11 July 2020

RSS Facebook

سوداگریز


تازه خبرونه

د کانونو په سکتور کې ولسي مشارکت ته زمینه برابرېږي

د کانونو په سکتور کې ولسي مشارکت ته زمینه برابرېږي

کابل/ د چنګاښ ۱۹مه/ باختر د ۳۴ ولایتونو له والیانو او...

په حکومتولۍ کې د ښځو ونډه

کابل / د چنګاښ ٢٠ مه / باختر په دغو وروستیو...

Youtube Player

khantry design

سوداگریز

سوداگریز

دوشنبه  باختر د غبرګولي  اوولسمه :
دتاجکستان  جمهور رييس  امام علي رحمان  دافغانستان دبهرنيو چارو له وزير  ضرار احمدعثماني سره په کتنه کې وويل: ددواړو دوستو او ورونو هيوادونوتاجکستان  او افغانستان همکارۍ  دافغانستان دجمهوري رياست دراروانو انتخاباتو دنتيجې په پام کې نيولو پرته پياوړې شي .
   دتاجکستان دجمهوري رياست دمطبوعاتي دفتر له خولې، دايران ددولتي خبري اژانس دخبر له مخې،  امام علي رحمان په دې  کتنه کې هيله وکړه چې په افغانستان کې دسياسي ثبات دټينګښت لپاره په دغه هيواد کې دجمهوري رياست دانتخاباتو دويم پړاو دامن په فضا کې او له هرراز تاوتريخوالي څخه لرې ترسره شي .
  امام علي  رحمان او ضرار احمد عثماني له تروريزم اوبنسټ پالنې سره او دغه راز دنشه يي توکو له قاچاقو سره په مبارزه کې د دواړو هيوادونو دامنيتي بنسټونو دګډو فعاليتونو له امله خوښي څرګنده کړه او دسوداګرۍ انرژۍ او ترانسپورت  په برخه کې  يې دهمکاريو دپراختيا  په باب خبرې وکړې .
دافغانستان دبهرنيو چارو وزير دغه راز افغانستان ته دبريښنا دليږدونې لپاره په تاجکستان کې دسنګ توده – ٢ دايراني بټۍ دفعاليت  له امله دخوښي په څرګندولو سره افغانستان  ته دتاجکستان دبريښنا دليږدونې په مقصد دکاسا ١٠٠  په نامه دبريښنا دليږدونې دطرحې په تحقق باندې ټينګار وکړ .
دتاجکستان _ افغانستان ، ترکمنستان  داوسپنې پټلۍ  طرحه او له افغانستان څخه تاجکستان ته دګازو دليږدونې دنل ليکې غځول  هم  دتاجکستان له جمهور رييس  سره دافغانستان   دبهرنيو چارو دوزير دخبرو يو بل محور و.
  تاجکستان  او افغانستان ١٤٠٠ کيلومتره ګډه پوله لري .

واشنګتن  باختر د غبرګولي  اوولسمه :
دامريکا متحده ايالاتو اودملګروملتو دسازمان امنيت  شورا دافغانستان دجمهوري رياست  ددويم پړاو دانتخاباتو په يوه نوماند ډاکتر عبدالله عبدالله ناوړه قصد وغانده .
  دامريکا دبهرنيو چارو وزارت وياندې ماري هارف وويل چې په ډاکتر عبدالله عبدالله بريدغندي .
دملګروملتو  دسازمان دامنيت شورا غړو هم ديوې اعلاميې په صادرولو سره وويل چې هيڅ تروريستي عمل په افغانستان کې دسولې ، دموکراسۍ او ثبات دتامينولو په لاره کې  دافغانانو تر مشرتابه لاندې هلوځلو خنډ نه شي کيداي .
  دوى دغه راز ددغې پيښې دقربانيانو کورنيو او دافغانستان حکومت   ته د ډاډ ګيرنې مراتب څرګند کړل .
دملګروملتو  دسازمان امنيت شورا په افغانستان کې  له دموکراتيکو بهيرونو  سره هم خپل ملاتړ اعلام کړ .
  عبدالله پرون  په کابل کې  په ځانمرګي بريد کې روغ رمټ پاتې شو .
ډاکتر عبدالله دده پرخلاف له ناوړه قصد وروسته په يوه انتخاباتي  غونډه کې وويل چې ديرغلګرو هدف دخلکو ترمنځ دويرې او ډار دفضا برابرول و چې  پرې نه ږدي دخپل برخليک په باب تصميم ونيسي .

کابل باختر د غبرګولي  اوولسمه :
دوه تنه وسله وال طالبان په فارياب ولايت کې دچاڼيزو عملياتو له امله ووژل شول.
دغه عمليات چې دايثار يو تر عنوان لاندې د ٢٠٩ شاهين قول اردو دلومړي لوا دقوماندانۍ  دمنسوبينو له خوا او له ملي پوليسو او عامه نظم  په ګډو هلوځلو کې درې ورځې مخکې  پيل شوي وو پرون مازيګر پاى ته ورسيدل .
  د٢٠٩ شاهين  قول اردو دمطبوعاتي دفتر مسوول جګړن محمد رضا رضايي دباختراژانس خبريال ته وويل ، دغه عمليات  دطالبانو دډلو له شتون څخه دقيصار  او غورماچ دولسواليو ترمنځ دلويې لارې  دپاکولو، دلارو دامنيت دتامينولو او دامنيتي  پوستو دجوړولو په مقصد  پيل شوي وو.
  ديواړونده خبرځاى دڅرګندونو له مخې ،ددغو عملياتو له امله دوه تنه   وسله وال طالبان ووژل شول او څلور تنه  نور  ټپيان شول او دغه راز دطالبانو دوه کلاشينکوفونه او يوموټر سايکل هم دامنيتي  ځواکونو لاس ته ورغلي دي .
خبرځاى زياته کړه: په دغو عملياتو کې دوه تنه پوليسان هم برسيرن ټپيان شوي دي .

کابل باختر د غبرګولي  اوولسمه
د افغانستان داسلامی جمهوريت جمهوری ریاست د کابل ښار د پنځمې ناحیې په سیمه کې د کابل آریانا هوتل ته څیرمه د داکتر عبدالله عبدالله پر ټاکنیز کاروان د ځانمرګې برید د څیړنې په هکله د هیئت د ټاکنې په اړه دجمهوررييس حامد کرزي حکم.
د روان کال د غبرګولې په 16 مه نېټه د کابل ښار د پنځمې ناحیې په سیمه کې کابل آریانا هوتل ته څیرمه د داکتر عبدالله عبدالله پر ټاکنیز کمپاین د دوو چاودنو له امله، زموږ یو شمیر هېوادوال، شهیدان او ځینې نور ټپیان شوي دي. انا لله و انا الیه راجعون
په داسي حال کې چې د دي غمجني پیښئ شهیدانو ته د لوی خدای (ج) له درباره فردوس جنت، کورنیو او خپلوانو ته يي جمیل صبر او ټپیانو ته د سملاسۍ او بشپړې روغتیا هیله کوم، د هر اړخیزې څیړنې لپاره یی د کورنیو چارو د وزیر په مشری او د لاندې ذواتو په ګډون د هیئت ټاکنه منظوروم:
1. د کورنیو چارو وزارت د جنایی جرمونو پر ضد دمبارزې لوی رئیس، لوی پاسوال سید عبدالغفار، د غړي په توګه.
2. د چارود ادارې اود وزیرانو شورا د دارالانشا د لوی ریاست استازې تورنجنرال سید رحیم سعید د غړي په توګه.
3. د ملي دفاع وزارت د کشف رئیس، تورنجنرال عبدالمنان فراهی، د غړي په توګه.
4. د ملی امنیت د لوی ریاست استازي، برید جنرال ګلستان، د غړي په توګه.
5. د لوی څارنوالی د تحقیقاتو لوی رئیس عبدالشکور ستانکزی، د غړي په توګه.
هیئت دنده لري چې پیښه په هر اړخیزه توګه وڅیري، عاملین یي تشخیص او د قانون منګوته یی وسپاري.
هیئت دي د یوې اونۍ په ترڅ کې د خپلو څیړنو او کړنو بشپړ رپوټ د جمهوري ریاست مقام ته وړاندې کړي.

کابل باختر د غبرګولي  اوولسمه :
دتنکيو ځوانانو يا دفوټبال روزنيز کورس نن دهيواد دفوټبال په فدراسيون کې پيل شو .
دهيواد دفوټبال فدراسيون  دخپرونوآمر عبدالرشيد عزيزي دباختراژانس خبريال ته وويل، دغه کورس چې دالمان دفوټبال  فدراسيون په همکارۍ  پيل شوى دى  دتنکيو ځوانانو دڅانګې  ديرش تنه ښوونکي  پکې ګډون لري  چې دپنځو ورځو لپاره  به مسلکي زده کړې وکړي .
دغه راز دخبرځاى دڅرګندونو له مخې، ټاکل شوې  ده ددغه کورس  په پاى کې دفوټبال فدارسيون په لوبغالي  کې  دتنکيو ځوانانو جشن  جوړ شي .

کابل باختر د غبرګولي  اوولسمه :
شپږ تنه وسله وال طالبان  تيره شپه په ننګرهار ولايت کې دملي اردو دعسکرو په چاڼيزوعملياتوکې ووژل شول .
دملي دفاع وزارت دويندوى مطبوعاتي دفتر باختراژانس ته خبر ورکړ: دملي اردو ځواکونو دننګرهار ولايت  دسره رود ولسوالۍ  دوسله والو مخالفينو له شتون څخه  دسيمو دپاکولو په مقصد دتره خيلو دکلي په مربوطاتو کې چاڼيز عمليات ترسره کړل چې له امله يې شپږ تنه وسله وال طالبان ووژل شول او درې تنه نور وسله وال طالبان ټپيان شول ،او يوه اندازه سپک او درانده جنګي وسايل هم ترلاسه شوي دي
ديوبل خبر له مخې ،  دشاهين ١١ تر عنوان لاندې دننګرهار ولايت دسره رود ولسوالۍ دباغباني ، قرينه اوکرک دسيمو په مربوطاتو کې دملي اردو دځواکونو په  يو لړ نورو عملياتو کې شپږ تنه وسله وال طالبان ووژل شول او درې تنه نور يې ټپيان شول او يوه اندازه مهمات وسلې او پوځي تجهيزات  هم ترلاسه شوي دي .

کابل باختر د غبرګولي  اوولسمه :
امنيتي  ځواکونو په تيرو ٢٤ ساعتوکې دامنيتي فعاليتونو په بهير کې يوولس تنه وسله وال طالبان  ووژل .
دکورنيو چارو وزارت مطبوعاتي دفتر باختراژانس  ته خبر ورکړ: امنيتي ځواکونو  دکونړ ، بغلان او دلوګر دولايتونو په مربوطاتو کې امنيتي فعاليتونه ترسره کړل چې له امله يې  يوولس تنه وسله وال طالبان ووژل شول لس تنه ټپيان  او دوه تنه  يې ونيول شول  .
ددغو فعاليتونو په بهير کې  يوه اندازه چاوديدونکي توکي هم ترلاسه شوي دي.
دغه راز ملي پوليسو  دلغمان ولايت  په مربوطاتو کې دامنيتي ګزمې په بهير کې  دوه ماينونه کشف او شنډ کړل .

کابل باختر د غبرګولي  اوولسمه :
څلور تنه وسله وال طالبان چې په قندهار کې يې دتروريستي فعاليتونو نيت درلود پرون دملي اردو دعسکرو له خوا ونيول شول .
دملي دفاع وزارت ويندوى مطبوعاتي دفتر باختراژانس ته خبر ورکړ: څلور تنه وسله وال طالبان چې دتروريستي فعاليتونو دترسره کولو لپاره دقندهار ولايت خاکريز ولسوالۍ ته  استول شوي و له يوې اندازې وسلې اومهماتو سره ونيول شول . ديوبل خبر له مخې، دملي اردو ځواکونو هغه درې تنه تروريستان چې دنيمروز ولايت ددلارام  ولسوالۍ په مربوطاتو کې دتروريستي فعاليتونو نيت درلود له يوه سراچه ډوله موټر ،  دوو  ځانمرګو واسکټونو ، دولسو کيلوګرامو چاوديدونکو توکو ،  دوو تومانچو ، څلورو کيلوګرامو چرسو او يو کيلو ګرامه  اپينو  سره  ونيول

کابل باختر د غبرګولي  اوولسمه :
دپامير دفوټبال ټيم دهرات دتنکيو ځوانانو دفوټبال دسياليو اتل شو .
دهرات ولايت دورزشي امريت مرستيال ضيا الحق ضيا دباختراژانس خبريال ته وويل، په هغې لوبه کې چې پرون دانصاري  او پامير دټيمونو ترمنځ ترسره شو. دپامير ټيم ديوې په مقابل کې په دريو سره دانصاري ټيم ته ماتې ورکړه او دغه ټيم دتنکيو ځوانانو دفوټبال اتل شو .
  دغه راز دانصاري او اتفاق  ټيمونوددغوسياليو دويم اودريم مقامونه  وګتل .
دغه سيالۍ دشلو ټيمونو ترمنځ له څه مودې  راپديخوا په هرات ولايت کې پيل شوې وې چې پرون پاى ته ورسيدې .

کابل باختر د غبرګولي  اوولسمه :
دنجونو دفوټبال دغوره ليګ سياليو وروستي پړاو نن په کابل کې پيليږي .
دهيواد فوټبال فدراسيون دخپرونو مسوول عبدالرشيد عزيزي دباختراژانس خبريال ته وويل، ټاکل شوې ده په دغوسياليو  کې دميهن او افغان کلپ ټيمونه سيالي وکړي.
دخبرځاى دڅرګندونو له مخې، دنجونو دفوټبال دغوره ليګ  سيالۍ چې له دريو اوونيو دراپديخوا  دفوټبال فدراسيون په ورزشي ډګر کې داتو ټيمونو ترمنځ  پيل شوې وې   له هغې  جملې څخه دميهن او افغان کلپ ټيمونو وکولاي شول ددغوسياليو وروستي پړاو ته لاره ومومي چې نن سيالي کوي .