11 July 2020

RSS Facebook

سوداگریز


تازه خبرونه

په نيمروز کې زر بېوزله  کورنیو ته  د چرګانو واړه کورني فارمونه جوړیږي

په نيمروز کې زر بېوزله کورنیو ته د چرګانو واړه کورني فارمونه جوړیږي

کايل/ د چنګاښ ۲۱مه/ باختر د کرنې، اوبولګولو او مالدارۍ وزارت...

د ارواښاد محمد یوسف غضنفر یادغونډه او د دعا مراسم په ارګ کې ترسره شول

د ارواښاد محمد یوسف غضنفر یادغونډه او د دعا مراسم په ارګ کې ترسره شول

کابل/ د چنګاښ ۲۱ مه/ باختر د اقتصادي او سوداګرۍ پراختیا...

د ښوونې او روزنې په نصاب کې به ملي او اسلامي ارزښتونه خوندي وي

د ښوونې او روزنې په نصاب کې به ملي او اسلامي ارزښتونه خوندي وي

کابل/ د چنګاښ ۲۱مه/ باختر د پوهنې وزارت سر پرستې رنګینې...

Youtube Player

khantry design

سوداگریز

سوداگریز

کابل – باختر د زمري دمياشتې ٢٦
يوه پنځه کسيزه ډله ډار اچوونکي د ملي امنيت د لوى رياست د موظفينو له خوا په بغلان ولايت کې ونيول شول.
د ملي امنيت دلوى رياست مطبوعاتي دفتر نن باختر آژانس د يوې خبرپاڼې په ليږلو سره ليکلي دي: په دغو ډار اچوونکو د بغلان ولايت د نهرين او دوشي د ولسواليو په مربوطاتوکې د شوګمارى، ماين ښخولو، غلا او په امنيتي پوستو د بريدونو تورلګول شوى دى چې د ملي امنيت دلوى رياست د موظفينو له خوا دريو ځانمرګو واسکټونو، د وسايطو ضد څلويښتو ماينونو، څو ميله وسلو، يوې اندازې مهماتو او له يو کرولاموټرسره ونيول شول.

کابل – باختر د زمري دمياشتې ٢٦
د پوليسو يوه جګپوړي قوماندان په هلمندکې د جګړې د بندولو لپاره د هلوځلو خبرې کړې دي او په وسله والو طالبانو پورې له اړوندوکړيو سره خبرې يې د دغو هلوځلو يوه برخه بللې ده.
د پوليسو دغه جنرال چې ويل کيږي د پوليسو د ځانګړو ځواکونو د افرادو قوماندانۍ په غاړه لري؛ له طالبانو سره هغه هم په هلمندکې د سيمه ييزو مشرانو له لارې د خبرو يادونه کړې ده او ويلي يې دي چې دغه خبرې رسمي نه دي.
په هلمندکې له طالبانو سره د خبرو په پيل پورې اړوند خبر په عمده توګه په خصوصي او آزادو رسنيوکې منعکس شوى دى. سره له دې چې د والي د فتر او يا هغو بنسټونو چې ويل کيږي په دغو خبروکې شامل دي؛ په دې باب کومه تبصره نه ده کړې.
خو دملي دفاع وزارت مقامات وايي چې ددغه وزارت له خوا له طالبانو سره هيڅ راز خبرې نه دې شوې.
دملي دفاع وزارت ويندوى جنرال ظاهر عظيمي د باختر آژانس خبريال ته وويل: د ګران خبري سايټ په هلمند ولايت کې د خاصو ځواکونو د قوماندانۍ له خوا له طالبانو سره د خبرو د پيل په اړوند يو مطلب خپور کړى دى. دملي دفاع وزارت اعلاموي چې تراوسه پورې له طالبانو سره د ملي اردو د منسوبينو له خوا هيڅ راز خبرې نه دې شوې.
په داسې حال کې چې د ملي اردو د خاصو عملياتو قطعات په ساحه کې د محاربوي او چاڼيزو عملياتو په اجراکولو بوخت دي .
دغه څرګندونې په ډاګه کوي چې د ملي دفاع وزارت د پخوا په شان د طالبانو پرخلاف د چاڼيزو عملياتو په ترسره کولو ژمن دى او همدا اوس د عقاب په نامه عمليات په هلمندکې دوام لري چې په هغوکې طالبانوته د سر دروند زيان اوښتى دى.

کابل – باختر د زمري دمياشتې ٢٦
د راى پاڼو د صندوقونو د پلټنې د بهير له پيل څخه تراوسه پورې د راى پاڼو لس زره دوه سوه يو ديرش صندوقونه پلټل شوي دي .
د باختر آژانس د خبريال د خبرله مخې: د انتخاباتو د خپلواک کميسيون ويندوى نورمحمدنور نن په يوه خبري غونډه کې وويل: دغه شمېر چې د جمهوري رياست د دويم پړاو انتخاباتو په سلوکې پنځه څلويښت راى پاڼې بيا پلټلې شوې دي .
ده زياته کړه چې د راى پاڼو د بيا پلټنې او د راى پاڼو د شپږ زره صندوقونو خاصه پلټنه او شمېرنه  د انتخاباتي ټيمونه د استازو او د ملي او نړيوالو کتوونکو له خوا په عادي ډول دوام لري.
ده څرګنده کړه: د ملګرو ملتو د سازمان هغه ٩٣ تنه کارکوونکي چې په نظارتي ټيمونو زيات شوي دي؛ په تخنيکي برخه کې خپل کار پرمخ بيايي.
د نور دڅرګندونو له مخې: د راى پاڼو د صندوقونو د بياپلټنې بهير د ملګرو ملتو د سازمان ترجدي څارنې لاندې دوام لري.
د انتخاباتو د خپلواک کميسيون ويندوى زياته کړه: د راى پاڼو د راټولو او د تقلبي راى پاڼو د باطلولو بهير به په علني ډولت پرمخ بوتلل شي.
د انتخاباتو د خپلواک کميسيون د مسوولينو دڅرګندونو له مخې: دملګرو ملتو د سازمان دکتوونکو له خوا د راى پاڼو د شميرنې د خاصې پلټنې بهير به شپږ ورځې دوام وکړي.

کابل – باختر د زمري دمياشتې ٢٦
دپاکستاني پوځيانو له خوا تېره شپه ١٢٦ توغندي د کونړ ولايت په ځينو سيمو وتوغول شول .
دکونړ ولايت امنيه قوماندان جنرال عبدالحبيب سيدخيل د باختر آژانس خبريال ته وويل: دغه توغول شوي توغندي د کونړ ولايت د دانګام، شيګل او د مرورې د ولسواليو په اړونده سيمو لګيدلي دي .
ده زياته کړه چې شپږ توغندي د دانګام ولسوالۍ په خارا او ډنډه کليوکې لګيدلي دي چې له امله يې د استوګنې څو کورونه ويجاړ شوي، خو د سر زيان يې نه دى اړولى. دغه راز د يوه ځنګله په يوه برخه کې اورلګيدلى دى .
له نږدې څلوروکلونو راپه دې خوا د پاکستاني پوځيانو له خوا د افغانستان په ختيځو سيمو راکټي بريدونه دوام لري چې په بهيرکې يې په زرګونو توغندي د ډيورنډ له کرښې اخوا څخه توغول شوي دي .
ويل کيږي: په دغو بريدونوکې څه دپاسه سلو تنو ته مرګ ژوبله اوښتې ده او نږدې يو زرو پنځه سوه کورنۍ له خپلو کورونو څخه وتلو ته اړې شوې دي.

کابل – باختر د زمري دمياشتې ٢٦
دکونړ ولايت د ناړۍ ولسوالۍ دولتي مسوولين او قومي مشران وايي چې د وسله والو طالبانو له شتون څخه د سيمو د پاکولو په مقصد يې د هغوى پرخلاف وګړنى پاڅون پيل کړى دى.
دغه پاڅون کوونکي وايي: تر هغه وخته پورې خپل پاڅون ته دوام ورکوي چې دغه سيمې د طالبانو له شتون څخه پاکې شي.
د ناړۍ ولسوالۍ يوه قومي مشرحاجي محمد ايوب د دغه پاڅون علت داسې بيان کړ: موږ د طالبانو له زور زياتى څخه په تنګ شوي يو؛ موږ ته وايي چې  تاسې د دولت ملاتړي ياست؛ د دې اجازه نه لرئ چې خپلو کليو او ځمکو ته لاړ شئ؛ تګ راتګ مه کوئ. له دې امله موږ د هغوى د زور زياتى په وړاندې پاڅون کوو.
د پاڅون دبرخه والو له حکومت څخه د پولو په اوږدوکې دسختو امنيتي تدبيرونو دنيولو غوښتنه کړې ده چې دافغانستان خاورې ته دپاکستاني طالبانو دننوتو مخه ونيول شي.
دغه راز دوى له حکومت څخه غوښتي دي چې پاڅون کوونکي په وسلو سمبال کړي چې وکولاى شي د وسله والو طالبانو په وړاندې وجنګيږي.
دکونړ والي شجاع الملک جلاله وويل: د امکان ترپولې پورې به له پاڅون کوونکو سره همکاري وکړي او هغوى چې د خپلې خاورې د ساتنې لپاره يې پاڅون کړى دى؛ يواځې نه پريږدي.
د کونړ والي وايي: وګړنى پاڅون د وسله والو طالبانو له شتون څخه د سيمو د پاکولو لپاره ګټور دى.
ده دغه راز زياته کړه: کله چې وسله وال طالبان د سيمې د خلکو ملاتړ له لاسه ورکړى؛ دې ته اړکيږي چې له سيمې څخه ووځي.

کابل – باختر د زمري دمياشتې ٢٦
شپاړلس تنه وسله وال طالبان په بدخشان ولايت کې له امنيتي ځواکونو سره په نښته کې ووژل شول.
د بدخشان ولايت سيمه ييز مقامات وايي چې يوې ډلې وسله والو طالبانو پرون سهار د دغه ولايت د وردوج ولسوالۍ د تيرګران په سيمه کې د پوليسو د ځواکونو په يوې قرارګاه بريد وکړ او د پوليسو له ځواکونو سره يې په نښتې لاس پورې کړ.
د بدخشان د والي ويندوى احمد نويد فروتن د باختر آژانس خبريال ته وويل چې په دې نښته کې ١٦ تنه وسله وال طالبان ووژل شول او يو شمېر نورهم چې دقيق شمير يې معلوم نه دى؛ ټپيان شول.
ده وويل: په  تيرو دوو ورځوکې دا دويم ځل دى چې وسله وال طالبان په دغې قرارګاه بريد کوي او امنيتي ځواکونو له سخت مقاومت سره مخامخ شوي دي.
دوه ورځې مخکې يوې ډلې وسله والوطالبانو د پوليسو په دغې قرارګاه بريد وکړ چې د پوليسو د مقاومت له امله په شاتګ ته اړ شول.
خو د ورودوج ولسوال پرون د باختر آژانس خبريال ته وويل چې وسله والو طالبانو له په شاتګ وروسته دغې قرارګاه ته څېرمه د سړک يوه برخه ويجاړه کړې او د بدخشان ولايت مرکز سره يې د دغې ولسوالۍ اړيکې شلولې دي.
د بدخشان د والي ويندوى وايي چې د دغه سړک د بيا پرانستلو لپاره زيات ځواکونه استول شوي دي او په عملي توګه کار دوام لري.

کابل – باختر د زمري دمياشتې ٢٦
افغان امنيتي ځواکونو په تيرو څلرويشتو ساعتوکې د هيواد په بېلابېلو سيموکې يو لړ چاڼيزعمليات ترسره کړل چې له امله يې ١٨ تنه وسله وال طالبان ووژل شول.
د کورنيو چارو وزارت مطبوعاتي دفتر باختر آژانس ته خبر ورکړ: دغه عمليات د افغان امنيتي ځواکونو له خوا د کونړ، فارياب ، سرپل، ميدان وردګو ، لوګر ، پکتيکا او دپکتيا د ولايتونو په مربوطاتوکې ترسره شول چې له امله يې ١٨ تنه وسله وال طالبان ووژل شول او ٢٠ تنه نور ټپيان شول او د دښمن يوه اندازه سپک او درانده جنګي وسايل هم د امنيتي ځواکونو لاس ته ورغلي دي.
دغه راز دملي پوليسو ځواکونو د قندهار ولايت په مربوطاتو کې دوه ماينونه کشف او شنډ کړل.

کابل – باختر د زمري دمياشتې ٢٦
درې تنه وسله وال مخالفين نن په سرپل ولايت کې د سولې له بهير سره يوځاى شول.
دسرپل ولايت دملي امنيت د رياست يوه خبرځاى د باختر آژانس خبريال ته وويل: دغه کسان چې پخوا د سرپل ښار په مربوطاتوکې په ورانکارو فعاليتونو بوخت وو؛ اوس د ملي روغې جوړې د تګلارې په رښتينولى په پوهيدو سره د سولې له بهير سره يوځاى شول.
يوه اړونده خبرځاى وويل: دغوکسانو خپلې وسلې چې يو کلاشينکوف، يوه پپشه ، يو کربين او يوځانمرګى واسکټ پکې دي؛ هم دولت ته وسپارلې.
له دولت سره يوځاى شوي کسان د القاعده په شبکې پورې اړوند د غضنفر د ډلې غړي وو چې اوس له دولت سره يوځاى شول.

کابل_باختر د زمري د مياشتې ٢٦مه:
د افغانستان د اسلامي جمهوریت جمهور رئيس حامد کرزي په بادغیس ولایت کې په یوه ترافيکي پېښه کې د یوشمېر هېوادوالو پر مرګ ژوبلې خواشيني څرګنده کړه.
په هغې مطبوعاتي اعلاميه کې چې په دې اړوند د جمهوري رياست د مطبوعاتي دفترله لارې باخترآژانس ته رسيدلې ده؛ ويل شوي دي:
د بادغیس د ولایت د مقام د معلوماتو له مخې: پرون مازدیګر د بادغيس د آب کمري ولسوالۍ په چهارسنګي کلي کې د یوې ترافيکي پېښې له کبله د مېرمنو او ماشومانو په ګډون ۳۴ کسان مړه شوي او ۱۲ تنه نور ټپیان شوي دي.
جمهور رئيس حامد کرزی په دغې ترافيکي پېښه کې پررامنځته شوې مرګ ژوبلې په ژوره توګه خواشينی شوی او د چارو ادارې ته يې لارښوونه کړې چې له سیمه ييزو چارواکو سره په همکارۍ کې د قربانیانو له کورنيو او ټپيانو سره لازمې عاجلې مرستې وکړي.
جمهور رئيس کرزي د دغې پېښې د قربانیانو کورنيو ته د خپلې ژورې خواخوږۍ او ډاډګيرنې مراتب وړاندې کوي او د لوی خدای (ج) له دربار څخه هغوی ته د جميل صبر او ټپيانو ته د سملاسي روغتیا هيله کوي.#

کابل_باختر د زمري دمياشتې ٢٦مه:
د افغانستان د خپلواکۍ د کاليزې په مناسبت د افغانستان جمهور رئيس ته د بارک اوباما پیغام
د افغانستان د خپلواکۍ د ۹۵ کاليزې د را رسېدو په مناسبت د افغانستان جمهور رئيس حامد کرزي ته د امریکا د جمهور رئيس بارک اوباما له لوري د مبارکۍ پیغام په لاندې ډول رارسېدلی دی:
جلالتمآب جمهور رئيس!
د امریکا د متحده ایالاتو د خلکو په استازيتوب، د افغانستان د خپلواکۍ د کاليزې په مناسبت، تاسو او د افغانستان خلکو ته مبارک وایم.
په روان کال کې د ښځو او نارینه وو په ګډون په میلیونونو افغانانو د جمهوري ریاست په تاریخي انتخاباتو کې په ګډون سره يې د یوه سوله ییز او ديموکراتيک افغانستان لپاره خپله اراده تمثيل کړه. د امریکا متحده ایالات د انتخاباتو د بهير پایلو ته سترګې په لاره ده او د افغانستان له راتلونکي جمهور رئيس سره د همکارۍ لپاره چمتو والي لري. د امریکا متحده ایالات به په راتلوونکو کلونو کې د افغانستان له خلکو سره د هېواد په جوړولو کې د هغوی ملاتړ ته دوام ورکړي.
د امریکا د متحده ایالاتو جمهور رئيس د ليک په پای کې، خپلې نېکې هيلې جمهور رئيس او د افغانستان خلکو ته وړاندې کړي او د افغانستان خلکو ته يې د یوې خوندي او سوله ییزې راتلونکې هيله کړې ده.#