04 April 2020

RSS Facebook

سوداگریز


تازه خبرونه

په قندهارکې پر تګ راتګ محدوديتونه ولګول شول

په قندهارکې پر تګ راتګ محدوديتونه ولګول شول

-کابل / د وري ۱۶ مه / باختر له کرونا ويروس...

درې ملکي وګړي په لغمان کې ټپيان شول

درې ملکي وګړي په لغمان کې ټپيان شول

-کابل / د وري ۱۶ مه / باختر درې ملکي وګړي...

Youtube Player

khantry design

سوداگریز

سوداگریز

کابل باختردلړم دمياشتې ١١ :
دسيمه ييزو ارګانونو خپلواکې ادارې دمزارشريف ، ميدان ښار ، قندهار ، هرات ، جلال اباد ،  کندز، غزني ، پل علم  او دچاريکارو دښارونو پرمختيايي طرحه سيالۍ ته وړاندې کړې ده .
دباخترآژانس دخبرله مخې  : په دې اړوند دسيمه ييزو ارګانونو  په خبرپاڼه کې ويل شوي دي  :په   دغې سيالۍ کې   ددغوښارونو اوسيدونکي دټولنيز موقعيت په پام کې نيولو پرته کولاى شي ګډون وکړي.
دسيمه ييزو ارګانونو اداره په دې باور ده  چې دښارونو دپرمختيايي طرحو تدوين  داوسيدونکوله خوا له يوې خوا په ښارونو کې  داستوګنې دپروګرام  جوړولو په برخه کې  دښارونو داوسيدونکو نظر شريکوي اوله بله پلوه  دښې  حکومتوالۍ په برخه کې يوبل مهم ګام اخستل کيږي .
دسيمه ييزو ارګانونو دخپلواکې ادارې دپاليسۍ اودتخينکي چارو مرستيال فريدماموند زى  د ادارې د دغه تصميم په باب وايي  غواړو ددغه پروګرام له لارې   ښاريانو ته دمسووليت حس او په ښارونو کې اوسيدونکو ته دمالکيت حس ورکړو. په داسې حال کې چې پخوا دښارونولپاره دپرمختيايي پروګرامونو دتدوين په مقصد  دخلکو  نظريو ته  ناڅيزه پاملرنه کيده .
دښارونو په پرمختيايي طرحو کې دښې  حکومتوالۍ رامنځته کول ،.  دخدمتونو دوړاندې کولو دبهېر ښه والى ، دتقنيني مواردو  ، لايحو ، قوانينو او پاليسو تنظيم  ، دښارونو اقتصادي پرمختيا ،  دعوايدو  اودمالي مديريت لوړول ، دبنسټونو پرمختيا او دظرفيتونو  دلوړولو مسلې شاملې دي  چې دمنلو وړ ګرځي .
دسيمه ييزو ارګانونو خپلواکه اداره ددغو نهو ښارونو  اوسيدونکو ته اعلاموي چې خپلې طرحې دې  دروان کال  دلړم دمياشتې  تر ٢١ نيټې پورې  ددغه ايميل  په پته  )   proposals a gdma.gov.af)  شريکې کړي .
دښارونو دپرمختيايي طرحو دراټولولو اوڅيړنې په مقصد  دسيمه ييزو ارګانونو دخپلواکې ادارې له خوا  خاص تخنيکي هيئت موظف کيږي  چې له  هر ښار څخه دليږل شويو طرحو له  جملې څخه ، درې طرحې  انتخابې  او له جمهوري رياست سره يې شريکې کړي .
په پاى کې  دجمهوررييس له څيړنې وروسته يوه طرحه دښاردپرمختيايي رسمي طرحې په توګه انتخابيږي اوطراح يې دجمهوررييس له خوا ستايل کيږي.
دافغانستان په تاريخ کې  دا لومړى ځل دى  چې هر هېوادوال ته فرصت ورکول کيږي  چې دخپل ښار دحالت دښه والي په خاطر خپله برابره شوې طرحه له حکومت سره شريکه کړي.

کابل – باختر دلړم دمياشتې ١١
دبغلان ولايت پوليسو نن داتصالاتو دمخابراتي شبکې غلا شوي کريدت کارتونه چې دوه مليونه افغانۍ ارزښت لري بيرته ترلاسه کړل.
دبغلان ولايت دامنيې قوماندانۍ وياند جاويد بشارت دباختر آژانس خبريال ته وويل : دغه کريدت کارتونه چې دخنجانو له ولسوالۍ څخه غلا شوي و دپوليسو له خوا په پلخمري ښار کې ترلاسه شول او ددغه شرکت استازي ته وسپارل شول.
بشارت زياته کړه : غل په تيښتې بريالۍ شوى او پوليس يې په لټه کې دي.

کابل باختردلړم دمياشتې ١١ :
دهندوستان او افغانستان  دمحصولا تو نندارتون  نن  په کابل کې پرانستل شو.
دباخترآژانس دخبرله مخې :  دغه نندارتون دهندوستان دسوداګرۍ اوصنايعو دخونو دفدراسيون له خوا  او دافغانستان  دسوداګرۍ اوصنايعو دخونو  اوپه کابل کې دهندوستان دسفارت په همکارۍ  جوړ شوى دى   او هدف يې دهندوستان  دصنايعو اوتوليداتوسره دخلکو بلدتيا ده .
په هغو مراسمو کې چې له  همدې امله پرځاى شوى و دافغانستان دسوداګرۍ اوصنايعو دخونو دنړيوالو اړيکو  رييس  آذرخش حافظي  ددغه نندارتون جوړول  خلکو ته دهندوستان دمحصولا تو اوصنعت په معرفي کولو کې  ارزښتناک وبلل   او ويې ويل  هندوستان ته دافغانستان دصادراتو کچه په  ١٣٩٢ کال کې    ١٠٢ مليونه ډالره  وه  او له هندوستان څخه دافغانستان واردات په همدې کال کې  د ١٣٦ مليونو  ډالرو په ارزښت و.
وروسته داقتصاد وزارت سرپرست عبدالهادي ارغنديوال دافغانستان او هندوستان ترمنځ   دسوداګرۍ په وده کې  ددغه شان نندارتونونو جوړول ګټور  او ارزښتناک وبلل .په دغو مراسمو کې دافغانستان دسوداګرۍ اوصنايعو وزارت معين متصل کومکي وويل :   دافغانستان  ملي سوداګر دې بايد  خپل محصولات  له نړيوال نورم او ستندرد سره سم  توليد کړي   چې  دغه محصولات په نړيوالو مارکيټونو کې  ښه بازار پيدا کړي.
په کابل کې دهند دسفير مرستيال  دافغانستان او هندوستان دسود اګرو ترمنځ  دګډې پانګونې اوسوداګرۍ  د ودې په باب خبرې وکړې او زياته يې کړه  چې هندوستان  دچاه بهار په بندر کې دڅه دپاسه  اتيا مليونو ډالرو پانګونه  کړې ده.
په دې  نندارتون  کې تر دريو ورځو پورې دمينه والو پرمخ پرانستى دى، دهند دتوليداتو  دوه ويشت کړکۍ او دافغاني توليداتو اوولس کړکۍ نندارې ته وړاندې وې دي.

کابل باختردلړم دمياشتې ١١ :
داطلاعاتو اوفرهنګ وزارت د سرپرست ډاکتر سيدمخدوم رهين په  خبرو سره داسلام دستر پيغمبر  ددرانه اهل بيت علمي سيمينار  نن د مطبوعاتودنړيوال مرکز په تالارکې   جوړشو .
دباخترآژانس دخبريال د خبرله مخې :  دغه سيمينار داطلاعاتو اوفرهنګ وزارت په  اهتمام  اودپوهاندنعمت الله شهراني ،  مولوي جوره ، ديوشمير درنو عالمانو ،  داطلاعاتو اوفرهنګ وزارت دمعينانو ، رييسانو او کارکوونکو او درسنيو ديوشمير کارکوونکو په ګډون  جوړشو.
ددغه سيمينار په پيل کې  ډاکتر سيدمخدوم رهين  داسلام دسترپيغمبر حضرت محمد مصطفي (ص ) دکورنۍ دعظمت  او فضيلت په باب  معلومات ورکړل او ويې ويل  لوى خداى  (ج ) داسلام د ستر پيغمبر د اهل بيت  له  سرشت  څخه ناپاکي لرې کړه  .
ډاکتر رهين زياته کړه چې  رسول الله  (ص ) داهل بيت محبت  دهر مومن دايمان بشپړونکى دى  او نبوي کورنۍ ته اقتدا د خلاصون اوفلاح لاره ده .
د اطلاعاتو او فرهنګ وزارت سرپرست  وويل :  داسلام دستر پيغمبر اهل بيت  آن  په  ډيرو سختو او ترخو ورځو کې  دعلم  او معرفت  دپياوړتيا په کار کې هلې ځلې وکړې   او ددغې کورنۍ  مشران  چې دمسلمه امت ګرانقدر مقتدايان دي ، خپل ټول عمر دعلم  او ددين په چارو کې  دتحقيق اوڅيړنې  او نورو اسلامي عالمانو ته  دلارې دپرانستلو  په کار کې  تير کړ.
ډاکتر رهين زياته کړه: په هغو کړاونو او حفا سره چې   درسول الله (ص) دکورنۍ مشرانو دحق په لاره او دباطل پرخلاف د حق  په جګړه کې  وزغملې  ، له  ترديد پرته  يې  دامت راتلوونکو نسلونو ته ستر درسونه او سرمشقونه پريښودل .
وروسته  پوهاند نعمت الله شهراني  دهغو تکليفونواو کړاونو په باب چې داسلام  دستر پيغمبر اهل بيت  ددين په لاره کې  وزغمل ، معلومات ورکړل او ويې ويل :   اهل بيت يوه مخصوصه طايفه او مذهب نه دى  بلکې  له مذهبونو څخه پورته    اودلارښوونې دروښانه ډيوې په توګه  ، دفضيلت  او دمسلمانانو ددين او امت لپاره دصبر او زغم بيلګه ده .
ده ټينګار وکړ  چې ټول مسلمانان دې بايد درسول الله  (ص) داهل بيت احترام پرځاى کړي اودهغوى کارنامې دې خپل لارښود وګرځوي.
دسيمينار په بهيرکې  داطلاعاتواوفرهنګ وزارت  دخپرونو دچارو معينې ميرمن سيمن حسن زاده  يو غزل  چې دسيمينار په مناسبت يې برابر کړى و ولوست .
دغه راز حجت الاسلام غلام عباس مصباح ،  دپوهنتون استاد سيدحبيب الله طاهري ، مولوي  جوره ، دشيعه ګانو دعالمانو شورا غړى حجت الاسلام  بازعلي  احمدي  او مولوي نيک محمد په وار سره  د رسول الله (ص ) داهل بيت دمقام ، فضيلت  ، عظمت  او کار نامو  او دحضرت امام حسين  اودهغه ديارانو  دباطل پرخلاف  دروا مبارزو  او پاڅون او دقرآن عظيم الشان  دآيتونو او دنبوي احاديثو له مخې  داهل بيت  دمقام په باب معلومات ورکړل.
دغه راز په دې سيمينار کې  دسرڅيړونکي مرستيال عبدالرحمن حکيم زاده د حضرت امام جعفرصادق  دعلمي مقام ترعنوان لاندې څيړنيزه مقاله ولوستله.

کابل باختردلړم دمياشتې ١١ :
دسمنګانو ولايت دمستوفيت  نوې ودانۍ  نن ګټې اخيستنې ته وسپارل شوه.
دايبکو له ښار څخه دباخترآژانس  دخبريال دخبرله مخې :  دغه ودانۍ  دماليې وزارت  له پرمختيايي بودجې څخه ددريو مليونو افغانيو په لګښت دپنځه زره
متره مربع دولتي ځمکې په ساحه کې په دريو پوړونو کې  په يوه نيمه مياشت کې  جوړه شوې ده او ديرش اداري  خونې  ، دکنفرانسونو او غونډو سالونونه ،  دوسايطو تم ځاى ، شنه ساحه   او نور ضروري ملحقات لري .
دسمنګانو ولايت سرپرست خيرالله انوش ددغې ودانۍ  دپرانستلو په غونډه کې وويل : ددغې ودانۍپه جوړولو سره ددغه ولايت د مستوفيت د  ادارې دکارکوونکو ستونزې لرې شوي دي.

کابل باختردلړم دمياشتې ١١ :
دپنجشير ولايت په  مرکز بازارک  ښارکې دپنځو کيلومترو په اوږدوالي دفرعي سړک  دکريړ اچولو کار نن پيل شو.
په  دغه سړک  دپنځو مترو په سور دکرواشي له سيمې څخه  دبازارک  تر خانيز پورې  کريړ اچول کيږي .
دپنجشيرولايت دفوايد عامې رييس حشمت الله  حکيمي دباخترآژانس خبريال ته وويل :   چې دغه واټ  ددغې ادارې  له پرمختيايي بودجې  څخه ددريو مليونو  شپږ سوه زرو افغانيو په لګښت  جوړيږي .
ده زياته کړه  چې  په دغه سړک  په  کريړ اچولو سره  نږدې اووه کلي  دپنجشيرولايت له عمومي واټ سره نښلول  کيږي .
له بلې خوا هم دپنجشيروالي مولانا عبدالرحمن کبيري  چې ددغه سړک دکار دپرانستلو په مراسمو  کې خبرې  کولې ددغه ولايت دفوايدعامې دادارې  له مسوولينوڅخه وغوښتل چې ددغې پروژې دکارکيفيت دې په جدي توګه وڅاري .

بغداد\ فرانسپرس \  باختردلړم دمياشتې ١١ :
دعاشورا دمراسمو دپرځاى کولو په درشل کې  په بغداد کې دپرونيو چاودنوله امله څه ناڅه  ٢٤ تنه وژل شوي دي .
دفرانسې دخبري اژانس دخبرله مخې : په يوه ډير مرګاني بريد کې يوه ځانمرګي يرغلګر په بمونو بار  خپله ليږدونکې واسطه دبغداد په  جنوب کې   دپلټنې په يوه پوسته کې  وچوله  چې له امله يې څه ناڅه شل تنه  ووژل شول او  ٥٣ تنه نور ټپيان شول .
په بله چاودنه کې  په بمونو بار ليږدونکې واسطه هغې خيمې ته څيرمه  چې په چايو او اوبو سره يې دکربلا دمسافرانو  هرکلى کاوه ،  چول شوې ده .
دعراق په سلګونو زره تنه شيعه ګان همدا اوس کربلا ته روان دي  چې سبا اوبل سبا دعاشورا مراسم پرځاى کړي. 

بغداد\ بي بي سي \ باختردلړم دمياشتې ١١ :
عراقي مامورينو  دداعش دډلې  دجګړه مارانوله خوا په الانبار ولايت کې  ديوې قبيلې دغړو دنوې وژنې  خبر ورکړى دى .
باخترآژانس  دبهرنيو  خبرځايونوله خولې خبر راکړ :  چې دداعش  جګړه مارانو د ال بونيمر  دقبيلې  څه ناڅه پنځوس تنه ښځې او نارينه له دغې ډلې سره  ددغې قبيلې دمقابلې په غبرګون کې ووژل .
دغه خبرونه  په داسې حال کې خپريږي  چې  له اتيا  څخه تر دوه سوه شلو پورې مړو لرونکي ډله ييز قبرونه  چې  زياتره يې   په همدې قبيلې پورې اړه لري پيدا شوي دي.
ددغې قبيلې  غړي  په  تيرو اوونيو کې  دداعش له جګړه مارانو سره  په جګړه کې وو.  خو دپوځي تجهيزاتو او دخوراکي توکو  کمښت ددې سبب شو چې  دوى ونه کړاى شي  له دغې ډلې سره مقابلې ته دوام ورکړي .
دداعش جګړه مارانو دعراق اوسوريې  په هغو پراخو سيمو کې چې  ترخپل کنترول لاندې يې نيولي دي، په سلګونو تنه وژلي دي .

کابل باختردلړم دمياشتې ١١ :
دملي دفاع وزارت وياند وايي  چې دملي اردو ځواکونه  دهېواد په بيلابيلو سيمو کې  دچاڼيزو عملياتو په ترسره کولو سره  هلې ځلې کوي  چې په ناامنو سيمو کې دامنيتي  ګواښونو  کچه ټيټه کړي.
دملي دفاع وزارت وياند  جنرال محمدظاهر عظيمي نن دباخترآژانس خبريال ته وويل :  دغه عمليات   په هېواد کې دښه امنيت دتامينولو په مقصد دپکتيا ولايت دشواک اوګردي څيړۍ  دولسواليو ، دکندز ولايت دګورتيپې ،   دخوست  ولايت  دصبريو ، دقندهار ولايت دغورک ، دزابل ولايت  دميزان او شينکي ، دارزګان ولايت ددهراود ، دهلمند ولايت دسنګين  او واشير او دبدخشان ولايت  د وردوج دولسواليوپه مربوطاتواوداووم لمبرلويې لارې په اوږدو کې   دوريښمو په تنګي کې   دملي اردو دځواکونوله خوا  ترسره شوي دي .
دغه عمليات دپرمختيا په حال کې دى  اوپه هغو کې  شامل ځواکونه  مطلوبو نتيجو ته رسيدلي دي.
دملي دفاع وزارت  مقامات ټينګار کوي چې  ددغو عملياتو په ترسره کولو سره به ددغو سيمو دامنيتي  ګواښونو کچه ټيټه شي .
دغه عمليات په داسې حال کې ترسره  کيږي  چې  په دې وروستيو وختو کې په دغو سيمو په تيره بيا  دبدخشان په وردوج او دکندز  اوقندهار دولايتونو په ځينو سيمو کې  دناامنيو درامنځته کيدو رپوټونه رارسيدلي دي.

پيښور\ ډي ډان \  باختردلړم دمياشتې ١١ :
د خيبر ايجنسۍ دتحصيل دباړې  په  مربوطاتو کې دپاکستاني پوځيانو او دمليشه طالبانو ترمنځ نښته کې پنځه تنه ووژل شول.
باخترآژانس  دپاکستان دډان ورځپاڼې له خولې خبر راکړ :
په دې  جګړه کې چې تيره شپه داکاخيلو په ناحيه کې  ونښته  دپاکستان يو امنيتي منسوب هم ټپي شو اوپه دې ناحيه کې  داستوګنې په يوه کور دهاوان دماين  دلګيدوله امله  يوه ښځه او دوه ماشومان ووژل شول   او دوه تنه نور ټپيان  شول .
مليشه طالبان  دباړې له ناحيې څخه په پيښور کې  دشتون لپاره   استفاده کوي او پيښور ښار ته څيرمه  دپوليسو  او دپوځيانو  دپلټنې په پوستو  بريدونه کوي.
دخيبرايجنسۍ په باړه کې پرون هم دمليشه طالبانو په پټنځيو دهوايي بريدونو له امله  څه ناڅه ديارلس تنه مليشه طالبان او دوه تنه عسکر وو ژل شول.