وزارت او ددغه ولايت له خوا جوړ شي .
دغه راز ددايکندي والي په دغه ولايت کې ديوسل بستريز روغتون  دودانۍ دکار دپيل يادونه هم وکړه او زياته يي کړه چې ددغه روغتون کار ډير ژر پيليږي او په پام کې ده چې دغه روغتون په معياري ډول جوړ او په عصري وسايلو سمبال شي .

کابل باختر د لړم دمياشتې لسمه :
په   بغلان  ولايت کې د  يو واده په مراسمو کې د  بم د چاودنې له امله  نهه  تنه    ټپيان شول .
دغه چاودنه د مرکزي بغلان د ولسوالۍ په بازار کې تيره شپه دنهوبجو په شاو
خوا کې هغه وخت رامنځته شوه چې خلکو د واده په  مراسمو کې  ګډون کړي و و .
دبغلان ولايت دعامه نظم  دکنډک قوماندان برهان الدين زاهد باختراژانس ته وويل :  چې په دې چاودنه کې د واده د مراسمو نهه تنه ګډون کوونکي ټپيان شول .
قوماندان زاهد د  واده په مراسمو کې بم ايښودنه يې شخصي دښمني بلله  خو ويې وويل چې ښايي دا دوسله وال طالبانو  کار  وي .
هغه کور چې د واده مراسم پکې ترسره کيدل د مرکزي بغلان دولسوالۍ ودانۍ ته څيرمه موقعيت لري  .
دبغلان د عامه نظم دکنډک قوماندان وايي چې امنيتي مامورينو د بم ايښودنې دعاملينو دپيژندلو او نيولو لپاره پلټنې پيل کړي دي .
له بلې خوا د مرکزي بغلان د ولسوالۍ د روغتون يو مسوول  ډاکتر خليل نرمګوي  ددغې پيښې  د ټپيانو حالت چې  ويل کيږي ټول  نارينه دي ښه بللى دى .

 کابل باختر د لړم دمياشتې لسمه :
طالبانو نن سهار په بغلان ولايت کې دافغان پوځيانو په يوې قرارګاه بريد وکړ .
ويل کيږي چې په دې پيښه کې يوازې وسله والو طالبانو ته دسر زيان اوښتى دى .
پيښه نن سهار هغه وخت رامنځته شوه چې وسله والو طالبانو د زاړه بغلان د مغلو په سيمه کې دعامه نظم دپوليسو په  قرارګاه  بريد وکړ . 
د بغلان ولايت دعامه نظم  دکنډک قوماندان  برهان الدين  زاهد باختراژانس ته وويل :   په دې بريد کې نښته هم شوې ده چې له امله يې  دوه تنه وسله وال  طالبان ټپيان شول او نور جګړه ماران تيښتي  ته اړ شول .
په همدې حال کې دسيمې اوسيدونکي وايي چې په دې نښته کې څلور تنه وسله وال طالبان  ووژل شول او دري تنه  نور يې ټپيان شول .
قوماندان  زاهد وايي چې  په دې نښته کې افغان ځواکونو اوملکي وګړو ته دسر زيان  نه دىاوښتى .

کابل – باختر دلړم دمياشتې ١٠ :
په ميدان وردګو ولايت کې  ديوې  چاودنې له امله څلور تنه ماشومان ووژل شول.
دغه پيښه پرون له غرمي وروسته دسيدآباد ولسوالۍ په سالار سيمه کې هغه وخت رامنځته شوه  چې يو ماشوم دهاوان يوماين له بهر څخه خپل کورته يوړ.
دميدان وردګو ولايت دپوليسو دقوماندانۍ مرستيال باخترآژانس ته وويل :  
چې په دې چاودنه کې څلور تنه ماشومان ووژل شول اويوتن بل يې ټپي شو.
دغه امنيتي مقام تائيد کړه  چې ددغي کورنۍ يوه ماشوم  دهاوان يوماين خپل کور ته راوړ   چې وچاوديده.
په ميدان وردګوولايت ديوروغتيايي مرکزډاکتران وايي چې دټپي ماشوم روغتيايي  حالت دانديښنې وړ دى.
په افغانستان کې دماينونو او ناچاودلو مهماتو شتون اوس هم دخلکو په وړاندې يو جدي ګواښ  بلل کيږي .

کابل – باختر دلړم دمياشتې ١٠ :
تراوسه پورې څه  ناڅه لس تنه افغاني حاجيان له سعودي عربستان څخه هيواد ته ليږدول شوي دي .
په مکه مکرمه کې د افغاني حاجيانو دبعثه يو مسوول قاضي فيض محمد عابد
دباختر آژانس استول شوى خبريال فضل واحدکريم ته وويل : له مکې  مکرمي څخه مديني منوري او  هيواد  ته دافغاني  حاجيانو ليږدونه دپروګرام له مخې دوام لري  تراوسه پورې له مکې مکرمې څخه  څه ناڅه  لس زره  تنه افغاني حاجيان هيوادته اودغه راز څه ناڅه پنځه زره تنه نور حاجيان مديني منورې ته  ليږدول شوي دي

کابل – باختر د لړم د مياشتې ٩:
د جمهوري رياست دعالي مقام د لومړي مرستيال او سرپرست د يو حکم په ترڅ کې عبدالرحمن کبيري د پنجشير ولايت د والي په توګه وټاکل شو.
د چارو د ادارې او د وزيرانو شورا د دارالانشا د لوى رياست د اطلاعاتو او عامه اړيکو رياست باخترآژانس ته خبرورکړ:
د سيمه ييزو ارګانونو د خپلواکې ادارې په وړانديز د پنجشير ولايت مرستيال عبدالرحمن کبيري چې لوړه زده کړې او ښې کاري تجربې لري؛ د جمهوري رياست دعالي مقام د لومړي مرستيال او سرپرست محمدقسيم فهيم د يوحکم په ترڅ کې د پنجشير ولايت د والي په توګه وټاکل شو.

کابل – باختر دلړم دمياشتې ٩
فرانسه دپنجشير له ولايت سره دظرفيتونو د ودې اوبنسټونو د جوړولو په برخه کې مرسته کوي.
دفرانسې سفير نن پنجشير ته دخپل سفر په بهيرکې وويل چې هيواد يې دښه حکومتوالۍ د پياوړتيا او دخلکو د ژوندانه دحالت دښۀ والى لپاره په پنجشير کې دبيارغونې پروګرامونه تمويلوي .
ژان ميشل مارلو وايي چې هيواد يې د ناټو دپوځي ماموريت له پاى ته رسيدو وروسته هم دبيارغونې او دافغان ځواکونو د ځواکمنتيا په برخوکې به له افغانستان سره خپلو مرستو ته دوام ورکړي.
دغه فرانسوي ډيپلومات چې نوى په افغانستان کې دسفير په توګه ټاکل شوى دى؛ نن يې پنجشير ولايت ته سفر وکړ او ددغه ولايت له مسوولينو سره يې په کتنه کې ژمنه وکړه چې هيواد به يې له افغانستان سره په اقتصادي او امنيتي برخو کې مرسته وکړي.
دپنجشير د والي مرستيال عبدالرحمن کبيري دفرانسې له سفير سره په کتنه کې دپنجشير ولايت دبيارغونې، د بنسټونو د جوړولو او دخلکو د ژوندانه دښه والى په لاره کې ددغه هيواد د زيات ملاتړ غوښتنه وکړه .
ژان ميشل مارلو ژمنه وکړه چې له پنجشير سره به مرسته وکړي.
دغه فرانسوي ډيپلومات دپنجشير ولايت ته دخپل سفر هدف دافغانستان دبيلابيلو سيمو کتنه او دافغانانو د اړتياوو څيړنه وباله.
ده په داسې حال کې چې دپنجشير د والي مرستيال هم ورسره و؛ د بازارک په ښارکې د ملالۍ لـيسه وکتله.

کابل – باختر دلړم دمياشتې ٩
د نړۍ دکيمياوي وسلو يو کتوونکي خبرځاى وويل چې دسوريې دکيمياوي وسلو دتوليد ټول تجهيزات له ټاکلې مودې څخه مخکې له منځه وړل شوي دي .
دباختر آژانس دخبرله مخې: دکيمياوي وسلو دبندولو د ادارې يو خبرځاى چې ويې نه غوښتل نوم يې واخستل شي؛ وويل چې سوريې دخپلو غير فعالو وسلو دتوليد، درولو اومونتاژټول تاسيسات وړاندې کړي دي .

کراچۍ – باختر دلړم دمياشتې ٩
دپاکستان دکراچۍ ښار د نا آراميو په دوام نن د دووښځو په ګډون درې تنه په دغه ښارکې په ډزو سره ووژل شول .
دباختر آژانس دخبرله مخې: دغې وژنې دکراچۍ په بيلابيلو ناحيوکې شوې دي .
پوليسو په ابتدايي تحقيقاتو کې ويلي دي چې له دغو ښځو څخه يوه يې دکراچۍ ښار دلياري په ناحيه کې ځان وژلې ده .
په کراچۍ ښارکې ناآرامۍ په وروستيو کلونو کې زيات شوې دي او له امله يې په زرګونو تنه وژل شوي دي .
په دې وروستيو وختو کې دکراچۍ ښار پوليس هره ورځ ددغو تاوتريخوالو دلمن وهلو په تور مشکوک افراد نيسي.

کابل_باختر د لړم د مياشتې٩ مه:
د افغانستان جمهوررئیس حامدکرزي پرون له غرمې وروسته د لندن په ښارکې په خپل استوګنځي کې د بریتانیا د نړیوالې پراختیا له وزیرې مېرمن جستن ګرینینګ سره وکتل.
د جمهوري رياست مطبوعاتي دفترباخترآژانس ته خبرورکړ:
په دې کتنه کې دواړو لورو د دواړو هېوادونو ترمنځ د اړیکو او له افغانستان سره په انکشافي پروژوکې د بریتانیا د ژمنو او همکاریو په اړه بحث او خبرې اترې وکړې.
د بریتانیا د نړیوالې پراختیا وزیرې مېرمن جستن ګرینینګ وویل چې هېواد به یې تر۲۰۱۷ میلادي کال پورې هر کال  له افغانستان سره له ۲۰۰ میلیونو ډالرو څخه زیاته مرسته وکړي.
دې وویل چې موږ دې ته لېوال یو چې له افغانستان سره تر ډیره په هغو برخوکې مرستې وکړو چې د هغه هېواد دولت ته لومړیتوب ولري.
حامدکرزي څرګنده کړه چې له افغانستان سره د بریتانیا مرستې دې تر ډیره په بنسټيزوبرخو له هغې جملې څخه پر پوهنې، لوړو زده کړو، سوداګرۍ، کرنې، برېښنا انرژۍ او سړک جوړونې متمرکزې شي.

په دې کتنه کې دواړو لورو د افغانستان او پاکستان ترمنځ د اقتصادي پروژو پر اهمیت باندې هم خبرې وکړې.
د افغانستان جمهوررئیس وویل: په هره اندازه چې په سیمه کې سوله او ثبات ډیر شي، په هماغه اندازه د پرمختيايي پروژو د چټک تحقق لپاره امکانات برابریږي.#