20 November 2019

RSS Facebook

سوداگریز


تازه خبرونه

جمهورريیس غني د ننګرهار د ولسي پاڅون له قومندانانو سره وکتل

جمهورريیس غني د ننګرهار د ولسي پاڅون له قومندانانو سره وکتل

کابل/ دلړم۲۸مه/باختر د افغانستان د اسلامي جمهوریت جمهورريیس محمد اشرف غني...

پنځه وسله وال طالبان په پکتیا کې ووژل شول

پنځه وسله وال طالبان په پکتیا کې ووژل شول

کابل/دلړم۲۸مه/باختر د پکتیا د ځاځي آریوب او سېدکرم ولسوالیو په مربوطاتوکې...

Youtube Player

khantry design

سوداگریز

سوداگریز

کابل_باختر د سلواغې دمياشتې ١٦ مه:
د کورنیو چارو وزارت په وړاندیزاو د جمهوري ریاست د عالي مقام په منظوری د دغه وزارت په اړوند اداروکې لاندې ټاکنې ترسره شوې دي.
• مل پاسوال سید بریالی د مالي چارو د لوى رییس په توګه.
• پاسوال شاه میر له محاکمو سره د اړیکو د رییس په توګه.
• مل پاسوال خلیل الله ضیایي د پروان ولایت د امنیه قوماندان په توګه .
• سمونوال سید ګل آقا د کابل ولایت د امنیې قوماندانۍ له جرمونوسره د مبارزې د تحقیقاتو د رییس په توګه .
• مل پاسوال محمد نادر فهیمی دهرات ولایت د امنیې قوماندانۍ د امنیت د آمرپه توګه.
• سمونوال عبدالروف ارزگاني د ننګرهار ولایت د امنیه قوماندانۍ د جنایي جرمونو د تحقیقاتو د رییس په توګه .
• پاسوال سید شریف یالایی دهرات ولایت د محبس د لوی مدیرپه توګه .
• سمونوال عبدالقیوم د مرکزی محبس د ادارې د مرستیال په توګه .

کابل باختر دسلواغي شپاړلسمه :
دفراه ولايت د جوين ولسوالۍ په سرحدي سيمه کې پرون د واورې د اورښت او واورې ښوئيدنې له امله څلور تنه ووژل شول.
د فراه ولايت امنيه قوماندان جاويدکارګر باخترآژانس ته وويل: سرحدي ځواکونو د يوه سړي مړى ترلاسه کړى دى او ددريو تنو نورو مړي تراوسه پورې نه دي پيدا شوي.
ده وويل: سرحدي ځواکونه هلې ځلې کوي چې د نورو بې درکه  شويوکسانو مړي له واورې څخه وباسي.
ديوبل خبر له مخې: د فراه ولايت په جوين ولسوالۍ کې د استوګنې يو ويشت کورونه د واورې ښوئيدنې له امله ويجاړ شوي دي او په دې پيښه کې درې تنه ماشومان وژل شوي دي.
دفراه ولايت امنيه قوماندان جاويدکارګر باخترآژانس ته وويل: په دې ولسوالۍ کې د واورې ښوئيدنې له امله درې تنه ماشومان وژل شوي او يوبل ماشوم ټپي شوى دى او زيانمن شوي کسان مناسب ځاى ته ليږدول شوي دي .

کابل باختر دسلواغي شپاړلسمه :
د اطلاعاتو او فرهنګ د وزير ډاکترسيدمخدوم رهين په مشرۍ د پښتو ژبې د پياوړى او نوميالى شاعر غني خان د زيږيدنې د سلمې کاليزې په درناوي د علمي –څيړنيز سيمينار د جوړولو لپاره د تيارى دکميسيون دويمه غونډه جوړه شوه.
د باخترآژانس دخبريال دخبر له مخې: په دې غونډه کې د اطلاعاتو اوفرهنګ وزير په لنډو خبروکې وويل چې دغه وزارت د علمي او فرهنګي شخصيتونو په باره کې د علمي-څيړنيزو سيمينارونو دجوړولو په دوام داځلې په پام کې لري چې دفرهنګي شخصيت او د پښتو ژبې د پياوړى شاعر اوليکوال علمي څيړنيزسيمينارجوړکړي.
په دې غونډه کې چې په فرهنګي چاروکې دجمهور رييس دسلاکار وزير څيړونکى زلمي هيوادمل، د افغانستان دعلومو اکاډمې د ځينو غړو او د هيواد د علمي او فرهنګي شخصيتونو په ګډون جوړه شوه؛ څرګنده شوه چې دغه سيمينار دې د ١٣٩٣ کال د ثور دمياشتې په شپاړلسمه او اوولسمه نيټه په کابل کې جوړ شي او دخيبر پښتونخوا شاعر اوليکوالو ته دې هم دګډون بلنه ورکړى شي .
دغه راز پريکړه وشوه چې علمي کميسيون دې هغه مقالې او آثار چې په دې سيمينارکې لوستل کيږي چاپ کړي.
دغه کميسيون د څيړنپوه استادعبدالله خدمتګار بختاني په مشرۍ او د څيړندوى حبيب الله رفيع، عبدالفغور ليوال، څيړنپوه عبدالواجد واجد، زرين انځور او د پوهاند رازقي نړيوال په ترکيب جوړ شو .

کابل باختر دسلواغي شپاړلسمه :
د لغمان ولايت د امنيې قوماندانۍ مسوولين وايي: درايي ورکولو د درې سوه شپږو مرکزونو له جملې څخه څلور نوي مرکزونه تر امينتي ګواښونو لاندې دي .
دوى وايي: تر ګواښ لاندې مرکزونه د اليشنګ، الينکار او د بادپخ په ولسواليو کې دي.
د دوى دڅرګندونو له مخې: د راى ورکولو دوه ويشت مرکزونه تر لوړ ګواښ لاندې دي چې تړل شوي دي؛ څلور اويا مرکزونه په عادي ډول فعاليت کوي.
د لغمان ولايت امنيه قوماندان مل پاسوال محمد داوود امين باخترآژانس ته وويل : ددغه ولايت امنيه قوماندانۍ هڅه کوي چې د نا امنو ولسواليو امنيت هم تامين کړي .
ده دغه راز له خلکو څخه وغوښتل چې په راتلوونکي انتخاباتوکې کارنده رول ولوبوي او د راى ورکولو صندوقونو ته لاړ شي او رايې ورکړي .

کابل باختر دسلواغي شپاړلسمه :
د اطلاعاتو او فرهنګ وزارت خبرتيا !
  ټاکل شوې ده د پښتو ژبې د نوميالى شاعر او ليکوال ارواښاد غني خان د ژوندانه په باره کې  علمي-څيړنيز سيمينار د١٣٩٣کال د ثور د مياشتې په شپاړلسمه او اوولسمه نيټه په کابل کې جوړ شي.
په دې وسيله د هيواد له ليکوالو، شاعرانو او څيړونکو څخه غوښتنه کيږي چې خپل آثار او مقالې دې د راتلوونکى کال د وري د مياشتې تر پاى پورې د سيمينار علمي کميسيون ته وسپاري.
د زياتومعلومات د ترلاسه کولو لپاره د کميسيون  د منشي امان الله جبارخيل له ٠٧٩٩٤٠٥٧٧٧ګڼه ټيلفون او د سيمينارونو د جوړولو د آمرمحمدزبير ابراهيمي  د٠٧٩٨٥٦٣٨٥٦ګڼه ټيلفون  له لارې اړيکې ونيول شي.

کابل باختر دسلواغي شپاړلسمه :
په غزني ښارکې د بد امنۍ او د وروستيو تروريستي بريدونو اصلي عامل له امنيتي ځواکونوسره په نښته کې ووژل شو .
په غزني کې د وسله والو طالبانو د ډلې مهم قوماندان ملا ګل محمد نن له غرمې مخکې د يوولسو بجو او ديرشو دقيقو په شاوخواکې دغزني ښار د سنجدک په سيمه کې پوځيانو له کمين سره مخامخ شو او ووژل شو.
دغزني ولايت امنيه قوماندان جنرال زړور زاهد باخترآژانس ته وويل: په ملاګل محمدکله چې په غزني ښارکې ديو لړ تروريستي بريدونو د ترسره کولو نيت درلود، بريد وشو او ووژل شو .
جنرال زاهد، ملاګل محمدپه غزني کې دوسله والو طالبانو د ډلې د يو مهم قوماندان په توګه وباله او ويې ويل چې دى په غزني ښارکې د وروستيو نا امنيو اصلي عامل و .
د وسله والو طالبانو د ډلې په دغه قوماندان په غزني ښارکې د ماينونو او بمونو د ښخولو او د وسله والو بريدونو په ګډون دلسګونو وسله والو تروريستي بريدونو د پلان جوړولو تور لګول شوى دى .
دغه راز د غزني ولايت سيمه ئيز مسوولين وايي چې قوماندان ملا ګل محمد د پوليسو د دريو تنو افسرانو دترور پلان جوړ کړى و چې په دې وروستيو وختوکې په غزني ښارکې د وسله والو طالبانو له خوا پرې بريد وشو .
دغه راز د دغه قوماندان افرادو د غزني دپوليسو په يوبل افسر نږدې شپږ مياشتې مخکې د ده دکور په وړاندې بريد وکړ چې په دې پيښه کې په خپله دغه پوځي ته زيان ونه رسيد، خو دوه زامن يې چې ورسره ملګري وو ، ووژل شول .
دغزني ولايت امنيه قوماندان د ملا ګل محمد وژل کيدل امنيتي ځواکونو ته يو برياليتوب وباله او ويې وويل چې د ده په لمنځه تللو سره به په دغه ولايت کې تروريستي بريدونه کم شي .
دغزني دمرکزي روغتون ډاکتران وايي چې ددغه وژل شوي قوماندان ټوټې ټوټې  شوى مړى دغه روغتون ته ليږدول شوى دى.

کابل باختر دسلواغي شپاړلسمه :
د پوهنې مينه والوته د پوهنې وزارت د تخنيکي او مسلکي تعليماتو د معينيت خبرتيا !
دکابل ښار ټولو اوسيدونکو ته خبر ورکول کيږي چې د ړندو مسلکي ليسه د ١٣٩٣کال لپاره هغه ړانده نارينه او نجونې چې عمر يې له اووه کلنى څخه تر ١٢کلنى پورې وي؛ د نويو زده کوونکو په توګه مني. زده کوونکو ته دغرمې ډوډۍ پخيږي .
د زده کوونکو ترانسپورت دليسې د ترانسپورت په واسطه ترسره کيږي. په دغو شرايطو برابر ړانده کولاى شي له خپلو څلوروعکسونو سره د نوم ليکنې لپاره د ړندو دمسلکي ليسې ادارې ته ورشي.
پته: د دارالمان سړک، دسناتوريم تمځاى، دکيور نړيوال روغتون ته څېرمه.

کابل باختر دسلواغي شپاړلسمه :
امنيتي ځواکونو په هغوچاڼيزو عملياتوکې چې په تيروڅليرويشتوساعتوکې دهيواد په بېلابېلو سيمو کې ترسره کړل؛ درې تنه وسله وال طالبان ووژل .
دکورنيو چارو وزارت مطبوعاتي دفتر باخترآژانس ته خبر ورکړ: امنيتي ځواکونو د ننګرهار، کاپيسا، کندز، قندهار، زابل اودلوګر د ولايتونو په مربوطاتوکې يولړ چاڼيز عمليات ترسره کړل چې له امله يې درې تنه وسله وال طآلبان ووژل شول او پنځه تنه نور يې ټپيان شول .
په دغو عملياتوکې يوه اندازه مهمات او چاوديدونکي توکي هم دامنيتي ځواکونو لاس ته ورغلي دي .
دغه راز د ملي پوليسو ځواکونوڅلور ماينونه چې د وسله والومخالفينوله خوا د ننګرهار، قندهار او د نيمروز د ولايتونو په مربوطاتوکې ښخ کړى شوي و؛ کشف او شنډ کړل.

کابل باختر دسلواغي شپاړلسمه :
دپنجشير ولايت درخې ولسوالۍ يواوسيدونکى تيره شپه دناپيژندل شويو کسانو له خوا په ډزو سره ووژل شو .
دغه سړي سوغات نوميده او ويل کيږي چې شپږ پنځوس کلن و او د ناپيژندل شويو کسانو له خوا دپنجشير ولايت د رخې ولسوالۍ د شصت په سيمه کې په خپل کورکې په ډزو سره ووژل شو.
دپنجشير ولايت د رخې ولسوالۍ امنيه قوماندان حميد الله خطابي باخترآژانس ته وويل: دغه سړى له چاسره شخصي دښمني نه درلوده او د وژنې انګيزه تراوسه پورې معلومه نه ده.
ده وويل: تراوسه پورې ددغې وژنې په اړوند څوک نه دى نيول شوى او پيښه تر څيړنې لاندې ده .

Wednesday, 05 February 2014 08:50

درې تنه غله ونيول شول

کابل باختر دسلواغي شپاړلسمه :
درې تنه  غله پرون دپوليسو له خوا دکابل ښار د ديارلسمې حوزې په مربوطاتوکې ونيول شول .
دکابل ولايت د امنيې قوماندانۍ مطبوعاتي دفتر باخترآژانس ته خبر ورکړ: په نيول شويوکسانو تور لګول شوى دى چې له يوه کور څخه يې دوه سوه څلويښت زره افغانۍ او درې سيټه سره زر غلا کړي دي چې  دپوليسو له خوا دمهديه ښارګوټي په ساحه کې ونيول شول .