16 February 2019

RSS Facebook

سوداگریز


تازه خبرونه

اووه تنه وسله وال طالبان په فارياب کې دسولې له بهيرسره  يوځاى شول .

اووه تنه وسله وال طالبان په فارياب کې دسولې له بهيرسره يوځاى شول .

کابل باختر دسلواغې شپږ ويشتمه : اووه تنه وسله و ال...

استاد دانش :  امارتي، عبوري اولنډ مهال حکومتونه  صفر نفطې  ته ستنيدل دي .

استاد دانش : امارتي، عبوري اولنډ مهال حکومتونه صفر نفطې ته ستنيدل دي .

کابل باختر دسلواغې شپږ ويشتمه : دافغانستان داسلامي جمهوريت دويم مرستيال...

جمهوررئیس غني د ترکیې د دفاع وزیر خپل حضور ته ومانه

جمهوررئیس غني د ترکیې د دفاع وزیر خپل حضور ته ومانه

کابل باختر دسلواغې شپږ ويشتمه : د افغانستان د اسلامي جمهوریت...

Youtube Player

khantry design

سوداگریز

سوداگریز

کابل باختر دکب دوه ويشتمه :
دننګرهار ولايت له پوځي اکاډمى څخه د پوليسو يوسلو اوولس تنه سرتيري فارغ شول.
دغو سرتيرو د اتو اوونيو لپاره په بېلابېلو پوځي برخوکې په دغې اکاډمى کې  زده کړې وکړې.
د ننګرهار ولايت د پوځي اکاډمى قوماندان مفاد خان رحيمزي د باخترآژانس خبريال ته وويل چې دغه سرتيري همدا اوس د افغانستان په بېلابېلو سيموکې په  نظامي واحدونوکې د ځاى پرځاى کيدو په حال کې دي.
د ترلاسه شويو شميرنو له مخې: ددغې پوځي اکاډمى له جوړيدو څخه تراوسه پورې  څه ناڅه اته شپيته زره يوسلو يو اويا تنه ځوانان دافغان  ښوونکو له خوا روزل شوي دي.
په دغو ځوانانوکې د پوليسو پوځي واحدونو ته نوى جذب شوي کسان او د دغو واحدونو برحال سرتيري شامل دي.

کابل باختر دکب دوه ويشتمه :
د هرات ولايت  د يوه سړک د جوړولو او کريړ اچولو کار پاى ته ورسيد .
د دولسو کيلومترو په اوږدوالى او د شپږو مترو په سور دغه سړک د قلعه کاه په ولسوالۍ کې نږدې اته کلي له يوبل او ددغه ولسوالۍ له بازار سره نښلوي.
ددغه سړک په جوړولو او کريړ اچولو نږدې څليرويشت مليونه افغانۍ لګيدلي دي چې دکليو د بيا جوړولو او پراختيا وزارت د کليوالي لارو د جوړولو د پروګرام له خوا ورکړې شوې دي.
د فراه ولايت د کليو د بياجوړولواو پراختيا رييس انجنير عبدالروف دباخترآژانس خبريال ته وويل چې ددغه سړک په جوړيدو اوکريړ اچولو سره دقلعه کاه ولسوالۍ  د اتو کليو د نږدې پنځه پنځوسو زرو تنو اوسيدونکو ترانسپورتي ستونزې په مستقيم اوغيرمستقيم ډول لرې شوې دي.
ويل کيږي مخکې له دې دغو کورنيو دسختو او اوږدو لارو په وهلو سره تګ راتګ کاوه.
ددغه سرک په تګلوري کې پنځلس پلګوټي او په لسګونو سيل برونه جوړ شوي دي چې سړک د سيلاو او د نورو پيښو له احتمالي خطرونو څخه خوندي وساتي.
  په همدې حال کې د قلعه کاه ولسوالۍ بزګرانو او بڼوالو ددغه سړک د جوړيدو او کريړ اچولو هرکلى وکړ او ويې ويل چې له دې وروسته له ضايعاتو پرته اوپه کمو ستونزو سره خپل کرنيز محصولات کولى شي بازارونو ته ورسوي.

کابل باختر دکب دوه ويشتمه :
د هرات والي سيد فضل الله وحيدي په تيرو لسوکلونوکې دهرات ولايت دبيا جوړولو او دامنيت دتامينولوپه کارکې د ايتالوي ځواکونو ستر رول وستايه.
دهرات والي په کابل کې د ايتاليا له سفير سره په کتنه کې د لويديځ زون په ولايتونوکې د امنيت د تامينولو او دبيا جوړولو په کارکې د ايتاليا رول ټاکوونکى وباله او د دغو همکاريو د دوام غوښتنه يې وکړه .
دباخترآژانس دخبرله مخې: ښاغلي وحيدي ټينګار وکړ چې د هرات خلک به  هيڅکله د ايتاليا همکاري هيرې نه کړي.
په مقابل کې په کابل کې د ايتاليا سفير اين پيزوتي د هرات ولايت ته دخپل سفر اصلي هدف له سيمه ئيزو مقاماتو او له ايتالوي پوځيانو سره کتنه ده چې دلويديځ زون د آيساف په قرارګاه کې ديره دي؛ وباله او تينګار يې وکړ چې د ايتاليا دولت به هم  د پخوا په شان خپلو همکاريو ته دوام ورکړي.
سره له دې چې ويل کيږي د ايتاليا پي آر ټي به په راتلوونکو ورځوکې په هرات ولايت کې خپل فعاليت  په رسمي ډول پاى ته ورسوي؛ خو د ايتاليا سفير اوددغه هيواد جګپوړو مسوولينو  اعلام کړى دى چې د هرات ولايت له مسوولينو او خلکو سره به  خپلو مرستو ته دپخوا په شان دوام ورکړي .
په کابل کې د ايتاليا سفير په داسې حال کې هرات ته سفر کوي چې نږدې يوه مياشت مخکې د دريو پراختيايي طرحو قرارداد چې د ايتاليا هيواد له خوا په هرات کې اجرا کيږي؛  لاسليک شو .
د ايتاليا هيواد چې په تيرو اوو کلونوکې په هرات ولايت کې د پي آر ټي مسووليت  په غاړه درلود؛ کال په کال ددغه ولايت په پراختيايي او دبيا جوړولو په طرحوکې سل مليونه امريکايي ډالره لګولي دي.
په يوبل خبرکې ويل شوي دي چې د ايتاليا سفير د سوداګرۍ او صنايعو د خونو له رييسه هيئت سره په کتنه کې د تجارتي اړيکو د ودې او پراختيا په خاطر دخپل هيواد دعلاقمندۍ خبر ورکړ.

کابل باختر دکب دوه ويشتمه :
وسله والوطالبانو په ننګرهار ولايت کې د انتخاباتو د خپلواک کميسيون درې تنه کارکوونکي وتښتول .
دغه کارکوونکي پرون ناوخته د انتخاباتو دترسره کولو دبهير دچمتو کولو لپاره  د هسکې مينې ولسوالۍ ته تللي وو چې په لاره کې د وسله والو طالبانو له خوا  پرې بريد وشو او وتښتول شول .
د ننګرهار د والي ويندوى احمد ضيا عبدالزي دباخترآژانس له خبريال ګلستان غالب سره په خبروکې د وسله والو طالبانو له خوا د انتخاباتو دکميسيون د درېو تنوکارکوونکو تښتول تاييد کړل او ويې ويل چې امنيتي مامورينو او قومي مشرانو د هغوى د خلاصون لپاره هلې ځلې  پيل کړې دي.
تراوسه پورې د تښتول شويوکارکوونکو دبرخليک په باب خبر نه دى ترلاسه شوى.

کابل باختر دکب دوه ويشتمه :
په افغانستان کې د نړيوالو ځواکونو لوى قوماندان وايي: که چيرې نړيوال  ځواکونه  د٢٠١٤ ميلادي کال تر پايه پورې له افغانستان څخه ووځي؛ دغه موضوع به په افغان ځواکونو او دښځو په حالت باندې ناوړه اغيزه وکړي او افغانستان ته به د القاعده د بيا راستنيدو زمينه برابره کړي.
باخترآژانس د نړيوالوخبرځايونو له خولې خبر راکړ: جنرال جوزيف دانفورد چې پرون په واشنګټن کې د امريکا د سنا د پوځي خدمتونو د کميټې په وړاندې وينا کوله؛ وويل: که چيرې ټول نړيوال ځواکونه د ٢٠١٤ ميلادي کال په پاى کې له افغانستان څخه ووځي؛ په ٢٠١٥ميلادي کال کې به د افغان امنيتي ځواکونو د کمزورتيا بهير رامنځته شي؛ د القاعده ډار اچوونکې شبکه به  بيا منسجمه شي او د لويديځ پرخلاف د بريدونو د ترسره کولو په مقصد به  له سيمې څخه استفاده وکړي .
جنرال دانفورد وويل: موږ د ترلاسه شويو استخباراتي اطلاعاتو له مخې په دې پوهيږو چې القاعده غواړي خپل فعاليتونه په افغانستان او پاکستان کې دوام ورکړي او هغوى  به  زموږ وتل د ستر برياليتوب په توګه  وبولي .
ده وويل: له افغانستان څخه په بشپړه توګه زموږ د وتلوپه صورت کې به ډار اچوونکي يوازې په فزيکي ډول تنظيم نه شي بلکې دغه وتل به القاعده ته  د روحيې د ورکولو دعامل په توګه  وي .
په واشنګټن کې د امريکا د سنا د پوځي خدمتونو په کميټه کې له جنرال دانفورد څخه پوښتنه وشوه چې  له افغانستان  څخه دنړيوالو ځواکونو د وتلو په صورت کې به  افغان ښځې له څه برخليک سره  مخامخې شي.
ده وويل: په هغه صورت کې به  په افغانستان کې دښځو لپاره حالت خراب شي.
ده زياته کړه: که چيرې د افغانستان حکومت دوه اړخيز امنيتي قرارداد لاسليک کړي؛ دى به له اتو زرو څخه تر دولسو زرو پورې سرتيرو سره د افغان ځواکونو د همکارۍ روزنې او سلامشورو لپاره راحت احساس کړي.
دانفورد ويلي دي: که چيرې د روان ميلادي کال تر مني پورې د افغانستان او امريکا ترمنځ دوه اړخيز امنيتي قراردادلاسليک نه شي؛ دغه موضوع به  د ٢٠١٤ کال په پاى کې له افغانستان سره د ټولو امريکايي ځواکونو د وتلو پروګرام له ستونزو سره مخامخ کړي.

کابل باختر دکب دوه ويشتمه :
د هرات ولايت د شينډنډ ولسوالۍ په مربوطاتوکې د ملي اردو د ځواکونو په عملياتوکې يو وسله وال مخالف ووژل شو او د دښمن يوه اندازه جنګي وسايل ترلاسه شول .
د ملي دفاع وزارت مطبوعاتي دفتر باخترآژانس ته خبر ورکړ: دغه عمليات د شينډند ولسوالۍ په مربوطاتوکې د امنيت د ټينګښت په مقصد د ملي اردو د خاصو عملياتو دفرقې د منسوبينو له خوا ترسره شول چې له امله يې يو وسله وال مخالف ووژل شو او څلور ميله سپکه وسله، يوه پرتله او دوه بوشکې چاوديدونکي توکي ترلاسه شول.
د يوبل خبر له مخې: دملي اردو  دځواکونو  دهغو عملياتو په بهيرکې چې دقندهار ولايت  د شا ه ولي کوټ ولسوالۍ په مربوطاتوکې ترسره شول؛ د دښمن دوه کره بين ټوپکونه او دوه دوربينونه ترلاسه شول .
په يوبل خبر کې ويل شوي دي چې دملي اردو دوه تنه منسوبين د امنيتي دندې  د ترسره کولو په وخت کې په واټ کې د ښخ کړى شوي ماين د چاودنې له امله  شهيدان شول.

کابل باختر دکب دوه ويشتمه :
ښاريان ادعاکوي چې نور دکابل ښار د هوا د ککړتيا دکمښت لپاره کومه هيله په سرکې نه لري.
خو ځينې يې په دې باور دي: تر هغه وخته پورې چې د ژوندانه د چاپيريال ساتنې په برخه کې همکاري موجوده نه وي؛ دولتي ادارې په يوازيتوب سره نه شي کولاى په کابل کې د هوا ککړتيا کمه کړي.
ځينې دغه ښاريان وايي: نور دکابل ښار د هوا دککړتيا دکمښت او يا مخنيوي په باب  دولتي مسوولينو په ژمنو او خبرو اعتماد او باور نه لري. ځکه په دې اړوند ډيرکم کار هم نه دى شوى او د ښار د هوا دککړتيا عوامل لا تر اوسه پورې په زياته اندازه شتون لري.
د نوې کارتې اوسيدونکي عبدالمالک د باخترآژانس خبريال ته وويل چې د ترانسپورتي وسايطو د دود د مخنيوي، د نانوايي ګانو داشونو، حمامونو او د جنراټورونو د سوند د موادو په باب د بدلون لپاره اړوندو دولتي ادارو د تدبيرونو ژمنې وکړې او دغه عوامل هم دښار د هوا په ککړتيا کې ستر رول لري. خو لا تراوسه پورې ليدل کيږي چې دښار په واټونوکې ځينې وسايط غليظ دود توليدوي او کله هم نه دى ليدل شوى چې د ترافيکو موظف کومه واسطه درولې وي او تر څيرنې لاندې يې نيولې وي.
دغه ښاري دغه راز څرګنده کړه: آن په هغه حمام کې چې د محمدجان خان واټ د ودانيو ترشاه دي او د ښار مرکزي ساحه بلل کيږي؛ لا تراوسه پورې هم په زياته پيمانه د ډبرو سکاره سوځول کيږي او په همدې ترتيب په ښارکې له جنراټورونو څخه هم کار اخستل کيږي.
دقلعه زمان خان اوسيدونکى زمرى په دې باور دى چې اړونده دولتي مسوولين هغه عوامل چې د ښار دهوا دککړتيا سبب کيږي؛ په آسانى سره له منحه وړلاى شي  خو لکه څنګه چې ليدل کيږي؛ دغه مسوولين د خلکو د آرامۍ په وړاندې خپلې دندې په زړه سوى سره نه ترسره کوي.
په همدې حال کې د دريم مکروريان اوسيدونکى سيدهشام په دې باور دى: تر هغه وخته پورې چې ښاريان د ژوندانه دچاپيريال ساتنې په لاره کې همکاري ونه کړي؛ لرې بريښي چې کابل ښاروالۍ او يا د ژوندانه دچاپيريال ساتنې اداره وکولاى شي د هوا دککړتيا په کمښت اويا د ښار په پاکوالى بريالى شي.
ده څرګنده کړه: که چيرې هر ښاري د ژوندانه دچاپيريال ساتنې په برخه کې خپل فردي مسووليت لکه څنګه چې د اسلام مبين دين  په فردي او ټولنيز نظافت لاس پورې پورې کړى؛ په دې پوه شي چې دولتي ادارې په آسانى سره کولاى شي د ژوندانه د چاپيريال ساتنې او د ښار د هوا دککړتيا دکمښت په کارکې خپلې دندې په برياليتوب سره ترسره کړي .
دباختراآژانس خبريال هلې ځلې وکړې چې په دې باب د اړوندو چارو د مسوولينو نظر هم ترلاسه کړي؛ خو د رخصتۍ په نسبت په دې کار بريالى نه شو.

کابل باختر دکب دوه ويشتمه :
په بلخ ولايت کې يو زرو درې سوه نجونې او ښځې ته د کارموندلو د تعليماتو د پروګرام تر روزنې لاندې دي.
دغه پروګرام د نړيوال بانک له خوا د (سي اچ اې) د دفتر په همکارۍ پيل شوى دى.
د (سي اچ اې) د دفتر مسوول ډاکتر ميرويس صافي د باخترآژانس خبريال ته وويل: په دې پروګرام کې له اتلس کلنى څخه تر ديرش کلنى پورې د دولسمو ټولګيو يو زرو درې سوه تنه نجونې اوښځې د شپږومياشتو لپاره دکمپيوټر، انګليسي ژبې  او د ژوندانه د مهارتونو په څانګوکې روزلې کيږي.
خبرځاى زياته کړه چې ددغه مرکز ټول مالي او تدارکاتي لګښتونه د نړيوال بانک له خوا ورکول کيږي او د هغه قرارداد له مخې چې دپوهنې وزارت او د نورو دولتي ادارو ترمنځ شوى دى؛ ددغه پروګرام په سلوکې او يا فارغانې په کار وکومارلې کيږي.
ويل کيږي دغه پروګرام د لومړي ځل لپاره د نړيوال بانک له خوا په نيپال کې او د دويم ځل لپاره په افغانستان کې هغه هم په بلخ ولايت کې پيل شوى دى.

کابل باختر دکب دوه ويشتمه :
په آستانه کې د افغانستان د اسلامي جمهوريت لوى سفيرمحمد فاروق بره کي  په دې وروستيو وختوکې خپل باور ليک د يو لړ خاصوتشريفاتي مراسمو په ترڅ کې  د قزاقستان جمهور رييس نور سلطان نظر بايوف ته وړاندې کړ.
د افغانستان د بهرنيو چارو وزارت د اطلاعاتو رياست باخترآژانس ته خبر ورکړ: د باورليک د وړاندې کولو له مراسمو وروسته د افغانستان سفير د قزاقستان له جمهور رييس سره په کتنه کې د افغانستان د اسلامي جمهوريت د جمهور رييس حامدکرزي ښې هيلې او سلامونه د قزاقستان جمهور رييس ته ورسول او هيله يې وکړه چې په آستانه کې د افغانستان داسلامي جمهوريت دسفير په توګه وکولاى شي د دوه اړخيزو اړيکو د پراختيا او پياوړتيا په لاره کې ستر برياليتوبونه ترلاسه کړي.
محمد فاروق بره کي مخکې له دې د بهرنيو چارو وزارت د اقتصادي اړيکو د رييس، په ازبکستان کې د افغانستان د اسلامي جمهوريت د لوى سفير او د بهرنيوچارو وزارت د سرحدي او د امنيتي همکاريو د چارو د رييس په توګه دندې ترسره کړې دي.

کابل باختر دکب دمياشتې  ٢١ :
دانتخاباتو دخپلواک کميسيون مسوولين هيله لري چې  راتلوونکي هجري لمريز کال تر لومړۍ ورځې پورې وکولاى شي   چې ټول  حساس اوغير حساس  انتخاباتي مواد  درايې ورکولو مرکزونو ته ورسوي .
دانتخاباتو دخپلواک  کميسيون دچارواکو دڅرگندونوله مخې :
دغه کميسيون   ولايتونو ته  درايي ورکولو  دمرکزونو دلوژستيکي موادو او داړتيا وړ نورو  موادو ليږدول  په دريو پړاونو کې  تنظيم کړي دي .
ددغه پروګرام لومړى پړاو  چې دولايتونو مرکزونو ته دټولو  حساسو  او غير حساسو  موادو ليږدونه ده  ، بشپړ شوى دى .
په دويم پړاو کې  دولايتونو له مرکزونو څخه   دولسواليو مرکزونو ته ددغو موادو ليږدونه شامله ده .
تراوسه پورې  دافغانستان  زياترو ولسواليو ته دغه مواد  ليږدول شوي دي   خو امنيتي ستونزو  او په ځينو ولايتونو کې هم   داورښت  او دواورې دشتون په شان
ستونزو  درايي ورکولو  مرکزونو ته دلوژستيکي موادو دليږدونې مخه نيولې ده، هغه ستونزې  چې له پيښو سره دمبارزې دادارې دمسوولينوله خوا هم تائيد شوي دي .
په همدې حال کې  دانتخاباتو دخپلواک   کميسيون ويندوى  نورمحمد نور وايي   چې په ناامنو سيمو کې  دامنيتي ستونزو  په لري کيدوسره  موږ تيار يو چې په ډير لنډ ممکن وخت کې لوژستيکي مواد وليږدو.
په دې ترڅ کې ددغه کميسيون مسوولين ډاډمن دي  چې درايې ورکولو په ټاکلو  حوزو کې امنيت تامينيږي او ترراتلوونکو لسو ورځو پورې   دغو مرکزونو ته دلوژستيکي موادو ليږدونه  پاى ته رسيږي.