12 December 2018

RSS Facebook

سوداگریز


تازه خبرونه

د کندز ولايت د اړوندو ولسواليو او ددغه ولايت دمرکز د کلسترکولو پروګرام پيل شو

کابل \باختردليندۍ دمياشتې٢١نيټه د کندز ولايت د مرکز او...

سل انځور شوي آثار نندارې ته وړاندې شول

کابل \باختردليندۍ دمياشتې٢١نيټه د افغانستان د دوو تنو انځورګرانو...

د افغانانو د سولې طرحه د هند له سفير سره د بهرنيو چارو وزارت د سياسي معين د کتنې محور

کابل \باختردليندۍ دمياشتې٢١نيټه د افغانستان د اسلامي جمهوريت د...

Youtube Player

khantry design

سوداگریز

سوداگریز

کابل باختر د  مرغومي دولسمه
دځانمرګو بريدونو يوتن سازمان ورکوونکى او يوځانمرګى بريدکوونکى نن په ننګرهار ولايت کي د ملي امنيت د ځواکونو له خوا ونيول شول.
دننګرهار ولايت دملي امنيت يوخبرځاى باخترآژانس ته وويل: د ملي امنيت ځواکونو  محمدعمر چې د مصطفى په مستعار نامه پيژندل کيږي او د لغمان ولايت د عليشنګ ولسوالۍ اوسيدونکى دى. کله يې چې غوښتل ځانمرګي بريد کوونکى محمودالحسن دلغمان ولايت دمهترلام ښارته وليږدوي؛ دواړه دننګرهار_ لغمان دلارې په اوږدوکې ونيول شول.
خبرځاى وويل: دوى د لغمان ولايت په مهترلام ښارکې د تروريستي عملياتو د ترسره کولو نيت درلود او امنيتي ځواکونه اوس د پيښې په څيړنې بوخت دي.

کابل باختر د  مرغومي دولسمه
امنيتي ځواکونو د قندهار ولايت په پنجوايي ولسوالۍ کې د طالبانو د جنګي وسايلو يوه زيرمه کشف کړه .
د قندهار د والي ويندوى جاويدفيصل باخترآژانس ته وويل: امنيتي ځواکونو د پنجوايي ولسوالۍ په مربوطاتوکې د عملياتو په بهيرکې د طالبانو د وسلو او مهماتو يوه زيرمه کشف او ترلاسه کړه.
خبرځاى وويل: له دغې زيرمې څخه ډول ډول ماينونه، سپکې او درندې وسلې، د پيکا ګولۍ، څو دوربينونه اومخابرې او سل  کيلوګرامه باروت ترلاسه شوي دي او په دې اړوند دوه تنه نيول شوي دي او تر پوښتنې لاندې دي.

کابل باختر د  مرغومي دولسمه
د افغانستان د اسلامي جمهوريت د جمهور رييس حامدکرزي د خواشينۍ او ډاډګيرنې پيغام!
په ډيرې خواشينۍ سره خبر شوم چې د بغلان ولايت يو قومي مشرحاجي حکم خان د ورپيښې ناروغۍ له امله له دې فاني نړۍ څخه سترګې پټې کړې دي.
انالله واناليه راجعون. 
ارواښاد حاجي حکم خان د خپلو خلکو خيرخواه، مصلح او قومي مشر و. د ده  مړينه يوه ضايعه ده.
دخپلې خواخوږۍ او ډاډګيرنې مراتب د ده کورنۍ، دوستانو او د بغلان ولايت خلکو ته وړاندې کوم. الله تعالى دې دى وبخښي اوکورنۍ ته دې يې جملي صبر په نصيب شي.

کابل باختر د  مرغومي دولسمه :
د پروان ولايت د بګرام ولسوالۍ اوسيدونکي  په دغې ولسوالۍ کې د نشه يي توکو د راکړې ورکړې د زياتوالى له امله انديښنه لري.
دوى ادعاکوي چې په دغې ولسوالۍ کې  پوليس د نشه يي توکو د راکړې ورکړې  مخنيوي ته پاملرنه نه کوي .
دغه کرغيړنه پديده چې يوشمېر ځوانان پرې روږدي شوي دي؛ د کورنيو حالت يې ګډود کړى دى او په ټولنه کې د بدبختى باعث شوې ده.
د بګرام يو تن اوسيدونکى لعل محمد د پوليسو په اجرااتو سخت انتقاد وکړ او ويې ويل: د بګرام مشرانو، مخورو او اوسيدونکو څو ځلې د دغې ولسوالۍ له امنيه قوماندانۍ څخه وغوښتل چې د نشه يي توکو د راکړې ورکړې مخه ونيسي  خو د پوليسو اداره ورته پاملرنه نه ده کړې.
ده زياته کړه: که چيرې مو د بګرام امنيه قوماندان ته وويل چې د بګرام ولسوالۍ په بېلابېلو ساحوکې د نشه يي توکو راکړه ورکړه شته؛ بايدپوليس اقدام وکړي؛
خو امنيه قوماندان زموږ دې غوښتنې ته پاملرنه ونه کړه.
په همدې ډول د بګرام څو تنو نورو اوسيدونکو هم وويل چې د بګرام د نود د بازار په ځينو دوکانونو او د استوګنې په کورونوکې نشه يي توکي په پرچون ډول پلورل کيږي. 
دغه راز د بګرام ولسوالۍ د نشه يي توکو پرخلاف د مبارزې آمر نعمت الله هم په دوکانونو او په تېره بيا د نود په سيمه کې نشه يي توکي په ښکاره ډول په عمده اوپرچون  ډول پلورل کيږي .
ده په دغو سيموکې د نشه يي توکو د پلورنې پرخلاف د اقداماتو په باب وايي:  زموږه اداره اجرائيه قوه نه ده؛ څه نشو کولى او موږ هلي ځلې کوو ترڅو په پروان کې د نشه يي توکو د روږدوکسانو د زياتوالى مخه ونيسو. خو هلې ځلې هغه وخت  نتيجه ورکوي چې دنشه يي توکو د پلورنې مخه ونيول شي.
په همدې حال کې د پروان امنيه قوماندان سمونوال عبدالرحمن سرجنګ باخترآژانس ته وويل: پوليس موظف  شوي دي چې د نشه يي توکو د راکړې ورکړې  مخه ونيسي او عاملين يې د قانون منګولو ته وسپاري .
د بګرام ولسوالۍ د نشه يي توکو پرخلاف د مبارزې آمر نعمت الله د روږدو کسانو د درملنې په باب وويل: له يوکال راپديخوا په نشه يي توکو څليرويشت تنه روږدي کسان  يې روغتون ته د درملنې لپاره معرفي کړي دي او تداوي شوي دي.
دنشه يي توکو پرخلاف د مبارزې د وزارت د معلوماتو له مخې: دکوکنارو په سلو کې نوي کرکيله په نهو جنوبي او لويديځو ولايتونوکې دي چې زياتره د طالبانو تر کنترول لاندې دي.

کابل باختر د مرغومي دولسمه د سمنګانو ولايت دنشه يي توکو د روږدو کسانو د درملنې دمرکز مسوولين وايي: د روان کال په بهيرکې په نشه يي توکو يو سلو نوي تنه روږدي کسان يې تداوي کړي دي . د سمنګانو ولايت دنشه يي توکو د روږدو کسانو د درملنې د شل بستريز روغتون سرپرست ډاکترمحمدصابرباهنر باخترآژانس ته وويل: دغه روغتون چې د هيواد دعامې روغتيا د وزارت له خوا له دريو کلونو راپديخوا په دغه ولايت کې په فعاليت پيل کړى دى؛ د روږدوکسانو د درملنې په خاطر يې زيات برياليتوبونه ترلاسه کړي دي. باهنر وويل: دوى يواځې په روان کال کې يو سلو نوي تنه چې په ډول ډول نشه يي توکو اخته وو؛ تداوي کړي دي او د يوسالم فرد په توګه يې بيرته ټولنې ته وړاندې کړي دي . ده وويل: هغو ناروغانو ته چې دغه روغتون ته مراجعه کوي؛ له راجستر وروسته د پنځلسو ورځو لپاره دنشه يي توکو د زيانونوپه باب سلامشورې ورکوي او په دې موده کې دوى له نشه يي توکو څخه استفاده کموي او بستر ته چمتو کيږي چې وروسته ناروغ له ديرشوڅخه تر پنځه څلويښتو ورځو پورې په بسترکې تداوي کيږي . باهنرپه داسې حال کې چې دغه روغتيايي مرکز د نشه يي توکو د روږدو ناروغانو د درملنې لپاره مناسب ځاى وباله؛ ويې ويل: زياتره افراد تراوسه پورې په دغه روغتون کې تداوي شوي دي چې له ايران او پاکستان څخه راستانه شوي وو. دغه راز دهيواد دنورو ولايتونو اوسيدونکي هم په دغه روغتون کې تداوي شوي دي . ده وويل: په دغه روغتون کې خواړه، د خوب ځاى، د سواد د زده کړې او د ديني علومو د زده کړې فرصتونه او د واليبال ورزش ناروغانو ته چمتو شوي دي او د موسيقي آلات هم د ناروغانو په واک کې هم ورکول کيږي. په نشه يي توکو يو تن روږدى عبدالجميل چې له دريو اوونيو راپديخوا په دغه روغتون کې بستردى؛ وايي: څلورکاله يې په ايران کې تير کړى و او هلته په اپينو روږدى شوى دى، خو اوس له څليرويشتو ورځو راپديخواپه دې روغتون کې بستر او حالت يې ښه دى.

کابل باختر د  مرغومي دولسمه
په بغلان ولايت کې د روان کال په بهيرکې د ډبرو سکرو د پلورنې له پلوه څه دپاسه  يو ملياردو اته سوه شپږ ويشت مليونه افغانۍ دولت ته عايد ترلاسه شوي دي.
د شمال د ډبرو سکرو د تصدۍ رييس انجنيرعبدالخالق تصميم باخترآژانس ته وويل:  د شمال د ډبرو سکرو د تصدۍ رياست دفني منسوبينو د هلوځلو په نتيجه کې  سږ کال د ډبرو سکرو ايستل د تيرکال په پرتله زيات شوى دى چې د کانونو او پطروليم  وزارت د ورکړى شوى پروګرام په پرتله د روان کال په نهو مياشتوکې دغه بهير په سلوکې سل تحقق موندلى دى.
ده زياته کړه: څه دپاسه يو مليونو دوه سوه څوارلس زره ټنه سکاره دسمنګانو ولايت د دهن تور، شب باشک او د آبخورک له کانونو څخه او د بغلان ولايت د تاله او برفک له کانونو څخه ايستل شوي دي چې له دې پلوه د تيرکال په پرتله څه دپاسه  درې سوه اووه څلويښت مليونه او دوه سوه اووه پنځوس افغانۍ زيات عوايد په پانک کې تحويل شوي دي.
ده دشمال د ډبرو سکرو د تصدۍ په عوايدوکې د زياتوالى عمده علت د امنيت تامينول، دکانونو په سوفونوکې دفني مسوولينو بلدتيا او واکمنۍ او په کارونو کې شفافيت وباله او زياته يې کړه: د هغه وروستۍ سروې له مخې چې په کانونوکې د ډبرو سکرو له زيرمو څخه ترسره شوې دي؛ په دغوکانونوکې څه دپاسه پنځه سوه مليونه ټنه ډبره سکاره اټکل شوى دى چې تراوسه پورې په سلوکې پنځه يې ايستل شوى دى. 

کابل باختر د  مرغومي دولسمه
دبدخشان ولايت د لسو ولسواليو مواصلاتي لارې د وروستيو څلور ورځولپاره د واورې د اورښت له امله ددغه ولايت له مرکز سره تړلې شوې دي.
د بدخشان د والي ويندوى احمدنويد فروتن باخترآژانس ته وويل: دبدخشان ولايت د مايمي ، شيکى، خواهان،  نسي، کوفاب، کوهستان، راغستان ، ياوان ، شغنان او د ارغچ خوره د ولسواليو مواصلاتي لارې د واورې د اورښت له امله ددغه ولايت له مرکزسره بند شوې دي او آن ددغو کليومواصلاتي لارې به د١٣٩٣ کال دغبرګولي ترمياشتې پورې تړلې وې.
دبدخشان ولايت له پيښو سره دمبارزې د تيارى د ادارې مسوول په دې باب باخترآژانس ته وويل: په څلورو ولسواليوکې مو زيرمې  جوړې کړې دي چې وکولى شو نورو ولسواليو ته مرستې ورسوو.
ده زياته کړه: يو زرو اووه سوه اتيا ټنه غنم په څلورو ولسواليوکې زيرمه شوې ده  چې د اړتيا په صورت کې به  نورو ولسواليو ته هم وليږدول شي.
دغه راز  شل زره ليتره غوړي او لس ټنه نسک په فيض آباد ښارکې زيرمه شوې ده چې د احتمالي پيښو د رامنځته کيدو په صورت کې په خلکو وويشل شي.

کابل باختر د  مرغومي دولسمه
دفراه ولايت مرستيال وايي: د راتلوونکى کال په انتخاباتو کې دګډون لپاره دخلکو دهڅونې په لاره کې د ديني عالمانو رول مهم  دى او هغوى  بايدخلک په انتخاباتو کې دګډون لپاره وهڅوي.
د فراه د والي مرستيال محمد يونس په يوه پراخه غونډه کې چې د ديني عالمانو او د ښځو د حقوقو د مدافعانو په ګډون ددغه ولايت په مرکزکې جوړه شوې وه؛ د راتلونکى کال د انتخاباتو د لاښه  ترسره کولو په  لاره کې د ديني عالمانو رول مهم وبلل او ويې ويل: د فراه  ولايت په ولسواليوکې  خلکو د ديني عالمانو لارښوونو او پريکړو ته زيات ارزښت ورکوي او ديني  عالمان کولاى شي په انتخاباتوکې دګډون  د ارزښت په باب خلکو ته دقيق معلومات ورکړي.
ده دغه راز په ټينګار سره وويل: بايدپوه شو چې دراتلونکى  کال دانتخاباتو ترسره کول د هيواد  د ټولنيز او اقتصادي او نورو  برخو لپاره مهم او ارزښتناک دى او بايد د ښځو او نارينه و په ګډون ټول خلک د جمهوري رياست او د ولايتي شوراګانوپه انتخاباتوکې ګډون وکړي او خنډونه لرې کړي .
د فراه ولايت د ښځو د چارو رييسې ليلما صديقي په دې غونډه کې وويل: له بده مرغه په فراه کې زيات نارينه خپلو ميرمنو ته اجازه نه ورکوي ترڅو په انتخاباتوکې ګډون  وکړي او دغه موضوع د انديښنې وړ ده. دښځو دچارو رييسې د دغه ولايت له ديني عالمانو څخه وغوښتل چې په انتخاباتوکې دښځو دګډون د ارزښت  په باب پراخ تبليغات وکړي.
دى ټينګار وکړ: په هغه صورت کې چې ديني عالمان په جوماتونو او له منبرونو څخه له خلکو  وغواړي چې په انتخاباتوکې دګډون لپاره ښځو ته اجازه ورکړي؛ دغه ستونزه به لرې شي .
په همدې حال کې په مراسموکې برخه والو ديني عالمانو د دغه ولايت سيمه ئيز حکومت  سره د همکارۍ ژمنه وکړه.
د فراه ولايت په دولتي اوخصوصي اداروکې د ښځورول لږ دى او په دغه موضوع تل د ښځو د حقوقو له مدافعانو له خوا انتقادکيږي.

کابل باختر د  مرغومي دولسمه :
څلورتنه  ماين ښخوونکي تېره شپه په هلمند ولايت کې ووژل شول .
دهلمند د امنيې قوماندانۍ مطبوعاتي آمرسمونوال عبدالاحد چوپان باخترآژانس ته وويل: دغو ماين ښخوونکو د مارجې ولسوالۍ د ناور توخې په سيمه کې د هغه ماين دچاودنې له امله ووژل شول چې غوښتل يې ماين په دغه سيمه کې ځاى پرځاى کړي.
ده زياته کړه چې د وژل شويوکسانو مړي له سيمې څخه د پوليسو له خوا وليږدول شول.
دغه راز دهلمند د والي ويندوى عمر ځواک وويل چې دپوليسو ځواکونه د طالبانو له يو پټنځي څخه شپږ توغندي د مارجې ولسوالۍد ناور توخې له ساحې څخه ترلاسه کړي .
خبرځاى زياته کړه: طالبانو غوښتل د دغه توغندي په عيارولو سره د لشکرګاه په ښار راکټي بريدونه وکړي .

باختر دمرغومې دمياشتې ١١
دولسي جرګې او دمشرانو جرګې مختلط هيت د وګړو داحوالو د ثبت په قانون کې اختلافي موارد حل کړل.
دولسي جرګې مطبوعاتي دفتر باختر آژانس ته خبر ورکړ :
په هغې غونډه کې چې دولسي جرګې دکورني امنيت ، ملي امنيت دپولو دسيمه ييزې ادارې  دټينګښت دکميسيون درييس دميراداد خان نجرابي په مشرۍ او دمشرانو جرګې دکورني  او دفاعى چارو دکميسيون درييسې روح ګل خيرزاده  په معاونيت جوړه شوه  د وګړو داحوالو دثبت په قانون کې دملي شورا د دواړو مجلسونو داختلافي مواردو په باب خبرې اترې وشوې.
دغونډې غړو دتابعيت په تذکره کې دنوم ترڅنګ دتخلص او د دين په ليکلو موافقه وکړه او اختلافي مواردو له  لرې کولو وروسته يې هغه تصويب کړ.