22 October 2019

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل – باختر دلړم دمياشتې ١١
درې تنه په هرات  ولايت کې دتروريستي بريدونو دسازمان ورکولو په تور دملي امنيت دلوى رياست دموظفينو له خوا په دغه ولايت کې  ونيول شول.
دملي امنيت دلوى رياست مطبوعاتي دفتر نن باختر آژانس ته ديوې خبرپانې  په ليږلو سره ليکلي دي :
دهرات ښار د اوومې ناحيې د رباطه کابلي اوسيدونکى فقيراحمد سيدمحمد او احمد شاه دتروريستي بريدونو دسازمان ورکولو په تور دملي امنيت دلوى رياست دموظفينو له خوا ونيول شول  او د دوى له پټنځاى څخه لس کلاشينکوفونه يو توغندي ويشتوونکي يوه  مکروف تومانچه ، دوه ديرش لاسي بمونه ، يوه مخابره ، څلور پاسپورټونه او يوه اندازه مهمات ترلاسه شوي دي .
نيول شويو کسانو په خپل جرم اعتراف کړى دى چې دملا شاه محمد او دسلطان محمد په نومونونو دطالبانو د ډلې دقوماندنانو په  لارښونه زيات تروريستي فعاليتونه ترسره کړي دي.

کابل – باختر دلړم دمياشتې ١١
د  آى ،  او ، ام د دفتر يو کارکوونکې تيرماښام د نيمروز ولايت دزرنج ښار په معصوم آباد سيمه کې ووژل شو.
دنيمروز د والي ويندوى احمد عرب باختر اژانس ته وويل :  دغه کارکوونکې دوه ويشت کاله عمر درلود او دوو ناپيژندل شويو وسله والو کسانو له خوا په  ډزو سره ووژل شو.
خبرځاى زياته کړه :  د وژنې انګيزه تر اوسه پورې روښانه  نه ده دپيښې عاملين له ساحې څخه په تيښتې  بريالي شوي او پوليس د هغوى د موندلو لپاره پلټنې  پيل کړي دي.

کابل – باختر دلړم دمياشتې ١١
دبغلان ولايت پوليسو پرون درې تنه ديو تن  دوژلو په تور ونيول.
دبغلان ولايت دخوست او فرنګ ولسوال محب الله محقق باختر آژانس ته وويل : مقتول چې ټاکل شوې وه  درې ورځې وروسته واده وکړي دخپلې کوږدنې دکورنۍ له خوا ووژل شو.
خبرځاى زياته کړه ،  جان آقا چې دخپلې کوږدنې له خوا کورته بلل شوى و دتومانچې په  ډزو سره وژل شوى دى .
محقق زياته کړه :  ددغه هلک خسر خواښې او کوږدنه نيول شوي دي او پيښه ترڅيړنې لانده  ده.

کابل – باختر دلړم دمياشتې ١١
دنړيوال بانک درپوټ له مخې :  افغانستان دتجارتي جواز د ويشلو په بهير کې د آسانتياو درامنځته کولو په خاطر دنړۍ دهيوادونو په کچه په څلرويشتم  مقام او دجنوبي آسيا په کچه په لومړۍ مقام کې دى .
دباختر آژانس دخبرله مخې :   دپانګې اچونې دملاتړ د ادارې  رييس وفي الله افتخار نن په يوه خبري غونډه کې وويل :  نړيوال بانک هرکال په نړۍ کې دپانګې اچونې د  ودې لس مهمې څانګې څيړې چې سږ کال په خپل رپوټ کې ديو سلو نهه اتيا هيوادونو ترمنځ دپانګي اچونې آسانتياوې وڅيړل شوې چې افغانستان يو سلو څلورشپيتم مقام ترلاسه کړى دى  او تيرکال په يو سلو اويايم مقام کې و او دتجارتي  جواز دويشلو په بهير کې په څلرويشتم مقام کې دى .
افتخار زياته کړه  چې پخوا دپانګې اچونې دجواز د پړاونو بشپړول يوه مياشت وخت نيوه  چې اوس دغه  بهير دريو  ورځوته کمښت موندلى دى .

کابل – باختر دلړم دمياشتې ١١
دهرات د ولسواليو دجام دواليبال سيالۍ دتورغنډۍ ښارګوټي د ټيم په اتلوالۍ سره پاى ته ورسيدې .
دهرات ولايت دورزشي آمريت مرستيال ضيا الحق ضيا باختر آژانس ته وويل : ددغو سياليو پاى لوبه دتورغنډۍ دښارګوتې او دکرخ دولسوالۍ دټيمونو ترمنځ وشوه چې لوبه ديوې په مقابل کې په دريو سره دتورغنډۍ دښارګوتې دټيم په ګټه پاى ته ورسيده او دغه ټيم اتل شو .
دغه راز د کرخ او د رباط سنګي ټيمونو دويم او دريم مقام وګټل  دغه سيالۍ ديوولسو ټيمونو ترمنځ په هرات ښار کې پيل شوي وې .
ديوبل خبرله مخې  : دهرات دباسکټبال دغوره ليک سيالۍ پرون مازيګر د درخشان او دسمندر دټيمونو ترمنځ په يوې لوبې سره  دوام موند.
دغه لوبه د اووه شپيتو په مقابل کې په اتيا سره د درخشان دټيم په ګټه پاى ته ورسيده.

تهران- دايران خبري منابع – باختر دلړم دمياشتې ١١
دترکيې جمهور رييس ،عبدالله ګل خپل ايراني سيال حسن روحاني  دغه هيواد ته دسفر بلنه ورکړې  ده .
دايران دولتي خبرى آژانس خبر ورکړ چې دغه بلنه دعبدالله ګل او دايران دبهرنيو چارو د وزير محمد جواد ظريف پرون  په استانبول ښارکې (( دبېض وسلو کولو او دسيمې او نړۍ دامنيت دخبرو اترو ))د غونډې ترڅنګ  شوې ده.
دايران د مهر خبر آژانس هم خبرورکړ چې دترکيې جمهور رييس دايران دبهرنيو چارو له وزير سره په کتنه کې دخپلې خوښى مراتب جمهوري رياست مقام ته دحسن روحاني دانتخاب په باب اعلام او دايران دبهرنيو چارو له وزير څخه يې غوښتنه وکړه   چې ترکيې ته دحسن روحاني دسفر لپاره د بلنې مراتب اعلام کړى .
دترکيې دبهرنيو چارو  وزير په مطبوعاتي کنفرانس کې د دواړو هيوادونو اړيکې ژورې او  تاريخي  بللى او ويلي يې دي چې ځينې  ډلې غواړي موږ  دوه  سيال ګاونډيان  معرفي کړى .
دايران او ترکيې اړيکې په سوريې کې دجګړې له پيل وروسته دمحمود احمدي نژاد دواکمنې په وخت کې خرابې شوې وې.

پيښور \ دى نيوز انترنشنل \ باختر دلړم دمياشتې ١١
دپاکستاني طالبانو دتحريک ډله ښايي د راتلوونکو دوو ورځو په ترڅ کې خپل نوى  مشر اعلام کړي .
دباختر آژانس دخبرله مخې :  پاکستاني طالبانو دتحريک مشر حکيم الله مسعود پرون په شمالي وزيرستان کې دامريکايي بې پيلوټه الوتکې په يوه بريد کې ووژل شو .
دپاکستان دخبرځايونو دخبرله مخې :   دپاکستاني طالبانو دمرکزي شورا غونډه
يا مرکزي مشورتي کميټه به  ددغې ډلې نوي مشر انتخاب کړي .
عمر خالد مولانا فضل الله او خان سعيد په پام کې دي چې ددغې ډلې دمشر په توګه وټاکل شي  .
په مهمندو ايجنسي کې  دپاکستاني طالبانو دتحريک امير عمر خالد ،له ملکندسيمي څخه ملا فضل الله  او دجنوبي وزيرستان  دطالبانو دتحريک 
مشرخان سعيد دي په نومونو دي .
دپاکستان حکومت تراوسه پورې دپاکستاني طالبانو دتحريک مشر حيکم الله مسعود وژل کيدل نه دي تاييد کړي او د ده له وژل کيدو وروسته شمالي وزيرستان ته دپاکستان دحکومت ديو هيت سفر ځنډول شوى دى .
دپاکستان د دي نيوز انترنشنل ورځپاڼې دخبرله مخې  :  دغه هيت دسولې دخبرو دترسره کولو لپاره شمالي وزيرستان ته سفر  کاوه.

کابل – باختر دلړم دمياشتې ١١
دانګلستان دفوټبال دغور ټيمونو دجام سيالۍ نن ماښام په اتو لوبو سره دوام مومي.
باختر آژانس دنړيوالو خبري منابعو له خولې خبر راکړ :  ددغو سياليو په لومړۍ لوبه کې دنيوکاسل ټيم له چلسي ټيم سره سيالۍ کوي او ورپسې دفولهم ټيم دمانچستر يونايتد له ټيم سره ،  دهالسي ټيم  د سندرلند ، ټيم دمانچسترسيټي ټيم  دناويج سيټي ، استوک له له دسوت  امپتن او ويسنبرومويج ټيم دکرستال پلس ، وستنهم د استن ويلا او دارسنال ټيم دليورپول له ټيم سره سيالي کوي .
تراوسه پورې دارسنال ټيم دجدول په سرکې ځاى لري او ورپسې دچلسي او ليورپول ټيمونه دي .

کابل – باختر دلړم دمياشتې ١١
په آلمان کې دفوټبال سيالۍ نن شپه په شپږ لوبو سره دوام مومي.
د دغو سياليو په  حساسو لوبوکې چې  د افغانستان په  وخت نن ماښام   پيليږي دآفن هم  ټيم دبايرمونيخ سره  لوبه کوي او  ورپسې د ايرانا برلين ټيم  له  شالکه    سره سيالي کوي.
دباختر آژانس دخبرله مخې  :  ددغو سياليو په سر کې تيره شپه د دورتمند ټيم ديوې په مقابل کې په شپږو سره دشتودګارد ټيم ته ماتې ورکړه .
تراوسه پورې د دورتمند ټيم دجدول په سرکې ځاى لري په همدې ترتيب دبايرمونيخ ټيم  دويم او لورکوزن ټيم  په دريم مقام کې ځاى لري

ميرانشا\  ډي ډان \  باختر دلړم دمياشتې ١١
دپاکستاني طالبانو د ډلې يوې څانګې دشمالي وزيرستان مرکز ميرانشا ښارته څيرمه سيمو له اوسيدونکو څخه غوښتنې دي چې خپلې کورنۍ خوندي سيمو ته وليږدوي .
دباختر آژانس دخبرله مخې :  دشمالي  وزيرستان د مجاهدينو په نامه شورا چې دحافظ ګل بهادر له خوا رهبري کيږي دميرانشاه ښار له دوکاندارانو څخه غوښتي دي چې خپل قيمتي مالونه نورو سيموته  وليږدوي.
دغه خبردارى دامنيتي ځواکونو دتوپونو له ډزو  وروسته چې په ملکي خلکو يې کړې دي  چې له امله يې دوه تنه ملکي وګړي ووژل شول او څلور تنه نور ټپيان شول صادر شوى دى .
په هغو تبليغاتي پاڼو کې چې پرون دجمعې دلمانځه له ادا کولو وروسته دميرانشاه ښار دبيلابيلو ناحيو ترمنځ وويشل شول له هغوى څخه غوښتل شوي دي چې ښځې او ماشومان  نورو سيموته وليږدوي او دشمالي وزيرستان داصلي واټ په اوږدو کې دنورو کليو اوسيدونکي دې له خپلو کورونو څخه  ووځي .
ديوبل خبرله مخې :  قوماندان حافظ ګل بهادر د طالبانو د ډلې له غړو څخه هم غوښتنې دي چې د حالاتو د خبراوالي له امله ديوې اوونۍ لپاره له  سميې څخه ووځي .
په دغې قبايلي سيمې دپاکستاني پوځيانو د ډزو له امله په  تيرو څو ورځو کې دښځو او ماشومانو په ګډون څو تنو ته مرګ ژوبله اوښتې  ده .
دپوځيانو بريدونه له هغه وروسته  پيل شول چې ناپيژندل شويو وسله والو کسانو دميرانشاه بازارته څيرمه دپلټنې په يوې پوستې بريد وکړ يو عسکر يې وواژه او درې تنه نورې ټپيان کړل.