19 February 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل باختردتلې دمياشتې    ٣ :
د افغانستان د اسلامي جمهوریت جمهور رئيس حامد کرزي نن غرمه پروفسير حضرت صبغت الله مجددي ته په ارګ کې د غازي امان الله خان عالي دولتي مډال ورکړ.
دجمهوري رياست مطبوعاتي دفترباخترآژانس ته خبرورکړ
د جمهور رئيس کرزي له خوا پروفیسور حضرت صبغت الله مجددي ته د غازي امان الله خان عالي دولتي مډال،له دولت سره د خلکو د ښو او غوره اړيکو د تامینولو، په هېواد کې د سولې د ټينګښت د هڅو او هلو ځلو په موخه ورکول کيږي.
د هېواد جمهور رئيس وویل: حضرت مجددي د دين په لاره کې او د افغانستان د خلکو د خدمت په لاره کې په ډېر اخلاص خدمت کړی دی او د دغې خاورې او ملت خیر غوښتونکی دی."
پروفسير حضرت صبغت الله مجددي په خپلو خبرو کې وویل چې هېڅکله يې یوه ځانګړي ګوند ته خدمت نه دی کړی، بلکې د افغانستان ملت او اسلام ته يې په ډېر اخلاص خدمت کړی دی.
جمهور رئيس حامد کرزي، حضرت صبغت الله مجددي ته د غازي امير امان الله خان عالي دولتي مډال د اساسي قانون د ۶۴ مې مادې د ۱۹ مې فقرې له حکم سره سم نوموړي ته منظور کړی دی.

 کابل باختردتلې دمياشتې    ٣ :
دکابل ولايت دامنيې قوماندانۍ منسوبينو  هغه دوه تنه انسان تښتوونکي ونيول چې په  يوه  څلور کسيز ګروپ کې يې فعاليت  کاوه .
دغه دوه تنه دهغو څلورو تنو  انسان تښتوونکو له جملې څخه وو چې دوه تنه يې پخوا دپوليسو له خوا نيول شوي وو.
دکابل ولايت    دامنيې قوماندانۍ يوه خبرځاى باخترآژانس ته خبرورکړ :
دغو انسان تښتوونکو څه موده مخکې يو سوداګر تښتولى وو چې ددغو دوو
تنو په نيول کيدو سره  تښتول شوى سوداګر هم  دهغوى له منګولو څخه آزاد کړاى شو.دغه انسان تښتوونکي دکابل ښار دپنځلسمې امنيتي حوزې  په مربوطاتو کې نيول شوي او په خپل جرم يې اعتراف کړى دى .

Thursday, 25 September 2014 14:03

تبصــره :

کابل باختردتلې دمياشتې    ٣ :
د نوي افغانستان  جوړونکي حامدکرزي  دافغانستان داسلامي جمهوريت دجمهوررييس په توګه له ديارلسو کلنو نه ستړې کيدونکو اوله  کړاو ډکو کارونو  وروسته  په پاى کې  دانتخاباتو دنتيجو  په اعلامولو سره  له جګپوړو دولتي مقاماتوسره  مخه ښه وکړه .
دباخترآژانس  سياسي مبصر ليکي  :په دې کې دشک او ترديد  ځاى نشته  چې دافغانستان داسلامي جمهوريت جمهورييس حامدکرزي  ټيک ديارلس کاله مخکې ديو  داسې هيواد مشرتوب په غاړه واخيست چې دتپل شويو جګړو له امله  بيخي ويجاړ شوى و.
ده دنوي افغانستان دجوړونکي په توګه  دنړيوالې ټولنې په همکارۍ  په کار لاس پورې کړ  اوپه هېواد کې  په سياسي، اقتصادي ، ټولنيزو اوفرهنګي برخو کې يې  دبنسټونوپه  جوړولو  اقدام وکړ.
ديارلس کاله  له زماني پلوه  له خاورو او دوړو څخه  دراپاڅيدلي افغانستان لپاره  زيات وخت نه دى  خو دا  جمهور رييس کرزى و  چې   په زغم ، تحمل  او سياسي  پوهې سره يې  دافغانستان بڼه  هم په ملي او عمراني برخه کې او هم په نړيوال ډګر  کې بدله کړه .
ويجاړ افغانستان  د حامدکرزي دخردمندانه رهبرۍ  ترسيوري لاندې و  چې اساسي قانون يې پيدا کړ . دهغه  له مخې يې دبنسټونو د جوړولو کار پيل کړ.
دهېواد امنيتي بنسټونه  جوړ شول اوپه همدې موده کې يې لازيات ټينګښت وموند .  دهېواد داقتصادي    لارو په توګه په زرګونو کيلومتره لويې لارې اوسړکونه  جوړ شول ، ښوونځي  او د لوړو زده کړو موسسې يوه په بلې پسې  جوړې شوې   لنډه دا  چې نه شو کولاى ټول برياليتوبونه  په دې لنډو ليکنو کې ياد کړو.خوبايد ووايو چې  دا دافغانستان داسلامي جمهوريت جمهوررييس  حامد کرزى و  چې  په بحران او شخړو کې ښکيل افغانستان يې ، يو داسې افغانستان جوړ کړ چې اوس دټولو  په ګډ کور بدل شوى دى .
دجمهوري رياست لومړي مرستيال محمديونس قانوني  دوزيرانوشورا په وروستۍ  غونډه کې اشاره وکړه او ويې ويل  چې دبحران له کلونو وروسته  ټول تاريخي  ، اقتصادي ، سياسي  او ټولنيز برياليتوبونه دحامدکرزي دهڅو او هاند زيږنده دي .
ده وويل :  ((  زما په نظر  دنظام ډير مهم برياليتوب دا دى چې حمدلله واحد  آزاد او سرلوړى افغانستان لرو چې دټولو افغانانو ګډ کور دى او هر افغان  ددې حق لري  چې  په هغه کې  په آزادۍ سره  ژوند وکړي  او په ودانولو کې يې  ونډه واخلي  .))
ده  دهېواد جمهوررييس ديو متحمل ، حوصله  لرونکي او زغم لرونکي  سياستوال په توګه وباله .
دغه راز دجمهوري رياست دويم مرستيال محمد کريم خليلي په خبرو کې وويل  جمهوررييس کرزي کار له صفر څخه پيل کړ  له هغو ټولو نعمتونو څخه چې  نن ورڅخه  ګټه اخلو لکه  ملي وحدت ، نړيوال اعتبار اوحيثيت   او ديو پراخ بنسټه وګړني  حکومت دعزت او اعتبار خبره نه وه   خو اوس داسې  حال ته رسيدلي يو چې دهېواد په تاريخ کې دلومړي ځل لپاره   سياسي قدرت په سوله ييز ډول له يوه منتخب جمهوررييس څخه بل منتخب جمهوررييس ته ليږدوو.دغه خبرې  په ډاګه هغو برياليتوبونو ته اشاره کوي  چې افغانستان دتيرو ديارلسو کلونو په بهيرکې  ترلاسه کړي دي .په هر حال  برياليتوبونه او ارزښتونه دپټولو وړ نه دي  آن په  جمهوررييس انتقاد کوونکو  هغه وخت چې له طالبانو سره  دسولې  خبرې طرحه کيدې ويل   چې په خبروکې دې ددموکراسۍ ارزښتونه او دنظام برياليتوبونه په پام کې وي. 

کابل باختردتلې دمياشتې    ٣ : 
دافغانستان داسلامي جمهوريت دبهرنيو چارو وزير ضرار احمدعثماني دملګروملتو دسازمان دعمومي ټولنې  په ٦٩ غونډه کې  دګډون په مقصد دافغانستان داسلامي جمهوريت ديو هيئت په مشرۍ  دروان کال دوږي دمياشتې په ديرشمه نيټه  نيويارک ته روان شو.
دبهرنيو چارو وزارت ويندوى  باخترآژانس ته خبر ورکړ :
عثماني  دتلې دمياشتې په لومړۍ نيټه دسه شنبې په ماښام په هغې ميلمستيا کې ګډون وکړ چې دامريکا دمتحده ايالاتو دجمهوررييس بارک اوباما له خوا  دهېوادونو ددولتونو او حکومتونو دمشرانو  او دهيئتونو درييسانو  دهرکلي  په مقصد په نيويارک ښارکې شوې و ه.
دافغانستان داسلامي جمهوريت دبهرنيو چارو وزير   دتلې دمياشتې په دويمه نيټه له غرمې مخکې دملګروملتو دسازمان  دعمومي ټولنې  د٦٩ غونډې ترڅنګ دمتحده عربي اماراتو په بهرنيو چارو کې د دولت دوزير ډاکتر انورمحمدګرګش او دايټاليا دبهرنيو چارو له وزيرې ميرمن  فدريکا موغريني سره  په جلاجلا توګه وکتل .
په  کتنه کې  دافغانستان داسلامي جمهوريت  دبهرنيو چارو وزير او دعربي متحده اماراتو په بهرنيو چارو کې ددولت وزير  په افغانستان کې  دملي وحدت دحکومت دجوړولو پرسر  دموافقې له امله خوښي څرګنده کړه او ژمنه يې وکړه چې عربي متحده امارات به  دافغانستان له اسلامي جمهوريت سره  خپلو همکاريو ته دوام ورکړي .
عثماني  ددغه هېواد دهمکاريوله امله دمننې  او قدردانۍ په ترڅ کې  په افغانستان کې  دپانګونې د زياتو فرصتونو خبرورکړ اوپه بيلابيلو ساحو کې  په افغانستان کې دمتحده اماراتو دزياتې پانګونې غوښتنه وکړه .
دافغانستان داسلامي جمهوريت دبهرنيو چارو دوزير او دايټاليا دبهرنيو چارو دوزيرې ترمنځ کتنه کې  ددواړو هېوادونو  ترمنځ دوستانه اړيکې ارزښتناکې وبلل  شوې  .
ميرمن موغريني په افغانستان کې دملي وحدت دحکومت دجوړولو پرسر دموافقې له امله عثماني ته مبارکي وويله اوله افغانستان سره په تيره بيا  دمدني ټولنې دپياوړتيا  ، دبشردحقوقو  اوددولت  په جوړښت کې  دښځو درول په ګډون ساحو کې  دخپل هېواد دهمکاريو په دوام باندې ټينګاروکړ .
عثماني له افغانستان سره  ددغه هېواد همکارۍ  ديادونې او قدر وړ وبللې  او په بيلابيلو ساحو کې دافغانستان ديارلس کلن برياليتوبونه يې دايټاليا په ګډون دنړيوالې ټولنې دهمکاريو زيږنده   وبلله .
دبهرنيو چارو وزير دتلې دمياشتې په دويمه پرون غرمه په هغې ميلمستياکې برخه واخيسته چې دملګروملتو دسازمان دسرمنشي بان کي مون له خوا دهېوادونو  ددولتونو او حکومتونو دمشرانو او دهيئتونو درييسانو دهرکلي لپاره  دملګروملتو دسازمان په مقر کې شوې وه .

 کابل باختردتلې دمياشتې    ٣ : 
په مکه مکرمه کې   دافغان  حاجيانو بعثه  رييس  مفتي سيدحجت الله نجيح
دباخترآژانس خبريال ته وويل  چې تر نن ورځې پورې ٢٣٥٩٥ تنه افغان حاجيان دهېواد هوايي شرکتونو  دالوتکو ديو ١١٤ الوتنو په واسطه  دفرضي  حج په مراسمو کې دګډون په خاطر  سعوي عربستان ته ليږدول شوي دي.
نجيح وويل :   چې په روان کال کې   څلرويشت زره تنه  حاجيان دفرضي  حج په مراسمو کې  ګډون کوي  او نږدې پنځه  سوه تنه پاتې  حاجيان ټاکل شوې ده سبا اوبل سبا په وروستيو الوتنو کې سعودي عربستان ته وليږدول شي .
له افغانستان  او دمدينې منورې له ښار څخه مکې مکرمې ته دافغان حاجيانو  ورتګ دوام لري  او ټاکل شوې ده  د ذى الحجته الحرام دمياشتې په اتمه دفرضي  حج مراسم پيل شي .

کابل باختردتلې دمياشتې    ٣
د افغانستان د اسلامي جمهوریت جمهور رئيس حامد کرزي د افغانستان د امنیتي ځواکونو له رهبرۍ سره د مخه ښې په غونډه کې د افغانستان د ساتنې په لاره کې د هېواد د ټولو امنیتي ځواکونو خدمتونه وستایل.
دجمهوري رياست مطبوعاتي دفترباخترآژانس ته خبرورکړ.
دغه غونډه چې نن سهار په ارګ کې جوړه شوې وه، جمهور رئيس کرزي په خپلو خبرو کې وویل چې د دغه هېواد ځواکونو د خپلې خاورې د ساتنې په لاره کې ډېرې قربانۍ ورکړي دي.
جمهور رئيس کرزي د افغانستان امنیتي سکټور د دفاع او کورينوچارو وزارتونو او د ملي امنیت ځواکونو ته خپله توصیه یوځل بیا داسې تکرار کړه: وطن دوستي، وطن پالنه، ټول افغانستان د ځان ګڼل، ټول افغانان، ځان بلل او د شهیدانو پالنه دا به نه هېروی.
جمهور رئيس کرزی زیاته کړه: له تاسو څخه ډېره مننه کوم چې په ۱۳ کلونو کې مو له ماسره په ډېر صبر او حوصلې سره کار وکړ او هر هدایت او امر چې ما درته کړی، تاسو هغه اجراء کړی دی.
جمهور رئيس کرزي د هېواد ټولو ځواکونو ته لارښوونه وکړه، لکه څنګه چې يې په تېرو ۱۳ کلونو کې د خپل هېواد خدمت کړی له دې وروسته به له نوي حکومت سره هم د خپل هېواد خدمت ته ادامه ورکوي.
جمهور رئيس کرزي د خپلو خبرو په پای کې وویل چې دی به د یوه متقاعد جمهور رئيس په توګه په همدې خاوره کې ژوند کوي او په هر ځای کې چې له امنیتي ځواکونو سره مخامخ شي، نو د یوه افغان په توګه به ورته سلام کوي.
د هېواد جمهور رئيس وویل چې هېواد مو ډېره لاره شاته پرېښې ده، نوره اوږده لاره په مخ کې ده چې تر دې هم ښه ژوند ته ورسېږو. نو په یقین سره چې د ښه ژوند او ښه ثبات په خوا ور روان یو، خو دا لاره به ستاسو په هڅو او همت پرمخ ځي. 
د افغانستان د دفاع وزير جنرال بسم الله محمدي د اردو د پرمختګ په برخه کې د جمهور رئيس کرزي تېرې ۱۳ کلنې هڅې وستایلې او ويې ویل چې جمهور رئيس په ډېرې حوصلې او اخلاص سره اردو هغه ځای ته ورسوله چې نن کولی شي په خپلواکه توګه له خپل ملت څخه دفاع وکړي.
نوموړي همداراز وویل چې جمهور رئيس حامد کرزی د ملي اردو بنسټ اېښودونکی دی.
له هغه وروسته د کورنيو چارو وزارت امنیتي مرستیال جنرال محمد ایوب سالنګي چې په دې غونډه کې يې د ملي پوليسو په استازیتوب خبرې کولې، وویل چې جمهور رئيس کرزي په تېرو ۱۳ کلونو کې د ملي پولیسو ملاتړ کړی او د سمبالولو لپاره يې جدي هڅه کړې ده.
نوموړي زیاته کړه چې د جمهور رئيس تولې لارښوونې او وړاندیزونه به له افغانستان څخه د دفاع په لاره کې په پام کې نیسي.
په دې جوړه شوې غونډه کې د ملي امنیت عمومي رئيس رحمت الله نبیل هم د دغه ریاست د سرتېرو په استازیتوب خبرې وکړې او د هېواد په ساتنه کې يې د جمهور رئيس صادقانه خدمتونه وستایل.
ښاغلي نبيل په خپلو خبرو کې وویل چې د ملي امنیت منسوبینو تل په خپلو کاري چارو کې د جمهور رئيس لارښوونې په پام کې نيولي، په ځانګړې توګه دا چې بشري حقونو مراعات کړي، د ملي امنیت سرتېري باید تر ټولو وطن دوسته کسان واوسي او د افغانستان له خلکو سره نېک چلند وکړي.

د غونډې په پای کې د امنیتي ځواکونو د رهبرۍ له خوا د افغانستان جمهور رئيس ته ځينې ډالۍ هم وړاندې کړې.
 

دمشق \ اسوشتدپرس\  باختردتلې دمياشتې    ٣ :
امريکاتيره شپه په سوريه کې دداعش دډلې  ترکنترول لاندې  دتيلو  چاڼ ځايونه بمباري کړل.
داسوشتدپرس خبري آژانس وليکل  چې په سوريه کې  دامريکا هوايي ځواکونو دتيلو هغه  کوچني چاڼ ځايونه چې دداعش دډلې په کنترول کې وبمباري کړل  دغو چاڼ ځايونو تراوسه پورې   دغې ډلې ته دمليونونو ډالرو ګټه رسولې ده.
دچهارشنبې په ورځ هم دسوريې په ختيځ کې په يوه پوځي کمپ چې داعش له هغه څخه   دعراق پولې ته دتجهيزاتو دليږلو  اوراټولولو لپاره استفاده کوله  هوايي بريد وشو.
دامريکا هوايي پوځ  په خپلو هوايي بريدونو کې  دلومړي ځل لپاره  له رادار څخه  دتښتوونکو  اف _ ٢٢  ډوله الوتکو څخه هم  کاراخستى دى.

انقره \ دحريت خبري سايت \  باخترد تلې دمياشتې   ٣:
په انقره کې دامريکا سفارت  په ترکيه کې  له خپلو ميشتو اتباعو څخه وغوښتل  چې داحتمالي تروريستي بريدونو په وړاندې  دې  داحتياط لورى  رعايت کړي .
په ترکيه  کې  دامريکا سفارت  په يوه خبرتيا کې   په امنيتي خبرداري سره  په ترکيه کې ددغه هېواد له اتباعو څخه وغوښتل  چې  دداعش دډلې پرخلاف  دامريکا دهوايي بريدونو  په غبرګون کې  داحتمالي تروريستي بريدونو په وړاندې دې په بشپړه توګه  محتاط  و اوسي .
په دې خبرتيا کې ويل شوي دي  سره له دې چې  دخاص تروريستي ګواښ په باره کې   کوم خبر نه دى ترلاسه شوى  خوپه ترکيه کې  دتروريستي بريدونو احتمال لوړ بلل کيږي .
په ترکيه کې دامريکاسفارت له خپلو اتباعو څخه وغوښتل په تيره بيا   دکردانو داستوګنې په  ختيځ او جنوب ختيځو سيمو کې دې   زيات محتاط  و اوسي .

 کابل باختردتلې دمياشتې    ٣ :
دلومړي ځل  لپاره  دديرشو تنو ځوانانو دډله ييزو  ودونو مراسم نن دخيرخواه  دخيريه بنسټ له خوا  په کابل  کې پرځاى شول.
دباخترآژانس دخبرله مخې: په هغو مراسمو کې چې په همدې مناسبت  په کابل کې پرځاى شول   څو تنو ديني عالمانو دخير خواه دخيريه بنسټ دغه عمل وستايه او له خلکو څخه يې وغوښتل چې  له دغه  ناروا  دود او رواج څخه  چې داسلام دمقدس دين داساساتو اودمحمد(ص)غرا شريعت پرخلاف دې لرې والى غوره کړي  ځکه زيات  لګښتونه ددې سبب کيږي چې ځوانان فساد ته مخه وکړي.
دغه راز په دغو مراسمو کې دميربچه کوټ ولسوال  عبدالرحيم راشد وويل  چې  دخير خواه بنسټ  ددغې ولسوالۍ دسيمه ييزې شوراپه همکارۍ دديرشو تنو ځوانانو  چې مالي توان يې نه درلود  چې دواده لګښتونه برابر کړي دواده مراسم يې  ددغه بنسټ له خوا په ډله ييز ډول پرځاى شول.
راشد زياته کړه  چې ددغو ديرشو تنو ځوانانو دواده او نکاح ټول لګښتونه دخير خواه خيريه بنسټ  ددغه بنسټ درييس حاجي مايل خير خواه له شخصي پيسو څخه ورکړي دي.
دغه راز دکابل والي عبدالجبار تقوا وويل :  په دې ترڅ کې چې د خير خواه دخيريه بنسټ دغه عمل ستايم له ملي سوداګرو  څخه غواړم  چې ددغه شان مراسمو  په پرځاى کولو سره  بيوزلو ځوانانو ته دواده زمينه برابره کړي .

 دمشق  \ نيوز نو\  باخترد تلې دمياشتې   ٣:
دسوريې په شمال کې دداعش دډلې ځواکونه  سخت بمباري شوي دي.
دامريکا په مشرۍ  په نړيوال ايتلاف پورې اړوندو بم  غورځوونکو الوتکو دسوريې په شمال کې  دکوباني ښار په لويديځ کې دداعش دډلې دځواکونو په سنګرونو  په بريد سره  دغه سنګرونه سخت بمباري کړل  ، دامشخصه نه ده  چې دغو الوتکو دايتلاف  په کوم غړي هېواد پورې اړه لرله .
دکوباني ښار   دسوريې   دشمال په حلب ولايت کې دى  او اوسيدونکي يې کردان  ، عربان  او ترکمنان دي.
په وروستيو ورځو کې په دغه ښار دداعش دځواکونوله خوا بريد شوى دى او له کردي ځواکونوسره  دنښتې ډګر دى .
دغه نښتې  او دداعش دافرادوله خوا  دکوباني ښار دنيولو احتمال ددې سبب شوى دى   چې دسيمې  په لسګونو زره تنه اوسيدونکي  وتښتي چې په زرګونو تنه يې ترکيې ته رسيدلي دي.
په رارسيدلو خبرونو کې ويل شوي دي   چې دداعش دځواکونو پرخلاف  دنړيوال ايتلاف دهوايي بريدونو په پيل کيدوسره  يو شمير دغو کډوالو  دخپل امنيت په نسبت  ډاډ پيدا کړى دى  او  دخپلې استوګنې سيمو ته دستنيدوپه لټه کې دي.
دعراق داردو ويندوى ويلي دي  چې دايتلاف الوتکو  دسوريې اوعراق  دپولې په دواړو غاړو کې يو لړهدفونه  بمباري کړي دي  چې له امله يې  دداعش دډلې يو زيات شمير  کسان وژل شوي دي  اودهغوى دمهماتو څوديپوګانې ويجاړې شوې دي.