13 July 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل باختردغبرګولي دمياشتې ٢٠ :
د هوايي پوځ قوماندان وايي چې د هېواد د هوايي ځواکونوله خوا د حساسو انتخاباتي موادو د ليږدونې بهير به تر سبا پورې بشپړ شي .
د باخترآژانس دخبرله مخې: د هوايي پوځ قوماندان جنرال عبدالوهاب وردګ چې نن يې په کابل کې په يوه خبري غونډه کې خبرې  کولې؛ څرګنده کړه چې د هېواد هوايي پوځ د دويم پړاو انتخاباتو د امنيت د تامينولو لپاره چې څلور ورځې وروسته ترسره کيږي؛ بشپړتيارى لري او دغه راز ليږدونو ته هم چمتو دي .
دافغانستان دهوايي پوځ دغه جګپوړي مقام دغه راز وويل : د هېواد هوايي پوځ لکه څنګه چې د انتخاباتو په لومړى پړاو کې د حساسو موادو د اکمالاتوپه برخه کې په خپلواک ډول عمل وکړ؛ په  دويم پړاوکې هم له خپلوامکاناتوڅخه په استفادې  سره دغه بهيرتعقيب کړ او ټاکل شوې ده چې سبا د دغو پوځونوله خوا د هېواد ولايتونو ته د حساسو انتخاباتي موادو د ليږدونې پروګرام بشپړشي.
جنرال عبدالوهاب وردگ زياته کړه چې د هيواد هوايي پوځ به دانتخاباتو په ورځ دغه بهير له فضا څخه ترنظرلاندې ولري او د دغه پوځ له خوا ځانګړي امنيتي تدبيرونه نيول شوي دي.
ده زياته کړه: په اوس وخت کې د هوايي پوځ امکانات په هغې کچه کې دي چې وکولاى شي په هېوادکې بيړنيو اړتياوو ته  ځواب ووايي او زموږ پيلوټان به له  ترانسپورتي الوتکو او هليکوپټرونوڅخه په استفادې سره دليږدونو او  د انتخاباتو د امنيت د تامينولو په بهيرکې ونډه واخلي .
جنرال وردګ زياته کړه چې د آيساف او د ايتلاف ځواکونه هم همکارۍ ته چمتو دي او که چيرې اړتيا رامنځته شي؛ د سوق او ادارې د ګډې قوماندانۍ له لارې له هغوى څخه مرسته غوښتل کيږي خوپه اوس وخت کې دغه شان اړتيانه ليدل کيږي.
دغه راز په دې خبري غونډه کې دملي دفاع وزارت ويندوى جنرال محمدظاهر عظيمي وويل چې دملي اردو ځواکونه به له لومړى پړاو انتخاباتو څخه په ترلاسه شويو تجربو سره په دويم پړاو کې په زيات مسووليت سره عمل وکړي.
دعظيمي دڅرګندونوله مخې: د دويم پړاو انتخاباتو د امنيت د تامينولو په مقصد
د ملي اردو ١٩٠ زره تنه ځواکونه موظف کړاى شوي دي .
د يادونې وړ ده چې د را روانو انتخاباتو د امنيت د تامينولو لپاره به٤٠٠ زره امنيتي ځواکونه په دندو وګومارل شي.

کابل باختردغبرګولي دمياشتې ٢٠ :
لس  تنه وسله وال طالبان په  کونړ ولايت کې د بهرنيو ځواکونو دبې پيلوټه الوتکو
دبريدونو له امله ووژل شول.
په وژل شويو کسانو کې څلور تنه پاکستاني طالبان هم  شامل دي .
دکونړ و لايت امنيه قوماندان جنرال عبدالحبيب سيدخيل نن دباخترآژانس خبريال ته وويل چې لس تنه وسله وال  طالبان ددغه ولايت دخاص کونړ په ولسوالۍ کې تېره شپه دبهرنيو ځواکونو د بې پيلوټه الوتکو د بريد له امله وژل شوي دي .
وسله والوطالبانو تراوسه پورې د دغې پيښې په اړوند نظر نه دى څرګندکړى.

کابل- باختر د غبرګولى دمياشتې ٢٠
په لسګونو تنه پوليسان په دايکنډي ولايت کې د امنيت د تامينولو او د تروريزم پرخلاف د مبارزې په مقصدځاى پرځاى شول .
دغو ځوانانو چې شمېر يې ٧٥ تنو ته رسيږي؛ نوى يې د دايکنډي په پوځي اکاډمۍ کې زده کړې پاى ته رسولې دي .
د دايکنډي ولايت د امنيې قوماندانۍ ويندوى درمحمدحسن د باختر آژانس خبريال ته وويل: دغه ځوانان د دغه ولايت دپوځي برخو په واحدونوکې ځاى پرځاى شول.
د حسن دڅرګندونو له مخې: ددغوځوانانوځاى پرځاى کيدل به دامنيت په تامينولو او په خاصه توګه د انتخاباتو د ترسره کولو په ورځ مهم دي.

کابل- باختر د غبرګولى دمياشتې ٢٠
سترجنرال ارکانحرب شيرمحمدکريمي نن د په جنوب ختيځه حوزه کې ٢٠٣ قول اردو وکتله.
جنوب ختيځې حوزې ته د افغانستان د ملي اردو د لوى درستيز د سفر هدف د جمهوري رياست د دويم پړاو د انتخاباتو د ترسره کولو په مقصد د امنيتي ځواکونو ترمنځ د همغږۍ برابرول او د امنيت تامينول دي.
لوى درستيز شيرمحمدکريمي په هغې غونډه کې چې د جنوب ختيځو ولايتونو له مسوولينو، امنيه قوماندانانو، د ملي امنيت له رييسانو سره وکړه؛ له دوى څخه يې وغوښتل چې د جمهوري رياست د دويم پړاو انتخاباتو د ترسره کولو لپاره امنيتي ځواکونه به چمتوکړي او هغوى دې ته وهڅوي چې تر څو پورې په دې پروګرام کې هڅې وکړي.
کريمي په دې غونډه کې وويل: د جمهوري رياست د دويم پړاو د انتخاباتو ترسره کول او د دويم پړاو د انتخاباتو د امنيت تامينولو يې د امنيت له پلوه مهم وباله، ځکه د دولت مخالفينو او طالبان تصميم لري د دويم پړاو انتخابات ګډوډ کړي. کريمي د جمهور رييس د فرمان له مخې: امنيتي ځواکونه تر دنده وسپارله چې د انتخاباتو په بهيرکې خپله بې طرفي وساتي، په دغه بهيرکې خلکوته لارښوونه وکړي.
په دې غوڼده کې لوى درستيز په هغو شمېر امنيتي ځواکونو چې د جمهوري رياست د انتخاباتو په لومړى پړاوکې وړتيا ښودلې وه؛ سوغاتونه او ستاين ليکونه وويشل .

کابل باختردغبرګولي دمياشتې ٢٠ :
د سنامجلس د دويم نايب حاجي رفيع الله ګل افغان په مشرۍ د مشرانو جرګې په نننۍ غونډه کې  يوځل بيا د جمهوري رياست د را روانو انتخاباتو د مسئلو او د بغلان ولايت  د سيلاو ځپلو د سر د زيان  او مالي تاوان د زياتوالي دموضوعګانو په باب خبرې  وشوې.
دمشرانو جرګې  مطبوعاتي دفتر باخترآژانس ته  خبر ورکړ:
دغونډې رييس رفيع الله ګل افغان او نورو غړو د جمهوري رياست د دويم پړاو انتخاباتو د سياسي او ټولنيز ارزښت په باب چې ټاکل شوې ده د روان کال  د غبرګولي دمياشتې په ٢٤ مه نيټه  په هېوادکې ترسره شي؛ خبرې وکړې او د افغانستان دخلکو د غوڅ برياليتوب په هيله يې د رايې ورکولو دکارټونو له ټولو خاوندانوڅخه يې وغوښتل چې ددغه سياسي حرکت د برياليتوب او له بحران، بيوزلى او فساد څخه د خلاصون په خاطر دې په ټاکلي ورځ د رايو ورکولو صندوقونو ته لاړ شي او په خپل سم  انتخاب سره دې د هېواد برخليک وټاکي.
دمجلس غړو  د يو بل پرخلاف  د انتخاباتي کمپاينونو د ځينو کسانو د ناندرو او
د لفظي بريدونو تکرار ، د نوماندانو د عکسونو لرې کول، د تورونو لګول او د نور
حساسيت پيدا کوونکي غبرګونونه د دموکراسۍ او  د انتخاباتوله آدابوڅخه لرې
وبلل او دغه شان عملونه يې د دغه ملي بهير په وړاندې بې حرمتي وبلله او ټينګار يې وکړ: هيڅوک د دې حق نه لري چې په خپلو منفي حرکاتو سره د انتخاباتو بهير يا د هغو نتيجې ګډوډې کړي او دهيواد د ورونو قومونو ترمنځ درز او نفاق پيداکړي.
سناتورانو  د انتخاباتو د امنيت په تامينولوکې دهېواد دامنيتي ځواکونو دهلو ځلو او تيارى د ستاينې په ترڅ کې، دانتخاباتي کميسيونونو، کورنيو او بهرنيو  کتوونکو او له مدني بنسټونو څخه وغوښتل چې د هر راز انتخاباتي سرغړونو او
تقلباتو مخه ونيسي چې خلک د شفافو او ډاډمنو انتخاباتو له بهير سره عادت پيدا کړي .
سناتورانو دغه راز ټينګار وکړ چې بايد دهرات او کاپيسا د ولايتونو په شان په امن ساحوکې د رايې ورکولو دپاڼو دکمښت او د رايې ورکولو د مرکزونو دکموالي په شان  دلومړى پړاو انتخاباتو ستونزې د انتخاباتو په بهير سيورى ونه کړي.
دبغلان ولايت دګذرګاه نور ولسوالۍ سيلاو ځپلو ته  د اغيزمنو مرستو رسول  وستايل شول او د سر د زيان  او د مالي تاوان زياتوالى د مجلس دغړو د انديښنې
سبب شو او دوى ددغې طبيعې  پيښې زيانمنو شويوکسانو ته د اړتيا وړ مرستوپه رسولوکې دملي او نړيوالو بنسټونو د جدي پاملرنې غوښتنه وکړه چې ترسره شوې مرستې د ناتار د ژورتيا له مخې ډيرې ناڅيزې دي.
د را رسيدلو خبرونوله مخې: په ګذرګاه نور ولسوالۍ کې  تېره اوونۍ د سختو او
بې سارو سيلاوونو د راوتلو له امله نږدې ٢٠٠ تنه له منځه لاړل چې د ځينوکسانو مړي لا تراوسه پورې نه دي ترلاسه شوي چې سر بيره پردې په دې سيمه کې د استوګنې يو زرو پنځه سوه کورونه بيخي ويجاړ شوي دي ، په زرګونو څاروي ، د بڼونو پراخې ساحې، کرنيزې ځمکې او نږدې شل کيلومتره سړک له منځه تللي دي او خلک اساسي مرستو، بيا ميشت کولو او د مواصلاتي لارو بيا پرانستلو ته سخته اړتيالري .
سربيره پردې په نننيو آزادو خبروکې په ښارونواوپه تيره بيا په کابل ښارکې د سوالګرو او د بې سر نوشتو ماشومانو د شتون له امله هم انديښنه څرګنده شوه او  وويل شول چې دغه سوالګر له معصومو ماشومانو څخه په استفادې سره په سوالګرۍ لاس پورې کوي او ماشومان په زجر او ځورونې سره د خلکو دپاملرنې د جلبولو په خاطرپه واټونوکې ويده کوي چې دغه ځورونه  د دوى روغتيا اوسلامتيا ته نه جبيره کيدونکي زيانونه رسوي.
دغه راز په غونډه کې د تروريزم دتمويل د مخنيوي په قانون کې د تعديل او زياتوالى طرحه  چې د ولسي جرګې له خوا رسيدلې وه، معرفي شوه  او د تدقيق
په مقصد اختصاصي کميسيون ته وسپارل شوه .
ځينو سناتورانو ډير  ژر د ولسي جرګې له خوا د پيسو دپاکولو د قانون  دتصويب په ارزښت باندې ټينګار وکړ چې د هغه د ځنډيدو په صورت کې د هېواد بانکونه په نړيواله کچه تر بلاک لاندې نيول کيږي او نه جبيره کيدونکي اقتصادي زيانونه به  ورسيږي .
دخبرو په جمع بندۍ کې رفيع الله ګل افغان اړوندو مراجعو ته د دغو موضوعګانو
د وړاندې کولو په ترڅ کې يو ځل بيا له حکومت او له مرستندويو بنسټونو څخه وغوښتل چې دبغلان ولايت دګذرګاه نور ولسوالۍ  له خلکوسره سملاسي مرستې وشي.
ده دغه راز دغبرګولي د مياشتې ٢٤، د انتخاباتو ورځ د هېواد لپاره يوه تاريخي ورځ وبلله او له خلکوڅخه يې وغوښتل چې د وري د مياشتي  د ١٦ نيټې  د انتخاباتو په شان دې په پراخه توګه پکې ګډون وکړي او د خپلې مسلمې رايې له حق څخه په استفادې سره دې د هيواد راتلوونکى مشر وټاکي او له امنيتي ځواکونو څخه يې هم د امنيت په تامينولوکې د جدي هلوځلو غوښتنه وکړه.

دمشق- دى دان- باختر د غبرګولى دمياشتې ٢٠
د سوريې دولتي ټلويزيوني شبکې پرون اعلام وکړ چې د دغه هيواد جمهور رييس بشاراسد هغه ټول کسان يې په عمومي بخښنه کې شامل کړي دي چې تر اوسه پورې يې په جرمونو لاس پورې کړى دى .
له دمشق څخه د فرانسې د خبري آژانس دخبرله مخې: د سوريې د دولتي ټلويزيوني شبکې د دغه هيواد د عدليې د وزير ناجم الا حمد له خولې اعلام وکړ چې ددې ټولنيزې بخښې په چوکاټ کې د جمهوري رياست دغه فرمان په څو پوځي برياليتوبونو له لاسبري سره جوخت او له سوله ييز ګډ ژوندانه په مقصد او ملي سمون ته د رسيدو لپاره د غوښتن ليکونه له مخې صادر شوى دى .
د سوريې دولتي ټلويزيوني شبکې په دې باب زيات جزييات اعلام نه کړل.
بشار اسد د سوريې د جمهوري رياست په انتخاباتوکې چې د روان کال د غبرګولي د مياشتې په ١٣مه نيټه ترسره شول؛ د غوڅ اکثريت په ترلاسه کولو سره د يوې بلې اووه کلنې دورې لپاره ددغه هيواد د جمهور رييس په توګه انتخاب شو .
عمومي بخښنه د سوريې د جمهور رييس په توګه د بشاراسد له بيا انتخاب څخه ٥ ورځې وروسته اعلام شوه چې دغو انتخاباتو د سوريې د حکومت د اپوزيسيون او د لويديځ په سلوکې نوي انتقادونه له ځان سره لرل چې انتخابات يې يوه خندونکې ننداره وبلله.
په بخښنه کې هغه افراد شامليږي چې د تروريزم ضد تر قانون لاندې تورن دي.
دغه قانون په ٢٠١٢ م کال کې نافذ شو او د دغه هيواد په جيلونوکې د وسله والو او نا وسله والو په ګډون د سوريې د رژيم د مخالفينو په زرګونو تنو بنديانو باندې ورڅخه استفاده کيږي.
په همدې حال کې د سوريې د ياغيانو کليدي ملاتړي، د قطر صدراعظم د ملګرو ملتو له سازمان څخه وغوښتل چې اوربند نافذ او په سوريه کې دې نښتې پاى ته ورسوي.
دغه راز د ايران جمهور رييس حسن روحاني ترکيې ته په سفرکې له دغه هيواد سره په همکارۍ او له بنسټ پالنې سره د همکارۍ ژمنه وکړه.
ترکيه د سوريې دحکومت د مخالفينو له ملاتړو څخه ده. دا لومړى ځل نه دى چې د سوريې حکومت عمومي بخښنه اعلاموي. نږدې سل زره تنه په سوريه کې په هغه پاڅون پورې د اړوندو فعاليتونو په ارتباط چې د ٢٠١١ م کال د مارچ په مياشت کې پيل شو؛ په بندکې شپې سبا کوي.
د بشرد حقوقو ډلو د سوريې د جيلونو او بنديانو شرايط چې ځورونه او خوار ځواکۍ پکې شته؛ خراب بللي دي .
د سوريې د بشر د حقوقو مدافع وويل چې نږدې ١٨ زره تنه بنديان بيدرکه دي .
په سوريه کې نا آرامۍ لومړۍ په اعتراضونو سره پيل شوې او وروسته د کورنى جګړې سبب شوې چې له امله يې څه د پاسه ١٧٠ زره تنه ووژل شول او په مليونونو تنه نور د دغه هيواد په دننه او بهرکې کډوال شول.

کراچۍ دى دان- باختر د غبرګولى دمياشتې ٢٠
د پاکستان د کراچۍ ښار په هوايي ډګر د دغه هيواد د طالبانو له خونړى بريد څخه يواځې د دوو ورځو له تيريدو وروسته نن هم د دغه هوايي ډګر د امنيتي ځواکونو دويم لمبر مقر د سختو نښتو او ډزو ډګر و.
باختر آژانس د پاکستان د ډان ورځپاڼې د انټرنټي سايټ له خولې خبر راکړ چې په ډزو سربيره په هوايي ډګرکې د څو چاودنوغږونه هم اوريدل شوي دي چې د هوايي ډګر د شاوخوا سيمو د اوسيدونکو د وحشت سبب شوى دى.
دکراچۍ د هوايي ډګر د امنيتي ځواکونوکمپ دغه ډګر ته څېرمه د پهلوان ګوټ په بيتا آباد ناحيه کې دى.
د لومړنيو را رسيدلو خبرونو له مخې: له څلورو څخه تر اووه تنو پورې يرغلګر د کمپ انګړ ته ننوتي دي او نښتو ته يې دوام ورکړى دى چې تراوسه پورې د دغه بريد له امله د سر د احتمالي زيان په باب خبرنه دى خپور شوى.
د پاکستاني طالبانو د مومندو ايجنسۍ د جناح د تحريک د ډلې له غړوڅخه په عمر خراساني پورې اړوند د ټويټر د ټولنيزې شبکې په يوه پيغام کې اعلام شوى دى چې د طالبانو دغې ډلې د کراچۍ په هوايي ډګر دويم بريد ترسره کړى دى.
دغه راز په را رسيدلو خبرونو کې ويل شوي دي: ځينې بهرني الوتنې چې د کراچۍ په نيت ترسره کيدې؛ له دې جملې څخه دکراچۍ ښارته د دوبى روانه الوتکه بېرته د دوبى هوايي ډګر ته ستنه شوې ده او له ملتان څخه کراچۍ ته يوه روانه الوتکه هم بېرته ستنول شوې ده او د کراچۍ هوايي ډګر ته غځيدلي واټونه تړل شوي دي.
دکراچۍ په هوايي ډګر د تيرې يکشنبې د شپې په تروريستي بريدکې څه ناڅه ٣٠ تنه ووژل شول.
پاکستاني طالبانو په دغه هوايي ډګر د تيرې يکشنبې شپې د بريد مسووليت په غاړه واخيست.

کابل باختردغبرګولي دمياشتې ٢٠ :
د سترې محکمې عالي شورا نن له غرمې مخکې د افغانستان داسلامي جمهوريت دقاضي القضات پوهاند عبدالسلام عظيمي په مشرۍ غونډه وکړه اوه اجندا کې نيول شوې موضوعګانې يې وڅيړلې .
د سترې محکمې دخپرونو رياست باختر آژانس ته  خبر ورکړ:
شورا لومړى دننګرهارولايت د استيناف محکمې د رياست په ودانۍ د تروريستانو
پرونى ځانمرګى بريد په کلکه وغانده او د دغو بريدونو د شنډولو په کارکې  د قاضيانو دمحافظت دقطعې دمنسوبينو او د ننګرهارولايت دنورو امنيتي ځواکونو ميړانه او زړه ورتيا چې د ځانمرګو يرغلګرو د ځپلو سبب شوې او د سر د زيانونو  او د مالي تاوانونو مخه ونيول شوه؛ وستايلې او د هېواد د زړوروامنيتي منسوبينو دبرياليتوب او سرلوړى دغوښتنې په  ترڅ کې يې تجويز ونيوه چې دننګرهار ولايت  د استيناف محکمې د رياست دقاضيانودمحافظت دقطعې قوماندان دې وستايل شي.
وروسته د قضايه قوې د پرستيژ د ساتنې او په سالمه توګه او له انحراف پرته   د عدالت  او د قانون د واکمنۍ په تګلوري کې د قضايي رسالت د اجرا کولو په مقصد تصويب شو چې دقضاوت له دندې پرته د قاضيانو اشتغال د شرعي اصولو، قانوني نصوصو او د قضايي آدابو پرخلاف دى او دوى نه شي کولاى   د دفاع د وکالت ، امامت  او په  جوماتونوکې د لمونځ  ورکولو او د نورو په ګډون  په دويمو دندو لاس پورې کړي. د دې کار سرغړونکي به له قانوني چلند سره مخامخ شي .
دغه راز  د ديت د بيې د تثبيت په مقصد چې د عالي شورا له  خوا په  کلني ډول  ترسره کيږي ، له بېلابېلو بانکي او تجارتي  مراجعوڅخه دلازمو معلوماتو له ترلاسه کولو او د سترې محکمې د دارالافتاء د نظر په پام کې نيول سره، په روان کال کې هم ټاکل شوى او دارالانشا ته لارښوونه وشوه چې مراتب دې په متحدالمال ډول  محکمو ته ابلاغ کړي .
وروسته د رسيدلو استهداګانو د څيړ نې په لاره کې د حق العبدي په دعوا کې د قصاص د بخښنې د څرنګوالى په برخه کې د چارو د ادارې او د وزيرانو شورا  دارالانشا د لوى رياست د قانون د ساتنې او د قضايي چارو د ادارې  د استهدايې په باب غور وشو او د معتبرو فقهي مسئلو د قانوني نصوصو پربنسټ د قصاص د بخښنې په شرعي اغيزو  او پايلو پورې د اړوندو اړخونو د ديت د دعوا د اقامه کولو، د مقتول د وارثانو په تېره بيا د صغيرانو په وړاندې د مرتکب د وجيبو او مکلفيتونو او هم د دغه شان قضيو د جزايي اړخونو په څيړنې پورې د اړوندو مراتبو په باب لازمې لارښوونې وشوې .
دغه راز  د کابل ولايت دحقوقو د رياست داستهدايې له مخې چې دکابل  دتجارتي ابتدائيه محکمې له خوا په يوه مدعا بها کې د دوو  پريکړو د صادرولو څرګندويه ده، د مدني محاکماتو د اصولو د قانون په رڼا کې لارښوونه وشوه:  څرنګه چې دواړه پريکړې د دعوا د خاوندانو د قانوني مطالبانو پربنست صادرې شوې دي؛ له دې امله اوسني مدعي کولاى شي د ملکيت په اصلي ذواليد باندې چې دولت دى؛ دعوا اقامه کړي .
په همدې ترتيب د لويې څارنوالي استهدا ته په پاملرنې سره څرګنده شوه: په هغو قضيوکې چې دوه حکمونه يو په بل پسې په محکوم د تطبيق وړ وي؛ که چيرې  محکوم يوه موده له مودې څخه اضافه په لومړى محکوميت کې تيره کړې وي؛ دغه موده د ده د دويم محکوم بها په موده کې د محاسبې وړ ده او په دې برخه کې قانوني خنډ نشته .
دغه راز د کشفي بنسټونوله خوا دنشه يي توکو په جرمونوکې دټيلفوني مکالماتو د اوريدو په اړوند دنشه يي توکو د ابتدائيه محکمې د رياست د استهدايې په وړاندې، څرګنده شوه: د جزايي اجرااتو نوى قانون چې دغبرګولي د مياشتې له  ١٥نيټې څخه نافذ شوى دى؛ دموضوع په اړوند پوره صراحت لري، له هغه سره سم دې اجراات وشي .
عالي شورا دغه راز  په نظامي چاروکې د لويې څارنوالۍ د معاونيت په وړانديز وپتيله چې د فراه ولايت د نظامي ابتدائيه محمکې قضايي هيئت دې د نيمروز ولايت د نظامي منسوبينو د جرمونو د دوسيو د لومړنۍ څيړنې په مقصد دغه ولايت ته واستول شي  .
سربېره پردې په نننۍ غونډه کې د بيا کتنې د شپږو مواردو غوښتن ليکونو او په مدني او جزايي برخوکې دمحکمې دبدلون دديرشو مواردوغوښتن ليکونو په باب هم غور او څيړنه وشوه او په هر موردکې لازم تصميم ونيول شو.

کابل باختردغبرګولي دمياشتې ٢٠ :
د ملي پوليسو ځواکونو پرون پنځه سوه پنځوس کيلوګرامه اپين په نيمروز ولايت کې ترلاسه کړل.
دکورنيو چارو وزارت مطبوعاتي دفتر باخترآژانس ته خبرورکړ:
دغه توکي د پوليسو د ځواکونو له خوا د نيمروز ولايت د خاشرود ولسوالۍ په مربوطاتوکې د ځانګړو عملياتو په بهيرکې ترلاسه شوي دي.
ددغې پيښې په اړوند د نشه يي توکو دوه تنه قاچاق وړونکي له يوکلاشينکوف سره نيول شوي دي.

کابل باختردغبرګولي دمياشتې ٢٠ :
د وسله والوطالبانو د ډلې ديو پنځه کسيز ګروپ قوماندان دملي امنيت د ځواکونو له خوا په فراه ولايت کې ونيول شو.
دغه قوماندان د فراه ولايت د خاک سفيدولسوالۍ په مربوطاتوکې د عملياتو په بهير کې ونيول شو.
د فراه ولايت د ملي امنيت د رياست يوه خبرځاى دباخترآژانس خبريال ته وويل :
ملا بسم الله چې د خاک سفيدولسوالۍ د آب خرما په ساحه کې د وسله والو طالبانو د ډلې د يو پنځه کسيز ګروپ قوماندان و؛ د ملي امنيت د ځواکونوله خوا ونيول شو.
دغه قوماندان د خاک سفيد ولسوالۍ په مربوطاتوکې او د فراه  _ فرارود په لاره کې په زياترو تروريستي او ورانکارو  بريدونوکې لاس درلود.
يوه اړونده خبرځاى وويل چې په دغو عملياتوکې د قوماندان ملابسم الله تر امر لاندې يوتن ملا يارمحمد هم  له يو موټرسايګل ، يو کلاشينکوف ، يو لاسي بم او شپاړلسو بوشکه يي ډوله ماينونوسره نيول شوى دى.