25 February 2020

RSS Facebook

سوداگریز


تازه خبرونه

درسنيزو شکايتونو او سرغړونو دڅېړنې کمېسيون غونډه وکړه .

درسنيزو شکايتونو او سرغړونو دڅېړنې کمېسيون غونډه وکړه .

کابل /دکب ٥مه / باختر : داطلاعاتواوفرهنګ وزارت دسرپرستې حسينې...

Youtube Player

khantry design

سوداگریز

سوداگریز

Sunday, 28 September 2014 12:27

خبرتيا

کابل – باختر د تلې دمياشتې ٦
د کابل پولي تخنيک پوهنتون خبرتيا
د کابل پولي تخنيک پوهنتون د ١٣٩٣ هجري لمريز کال لپاره د انګليسي ژبې په ډيپارتمنت کې د ليسانس، ماستر او يا دکتور په سويه په دوو بستونوکې علمي کادرته اړتيا لري.
په شرايطو برابر غوښتوونکي دې د روان کال د تلې د مياشتې له ٦مې نيټې څخه تر ١٤مې نيټې پورې د خپل شموليت د غوښتن ليکونو پړاونه د کابل پولي تخنيک پوهنتون له لارې بشپړ کړي او له خپلو سندونو او د تابعيت له تذکرې سره دې د پوهنتون ادارې ته ورشي.

کابل – باختر د تلې دمياشتې ٦
د پاکستاني پوځيانو له خوا تېره شپه ١٦ توغول شوي توغندي د کونړ ولايت په ځينو سيمو لګيدلي دي .
د کونړ ولايت امنيه قوماندان جنرال عبدالحبيب سيدخيل د باختر آژانس خبريال ته وويل: دغه توغندي د دانګام ولسوالۍ په ځينو سيمو ليګدلي دي چې د سر زيان يې نه دى اړولى.
خبرځاى وويل چې د دغو راکټي بريدونو په بهيرکې د دانګام ولسوالۍ په مربوطاتوکې يو شمېر کورنۍ له خپلو کورونو څخه وتلو ته اړې شوې.
ويل کيږي د روان کال له پيل څخه تراوسه پورې د پاکستاني پوځيانو له خوا څه دپاسه شپږ زره توغول شوي توغندي د افغانستان د ختيځ ولايتونو په اړوندو سيمو لګيدلي دي چې له امله يې زموږ په لسګونو تنه هيوادوال شهيدان او يو شمېر نور هم ټپيان شوي دي.

کابل – باختر د تلې دمياشتې ٦
د شخصي ملکيت دوه جريبه ځمکه د روغتيايي کلينيک د جوړولو په مقصد د بغلان ولايت د عامې روغتيا رياست په واک کې ورکړې شوه.
پهلوان قدوس د دوه جريبه لومړۍ درجې آبي ځمکې د ورکړې اصلي انګيزه د لوى خداى (ج) د رضايت ترلاسه کول او د نهرين ولسوالۍ د اره کش د کلي د خلکو د روغتيايي ستونزو حل کول وبلل.
پهلوان قدوس د باختر آژانس خبريال ته وويل: يو کال مخکې دوه تنه ښځې چې زموږ په ګاونډکې وې؛ کله يې چې غوښتل هغوى روغتون ته وليږدول شي؛ په لاره کې يې سا ورکړه او مړي يې کلي ته وليږدول شول چې دا کار د دې سبب شو چې په دې لټه کې شوم چې په مناسب ځاى کې روغتيايي کلينيک جوړ شي او ما خپله دوه جريبه شخصي ځمکه د روغتيايي کلينيک د جوړولو لپاره د عامې روغتيا رياست په واک کې ورکړه.
د نهرين ولسوالۍ د اره کش د کلي يوه سپين ږيري عبدالحى ددغه سړي دښه احساس له امله د قدردانۍ په ترڅ کې د خلکو د امنيت او آرامۍ د دښمنانو د نفوذ د مخنيوي په کارکې د ده ګړه وړه او رول مهم وبلل.
د بغلان ولايت د عامې روغتيا رياست سرپرست ډاکتر امرالدين اشرفي دغه دوستانه اقدام وستايل او وويل چې ددغه کلينيک په جوړيدو سره به ددغه کلي او د هغه د ګاونډيو کليو د اوسيدونکو روغتيايي ستونزې په بشپړه توګه حل شي.

کابل_باختر د تلې د مياشتې٦مه:
جمهور رئيس حامدکرزي نن له غرمې مخکې د اساسي قانون پر تطبیق د څار د خپلواک کمېسیون سرپرست پوهاند ګل الرحمان قاضي ته د غازي وزیر محمد اکبرخان عالي دولتي مډال ورکړ.
د جمهوري رياست مطبوعاتي دفترباخترآژانس ته خبرورکړ:
پوهاند ګل الرحمان قاضي ته دغه مډال په بګرام کې د ائتلافي ځواکونو د زندان د سپارلو او په نوموړي زندان کې د موجودو زندانیانو د برخلیک د معلومولو په برخه کې د نه ستړي کېدونکو هلوځلو او په بشپړ اخلاص او ريښتینوالۍ او بریا سره د دندې د ترسره کېدو په موخه ورکول کيږي.
د افغانستان جمهور رئيس حامد کرزي، پوهاند ګل الرحمان قاضي ته په کاري چارو کې د لا بریاليتوب هیله وکړه.#

کابل – باختر د تلې دمياشتې ٦
يوولس تنه وسله وال طالبان د امنيتي ځواکونو د هغو ګډو عملياتو په بهيرکې چې له څلورو ورځو راپه دې خوا د کندز ولايت په مربوطاتوکې دوام لري؛ ووژل شول او څوارلس تنه نور ټپيان شول.
دغه عمليات له څلورو ورځو را په دې خوا په کندز ښار پورې اړوند د ګورټيپې، لرخوابي او د خروټو په ساحوکې پيل شوي دي.
دکندز ولايت د امنيې قوماندانۍ وياند سيد سرور حيسني د باختر آژانس خبريال ته وويل: په دغو عملياتوکې د وسله والو طالبانو د ډلې د يوه مشر ملاعارف په ګډون ١١ تنه طالبان وژل شوي او ١٤ تنه نور چې دوه تنه قوماندانان هم پکې شامل دي؛ ټپيان او يو تن بل يې د امنيتي ځواکونو له خوا نيول شوى دى.
حيسني زياته کړه چې د طالبانو د پوځي کميټې مسوول هم په وژل شويو کسانو کې شامل دى او د طالبانو يوه اندازه سپک او درانده جنګي وسايل هم دپوليسو لاس ته ورغلي دي .
ويل کيږي ددغو عملياتو په بهيرکې د نښتو له امله څلور تنه پوليسان هم ټپيان شوي دي.
د يادونې وړ ده: دغه عمليات د وسله والو طالبانو له شتون څخه په بشپړه توګه د اړوندو سيمو تر پاکولو پورې دوام لري.

کابل – باختر د تلې دمياشتې ٦ دبغلان ولايت د نهرين ولسوالۍ ابتداييه محکمې دوه تنه چې د وژنې تور پرې لګول شوى دى؛ نن په اعدام محکوم کړل. دنهرين ولسوالۍ امنيه قوماندان سمونوال محمد ناصر اسدي د باختر آژانس خبريال ته وويل: د نهرين ولسوالۍ د ابتداييه محکمې په دوو جلاجلا قضيوکې د قضايي علني غونډې په ترڅ کې دوه تنه چې د وژنې تور پرې لګول شوى دى؛ په ډيرو سختو مجازاتو يعنې اعدام محکوم کړل. خبرځاى وويل: ددغې محکمې پريکړه وروستۍ نه ده او د تورنو کسانو د استيناف غوښتنې حق محفوظ دى.

کابل – باختر د تلې دمياشتې ٦
دميدان وردګو ولايت په جلريز ولسوالۍ کې د ماين دچاودنې له امله پنځه تنه پوليسان شهيدان شول.
دميدان وردګو د والي وياند عطاالله خوږياڼي دبآختر آژانس خبريال ته وويل : دغه چاودنه پرون مازيګر د جلريز ولسوالۍ د اسماعيل خيلو په سيمه کې هغه وخت وشوه چې يو سيمه ييز پوليس له وسله والو طالبانو سره د نښتې په بهيرکې ټپي شوى و، خو بل پوليس چې د هغه ليږدونې ته روان وو؛ په لاره کې په ښخ کړى شوي ماين وخوت.
خبرځاى وويل: په دې چاودنه کې پنځه تنه پوليسان شهيدان او د سپرلۍ موټر يې هم په بشپړه توګه ويجاړ شو.

کابل – باختر د تلې دمياشتې ٦ دوه تنه نن د نشه يي توکو د قاچاقو په تور د بلخ ولايت د پوليسو له خوا ونيول شول. دبلخ ولايت دامنيې قوماندانۍ وياند شيرجان دراني د باختر آژانس خبريال ته وويل: دوه تنه تنه د شپږو کيلوګرامو چرسو او هيروينو او د پنځه اتيا بوتله الکولي مشروباتو د قاچاقو په تور په مزاشريف ښارکې ونيول شول. دخبرځاى دڅرګندونو له مخې: نيول شوي کسان د جوزجان ولايت اوسيدونکي دي او پوليسو د روان کال په بهيرکې په لسګونو تنه د نشه يي توکو دقاچاقو په تور نيولي دي . دا په داسې حال کې ده چې د بلخ ولايت په کچه په نشه يي توکو د روږدوکسانو شمېر زيات شوى دى او په نشه يي توکو د ځوانانو د روږدي کيدو اصلي علت ګاونډيو هيوادونو او په تېره بيا ايران ته مهاجرت دى. دراني زياته کړه: همدا اوس په بلخ ولايت کې يواځې يو روغتون د روږدوکسانو د درملنې په خاطر فعاليت کوي چې د روږدوکسانو د لوړ شمېر په پرتله هغوى ته د روغتيايي خدمتونو وړاندې کول لږ او ناڅيز دي.

کابل – باختر د تلې دمياشتې ٦
د فارياب ولايت په المار ولسوالۍ د وسله والو طالبانو بريد د امنيتي او وګړنيو ځواکونو له خوا شنډکړى شو او دښمن ته د سر دروند زيان واوښت .
په فارياب ولايت کې د ٢٠٩شاهين قول اردو د لومړۍ لوا د قوماندانۍ مطبوعاتي مسول جګړن محمد رضا رضايي د باختر آژانس خبريال ته وويل: د بهرنيو اتباعو په ګډون سلګونو تنو وسله والو طالبانو تيره اوونۍ دفارياب ولايت د آلمار ولسوالۍ په قره يي سيمې وحشيانه بريدکړى و؛ خو کلي يې نيولي او ماشومان يې په وحشيانه ډول شهيدان کړي وو.
خبرځاى زياته کړه: د (پنځم خنجر) په نامه محاربوي عمليات د ٢٠٩ شاهين قوماندانۍ د ځواکونو له خوا د وګړنيو ځواکونو په همکارۍ د طالبانو له منګولو څخه د خپلو سيمو د بېرته نيولو په مقصد ترسره شول چې دغه عمليات تر ماښام په برياليتوب سره پاى ته ورسيدل .
ده زياته کړه: د دغو عملياتو په بهيرکې ١٢تنه وسله وال طالبان ووژل شول او١٨ تنه طالبان ټپيان شول چې د دوى دوه تنه قوماندان ملا محمد او امير محمدهم په وژل شويو کسانو کې شامل دي.
دغه راز د دغو عملياتو په بهيرکې د دښمن دولس موټر سايکلونه هم دامنيتي ځواکونو لاس ته ورغلي دي .
ويل کيږي ددغو عملياتو په بهيرکې درې تنه وګړني ځواکونه شهيدان او دوه تنه نور برسيرن ټپيان شوي دي.

واشنګتن تايمز آن لاين  – باختر د تلې دمياشتې ٦
د ټايم آنلاين خپرونې د امريکا د ديموکرات ګوند د يوه سناتور کارل ليون له خولې په خپلې وروستۍ ګڼه کې ليکلي دي چې وايي: په افغانستان کې برياليتوبونه د يادونې وړ دي او بايد د دغه هيواد د راتلوونکى په باب ناهيلې نشو.
د خپرونې په ليکنه: سناتور ليون ويلي دي چې د امريکا په سلوکې له ٦٥ څخه تر ٧٠ پورې خلک نن په افغانستان کې د دغې جګړې له پايلو څخه خوښ نه دي. خو په افغانستان کې په سلوکې له ٧٠ څخه تر ٨٠ پورې خلک په دې باور دي چې دغه جګړه د دوى په ګټه نه ده.
د سناتور ليون د څرګندونو له مخې: هغه کسان چې له پنځلسو زرو څخه تر شلو زرو کيلو مترو پورې لرې ژوند کوي؛ ښايي په ښه توګه قضاوت ونه کړاى شي.
د ټايم آنلاين خپرونې په ليکنه: امريکايي ماليه ورکوونکي د دې حق لري چې په دې باب پوښتنه وکړي.
خو سناتور ليون وايي: که چيرې لاره پيدا شي چې دى افغانستان ته سفر وکړي؛ هيله من دى چې د امريکا خلکو ته يو پيغام له ځان سره راوړي چې په افغانستان کې د دوى د حکومت د هڅو او هاند د اغيزمنتوب څرګندوى وي.