23 October 2019

RSS Facebook

سوداگریز


تازه خبرونه

مطبوعاتي اعلامیه

کابل/دتلې۳۰مه/باختر د کاناډا د لومړي وزیر په توګه د جسټن تروډو...

په کونړکې د انسان تښتوونکو له منګولو څخه د پنځه کلن ماشوم ژغورل

کابل/دتلې۳۰مه/باختر د کونړ د امنیې قوماندانۍ مسوولین وايي چې د دغه...

Youtube Player

khantry design

سوداگریز

سوداگریز

کابل باختر دمرغومي شپاړلسمه :
د تنکيو ځوانانو دجام دفوټبال سيالۍ نن په هرات ولايت کې په شپږو لوبو سره دوام مومي.
دهرات ولايت د ورزشي آمريت مرستيال ضياالحق ضيا باخترآژانس ته وويل: په دغوسياليوکې دکهسان ټيم د بيګ بير له ټيم، د پيام آسياټيم د نوابي له ټيم، دجامي ټيم د باختر له ټيم، د آريانا ټيم د هيري له ټيم او د پيروزي ټيم د پيمان له ټيم سره لوبې کوي.
دغه سيالۍ چې څه موده مخکې د تنکيو ځوانانو د ديرشو ټيمونوترمنځ په هرات ولايت کې پيل شوې ؛ په دوام يې پرون د آزادي، خراسان، اتفاق، پامير او داستقلال  ټيمونه پرخپلو سيالانوبريالي شول.

کابل باختر دمرغومي شپاړلسمه :
په هلمند ولايت کې پرون مازيګر د يوه توغندي د لګيدو له امله پنځه تنه ملکي وګړي ووژل شول.
د هلمند د والي ويندوى عمر ځواک باخترآژانس ته وويل: دغه پيښه د ګرشک ولسوالۍ دکمبرک په سيمه کې هغه وخت وشوه چې د طالبانو له خوا توغول شوي  توغندي په يوه سراچه ډوله موټر ولګيد.
ځواک وويل: په دې پيښه کې د دوو ښځو او دريو تنو نارينه وپه ګډون پنځه تنه ملکي وګړي  چې د سنګين ولسوالۍ اوسيدونکي وو؛ ووژل شول.

کابل باختر دمرغومي شپاړلسمه :
د هرات ولايت په شينډنډ ولسوالۍ کې پرون په واټ کې د ښخ کړى شوي ماين دچاودنې له امله دملي اردو دوه سرتيري شهيدان او درې تنه نورسرتيري ټپيان شول.
د شينډنډ ولسوال عبدالحميد نور باخترآژانس ته وويل: دغه پيښه هغه وخت رامنځته شوه چې د ملي اردو د سرتيرو د سپرلۍ  موتر د شينډنډ ولسوالۍ د خواجه نوح  په سيمه کې په واټ کې په يوښخ کړى شوي ماين وخوت.
د شينډنډ ولسوال وويل: په دې پيښه کې د ملي اردو دوه سرتيري شهيدان شول او درې تنه نور سرتيري ټپيان شول .
  دخبرځاى دڅرګندونو له مخې: د پيښې ټپيان په ډيرلنډ ممکن وخت کې دامنيتي ځواکونو له خوا د هرات حوزوي روغتون ته وليږدول شول او د روغتون مسوولينو د دوو تنو ټپيانو روغتيايي حالت خراب بللى دى.

کابل باختر دمرغومي شپاړلسمه :
يو سړي له پنځلسوکيلوګرامه چاويدونکو توکو سره پرون مازيګر د امنيتي ځواکونو له خوا په کونړ ولايت کې ونيول شو.
د٢٠١ سيلاب  قول اردو د دويمې لوا ويندوى هارون يوسفزي باخترآژانس ته وويل: دغه سړي چې پنځلس کيلوګرامه چاوديدونکي توکي او اړونده وسايل يې په يوکرولا ډوله موټر کې ځاى پرځاى کړي او غوښتل يې هغه دکونړ ولايت له اسمار ولسوالۍ څخه دناړې ولسوالۍ ته وليږدوي؛ له چاوديدونکو توکو سره د امنيتي ځواکونو له خوا ونيول شو.

بيجينګ باختر دمرغومي شپاړلسمه :
دچين دولتي رسنيو خبرورکړچې ددغه هيواد دشمال لويديځ  په يوجومات کې دګڼې ګوڼې له امله څوارلس تنه ووژل شول اولس تنه نور ټپيان شول.
دباخترآژانس دخبرله مخې: دغه پيښه پرون مازيګرهغه وخت رامنځته شوه چې خلک د يومذهبي دود په مناسبت په دې جومات کې راټول شوي وو چې دوديز خواړه په خلکو وويشي.
دپيښې له ساحې څخه ټلويزيوني تصويرونو دقربانيانو جامې او بوټان وښودل چې ټوټه ټوټه پرځمکه پراته و.
د چين خبري آژانس سينهوا وويل چې د پيښې ټپيان روغتون ته ليږدول شوي دي او ددغې پيښې د څلورو تنو روغتيايي حالت خراب بلل شوى دى.
دغه پيښه په هغه سيمه کې رامنځته شوې ده چې د( اوي ) اقليت د استوګنې ځاى دى او زياتره وګړي يې مسلمانان دي.

کابل باختر دمرغومي شپاړلسمه:
د افغانستان د اسلامي جمهوريت دجمهور رييس حامدکرزي د خواشينۍ او ډاډګيرنې پيغام!
په ډيرې خواشينۍ سره خبر شوم چې د افغانستان د معارف پخوانى خدمتګار  حفيظ الله سمسور او زوى يې رحمت الله سمسور په يوه حادثه کې له دې فاني نړۍ څخه سترګې پټې کړې دي.
انالله و اناليه راجعون.
ارواښادحفيظ الله سمسور ډيرکلونه د افغانستان په معارف کې په کاربوخت و. دهيواد د معارف دترقۍ لپاره يې ډير خدمات کړي دي. له دې سربېره ارواښاد سمسور شاعر او ليکوال هم و. د ده مړينه يوه ضايعه ده.
دخپلې خواخوږۍ او ډاډګيرنې مراتب د ده کورنۍ، دوستانو او د قندهار ولايت خلکو ته وړاندې کوم. الله تعالى دې دى وبخښي اوکورنۍ ته دې يې جميل صبر په نصيب شي.

کابل باختر دمرغومي شپاړلسمه :
  دکرنې او اوبو لګولو وزارت هوډ لري چې څلورسوه ټولګټې کرنيزې پروژې دکابل  ولايت په کچه په راتلونکى لمريز کال کې تطبيقې کړي.
داپه داسې حال کې ده چې دکابل ولايت د ولسواليو مالداران او کروندګر دکرنې په برخه کې دلومړنيو امکاناتو د نشتوالي خبرې کوي.
د باخترآژانس دخبر له مخې: دکابل ولايت دکرنې او اوبو لګولو رييس حشمت الله عنايت د دغوپروژو د داوطلبى د اعلان په وخت کې وويل: په دغو پروژوکې د اوبو دکوچنيو اومنځنيو بندونو او د فصلي کرنيزو محصولاتو د ساتنې لپاره د سړو خونو جوړول، دکرنې په نويو چلندونو سره د بزګرانو په معرفي کولو سره د هغوى روزنه، دڅارويو دحلالولو دځايونو جوړول او دکرنې د اصلاح شويونباتي تخمونواو دحيواني اونباتي ضد آفتونو د درملو په واک کې ورکول شامل دي چې د تطبيقولو لګښت يې نږدې يو ديرش اعشاريه نولس مليارده ډالره اټکل شوى دى چې دکرنې او اوبو لګولو وزارت له بودجې څخه به تمويل شي.
دحشمت الله عنايت دڅرګندونو له مخې: دغه پروژې د کابل ولايت په څوارلسو ولسواليو کې عملي کيږي چې دکرنيزو او د حيواني محصولاتو د زياتوالى په خاطر به اغيزمنې وي.
دکابل ولايت د هغو ولايتونو له جملې څخه دى چې د هغه د ولسواليو په سلوکې نږدې نوي اوسيدونکي  يې په کرکيلې اوبڼوالي بوخت دي.
دکابل ولايت بزګران په داسې حال کې چې دکرنې او اوبو لګولو وزارت ددغه اقدام  هرکلي کوي؛ هيله لري چې د دغو پروژو په تطبيق سره د بڼوالي اوکرکيلې په برخه کې ستر  بدلونونه د دوى په برخه شي.
بزګران او هغه کسان چې په کرکيلې بوخت دي؛ په خپلو اړوندو سيموکې د کرکيلې د ميکانيزکيدو غوښتوونکي دي اوغواړي چې دولت دکوچنيو  پورونو په ورکړې سره په دې لاره کې له دوى سره مرسته وکړي او دکرنې او اوبو لګولو وزارت  مسوولين وايي چې ددغو پروژوپه تطبيق سره دکابل او د هيواد په نورو ځايونوکې په خوراکي مصوونيت برلاسي شي او دکرنيزې اقتصاد د پياوړتيا له لارې خپلو خلکو ته دکار زمينه برابره کړو.
د يادونې وړ ده چې افغانستان يوکرنيز هيواد دى او په کرنې متکي اقتصاد لري. څومره چې کرکيلې ته پاملرنه وشي؛ په هماغه اندازه د هيواد اقتصادي حالت ښه والي مومي.

کابل باختر دمرغومي شپاړلسمه :
د سرپل ولايت پوليسوپرون يو وسله وال طالب چې د ملي اردو د لسو تنو عسکرو د وژلو تور پرې لګول شوى دى؛ ونيوه.
دکورنيوچارو وزارت مطبوعاتي دفتر باخترآژانس ته خبر ورکړ: د سرپل ولايت دکوهستاناتو ولسوالۍ د ده يک دکلي اوسيدونکى غفارچې دملي اردو دلسو تنو منسوبينو د شهادت تور پرې لګول شوى؛دى پرون د سرپل ولايت د سوزمه قلعه ولسوالۍ کې دپوليسو له خوا ونيول شو.
په دغه سړي سربېره پر دې چې د ملي اردو د لسو تنومنسوبئنو د شهادت تور لګول شوى دى؛ د سرپل ولايت په مربوطاتوکې هم د ترورريستي بريدونو، په واټ کې د ماينونو په ښخولو تورن دى او د مولوي شاکرپه ډلې پورې اړه لري. د سرپل  د پوليسومسوولينو د غفارنيول کيدل په سوزمه قلعه ولسوالۍ کې د ثبات د اعاده کولو لپاره اغيزمن بللى دى.

اسلام ابادباختر دمرغومي شپاړلسمه :
د سعودي عربستان د بهرنيو چارو وزيرسعود الفيصل به نن اسلام آباد ته ورسيږي او دپاکستان له صدراعظم او جمهور رييس سره به وګوري.
دپاکستان دخبري منابعو دخبر له مخې: الفيصل به د دوه اړخيزو اړيکو په باب په خبرو سربېره له پاکستاني مقاماتو سره د افغانستان د مسئلو  او د ٢٠١٤ ميلادي کال په پاى کې د نړيوالو پوځيانو له وتلو وروسته د دغه هيواد د حالت په باب هم خبرې وکړي.
پاکستان ته د سعودي عربستان د بهرنيو چارو د وزير دغه سفر په داسې حال کې کيږي چې د افغانستان د سولې دعالي شورا يو هيئت تيره اوونۍ عربستان ته تللى و .
ددغه سفر په بهيرکې د افغانستان د سولې د عالي شورا هئيت د اسلامي هيوادونو د همکاريو د سازمان له مقاماتو سره هم د افغانستان د سولې د هڅو په باب خبرې کړې دي.
سعودي عربستان تراوسه پورې په عملي توګه په افغانستان کې له وسله والو مخالفينو سره د سولې د خبرو لپاره په هڅوکې نه دى ښکيل شوى.

Monday, 06 January 2014 10:17

تبصره :

کابل باختر دمرغومي دمياشتې ١٦ :
په يوه هيوادکې دقانوني موازينو پيروي او رعايتول د دموکراسۍ د ټينګښت او دملي ارزښتونو او د وګړني ارادې دمنلو نښه نښانه ده .
دباختراژانس  مبصر ليکي  :
په افغانستان کې دمرغومي دمياشتې له څوارلسمې نيټې څخه تر يوويشتمې نيټې پورې د اساسي قانون د نمانځنې د اوونۍ  په توګه  بلل کيږي.
ټيک لس کاله مخکې په همدغو  ورځوکې د افغانستان د ملت استازي په يوه
دوديزه لويه جرګه کې راټول شول او د هيواد اساسي قانون يې ديوې ملي وثيقې 
په توګه تصويب کړ او دهغه د رعايتولو په نسبت يې ژمنه وکړه.
د افغانستان اساسي قانون د اسلامي حکمونو ، د انساني  کرامت  د ارزښتونو، مدني حقوقو، ملي روغې جوړې، د بشر د حقوقو د نړيوالې اعلاميې، د نړيوالو حقوقو د منل شويو موازينو او د افغانستان د خلکو د ارادې  پربنسټ تکيه لري.
له دې امله ددغه قانون تطبيق او په ټولنې کې د هغه واکمنۍ چې  يوه اسلامي، انساني، مدني، اخلاقي او ملي صبغه لري؛ يو حتمي کار او ضرورت دى.
د اساسي قانون په تصويب سره د افغانستان خلکو ته زيات فرصتونه برابر شول چې هغوى د همدې قانون په چوکاټ کې خپله اراده تمثيل کړي.
دهمدې قانون په  رڼا کې  چې دافغانستان خلک په دې بريالي شول چې دوه ځلې  دجمهوري رياست ملي شورا او د ولايتي شوراګانو انتخابات ترسره کړي او د همدې ملي وثيقې په چوکاټ کې له بهرنيو هيوادونوسره خپلې اړيکې ټينګې کړې او زياتره نورکارونه.
په افغانستان کې د اساسي قانون د بشپړ او هميشنۍ تحقق په نسبت جدي ژمنه شته چې بيلګه يې دجمهوري رياست د راتلوونکو انتخاباتو د پروګرامونوجوړول دي چې له يوې خوا د خلکو د ارادې درناوى وشي او له بله پلوه په هيوادکې نوې دموکراسي پياوړتيا ومومي او د اساسي قانون د حکمونو او موازينو رعايتول په هيوادکې د يو دود په توګه  ټينګ او پياوړي پاتې شي. ځکه ملي دولتونه د هغو قوانينو او د ستورالعملونو په رڼاکې چې د خلکو د ارادې څرګندوى دي؛ خپلې چارې پرمخ بيايي.
افغان دولتي چارواکي په دې باور دي چې دهغو حقوقي موازينو پيروي او رعايتول چې د افغانستان  په اساسي قانون کې ليکل شوي دي؛ د دموکراسۍ دټينګښت او دملي ارزښتونو د ساتنې نښه نښانه ده او دوى ددغو ارزښتونو د ساتنې او د دموکراسۍ د پياوړتيا په نسبټ ژمن دي.  په داسې حال کې چې د قانون په وړاندې بې پروايي به د قانونمند ژوندانه معيارونه کم کړي.
د نظام مشروعيت او خلکو د ارادې  تمثيل به تر پوښتنې لاندې ونيسي او د دموکراسۍ د پياوړتيا او ټينګښت مفکوره به بې ارزښته کړي.
له دغو ټولو هلوځلو سره سره لاتراوسه پورې هم په افغانستان کې د قانون تحقق له خنډونو سره مخامخ دى چې بېلابېل عوامل لري او دغو عواملوله قانون څخه سرغړونې او يا له قانون څخه د تيښتې زمينه برابره کړې ده. دلته د اساسي قانون پر تطبيق باندې د څارنې د خپلواک کميسيون، د هيواد د مشرتابه د مقاماتو، دعدلي او قضايي بنسټ، نو د مسوولينو اوپه پاى کې د دولت د اجرائيوي بنسټونو رول متبارز دى چې دوى له هر امکان څخه استفاده وکړي چې په هيواد کې د قانون د تطبيق زمينه پراختياومومي.
د قانون د بشپړ او هميشني تطبيق يوه لاره د هغه په عملي کولوکې جديت دى. په داسې حال کې چې نن يو زيات شمېر خلک د قانون د نه تطبيق له پلوه سرټکوي  چې په هيوادکې د اداري فساد د پراختيا لپاره يې زمينه برابره کړې ده.
د چارومسوولين بايد په هيوادکې د قوانينو د عملي تحقق اړخونه ولټوي او په هيوادکې قانون ته غاړې ايښودل په يو فرهنګ بدل کړي.