24 January 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل باختر دوري  نولسمه:
پروفيسر  عبدالستار سيرت  نن په يوه خبري غونډه کې په افغانستان کې دملي سولې دجبهې دجوړيدو خبر ورکړ .
دغې جبهې بنسټ  دوه کاله مخکې  دافغانانو په واسطه  دامريکا په متحده ايالاتو کې  ايښودل شوى دى .
دباختراژانس دخبريال دخبر له مخې، دغه راز ده وويل هر افغان چې دنړۍ په هر ګوټ کې ژوند کوي نه شي کولاى دهيواد له قضاياو څخه جلا واوسي .
ده زياته کړه: دافغانستان خلک په جهاد اومقاومت کې ګټونکي و خو په سياست کې ناکام ، په تيره بيا په دغو لسو کلونوکې چې تير شول .
  دده په خبره په افغانستان کې سوله دجګړې له لارې نه شي ترلاسه کيدى او په جګړه کې  ښکيل اړخونه هم نه شي کولاي چې سوله راوړي
دده په باور سوله هغه وخت په افغانستان کې تحقق مومي چې دافغانستان ټول خلک دقوم ، قبيلې ،مليت په پام کې نيولو  پرته دافغانستان په نامه دملي يو والي په ساتنې سره په يوملي مرکز کې  ديوبل تر څنګ راټول شي
سيرت زياته کړه دغه جبهه  دسولې دټيګښت په مقصد دافغانستان له ټولو خلکو سره خبرې کوي او په يو واحد نظر سره داسې پروګرام  جوړوي چې له مخې يې په هيوادکې سوله تامين شي .
دغه راز  سيرت په دې بارو دى چې بهرنيان نه شي کولاي  چې په افغانستان کې سوله  تامين کړي .
ده وويل په خپله افغانان کولاى شي سوله راوړي  .

کابل باختر دوري  نولسمه:
دانتخاباتو  دخپلواک کميسيون ويندوى نن په يوه خبري غونډه کې  وويل هغه ارقام چې درايو دشميرنې  په باب ددغه کميسيون له لارې خپريږي اعتبار لري .
داپه داسې حال کې ده چې دراي ورکولو صندوقونه  دهيواد ديو ديرشو  ولايتونو له ولسواليو  څخه دولايتونو مرکزونو ته ليږدول شوي دي .
دباختراژانس دخبريال دخبر له مخې،  په دې خبري  غونډه کې د انتخاباتو دخپلواک کميسيون ويندوى نورمحمد نور زياته کړه له رسنيواوله ټولنيزو بنسټونوڅخه زموږغوښتنه داده هغه ارقام چې دنوماندانودرايو دشميرنې په اړوند دانتخاباتو دخپلواک کميسيون له لارې خپاره شوې وي ، باوري دى . رسنۍ دى داسې ارقام خپاره  نه کړي چې دهغو له مخې دخلکو ذهنونه  مغشوش شي.
نور زياته کړه يواځې هغه ارقام چې دانتخاباتو دخپلواک  کميسيون له لارې خپريږي اعتبار لري .  او هغه ارقام چې ددغه کميسيون له تاييد پرته خپريږي اعتبار نه لري .
ده وويل په هرځاى کې چې سرغړونې او تقلب دانتخاباتوبهير ته زيان رسولي وي کميسيون هغه  جدي انګيري .
  ده زياته کړه: تراوسه پورې دراي ورکولو صندوقونه  ديو ديرشو ولايتونو له ولسواليو څخه دولايتونو مرکزونو ته ليږدول شوي دي اويواځې دبدخشان ،غور او ددايکندي دولايتونو دولسواليو دراي ورکولو صندقونه  پاتې دي چې ښايي دهغو دليږدونې کار ترسبا پورې پاى ته ورسيږي .
دنور دڅرګندونو له مخې ، ابتدايي نتيجې به دروان کال دثور دمياشتې په څلورمه نيټه  او وروستۍ  نتيجې دثور دمياشتې په څلور ويشتمه نيټه  اعلام شي .  دانتخاباتو دخپلواک کميسيون ويندوى يوځل بياټينګار وکړ يو لړ مدارک او شواهد دغه کميسيون ته رسيدلي دي چې ځينو دولتي مقاماتو دجمهوري رياست دځينونوماندانو په ګټه اويازيان کار وکړ چې دغه موارد دانتخاباتو د خپلواک  کميسيون له لورې دهيواد له  جمهور رييس سره شريک کړى شول .
هيله ده چې دغه شان اشخاص دجمهور رييس له پخوانۍ لارښوونې سره سم تر څارنې لاندې  ونيول شي .

کابل باختر دورى  نولسمه
د هند صدر اعظم ښاغلي من موهن سېنګ پرون  له غرمې مخکې د يوې ټليفوني اړيکې په ترڅ کې جمهور رئيس حامد کرزي او د افغانستان ولس ته په افغانستان کې د انتخاباتو د بريالي ترسره کېدو له امله مبارکي وويله.
دجمهوري رياست مطبوعاتي دفترباخترآژانس ته خبرورکړ
ښاغلي من موهن سېنګ د جمهور رئيس کرزي له رهبرۍ او د افغانستان د خلکو له مېړانې، قاطعت او ارادې ستاينه وکړه چې تروريزم او تاوتريخوالي ته يې نه وويل او د خپل هېواد د ديموکراتيکې او هوسا راتلونکې لپاره يې رايه ورکړه.
د هند صدراعظم جمهوررئيس کرزي ته وويل چې دغه انتخابات ستاسو تر مشرتابه لاندې په داسې حساس وخت کې ترسره شول په کوم کې چې افغانستان د ستونزمنو ننګونو سره سره، د پام وړ پرمختګ کړی دی.
ده زياته کړه چې په انتخاباتو کې د افغانانو پراخ ګډون پر ديموکراسۍ د دوی باور او د يو ثبات لرونکي، سوله ييزه، يو موټي، ټول شموله او هوسا افغانستان د رامنځته کولو لپاره د دوی د ارادې ښکارندويي کوي.
ښاغلي من موهن سېنګ څرګنده کړه: زه په دې پوهيږم چې په افغانستان کې د انتخاباتو د بهير پلي کول اسانه نه ؤ. غواړم په دې برخه کې د افغانستان د دولت، د انتخاباتو د خپلواک کمېسيون او په ځانګړي توګه د افغانستان د امنيتي ځواکونو له هڅو څخه خورا زياته ستاينه وکړم چې د دغه بهير د تطبيق امکان يې رامنځ ته کړ.
همداراز  د هند صدراعظم د هغو افغانانو کورنيو ته د خپلې ژورې ډاډګيرنې مراتب وړاندې کړل چې د دندو د ترسره کولو په لړ کې يې خپل ژوند له لاسه ورکړی دی.
ده همدا راز  هيله څرګنده کړه چې د رايو شمېرنه او د اړتيا په صورت کې د انتخاباتو دوهم دور په ښه توګه ترسره شي.
د هند صدراعظم ډاډ څرګند کړ چې هند به له افغانستان سره له خپلو امکاناتو سره سم، د امنيت او اقتصادي پرمختيا پخاطر خپل ملاتړ او مرستو ته دوام ورکړي.
ده جمهوررئيس کرزي ته په خپلو خبروکې وويل: ستاسو ملګرتيا او له تاسو سره کاري اړيکې، زما لپاره خورا زيات وياړ دی او  مونږ هند ته ستاسوله راتګ څخه هرکله هرکلی کوو.
ښاغلي من موهن سېنګ  هيله څرګنده کړه چې له جمهور رييس کرزي سره په نږدې راتلونکې کې په هند کې لېده کاته وکړي.
ده وويل: موږ هم انتخابات په مخ کې لرو. زه په دې باور يم چې د هند د انتخاباتو نتايجو ته له پام پرته، د افغانستان او هند ترمنځ اړيکې به د هند راتلونکي دولت ته هم خورا زيات اهميت ولري. 
ښاغلي من موهن سېنګ  زياته کړه چې په هند کې له افغانستان سره د اړيکو په اړه عمومي سياسي توافق ليدل کيږي او  د دواړو هېوادونو ترمنځ لرغونې اړيکې به لا وده او پياوړتيا ومومي.
د هند صدراعظم ټينګار وکړ چې هېواد به يې په راتلونکي کې هم له افغانستان سره خپل ملاتړ او مرستو ته دوام ورکړي.
د دغې ټليفوني اړيکې په ترڅ کې جمهور رئيس حامدکرزي د هند د صدراعظم له ټليفوني تماس او نيکو هيلو څخه په مننې سره وويل: افغانانو په انتخاباتو کې په خپل پراخ ګډون سره د افغانستان د غوره راتلونکې په اړه خوشبيني وښوده.
حامدکرزي د هند له صدراعظم او د دوی له دوامدارو مرستو او ملاتړ څخه په مننې سره، وويل چې د افغانستان خلک، هند خپل ريښتينۍ دوست ګڼي او د دوست هېواد هند مرستو او همکاريو ته د قدر په سترګه ګوري.
جمهور رئيس ډاډ څرګند کړ چې د افغانستان راتلونکی حکومت او جمهور رئيس به هم د هند نږدې متحد او ملګری پاتې شي.
جمهور رئيس هيله څرګنده کړه چې د هند راتلونکي انتخابات هم په ښه توګه او پراخه کچه ترسره شي. 

کابل باختر دورى  نولسمه
د هېواد د پوهنتونونو د استادانو د سراسري اتحاديې غړو د افغانستان له جمهوررئيس حامد کرزي سره په کتنه کې د کانکور د آزموينې په سيستم کې د اصلاحاتو د رامنځته کولو غوښتنه وکړه.
دجمهوري رياست مطبوعاتي دفترباخترآژانس ته خبرورکړ
په دې کتنه کې چې نن غرمه په ارګ کې ترسره شوه، په داسې حال کې چې د لوړو زده کړو وزير او د دغه وزارت د مشرتابه پلاوی هم حاضرو، د هېواد د پوهنتونونو د استادانو د سراسري اتحاديې غړو په هېواد کې د کانکور  په اوسنی سيستم کې د اصلاحاتو د رامنځته کولو غوښتنه وکړه.
دوی همدا راز د لوړو زده کړو وزارت له تشکيل څخه د باندې د کانکور د آزموينې د اخيستلو لپاره  د يوې خپلواکې کميټې د جوړيدو غوښتنه وکړه.
جمهوررئيس کرزي د هېواد د پوهنتونونو د استادانو د سراسري اتحاديې د غړو د نظرونو او وړانديزونو له اوريدو وروسته د لوړو زده کړو وزير ته لار ښوونه وکړه چې د کانکور د آزموينې په سيستم کې د اصلاحاتو د رامنځته کېدو او د کانکور د آزموينې د اخيستلو لپاره دې د يوې خپلواکې کميټې د جوړيدو لپاره يوه هر اړخيزه طرحه د کابينې غونډې ته وړاندې کړي ترڅو له مخې يې لازم تصميم ونيول شي.

کابل باختر دورى  نولسمه:
دسترې محکمې عالي شورا نن له غرمې مخکې دقاضي القضات پوهاندعبدالسلام عظيمي په مشرۍ غونډه وکړه .
  دسترې محکمې دخپرونو رياست باختراژانس ته خبر ورکړ.
دسترې محکمې عالي شورا لومړۍ  په برياليتوب  سره دجمهوري رياست دانتخاباتو ترسره کيدل ديومهم ملي کار په توګه چې دافغانستان دمليوني خلکو په ګډون اوپه لوړې  ملي روحيې سره ترسره شول دهيواد خلکو  اوسياسي نظام ته يو ستر برياليتوب وباله او دملي اردو ، ملي پوليسو او دملي امنيت په ګډون  دهيواد له امنيتي ځواکونو څخه چې په مسوولانه او صادقانه ډول دخپل رسالت په ترسره کولو سره يې وکولاى شول ددغه ملي بهير بشپړ امنيت تامين کړي ، مننه او قدرداني وکړه او دلوى خداى ( ج )  له دربار څخه يې هغو کسانو ته چې په دې ملي او تاريخي ورځ دسولې او امنيت ددفاع په لاره کې شهيدان شوي دي ، دفردوس جنت هيله وکړه .
شورا وروسته په اجندا کې نيول شويو مسئلو په څيړنې لاس پورې کړ او دبلخ ولايت داستيناف  محکمې درياست  دماشومانو دديوان استهدايې  په پاملرنې  سره يې څرګنده کړه . چې دقضيو په تيره بيا دماشومانو دقضيو دڅيړنې په خاطر  په نافذو قوانينو کې اټکل شوي وختونه دقانون جوړولو ځانګړي منطق لري. او دمتهمينو  دڅيړنې دبهير د چټکتيا په مقصد وضع شوي دي له دې امله دهيواد ټول عدلي او قضايي بنسټونه  دخپلو صلاحيتونو په محدوده کې داټکل شويو قانوني وختونو په جدي رعايتولو مکلف دي خوهغه خاص مواردچې دعدالت دتامينولو ، دقانونيت دتحقق  او دعادلانه محاکمې  دموازينو د رعايتولو په مقصد دزيات دقت غوښتنه وکړي  ، له دې کار څخه  مستثنى  دي .
دغه راز ديوې جزايي قضيې دڅيړنې دڅرنګوالي په برخه کې دکورني امنيت دجرمونو پرخلاف دمبارزې دڅارنوالۍ  دلوى رياست  داستهدايې په وړاندې چې اصلي متهم او زيانمن شوي کسان  يې بي درکه دي ، لارښوونه وشوه چې ددغه شان قضيو دتحقيقاتو اومحاکمې څرنګوالي په نافذوقوانينو کې مشخص دي ،عدلي او قضايي مراجع کولاى شي دخپلو قانوني   صلاحيتونو په حدودو کې لازم تصميمونه ونيسي .
په همدې ترتيب دجيلونو او توقيف  خونو دلوى رياست داستهدايې  پربنسټ دمحکمودقطعي او وروستيو حکمونو پرتطبيق باندې دڅارنې  لوى  رياست  ته لارښوونه وشوه چې دکندز ولايت دهغو شپږو تنو بنديانو غوښتنې چې ځان دجمهوري رياست دمجازاتو دبخښنې  او تخفيف  له بيلابيلو فرمانونوڅخه داستفادې مستحق بولي وڅيړي او په دې برخه کې دې لازم تصميم ونيسي  .
سربيره پردې دعالي شورا په نننۍ غونډه کې دبيا کتنې ددوومواردو غوښتن ليکونو اودمحکمې دبدلون دپنځلس مواردو غوښتن ليکونو او دقضايي صلاحيت  دتنازع  ديو مورد په باب  څيړنې  وشوې او په هر مورد کې لازم تصميمونه  ونيول شول .
  ديوبل خبر له مخې،  دقضايي کنترول اوڅارنې دادارې موظفينودروان کال دورى دمياشتې  په لسمه نيټه  د هرات ولايت دښاري ابتداييه محکمې يو تن قاضي  د بډې اخستنې په تور اوهم دورى دمياشتې په دولسمه نيټه يو تن د زوجيت دوثيقې  دتذويرپه تور  دکابل ښار په شپږمه  ناحيه کې نيولي دي دواړه قضيې تر قانوني څيړنې لاندې دي .

کابل باختر دوري  نولسمه:
دهلمند په ولايت کې دامنيتي ځواکونو او طالبانو ترمنځ نښته کې دطالبانو يو قوماندان ووژل شو او شپږ تنه نور طالبان ټپيان شول .
دهلمند ولايت دامنيې قوماندانۍ وياند عبدالاحد چوپان دباختراژنس خبريال ته وويل دغه جګړه پرون هغه وخت ونښته چې امنيتي  ځواکونه ددغه ولايت له کجکي  ولسوالۍ څخه لښکرګاه ته دراي ورکولوپاڼو دصندوقونو په ليږدولو بوخت وو
  دچوپان دڅرګندونو له مخې په دې نښته کې امنيتي ځواکونو او دراي ورکولو دپاڼو صندوقونو ته تاوان نه دى اوښتى .

کابل باختر دوري  نولسمه:
دپروان په ولايت کې دغير مسوولو وسله والو کسانو دډزو په پايله کې يو تن ووژل شو او يو بل تن ټپي شو .
دپروان ولايت امنيه قوماندان جنرال خليل الله ضيايي دباختراژانس خبريال ته وويل دغه پيښه تيره شپه دهغه ولايت دمرکز په قلعه سوخته کې  رامنځته شوه
ديوه اړونده خبرځاى دڅرګندونو له مخې لاتراوسه  دوژل شوي  او ټپي  هويت معلوم نه دى  چې په دې برخه کې پوليسو  خپله څيړنې پيل کړي دي .
دغه پيښه په داسې حال کې  دپروان په ولايت کې شوې ده چې ددغه ولايت خلکو تل دغير مسوولو  وسله والو ډلو دشتون دپراخوالې  او زياتوالې له امله شکايت کړى دى .

کابل- باختر د ورى دمياشتې ١٩مه :
په نړيوالو بازارونوکې د يوانس سرو زرو بيه. په ١٣٠٠ ډالره وړاندې کيږي
. د پښتنى بانک د سرو زرو د مارکيټ يو پلورونکى قاهرخان  ددغه خبر په تاييدولو سره باخترآژانس ته وويل: اوس دکابل په بازارونوکې يو ګرام مصري سره زر په٢٥٥٠ افغانيو، کويټي په٢٥٠٠ افغانيو، سنګاپوري په٢٤٥٠ افغانيو، بحريني په٢٢٠٠افغانيو، عربي په٢١٥٠ افغانيو، ايراني په١٧٠٠ افغانيو او يوګرام روسي سره زر په١٦٠٠افغانيو پلورل کيږي.

کابل باختر دوري  نولسمه:
دوسله والوطالبانو دډلې ددووتنو پاکستانيانو  په ګډون دولس تنه وسله وال طآلبان په ننګرهار ولايت کې دپوځي عملياتو په بهير کې  ووژل شول
په دغو جګړه مارانو داردو او پوليسو دپوځيانو له خوا دننګرهار ولايت دخوږيانيو ولسوالۍ په  ترمي خور سيمه کې  ددوى په پټنځايونو کې بريدونه وشول او ووژل شول .
دغه عمليات داردو او پوليسو دسل ګونو تنو منسوبينو په ګډون  پرون په دې سيمه کې پيل شوي دي او تراوسه پورې دوام لري .
دننګرهار ولايت دامنيې قوماندانۍ ويندوى  حضرت حسين  مشرقي وال دباختراژانس خبريال ته وويل چې ددغو عملياتو په بهير کې تراوسه پورې دولس تنه وسله وال طالبان  وژل شوي دي .
په همدې حال کې دخوږيانيو ولسوالۍ يو سيمه ئيز مسوول وايي چې په وژل شويو کسانو کې دوه تنه پاکستاني اتباع هم شامل دي .
په دغو عملياتو کې برخه والو دوسله والو طالبانو څو پټنځايونه دړې وړې  کړي دي او ددغې ډلې  په لسګونو سپک او درانده  جنګي وسايل  او په سلګونو  کيلوګرامه چاوديدونکي  توکي ترلاسه کړي دي .
دننګرهار ولايت دپوليسو ويندوى  وايي چې دغه عمليات دوسله والو طالبانو له شتون څخه دخوږيانيوولسوالۍ دپاکولو  په مقصد پيل شوي دي او همدا اوس هم دوام لري .
  ده وويل چې تراوسه پورې ددغو عملياتو په بهير کې پوځيانو اوملکي وګړو ته دسرزيان  نه دى اوښتى .

کابل باختر دوري  نولسمه:
دهرات ولايت ديوې ولسوالۍ ولسوال دانتخاباتو  په ورځ ددندې په ترسره کولو کې دبي پروايي  په تور ددغه ولايت دمقام له خوا ګوښه کړى  شوى دى .
  دولتي مسوولين ددغه خبر په تاييدولو سره وايي چې دغه ولسوال دانتخاباتو په ورځ د ډار اچوونکو بريدونو له ويرې له خپلې دندې څخه تښتيدلي و .
دغه مسوولين وايي چې ددغه ولسوال دګوښه کيدو ليک يې دسيمه ئيزو ارګانونو خپلواکې ادارې ته ليږلى دى .
له دې سره جوخت عدلي او قضايي ارګانونو هم  له دغه ولسوال څخه تحقيقات پيل کړي دي .
دباختراژانس دخبريال دخبر له مخې سره له دې چې ځينو رسنيو خبر ورکړى و چې دهرات ولايت دپوهنې رييس هم له دندې څخه ګوښه کړى شوى دى خو دهرات والي سيد فضل الله وحيدي دغه اوازې درواغ وبللې .
په هرات ولايت کې دجمهوري رياست او دولايتي شوراګانو انتخابات دنږدې يو مليون تنو وګړو په ګډون درايي ورکولو په څلور سوه يو ديرشو مرکزونوکې دبشپړ امنيت په فضا کې  ترسره شول .