19 November 2018

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل باختر د ليندي دولسمه :
د افغانستان دسولې دعالي شورا يو هيئت د اسلامي هيوادونو د سولې په کنفرانس کې دګډون لپاره سعودي عربستان ته ځي .
دسولې د عالي شورا مرستيال مولوي عبدالحکيم مجاهد د باخترآژانس له خبريال سره په مرکه کې وويل: په نږدې راتلوونکي کې به د هيواد د سولې دعالي شورا يو هيئت د اسلامي هيوادونو د سولې په کنفرانس کې دګډون لپاره سعودي عربستان ته لاړ شي .
ده زياته کړه چې دغه کنفرانس په سعودي عربستان کې د اسلامي هيوادونو دهيتونو دغونډو په دوام جوړيږي او برخه وال به يې په افغانستان کې دسولې او امنيت د ټينګښت دڅرنګوالي په باب خبرې اترې وکړي .
مجاهد ددغه کنفرانس د جوړولو دهدف په باب وويل: دغه پراخ اسلامي کنفرانس  چې د اسلامي هيوادونو د عالمانو په ګډون په جده ښارکې جوړيږي؛ برخه وال عالمان يې په افغانستان کې د سولې او امنيت د ټينګښت زمينه برابروي. خو د هيئت د سفر د دقيقې نيټې په باب يې څه ونه ويل .
په همدې حال کې ځينې کارپوهان وايي: د سولې عالي شورا هلې ځلې کوي چې بېلابېلو هيوادونو ته په سفر او دبهرنيو هيوادونوله مقاماتو سره په خبرو اترو سره له طالبانو سره د خبرو او په افغانستان کې د سولې او ثبات دټينګښت لارې چارې ولټوي. خو دا معلومه نه  وه چې دغه هلې ځلې به څومره ګټوري وي؟
دغه راز د افغانستان دسولې دعالي شورا د رييس صلاح الدين رباني په مشرۍ ددغې شورا يوهيئت په سولې او پخلاينې باندې د لاسبرى او د طالبانو له  استازو سره دکتنې لپاره اسلام آباد ته سفر کړى و چې ددغه هيئت دغړو ستر هدفونه چې دطالبانوله هغو ډلو سره کتنه بلل شوې وه چې د سولې له بهير سره پيوستون غواړي .

کابل باختر د ليندي دولسمه :
دافغانستان دترانسپورت او هوايي چلند وزارت مقامات وايي چې سرله سبا کابل ته دمتحده عربي اماراتو د هوايي شرکت د الوتکې لومړۍ الوتنه پيليږي .
  دترانسپورت  او هوايي چلند وزارت د خپرونو مسوول باخترآژانس ته وويل: دعربي متحده اماراتو هوايي شرکت کابل ته خپله لومړنۍ الوتنه سبا د ليندۍ د مياشتې په ديارلسمه نيټه پيلوي .
  ده دغه پروګرام يو مثبت پيل وباله چې نور شرکتونه دې ته وهڅوي چې کابل ته خپلې الوتنې پيل کړي .
دمتحده عربي اماراتو دهوايي شرکت الوتنې هره ورځ له دوبى څخه کابل ته او له کابل څخه دوبى ته ترسره کيږي .
دمتحده عربي اماراتو هوايي شرکت په منځني ختيځ کې له ډيرو سترو هوايي شرکتونو څخه دي چې د دوه سوه مدرنومسافروړونکو الوتکو په لرلو سره په اوونۍ کې د نړۍبېلابېلو ښارونو ته څه ناڅه درې زره الوتنې ترسره کوي .
داپه داسې حال کې ده چې د آسيايي او اروپايي هيوادونو ځينو هوايي شرکتونو هم  افغانستان ته دخپلو شرکتونو د الوتنو داجازې دترلاسه کولوغوښتنه کړې ده.
د خصوصي هوايي شرکتونو مسوولين وايي چې بهرنيو شرکتونو ته د اجازې ورکول کورنيو شرکتونو ته زيان رسوي .

کابل باختر د ليندي دولسمه :
شپاړس تنه وسله وال طالبان تېره شپه د افغانستان په ختيځ کې د نويو نښتو په بهيرکې ووژل شول .
دغه جګړې دکونړ او نورستان د ولايتونو په سرحدي سيموکې هغه وخت ونښتې چې يوې ډلې وسله وال طالبانو غوښتل دپاکستان له خاورې څخه په ځينو افغان امنيتي پوستو بريد وکړي .
دافغانستان په ختيځ کې د افغان سرحدي پوليسو يوه قوماندان باخترآژانس ته وويل چې په دغو جګړوکې شپاړلس تنه وسله وال  طالبان وژل شوي دي  .
ويل کيږي دطالبانو دوه تنه سيمه ئيز قوماندانان هم په وژل شويوکسانوکې شامل دي .
دسرحدي پوليسو ددغه قوماندن دڅرګندونو له مخې: طالبانوغوښتل چې دکونړ ولايت د شيګل او د نورستان ولايت دکامديش د ولسواليو په ځينو سرحدي پوستو بريدونه وکړي .
د را رسيدلوخبرونو له مخې: افغان پوځيانو د دغو نښتو په پاى کې د وسله والو طالبانو په لسګونوجنګي وسايل ترلاسه کړي دي .
دافغانستان په ختيځ  کې د کونړ او نورستان ولايتونه له پاکستان سره د اوږدو پولو په لرلو سره تل د القاعده، دوسله والو طالبانود ډلې او ددغې ډلې دپاکستاني جګړه مارانو په ګډون دتروريستي ډلو دشتون او فعاليت ډګر دي.

کابل باختر د ليندي دولسمه :
په قندهار ولايت کې يو تن پرون  له يوې اندازې نشه يي توکو دقاچاقو په وخت کې ونيول شو .
دغه سړي غوښتل چې اووه پنځوس کيلوګرام اپين دقندهار د ميوند له ولسوالۍ څخه نامعلوم ځاى ته قاچاق کړي چې د امنيتي مامورينو له خوا ونيول شو .
دقندهار د والي ويندوى جاويد فيصل باخترآژانس ته وويل چې په دې اقدام کې اووه پنځوس کيلوګرامه اپين ترلاسه شوي دي .
په همدې حال کې د قندهار ولايت امنيتي مسوولين وايي چې نيول شوي سړي د اپينو کڅوړې په مهارت سره په يوه کرولا موټرکې ځاى پرځاى کړي و.

کابل باختر د ليندي دولسمه :
په غير قانوني ډول دپيسو داخيستلو د مخنيوى دکميسيون مسوولين چې دکورنيو چارو په وزارت کې فعاليت کوي؛ وايي چې دهيواد په لويو لارو کې يې گرځنده نظارتي ډلې موظفې کړې دي .
دکورنيو چارو وزارت مطبوعاتي دفتر باخترآژانس ته ديوې خبرپاڼې په ليږلو سره ليکلي دي چې دغه کميسيون پرون يوه بله غونده جوړه کړه چې په هغې کې دکورنيو چارو وزارت دپلتڼې رييس مل پاسوال عبدالحکيم چې ددغه کميسيون مشرتوب په غاړه لري؛ وايي چې په غير قانوني ډول د پيسو داخيستلو دڅارنې اومخنيوى په مقصد د لويو لارو په ټاکلو ځايونوکې نظارتي  ډلې موظفې شوې او دهيوادوالو شکايتونه څيړل شوي او په غير قانوني ډول دپيسو دترلاسه کولو مخه نيول شوې ده .
دکورنيو چارو وزارت مقامات په داسې حال کې په لويو لاروکې دنظارتي ډلو دموظف کولو خبرې کوي چې په دې وروستيووختوکې داسې ادعاګانې طرحه شوې دي چې ګنې د پوليسو يو شمېر افراد په لويو لاروکې په غير قانوني ډول دپيسو په اخيستلو لاس پورې کوي اودموټر چلوونکو اوسپرليو دځورونې سبب کيږي . هغه خبره چې دکورنيو چارو وزارت مقاماتو دا کار ردکړ،خو په لويو لارو کې په تحقيق او څارنې ژمن شول.

کابل باختر د ليندي دولسمه :
دپوليسو شپږ اويا تنه سرتيري چې د هرات _  قندهار په لويه لاره کې يې دنده ترسره کوله؛ له دندو څخه يې ګوښه کړى شول .
دفراه ولايت امنيه قوماندان محمدرازق يعقوبي باخترآژانس ته وويل: دغه سرتيري پخوا د دغې لوى لارې د امنيت د تامينولو لپاره په اوو امنيتي پوستوکې ګومارل شوي وو چې خلکو د دوى د چلند اوکړنو د څرنګوالي له پلوه شکايت کاوه.
يوه اړونده خبرځاى وويل: دغه کسان په دې لايه لاره کې د زياترو ناامنيو عامل وو اومسلکي اونظامي زده کړې يې هم نه لرلې.
دغه مقام دغه راز زياته کړه چې دوى د ګوښه کړى شويوکسانو پرځاى يو شمېر مسلکي او د زده کړې خاوندکسان په دې لويه لاره کې ځاى پرځاى کړي دي.
ده وويل چې ددغوکسانو په ګوښه کيدو سره به ددغې لويې لارې امنيتي حالت ښه شي .
مخکې له دې هغوکسانو او سوداګرو چې په دې لويه لاره کې يې تګ راتګ کاوه؛ د امنيتي  منسوبينو د ناسم چلند له امله تل سرټکاوه.
ويل کيږي دهرات_قندهار لويه لاره په هيوادکې يوه ډيره ګڼ ميشته لاره ده چې وسله وال طالبان تل په دې لويه لاره کې د ناامنۍ سبب کيږي اوکال په کال يو زيات شمېر ملکي کسان او سپرلۍ په دې لويه لاره کې د ماينونو د چاودنې او دموټر چلوونکو د بې احتياطي له امله وژل کيږي او ټپيانيږي.

کابل باختر د ليندي دولسمه :
په پنجشير ولايت کې نن اويا بې ځايه شويوکورنيو د خوراکي توکو له مرستې څخه ګټه واخيسته .
دپنجشير ولايت دمهاجرينو د راستنولو د چارو رييس عبدالحميد نو روزي باخترآژانس ته وويل: دغه مرسته دکډوالوپه چاروکې د ملګرو ملتو د سازمان دعالي کميشنرۍ دفتر له خوا وشوه او په هرې کورنۍ درې پنځوس کيلويي  بوري  غنم، دوه ډبلي غوړي، درې شړى، دوه بوري سکاره، درې کيلوګرامه دال نخود ، يو ترپال، د پخلنځي يوسيټ لوښې، د اوبو سطل او يولمريز څراغ وويشل شول.
خبرځاى زياته کړه چې تراوسه پورې څه دپاسه سل کورنۍ د نورستان ، بغلان ، بدخشان او د تخار له ولايتونو څخه د نا امنيو او دطالبانو دګواښ  له امله بې ځايه شوې او د پنجشير ولايت په مربوطاتوکې ځاى پرځاى شوي دي .

کابل باختر د ليندي دولسمه :
په ننګرهار ولايت کې د پوليسو د سرتيرو په کاروان چاودنه وشوه .
دغه چاودنه نن غرمه د چپرهار ولسوالۍ په غور آباد سيمه کې هغه وخت وشوه چې د امنيتي مامورينو کاروان له ساحې څخه دتيريدو په حال کې و .
دننګرهار ولايت يو امنيتي مسوول باخترآژانس ته وويل چې په دې چاودنه کې دپوليسو يو شمېر سرتيرو ته مرګ ژوبله اوښتې ده .
ده په دې چاودنه کې د سر د زيان د دقيق شمېر په باب بې خبري وښوده. خو داسې خبرونه ترلاسه شوي دي چې په دې پيښه کې د چپرهار ولسوالۍ د امنيې قوماندانۍ مرستيال شهيد شوى دى.
  ددغې پيښې جزئيات وروسته خپريږي.

کابل باختر د ليندي دولسمه :
هغه سړي چې دکونړ او ننګرهار په ولايتونوکې د تروريستي بريونو سازمان ورکوونکى  بلل کيږي؛ پرون د ملي امنيت د مامورينو له خوا ونيول شو.
په عادل مشهورقاري حزب الله کله يې چې دطالبانو د ډلې  د تروريستي بريدونو لپاره د جنګي وسايلو او مالي امکاناتو د برابرولو نيت درلود؛ په جلال آباد ښار کې ونيول شو.
دننګرهار ولايت دملي امنيت د ادارې يوه مسوول باخترآژانس ته وويل چې قاري حزب الله دکونړ او ننګرهارپه لايتونوکې د تروريستي بريدونو د سازمان ورکولو او په دغو ولايتونوکې د وسله والوطالبانو ډلې ته جنګي وسايلو او د مالي امکاناتو د برابرولو مسووليت درلود.
ويل کيږي له دغه سړي څخه يوه اندازه جنګي وسايل هم ترلاسه شوي دي.
له بلي خوا قاري حزب الله په خپلو لومړنيوتحقيقاتوکې اعتراف کړى دى چې تراوسه پورې يې د کونړ او ننګرهار د ولايتونو په مربوطاتوکې په لسګونو خونړيوتروريستي پيښو ته سازمان ورکړى دى.
ده دغه راز ويلي دي چې د تروريستي بريدونو د ترسره کولو لپاره يې په پاکستان کې د وسله والوطالبانو د ډلې له جګپوړو قوماندانانو څخه لارښوونې ترلاسه کولې.

کابل باختر د ليندي دولسمه :
د بادغيس ولايت د بالامرغاب ولسوالۍ په مربوطاتوکې د نښتو له امله اووه پنځوس وسله وال طالبان ووژل شول.
ددغو نښتو په بهيرکې چې درې ورځې يې دوام درلود؛ اته څلويښت تنه نور طالبان ټپيان شول .
  په بادغيس ولايت کې دملي اردو د دريمې لوا قوماندان جنرال داوودشاه وفادار باخترآژانس ته وويل: جګړه د بادغيس ولايت په بالامرغاب ولسوالۍ کې د افغان ځواکونو په اکمالاتي کاروان د وسله والوطالبانو له بريد وروسته ونښته .
د ده دڅرګندونو له مخې: په دې نښته کې اووه پنځوس تنه وسله وال طالبان ووژل شول اواته څلويښت تنه نور يې ټپيان شول .
په وژل شويوکسانوکې د طالبانو د سيمه ئيزو قوماندانانوله جملې څخه ملاحسن اڅکزي، ملا بسم الله، ملا ذاکر، مولوي عبدالظاهر، ملا عبدالروف او ملا جليل هم شامل دي .
جنرال وفادار زياته کړه: په دې نښته کې د ملي اردو پنځه تنه سرتيري شهيدان او دملي اردو او ملي پوليسو پنځلس سرتيري ټپيان شول .
د ده دڅرګندونو له مخې: ددغو نښتو په بهيرکې د طالبانو ٣٢ ميله وسلې ترلاسه شوې او څو موټرونه اوموټرسايکلونه سوځول شوي او له منځه تللي دي او دغه راز په سيمه کې دوه ويشت ماينونه هم ترلاسه او شنډ کړى شوي دي .