12 December 2019

RSS Facebook

سوداگریز


تازه خبرونه

کولمبيا له افغانستان سره همکاري کوي

کابل/ د ليندۍ٢٠مه/ باختر کولمبيا له افغانستان سره د کانونو...

د کورنیو چارو وزارت: د نشه يي توکو یوه ډله قاچاق وړونکي په غورکې ووژل شول

د کورنیو چارو وزارت: د نشه يي توکو یوه ډله قاچاق وړونکي په غورکې ووژل شول

کابل/ د ليندۍ٢٠مه/باختر د نشه يي توکو څلور قاچاق وړونکي چې...

اته وسله وال طالبان په روزګان کې ووژل شول

اته وسله وال طالبان په روزګان کې ووژل شول

کابل/ د ليندۍ٢٠مه/باختر اته وسله وال طالبان په ارزګان کې له...

Youtube Player

khantry design

سوداگریز

سوداگریز

کابل باختر د مرغومي شپږمه :
دکويټې د شورا د رهبرى دکميټې يو مهم غړى او د طالبانو د ډلې يو مشهور قوماندان د ناپيژندل شويو وسله والوکسانو په بريدکې ووژل شو .
په ده پرون ناوخته د پاکستان دکويټې ښار په پښتون آبادسيمه کې کله چې له ساتوونکي سره يې کوم ځاى ته روان و؛ د ناپيژندل شويو وسله والوکسانو له خوا ډزې وشوې او ووژل شو.
ملانور الله دکويټې د شورا د رهبرى دکميټې مهم غړى او د وسله والو طالبانو د ډلې يو مشهور قوماندان و.
ويل کيږي د افغانستان په جنوب په تيره بيا په زابل ولايت کې زياتره تروريستي بريدونه دکويټې د شورا د دغه مهم غړى له خوا ترسره کيدل.
د زابل ولايت دامنيې قوماندانۍ د امنيت آمر غلام جيلاني فراهي وايي چې دکويټې د شورا او د طالبانو د ډلې دغه مهم غړي په زابل کې د تروريستي بريدونو په ترسره کولو او ځانمرګو بريدونو ته دځوانانو په جلب او جذب کې رغنده رول درلود.
له بلې خوا د افغانستان دکورنيو  چارو وزارت يوه مسوول له باخترآژانس سره په اړيکه کې د ملانورالله وژل کيدل تاييدکړل او ويې ويل چې دى د کويټې د شورا  او د وسله والو طالبانو د ډلې يو ډير کليدي غړى و او په افغانستان کې په زياترو نا امنيوکې يې لاس درلود .
د زابل ولايت د سيوري د سيمې اصلي اوسيدونکى  ملانور الله په تيرو وختونوکې يوجهادي قوماندان و او د امريکا دمتحده ايالاتو تر څارنې لاندې اشخاصوڅخه و.

کراچى باختر د مرغومي شپږمه :
د شپږو تنو مړي نن سهار د کراچۍ ښار په پاک کالوني ناحيه کې دپوليسو لاس ته ورغلي دي.
دپوليسو دڅرګندونو له مخې: دغه کسان لومړى تښتول شوي او وروسته وژل شوي دي.
دغه مړي په داسې حال کې د پوليسو لاس ته ورغلي دي چې لاسونه اوپښې يې تړلې شوې، ځورول شوي او وروسته وژل شوي دي.
ديوبل خبر له مخې: دکراچۍ ښار په پيچ ناحيه کې نن دلاسي بم د بريد له امله يوه کوچنۍ نجلۍ ووژل شوه.
دپوليسو دڅرګندونو له مخې: دغه لاسي بم په يوه کور وغورځول شو چې د هغه دچاودنې له امله ددغه کور يوه ساتوونکى کوچنۍ نجلۍ ووژل شوه .
  د کور خاوند له خپلې کورنۍ  سره له کور څخه بهر ژوندکاوه.
تراوسه پورې ددغه بريدانګيزه نه ده معلومه شوې. خو پوليسو تحقيقات پيل کړي دي .

اسلام ابادباختر د مرغومي شپږمه :
دامريکا د پرمختيايي ادارې يوکارکوونکى وارن وينستين چې دوه کاله مخکې دپاکستان په لاهور ښارکې تښتول شوى و؛ په هغه نوى ويډيويي کسټ کې چې خپورشوى دى؛ د امريکا له جمهور رييس بارک اوباماڅخه غوښتي دي چې ددغه کارکوونکى دخلاصون لپاره دې خبرې او مرسته وکړي.
دباخترآژانس دخبر له مخې: دغه ديارلس دقيقه يي ويډيويي کسټ چې پرون د اسوشيتد پرس د خبري آژانس له لارې خپور شو؛ وينستين ويلي دي: داسې احساسوي  چې آزادبه شي.
دى د ٢٠١١ ميلادي کال د اګـست په مياشت کې په لاهور ښارکې له خپل کورڅخه وتښتول شو او القاعده د دغې امريکايي تبعه د تښتولو مسووليت په غاړه واخيست .
يو برقي ليک ددغه ويډيويي کست په مليتا د اسوشتيدپرس خبريالانو ته ايمل شوى دى. خو ددغه الکتروليکي ليک د ايمل وخت معلوم نه دى.

بغداد باختر د مرغومي شپږمه :
په عراق کې د پرونيو چاودنو له امله څلور څلويښت تنه ووژل شول.
د عراق د کورنيو چارو وزارت ويندوى وويل: دوه بمونه د دورا ښارګوټى يوې کليسا ته څېرمه په يو ګڼ ميشت مارکيټ کې وچاوديد چې له امله يې پنځه ديرش تنه ووژل شول او شپږ پنځوس تنه نور ټپيان شول.
دغه ښارګوټي دبغداد په جنوب کې دى او بېلابېلو اقليتونه پکې ژوند کوي .
  ياغيان په دې وروستيو وختوکې دمارکيټونو رستورانتونو او جوماتونو په ګډون دخلکو په ګڼ ميشتو سيمو بيابيا بريدونه کوي او د سر دروند زيان اړوي .
داپه داسې حال کې ده چې دکرسمس په ورځ په عراق کې يوې کليسا ته څېرمه اوپه يو سيمه ئيز بازارکې د دوو چاودنوله امله اووه ديرش تنه ووژل شول.
په بغدادکې د امريکا د متحده ايالاتو سفارت يوه وينا خپره کړې ده او په دوراښارګوټى کې بريدونه يې غندلي دي .
په دغو بريدونوکې په مسحيانو چې دکرسمس جشن يې جوړ کړى و؛ بريدونه شوي دي.
دغه بريدونه د ٢٠٠٨ ميلادي کال د خونړيو بريدونو په شان دي چې عراق يې کورنى فرقه يي جګړې ته تيل وهلې دي.
د روان ميلادي کال له پيل څخه تراوسه پورې په عراق کې څه ناڅه اته زره تنه وژل شوي دي او يواځې په روانه ميلادي مياشت کې د قربانيانو شمېرپنځه سوه پنځوسو تنو ته رسيدلى دى.

ډاکه باختر د مرغومي شپږمه :
دبنګله ديش  دحکومت دستر مخالف ګوند مشره خالده ضياپرون له هغه وروسته چې په دغه هيوادکې د مرغومي د مياشتې دپنځلسمې نيټې د انتخاباتو دګډوډيدوپه سبب دپراخ لاريون غوښتنه وکړه؛ په کورکې نظربنده شوه .
  دبنګله ديش د نشنلست ګوند مرستيال  شمشير مبين چوهدري وويل پوليس ددغه ګوند او فعالينو د مشرانو په ګډون هيچاته اجازه نه ورکوي چې له خالدې ضيا سره وګوري .
د ډسمبر د مياشتې د نهه ويشتمې نيټې لاريون به د دموکراسي په خاطر وي او حکومت دهغه دنه ترسره کيدو غوښتونکي دي.
خالدې ضيا له خپلو پلويانو څخه غوښتي دي چې د راتلونکې يکشنبې په ورځ دې په پراخ لاريون لاس پورې کړي او په دغو له ملنډو ډکو انتخاباتوکې دې ګډون نه کوي .
دبنګله ديش نشنلست ګوند او شلونورو مخالفو ګوندونو له دغو انتخاباتو سره مقاطعه کړې ده .
د ډاکې ښار د کميسار مرستيال وايي چې خالده ضيا نه ده نيول شوې، خو د استازو د مجلس يوشمېر اوسني او پخواني استازي نيول شوي دي. خو د دې کورته څېرمه د امنيتي ځواکونو د ځاى پرځاى کولو هدف د امنيتي تدبيرونو د نيولو په توګه دى.

 واشنګتن باختر د مرغومي شپږمه :
د امريکاپه شمال ختيځ او د کاناډا په جنوب ختيځ کې د يخ د توپان له امله  د استوګنې نيم مليونه کورونه بې بريښنا شوي دي او اووه ويشت تنه پکې وژل شوي دي.
دباخترآژانس دخبر له مخې: له دې امله په امريکاکې د سر د زيان شمېر اوولسو تنوته او په کاناډاکې لسو تنو ته رسيدلى دى چې ځينې يې دترافيکي  پيښو او د يخ د توپان له امله د کاربن مونو اکسايدګاز د خپريدو په نتيجه کې د مسموميت زيږنده دي.
ديخ توپان دکرسمس په اوونۍ کې د بريد توپان و او د چاروکارکوونکي د کاناډا او امريکا په ځينو سيموکې د بريښنا د سيستمونو په بيا ترميمولو بوخت دي .
د تورنتو په ګډون د کاناډاپه څو ښارونوکې د بريښنا ټول يوسلو ديرش زره تنه مشتريان بريښنا نه لري.
  د امريکا  په مشيګان او مين  ايالتونوکې پنځه سوه شپيته زره تنه بې بريښنا دي.
په کاناډاکې مامورينوخبر دارى ورکړى دى چې دغه بې برقۍ به سبا تر شنبې پورې دوام ولري .
له بلې خوا په بريټانيا کې نږدې پنځوسو کورنيو دکرسمس ورځ له بريښنا پرته تيره کړه او په سلګونو تنه د سيلاوونو د راوتلو له ويرې له خپلو سيمو څخه ايستل شوي دي .

 ويجنګ باختر د مرغومي شپږمه :
چين دپاکستان په کراچۍ ښارکې د يوې مهمې اټومي پروژې د جوړولولپاره دشپږ اعشاريه پنځو ملياردو ډالرو دلګولو ژمنه کړې ده.
  دپاکستان صدراعظم نوازشريف تېره مياشت د دغې پروژې د بنسټ ډبره چې لګښټ يې نهه اعشاريه نهه پنځوس مليارده ډالره اټکل شوى دى؛ کيښوده. خو پاکستاني مقاماتو په دې باب چې دغه لګښت به څه ډول تمويل شي؛ څه نه دي ويلي.
د هغې پانګې اچونې سندونه چې د رويټرز د خبري آژانس له خوا ليدل شوي دي؛ ښيي چې د چين  اټومي ملي شرکت ژمنه کړې ده چې د دغې پروژې د تمويلولو لپاره څه ناڅه شپږ اعشاريه پنځه مليارده ډالره پور چې د بريښنا دوه ريکټوروته هم يو د يو زرو سلو ميګاواټه بريښنا به ظرفيت پکې شامل دى؛ پاکستان ته ورکړي .
دپاکستان د اټومي انرژۍ دکميسيون رييس انصار پرويز وويل چين بشپړ ډاډلري چې پاکستان ددغې بټۍ د ساتنې قدرت لري او دغه نوۍ بټې له هغو ټولواټومي بټيو څخه ستره ده چې په پاکستان کې فعالې دي .
پاکستان اټومي ځواک، په دغه هيوادکې د بريښنا دکمښت لپاره د حل لاره بولي همدا اوس پاکستان د يوولسو زروميګا واټه بريښنا د توليد ظرفيت لري. په داسې حال کې چې ددغه هيواد اړتيا پنځلس زره ميګاوټه  بريښنا ده.
په همدې علت دپاکستان په زياتروسيموکې يواځې نيمه ورځ بريښنا شته او له دې پلوه ددغه هيواد اقتصاد سخت زيانمن شوى دى .
پاکستان هيله لري چې تر٢٠٥٠ کال پورې دخپلو اټومي بټيو له لارې څه دپاسه څلويښت زره ميګاواټه بريښنا توليدکړي .

کابل باختر د مرغومي شپږمه :
يوه ځانمرګى يرغلګر نن له غرمې وروسته په يوه بجه او ديرشو دقيقو دکابل  ښار د نهمې ناحيې په مربوطاتوکې په ګمرک واټ کې د بهرنيو ځواکونو د وسايطو په کاروان بريد وکړ چې له امله يې درې تنه بهرني سرتيري ووژل شول.
دباخترآژانس دخبر له مخې: ځانمرګى يرغلګر په چاوديدونکوتوکو بار خيل موټر د بهرنيو ځواکونو پوځي وسايطو ته څيرمه وچاوه چې له امله يې درې تنه بهرني سرتيري ووژل شول او شپږ تنه ملکي کسان ټپيان شول.
د ناټو ځواکونو له رسنيوسره په اړيکه کې تاييدکړې ده چې د دوى د پوځي وسايطوپه کاروان په کابل کې بريدشوى دى او د دوى درې تنه منسوبين يې په دې پيښه کې وژل شوي دي.
په همدې حال کې دعامې روغتيا وزارت دمرکز د روغتونونو رييس ډاکتر سيد کبير اميري باخترآژانس ته وويل: درې تنه ملکي وګړي چې په دې پيښه کې ټپيان شوي وو؛ لومړى د وزير محمد اکبر خان روغتون ته وليږدول شول او له دغه ځاى څخه دوه تنه ټپيان د سردار محمد داود خان څلور سوه بستريز روغتون او يوبل ټپي د ابن سينا عاجل روغتون ته ليږدول شوي دي.

کابل باختر د مرغومي شپږمه :
خطيبانو اوملا امامانو نن د جمعې د لمانځه په خطبوکې خلک د درس او تعليم زياتې زده کړې او په هيوادکې دراتلونکى کال په انتخاباتوکې دګډون لپاره تياري ته راوبلل .
دهيواد له مرکز او ولايتونو څخه د باخترآژانس د خبريالانو د خبر له مخې: په دغو خطبوکې علم او پوهې د زده کړې په کارکې د اسلام د مبين دين د ټينګار په باب څرګندونې وشوې او هم له خلکو څخه وغوښتل شول چې د جمهوري رياست او د ولايتي شوراګانو د راتلوونکي کال په انتخاباتوکې دګډون لپاره تياري ونيسي اوخپله رايه دې دهغه چا په ګټه  وکاروي چې د دين، خلکواو  هيواد په نسبت زړه سوانده او خدمتګاره څيره وي او په دې لاره کې په صداقت سره هلې ځلې  وکړي.
  دغه راز په دغو خطبوکې په افغانستان دوخت دشوروي د سره پوځ ديرغل کاليزې ته هم اشاره وشوه او ددغه پوځ له منګولوڅخه د هيواد د آزادي د لارې د سورکفنو شهيدانو پاک روح ته دعا وشوه.
په خطبوکې وويل شول چې لوى خداى (ج ) د وخت د شوروي د سره پوځ په وړاندې برياليتوب د افغانستان د مجاهدملت په برخه کړ او دغه برياليتوب زموږ د مومن اومسلمان ملت د اتفاق، اتحاد او پيوستون زيږنده وبلل شو.
  په خطبوکې د امريکا له متحده ايالاتو سره د امنيتي او دفاعي تړون په باب د افغانستان د اسلامي جمهوريت د جمهور رييس د دريځ ملاتړ وشو او ټينګار وشو چې بايد په دې برخه کې د هيواد لوړې ګټې په پام کې ونيول شي.

کابل باختر د مرغومي شپږمه :
په هغو شپږو موادو ځانګړو عملياتوکې چې دکورنيو چارو وزارت د خاصو قطعاتو د لوى رياست د منسوبينو له خوا د هيواد په بېلابېلو ولايتونوکې ترسره شول؛ د قدير په نامه دطالبانو د ډلې يوسرګروپ له شپږو تنو وسله والوکسانو سره په پکتيکا ولايت کې ووژل شو.
دکورنيوچارو وزارت مطبوعاتي دفتر باخترآژانس ته خبرورکړچې په دغو عملياتو کې دوه کلاشينکوفونه ،يوتوغندي ويشتونکى، يوه دوه اتياملي متري توپ ، دوه ريموټ کنترول، دوه موټرسايکلونه، يوه مخابره، يو اتياګولۍ او يوسراچه ډوله کرولا موټر له اويا کيلوګرامو چاوديدونکو توکو سره چې په تروريستي فعاليتونو کې کارول کيدل؛ ترلاسه شوي دي .
ديوبل خبر له مخې: دکورنيو چارو وزارت د خاصو قطعاتو د لوى رياست منسوبينو په قندهار ولايت کې په جلا عملياتوکې دعامه محافظت د معينيت يو رنجر موټر چې د دښمن لاس ته ورغلى و؛ بېرته ترلاسه کړ او د دښمن يو موټرسايکل يې هم ضبط کړى دى.