18 January 2020

RSS Facebook

سوداگریز


تازه خبرونه

درې طالبان په بادغيس کې ووژل شول

کابل/ دمرغومي ٢٧مه/ باختر درې وسله وال طالبان نن سهار د...

څلور طالبان په دايکنډي کې ووژل شول

کابل/ دمرغومي٢٧مه/ باختر څلور وسله وال طالبان تېره شپه د دايکنډي...

په غورکې د پوليسو دوه سرتېري ټپيان شول

کابل/ دمرغومي ٢٧مه/ باختر د غور – هرات لويې لارې په...

Youtube Player

khantry design

سوداگریز

سوداگریز

کابل باختر دسلواغي شپاړلسمه :
په جوزجان ولايت کې دواورې داورښت او داوبو دڅپانده کيدو له امله داستوګنې سل کورونه زيانمن شوي دي .
داوبو دڅپانده کيدو له امله دتيرې شپې په نيمايي کې دشبرغان دخلکو کورونه ويجاړ شوي دي .
دجوزجان ولايت مرستيال انجنيرعبدالرحمن محمودي باختراژانس ته وويل  دبيړني حالت دکميټې مسوولينو په همکارۍ له سلوزيانمنو شويو کورنيو سره  لازمې مرستې شوې دي .
دغه مرستې دزيانمنو شويوکسانو دزيان دکچې په پام کې نيولو سره شوې دي . او بايد دولتي او غير دولتي مرستندوى مرکزونه له زيانمنوشويو کورنيو سره دمرستي لپاره اقدام  وکړي .

واشنګتن  باختر دسلواغي شپاړلسمه:
دامريکا دبهرنيوچارو د وزارت ويندوى جين ساکې څرګنده کړه چې امريکا دافغانستان دحکومت او طالبانو ترمنځ دسولې دهلوځلو ملاتړ کوي .
جين ساکي په واشنګتن کې خبريالانو ته وويل موږ له يوې مودې راپديخوا ددغه اقدام ملاتړ کړى دى .
ده زياته کړه  تاسې له ماڅخه تل اوريدلي دي چې په دې باب مې خبري کړي دي او هغو کسانو چې له ما څخه مخکې هم و په دې باب  خبري کړي دي چې امريکا دافغانانوپه مشرۍ دروغې جوړې دبهير په جدي توګه ملاتړ کوي .
  ده زياته کړه البته داڅرګنده ده چې افغانان بايد له افغانانو سره خبري وکړي له همدې امله دغه څرګندونې  چې موږ ددغه شان خبرو ملاتړ نه کوو ، حقيقت نه لري

په روسيه کې دشمالي کوريا سفير کيم ين جه پرون وويل دشمالي کوريا حکومت باور لري چې دامريکا او دجنوبي کوريا ګډ تمرينونه په شمالي کوريا داټومي بريد په لاره کې دتياري په مانا ده .
ددغه سفير دڅرګندونو له مخې، موږ دغه شان تمرينونه دښمني او خطرناک بولو،ځکه هغوى له پيل څخه ترپاى پوري له شمالي کوريا سره داټومي جګړي لپاره دتياري  په توګه دي چې ددفاعي  تمرينونو تر پوښښ لاندي ترسره کيږي .
ددغه شان تمرينونو هدف دشمالي کوريا نيول دي .
په روسيه کې دشمالي کوريا دسفير دڅرګندونو له مخې ، ددفاعي تمرين په توګه ددغه پوځي مشق نومول يوتش خيال دى .
  دجنوبي کوريا حکومت پخوا په واروار  اعلام کړى و چې دامريکا او جنوبي کوريا تمرينونه به دمهال ويش له مخې ترسره شي . دغه تمرينونه بايد دروانې ميلادي مياشتي په وروستيو کې ترسره شي .

Wednesday, 05 February 2014 08:43

تبصره :

کابل باختر دسلواغي شپاړلسمه :
انتخابات  يو ملي بهير دى او دافغانستان داسلامي جمهوريت دولت په جدي توګه هلې ځلې کوي چې دغه بهيرپه شفاف  او په هراړخيزه توګه او دنورو دلاسوهنې څخه  پرته ترسره شي .
دباختراژانس مبصر ليکي ، دجمهوري رياست او دولايتي شوراګانو انتخابات دراتلونکي هجري لمريز کال دوري دمياشتې په شپاړلسمه نيټه په ټول هيواد کې ترسره کيږي .
سره له دي  چې  په هيواد کې دانتخاباتو دترسره کولو دڅرنګوالى  په باب په تيرو وختونوکې نارې سورې وجودې وې  خو دانتخاباتودبهير پيل چې اوس دانتخاباتي مبارزوپړاو ته رسيدلى دى داکار يقني کړ چې په هيوادکې انتخابات يوحتمي بهير دى او په خپل ټاکلي وخت کې ترسره کيږي .
په افغانستان کې انتخابات په داسې حال کې ترسره کيږي چې دافغانستان خلک په تيرو دولسو کلونو کې په هيواد کې ددوو نورو انتخاباتو شاهدان دي او په دې برخه کې  يې زياتې تجربې ترلاسه کړي دي .
په تيرووختونوکې دغه بهير دبهرنۍ لاسوهنې او دکورنيو زورازموينو له پلوه زيانمن و او په دي نسبت يولړ خبرې او نارې سورې  موجودي وي .
هغه څه چې له تيرو وختونو څخه زده  شوي دي دغه انګيزه پياوړې کوي چې په راتلونکو انتخاباتو کې بهرنۍ لاسوهنې او ددولتي مقاماتو او کارکوونکو داغيزې لپاره  ځاى نشته .
  دافغانستان دولت زياتې هلې ځلې وکارولي چې دغه بهير په بشپړه توګه افغاني وي .
په شفاف ډول او له لاسوهنې پرته ترسره شي  . دانتخاباتي شکايتونو داوريدو دکميسيون  افغاني کول او دهغه  فرمان صادريدل  چې دروان کال دتلې دمياشتې په يوولسمه نيټه صادر شو او په هغه کې ټولو ملکي او نظامي دولتي کارکوونکو ته لارښوونه وشوه چې په انتخاباتوکې دبي طرفي اصل رعايت کړي دهغو اقداماتو يوه برخه ده  چې دغه بهيرله بهرنۍ اغيزې څخه  خوندي وي او دنوماندانو لپاره له دولتي امکاناتو څخه استفاده ونه کړي .
دغه اقدامات کولاى شي خلکوته دانتخاباتو بهير ته زيات اعتبار ورکړي اوهغوى په دي باوري کړي چې په راتلونکې کې انتخابات له سياسي شخړو څخه لري او دبهرنيو کړيو له لاسوهنې  او ددولت مقاماتو له اغيزې  څخه لري  ترسره کيږي .
په دي ترتيب دانتخاباتو شفافيت او هر اړخيزوالى ضمانت شوى دى .
دافغانستان داسلامي جمهوريت جمهور رييس حامدکرزي وزيرانو شورا په وروستي غونډه کې يوځل بيا په همدې ټکي باندې ټينګار وکړ او په دي ترڅ کې چې امنيتي ځواکونه يې موظف کړل چې په ټول هيواد کې دانتخاباتي مبارزو په ډاډمن امنيت کې پاملرنه او جدي اقدامات  وکړي . ددولت له ټولو ملکي او نظامي کارکوونکو او منسوبينو څخه يې وغوښتل چې دجمهوري رياست دروان کال دتلې دمياشتې ديوولسمې نيټې د٧٧ ګڼه  فرمان مادې د١٣٩٣ کال په انتخاباتو کې په بشپړې بيطرفي  او په جدي توګه  رعايت کړي او دخلکو درايو درناوى وکړي .

پيښورباختر دسلواغي شپاړلسمه :
  دپيښور ښار په يوه سيمه ئيز هوټل کې تيره شپه دبم دچاودنې له امله  نهه تنه  ووژل شول او پنځوس تنه نور ټپيان شول .
باختراژانس دپاکستان دډان ورځپانې دانترنتي سايت له خولې خبر راکړ. دغه پيښه پاک هوټل ته څيرمه رامنځته شوه او ښځې او ماشومان هم ددغې پيښې په ټپيانو کې شامل دي .
  دپوليسو ديوه افسر دڅرګندونو له مخې ، دغه هوټل چې يوې حسينې ته څيرمه موقعيت لري دشيعه ګانو داستفادې وړ و، اوزياتره وژل شوي  کسان شيعه ګان  وو
دغه چاودنه له هغه وروسته وشوه چې حکومت او دطالبانو استازو ويلي دي چې په دغه هيواد کې دڅوکلنو نښتو دپاى ته رسولو لپاره خبرې کوي .
دخيبر پښتونخوا ايالت دروغتيا وزير شوکت يوسفزي  رسنيو ته وويل چې څه ناڅه  شپږ کيلوګرامه  چاوديدونکي  توکي په دغه بم کي کارول  شوي وو او دځان مرګي بريد کوونکي لاسونه او پښې  اودبدن نور غړي دپيښې په سيمه کې ترلاسه شوي دي .
ټپيان دليديد ريدينګ روغتون ته ليږدول شوې او په دغه روغتون  کې بيړنې حالت اعلام  شوي دي . 
له دغې پيښې څخه يوه ورځ مخکې دشيعه ګانو يوه مشر حاجي سردار علي په پيښور ښار کې په ډزوسره ووژل شو او مړى يې دليديدريدينګ  روغتون ته وليږدول شو چې له روغتون څخه بهر دمظاهرو سبب شو .

کابل – باختر دسلواغې دمياشتې ١٥
سره له دې چې د سالنګونو لويه لاره نن له غرمې وروسته دترافيکو پرمخ پرانستل شوه؛ خو د سالنګونو د ساتنې او څارنې آمرې وايي: د واورې بيا اورښت د سالنګونو د بياتړلو احتمال زيات کړى دى.
د سالنګونو د ساتنې او څارنې آمر جنرال محمد رجب د باختر آژانس خبريال ته وويل: له هغه وروسته چې د دوشنبې په شپه د واورې اورښت د لويې لارې د تړل کيدو سبب شو؛ دغه لويه لاره د واورې ښويدنې دنهه څلويښتو طبيعي او د څلورو جبري واورې ښويدنې شاهده وه. د لارې خدماتي کارکوونکي وکولاى شول نن له غرمې وروسته واټ پاک کړي او د وسايطو د تګ راتګ لپاره دوه کرښې پرانيستې او په دې ډول په لاره کې دترافيکو دبهير دبېلابېلو زمينه برابره شوه، خو نن مازيګر په سالنګونوکې د واورې اورښت بيا پيل شو او اټکل کيږي چې د واورې اورښت د پنجشنبې تر ورځې پورې دوام ومومي.
جنرال رجب وويل: د سالنګونو د لويې لارې د ساتنې او څارنې کارکوونکي له ټولو امکاناتو سره هلې ځلې کوي چې لاره د ترافيکو پرمخ پرانستې وساتل شي، خو دخلکو سر او مال زيات ارزښت لري.
ده له موټر چلوونکو او مسافرينو څخه چې د سالنګو په لويه لاره تګ راتګ کوي؛ وغوښتل چې د سالنګونو د ساتنې او څارنې د موظفينو لارښوونو او خبرتياوته متوجه واوسي او په دې برخه کې د سالنګونو له موظفينو سره دې همکاري وکړي.

کابل – باختر دسلواغې دمياشتې ١٥
د انتخاباتي شکايتونو دکميسيون ويندوى وايي: ددغه کميسيون ولايتي دفترونه په نږدې راتلوونکي کې جوړيږي.
دا په داسې حال کې چې په هيوادکې انتخاباتي مبارزې پيل شوې دي او دجمهوري رياست او د ولايتي شوراګانو يو شمېر نوماندانو په ولايتونوکې د انتخاباتي شکايتونو د کميسيون د دفترونو د نشتوالى له امله شکايت او انديښنه څرګنده کړې ده.
د انتخاباتي شکايتونو دکميسيون ويندوى نادرمحسني د باختر آژانس له خبريال سره په مرکه کې وويل: ټاکل شوې ده ډير ژر د هيوادپه ټولو ولايتونوکې دانتخاباتي شکايتونو ولايتي دفترونه جوړشي چې په همدې مقصد يو سلو دوه تنه کميشنران مو خپلو ولايتي دفترونو ته پيشنهادکړي دي چې دجمهوري رياست له منظورى وروسته به په کار وګومارل شي.
محسنى زياته کړه: دا هغه کار و چې بايد پخوا شوى واى، خو د ستونزو او په خپل وخت د دغه کميسيون د نه جوړيدو له امله د ولايتي دفترونو د جوړولو پروګرام وځنډيد.
ده زياته کړه: دغه کميسيون دانتخاباتي مبارزو په بهيرکې د انتخاباتي شکايتونو او سرغړونو څيړنې ته چمتو دى.
ده وويل: دجمهوري رياست د نوماندانو د انتخاباتي مبارزو په پيل سره که چيرې نوماندان د انتخاباتي اصولو پرخلاف عمل وکړي؛ له هغوى سره به قانوني چلند وشي او له نوماندانو څخه يې وغوښتل چې د انتخاباتي اصولو او قوانينو، لايحو او طرز العملونو دڅرګندونو حکمونو درناوي وکړي او هلې ځلې دې ونه کړي چې د انتخاباتو د فضا په ګډوډولو او د انتخاباتو اصولو څخه په سرغړونې سره د انتخاباتو بهير اغيزمن کړي .
دجمهوري رياست په انتخاباتي مبارزوکې يوولس تنه نوماندان سيالي کوي.

کابل – باختر دسلواغې دمياشتې ١٥
دبهرنيو چارو په وزارت کې نن يو موافقه ليک لاس ليک شو چې د هغه له مخې جاپان د کابل د نړيوالې هوايي ډګر د ودې او بيارغاونې په خاطر درې څلويښت مليونه ډالره لګوي.
دباختر آژانس دخبريال دخبرله مخې: د بهرنيو چارو وزير ضرار احمد عثماني نن دکابل د نړيوالې هوايي ډګر د پرمختيا او بيارغاونې په مقصد د جاپان د وړيا مرستو موافقه ليک په کابل کې د دغه هيواد له سفير سره لاس ليک کړ.
دبهرنيو چارو وزير ضرار احمد عثماني ددغه موافقه ليک له لاس ليک کولو مخکې وويل: جاپان درې څلويښت مليونه ډالره د ترمينل د ودانۍ، د اکسرې ماشين، د څيړنې امنيتي دروازې او د بس موټرونو په ګډون د ځينو تجهيزاتو د پيرودنو په برخه کې لګوې ده؛ وويل: جاپان په افغانستان کې دويم مرستندوى دى چې تراوسه يې په بېلابېلو برخوکې پنځه مليارده ډالره مرسته کړې ده چې سل مليونه ډالره يې دکابل په نړيوالې هوايي ډګرکې لګولې ده.
دافغانستان دبهرنيو چارو د وزير دڅرګندونو له مخې: جاپان د توکيو په کنفرانس کې ژمنه وکړه چې له افغانستان سره تر ٢٠١٧ کال پورې نهه مليارده ډالره مرسته کوي .
وروسته دجاپان سفير هيروتا کاهاشي وويل: دکابل نړيوالې هوايي ډګر له نړۍ سره د افغانستان دروازه ده او له دغه ډګر سره زموږ مرستې د افغانستان او دجاپان دخلکو ترمنځ د دوستي ښکارندوى دي.
ده وويل: دکابل له نړيوال هوايي ډګر سره د جاپان مرستې د مسافرو د راستيندو په خاطر د دويم پوړ د احيا کولو، امنيتي دروازې، د ميدان پراختيا او د مسافر د کنترول د ماشينونو په خاطر دي.

کابل – باختر دسلواغې دمياشتې ١٥
د نجونو د فوټبال دسياليو لومړى پړاو نن د فوټبال د نړيوال فدراسيون دفيفا له خوا د ځوانمردانه لوبې دجايزې د ورکولو په مناسبت د هيواد د فوټبال فدراسيون له خوا په کابل ښارکې پيل شو.
دباختر آژانس د خبريال دخبرله مخې: دغه سيالۍ چې د فوټبال له دولسو ټيمونو څخه د دوه سوه تنو ورزشکارو نجونو په ګډون د المپيک د ملي کميټې پرسرپټې جمنازيوم کې پيل شوې؛ د اطلاعاتو او فرهنګ وزارت د خپرونو د چارو معنيې  سيمين حسن زاده له خوا پرانستل شوې.
دې ددغو سياليو د پرانستلو په مراسموکې د خبرو په ترڅ کې وويل: ((زموږ ټولنه دبياجوړولو په حال کې ده. موږ د خپلې ټولنې دجوړولو لپاره پياوړو، ځواکمنو او د سالم جسم او روان او د سالمې مفکورې لرونکو ښځو او نارينه وته اړتيا لرو. په همدې مقصد بايد ټولو په تېره بيا ښځو او نجونو ته د ورزشي فعاليت د زمينو د برابرولو لپاره جدي اقدامات وشي.))
ميرمن حسن زاده زياته کړه: ((زموږ په ټولنه کې ښځې د تاريخ په اوږدوکې په يو ډول نه يو ډول له خپلو انساني او اسلامي حقوقو څخه بې برخې ساتلې شوې دي. په اوس وخت کې هم په دغه قشر تاوتريخوالى کيږي او د ټولنيزو، فرهنګي او وزرشي فعاليتونو په بېلابېلو برخوکې د هغوى شتون کله ناکله له ګواښونو سره مخامخ کيږي. لکه څنګه چې داسې کورني شته، اجازه نه ورکوي چې لونې يې په بېلابېلو برخوکې فعاليت ولري. په تېره بيا هم د هيواد په دننه کې او له هيواد څخه په بهرکې په ورزشي ډګرونوکې د هغوى له شتون سره مخالفې دي.))
دخپرونو دچارو معينې په خپلو خبروکې چې د ټولنيز ژوندانه په بېلابېلو ډګرونو کې د شتون لپاره د ځوانو افغان نجونو د هيلې، ارادې او زياتو هڅو پيغام ورسره او د ورزشکارو نجونو په خطاب کې وويل: ((زما خويندو! له دې وروسته په زياتې انګيزې او جديت او په غوڅ هدف سره په ورزشي ډګرونوکې ګام کيږدئ او خپلې ټولنې او هيواد ته وياړ و ګټئ. زه به ستاسو ملاتړې او ستاسو ترڅنګ و اوسم او د اطلاعاتو او فرهنګ وزارت چې د فرهنګ جوړولو رسالت په غاړه لري؛ د رسنيو له لارې د نجونو د ورزش د فرهنګ دپراخ بنسټ کولو لپاره به جدي هلې ځلې وکړي.
سيمين حسن زاده دخپلو خبرو په پاى کې چې د ورزشکارو نجونو له تاوده هرکلي سره مخامخې کيدې؛ زياته کړه: ورزش يوازې جسمي سلامتيا نه ده بلکې په اوس وخت او شرايطوکې د ملتونو د يواوالي او پيوستون څرګندوى ده.
د يادونې وړده چې په دغو سياليوکې دولس ټيمونه دڅلورو ډلو په چوکاټ کې سيالي کوي .
دغه سيالۍ به د روانې مياشتې تر اووه ويشتمې نيټې پورې دوام ومومي.
دغه راز په پام کې ده هغه کسان چې په دغو سياليوکې ښه وځليږي؛ د هيواد د نجونو منتخب ټيم ته لاره پيدا کړي.

کابل – باختر دسلواغې دمياشتې ١٥
يو ترکي شرکت اعلام وکړچې دهرات دسمنټو دفابريکې په احيا کولو او بيارغاونه کې ونډه اخلي.
ددغه شرکت د مسوولينو د څرګندونو له مخې: د هرات د سمنټو فابريکه به له بيارغاونې او نوى کولو وروسته په ورځ کې د څلور زره ټنو سمنتو د توليد ظرفيت ولري.
دا په داسې حال کې ده چې افغانستان هرکال د خپلې اړتيا وړ سمنټ له بهر څخه واردوي .
ددغه شرکت جګپوړو مقاماتو دهرات له والي سيد فضل الله وحيدي سره په کتنه کې وويل: چمتو دي چې په لسو کلونوکې يو نيم مليونه امريکايي ډالره د هرات د سمنټو دفابريکې دبيارغاونې په خاطر ولګوي .
ددغه شرکت رييس وويل: يو مليون امريکايي ډالره چې ټاکل شوې ده په دې لاره کې پانګه وشي؛ په وړيا ډول د دولت په واک کې ورکول کيږي .
ده وويل: د سمنټو په فابريکه کې د توليد د دستګاوو دمونتاژ په بېلابېلو پړاونو کې له له بې لوګي پرمختللو دستګاوو څخه چې د ژوندانه له چاپيريال ساتنې سره هم مرسته کوي؛ استفاده کيږي .
په همدې حال کې د هرات والي سيد فضل الله وحيدي ددغې فابريکې د بيارغاونې په برخه کې دترکي دخصوصي سکټور د تيارى د اعلام څخه له امله په هرکلي سره وويل: ددغه پروګرام په تطبيق سره د اقتصاد له ودې سره په مرستې برسيره د هرات ولايت زرګونو تنو ته د کار زمينه هم برابريږي.
دغه شرکت وايي: د سمنټو دفابريکې په بيا احيا کولو سره به په ورځ کې څلور زره ټنه سمنټ توليد شي .
په هرات کې د پانګې اچونې د ملاتړ د ادارې يو مسوول باختر آژانس ته وويل: په داسې شرايطوکې چې افغانستان په کال کې له پنځلسو مليونو څخه تر ديرشو مليونو ټنو پورې سمنټو ته اړتيا لري چې له ايران، پاکستان او آن د پخواني شوروي له ځينو هيوادونوڅخه نامييږي.
دسمنټو د فابريکې بيارغاونه کولاى شي دساختماني سکټور په پرمختياکې ګټور وي. له بله پلوه د اقتصاد دځينې کارپوهان د سمنټو دپروژې د بيارغاونې د ارزښتناک بللو په ترڅ کې ټينګاروي چې د امنيت د تامينولو او د خلکو داقتصاد د لوړولو په لاره کې له دغه شان پروژو څخه ګټه اخستنه اساسي رول لري.
د هرات دسمنټو د فابريکې دبنسټ ډبره په ١٣٥٥ کال کې د وخت د چک سلواکيا هيواد په همکارۍ د هرات ښار په لويديځ کې کيښودل شوه او د جوړولو کاريې په سلوکې اتيا او د اساسي تجهيزاتو په سلوکې شل بشپړ شول. خو د کورنيو جګړو له امله کاريې بشپړ نه شو.
د اقتصاد کارپوهان هيله لري چې د دغې فابريکې احيا کول افغانستان له توليدي پلوه په خپلو پښو د دريدو په لاره کې پرمخ يوسي.