12 July 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل باختردغبرګولي دمياشتې ٢٠ :
درې تنه ملکي وګړي په غور ولايت کې د خپل منځي اختلافونو له امله ووژل شول.
د غور د والي ويندوى عبدالحى خطيبي د باخترآژانس خبريال ته وويل: دغه پيښه
تېره شپه دغور ولايت دچارسدې ولسوالۍ په مربوطاتوکې هغه وخت رامنځته شوه  چې د چارسدې ولسوالۍ د خورنج اوکنداخ دکليو اوسيدونکو دقومي اختلافونوله امله په خپلوکې په جګړې لاس پورې کړ چې له امله يې له دواړو لورو څخه درې تنه ووژل شول.
دغورولايت خلکو د قومي اختلافونو له امله د سردرانده زيانونه زغملي دي چې ددغو اختلافونوله امله کال په کال لسګونو تنو ته مرګ ژوبله اوړي.

کابل باختردغبرګولي دمياشتې ٢٠ :
د پروان پوهنتون يو شمېر استادانو دخپلو معاشونو  دنه ترلاسه کولو په دليل له دوو ورځو را په دې خوا په اعتصاب لاس پورې کړى دى او درسي خونو ته له ورتګ څخه يې ډډه کړې ده.
د پروان پوهنتون استادان وايي چې له پنځومياشتو را په دې خپل معاشونه نه دي ترلاسه کړي .
ددغه پوهنتون استادان دغه راز په دغه علمي مرکزکې د کمزورى مديريت له امله شکايت لري .
خو د پروان پوهنتون رييس عطامحمديار دغه ادعا ردوي او وايي چې په دې اړوند يې د لوړو زده کړو وزارت له مقاماتو سره خبرې کړې دي او په ډيرلنډ ممکن وخت کې به د استادانو ستونزه حل شي .
استادان وايي: که چيرې د دوى ستونزې  حل نه شي؛ خپل اعتصاب ته به دوام ورکړي.
دا په داسې حال کې ده چې څه موده مخکې د کابل پوهنتون د ټولنيزو علومو او د اروا پوهنې د پوهنځي استادانو هم د لوړو زده کړو وزارت له خوا د دوى د شپې له خوا د لوست ورکولو د حقوقو د نه اجرا کيدو له امله د دوو ورځو لپاره د شپې له خوا محصلانو ته له لوست ورکولوڅخه ډډه وکړه.

کابل باختردغبرګولي دمياشتې ٢٠ :
وسله والوطالبانو د ارزګان و لايت د خاص ارزګان په ولسوالۍ کې د افغان بيسيم
شرکت مخابراتي آنتن ته اور واچاوه.
په ارزګان ولايت کې سيمه ييز مقامات وايي چې وسله والوطالبانوله څو ورځو را  په دې خوا د سيمې اوسيدونکو ته خبر دارى ورکړى و چې د شپې له خوا د مبايل ټيلفونونو له لارې اړيکې ونه نيسي .
په ارزګان ولايت کې د افغان بيسيم د مخابراتي شرکت مسوول وويل: وسله والو طالبانو تېره شپه د خاص ارزګان په ولسوالۍ کې دافغان بيسيم دمخابراتي شرکت  آنتن ته اور واچاوه.
يوه اړونده خبرځاى تائيدکړه چې  وسله والو طالبانو دا کار دسيمي د اوسيدونکو داړيکو دمخنيوي په خاطر کړى دى.

کابل باختردغبرګولي دمياشتې ٢٠ :
د امنيتي ځواکونو په هغو عملياتوکې چې تېره شپه دکابل ولايت د خاکجبار ولسوالۍ په مربوطاتوکې ترسره شول؛ د درندو وسلو يوه اندازه مهمات کشف او ترلاسه شول .
دملي دفاع وزارت د ويندوى مطبوعاتي دفتر باخترآژانس ته خبرورکړ:
په دغو عملياتوکې چې د ډار اچوونکوله شتون څخه د سيمو د پاکولو په مقصد
د ملي اردو، ملي امنيت  او د ملي پوليسو د ځواکونوله خوا د کابل ولايت د خاکجبار ولسوالۍ په مربوطاتوکې ترسره شول؛ د٧٦ ملي صحرا توپ  ١٩ ګولۍ،  د توغندي ويشتوونکي ١٢ ماينونه او  د  بي ام  _ ١ درې مايونه کشف او په  عملياتوکې د شاملو ځواکونو لاسته ورغلي دي.

کابل- باختر د غبرګولى دمياشتې ٢٠
يو ماين ښخوونکى طالب نن د امنيتي ځواکونو له خوا په کاپيسا ولايت کې ونيول شو.
دکاپيسا ولايت د کوهستان د دويمې برخې د ولسوالۍ امنيه قوماندان جنرال عبدالعظيم کوهستاني د باختر آژانس خبريال ته وويل : د وسله والو طالبانو د ډلې غړى قاري عبدالواسع چې غوښتل يې د ملاخليل د سيمې په فرعي سړک کې ماين ښخ کړي؛ د ملي پوليسو له خوا د خلکو په همکارۍ ونيول شو.

کابل- باختر د غبرګولى دمياشتې ٢٠
اوولس تنه وسله وال طالبان تېره شپه په غزني ولايت کې دملي اردو د ځواکونو په چاڼيزو عملياتوکې ووژل شول .
دملي دفاع وزارت د ويندوى مطبوعاتي دفتر باختر آژانس خبر ورکړ: د ملي اردو د ځواکونو د غزني ولايت د اندړو ولسوالۍ په مربوطاتوکې د ډار اچوونکو د ځپلو په مقصد چاڼيز عمليات ترسره کړل چې له امله يې ١٧ تنه وسله وال ډار اچوونکي طالبان ووژل شول او ٦ تنه نور طالبان ټپيان شول.
په دغو عملياتوکې د دښمن دوه توغندي ويشتوونکي، دوه پيکا، درې کلاشنکوفونه ، يوه ايکم مخابره ، يوه اندازه پوځي تجهيزات او دوه موټر سايکلونه ترلاسه شوي دي.

کابل- باختر د غبرګولى دمياشتې ٢٠
په مزارشريف ښارکې نن سهار د ماين د چاودنې له امله يو ملکي وګړى ټپي شو.
دغه پيښه هغه وخت رامنځته شوه چې مقناطيسي ماين په يو کرولا موټرکې ځاى پرځاى شوى او د مزارشريف ښار د ښاري محکمې د رياست ودانۍ ته څېرمه درول شوى و.
د مزارشريف ښار د پنځمې امنيتي حوزې آمر د باختر آژانس خبريال ته وويل: دغه موټر د دغه ولايت د مقر په شل مترى واټن کې هغه وچاوديد چې چلوونکى يې ښارې محکمې ته ننوتى و.
د خبرځاى د څرګندونو له مخې: د موټر خاوند د پوليسو له خوا نيول شوى دى .

کابل\باختر\د غبرګولي د مياشتې٢٠:
په نړيوالو بازارونوکې د يوانس سرو زرو په بيه کې د پرون په نسبت يو ډالر زياتوالى راغلى دى.
پرون په نړيوالوبازارونوکې يو انس سره زر په ١٢٥٣ډالرو وړاندې کيدل، خو نن په١٢٥٤ډالرو وړاندې کيږي.
د پښتنى بانک د سرو زرو د مارکيټ يو پلورونکى قاهرخان  ددغه خبر په تاييدولو سره باخترآژانس ته وويل: اوس دکابل په بازارونوکې يو ګرام مصري سره زر په٢٤٥٠ افغانيو، کويټي په٢٤٠٠ افغانيو، سنګاپوري په٢٣٥٠ افغانيو، بحريني په٢٠٥٠افغانيو، عربي په٢٠٠٠ افغانيو، ايراني په١٦٥٠ افغانيو او يوګرام روسي سره زر په١٥٥٠افغانيو پلورل کيږي.

کابل- باختر د غبرګولى دمياشتې ٢٠
د کورنيو چارو وزارت مقامات وايي: نهه تنه وسله وال طالبان د هيواد په بېلابېلو سيموکې د پوليسو د امنيتي فعاليتونو په بهيرکې ووژل شول .
دکورنيو چارو وزارت مطبوعاتي دفتر دباختر آژانس خبريال ته خبر ورکړ: امنيتي ځواکونو د زابل ، هلمنداو د نيمروز د ولايتونو په مربوطاتوکې امنيتي فعاليتونه ترسره کړل چې له امله يې٩ تنه تروريست طالبان ووژل شول؛ يو تن يې ټپي او يو تن بل يې ونيول شو.
په دغو عملياتوکې يوه اندازه سپک او درانده جنګي وسايل هم تر لاسه شوي دي.
د يوبل خبرله مخې: د ملي پوليسو ځواکونو د کاپيسا ولايت په مربوطاتوکې د امنيتي فعاليتونو په بهيرکې د وسايطو ضد دوه ماينونه کشف او شنډکړل.

کابل- باختر د غبرګولى دمياشتې ٢٠
په ښځينه جامو سمبال يو بم ښخوونکى پرون د پوليسو له خوا په غزني ولايت کې ونيول شو.
د غزني ولايت امنيه قوماندان زړور زاهد د باختر آژانس خبريال ته وويل: يو تروريست چې غوښتل يې له ښځينه جاموڅخه په استفادې سره د دولتي مسوولينو په موټرونوکې مقناطيسي بم ځاى پرځاى کړي؛ د عامه نظم د پوليسو له خوا په غزني ښارکې ونيول شو.