18 August 2019

RSS Facebook

سوداگریز


تازه خبرونه

په جوماتونو کې چاودنه د اسلام او شريعت پرخلاف ده

په جوماتونو کې چاودنه د اسلام او شريعت پرخلاف ده

کابل / باختر\ د زمري٢٦مه د ملي امنيت شورا د يوې...

د جنايي جرمونو په اړوند د٢٥ کسانو نيول کيدل

د جنايي جرمونو په اړوند د٢٥ کسانو نيول کيدل

کابل / باختر\ د زمري٢٦مه د هېواد په پنځو ولايتونو کې...

Youtube Player

khantry design

سوداگریز

سوداگریز

کابل – باختر دلړم دمياشتې ٣
څلور تنه وسله وال طالبان دماين دايښودلو په وخت دخپل ماين د چاودنې له امله ووژل شول.
دغه پيښه تيره شپه  ناوخته رامنځته شوه چې يرغلګرو طالبانو غوښتل دجاني خيلو دولسوالۍ په عمومي واټ کې ماينونه ځاى پرځاى کړي.
دپکتيا ولايت دامنيې قوماندانۍ يومسوول باختر آژانس ته وويل :  دغه طالبان دماين دايښودلو په وخت کې د خپل ماين د چاودنې له امله ووژل شول.
ويل کيږي دغو طالبانو له وژل کيدو يو ساعت مخکې له دغې سيمې څخه لرې په يوګڼ ميشته لاره کې يو ماين ځاى پرځاى کړى و چې دچاودنې له امله يې يو بزګر ووژل شو او درې تنه ملکي وګړې ټپيان شول .

کابل – باختر دلړم دمياشتې ٣
دافغانستان ،پاکستان او دانګلستان دمشرانو درې اړخيزه غونډه به په نږدې راتلوونکې کې  په لندن کې جوړ شي.
باختر آژانس دنړيوالو خبرځايونو له خولې خبر راکړ .
ددغې غونډې د جوړولو هدف چې دانګلستان دصدراعظم ديويدکامرون په بلنه جوړيږي د طالبانو له ډلې سره د خبرو بيا  پيليدل دي .
دبريتانيا د ډيلي تلګراف ورځپانه دافغانستان د دولت د يو مقام له خولې ليکلي دي چې دغه غونډه به دافغانستان دجمهور رييس حامد کرزي ، دپاکستان دصدراعظم نواز شريف او دانګلستان دصدراعظم ديويدکامرون په ګډون جوړه شي او د دوى دخبرو محور دطالبانو له ډلې سره دخبرو بيا پيلول بلل شوي دي.
ورځپانې ليکلي دي چې ديويد کامرون به هلې ځلې وکړي  چې له طالبانو سره دسولې درول شوې خبرې يوځل بيا پيل کړي .
دغه راز ورحپانې ليکلي دي پاکستان  د دې لپاره چې ځان دافغانستان دسولې   په بهير کې همکار وښي او امريکا هم خوشخاله کړي ځينې سمبوليک ګامونه يې پورته کړي دي خو په عمل کې  يې خپل دريځ نه دى بدل کړى .
ورځپاڼې زياته کړې ده چې دافغانستان او پاکستان مشران دا ځل په داسې حال کې دبريتانيا په بلنه کتنه کوي چې دپاکستان نوى حکومت  په کار پيل کړى دى خو حالت  دومړه  بدلون نه دى موندلى .
دسياسي مسلو دکارپوهانو په  باور په  وروستيو کلونو کې دغه شان غونډې  څو ځلي جوړې شوي دي او په معمولي توګه دافغانستان او پاکستان اختلافونه پکې څيړل شوي دي .
دناټو ستونزې او په افغانستان کې دهغوى شتون ، د پاکستان له  لارې  د دغو ځواکونو وتل ، امنيتي مسلې او له تروريزم او د نشه يي توکو له قاچاقو سره مبارزه ددغو خبرو له جملې څخه دي پخواهم دافغانستان ، انګلستان او دپاکستان مشرانو دوه ځلې خبرې اترې کړي دي .
تيرکال هم لندن  د افغانستان او پاکستان دجمهورو رييسانو حامد او آصف علي زرداري کوربه  و .
په هغه وخت کې هم پاکستان دافغانستان  په  وړاندې د ژمنو يادونه وکړه خو په عمل کې يې هيڅ کار ونه کړ.
اوس  به معلومه شي چې دا ځل پاکستان ب چره دنواز شريف په شتون کې څه وکړي.

کابل – باختر دلړم دمياشتې ٣
دارزګان ولايت امنيتي ځواکونو دځانګړو عملياتو په بهير کې د دوه  زره اووه سوه کيلوګرامه نشه يي توکو په کشفولو بريالي شول .
دغه نشه يي توکي پرون په  دوو جلاجلا پيښو کې دپوليسو لاسته ورغلي دي .
دخبرونو له مخې :  ددغو ځانګړو عملياتو په بهير کې جګړه هم شوې ده چې د دريو تنو قاچاق وړونکو د وژل کيدو او درې تنه نورو دټپي کيدو سبب شوې ده .
د ارزګان دامنيه قوماندانۍ ويندوى  فريد عايل باختر اژانس ته وويل : 
يو زرو  پنځوسو کيلوګرامه  هيرويين په داسې حال کې ترلاسه شول چې له ترينکوت ښار څخه د چارچينو ولسوالۍ ته ليږدول  کيدل.
ويل کيږي دغه نشه يي توکي  په ماهرانه ډول په  دوو بار وړونکو موټرونو کې ځاى پرځاى شوي و.
دغه راز نور نشه يي توکي دقاچاق وړونکو له خوا دترينکوت ښار په يو کورکې ساتل کيدل.
دامنيه قوماندانۍ ويندوى  وويل :  ددغو نشه يي توکو دکشفولو په بهير کې نښته هم شوې  ده چې له امله يې درې تنه  قاچاق وړونکي وژل شوي دي   او درې تنه نور ټپيان شوي دي  چې ټپي قاچاق وړونکې دپوليسو له خوا نيول شوي دي .
دارزګان په ګډون دافغانستان ځينې نا امنې ولسوالۍ کلونه کلونه کيږي چې دنشه يي توکو دکرکيلې توليد او کار او بار  ډګر دى .

کابل – باختر دلړم دمياشتې ٣
په واټ کې دماينونو دچاودنې له امله پرون دملي اردو يو تن منسوب شهيد او شپږتنه نورټپيان شول .
دملي دفاع وزارت مطبوعاتي دفتر دويندوي باختر آژانس ته خبر ورکړ :
دملي اردو يوتن منسوب شهيد او شپږ تنه نور هغه وخت ټپيان شول چې دغه  ځواکونه  دکونړ ،غزني ،قندهار او دهلمند دولايتونو په مربوطاتو کې دامنيتي دندو دترسره کولو په بهير کې له  ښخ کړى شويو  ماينونو سره ټکر وکړ.

کابل – باختر دلړم دمياشتې ٣
دوه تنه ماين ښخوونکي  پرون د ماين دچاودنې له امله ووژل شول .
دملي دفاع وزارت دمطبوعاتي دفتر ويندوى  باختر اژانس ته خبرورکړ:
دغه  افراد  هغه  وخت ووژل شول چې غوښتل يې دوسايطو ضد يو ماين  دفراه ولايت دبالابلوک ولسوالۍ په سړک کې ښخ کړي  چې  ماين  دښخولو پرمهال وچاوديد او ماين ښخوونکو  ووژل شول.
ديوبل خبرله مخې :   پنځه تنه وسله وال مخالفين پرون په قندهار ولايت کې دملي اردو دمنسوبينو له خوا دچاڼيزو عملياتو په بهير کې ونيول شول .
دملي دفاع وزارت دمطبوعاتي دفتر ويندوى  باختر آژانس ته خبر ورکړ :  دملي اردو منسوبينو يو لړ چاڼيز عمليات دقندهار ولايت دپنجوايي ولسوالۍ په مربوطاتو کې ترسره کړل چې له امله يې پنځه تنه وسله وال مخالفين ونيول شول .

کابل – باختر دلړم دمياشتې ٣
په بغلان ولايت کې دوسله والو طالبانو يو سيمه ييز قوماندان له جګړې څخه لاس واخست او له ديارلسوتنو افرادو سره يې دسولې له بهير سره يوځاى شو .
قاري نسيم تراوسه پورې دپلخمري ښار دشهاب الدين ډنډپه  ساحه کې په تروريستي فعاليتونو بوخت و .
ده دخپل پيوستون  په مراسمو کې وويل  موږ  يي پاکستان ته وغوښتلو کله چې لاړو موږ  ته يې لارښونه وکړه چې په بغلان کې د روغتونونو او ښوونځيو په ګډون وګړنۍ تاسيسات ويجاړ او خونړي  تروريستي بريدونه هم  زيات کړو کله چې ما فکر وکړ چې دغه کار ديو مسلمان کارنه دى تصميم مې ونيو کله چې بيرته بغلان ته ورسيږم  له ويجاړولو څخه  لاس اخلم  . ده له هغو کارونو څخه چې پخوايي دهيواد دويجاړولو په لاره کې ترسره کړي و  پښيماني څرګنده کړه او له طالبانو څخه يې وغوښتل چې نور دافغانستان دخلکو د دښمنانو له خوا و نه غوليږي او دخپل هيواد د آبادۍ او دامنيت د تامينولو په لاره کې همکاري وکړي .
دبغلان امنيه قوماندان اسدالله شير زاد  دسولې له پروګرام سره دقوماندان نسيم پيوستون دامنيت دتامينولو او په تيره بيا دانتخاباتو په درشل کې دامنيت دتامينولو  په لاره کې يو ستر برياليتوب وباله. دشهاب الدين ډنډ دپلخمري ښارته څيرمه موقعيت لري .چيرته چې قوماندان نسيم او افراديې پکې فعاليت  درلود او
په دې وروستيو وختو کې دوسله والو طالبانو دپراخ حضور او فعاليت ډګر و .

کابل – باختر دلړم دمياشتې ٣
وسله والو طالبانو تيره شپه په پکتيا ولايت دوه تنه ملکي وګړي په ډزو سره ووژل.
دغه دوه تنه  ځوانان دوه  ورځې مخکې د زرمت ولسوالۍ په مربوطاتو کې دوسله والو طالبانو د ډلو له خوا تښتول شوي وو .
په پکتيا ولايت کې دافغاني سرې مياشتې د ادارې مسوول بهادرخان منګل باختر آژانس ته وويل ،  چې دهغوي کارکوونکو دسيمې دمشرانو په همکاري وکولاى شول  ددغو دووتنو ملکي وګړو مړي د زرمت ولسوالۍ له يو نا امنې سيمې څخه دګرديز ښار ته  وليږدوي.
ددغو ځوانانو کورنۍ وايي چې زامنو يې دوه کاله مخکې يوځلې له موټرونو سره ديوې مړۍ   ډوډې دترلاسه کولو لپاره د ناټو دپوځيانو جامې  يې ليږدولې وې .
په دې حال کې دپکتيا ولايت دپوليسو مسوول  جنرال زلمي اورياخيل ددغو  دوو ملکي وګړو د ترور مسوول وسله وال طالبان وبلل او ويې ويل چې هغوى له دولت سره  هيچ اړيکې نه درلودې .

کابل\باختردعقرب ٢
داطلاعاتو اوفرهنګ وزير ډاکترسيد مخدوم رهين نن د کابل ولايت دميربچه کوټ ولسوالۍ دخواجه ګيان آرامګاه له ترميمولو وروسته پرانيستله.
دباخترآژانس دخبريال دخبر له مخې: په هغې غونډه کې چې له همدې امله دميربچه کوټ د ولسوال او د دغې ولسوالۍ دملکي اوپوځي مسولينو ، سپين ږيرو او مخورو په ګډون جوړه شوې وه؛ لومړى دميربچه کوټ ولسوال عبدالرحيم راشدي دبيا رغاونې دهغوکارونو په باب چې په تيرو لسوکلونوکې په دغې ولسوالۍ کې ترسره شوي دي؛ معلومات ورکړل.
ده د خواجه ګيان د آرامګاه دتاريخي ودانۍ او د نورو تاريخي څلو د ترميمولو په خاطر د اطلاعاتو اوفرهنګ وزارت دپاملرنې له امله دقدردانۍ په ترڅ کې د کتابتون ودانۍ ته د خلکو د اړتياوو يادونه وکړه.
په دغو مراسموکې داطلاعاتو اوفرهنګ وزيرډاکترسيدمخدوم رهين د تاريخي آثاروپه ترميمولو کې ددغه وزارت د پاملرنې په ترڅ کې د خواجه ګانو د طريقت په باب يې معلومات ورکړل، خواجه امان الله يې چې په دغې آرمګاه کې ښخ دى؛ په دې سيمه کې ددغه طريقت له مشرانو څخه وباله او ددغه طريقت د نورومشايخويادونه يې وکړه.
ډاکتر رهين وويل: په هيوادکې څه ناڅه يوزرو دوه سوه تاريخي څلي او ودانۍ شته چې نږدې زرڅلي او ودانۍ يې زموږ په اسلامي تمدن پورې مربوط دي.
دغه څلي د ويجاړيدو په حالت کې دي چې د اطلاعاتو اوفرهنګ وزارت د توان ترپولې پورې ددغو څلو د ويجاړى په مخنيوى لاس پورې کړى دى اودغه راز په دې برخه کې د نړۍ او داسلامي هيوادونو د مرستې غوښتنه کړې ده.
د اطلاعاتو اوفرهنګ وزير زياته کړه: يوه تاريخي ودانۍ چې د هغه د ويجاړيدو مخه مو ونيوله؛ د خواجه ګيان يا ولي سرشناس، خواجه امان الله آ رامګاه ده چې دغه سيمه هم دخواجه ګيان يا خواجه ګان په نامه چې د دغو خواجه ګانو په سرکې هم همدغه روحاني شخصيت و، شهرت لري.
ډاکتر رهين وويل: دسراى خواجه د تعبيرکلمه هم په خواجه امان الله ولي منسوب دى او خواجه اوخواجه ګان دنقشبندي طريقت مشايخو ته اطلاق کيږي.
په دې غونډه کې د ولايتي شورا وکيل عبدالفهيم راشدهم په ميربچه کوټ ولسوالۍ کې دپرمختګونو په باب معلومات ورکړل او وې ويل: دغه ولسوالۍ له لسوکلونو راپه ديخوا دپوهنې، روغتيا او د امنيت د تامينولو په برخوکې زيات برياليتوبونه درلودل چې ټول د دغې ولسوالۍ د مسوولينو او د خلکو دهلوځلو نتيجه ده.
ده هم دتاريخي ودانيو او څلو د ترميمولو اوساتنې په لاره کې د اطلاعاتو اوفرهنګ وزارت دهلو ځلو له امله قدرداني وکړه او غوښتنه يې وکړه چې دسکندردتاريخي غونډى جوړولو ته هم پاملرنه وشي.
دغونډې په پاى کې ډاکتر رهين او دميربچه کوټ ولسوال دخواجه امان الله ولي آرامګاه چې دخواجه ګيان په زيارت مشهور ده؛ پرانيستله.
د اطلاعاتو اوفرهنګ وزارت د تاريخي آبداتو د ساتنې رئيس ډيپلوم مهندس عبدالاحد عباسي دباخترآژانس خبريال ته وويل: دغه آرامګاه له يو کال څخه په لږ موده کې د اطلاعاتو اوفرهنګ وزارت له پرمختيايي بودجې څخه د څه ناڅه اوومليونو افغانيو په لګښت ترميم شوې ده.

کابل\باختردعقرب ٢
دپروان ولايت د شينواري ، سياګرد او دشيخ علي ولسوالۍ په بشپړه توګه د دولت د وسله والو مخالفينو له شتون څخه پاکې شوې دي.
د٢٠١سيلاب قول اردودختيځ زون ويندوى ډګروال محمدنعمان نن باخترآژانس ته وويل: هغه ګډ محاربوي عمليات چې له دريو ورځو را په ديخوا د پروان ولايت د شينواري، سياګرد اوشيخ علي په ولسواليوکې پيل شوي دي؛ ددغو ولسواليو ټولې سيمې د دولت د وسله والو مخالفينو له شتون څخه پاکې شوې دي.
ده وويل: ددغو عملياتو په بهير کې درې تنه وسله وال مخالفين وژل شوي او اته تنه نور يې ټپيان شوي دي.
ډګروال نعمان څرګنده کړه: يو ماين ايښودونکى دشينواري ولسوالۍ د نمک آب په کلي کې د ماين ايښودلو په وخت کې د٢٠١ سيلاب قول اردو د دريمې لوا د منسو بينو له خوا له ماين سره يې ونيول شو.
ده څرګنده کړه چې د دغو ولسواليو مواصلاتي لارې چې د دولت د وسله والو مخالفينو له خوا تړل شوې وې؛ بيا پرانيستل شوې دي.
ده دغه راز وويل: د پروان په ټولو نا امنو ولسواليوکې دغه عمليات به د وسله والو مخالفينو د له منځه وړلو په خا طر دوام وکړي.

کابل باختر دلړم   دويمه :
په ارزګان ولايت کې د ملي اردو ميشت ځواکونه وايي چې دوى د تيريوکال په بهير کې د لسګونوجنګي وسايلو او د لسګونوتنو وسله والوطالبانو په نيولو بريالي شوي دي .
دغوبرياليتوبونه د وسله والوطالبانو په پټنځايونو دپوځي عملياتو او له دغو جګړه مارانو سره دمخامخوجګړو په بهيرکې ترلاسه شوي دي .
  په ارزګان ولايت کې د ملي اردو د څلورمې لوا قوماندان جنرال محمد رسول قندهاري نن په ترينګوت ښارکې له خبريالانو سره په يوه غونډه کې وويل چې دملي اردو سرتيري دتيريوکال په بهيرکې دطالبانو دلسو تنو سيمه ئيزو قوماندانانو په ګډون د اته اوياتنو طالبانو په وژلو بريالي شوي دي .
ويل کيږي دغو ځواکونو په همدې موده کې ديوځانمرګى يرغلګر په ګډون اته تنه وسله وال طالبان نيولي دي.
جنرال قندهاري زياته کړه چې دغه ځواکونه بريالي شوي دي چې دتيريوکال په بهير کې دپيکا ، کلاشينکوف اوتومانچې په ګډون څه ناڅه سل ميله وسلې او يوه اندازه نشه يي توکي د پوځي او دپلټنې د عملياتو په بهيرکې له جګړه مارانو څخه ترلاسه کړي .
د وړاندې شويو شميرنو له مخې: دغو ځواکونو په يوکال کې په سلګونه توغندي ويشتونکي ، زيکويو، داشکه او دتوغنديو ماينونه او په سلګونولاسي بمونه ترلاسه کړي .
  ده وويل چې دملي اردو ځواکونو د نورو امنيتي ځواکونو په همکارۍ بريالي شوي دي چې ديوکال په بهيرکې د وسله والو طالبانو لسګونه پټنځايونه له منځه يوسي او د هغوى په سلګونو تروريستي طرحې ناکامې کړي.
د اردو دغه قوماندان د امنيتي حالاتو ښه والى ته په اشارې سره خلکو ته ډاډ ورکړ چې ديو لړ عملياتو په ترسره کولو سره به په ارزګان کې امنيتي ګواښونه ټيټې کچې ته ورسوي.