19 July 2019

RSS Facebook

سوداگریز


تازه خبرونه

د کابل په نننۍ چاودنه کې اته کسان ووژل شول

د کابل په نننۍ چاودنه کې اته کسان ووژل شول

کابل/باختر/ د چنګاښ ٢٨ مه د کابل پوهنتون په وړاندې...

د ډار اچوونکوله شتون څخه د هلمند د یوې سترې ساحې پاکول

د ډار اچوونکوله شتون څخه د هلمند د یوې سترې ساحې پاکول

ـ کابل/باختر/ د چنګاښ ٢٨ مه په داسې حال کې چې...

په پروان کې د ډایاک پروګرام ته لسګونه جنګي وسایل وسپارل شول

په پروان کې د ډایاک پروګرام ته لسګونه جنګي وسایل وسپارل شول

کابل/باختر/ د چنګاښ ٢٨ مه د پروان پولیسو د ډایاک...

Youtube Player

khantry design

سوداگریز

سوداگریز

کابل_باختر د سلواغې٣٠ مه:
د کورنیو چارو وزیر محمدعمر داوود زي نن د پکتیا، پکتیکا، او د خوست د ولايتونو له یوشمېر قومي مشرانو او مخورو سره وکتل.
د کورنيوچارو وزارت مطبوعاتي دفترباخترآژانس ته خبرورکړ:
په دې کتنه کې لومړی د پکتیا، پکتیکا او د خوست له ولايتونو څخه راغلو قومي مشرانو او مخورو په خپلو خبرو کې د دغو ولایتو په سیمه ییزو ستونزو خبرې وکړې او د کورنیو چارو وزارت ټول امنیتي پلانونه په ځانګړې توګه د راتلوونکو ولسمشریزو او ولایتي شوراګانو د ټولټاکنو د ډاډمن امنیت په موخه د کورنیو چارو وزارت له لوری هلو ځلو څخه یادونه او ستاینه وکړه ویې ویل، د پکتیا، پکتیکا او د خوست د ولایتونو ټول اوسیدونکي به له خپلو ملي پولیسو او نورو امنیتي ارګانونو سره د کلکې همغږۍ په لرلو سره د سولې او امنیت په ټینګښت کې پوره ونډه لري او په پوره اخلاص او صداقت سره به په راتلونکو ولسمشریزو ټولټاکنو کې بشپړه برخه واخلو ترڅو د هېواد د روښانه راتلونکي په موخه خپله هېوادانۍ دنده ترسره کړو.
وروسته د کورنیو چارو وزیر محمد عمر داوود زي د پکتیا، پکتیکا او د خوست له ولایتونوڅخه راغلو قومي مشرانو او مخورو له راتګ څخه مننه وکړه ویې ویل: د کورنیو چارو وزارت د خپلو ولسونو د ګډو همکاریو او همغږیو څخه پوره منندوﺉ دی او له ملي امنیتي ځواکونو سره د راتلوونکو ټولټاکنو د ډاډمن امنیت په موخه د قومونو او ولسونو د ګډې همکارې رول تر هرڅه لومړیتوب لري.
موږ به د خپل ټول وس اوتوان او د ولسونو په ګډې همکارۍ سره د امنیت په ټینګښت کې لا نور کوټلي ګامونه پورته کړو ترڅو د راتلوونکو ټولټاکنو لپاره يوه ډاډمنه امنیتي فضا برابره کړو.

کابل باختر دسلواغې ديرشمه :
د افغانستان دجمهوري رياست نوماندان استاد عبدالرب رسول سياف اوګل آقا شيرزي نن ختيځ  ولايت ننګرهار ته  لاړل او د خپلو زرګونوتنو ملاتړو ترمنځ يې خپل کاري پروګرامونه څرګند او بيان کړل.
استاد سياف په جلال آباد ښارکې د خپلوزرګونوتنوملاتړو ترمنځ وويل چې د جمهوري رياست په انتخاباتوکې د برياليتوب په صورت کې به د اسلام د مبين دين په ارشاداتو په ډډې لګولو سره د تروريزم، نشه يي توکو اوبې وزلۍ په ګډون د کرغيړنو پديدو ټغر ټول کړي.
استاد سياف په دې غونډه کې دټولنيزې سوکالۍ، د افغانستان داقتصادي ودې، کار موندلو او دهيواد دامنيتي، دفاعي او اقتصادي ځواکمنۍ په برخه کې هم  خپلو پروګرامونو ته اشاره وکړه او له خلکو څخه يې وغوښتل چې د جمهوري رياست په انتخاباتوکې د ده ملاتړ وکړي .
دجمهوري رياست بل نوماند ګل آقا شيرزي هم نن په جلال آباد ښارکې دخپلو زرګونو تنو پلويانو ترمنځ خپل پروګرامونه بيان کړل.
شيرزي وويل چې د برياليتوب په صورت کې د افغانستان د بيا جوړولو، دعوايدو د ودې، د امنيت د تامينولو اودکارموندلو لپاره پروګرامونه لري.
د افغانستان له ملي ګټو سره سم له نړۍ سره د مناسبو اړيکو ټينګښت، ښوونې او روزنې ته پاملرنه، د تحصيلي کچې وده او د ادارو اغيزمنتوب هغه نوې موضوعګانې وې چې استاد سياف اوګل آقا شيرزي ورته اشاره وکړه.

کابل باختر دسلواغې ديرشمه :
په کونړ ولايت دپاکستاني پوځيانو د راکټي بريد له امله ددغه ولايت د دوو ساحو په ځنګلونوکې اور لګيدلى دى .
دکونړ ولايت امنيه قوماندان مل پاسوال عبدالحبيب سيد خيل باخترآژانس ته وويل: په تيرو څليرويشتوساعتوکې د پاکستاني پوځيانو له خوا د دغه ولايت د دانګام ولسوالۍ د زوړ براول اوښاره په کليو څليرويشت توغندي توغول شوي دي چې د هغو د لګيدو له امله د هغو دوو سيمو په ځنګلونوکې اورلګيدلى دى .
ددغه خبر تر را رسيدوپورې په دغو ځنګلونوکې اور لګيدنه هماغه شان دوام لري .

کابل باختر دسلواغې ديرشمه :
په نورستان ولايت کې د نويونښتو په بهيرکې شپږ تنه وسله وال طالبان ووژل شول.
دغه جګړې نن سهار د ډيورندکرښې ته څېرمه په کامديش ولسوالۍ کې هغه وخت ونښتې چې يوې ډلې وسله والوطالبانوغوښتل چې د ډيورندله کرښې اخوا څخه نورستان ته واوړي.
دافغانستان په ختيځ کې د سرحدي پوليسو يو قوماندان باخترآژانس ته وويل چې په دغو نښتوکې شپږ تنه وسله وال طالبان ووژل شول.
ده وويل: دغوطالبانوغوښتل چې د ډيورند له کرښې اخوا څخه نورستان ته راواوړي او دسرحدي  پوليسو په پوستې بريد وکړي .
ويل کيږي په دغو نښتوکې افغان پوځيانو اوملکي وګړو ته زيان نه دى اوښتى.
ديوبل خبرله مخې: پنځه تنه وسله وال طالبان په ارزګان ولايت کې د نښتو له امله ووژل شول.
دغه جګړې تېره شپه ناوخته دچارچينو ولسوالۍ په مربوطاتوکې هغه وخت ونښتې چې پوځيانو د وسله والو طالبانو په  يوه پټنځي  بريد وکړ .
د ارزګان ولايت د چارچينو ولسوالۍ د امنيې قوماندانۍ مرستيال  دباخترآژانس  خبريال ته وويل چې په دغونښتوکې پنځه تنه وسله وال طالبان ووژل شول.
ده وويل چې په دې پيښه کې يو شمېر طالبان هم ټپيان شوي دي چې دقيق شمېر يې څرګند نه دى.
ويل کيږي په دې پيښه کې افغان پوځيانو او د سيمې اوسيدونکو ته زيان نه دى اوښتى.
په را رسيدلوخبرونوکې ويل شوي دي چې له دغو جګړو وروسته افغان پوځيانو د وسله والو طالبانو څوجنګي وسايل او يو پټنځاى ترلاسه کړى دى.

کابل باختر دسلواغې ديرشمه :
په بغلان ولايت کې يوه ښځينه پوليسه نن دخپل  ميړه له خوا دتبر په ګوزارونو سره ووژل شوه .
دبغلان ولايت دامنيې قوماندانۍ ويندوى جاويد بشارت باخترآژانس ته خبرورکړ: ددغه ولايت دامنيې قوماندانۍ يوه ښځينه پوليسه ساتمنه سبزه د خپل ميړه له خوا د تبر په ګوزارونو سره په بې رحمانه ډول وژل شوې ده .
ده وويل: ددغې پيښې اصلي علت کورنۍ تاوتريخوالي دى او د پيښې په اړوند د پوليسو څيړنې پيل شوې دي .
ويل کيږي ددغې ميرمنې ميړه له ساحې څخه تښتيدلى  دى او ترڅارنې لاندې دى.

کابل باختر دسلواغې ديرشمه :
دغزني ولايت په ګيلان ولسوالۍ کې پرون د بهرنيو ځواکونو د هوايي بريد له امله څلورتنه وسله وال طالبان ووژل شول.
په غزنې ولايت کې د ٢٠٣ تندر قول اردو د دريمې لوا ويندوى نظيف الله سلطاني باخترآژانس ته وويل: په دې بريدکې چې په دغه ولايت کې له ميشتو افغان امنيتي ځواکونو سره په همغږۍ کې ترسره شو؛ څلورتنه وسله وال طالبان دګيلان ولسوالۍ په سپيدار کلي کې ووژل شول .
ديوبل خبر له مخې: پوليسو دغزني ولايت د آب بند ولسوالۍ په مربوطاتوکې د ځانګړو عملياتو په بهيرکې دولس ماينونه کشف او شنډکړل.
ده زياته کړه: دغه ماينونه د وسله والوطالبانو له خوا د يوه ښوونځي په ودانۍ کې ځاى پرځاى شوي و چې دپوليسو له خوا کشف او ترلاسه شول .

ميرامشاه  باختر دسلواغې ديرشمه :
د پاکستاني طالبانوتحريک ادعاکړې ده چې دغه ډله د پاکستان له حکومت سره د سولې په خبروکې جدي ده.
باخترآژانس د پاکستان د ډان ورځپاڼې د انترنتي سايټ له خولې خبر راکړ:  دپاکستاني طالبانو د تحريک ويندوى شاهدالله شاهد چې د نامعلوم ځاى څخه يې  دټيلفون له لارې له خبريالانو سره خبرې کولې چې دغه ډله د اوربند په باب په خپله اراده کې هوډمنه ده او په ډيرلنډ ممکن وخت کې په دې باب دتصميم نيولو درناوي کوي .
دپاکستاني طالبانو دتحريک ويندوى زياته کړه چې دغه ډله دسولې دخبرو دبهير ملاتړ کوي او د اوربندپه ګډون د هغوى دتصميم  د اجرا کولو په باب به هيڅ راز ستونزه ونه لري.
دغه ويندوى دپاکستان د درې ويشتو تنو سرحدي ځواکونو د وژل کيدو په باب وويل: ددغې موضوع توضيح چې د مومند اجنسى د طالبانو له خوا شوې ده؛ مانالرونکې ده او د دوى له خوا دغه ترسره شوي اقدام به دپاکستانې طالبانو د شورا  په غونډه کې وڅيړل  شي.
دغه ويندوى وويل چې د ستنيدو په وخت کې د دغوعسکرو وژل او د هغوى د مړو پريښودل يو لمسوونکى اقدام دى او زياته يې کړه چې دغه شان پيښې کولاى شي د سوله ئيز برياليتوب بهير له ډب سره مخامخ کړي .
په همدې حال کې د طالبانو دسولې دکميټي ناظم او د جمعيت العلماى اسلام  ايالتي مشر مولانا يوسف  شاه ويلي دي: طالبان غواړي چې په خبرو کې اوسنى ډب پاى ته ورسول شي. دحکومت د سولې کميټه دې بايد نرمښت وښي او له طالبانو سره دسولې خبرې له سره پيل کړي .
دپاکستان دحکومت او د پاکستاني طالبانودتحريک ترمنځ دسولې خبرې د روانې اوونۍ د دوشنبې په ورځ دپاکستان د سرحدي ځواکونو د هغو درې ويشتو تنو عسکرو له وژل کيدو وروسته چې په٢٠١٠ کال کې د طالبانو د ډلې له خوا اسيران شوي وو؛  وځنډيدې.

کابل باختر دسلواغې ديرشمه :
دوه تنه وسله وال مخالفين پرون په پکتيا ولايت کې د ډار اچوونکو فعاليتونو د ترسره کولو په تور ونيول شول.
دملي دفاع وزارت د ويندوى مطبوعاتي دفتر باخترآژانس ته خبرورکړ: دوه تنه وسله وال مخالفين چې په ورانکارو فعاليتونو او د وسلو اومهماتو په ليږدونه کې رول درلود؛ دپکتيا ولايت د زرملي ولسوالۍ  په مربوطاتو کې  د ملي دفاع وزارت د خاصو قطعاتو دځواکونو دچاڼيز فعاليت په بهيرکې ونيول شول .
  په دغو عملياتو کې د وسلو اومهماتو يوه ډيپو، اووه ميله سپکه وسله، يوه پيکا، يوکلاشينکوف، د ټانک يو دوربين، د پيکا يوه بکسې ګولۍ او نور پوځي تجهيزات او وسايل ترلاسه شوي دي.

کابل باختر دسلواغې ديرشمه :
دملي امنيت دلوى رياست موظفينو دکندز ولايت په مربوطاتوکې دامنيتي فعاليت په بهير کې د وسله والو مخالفينو په يوه ډيپوکې يوه اندازه وسله ترلاسه کړه .
دملي امنيت د لوى رياست مطبوعاتي دفتر نن باختر آژانس ته د يوې خبرپاڼې په ليږلو سره ليکلي دي چې د دغې ادارې موظفينو د هغه امنيتي فعاليت په بهيرکې  چې دکندز ولايت د خان آباد ولسوالۍپه مربوطاتوکې ترسره شو؛په يوه ډيپوکې  يوه اندازه وسله کشف اوترلاسه کړه.
يوه اړونده خبرځاى وويل: په ترلاسه شويو مهماتواو وسلوکې يو الوانداز، دوه آر-لي-جي-٧ توغندى او شپږ کلاشينکوفونه شته چې وسله والو مخالفينو غوښتل چې هغه د انتخاباتو د بهير دګډوډولولپاره وکاروي .
ددغې قضيي په اړوند يو تن نيول شوى دى.

کابل باختر دسلواغې ديرشمه :
د ملي اردو دوه عسکر پرون په قندهار او هلمند کې د ماينونو د چاودنې له امله شهيدان شول .
دملي دفاع وزارت د ويندوى مطبوعاتي دفترباخترآژانس ته خبرورکړ: دغه دوه عسکر دقندهار ولايت دپنجوايي او دهلمند ولايت دګرشک دولسواليوپه مربوطاتو کې د امنيتي دندو په ترسره کولو بوخت وو چې په ښخ کړى شويو ماينونو  وختل  او شهيدان شول .