18 August 2019

RSS Facebook

سوداگریز


تازه خبرونه

په لوګر کې د طالبانو د ولسوال وژل کېدل

په لوګر کې د طالبانو د ولسوال وژل کېدل

کابل \باختر\ د زمري ٢٧ مه د لوګر د پل علم...

په تخار کې دوه کسان د نشه يي توکو د قاچاقو په تور ونيول شول

په تخار کې دوه کسان د نشه يي توکو د قاچاقو په تور ونيول شول

کابل \باختر\ د زمري ٢٧مه د تخار د ملي امنيت د...

 په فارياب کې د ١٧ وسله والو طالبانو وژل کېدل

په فارياب کې د ١٧ وسله والو طالبانو وژل کېدل

کابل \باختر\ د زمري ٢٧مه د دوو ازبکستانيو اتباعو په ګډون...

Youtube Player

khantry design

سوداگریز

سوداگریز

کابل باختر دلړم   دويمه :
د سمنګانو ولايت د کرنې د ادارې مسوولين وايي: ددغه ولايت د انګورو محصولات د تېرکال په پرتله  کمښت موندلي دي .
خوپه بازارکې د انګورو د بيې د لوړولوله امله بڼوالو د تېرکال په پرتله زيات عايد ترلاسه کړى دى.
دسمنګانو ولايت دکرنې او مالدارۍ د ادارې د زراعتي چارو آمر نورمحمد باخترآژانس ته وويل: د انګورو زيات بڼونه ددغه ولايت  په فيروز نخچير او حضرت سلطان په ولسواليوکې شته چې د دغو ولسواليو د انګورو حاصلات تېرکال څه دپاسه شپږ زرو ټنو ته رسيدلي و. خو دغه شمېر په روان کال کې پنځه زره پنځه سوه ټنو ته  کمښت موندلى دى چې د تېرکال په پرتله پنځه سوه ټنه کمښت ښيي.
  ده له دې امله چې د تېرکال په پرتله د انګوروبيه لوړه شوې ده؛ له همدې امله  بڼوالو په روان کال کې د خپلو محصولاتو د پلورنې له پلوه دوه سوه شل مليونه افغانۍ ترلاسه کړې دي چې په تيرکال کې دغه شمېر نږدې دوه سوه مليونه افغانۍ و.
ده وويل: په دغو ولسواليوکې د انګورو د ټاکونو د ودې لپاره هوا ښه ده او بڼوال  د هغو په روزلوکې خاص مهارت لري. خو په روان کال کې دهغوى دټاکونو حاصلات دتيرکال په پرتله  لږ و.
د ده دڅرګندونو له مخې: په دغو ولسواليوکې څه دپاسه اته سوه زره هکتاره ځمکه کې د انګورو بڼونه شته چې د دوى د سروې له مخې څه دپاسه يو مليونو شپږ سوه زره  تاکونه روزل شوي دي .
له بله پلوه د فيروز نخچير د ولسوالۍ بڼوالو د خپلو انګورو د حاصلاتوکمښت تائيدوي .
يوتن بڼوال رحمت خان وويل: په ديرش جريبه ځمکه کې د انګوروبڼ لري. په تيرکال کې درې ديرش ټنه انګوراو څه دپاسه يو مليون افغانۍ عايدى  ترلاسه کړى و . خو سږ کال له خپلو بڼونو څخه دوه ويشت ټنه انګور اخستى چې د پلورنې له پلوه يې نهه سوه زره افغانۍ ترلاسه کړي دي .
ده وويل: دغه پيسې کولى شي زموږ دژوندانه چارې تامين کړي.په همدې حال کې  د انګورو سوداګرپه روان کال کې د انګورو دبيې دلوړوالي او د ښه مارکيت له امله  خوښي څرګندوي .
د انګورو يو تن سوداګر نصرت الله چې تراوسه پورې يې په سلګونه ټنه انګور صادر کړي دي؛ باخترآژانس ته وويل: په دغو ولسواليوکې د حسيني او طايفي په نومونو دوه ډوله انګور شته چې لوړکيفيت او ښه خوند لري او لږې ځايونوته په ليږلوکې ښه مقاومت لري. له همدې امله يې د سوداګرو پاملرنه جلب کړې ده .
ده وويل: زه له ديارلسوکلونو راپديخواد سمنګانوولايت له فيروز نخچير ولسوالۍ څخه انګور پيرم او د پلورنې په خاطر يې کابل او پاکستان ته ليږدوم. په روان کال کې تراوسه پورې درې سوه ديرش ټنه انګور مې صادر کړى دى او د انګورو د بيې دلوړوالي له امله مې ښه ګټه ترلاسه کړې ده.
ده وويل: تيرکال ديو کيلوګرامه بيه انګورديرش افغانۍ وه، خو اوس له بڼوالو څخه يوکيلوانګور په څلويښتو افغانيو پيرم او کابل او پاکستان ته له ليږدولو وروسته يو کيلو له شپيتو څخه تراويا افغانيو پورې پلورم .
دکرنې د مسوولينو د څرګندونو له مخې: د دغې ولسوالۍ په سلوکې نوي اوسيدونکي په بڼوالۍ بوخت دي او هغوى دخپل ژوندانه چارې د انګورو له محصولاتو څخه تامينوي او په سمنګانوکې د هرکال په تيريدو سره د انګوروبڼونه پراختيا مومي.

کابل – باختر دلړم دمياشتې ١
دولسي جرګې د دارلانشا لوى  رييس نن د يو ان ، اف ،پي، اى موسسې له استازي سره وکتل.
دولسي جرګې مطبوعاتي دفتر باختر آژانس ته خبرورکړ :
ددغې موسسې استازي محمد يوسف له ملي شورا او په تيره بيا دولسي جرګې له دارلانشا سره ددغې موسسې دهمکارۍ ډاډ ورکړ او څرګنده يې کړه چې دغه موسسه په پام کې لري چې په محدود وخت کې دمشورتي بورد په استخدامولو سره په  نظر وړ برخو کې دولسي جرګې له دارلانشا سره همکاري وکړي.
دولسي جرګې د دارلانشا لوى رييس خداى نظر نصرت د  يو، ان،اف ، پي ،  اى دموسسې دهمکاريو له امله قدرداني وکړه او څرګنده يې کړه چې له ملي شورا سره په تخنيکي برخو کې همکارۍ به په کاري بهير کې مثبته اغيزه وکړي.

کابل – باختر دلړم دمياشتې ١
دبشردحقوقواو ښځودحقوقو دروزنې ترعنوان  لاندې  روزنيزه  کارګاه د مهاجرينو د راستنولو دچاروپه وزارت کې جوړه  شوه .
دمهاجرينو دراستنولودچارو د وزارت يو خبرځاي باختر آژانس ته خبرور کړ :
په دې  پروګرام کې دښځو او نارينه و په ګډون ددغه وزارت پنځه ديرشو تنو کارکوونکو ګډون کړى دى .
دمهاجرينو دراستنولو دچارو  وزارت دپلان او پاليسي معين فضل احمدعظيمي په تيرولسوکلونو کې دښځو دحقوقو ددفاع په لاره کې دتيرو لسوکلونو پرمختګونه  ښه وبلل او ويې ويل په بيلابيلو دولتي ادارو کې دجندر  د څانګو جوړول د دغه ادعا ښکارندوى دى اودغه شان ادارې بريالي شوې دي  چې دبشردحقوقواودښځو دحقوقو د ارزښتونو دساتلو په لاره کې ښه برياليتوبونه ولري.
ده وويل :  دبشر دحقوقو او دټولنيز عدالت رعايتول له هغو مهمو موضوعګانو څخه دي چې داسلام مبين دين  ورباندې ټينګار کړى دى او موږ مسلمانان دې ته متوجه کوي چې ددغه شان لارښونو  پيروي وکړو  .
دغه کارګاه  به درې ورځې دوام وکړي.

کابل – باختر دلړم دمياشتې ١
دغيرحکومتي موسسو دچارو د همغږۍ دڅيړنې او د لازمو آسانيتاو دبرابرولو په مقصد يو انټرنټي مرکز په اقتصاد وزارت کې جوړ شو .
داقتصاد وزارت يو خبرځاى باختر آژانس ته وويل :  دغه مرکز نن په داسې حال کې چې داقتصاد وزير عبدالهادي ارغنديوال حاضر و پرانستل شو .
داقتصاد وزارت مسوولين  وايي چې د دغه مرکز په پرانستلو سره به غير دولتي
موسسې خپل رپوټونه  په ښه او ګړنديتوب سره وړاندې کړي اود اقتصاد وزارت او دغير حکومتي موسسو  ترمنځ به اړيکي ښې شي.

کابل – باختر دلړم دمياشتې ١
نهه تنه پاکستاني طالبان  تيره شپه په نورستان ولايت کې له افغان سرحدي ځواکونو سره دنښتې په بهير کې ووژل شول .
په دې نښته کې چې دکامديش ولسوالۍ په يوه سرحدي سيمه کې  وشوه درې تنه نور جګړه ماران  ټپيان شول .
نښته هغه وخت پيل شوه چې پاکستاني طالبانو د افغان جګړه مارانو په  همکارۍ له پاکستان څخه دافغان سرحدي پوليسو په  يوې پوستې بريد وکړ .
دنورستان ولايت دسرحدي پوليسو يو قوماندان باخترآژانس ته وويل  :  چې په دې يوساعته  نښته کې نهه تنه وسله وال طالبان ووژل شول او درې نور يې ټپيان شول .
ده زياته کړه  نور يرغلګر طالبان دنښتې په بهير کې بيرته پاکستان ته وتښتيدل.
دپوليسو ددغه قوماندان  دڅرګندونو له مخې ،  په دې نښته کې ديوتن افغان  سرحدي ساتونکى  هم  ټپي شوى دى .
دنورستان ولايت دافغانستان په ختيځ کې له پاکستان سره د درې سوه شلو کيلو مترو په اوږدوالي دګډې پولې په لرلو سره دوسله والو طالبانو په ګډون دتروريستي ډلو دشتون او فعاليت شاهد دى .

کابل – باختر دلړم دمياشتې ١
درې تنه افغاني حاجيان دترافيکي  پيښو او دطبيعي مرګ له امله  په مکه مکرمه
کې وفات شول .
دباختر آژانس استول شوي خبريال فضل واحد کريم  په مکه مکرمه کې دافغاني حاجيانو دبعثه دبېدرکه شويو پيښو او وفياتو دکميټې دمسوول قاري عبدالعظيم له خولې خبرراکړ چې دفارياب  ولايت اوسيدونکې عبدالصمد په طبيعي  ډول او دفارياب ولايت  اوسيدونکى  فرزلي او د تخار ولايت اوسيدونکى محمداسماعيل د ترافيکې  پيښو له امله وفات شوي دي .
دباختر آژانس خبريال زياتوي چې يوولس تنه افغاني حاجيان پخوا دعمر دزياتوالي ، ناروغۍ او دترافيکي پيښو له امله په مدينه منوره او مکه مکرمه کې په  حق رسيدلي وو،  چې په دې ډول د هغو افغاني حاجيانو شمير چې په سعودي عربستان کې دبيت الله شريف دحج دمناسکو دپرځاى  کولو په وخت کې په  حق رسيدلي دي څوارلسو تنو ته ورسيد.

کابل\باختر\دعقرب اوله
دناصرخسرو بلخي دعالي ليسې نوې ودانۍ نن دکابل ښاردتايمنيو په ساحه کې پرانستل شوه او د زده کوونکو داستفادې وړ وګرځيده .
دباخترآژانس دخبريال دخبر له مخې  :  په هغې غونډه کې چې له همدې امله ددغې ليسې په انګړ کې جوړه شوې وه دپوهنې وزير فاروق  وردګ خبرې وکړې او  ويې ويل  دناصرخسرو بلخي دعالي ليسې نوي ودانۍ دامريکا په مرسته دڅوارلسو مليونو افغانيو په لګښت جوړه شوې ده چې شپاړلس درسي او څلوراداري خونې اونور ضروري ملحقات لري .
ديادونې وړ ده چې ددغې ليسې زده کوونکو پخوا د درسي خونو دکمښت له امله په پرانستي فضا کې په زده کړه بوخت وو  چې دنوې ودانۍ په جوړولو سره دناصر خسرو بلخي په ليسه کې دغه ستونزه لرې شوې ده .

کابل\باختر\دعقرب اوله
دهيواد دبيلا بيلو ولايتونو يوشميرمحصلينو نن له غرمې وروسته د جمهور رييس له دويم مرستيال محمدکريم خليلي سره وکتل  اودتحصيلي حالت د ښه والي او هغومحصلينو ته چې دهيواد له پوهنتونونو څخه فارغ شوي دي دکاردموندلو په لاره کې ددولت دمشرتابه هيت د پاملرنې غوښتنه وکړه .
دجمهوري رياست مطبوعاتي دفتر باخترآژانس ته خبرورکړ :
په دې کتنه کې له بيلا بيلو ولايتونو څخه د مرکز دپوهنتونونو يوشميرمحصلينو ګډون کړى و ،  په هيوادکي په تيرو لسو کلونو کې يې د ښوونې  اوروزنې وده  بې ساري  وبلله او د لوړو زده کړو غوښتونکو  ځوانانو اړتياوو ته دځواب ورکولو په لاره کې ترسره شوي هلې ځلې کافي ونه بللې او په دې برخه کې د دولت دمشرتابه او دلوړو زده کړو  وزارت درهبرۍ  په اغيزمنې  پاملرنې يې ټينګاروکړ.
دوي دغه راز د لوړو زده کړو له مرکزونو څخه فارغ شويو ځوانانوته دکاري مناسبو فرصتونو نشتوالي دځوانانو له مهمو ستونزو څخه وبلل اوهغوي ته يې د کاري زمينو د برا برولو غوښتنه وکړه .
دجمهور رييس مرستيال دښووني او روزنې ودې ته په اشارې سره څرګنده کړه چې زموږ هيواد په نوې دوره کې د نا امنيو له امله له ځينو ستونزو سره سره  دښوونې اوروزنې او دلوړو زده کړو په برخوکې ښې لاسته را وړنې لرلې  اونن  د دولتي او خصوصي په ګډون دلوړو زده کړو د مرکزونو په شتون سره زموږ په هيواد کي دعلم او پوهي په برخه کې ښه بدلون رامنځته شوى دى .
دجمهور رييس مرستيال  دنوي فصل دساتلو اودهغه دکمزورتياو اونيمګړتياو داصلاح کولو په لاره کې  دخلکو اوتيره بيا دزده کړي خاوندو مشارکت اغيزمن وباله اوڅرګنده يي کړه زموږهيواد به هغه وخت په موجودو ستونزو بريالي شي چى زموږ خلک دپرمختګ اوترقي په مقصد په ټولنيزو چارو کې فعاله ونډه واخلي  .
دجمهور رييس مرستيال دهيواد په تحصيلي مرکزونو کي ځينو نيمګړتياو  او دتحصيل خاوندوځوانانودجذب او هغوي ته دکاري فرصتونوکمښت ته په اشارې سره  هيله څرګنده کړه چې دغه کمزورتياوي اونيمګړتيا وي به  په پړاويز ډول لري شي .
ده دغه راز په کتنه کي حاضرو محصلينو ته ډاډ ورکړچې د دوى دغوښتنوپه لاره کې  به اقدامات  وکړي .

کابل\باختر\دعقرب اوله
په کاپيسا ولايت کې نن  د دريو کيلو مترو په اوږد والي دسړک دترميمولو او
کريړ اچولو کار پيل شو  .
دکاپيسا ولايت د کليو د بيا جوړولو او پراختيا رييس حيات الله  فرهنګ باختراژانس ته وويل :  دغه سړک دکاپيسا مرکز د دويمې  برخې د ولسوالۍ د ديراحسان له سيمې سره  نښلوي .
ددغه سړک دترميمولو او کريړ اچولو لګښت شپږمليونه درې سوه ديرش زره افغانۍ کيږي چې دکليو دبيا جوړولو او پراختيا وزارت دکليوالي لارو دجوړولو دپروګرام له خوا ورکول کيږي .
ده  د دغه سړک جوړول دسيمې  داوسيدونکو دترانسپورتي ستونزو دلرې کولو لپاره ګټور وباله .

کابل\باختر\دعقرب اوله
د نورستان ولايت ښځينه  ښوونکو ته  روزنيزه  کارګاه جوړه  شوه .
دغه روزنيزه  کارګاه دجک موسسې له خوا دنورستان په شپږو ولسواليو کي
جوړه شوي ده .
دنورستان دپوهني رئيس باخترآژانس ته وويل :  دغه کارګاه دښوونکودمسلکي ظرفيت د لوړولو په مقصد پيل شوي ده چې دنورستان ولايت څلورسوه تنه ښوونکي اودوه  اتيا تنه سرښوونکو پکې ګډون کړى دى اوديارلس ورځې دوام کوي  .