07 December 2019

RSS Facebook

سوداگریز


تازه خبرونه

څوارلس تنه دجنايي جرمونوپه تور ونيول شول

څوارلس تنه دجنايي جرمونوپه تور ونيول شول

کابل / د ليندۍ دمياشتې ١٤ مه / باختر...

دجوزجان بڼوالو دکار وسايل ترلاسه کړل

دجوزجان بڼوالو دکار وسايل ترلاسه کړل

کابل / د ليندۍ دمياشتې ١٤ مه / باختر...

يو قاتل ونيول شو

يو قاتل ونيول شو

کابل / د ليندۍ دمياشتې ١٤ مه / باختر : دکابل...

Youtube Player

khantry design

سوداگریز

سوداگریز

کابل باختر د مرغومي دويمه :
په کابل کې دمصر  د عربي جمهوريت سفير  نن له غرمې وروسته  د جمهور رييس له مرستيال  محمدکريم خليلي سره د مخه ښې کتنه وکړه .
  دجمهوري رياست مطبوعاتي دفترباخترآژانس ته خبر ورکړ: په دې کتنه کې لومړى  په کابل کې د مصر سفير د دواړو هيوادونو افغانستان اومصر د دولتونو  او ملتونو ترمنځ اړيکې پياوړې او صميمانه وبللې او د دواړو هيوادونو ترمنځ  د متقابلو اړيکو په پراختيا باندې دټينګار په ترڅ کې يې  څرګنده کړه چې د مصر او افغانستان ترمنځ دوستانه اړيکې ډيره اوږده لرغونتيا لري . 
ده دې ته په اشارې سره چې دمصر دولت د امنيتي ځواکونو د روزنې، د لرغونو آثارو دبيا رغاونې په برخو او دغه راز دتحصيلي بورسونو د برابرولو په برخه کې  دافغانستان له خلکو سره همکارۍ کړې ده؛ د دواړو هيوادونو ترمنځ دمتقابلو  همکاريو  په پراختيا باندې ټينګار وکړ .
  دده دڅرګندونو له مخې: دمصر دولت د روغتيايي زده کړو په برخه کې هم  دافغانستان  دعامې روغتيا له وزارت سره  همکارۍ کړې ده  او له دې وروسته هم دغه هيواد چمتو دى چې په دغو برخوکې  دافغانستان  له دولت اوخلکو سره  خپلو مرستو اوهمکاريو ته دوام ورکړي .
  وروسته دجمهور رييس مرستيال محمدکريم خليلي دافغانستان له خلکو سره  دمصر د دولت دهمکاريو له امله دقدردانۍ په ترڅ کې دواړه هيوادونه لرغوني  اوصميمي دوستان وبلل او ويې ويل چې دمصر هيواد د اسلامي هيوادونو ترمنځ ځانګړى ځاى لري . 
  دجمهور رييس مرستيال په مصرکې د الازهر دعلمي مرکز شتون ته په اشارې سره  په دغه هيوادکې ترلاسه شوي  علمي پرمختګونه د وياړ سبب وبلل او هيله يې وکړه چې دواړه هيوادونه مصر او افغانستان په اوسنيو ستونزو او ناخوالو بريالي شي .
ده دافغانستان اومصر ترمنځ فرهنګي اوديني مشترکاتو ته  په اشارې سره څرګنده کړه چې ددغو دواړو هيوادونوترمنځ دوستانه اړيکې له پخوا زياتې ژورې او پياوړې شي او د دواړو دولتونو ترمنځ متقابلې  همکارۍ به زياتوالي ومومي .

کابل باختر د مرغومي دويمه :
يوه ميرمن تېره شپه په بغلان ولايت کې دخپل ميړه له خوا ووژل شوه .
  دغه ميرمن چې٤٠ کلنه وه؛ په نامعلوم دليل د مرکزي بغلان د ولسوالۍ په چايابي کلي کي په خپل کورکې دخپل ميړه له خوا زندي کړې شوه او وژل شوه.
  د مرکزي بغلان ولسوال ګوهرخان بابري ددغه خبر د تاييدولو په ترڅ کې باخترآژانس ته وويل چې د دغې ميرمنې ميړه تښتيدلى دى او زوى يې د تحقيق په خاطر د پوليسو تر توقيف لاندى دى.
ده زياته کړه چې قضيه دمرکزي بغلان د څارنوالۍ ادارې ته ليږدول شوې ده او پوليسو د قاتل د نيولو لپاره پلټنې پيل کړې دي .

کابل باختر د مرغومي دويمه :
دجوزجان ولايت د قوش تيپې او د درز آب د ولسواليو ترمنځ لاره کې د افغان ځواکونو په اکمالاتي کاروان د وسله والوطالبانو په بريدکې يو افغان سرتيرى  شهيد او درې تنه نور سرتيري ټپيان شول.
دجوزجان ولايت امنيه قوماندان فقير محمد جوزجاني باخترآژانس ته وويل: دغه پيښه تېر ماښام هغه وخت رامنځته شوه چې وسله والو طالبانو د افغان پوځيانو په اکمالاتي کاروان بريد وکړ او له امله يې يو افغان سرتيرى شهيد او درې تنه نور سرتيري ټپيان شول.
يوه اړونده خبرځاى وويل چې په دې پيښه کې طالبانو ته هم د سر زيان اوښتى دى خو دقيق شمېر يې تراوسه پورې معلوم نه دى .

کابل باختر د مرغومي دويمه :
په سمنګانو ولايت کې د اوبولګولو دکانال دڅلوروبندونوجوړولو کار نن پيل شو.
دغه پروژې دکليو دبيا جوړولو او پراختيا وزارت له لارې د آسيا دپرمختيا بانک په مرسته عملي کيږي.
دسمنګانو ولايت دکليو دبياجوړولو اوپراختيا رياست د پروګرامونو آمر او سرپرست انجنير سيد محمد محمدي باخترآژانس ته وويل: د دغو پروژو لګښت لس مليونه او يوسلو اووه پنځوس زره افغانۍ اټکل شوې دي چې د آسيا د پرمختيا بانک  له لارې ورکول کيږي.
د ده دڅرګندونو له مخې: په دغو پروژوکې د سرقد د کلي د کانال د بندجوړول او د هغه  د شلو مترو محافظتي ديوال جوړول او د سمنګانو ولايت په مرکز ايبکو پورې اړوند د آئينه چه دکلي دکانال جوړول او دغه راز د دغه ولايت د فيروزو نخچير په ولسوالۍ کې د چنارګه دکلي دکرنې دکانال جوړول شامل دي او په په بشپړيدو سره يې د٤٨٠٠ جريبه باغي ځمکې ستونزي چې د دغو کليو په ١٢٣٣ کورنيو پورې اړه لري؛ حل کيږي او له بله پلوه د هغوزرګونوکورنيو د څښاک اوبه چې دکانال په تګلوري کې دي؛ هم لرېې کيږي .

کابل باختر د مرغومي دويمه :
پنځه تنه وسله وال طالبان تيره شپه په هلمندکې له پوليسو سره په نښته کې ووژل شول .
دهلمند د والي ويندوى عمر ځواک باخترآژانس ته وويل: وسله والوطالبانو دمارجې ولسوالۍ په مربوطاتوکې د پوليسو په امنيتي پوستو بريد وکړ چې له امله يې پنځه تنه وسله وال طالبان ووژل شول او دوه تنه پوليسان ټپيان شول.
  خبرځاى زياته کړه چې ټپيان د لښکرګاه ښار ملکي روغتون ته ليږدول شوي او د روغتون د مسوولينو دڅرګندونو له مخې: ديوتن ټپي روغتيايي حالت خراب دى.

Monday, 23 December 2013 12:48

تبصره:

کابل باختر د مرغومي دويمه :
په داسې حال کې چې نړيوال ځواکونه د افغانستان د امنيتي او دفاعي بنسټونو د ظرفيت جوړولو او سمبالولو په ژمنې سره له دغه هيواد څخه وځي؛ خو د پوځي تاسيساتو او وسايطو ويجاړول کيداى شي د هغو ژمنو پرخلاف حرکت وي چې دنړيوالو ځواکونو او د افغانستان په قضيو کې دښکيلو هيوادونو له خوا شوې دي.
دباخترآژانس مبصر ليکي: هغه بهرني ځواکونه چې امريکايي پوځيان پکې زيات کميت لري؛ له افغانستان څخه د وتلو په حال کې دي.
له افغانستان څخه د بهرنيو پوځيانو د وتلوپروګرام د٢٠١٤ ميلادي کال په وروستيوکې د پرتګال په لزبن کې د ناټو د مشرانوپه غونډه کې طرحه شو.
دناټومشرانوپه هغې بله غونډه کې چې د امريکا په شيکاګوښارکې جوړه شوه؛ په دې طرحه کې چې د لزبن د غونډې په پريکړه باندې ټينګار وکړ؛ د افغانستان په دفاعي او امنيتي بنسټونوکې يې د ظرفيت  جوړولو اوسمبالولو موضوع يوه جدي اړتيا وبلله او د ناټو هرغړى هيواد د افغانستان د امنيتي او دفاعي بنسټونو د ظرفيت جوړولو، سمبالولو او ملاتړ په مقصد يو لړ ژمنې وکړې.  يواځې امريکا ديو داسې هيواد په توګه چې په افغانستان کې ډير زيات پوځي کميت لري؛ ژمنه شوه .
افغان امنيتي ځواکونو د لزبن له غونډې وروسته په خپلواک ډول د هيواد د دفاع لپاره خپل تيارى اعلام کړ او له بهرنيو ځواکونو څخه افغان پوځيانو ته د امنيتي مسووليتونو دسپارلو کار پيل او اوس نږدې دپاى ته رسيدو په حال کې دى.
هغه څه چې د افغانستان دولت دبهرنيو پوځيانو د وتلو په درشل کې بيان کړل او دبهرنيومتحدينوله خوا يې تاييد شول؛ د افغان پوځيانو د ظرفيت جوړولو او سمبالولو په مقصد مرسته وه.
دغه راز په افغانستان کې دبهرنيو پوځيانوقوماندانانو له افغانستان څخه د وتلو د پروګرام له پيل کيدومخکې ژمنه وکړه چې خپل پوځي تاسيسات او وسايط چې د ليږدونې وړ نه دي اوکيداى شي د افغانستان د امنيتي او دفاعي بنسټونو لپاره ګټور او اغيزمن وي؛ ددغه بنسټ په واک کې ورکوي او د افغانستان دولت د بهرنيو ځواکونو دپوځي تاسيساتو او امکاناتو د سپارلو دپروګرام دسالم مديريت په مقصد يوکميسيون جوړکړچې دغه بهير په مطلوب ډول تحقق ومومي. خوکله چې له افغانستان څخه د وتلو پروګرام پيل شو؛ معلومه شوه چې دغې ژمنې او پريکړې خپل ځاى نه دى پيداکړى او افغان پوځيانو ته د بهرنيو ځواکونو دپوځي تاسيساتو اوامکاناتو د سپارلو بهير لکه څنګه چې لازمه ده او ژمنه يې شوې وه؛ نه عملي کيږي .
بهرنيو ځواکونو له خپلو ناڅيزو پوځي امکاناتو پرته نور امکانات يا له منځه يوړل او يا دا چې له ځان سره يې وليږدول. لکه څنګه چې په پکتيکا کې ميشتو بهرنيو پوځيانو د ښرنې ښار ته څېرمه خپله اډه چې د څه دپاسه شلو مليونو ډالرو په لګښت يې جوړه کړې وه؛ نه يواځي داچې افغان پوځيانو ته يې ونه سپارله، بلکې هغه يې ويجاړه کړه آن د اوبو کيندل شوې څايې بيا ډکه کړه. ښرنې ته ورته اقدامات د هيواد په نورو سيمو فارياب ، بادغيس ، کونړ او په نورو ځايونوکې شوي دي .
د را رسيدلو معلوماتو له مخې: بهرنيو پوځيانو په دې پلمه چې ګني افغان ځواکونه له دغو تاسيساتو او امکاناتو څخه داستفادې او دهغو دساتنې لپاره لازم ظرفيت نه لري؛ دهغو په ويجاړولو لاس پورې کړى دى .
دغه شان پلمې کيداى شي په افغانستان کې د بهرنيو ځواکونو په ناکامۍ او بې پروګرام والى سند ولري او دا کار ثابتوي چې بهرنيو پوځيانو په تيرو دولسوکلونو کې يواځې د افغان پوځيانو د ملاتړ او سمبالولو شعارونه ورکړل. خو په عمل کې يې څه ونه کړل. هغوى ژمنه کړې وه چې د کادرونو په روزنه او د افغان ځواکونو په ظرفيت جوړولوکې مرسته کوي او اوس په خپله دافغان په دفاعي بنسټونوکې دنه ظرفيت خبرې کوي .
په دې ترتيب بهرنيو پوځيانو په عملي توګه ونه غوښتل چې په افغانستان کې د کادرونو د روزنې او ظرفيت جوړولوبهير عملي شي. له دغو ټولو پلمو سره سره د افغانستان اردو بهرنيو ځواکونو د دغو پوځي تاسيساتو او امکاتاتو د ساتنې او کارولو لپاره مجرب او پياوړي کادرونه لري. لکه څنګه چې دخپل هيواد د امنيت په تامينولوکې ښه وځليدل؛ دپوځي تاسيساتو او تجهيزاتو د ساتنې او کارولو ظرفيت هم لري .
دملي امنيت شورا په خپلې پرونې غونډه کې دغه مسئله وڅيړله او دبهرنيو پوځيانو له خوا د نظامي تاسيساتو او تجهيزاتو ويجاړول يې يو غير موجه عمل وباله اومسوولوحکومتي بنسټونو ته يې دنده وسپارله چې په دې باب دافغانستان دحکومت جدي انديښنې دې د آيساف دځواکونو قوماندانانو ته ورسوي .
ديادونې وړ ده چې دبهرنيو ځواکونو له خوا دپوځي تاسيساتو او تجهيزاتو د ويجاړولو بهير د هغوى په نسبت د افغانستان د خلکو ترمنځ بې اعتمادى او بې باورى ته پراختيا ورکړي؛ ښه به وي چې بهرني ځواکونه په هوښ راشي او د خپلو ژمنو درناوي وکړي او عملي يې کړي .

کابل باختر د مرغومي دويمه :
ديارلس تنه وسله وال طالبان د کندز او جوزجان په ولايتونوکې له امنيتي ځواکونوسره په نښتوکې وژل شوي دي.
په دغو جګړه مارانو تېره شپه کله چې په تروريستي فعاليتونو بوخت وو؛ د اردو او دپوليسو دځواکونو له خوا بريد وشو او ووژل شول .
لومړۍ جګړه تيره شپه د اوو بجو په شاوخواکې دشبرغان ښار په مربوطاتوکې هغه وخت ونښته چې د پوليسو د سرتيرو يوې ګزمې د وسله والو طالبانو په يوکاروان بريد وکړ .
په دې نښته کې شپږ تنه وسله وال طالبان ووژل شول.
دجوزجانولايت د امنيې قوماندانۍ مرستيال باخترآژانس ته وويل چې په دې نښته کې شپږ تنه وسله وال طالبان وژل شوي دي. 
يوه اړونده خبرځاى وويل چې په دې نښته کې سرتيروته زيان نه دى اوښتى .
دويمه جګړه تېره شپه ناوخته دکندز ولايت په خان آباد ولسوالۍ کې هغه وخت ونښته چې د اردو سرتيرو د وسله والو طالبانو په يوه پټنځي بريد وکړ.
په خان آباد ولسوالۍ کې يوسيمه ئيز مسوول وايي چې په دې پيښه کې د وسله والو د ډلې ديو سيمه ئيز قوماندان په ګډون اووه تنه وسله وال طالبان وژل شوي دي.
ويل کيږي په دې نښته کې افغان سرتيرو ته د سر زيان نه دى اوښتى .
دکندز اوجوزجان د ولايتونو سيمه ئيز مسوولين وايي چې  ددغو نښتو په بهيرکې  يې د وسله والو طالبانو په لسګونو سپک او درانده جنګي وسايل ترلاسه کړي دي.

کابل \ باختر  د چنګاښ ١٨ :
مرکزي بانک پنځوس مليونه ډالره د ليلام په ډول پلوري.
ددغه بانک په هغه ليک کې چې باخترآژانس ته ليږل شوې ده؛ ويل شوي دي: د افغانستان  بانک د روان کال د مرغومي دمياشتې په٣ مه نيټه د سه شنبې په ورځ پنځوس مليونه ډالره دليلام په ډول پلوري .
په شرايطوبرابرهغوصرافانواوتجارتي بانکونوته چې پخوايې يومليون پنځه سوه زره افغانۍ يې دتضمين په ډول دافغانستان بانک دبازاردعملياتو په لوى مديريت کې تحويل کړې دي؛ بلنه ورکول کيږي چې په دغو داوطلبيوکې ګډون وکړي او دليلام ګټوونکي مکلفيت لري چې حسابونه دې تر دوو ورځو پورې تصفيه کړي  .
له ټولوبرخه والوڅخه غوښتنه کيږي چې د داوطلبۍ فورمې دليلام د ورځو د سهارپه نهوبجو د بازار د عملياتو له مديريت څخه ترلاسه کړي اوپه نهه نيمو بجودې بيرته وسپاري.
هغه صرافان چې تراوسه پورې يومليونو پنځه سوه زره افغانۍدتضمين په ليلامونوکې دګډون په مقصدنه دي تحويل کړي؛ کولاى شي له داوطلبي څخه يوه ورځ مخکې دخپل تضمين پيسې تحويلې اوپه راتلوونکو ليلامونو کې دې ګډون وکړي .
ديادونې وړ بلل کيږي چې دمعاملوقسمي ترسره کول مجاز نه دى، د ليلام ګټوونکي دخپل ذمت پيسې ټولې يوځاى په نغدي ډول اوپه حوالې سره په ټاکلې موده کې په  بانک کې تحويلې کړي.

کابل باختر د مرغومي دويمه :
دکورنيو چارو وزارت ويندوى وايي چې په روان ميلادي کال کې د ٢٠١٢ کال په پرتله د پوليسو د سر د زيان شمېر په سلوکې پنځلس زيات شوى دى.
دباخترآژانس دخبريال دخبر له مخې: دکورنيوچارو وزارت ويندوى صديق صديقي نن په يوه خبري غونډه کې وويل چې په روان ميلادي کال کې د ٢٠١٢کال په پرتله دپوليسو د سر د زيان شمېر په سلوکې پنځلس زيات شوى دى او دپوليسو د سر زيات زيان په واټونوکې د ښخ کړى  شويو ماينونو د چاودنې زيږنده دى.
ده دطالبانو هغه پروګرام چې دخالد بن وليد دعملياتو په شتون کې ترسره شو؛ يو ناګام پروګرام وباله او ويې ويل چې دوى په دې نه دي بريالي شوي چې آن يوه ولسوالۍ ونيسي.
صديقي زياته کړه: په ٢٠١٤ کال کې د ملي پوليسو زيات تمرکز به دپولو دټينګښت په باب وي چې هيوا ته د ډار اچوونکو د راننوتو مخه ونيسي .
دغه راز ده وويل چې دانتخاباتو د امنيت د تامينولو په باب هلې ځلې دوام لري اوخلکو ته ډاډ ورکوم چې پوليس د انتخاباتو د ترسره کولو د امنيت د ترسره کولو ځواکمني لري اوخلک کولى شي په يوه خوندي فضاکې په انتخاباتوکې ګډون وکړي .
دکورنيو چارو وزارت ويندوى وويل چې ٢٠١٣ کال دپوليسو دمسلکي زده کړې لپاره يوښه فرصت و .
ده وويل چې تيره اوونۍ ديرش تنه ميرمنې دمسلکي زده کړو لپاره مصر ته واستولې شوې او ټاکل شوې ده چې ١٢٠ تنه نورې ميرمنې د زده کړې لپاره ترکيې ته واستولې شي او د ښځينه پوليسو د زياتې روزنې لپاره کار دوام لري.
دغه راز په يوبل پړاوکې دپوليسو يو شمېر افسرانو په ترکيه او په نورو هيوادونو کې زده کړې  وکړې.

کابل باختر د مرغومي دويمه :
دبهرنيو ځواکونو يوسرتيرى نن دافغانستان په ختيځ کې ووژل شو .
باخترآژانس دهغې مطبوعاتي اعلاميې له مخې چې د آيساف له خوا خپره شوه؛ خبر راکړ چې دغه سرتيرى د وسله والو مخالفينو له خوا په ډزو سره وژل شوى دى.
د آيساف په خبرپاڼه کې د وژل شوى سرتيرى دهويت او دپيښې ددقيق ځاى په باب څه نه دي ويل شوي .