17 February 2019

RSS Facebook

سوداگریز


Youtube Player

khantry design

سوداگریز

سوداگریز

کابل باختر دکب لسمه
دافغانستان داسلامي جمهوريت ستر وزيرهدايت امين ارسلا پرون وروسته  داستراليا له نوى سفير جان فليپ  سره  دپيژندګلوۍ کتنه وکړه .
دباختراژانس دخبر له مخې، په دې کتنه کې  دافغانستان داسلامي جمهوريت ستر وزير  وويل چې دافغانستان دولت او خلک په وروستى لسيزه  کې داستراليا دمرستو له امله قدردانى کوي او هيله لري چې دغه مرستې له ٢٠١٤کال وروسته هم دوام وکړي .
  وروسته دغه سفير په افغانستان کې د دندې له امله خوښي څرګنده کړه او وي ويل چې هلې ځلې به وکړي چې دافغانستان له حکومت  سره   په هلوځلو کې دافغانستان دخلکو دثبات او سوکالۍ لپار ه زياتې همکارى وکړي .
دغه راز دواړو لورو په ارزګان ولايت کې له استراليايي ځواکونو څخه افغان ځواکونو ته دامنيتي مسووليتونو دسپارلو او له  ٢٠١٤ کال وروسته دملي پوليسود ښوونې او روزنې په برخه کې دهمکاريو ددوام ، دهغو ژمنو په باب چې دتوکيو په کنفرانس کې دافغانستان او نړيوالې ټولنې ترمنځ شوې وه دراتلونکو انتخاباتوښې حکومتوالى  او داقتصادي او ټولنيز ودې دپلانونو په باب خبرې وکړې .
 

کابل\  باختردکب  دمياشتې  ٩ :
د اطلاعاتو اوفرهنګ وزير ډاکترسيدمخدوم رهين وايي: د رسنيو په خپرونوکې د هيواد د رسمي ژبو د معياري کولو په مقصد، د اطلاعاتو اوفرهنګ وزارت د افغانستان د علومو اکاډمى، د لوړو  زده کړو او د پوهنې د وزارتونو د استازو او دپوهنتون د استادانو په ترکيب، دوه کمييسونونه جوړې کړي دي .
د باختر آژانس دخبريال دخبرله مخې: د اطلاعاتو اوفرهنګ وزير ډاکترسيدمخدوم رهين چې د خبريالى د يوکورس په شاملانو د فراغت د سندونو د ويشلو په  مراسمو کې خبرې کولې؛ وويل: د پرديو او د نامانوسو کليمو کارول، د رسنيو په کارکې دګډوډى سبب شوى دى او دغه موضوغ دوزيرانو شورا په غونډه کې وڅيړل شوه اولازم تصميمونه ونيول وشول .
داکتر سيدمخدوم رهين په دې ترڅ کې د هغو دوه ديرشو تنو  ژورنالستانو د فراغت له امله چې د خبريالى دکارپه بېلابېلو برخوکې زده کړې  کړې دي؛  مبارکي وويله او د افغانستان د ژورناليستانو له شورا څخه يې چې دغه پروګرام يې جوړ کړى  دى؛ منه وکړه.
ده له فارغانو څخه  وغوښتل چې د خبريالى اخلاق رعايت کړي او د بيان  د آزادى ساتنې او پراختياته پاملرنه وکړي او د ځوانانو ترمنح د مطالعې دفرهنګ د ودې او پراخ بنسټه کولو په مقصد،کار وکړي .
 

کابل\  باختردکب  دمياشتې  ٩ :
دجمهوري رياست لومړي مرستيال مارشال محمدقسيم فهيم نن  له غرمې وروسته په کابل کې د پولند جمهوريت له سفير پيترلوکاسيويچ  سره وکتل او په اقتصادي اوفرهنګي برخوکې دافغانستان اوپولند د همکاريو او له افغانستان سره د پولند دملاتړ د دوام په باب يې خبرې وکړې.
دجمهوري رياست مطبوعاتي دفتر باخترآژانس ته خبرورکړ: د جمهوري رياست لومړي مرستيال په دې کتنه کې له افغانستان سره د نړيوالې ټولنې دهمکاريو اړتيا ته اشاره وکړه او زياته يې کړه چې د تيريدو په پړاوکې د نړۍ د هيوادونو همکاري  تيرو وختونو ته دافغانستان د ستنيدو مخه نيسي .
د جمهوري رياست لومړي مرستيال زياته کړه چې پولند په افغانستان کې د نوى نظام دجوړولو په کلونو کې له موږ سره په اقتصادي ، فرهنګي اوپوځي برخو کې مرسته کړې ده اوهيله لرم چې دغه بهير دغه راز دوام  وکړي.
دجمهوري رياست لومړي مرستيال دغه راز وويل چې په افغانستان کې د امنيتي  چارو سمون په تېره بياله ٢٠١٤ کال وروسته، موږ سمبالو او روزل شويو امنيتي ځواکونو لرلو ته اړباسي چې په مسلمه توګه نړيواله ټولنه له دې جملې  څخه دوست هيواد په دې برخه کې په ژمنوعمل کوي .
په کابل کې دپولند جمهوريت سفير پيتر لوکاسيويچ هم په دې کتنه کې هيله وکړه   چې دافغانستان خلک وکولاى شي په خپل هيوادکې مطلوبې سولې اوثبات ته ورسيږ ي.
ده وويل چې هيواد يې دافغانستان دخلکو ترڅنګ پاتې کيږي او د هغه دپرمختګ  اوسوکالي لپاره همکاري کوي .
ده د سړک جوړولو  او دکانونو دپلټنې او را ايستلو په برخوکې دپانګې اچونې لپاره  دخپل هيوادجدي علاقمندي څرگنده کړه او ويې ويل چې هيله لري چې د افغانستان په بنسټيزو پروژوکې په مشارکت سره په افغانستان کې د پولند د ونډې کچه لوړه کړي .
 

Wednesday, 27 February 2013 09:00

خبــــــــــــــرتيا

کابل\  باختردکب  دمياشتې  ٩ :
خبــــــــــــــرتيا
د الکترونيکي تذکرو د ويشلو اداره د برقي تذکرې د ويشلو دنوم ليکنې د ټيمونو
کانديدانو ته چې د مرکې پړاو ته يې لاره نه ده موندلي؛ خبر ورکول کيږي، که  چيرې شکايت يا اعتراض ولري؛ د ١٣٩١ کال  دکب  د مياشتې تر دولسمې نيټې پورې دې خپل شکايتونه  دکورنيو چارو وزارت دبشري منابعو رياست ته وړاندې کړي. له دغې نيټې وروسته هيڅ راز شکايت د منلو وړ نه دى .
 

کابل\  باختردکب  دمياشتې  ٩ :
څوشيبې مخکې په ننګرهار ولايت کې چاودنه وشوه.
دغه پيښه چې ويل کيږي د يوځانمرګى بريد زيږنده ده؛ نن مازيګر په څلورنيمو بجو دجلال آباد _ تورخم د لوى لارى په  تګلورې  د مارکو په سيمه کې وشوه.
په نه تائيد شويو خبرونو کې ويل شوي دي چې په دغه بريدکې دپاکستان دلښکر اسلام د مرستيال امين شاه په ګډون، څوتنه  وژل شوي دي .
امين شاه په دې وروستيو وختوکې په افغانستان کې دخبرو ميز ته دطالبانو د راوستلو لپاره زياتې هلې ځلې کړې دي .
ده په خپلو وروستيو خبروکې په افغانستان کې د سولې او آرامى د تامينولو لپاره خپله هيله څرگنده کړې وه.
دباختر آژانس دخبريال دپيښې له سيمې خڅه وايي چې اوس امنيتي مامورينو د جلال آباد _ تورخم لويه لاره دترافيکو پرمخ تړلې ده او د ژغورنې ټيمونه روغتون ته د دغې پيښې د مړو اوټپيانو په  ليږدولو بوخت دي.
تراوسه پورې سيمه ييزو مقاماتو په دې باب نظر نه دى څرگندکړى.
ددغې پيښې جزئيات وروسته خپريږي.
 

Wednesday, 27 February 2013 08:42

تبصره:

کابل\  باختردکب  دمياشتې  ٩ :
په ايران کې د افغانانو د اعدامونو دوام، نه يواځې د ايران د اسلامي جمهوريت په نسبت د افغانانو باور او اعتماد کموي؛ بلکې په اوږدمهال کې د دواړو هيوادونو په اړيکوکې  سيورى اچوي .
د باخترآژانس  مبصر ليکي :
افغانان په ايران کې د خپلو هيوادوالو د اعدامونو په دوام پورې اړوند خبرونه له  انديښنې سره تعقيبوي .
ددغو اعدامونو په وروستي موردکې د تخار د پنځو تنو اوسيدونکو مړي دغه ولايت ته وليږدول شول او د دوى په پلرنې اديره کې خاورو ته وسپارل شول. په ښکاره ددغو کسانو جرم چې تنګي ځوانان وو، د نشه يي توکو قاچاق بلل شوي دي.
دغه اعدامونه په داسې حال کې کيږي چې داسې ادعاګانې شته  چې په ايران کې يو زيات شمېر بندي افغانان دنشه يي توکو دقاچاقو او يا د نورو جنايي جرمونو په تور اعدام شوي دي او د صادرشوى حکم عملي کيدو ته سترګې په لاره دي .
د افغانستان خلک په هغه درناوى سره چې د ايران داسلامي جمهوريت قوانينو ته يې لري؛ په  جدي توګه غواړي چې ددغه ورور هيواد خلک په آرامه اوله ستونزو خلاصه فضا کې ژوند وکړي؛ په دې ټکى ټينګارکوي چې افغانستان او ايران ددوو هيوادونو په توګه چې ګډه ژبه، فرهنګ او تاريخ لري او د يوبل په خوشحالى اومصيبت پوهيږي، بايد داسې تګلورې غوره کړي چې مشترکات پياوړي شي او دمتقابلې همکارى اومرستې فضا زياته پراختيا ومومي او په يوه ګام کې دواړه د سوله ييز ګډ ژوندانه اصل ته په درناوى سره ژوند وکړي.
افغانان په جدي توګه په دي عقيده دي چې مجرم اوجنايتکار بايد دتړلتيا اوسليقو په پام کې نيولو پرته دخپلو عملونو سزا و ويني او نشو کولاى هغه افغانان چې په ايران کې قانون ترپښولاندې کوي او د جرم سبب کيږي؛ جلا وبولو.
افغانان په دې ترڅ کې چې په خپل هيواد او په نورو هيوادونوکې د مجرمينو او تورنوکسانو د حالت په نسبت په حقوقي څيړنې ټينګار کوي؛ دا کار په ډاګه  بيانوي چې بايد دهغو افغانانو په نسبت  چلند چې تورن اومجرم بلل کيږي؛  شفاف، څرگند او قانونمند وي .
له بده مرغه  دغه اصل  چې د نړۍ په ټولو هيوادونو کې منل شوى دى په ايران کې دافغانانو په نسبت کم رعايت شوى دى. په ايران کې دافغانانو محاکمه د ايران  او د نړۍ له  حقوقي معيارونو څخه لرې اجرا شوې ده. په ايران کې بندي افغانان ډير کم په مدافع وکيل اوپه نورو حقوقي امکاناتو برلاسي لري .
د بندي افغانانو لپاره حکم زياتره په خصوصي ډول د رسنيو ، د بنديانو دکورنيو ، مدافع وکيل او دافغانستان د سياسي نماينده ګانو له شتون پرته صادر شوى دى اوپه همدې ډول اجرا شوى دى .
افغانستان د ايران د يو ګاونډى هيواد او د ملګروملتو د سازمان د غړى په توګه د دې حق لري چې  په ايران او د نړۍ په نورو هيوادونو کې دخپل يو تبعه دبندي کيدو په څرنګوالې خبرشي. دهغه د محاکمې بهير تعقيب کړي اوپه پاى کې دهغه د حقوقو دفاع وکړي .
له بده مرغه په زياترو هغو پيـښوکې چې افغانان په ايران کې ورسره مخامخ کيږي؛ د افغانستان سياسي نمايندګۍ نه خبريږي .
دغه راز ايران په داسې حال کې په دغه هيوادکې د افغانانو اعدام ته دوام ورکوي  چې د دواړو هيوادونو ترمنځ دمجرمينو دسپارلو سند موجود دى.
دغه راز ايراني دوستان افغانانو ته په عمري بند د اعدام  د حکم د تعديل په اړوند يولړ ژمنې لري چې بايد هغه رعايت کړي.
له بلې خوا، افغانستان په خپله د نشه يي توکو د قاچاقو په اړوند څرگند اوجدي قوانين  لري. که چيرې ايرانيان افغانستان  ته دنشه يي توکو دقاچاقو دمجرمينو په استرداد اقدام وکړي؛ ډاډمن  و اوسئ چې د هغوى په نسبت به بې پروايي ونه شي .
د افغانستان خلک په داسې حال کې چې په ايران کې دافغانانو د اعدام دوام په انديښنې سره تعقيبوي؛ په دې کار هيله لري چې ددغه بحران په  پاى ته رسولوکې دافغانستان د دولت ډيپلوماتيکي هلې ځلې  اغيزمنې وي.
په دې وروستيو وختو کې دافغانستان داسلامي جمهوريت  دوزيرانو شورا په ايران کې دافغانانو د اعدام مسئله وڅيړله ا ودبهرنيو  چارو وزارت اودملي امنيت شورا ته يې دنده سپارلې ده چې له ايراني لورې سره اړيکې ونيسي او دغه ستونزه حل کړي.
دغه راز دبهرنيو چارو وزارت غواړي چې په ايران کې افغان بنديانو ته دموافقو وکيلانو په استخدام کې مخکښ و اوسي. هيله ده چې دغه هلې ځلې محوسسې نتيجې ولري اوپه ايران کې د بندي افغانانو ستونزې د دواړو مسلمانو  هيوادونو ترمنځ دخبرو اوتفاهم له لارې حل شي چې د دواړو هيوادونو دخلکو ترمنځ د باور د اعتماد فضا چې د دوى  ګډې اوارزښتناکې وياړنې دي ؛ پراختيا ومومي .
 

کابل\  باختردکب  دمياشتې  ٩ :
د اطلاعاتو اوفرهنګ د وزير ډاکتر سيدمخدوم رهين په مشرۍ د نوروز د ملي جشن د جوړولوکميسيون نن غونډه وکړه .
د باختر آژانس د خبريال دخبرله مخې: دغه غونډه دبهرنيو د چارو، دکورنيو د چارو، دکرنې او اوبولګولو ، عامې روغتيا، د ښځو د چارو، انرژي او اوبو ، ترانسپورت او هوايي چلند، ماليې او د سوداګرۍ اوصنايعو د وزارتونو، د ملي امنيت د لوى رياست، د جپګوړو دولتي چارواکو، د امنيت دمحافظت  د رياست ، د افغاني سرې مياشتې دټولنې اودکابل ښار دکسبګرو د اتحاديې د استازو په ګډون جوړه شوه او د نوروز دملي جشن  په نمانځلو کې د ونډې اخيستنې په خاطر  د دغو ارګانونو د تيارى په اړوند خبرې وشوې.
ددغې غونډې په پيل کې اطلاعاتو او فرهنګ وزير ډاکترسيدمخدوم رهين دنوروز دملي جشن دنمانځلو د څرنګوالى په اړوند معلومات ورکړل او ويې ويل : هيله لرو يوځل بيا د نوروکلونو په شان نوروز په هغه عزت او حرمت سره  چې ورته په کار دى؛ ونمانځو او په دې جشن کې مو له تياتر، موسيقي او ورزشي سياليو څخه د نوروز دغونډو او شعر ويلو د غونډو اونندارتونو  پورې  پروګرامونه پکې په پام کې  ولرو.
ددغې غونډې دويمې برخې، د اطلاعاتو اوفرهنګ وزارت د نشراتي معين مبارز راشدي په مشرۍ خپل کار ته دوام ورکړ او د دغو وزارتونو او ارګانونو استازو د نوروز د ملي جشن د نمانځنې په خاطر، د اړوندو مرکزونو د ونډې اخيستنې د څرنګوالې په اړوند معلومات ورکړل .
د اطلاعاتو اوفرهنګ وزارت  نشراتي معين  ټينګار وکړ چې دغه جشن بايد په  لازيات پرتم سره جوړ شي .
دغه راز پريکړه وشوه چې ددغه کميسيون بله غونډه دې د راتلوونکې اوونۍ  د يکشنبې په ورځ  جوړه شي .
 

کابل\  باخترد کب دمياشتې  ٩ :
د نوروز د لرغونې جشن د جوړولو په مراسمو کې چې سږکال په ترکمنستان کې پرځاى کيږي؛ د نورو نندارو ترڅنګ د هيواد لس تاريخي آثارهم نندارې ته وړاندې کيږي .
د لرغونې نوروزجشنواره سږکال د افغانستان، پاکستان ،تاجکستان ، قزاقستان ، ايران، ازبکستان او ترکمنستان دجمهورو رييسانو په ګډون جوړيږي.
د اطلاعاتو اوفرهنګ وزارت دملي نګارستان رييس محمد رفيق خشنود چې په دې باب يې د باخترآژانس له خبريال سره خبرې کولې؛ وويل چې په دغه جشنواره کې د استاد غلام محمدميمنه ګي د طوفان، دکابل زاړه بازارونو، دپنجشير ددرې ،دکابل دکليو ، د پل خشتي د جومات ، د سخي د زيارت ، دهرات دجام  دڅلى  او دبزکشۍ د لوبو د آثارو په ګډون، لس هنري آثار نندارې ته وړاندې کيږي .
ده زياته کړه: په دغه جشنواره کې د دې ترڅنګ چې دهيواد د هنرمندانو له خوا د افغاني موسيقي پارچې اجراکيږي؛ افغاني ډوډۍ پخيږي او مينه والو ته وړاندې کيږي .
د يادونې وړ ده چې دغه  جشنواره  تېرکال دافغانستان د مزارشريف په ښارکې
د شپږويشتو هيوادونو په ګډون جوړه شوې وه .
 

کابل\  باختردکب  دمياشتې  ٩ :
دمرکزي بانک رييس نورالله دلاوري نن اعلام وکړ چې په بانکونوکې دخلکو پيسې  خوندي دي .
دباخترآژانس دخبريال د خبرله مخې:ده چې د يوې لسيزې په بهيرکې په افغانستان کې د بانکوالۍ د سيسټم اوپه هيوادکې دهغه دلرليد ترعنوان لاندې ګردې ميز کې خبرې کولې؛ زياته کړه: دمرکزي بانک اساسي دنده دپيسو خپرول او په بازار کې دهغه کنترول دى.
دده دڅرگندونوله مخې: په دولتي اوخصوصي بانکونو پورې ټولې اړوندې مسئلې په پرله پسې توګه د څارنې د هيئت له خوا چې ددغه بانک له خوا ټاکل شوى دى؛ کنتروليږي .
ده ډاډ ورکړ چې په خصوصي بانکونو کې دخلکو پيسې خوندي دي اودخلکو پيسو ته کوم خطر متوجه نه دى .
دافغانستان د سوداګرۍ اوصنايعو د خونو دعاملې هيئت رييس محمدقربان حقجو وويل: دخصوصي  بانکوالۍ په برخه کې ستربرياليتوبونه لري.
دغه بانکوالي څلور اعشاريه پنځه مليارده ډالره پانګه لري او همدا اوس په هيواد کي څوارلس خصوصي تجارتي بانکونه فعال دي .
په پاى کې د بانکوالۍ او د افغانستان په اقتصاد دهغو د اغيزو په باب د نظر له  خاوندانو سره دکارپوهان خبرې پيل شوې
 

کابل\  باختردکب  دمياشتې  ٩ :
د شهيدانو، معلولينو کار اوټولنيزو چارو وزارت پنځه سوه سلو تنو ته دحرفوي زده کړو زمينه برابره کړه.
په همدې مقصد ددغه وزارت د وزيرې  آمنې افضلي او د روشن براى افغانستان او د افغان _ بلجيم د پيوستون د موسسو د مسوولينو ترمنځ د شپاړلسو مليونو افغانيو په ارزښت يو تړون لاسليک شو.
دباخترآژانس دخبرله مخې: د تړون د لاسليک کولو په مراسموکې چې د عامې روغتيا د وزارت معينه ناجيه طارق، له نشه يي توکو سره د مبارزې دچارو وزارت معين هارون رشيد شيرزاد او دځينو همکارو موسسو ګډون کړي و؛ د شهيدانو، معلولينوو کار اوټولنيزو  چارو وزيرې آمنې افضلي د بازار د اړتيا له مخې دکاري لازمو مهارتونو نشتوالې په هيوادکې د وزګارتيا اساسي ستونزه وبلله او ويې ويل  چې دغه وزارت د موسسو د مرستو په جلبولو سره هلې ځلې کوي چې په ټول هيواد کې دحرفوي زده کړو زمينه برابره کړي .
د ميرمن افضلي دڅرګندونوله مخې: ټاکل شوې ده، ددغو پروژو په تطبيق سره دغه موسسې درې سوه شل تنه د موټرو ، بايسکل  او موبايلو د ترميمولو او دغالۍ اوبدلو، خياطى اوګلدوزى په څانګوکې دنهو مياشتو لپاره  اودغه راز هغه کسان چې په نشه يي توکو له روږديتوب وروسته ښه شوي دي؛ په دغو څانګوکې د يوکال لپاره روزي  .
د تړون د لاسليک کولو په بهيرکې دعامې روغتيا او له نشه يي توکوسره د مبارزې د چارو  د وزارتونو معينانو  او د تطبيقوونکو موسسو مسوولينو هم د موضوع په باب خبرې وکړې او په هيوادکې د وزګارتيا دکمښت  په لاره کې د حرفوي زده کړې ارزښتناکې وبللې .