20 November 2019

RSS Facebook

سوداگریز


تازه خبرونه

جمهورريیس غني د ننګرهار د ولسي پاڅون له قومندانانو سره وکتل

جمهورريیس غني د ننګرهار د ولسي پاڅون له قومندانانو سره وکتل

کابل/ دلړم۲۸مه/باختر د افغانستان د اسلامي جمهوریت جمهورريیس محمد اشرف غني...

پنځه وسله وال طالبان په پکتیا کې ووژل شول

پنځه وسله وال طالبان په پکتیا کې ووژل شول

کابل/دلړم۲۸مه/باختر د پکتیا د ځاځي آریوب او سېدکرم ولسوالیو په مربوطاتوکې...

Youtube Player

khantry design

سوداگریز

سوداگریز

Monday, 16 June 2014 08:15

تبصره

کابل- باختر د غبرګولي د مياشتې ٢٦
د افغانستان خلکو د جمهوري رياست په دويم پړاو انتخاباتوکې په پراخ ګډون سره وښودله چې په باورونو او ارزښتونو ژمن دي او ملي هدفونوته د رسيدو په لاره کې هيڅ راز خنډ نه زغمي.
د باختر آژانس مبصر ليکي:
په هيوادکې د جمهوري رياست دويم پړاو انتخابات چې دوه ورځې مخکې ترسره شول؛ په دې پړاوکې د خلکو د ګډون کچه د رضايت او قناعت وړ و او کولاى شو ووايو چې زموږ خلکو يوځل بيا يوه ملي حماسه تکرار کړه.
په انتخاباتوکې د خلکو پراخ ګډون ثابته کړه چې دوى په ارزښتونو او باورونو ژمن دي او د ډار اچوونکو هيڅ ګواښ او د سيمې د مغرضو استخباراتي سازمانونو هيڅ ورانکار پروګرام نه شي کولاى چې دوى د هويت له ثبت او د ځلانده راتلوونکې له انتخاب څخه واړوي.
دغه ملي پروګرام له پيل څخه له امنيتي ګواښونو او د بهرنيو استخباراتي سازمانونو له اخلالوونکو پروګرامونو سره يوځاى و، خو د خلکو هوډ او په انتخاباتوکې د هغوى پراخ ګډون وښودله چې زموږ خلکو په همغږۍ سره او په يوه غږ تروريزم او بهرنيوګواښونو ته (نه) ووايه او د يوې ځلانده راتلوونکې په جوړښت باندې د تاييد مهر ولګاوه.
د وګړني هوډ او نيت ترڅنګ، د اداري پروګرام جوړولو، مناسبت تخنيکي مديريت او په پاى کې د امنيتي ځواکونو تدبيرونو او سرښندنو تر يوې اندازې پورې په هيوادکې په معياري ډول د انتخاباتو د ترسره کولو زمينه برابره کړه.
له هرڅه څخه زيات امنيتي ګواښونه او انديښنې د دغه بهير د ګډوډيدو عامل بلل کيده خو امنيتي ځواکونو په ولايت او متانت او په لوړ مديريت سره يوې سترې امنيتي انديښنې او ستونزې ته ځواب ووايه او ثابته يې کړه چې دې هيواد د خپلواکۍ ، عزت او هويت رښتيني ساتندويان دي .
سره له دې چې دغه تدبيرونه په لوړه کچه او په مناسب مديريت سره اجرا شول؛ سره له دې هم تروريستانو د هيواد په ځينو سيموکې په غلچکي او وحشيانه ډول په تحرکاتو لاس پورې کړ او زموږ د يو شمېرهيوادوالو دوينې نويدو ترڅنګ ديوشمېر امنيتي منسوبينو د شهادت سبب شول.
دوى خپل سرونه قرباني کړل چې نورکسان رايې ورکړي چې دغه ميړانه او درايت کيداى شي يوه تلپاتې خاطره الګو وي.
د دې ترڅنګ د رسنيو مسولانه، بيطرفانه او وګړني چلند خلکو ته روحيه ورکړه، د انتخاباتو د ترسره کولو په وخت کې د جنګي خبرونو او د تروريستي پيښوتحريم چې د رسنيو له خوا يو نوښتګر حرکت و؛ د دې سبب شو چې خلک انديښنې ته لاره ورنه کړي.
دغه راز دا رسنۍ دي چې په منظم ډول يې خلک دې ته وهڅول چې د رايې وکولو صندوقونو ته لاړ شي او د خپلې راتلوونکې په نيت تصميم ونيسي چې کولاى شو د رسنيو حرکت ارزښتناک او د ستاينې وړ وبولو.
هغه څه چې وويل شول؛ د کار پاى نه دى، په تقويم کې د انتخاباتو د ترسره کولو ورځ يوازې يوه ورځ ده، په داسې حال کې چې انتخابات په خپله يو بهير دى چې يوه موده وخت نيسي او څه ناڅه د نوى منتخب جمهور رييس د لوړې د مراسمو د پرځاى کيدو تر وخته پورې دوام مومي.
په دې موده کې ضروري ده چې انتخاباتي کميسيونونه خپل کارونه په شفاف او عادلانه ډول پرمخ بوځي او د خلکو هرې پوښتنې ته قناعت بخښوونکى ځواب ولري؛ ثابته کړي چې دويم پړاو انتخابات له تقلب او لاسوهنې پرته ترسره شوي دي او هيڅ سليقه او غوښتنه د هغو په نتيجو باندې اغيزه نه کوي، د منلو وړ يوه نتيجه وړاندې کړي.
دغه راز د جمهوري رياست په نوماندانو او د هغوى د انتخاباتي کمپاينونو په مسوولينو پورې اړه پيدا کوي چې د لومړنيو او وروستيو نتيجو د اعلام له وخت څخه له هره داسې حرکت څخه چې د خلکو روان ستړى کړي؛ ډډه وکړي او د يوبل پرخلاف د نا انډولو ادبياتو له کارولو او له وخت څخه مخکې اټکلونو څخه ډډه وکړي .
په دې ترتيب کولاى شو د يو ملي بهير په توګه د انتخاباتو دفاع وکړو او ارزښت او اهميت ورته ورکړو.

کابل باختر  د غبرګولي  پنځه ويشتمه
  دمنتخب جمهور رييس دلوړې دمراسمو دپرځاى کولو ددولتي عالي کميسيون غونډه دچارو دادارې او دوزيرانو شورا د دارالانشا  د لوى رييس او دلوړې دمراسمو دپرځاى کولو دعالي کميسيون درييس صادق مدبر په مشرۍ نن مازيګر  په څلورو بجو دکابل دنړۍ هوايي ډګر دغونډو په تالار کې  جوړه شوه.
دچارو دادارې او دوزيرانو شورا دددرالانشا لوى رياست باختراژانس ته خبر ورکړ .
په پيل کې  دتدارکاتو او فرهنګي کميټو  رييسانو  خپل کاري پلانونه  غونډې ته طرحه کړل چې  ديو لړ تصحيحاتو له واردولو وروسته  دتاييد وړ وګرځيدل .
ورپسې  دتدارکاتو دکميټې  مرستيال دکورنيو ميلمنو دبلنې  دکارت طرحه  غونډې ته وړاندې کړه او دغې کميټې ته  دنده وسپارل شوه  چې دکورنيو ميلمنو  دبلنې کارت  دې  دغونډې  له تفاهم سره سم  تصحيح او دکميسيون راتلوونکي غونډې ته دې وړاندې کړي .
دغونډې په پاى کې  دکمسيون غړو دکابل دنړيوال هوايي ډګر  انګړاو دهوايي ډګر  دنوى او پخواني  ترمينل  د وي- اي- پي او د وي -وي -اي -پي  سالونونه وکتل او دودانيو دښکلا ، تنظيف ، تنظيم ، ګل کاري او رنګمالي او دهوايي ډګر او دجمهوري رياست تر ارګ پورې دهغه دتګلوري په سړکونو دخطونو داچولو په اړوند يې  دتشريفاتو  ، فرهنګي او دتدارکاتو کميټو او کابل ښاروالۍ ته  مشخصې دندې  وسپارل شوې .

کابل  باختر دغبرګولي  پنځه ويشتمه :
د افغانستان د اسلامي جمهوریت د جمهور رئيس حامد کرزي په مشرۍ د ملي امنیت شورا غونډه نن له غرمې مخکې په ارګ کې جوړه شوه.
دجمهوري رياست دمطبوعاتي دفترباختراژانس ته خبرورکړ.
په دې غونډه کې په بریالۍ توګه د جمهوري ریاست د دویم پړاو د انتخاباتو د ترسره کېدو په اړه د امنیتي سکټورونو د رپوټونو له اورېدو وروسته، د ملي امنیت شورا د دویم پړاو د انتخاباتو د امنیت د ټينګښت لپاره د هېواد د دفاعي او امنیتي ځواکونو له هڅو څخه قدرداني وکړه او په بېلابېلو کچو کې يې د اردو، پوليسو اود ملي امنیت ترمنځ همغږي او تفاهم وستایه او هغه يې د هېواد د امنیتي ځواکونو د مسلکي کېدو په لاره کې یو مهم ګام وباله.
له بله پلوه د هېواد امنیتي مسوولینو یادونه وکړه چې د انتخاباتو په ورځ د تروریستانو د احتمالي بریدونو په مخنيوي کې د خلکو همکاري بې سارې وه او له امنیتي ځواکونو سره د خلکو همدا همکاري وه چې د دښمن د څو بریدونو مخه ونیول شوه.
د ملي امنیت شورا په خپل وار سره د انتخاباتو د امنیت د ټينګښت په برخه کې د خلکو همکاري وستایله. د هېواد د ملي امنیت شورا همداراز په دغه ملي بهير کې د رسنيو د مثبت رول قدرداني وکړه.
د ملي امنیت شورا، د انتخاباتو د ورځې په تړاو د امنیتي رپوټونو په ادامه، د هېواد پر ختيځو سیمو د پاکستان د راکېټي بریدونو دوام په سختو ټکو وغانده، څرګنده يې کړه چې پاکستاني پوځيانو د خپلې ژمنې پر خلاف عمل کړی، هغه ژمنه چې د جمهوري ریاست د دویم پړاو د انتخاباتو د ترسره کېدو د همکارۍ په برخه کې يې کړې وه.
ورپسې د هېواد د ملي دفاع وزير له اوکراین څخه د ( اي ان ۱۴۰ ) انتونوف ډوله د دريو الوتکو د اخیستو په اړه خپل لومړنی رپوټ غونډې ته وړاندې کړ.
ده څرګنده کړه چې په اوکراین کې سیاسي تغييرات او وروستۍ ستونزې د دې لامل شوې، هغه کمپنۍ چې د الوتکو د خرڅلاو او لېږد مسوولیت يې درلود، یاد قرارداد له منځه یوسي. له همدې کبله د ملي دفاع وزارت له نورو بهرنيو کمپنيو سره په اړيکه کې دی چې بشپړ رپوټ به يې د ملي امنیت په راتلونکې غونډه کې وړاندې شي.
د غونډې په پای کې د ملي امنیت شورا د خصوصي کمپنيو له لارې د کورنيو چارو وزارت د برجسته رجالو قطعې ته د سپکو وسلو د برابرولو د موضوع په اړه بحث وکړ. تصمیم ونیول شو چې د مخکينيو پرېکړو له مخې د امنیتي ځواکونو د اړتیا وړ د وسلې اکمال دې یوازې له دولتي لارې ترسره شي او په دې اړه مطرح شوی وړاندیز رد شو.

کابل  باختر دغبرګولي  پنځه ويشتمه :
دانتخاباتي شکايتونو دکميسيون ويندوى نن په يوه خبري غونډه کې وويل: دتيرې شپې له نيمايي څخه نن له غرمې مخکې تريوولسو بجو پورې  ددغه کميسيون له خوا دانتخاباتو دبهير په نسبت ٢٧٠  مورده شکايتونه  او تيلفوني  معلومات ثبت شوي دي .
دباختراژانس دخبريال دخبر له مخې، دانتخاباتي شکايتونو دکميسيون ويندوى نادر محسني وايي، دانتخاباتي شکايتونو کميسيون ته د ٢٧٠ رسيدلو شکايتونو  اومعلوماتو څخه يوسلو څلويښت مورده يې تيلفوني معلومات دي چې شکايت  بلل کيږي اويوسلو  پنځه ديرش نور موارد يې رسمي شکايتونه دي چې په مرکزي دفترونو او دهيواد په څلورديرشو  ولايتونوکې ثبت شوي دي او دانتخاباتي شکايتونو دثبت بهير به دراتلوونکي شپې تر دولسو بجو پورې هماغه شان دوام ولري .
محسني زياته کړه چې دانتخاباتو دخپلواک کميسيون دکارکوونکو اودانتخاباتو په ورځ دهغو دلاسوهنو  په نسبت نهه ويشت مورده شکايتونه هم ثبت شوي دي چې دنوماندانو دملاتړو له خوا خلک  ته دپيسو دورکولو او دهغوى نظر وړ نوماندته دراي ورکولو په خاطر دهغوى دهڅونې ، دمشخص نوماند دملاتړ او دپيسو دورکولو په خاطر دامنيتي ځواکونو له خوا دخلکو دګواښلو او دانتخاباتو دکميسيون  دکارکوونکو دلاسوهنې  او نظر وړ نوماند ته دراي ورکولو لپاره دخلکو دهڅونې په ګډون مسئلې پکې شامليږي .
  دانتخاباتي شکايتونو دکميسيون ويندوى دغه راز دانتخاباتو له خپلواک کميسيون څخه وغوښتل چې  دهغوى دشکايتونو  دثبت لپاره دټاکلې مودې تر پاى ته رسيدو پورې دشکايتونو دثبت  هغه فورمې چې دراى ورکولو په ځايونوکې ويشلې شوې وې،  دشکايتونوکميسيون ته وسپاري او دغه راز محسني وويل  چې دشکايتونو داخستلو وخت دتيرې شپې له دولسو بجو څخه پيل شوى دى .
او  دغه بهير به ددوشنبې دشپې تر دولسو بجو پورې دوام ولري .
ده ټينګاروکړ چې  بايد له وخت څخه مخکې اټکل ونه شي .

کابل  باختر دغبرګولي  پنځه ويشتمه :
دشمالي وزيرستان څه دپاسه شپيتوکورنيو له يوې اوونۍ راپديخوا دخوست ولايت ته پناه راوړې ده .
  دخوست دوالي وياند دباختراژانس  خبريال ته وويل: دغه کورنۍ دناامنيو له امله له شمالي وزيرستان اوميرامشاه څخه دخوست ولايت دکربزو  او نادر شاه کوټ ولسواليو او ددغه ولايت مرکز ته راغلې دي.
د يوه خبرځاى دڅرګندونو  له مخې، په دغو کورنيو چې  زيات شمير  ماشومان اوښحې پکې دي، دولايت دمقام او  دمرستندويو موسسو له خوا  يوه اندازه خوراکي او غير خوراکي توکي ويشل شوي دي.
دوالي وياند ددغو کورنيو له خولې وايي دغه لړۍ  روانه ده او ښايي دغه ولايت ته زياتې کورنۍ راشي .
  خبرځاى زياته کړه: دولتي مقامات په پام کې لري چې هغوى ته يو سترکمپ جوړ کړي .

کابل  باختر دغبرګولي  پنځه ويشتمه :
درې تنه  وسله وال طالبان په لوګر ولايت کې له امنيتي ځواکونوسره په نښته کې ووژل شول .
دغه جګړه نن سهار دلوګر  ولايت په مرکز پل علم پورې اړوند په الوزاي کلي کې ونښته .
دلوګر دوالي ويندوى دين محمد  درويش دباختراژانس خبريال ته وويل: دغه جګړه هغه وخت ونښته چې وسله والو طالبانو په پل علم ښار کې دپوليسو په څو امنيتي پوستو بريدونه وکړل چې له طالبانو سره دپوليسو په مقابله کې  درې تنه وسله وال طالبان ووژل شول او يوبل طالب ټپي شو .
ويل کيږي  چې دنښتې په بهير کې يو پوليس هم ټپي شو چې روغتيايي حالت يې مخ په ښه والى بلل شوى دى .

کابل  باختر دغبرګولي  پنځه ويشتمه :
دوينې دورکړې نړيواله ورځ  دميندو دژغورنې لپاره  خوندي وينه تر شعار لاندې  نن په کابل کې  ونمانځل شوه .
دوينې دورکړې نړيواله ورځ  کال په کال  دنړۍ دروغتيايي  سازمان  له لارې  دغبرګولي  په دريمه لسيزه کې په ټولو هيوادوکې نمانځل  کيږي .
دباختراژانس  دخبريال دخبر له مخې، په افغانستان کې  دوينې دورکړې  دنړيوالې ورځې نمانځل  په اوسنيو شرايطو کې زيات ارزښت  لري، ځکه په افغانستان کې هره ورځ ددغه هيواد يو شمير بچيان  په تپل شوې جګړه کې يا وژل کيږي اويا ټپيانيږي ، دهغو کسانو له خوا دوينې ورکړه چې توان يې لري يو ستر انساني کار بلل شوى  او په همدې دليل  تل ويل کيږي  چې ستاسو ورکړې وينه ستاسو دميندو اوبچيانو ژوند ژغوري .
دعامې روغتيا وزيرې ډاکترې  ثريا دليل په دې غونډه کې ددغې موضوع ارزښت ته په اشارې سره  وويل:  وينه دژوند په دوام او دنړۍ دژونديو مخلوقاتو په پايښت  کې دخلقت اصلي عنصر دى چې  دروغتيا او سلامتي  په تامينولو کې خپل ځانګړي ځاى او ارزښت لري .
دليل زياته کړه، ځوانان ددې توان او ځواک لري او کولاي شي دخپلې وينې په ورکړې سره دبل انسان ژوند وژغوري .
  دعامې روغتيا وزيرې په خپلو خبرو کې يادونه وکړه چې دوينې دبانک دجوړولوکار بشپړ شوى او په روان کال کې په فعاليت پيل کوي اوهمدارنګه په هرات ،  مزارشريف او دهيواد په لرو پرتو سيموکې په دې لاره  اقدامات ترلاس لاندې دي .
يو سړى کولاي شي چې په کال کې څلور ځلې وينه ورکړي او ښځې کولاي شي چې په کال کې درې ځلې وينه ورکړي، په تيرو کلونوکې په سلوکې  څلويښت ورکړى شوې وينه درضاکارو خلکو وينه وه .
  دغه راز داطلاعاتو او فرهنګ وزارت دځوانانودچارو معين  دپاليسۍ رييس سيد مصطفي  سعيدي هم په دې غونډه کې خبرې وکړې وي ويل :ځوانان کولاي شي  په دې برخه کې  له نورو څخه مخکښ واوسي، په دې غونډه کې څو تنو هغو کسانو چې تل يې د نورو دمرستو په خاطر وينه ورکړې ده  دعامې روغتيا وزارت دستاينې  وړ وګرځيدل .

کابل  باختر دغبرګولي  پنځه ويشتمه :
  يو وسله وال طالب تيره شپه په لغمان ولايت کې  ووژل شو او درې تنه  نور طالبان ټپيان شول .
دلغمان ولايت دامنيې قوماندانۍ  ويندوى دباختراژانس خبريال  ته وويل : وسله والو طالبانو دالينګار ولسوالۍ دسنګر دمياخيلوپه سيمه کې  غوښتل دانتخاباتو دکميسيون په کارکوونکو کله يې چې دراي ورکولو صندوقونه دولايت مرکز ته ليږدول بريد وکړي چې دامنيتي ځواکونو د مقاومت له امله يوطالب ووژل شو او درې تنه نور يې ټپيان شول او نور طالبان له سيمې څخه وتښتيدل .
ويل کيږي چې په دې پيښه کې امنيتي ځواکونو او د انتخاباتو کارکوونکو ته زيان نه دى اوښتى .

کابل  باختر دغبرګولي  پنځه ويشتمه :
دانګلستان دفوټبال ملي ټيم دايټاليا دفوټبال له ملي ټيم سره په لومړۍ لوبه کې ماتې وخوړه .
په دې لوبه کې دايټاليا ټيم دانګلستان ټيم په دروازې دوه ګولونه  ووهل او دانګلستان دملي ټيم لوبغاړو يوازې يو ګول وواهه
دباختر اژانس دخبر له مخې، دغه راز دکولمبيا او دکاستاريکا ټيمونو تيره شپه خپلو سيالانو ته ماتې ورکړه .

کابل  باختر دغبرګولي  پنځه ويشتمه :
دفوټبال دنړيوال جام سيالۍ  نن شپه په دريو لوبو سره تعقيبيږي.
دباختراژانس دخبر له مخې، په لومړى لوبه کې دسويس ملي ټيم دافغانستان په وخت  نن شپه په اته نيمو بجو داکوادورله ټيم سره سيالي کوي او له هغه وروسته فرانسه او هاندورانس  دلوبې  دګر ته وردانګي  او دافغانستان په وخت دشپې په وروستيو وختو کې دارجنتاين ملي ټيم  دبوسنيا له ټيم سره لوبه کوي .