20 February 2019

RSS Facebook

سوداگریز


تازه خبرونه

 په کابل کې  له  ٥٥ وسلو سره  ددوو تنو نيول کيدل .

په کابل کې له ٥٥ وسلو سره ددوو تنو نيول کيدل .

کابل باختر دسلواغې ديرشمه : دپوليسو موظفينو دکابل په ديارلسمې...

په دايکنډي کې بې ځايه شويو کورنيو مرستې ترلاسه کړې .

په دايکنډي کې بې ځايه شويو کورنيو مرستې ترلاسه کړې .

کابل باختر دسلواغې ديرشمه : له يوسلو څلويښتو بې...

دهېواد دکرکټ ملي ټيم دايرلند  له کرکټ  ټيم سره  لوبه کوي .

دهېواد دکرکټ ملي ټيم دايرلند له کرکټ ټيم سره لوبه کوي .

کابل باختر دسلواغې ديرشمه : دهېواد دکرکټ ملي ټيم...

Youtube Player

khantry design

سوداگریز

سوداگریز

کابل باختر دمرغومي لسمه :
له پيښو سره دمبارزې د ملي کميټې غونډه نن له غرمې وروسته دجمهور رييس  د دويم مرستيال او ددغې کميټې د رييس  محمدکريم خليلي په مشرۍ جوړه شوه.
د جمهوري رياست مطبوعاتي دفتر باخترآژانس ته خبرورکړ: په دې غونډه کې له پيښو سره د مبارزې د ملي ادارې مرستيال دکميټې د تيرو پريکړو د تحقق د څرنګوالى او د پيښو دعمومي حالت په باب لنډرپوټ وړاندې کړ.
ددغه رپوټ له مخې: په هرات ولايت کې د غور او بادغيس د ولايتونو له بې ځايه شويوکسانو سره د خوراکي او غير خوراکي توکو مرسته شوې ده .
دغه راز د منظور شوى بيړني تخصيص د غور ولايت ته ليږدول شوى دى او دغه ولايت ته د شپږ زرو ټنوغنمو د ليږدونې بهير هم پيل شوى دى.
د پروان، ميدان وردګو ، پکتيکا، دايکندي،  لغمان او نورو ولايتونو ته دغنمو ليږدول پيل شوى دى او دغه راز د نورستان ولايت ته د درې زره متريک ټنو غنمو د تخصيص د ليږدونې خبر هم غونډې ته ورکړ.
په دې غونډه کې له پيښو سره د مبارزې د ملي کميټې ټولو غړو د ژمنيو احتمالي پيښو د څيړنې لپاره خپل تيارى اعلام کړ او په دې باب يې کميټې ته ډاډ ورکړ.
کميټې د نورستان په مستحقوکسانو د ځانګړې شوې مرستو د رسيدو او ويشلو په ډاډ باندې ټينګار وکړ .
دغه راز له پيښو سره د مبارزې د ملي ادارې برسيره د مهاجرينو د راستنولو د چارو وزارت، د اوچا او ډبليو اف پي) د ادارو استازو هم  په هرات کې د غور او بادغيس د ولايتونو دمهاجرينو دترپوښښ لاندې نيولو له امله کميټې ته ډاډ ورکړ.
په دې غونډه کې د کليو د بياجوړولو او پراختيا او دعامې روغتيا وزيرانو  د بدخشان ولايت د پامير او واخان د ساحوله اوسيدونکو سره د مرستې له امله  دغونډې غړو ته خبر ورکړ.

کابل باختر دمرغومي لسمه :
د حضرت حکيم سنايي غزنوي د شخصيت په باب د سيمينار په مناسبت  د افغانستان د اسلامي جمهوريت د جمهور رييس حامدکرزي پيغام!
نوميالى شاعر او عالي مقام عارف حکيم ابوالمجدمجدود بن آدم سنايي د فارسي _ دري شعرله استادانوڅخه دى.
  حکيم سنايي د هغو ويناوالو له جملې څخه وچې د دري شعر د سبک په بدلون او  په هغه کې د تنوع  او تجدد په رامنځته کولوکې اغيزمن و او د ده آثار له ده څخه د وروسته شاعرانو په خبروکې د ژورو بدلونونو سبب شو.د ده آبداره او استادانه شعرونه د پيړيو په بهيرکې د ويناوالو او د زړه خاوندانو د پاملرنې وړ و.
خوشحاله يم چې د اطلاعاتو اوفرهنګ وزارت په تېره يوه لسيزه کې د دغه ستر عارف او د تاريخي غزني د دغه  نوميالى شاعر د شخصيت، فکر او انديشې په باب سيمينارونه جوړکړ .
د حکيم آثار يې بياچاپ کړ او اوس هم د ايسيسکو د سازمان په همکارۍ نننى سيمينار يې جوړ کړى دى.  هيله لرم د دغه سيمينار لپاره  برابرې شوې مقالې او په دې غونډه کې زموږ  د پوهانو خبرې اترې دهيواد راتلونکى نسل دحکيم غزنوي له شخصيت، فکر، انديشې او آثارو سره زيات بلدکړي.
د الله(ج ) له دربارڅخه ستاسو د سيمنيارد برياليتوب هيله کوم او د اطلاعاتو او فرهنګ وزارت ته شاه باسي وايم.

کابل باختر دمرغومي لسمه :
دکندز ولايت سيمه ئيزمسوولين وايي چې آلمان ددغه ولايت په مرکز او شپږو ولسواليوکې د څښاک د اوبو پروژې تطبيقوي.
دکندز ولايت د اوبو رسولو  اوکاناليزاسيون رييس دادمحمد بهير باخترآژانس ته وويل: ددغو پروژو په تطبيق سره د څښاک اوبو د ستروپايپونو په واسطه د دشت ارچي، امام صاحب، کلاى ذال، چاردرې، خان آباد او علي آباد ولسواليو ته رسول کيږي .
د دولتي مسوولينو د څرګندونو له مخې: ددغو پروژو په تطبيق سره به د اوبو دکمښت له پلوه دسلګونوکورنيوستونزي لرې شي .
ټاکل شوې ده ددغو پروژوکار په نوى ميلادي کال کې پيل شي.

کابل باختر دمرغومي لسمه : ؛
دپوليسو د ځانګړو ځواکونو د شپنيو عملياتو په بهيرکې چې د بغلان ولايت په مربوطاتوکې ترسره شول؛ د طالبانو يو قوماندان ونيول شو .
دبغلان ولايت امنيه قوماندان مل پاسوال امين الله امرخيل ددغه خبر د تاييدولو په ترڅ کې باخترآژانس ته وويل: نيول شوي سړي مولوي کبير نوميږي او په دوشي ولسوالۍ کې د طالبانو پوځي مسوول و چې  له يو بل طالب سره  له يوې اندازې جنګي وسايلو سره د دوشي ولسوالۍ دکيله ګي په سيمه کې ونيول شو.

کابل باختر دمرغومي لسمه :
په کونړ ولايت کې نن د سيمه ئيزو پوليسو او طالبانو ترمنځ د نښتې په بهيرکې دوه تنه وسله وال طالبان ووژل شول .
دکونړ ولايت امنيه قوماندان عبدالحبيب سيدخيلي باخترآژانس ته وويل: دغه نښته دکونړ ولايت د ناړې ولسوالۍ په مربوطاتوکې هغه وخت پيل شوه چې طالبانو غوښتل د دغې ولسوالۍ په مربوطاتوکې د سيمه ئيزو پوليسو په پوستو بريد وکړي.
دخبرځاى دڅرګندونو له مخې: په دې نښته کې دوه تنه وسله وال طالبان ووژل شول او د سيمه ئيزو پوليسو ځواکونو ته زيان نه دى رسيدلى.

کابل باختر دمرغومي لسمه :
د اطلاعاتو او فرهنګ وزارت دخپرونو د چارو معينې ميرمن سيمين عزل حسن زاده  نن  د لمر، طلوع او د طلوع نيوز د ټلويزيونونو له مسوولينو سره وکتل.
  دباختر آژانس دخبر له مخې: دې د دغو رسنيوله مسوولينو سره په خبروکې په هيوادکې د پوهاوي د ورکولو او د دموکراسي د پياوړتيا په لاره کې د سنيو په رول  ټينګار وکړ او  ويې ويل: ((په هراندازه چې مقتدرې رسنۍ په هيوادکې موجودې وي؛  په آسانى سره کولى شوملي هدفونو ته ورسيږو .))
دې دغه راز وويل چې په افغانستان کې د نوى دموکراسي په پياوړتيا او پراختيا کې د رسنيو رول ارزښتناک دى.
دغه راز د دغو ټلويزيونونو مسوولينو هيله وکړه چې د ډله ئيزو رسنيو د قانون په رڼا کې د اطلاعاتو او فرهنګ له وزارت سره نږدې او رغنده همکاري ولري.

کابل باختر دمرغومي لسمه :
د مشرانو جرګې لومړي نايب محمد علم ايزديار نن دهرات ولايت دهوايي ډګر له آمر  جمعه ګل رحماني سره دخپل کارپه دفترکې وکتل.
دمشرانو جرګې مطبوعاتي دفتر باخترآژانس ته خبر ورکړ: په  دې کتنه کې د هرات د هوايي ډګر آمرپه داسې حال کې چې يو شمېر سناتوران هم حاضر وو؛ د امنيت،  عامه نظم د تامينولو اومسافرينوته د ښو اسانتياوو د برابرولوپه لاره کې ددغه هوايي ډګردکارکوونکو دکاراو فعاليت يادونه وکړه او ويې ويل: ددغې ادارې پرسونل شپه او ورځ هلې ځلې کوي ترڅو هيوادوالو ته ښه ترانسپورتي خدمتونه وړاندې کړي.
دغه راز ايزدياردکابل ښارد نادرې دليسې له مديرعبدالمبين ظريفي سره د جلاکتنې په ترڅ کې د زده کړې د سالم مديريت د رامنځته کولواو د استادانو او زده کوونکوترمنځ د صميمت د فضا د ټينګښت په باب د دغې ليسې د ادارې کاري رپوټ د سنامجلس  لومړي نايب ته وړاندې کړ او ويې ويل چې ددغې ليسې ادارې د زده کوونکو د پوهې د کچې د لوړولو، د کانکور آزموينې د تياريو د ممتازو زده کوونکو ترمنځ د رقابتي پروګرامونو د ترسره کولو او د تاريخي ورځو د نمانځنې په لاره کې ښه پروګرامونه ترسره کړي دي.
د مشرانو جرګې لومړي نايب د دغو مسوولينو دکاري چارو په خاطر د دوى  کارونه او فعاليتونه وستايل او د مسووليتونو په اجرا باندې د ټينګار په ترڅ  کې يې د دوى د لازياتې برياليتوبونو هيله وکړه.

کابل باختر دمرغومي لسمه :
په چاوديدونکو توکو بار يو موټرتېره شپه دپکتيکا ولايت په مربوطاتوکې د سيمه ئيزو پوليسوله خوا له پيژندلو وروسته ضبط کړى شو.
د پکتيکا د والي مرستيال عطاالله فضلي باخترآژانس ته وويل: طالبانو څوټنه چاوديدونکي توکي په ماهرانه ډول په يو بار وړونکى موټرکې ځاى پرځاى کړي و او غوښتل چې کابل ته يې وليږدوي؛ دپکتيکا ولايت دارګون او سرروضې دلارې په اوږدوکې د سيمه ئيزو پوليسوله خواکشف اوضبط  شو.
د سيمه ئيزو پوليسو قوماندان عزيز الله  کاروان وويل: دغه موټر د حقاني دشبکې د افرادو له خوا له ميرامشاه څخه بار شوى و او کابل ته ليږدول کيده.

Tuesday, 31 December 2013 13:08

تبصره

کابل باختر دمرغومي لسمه :
په افغانستان کې مطبوعات او رسنۍ اوس د افغانستان په سياسي او ټولنيزژوندانه کې له ځانګړى اغيزمنتوب څخه برخمن دي او دا د مطبوعاتو دکارکوونکو رسالت منده دنده ده چې د خلکو ژبه او د مسوولينو سترګې وي.
دباخترآژانس مبصر ليکي: د افغانستان په سياسي او ټولنيز ژوندانه کې د مطبوعاتو او رسنيو رول ځانګړى ارزښت لري.
د تيرو دولسوکلونو په موده کې په افغانستان کې هيڅ برياليتوب د رسنيو د آزاد کار او د بيان د آزادى په اندازه دلمس وړ نه دى.
دغه بهير د دولت د ملاتړ او زغم ترسيورى لاندې وده کړې ده، سوکاله شوې او اوس دحکومت تر څنګ د يو رکن په توګه ځاى لري.
په بل عبارت  په هيوادکې د بيان آزادى او د رسنيو کارکيداى شي په هيوادکې د نوې دموکراسي د پياوړتيا لپاره د يون د يو ښه پيل په توګه وشمېرل شي .
په اوسني حالت کې چې افغانستان د ډيرو ناخوالوشاهد و؛ د رسنيو او د هغو دکارکوونکو رسالت ځانګړى ارزښت لري چې کولاى شي ټولنه رهبري کړي او د سوکالى اونيکمرغى په لور دخلکو تګلوري وټاکي او لنډ کړي .
ددغه شان  فکر په  وجودکې رسنۍ هغه وخت بريالي وي چې عام مخاطبين پيداکړي يعنې د ټولنيزو ناروغيو لپاره درمل وي نه دا چې په  خپله د ټولنې په وړاندې ودريږي او د ټولنې ترمنځ د ليکو د جوړولو باعث شي.
اوسني فضا او حالت له موږ څخه غوښتنه کوي چې مطبوعاتي کار جنجالي او د احساساتو د راپارولوسبب نه شي، بلکې د وګړنيو هدفونو په تګلوري کې چې د ملي ګټوضمانت کوونکي دي؛ حرکت وکړي. خو له بده مرغه د افغانستان د مطبوعاتو په کورنۍ کې محدودکسان شته چې د هغوى خبره او مخاطبين يو ځانګړى قشرته دى. کارونه يې سليقه يي او چلندونه يې د يو وخت لپاره دي چې دغه حرکت  نه شي کولاى د مطبوعاتو د رسالتمندانه کار تعريف ولري.
په دې وروستيو وختوکې د افغانستان د اسلامي جمهوريت جمهور رييس حامدکرزي د مطبوعاتو او رسنيوله يو شمېر کارکوونکو سره غونډه وکړه .
په دې  غونډه کې د ځينو مسئلو په باب چې زموږ دهيواد له ژوندانه او سياسي راتلوونکى سره پيوند درلود؛ د خبرو په ترڅ کې د مطبوعاتو په دننه کې د ځينو ستونزو او نيمګړتياوو په باب هم خبرې وشوې.
دټولوټينګار په دې و چې رسنۍ دې دملي ګټو دکرښې پرمخ حرکت وکړي. داسې حرکت چې قومي، ژبني او سليقوي تعصبات پکې ځاى ونه لري، بلکې ټول په خپلو کارونوکې له ملي ګټوڅخه په تعريف سره پکې عمل وکړي. دلته رسالتمندانه کار دنظر وړ دى چې بايد وشي.
د رسنيوله کارکوونکوسره د افغانستان د اسلامي جمهوريت د جمهور رييس په وروستيوخبروکې بل ټکي چې کيداى شي د رسنيو د زيات مسلکي کار لپاره د دلګرمى سبب وي؛ د هغو ټولو دوسيو بخښل وچې د يوشمېر رسنيو او د رسنيو د يو شمېرکارکوونکو په پته په عدلي او قضايي مرکزونوکې شته .
دغه کارکولاى شي د رسنيو د هدفمندانه او رسالتمندانه کار په باب د افغانستان دحکومت بل ژمنه او زغم وي او په هيوادکې د مطبوعاتو، رسنيو او د بيان د آزادى موقعيت پياوړى کړي او د کثرت ګرا مطبوعاتو د ملاتړ په لاره کې يون وي.
دلته رسنۍ د خلکو په وړاندې زيات مسووليت منوونکي کيږي او هغوى به د رسالتمندانه او هدفمندانه کار په ترسره کولو سره ځان زيات دخلکوترمنځ ومومي.

کابل_باختر د ليندي دمياشتې ١٠ مه:
د سترې محکمې د عالي شورا دوو تنو نویو غړو چې په دې وروستیو کې یې د ولسي جرګې له لوري د باور رایه ترلاسه کړه، د افغانستان د جمهوررئیس حامدکرزي پر وړاندې د لوړې مراسم پرځای کړل.
د جمهوري رياست مطبوعاتي دفترباخترآژانس ته خبرورکړ:
په دغو مراسمو کې چې نن له غرمې مخکې په ارګ کې پرځای شول او په هغوکې  قاضي القضات او د سترې محکمې سرپرست پوهاند عبدالسلام عظیمي هم حاضروو، د سترې محکمې د عالي شورا نویو غړو دین محمد ګران او عبدالقادر عدالتخواه، د وفادارۍ لوړه وکړه.
دوی سوګند وکړ چې د سترې محکمې د عالي شورا د غړو په توګه به  د اسلام د مقدس دین، د اساسي قانون د نصوصو او د افغانستان  د نورو قوانینو د احکامو په رڼا کې حق او عدالت ټینګ کړي او د قضا دنده به په پوره امانت دارۍ، صداقت او بې طرفۍ  سره ترسره کړي.
د لوړې د مراسمو له پرځای کېدو وروسته، د هېواد جمهوررئیس د سترې محکمې د عالي شورا نویو غړو ته مبارکي وویله او هغوی ته یې د افغانستان خلکو ته د خدمت په لاره کې د بریالیتوب هیله وکړه.#