26 May 2020

RSS Facebook

سوداگریز


تازه خبرونه

د کرونا په اړه بې پروا چلند ستر ناورین رامنځ ته کولای شي

د کرونا په اړه بې پروا چلند ستر ناورین رامنځ ته کولای شي

کابل / د غبرګولي ۶ مه / باختر د کروناویروس خپرېدا...

د ملي امنيت شورا سلاکار پکتيا ته سفر وکړ

د ملي امنيت شورا سلاکار پکتيا ته سفر وکړ

- کابل / د غبرګولي ٦ مه / باختر د ملي...

Youtube Player

khantry design

سوداگریز

سوداگریز

کابل-باختر- دچنګاښ دمياشتې ٢٣
په سرپل ولايت کې نن د څوارلسو شهيدانو له کورنيو سره د جمهوري رياست له خوا نغدي مرسته وشوه.
دغه مرسته د شپږو سيمه ييزو پوليسو او د هغو اتو تنو په کورنيو چې په دغه ولايت کې د وروستيو سيلاوونو له امله وژل شوي وو؛ وويشل شوه.
د باختر آژانس د خبريال دخبرله مخې: له دغومرستوڅخه د هر شهيدکورنۍ د سرپل د والي له خوا سل زره افغانۍ او د وروستيو سيلاوونو په زيانمنو شويو کورنيو پنځوس پنځوس زره افغانۍ نغدي وويشل شوې.
عبدالجبارحقبين دغو کورنيو ته د جمهور رييس حامدکرزي د ډاډ ګيرنې د پيغام د رسولوپه ترڅ کې د لوى خداى (ج) له دربار څخه شهيدانو ته د فردوس جنت او پاتې کسانو ته يې د جميل صبر هيله وکړه.

کابل-باختر- دچنګاښ دمياشتې ٢٣
د کورنيو چارو وزارت يو امنيتي کميسيون جوړکړى څو د هغوکسانو امنيت تامين کړي چې د رايو د پلټنې د بهير مسوليت په غاړه لري.
دکورنيو چارو وزارت په يوه اعلاميه کې چې په همدې مقصد خپره شوې ده؛ ويل شوي دي:
له هغه وروسته چې د جمهوري رياست نوماندانو موافقه وکړه چې د انتخاباتو د دويم پړاو ټول رايې دې بيا وشميرل شي؛ دکورنيو چارو وزارت يو امنيتي کميسيون جوړ کړ چې له نورو امنيتي ځواکونو سره په همغږۍ کې ددغه دفتر د غړو او کار کوونکو او کميسيونونو او دغه راز د کانديدانو د کتوونکو د ښه امنيت د تامينولو څرنګوالي وڅيړي.
دکورنيو چارو وزارت سرسلاکار ددغه کميسيون مشرتوب پاسوال عبدالمجيد روزي په غاړه لري او په ترکيب کې يې دکابل ولايت امنيه قوماندان پاسوال محمد ظاهرظاهر، له تروريزم سره د مبارزې لوى رييس پاسوال محمدشريف امين، د پوليسو د چارو د لوى رياست مرستيال پاسوال داد الله خان او د استخباراتو د لوى رياست استازي مل پاسوال محمد فريد شامل دي؛ د کميسيون په دننه او بهرکې د نوماندانو د کتونو او د انتخاباتي کميسيونونو د کارکوونکو د ښه امنيت د تدبيرونو نيول د دغه کميسيون له مهمو دندو څخه دي چې د انتخاباتو دخپلواک کميسيون ، دملي امنيت د رياست او د ملي اردو د١١١ فرقې د قوماندانۍ د موظفې کميټې سره په همغږۍ کې اجرا کوي او هره ورځ د انتخاباتو د بهير ترپاى او د راتلوونکى جمهور رييس د لوړې د مراسمو د ترسره کولو مودې خپل کاري رپوټ له وړانديزونو سره د کورنيو وزارت مشرتابه ته وړاندې کوي.

کابل-باختر- دچنګاښ دمياشتې ٢٣
په کاپيسا ولايت کې تېره شپه د طالبانو د دوو ډلو ترمنځ د نښتې له امله د طالبانو يو سرګروپ له خپلو دوو تنو ملګرو سره يې ووژل شو .
دکاپيسا ولايت د امنيې قوماندانۍ ويندوى همايون رشيدي دباختر آژانس خبريال ته وويل: دغه جګړه د نجراب ولسوالۍ د افغانيه په سيمه کې د طالبانو د دوو ډلو ترمنځ ونښته چې له امله يې د شاغاسي په نامه د طالبانو يو سرګروپ له خپلو دوتنو افرادو سره يې ووژل شو.
دخبرځاى دڅرګندونو له مخې: وژل شوي کسان د طالبانو د يوې ډلې غړي وو چې د بل ګروپ په مقابل کې جنګيدل.

کابل-باختر- دچنګاښ دمياشتې ٢٣
په غور ولايت کې د ماين دچاودنې له امله يو ملکى وګړى شهيد شو .
د دولينه ولسوالۍ د امنيې قوماندانۍ د اوپراسيون آمر ساتمن محمدنسيم دباختر آژانس خبريال ته وويل: دغه پيښه نن ددغې ولسوالۍ د دهن قلعه آهن په ساحه کې هغه وخت رامنځته شوه چې يو ملکي وګرى په ښخ کړى شوي ماين وخوت.
دخبرځاى دڅرګندونو له مخې: دغه ماين د طالبانو له خوا دامنيتي ځواکونو په اکمالاتي کتارونو د بريد په مقصد د طالبانو له خوا په سيمه کې ښخ کړى شوى و.

کابل-باختر- دچنګاښ دمياشتې ٢٣
په باميانو ولايت کې نن د يوې ترافيکي پيښې له امله دوه تنه ووژل شول او شپږ تنه نور ټپيان شول.
دباميانو ولايت د امنيې قوماندانۍ دامنيت آمر سمونمل محمد علي دباختر آژانس خبريال ته وويل: دغه پيښه دباميان ولايت د ورث ولسوالۍ په مربوطاتو کې هغه وخت رامنځته شوه؛ يو فلاينکوچ موټر چې له کابل څخه د دايکنډي په لور روان و؛ له واټ څخه وخوت او چپه شو.
دخبرځاى دڅرګندونو له مخې: په دې پيښه دوه تنه نارينه ووژل شول او د ښځو او ماشومانو په ګډون شپږ تنه ټپيان شول.
دخبرځاى دڅرګندونو له مخې: ټپيان ډير ژر د ورث روغتون ته وليږدول شول او د روغتون د مسوولينو دڅرګندونو له مخې د څلورو تنو ټپيانو روغتيايي حالت خراب دى.
ده د دغې پيښې علت دموټر چلونکى بې احتياطي وباله او ويې ويل چې د فلاينکوچ موټر ټول مسافرين د دايکنډي ولايت اوسيدونکي دي.

کابل-باختر- دچنګاښ دمياشتې ٢٣
دامنيتي ځواکونو دګډو فعاليتونو په بهيرکې پرون شل تنه وسله وال طالبان ووژل شول .
دکورنيو چارو وزارت مطبوعاتي دفتر باختر آژانس ته خبر ورکړ: امنيتي ځواکونو د قندهار، نيمروز او دکابل د ولايتونو په مربوطاتو کې څو امنيتي فعاليتونه ترسره کړل چې په بهيرکې يې ٢٠ تنه وسله وال طالبان ووژل شول؛ ١٢ تنه ټپيان او ٥ تنه يې ونيول شول او يوه اندازه جنګي وسايل ترلاسه شول.
دغه راز ملي پوليسو اووه ماينونه د قندهار ولايت له مربوطاتو څخه کشف او شنډ کړل.

کابل \ باختر د چنګاښ د مياشتې٢٣مه:
مرکزي بانک پنځه ديرش مليونه ډالره د ليلام په ډول پلوري.
ددغه بانک په هغه ليک کې چې باخترآژانس ته ليږل شوې ده؛ ويل شوي دي:
د افغانستان بانک د روان کال د چنګاښ د مياشتې په ٢٤مه نيټه د سه شنبې په ورځ پنځه ديرش مليونه ډالره د ليلام په ډول پلوري .
په شرايطوبرابرهغوصرافانواوتجارتي بانکونوته چې پخوايې يومليون پنځه سوه زره افغانۍ يې د تضمين په ډول دافغانستان بانک د بازار د عملياتو په لوى مديريت کې تحويل کړې دي؛ بلنه ورکول کيږي چې په دغو داوطلبيوکې ګډون وکړي او دليلام ګټوونکي مکلفيت لري چې حسابونه دې تر دوو ورځو پورې تصفيه کړي  .
له ټولوبرخه والوڅخه غوښتنه کيږي چې د داوطلبۍ فورمې دليلام د ورځو د سهارپه نهوبجو د بازار د عملياتو له مديريت څخه ترلاسه کړي اوپه نهه نيمو بجو دې بيرته وسپاري.
هغه صرافان چې تراوسه پورې يومليونو پنځه سوه زره افغانۍدتضمين په ليلامونوکې دګډون په مقصدنه دي تحويل کړي؛ کولاى شي له داوطلبي څخه يوه ورځ مخکې دخپل تضمين پيسې تحويلې اوپه راتلوونکو ليلامونو کې دې ګډون وکړي .
ديادونې وړ بلل کيږي چې دمعاملوقسمي ترسره کول مجاز نه دى، د ليلام ګټوونکي دخپل ذمت پيسې ټولې يوځاى په نغدي ډول اوپه حوالې سره په ټاکلې موده کې په  بانک کې تحويلې کړي.

_  کابل باختر دچنګاښ دمياشتې ٢٣ :
د وزيرانو شورا نوبتي غونډه نن له  غرمې مخکې دافغانستان داسلامي جمهوريت
دجمهوررييس حامدکرزي په مشرۍ دجمهوري رياست د ارګ دګلخانې په ماڼۍ کې جوړه شوه .
دچارو د ادارې او د وزيرانو شورا دارالانشا لوى رياست باخترآژانس ته خبرورکړ:
په پيل کې دافغانستان داسلامي جمهوريت  جمهور رييس دجمهوري رياست له
انتخاباتو څخه  د وزارتونو او دولتي ادارو په کاري چاروکې د نميګړتيا اوځنډ دشتون يادونه وکړه او څرګنده يې کړه چې په دې وروستيو وختوکې د دولتي ارګانونو د چارو په اجرا کولوکې سستوالى اوبېرته پاتې والى رامنځته شوى دى چې د مراجعينو او هېوادوالو د شکايتونو سبب شوي دي.
د وزيرانو شورا له هر اړخيزو خبرو وروسته  وزارتونه ، دولتي ادارې او ټول دولتي ارګانونه يې موظف کړل چې ورځني اجرآت دې له ځنډ پرته په نور مال ډول ترسره کړي،د وزارتونو او د دولتي ادارو مسوولين موظف دي چې په خپلو دندو دې حاضر وي او هره ورځ دې د لومړنيو او دويمو واحدونو اجرآت وڅاري.
وروسته د کليو د بيا جوړولو او پراختيا وزير او د بيړني حالت د ملي کميټې  مرستيال د وزيرانو شورا د ١٣٩٣  کال د ثور دمياشتې د ٢٢ نيټې په پريکړې سره سم د بدخشان ولايت د ارګو ولسوالۍ په آب باريک کلي کې د ځمکې ښوئيدنې له امله د زيانمنو شويوکسانو د ميشت کولو په لاره کې په دغې ولسوالۍ کې  د اشخاصو دملکيت دپنځه سوه جريبه ځمکې استملاک غونډې ته طرحه کړ.
د وزيرانو شورا دغه استملاک په اصولوکې تائيدکړ او د بيړني حالت ملي کميټه يې موظفه کړه چې له طرحه شوي سکيچ سره سم دې د ښارګوټي مقدماتي کارونه پيل کړي او د سيمه ييزو ارګانونو خپلواکه اداره موظفه ده چې د دغې ساحې د استملاک د سندونو پړاونه دې په دريو مياشتوکې دبدخشان ولايت له لارې بشپړکړي.
وروسته په ١٣٩٣ کال  کې د زړه په سوري د اخته ماشومانو د درملنې په مقصد د افغاني سرې مياشتې د ټولنې حساب ته د بيت الله شريف  د هريو زيارت کوونکى له خوا د اعانې په ډول  د زرو افغانيو د ورکړې په باب ددغې ټولنې غوښتنه غونډې ته طرحه شوه .
د وزيرانو شورا د زړه په سوري د اخته ماشومانو د درملنې په  مقصد دبيت الله شريف د هر يو زيارت کوونکى له لوري د زرو افغانيو اعانې ورکړه تصويب کړه او د حج او اوقافو وزارت يې موظف کړ چې دغه اعانه دې په ١٣٩٣ کال کې د هېواد له حاجيانو څخه واخلي او دافغاني سرې مياشتې د ټولنې حساب ته دې وليږدوي.
وروسته د سوداګرۍ اوصنايعو وزير د اړتياوو د لرې کولو او د بيو دثبات په مقصد د لسو زرو ټنو پطرولو، لسو زرو ټنو ډيزلو او د لسو زروټنو اوبلن ګاز د پيرودنې په باب ددغه وزارت پيشنهاد له توليدونکو هېوادونو څخه د پيرودنې په توګه غونډې ته طرحه کړ چې دتصويب وړ وګرځيد.
ورپسې دعدليې وزارت مسلکي معين اوسرپرست د وزيرانو شورا د١٣٩٣ کال د غبرګولي د مياشتې د ١٩ نيټې دغونډې له پريکړې سره سم له کابل ښاروالۍ سره د اوبو رسولو او کاناليزاسيون شرکت د ادغام طرحه غونډې ته وړاندې کړه او څرګنده يې کړه چې دغه شرکت پخوا د دولتي تصدۍ په توګه فعاليت کاوه او په دې وروستيو وختوکې د وزيرانو شورا له پريکړې سره سم  حقوقي شخصيت يې په دولتي شرکت بدل شوى دى او مشخصه اساسنامه لري چې له بده مرغه د کاناليزاسيون برخه يې دشرکت د اساسنامې په دندوکې نه ده شامله شوې، سربيره پردې دجمهوري رياست دمقام له حکم سره سم دغه شرکتونه د بودجوي واحد په  توګه منظورکړې دي چې د هغه د مشرتابه د کمزورى منجمنت په ګډون دغه ټول عوامل په کارونوکې دځنډ سـبب شوي دي.
د وزيرانو شورا د اوبورسولو اوکاناليزاسيون د شرکت عمومي ټولنه چې دماليې، اقتصاد او د ښار جوړولو د چارو وزارتونه، کابل ښاروالۍ، د ژوندانه د چاپيريال ساتنې خپلواکه اداره او د اوبو رسولو اوکاناليزاسيون شرکت پکې شامل دي؛ موظف کړل چې د يوې اوونۍ په دننه کې دې د اوبو رسولو او کاناليزاسيون دشرکت دکاري اغيزمنتوب طرحه دغونډې له يادونې سره سمه برابره او د وزيرانو شورا ته  دې وړاندې کړي.
دغونډې دکار په دوام دپوهنې وزير د محمدحکيم مستنمدي د ملکيت د٩٢ متره مربع ځمکې پيرودنه چې دغه وزارت ته څېرمه پرته ده؛ د شپاړلس مليونو اوپنځه سوه زرو افغانيو په ټوله بيه غونډې ته طرحه کړه .
د وزيرانو شورا د دغه ملکيت پيرونه په اصولوکې تائيدکړه او دماليې وزير يې موظف کړ  چې ددغه  جايداد بيه دې د هغه له خاوند سره تثبيته کړي او د جمهوري رياست مقام ته دې پيشنهاد کړي.
وروسته د سيمه ييزو ارګانونو د خپلواکې ادارې رييس د هلمندولايت دجامع جومات د ساحې د پرمختيا په مقصد ددغه ولايت د لښکرګاه ښار په ماسټرپلان کې شامله د شنې ساحې د څلرويشت زرو متره مربع ځمکې تعديل غونډې ته طرحه کړ.
د وزيرانو شورا د دغې ساحې تعديل په اصولوکې تائيدکړ او دحج او اوقافو وزارت او دسيمه ييزو ارګانونو خپلواکه اداره يې موظف کړل چې دغې ساحې د تعديل  دقيق جزئيات دې د موافقه شوي وړانديز په ترڅ کې د جمهوري رياست مقام ته وړاندې کړي.
د غونډې په پاى کې درې مورده نړيوال تړونونه د بهرنيو چارو د وزير له  خوا په دې ډول غونډې ته  طرحه شول چې د تائيد وړ وګرځيدل:
• د افغانستان د اسلامي جمهوريت د بهرنيو چارو وزارت د ډيپلوماسۍ د انستيتوت او د آذربايجان جمهوريت د بهرنيو چارو وزارت د ډيپلوماسۍ  د اکاډمۍ ترمنځ تفاهم ليک .
• د افغان ست _ ١ دټينګښت او عملي کولو په لاره کې دافغانستان دمخابراتو اومعلوماتي تکنالوجۍ وزارت او دفرانسې ديوتل ست شرکت ترمنځ  تفاهم ليک.
• د افغانستان د اسلامي جمهوريت او د تاجکستان جمهوريت ترمنځ  د ګمرکاتو په برخه کې د دوه اړخيزې همکارۍ موافقه ليک.

کابل-باختر- دچنګاښ دمياشتې ٢٣
يو شمېر افغاني محصلانو چې د قزاقستان په پوهنتونونوکې په زده کړه بوخت دي؛ نن له غرمې وروسته د جمهور رييس له مرستيال محمدکريم خليلي سره وکتل او خبرې يې ورسره وکړې.
دجمهوري رياست مطبوعاتي دفتر باختر آژانس ته خبر ورکړ: په دې کتنه کې د کتنې برخه والو له ځوان نسل او محصلانو سره د هيواد د مشرتابه هيئت په تېره بيا د جمهور رييس د دويم مرستيال د ملاتړله امله د قدردانۍ په ترڅ کې يو لړ ستونزې چې په قزاقستان کې افغاني محصلان ورسره مخامخ دي؛ د جمهور رييس له دويم مرستيال سره طرحه کړې.
دوى دې ته په اشارې سره چې قزاقستان له علمي پلوه په سيمه کې له ښو هيوادونو څخه دى؛ دې ته په پاملرنې سره چې په روان کال کې د افغاني محصلانو د منلو په باب د قزاقستان او افغانستان ترمنځ د دوه اړخيزو همکاريو تړون پاى ته رسيږي؛
د هغه د تمديدولو غوښتنه وکړه.
دکتنې برخه والو د طبي محصلانو او د قزاقستان په پوهنتونونوکې د افغاني محصلانو د تخصص د مسئلې د څيړنې غوښتنه وکړه.
په دې کتنه کې د جمهور رييس مرستيال محمدکريم خليلي دکتنې برخه والو ته د ښه راغلاست د ويلو په ترڅ کې دهغوى دعلمي برياليتوبونو له امله مبارکي وويله.
دجمهور رييس مرستيال قزاقستان د سيمې له مهمو هيوادونو څخه او په نوى فصل کې د افغانستان ښه دوست وباله.
د جمهور رييس مرستيال په بېلابېلو برخو په تېره بيا په علمي او اکاډميکي برخو کې د افغانستان او قزاقستان د اړيکو پراختيا مهمه وبلله او دا کاريې د دواړو هيوادونو په ګټه وباله.
ده دغه راز ځوانانوته د تحصيلي زمينو پراختيا د نوى فصل يو برياليتوب وباله او څرګنده يې کړه: څومره چې زموږ ځوانان د پوهې او تخصص په لور مخه وکړ؛ په هماغه اندازه به د هيواد راتلوونکى ښه شي.

_  کابل باختر دچنګاښ دمياشتې ٢٣ :
په  بادغيس ولايت کې تېره شپه د دو  ډلو طالبانو ترمنځ  نښته کې شپږ تنه وسله وال طالبان ووژل شول.
د بادغيس ولايت دامنيې قوماندانۍ د امنيت آمر محمدقيوم انگار د باخترآژانس خبريال ته وويل: د مقر ولسوالۍ په سنګ آتش سيمه کې د دوو ډلو وسله والوطالبانو ترمنځ جګړه ونښته چې له امله يې شپږ تنه وسله وال طالبان ووژل شول.
د يوه اړونده خبرځاى دڅرګندونوله مخې: درې تنه  له يوې ډلې څخه او درې تنه نور  له بلې ډلې څخه وژل شوي دي .
خبرځاى  ددغو دوو ډلو طالبانو ترمنځ  د جګړې  علت دپستې د شول ماتول وبلل .
په يوبله پيښه کې د بادغيس ولايت په قادس ولسوالۍ کې  د پوليسو د ځواکونو په عملياتوکې دوه تنه وسله وال طالبان ووژل شول.
خبرځاى  زياته کړه: دغه عمليات د قادس ولسوالۍ د پاکولو په مقصد دپوليسو دځواکونو له خوا پيل شوي و او ويل کيږي چې دغه عمليات د طالبانو له شتون څخه ددغې ولسوالۍ تر بشپړ پاکولو پورې دوام لري.