19 September 2019

RSS Facebook

سوداگریز


تازه خبرونه

انتخابات او امنیتي ګواښونه

کابل/ باختر/ د وږي ۲٧ مه د جمهوري ریاست راتلونکي انتخابات...

Youtube Player

khantry design

سوداگریز

سوداگریز

کابل باختر د تلي  دويمه :
د سترې محکمې عالي شورا نن له غرمې مخکې د سترې محکمې دکفيل قضاوتپوه بهاءالدين بها په مشرۍ غونډه وکړه اوپه اجنډا کې شاملې  موضوعګانې وڅيړلې .
د سترې محکمې د خپرونو رياست باخترآژانس ته خبرورکړ: عالي شورا لومړۍ  دشرعي وثيقو په اجرااتو او د محفوظ په ثبت کې د سم تنظيم او دقيق چلند د رامنځته کولو په مقصد لارښوونه وکړه، هغه ټول قاضيان چې د بېلابېلو وثيقو په اجرا کولو بوخت دي؛ دخپل کار لاندې د محفوظ د ثبت دفترونه هره اوونۍ کنترول کړي او هغو د نيمګړتياوو او نواقصو په لرې کولو لاس پورې کړي او هم د محکمو ټول رييسان او قاضيان مکلف دي چې د تبديلي او تقاعد په وخت کې دې د خپل دکار د دورې د وثيقو د ثبت محفوظ دفترونه او د نواقصواو نيمګړتياوو د نشتوالي په  اړوند ډاډ ترلاسه کړي، له شک پرته ددغه امر اهمال کوونکى په ترجدي قانوني پوښتنې لاندې ونيول شي .
وروسته د يو شمېر رسيدلې استهداګانو په باب غور وشو، د دعواوو د تفريق او د هغو د سببونو په باب چې په ځينو مواردوکې د ميړه شتون ضروري بولي؛ دفارياب  ولايت د استيناف محکمې د رياست استهدا ته په پاملرنې سره څرګنده شوه چې د زوج د غيابت په حالت کې يواځې د دعوى زيان چې ميړه د شتون غوښتنه ونه کړي او يا هم د تفريق دعوى د غيابت له امله د دوران وړ دي، نورې دعواوې چې ذاتا د ميړه د شتون غوښتنه وکړي؛ د هغوى په غياب کې د دوران وړنه دي.
دغه راز د يو شمېر اړوندو وثيقو په کندوکې د غزني ولايت د جاغوريو ولسوالۍ  د ابتدائيه محکمې د پخوانى رييس د لاسليک او مهر څخه پاتې دي؛ دغزني ولايت د استيناف محکمې د رياست د استهدايې په وړاندې لارښوونه وشوه چې د قضايه قوې دتشکيل  او صلاحيت دقانون دشپږ پنځوسمې مادې دلومړى بند دصراحت له مخې، د استيناف محکمې د رييس د دندو له جملې څخه يوهم دديوانونو او اداري څانګو دفعاليتونو تنظيمول دى. له دې امله د محکمې رييس کولاى شي د اړتيا په صورت کې دغه قاضي مکلف کړي چې د خپلې تصدۍ د وخت کارونه دقانون له مخې دموضوعه اصولو په رڼا کې بشپړ کړي .
دغه راز د يو رسيدلې استهدايې په پام کې نيولو سره، د قضايي پلټنې رياست ته لارښوونه  وشوه چې د ميربچه کوت ولسوالۍ  په ابتدائيه محکمه کې د قباله جاتو د ثبت دکتاب دغلا څرنګوالي تر دقيقې څيړنې او پلټنې لاندې ونيسي او د نتيجې په باب دې د سترې محکمې مقام ته رپوټ وړاندې کړي.
برسربېره، پرون د عالي شورا په نننۍ غونډه کې د نوى نظر غوښتنې د درې غوښتنو او يو شمېر قاضيانو د قضايي کادر له لوړوالى سره جوخت په جزايي او مدني قضاياووکې دمحکمې دبدلون او لسو غوښتنو په باب هم بحث وشو او په هر مورد کې مقتضي تصميمونه ونيول شول.

کابل باختر د تلي  دويمه :
دملي اردو درې تنه سرتيري پرون د قندهار ولايت په مربوطاتوکې د امنيتي دندو دترسره کولو په وخت کې شهيدان شول .
دملي دفاع وزارت مطبوعاتي دفتر باختر آژانس ته خبر ورکړ: دملي اردو درې تنه سرتيري دقندهار ولايت دغورک ولسوالۍ په مربوطاتوکې د امنيتي دندو دترسره کولو په وخت کې د واټ پرسر د ماين دچاودنې له امله شهيدان شول .

کابل باختر د تلي  دويمه :
کابل- د استانبول بهیر د غړو هیوادونو او د دغه بهیر ملاتړ کوونکو هیوادونو لوړ پوړو کارکوونکو نن په نیویارک کې د ملګرو ملتونو د عمومي غونډې په څنګ کې سره وکتل.
دبهرنيوچارو وزارت مطبوعاتي دفترباخترآژانس ته خبر ورکړ:
د افغانستان اسلامي جمهوریت د بهرنیو چارو وزارت سیاسی مرستیال ښاغلي ارشاد احمدي او د چین د خلکو جمهوریت سفیر ښاغلي لوژو هوی چې په ۲۰۱۴ کال کې د استانبول بهیر د بهرنیو چارو وزارت د راتلونکې غونډې کوربه توب کوي، د دغې غونډې مشري وکړه.
ښاغلي ارشاد احمدي د ۲۰۱۱ کال په نومبر میاشت کې د آسیا زړه سیمې هیوادونو له لوري په استانبول کې د استانبول بهیر د جوړیدو راهیسې د دغه بهیر د کلکي بریالیتوب او چټک او د پام وړ پوخوالې په ګوته کړ. هغه په دې وروستیو کې د اپریل په میاشت کې په آلماتا کې د بهرنیو چارو د وزیرانو د غونډې ځانګړي بریالیتوب ته اشاره وکړه چې په کې د باور جوړونې تدبیرونو د پلي کیدو پړاو په ګوته او  د ټولو هیوادونو له لوري تایید شو. هغه څرګنده کړه چې د دغه بهیر د تحرک د ساتلو او مخته وړلو په هکله ټول غړي هیوادونه تر خپلې وسې مکلف دي.
" زما په آند دا ویل به مناسب وي چې اوس د آسیا زړه او ملاتړ کوونکو هیوادونو او سازمانونو لپاره د عمل وخت رارسیدلی دی،" ښاغلي احمدي وویل." دا د ټولو ملاتړ کوونکو هیوادونو او سیمه ییزو او نړیوالو سازمانونو لپاره یو ښه فرصت دی چې د دغه بهیر په اړه خپل کلک او ټینګ ملاتړ څرګند کړي."
ښاغلي احمدي زیاته کړه،" مونږ هیله من یو چې د چین د خلکو جمهوریت په زښتې ارزښتناکې او فعالې ګډې مشرۍ او ملاتړ به وکولای شو دغه ژمنې پوره کړو."
د غونډې برخه والو د خبرو اترو او رغنده همکارۍ د یوه ځای په توګه د سیاسي سلا مشورو پر ارزښت او همداراز د باور جوړونې د تدبیرونو د عملي کولو پر اهمیت ټینګار وکړ.
سفیر لو څرګنده کړه چې سیمه باید د سیمه ییزې همکارۍ په برخه کې رول ولوبوي په ځانګړې توګه په یوه داسې وخت کې چې افغانستان د یوه تاریخي سیاسي او امنیتي لیږد څخه تیریږي. نوموړي زیاته کړه چې استانبول بهیر په ډیر لږ وخت کې ډیرې لاسته راوړنې لري او دا چې سیمه باید دوه اړخیزه همکاري د آسیا زړه هیوادونو په څیر د څو اړخیزو جوړښتونو له لارې روانه وساتي.
افغانستان ته د ملګرو ملتونو د سرمنشي ځانګړي استازي ښاغلي یان کوبیش وویل، د سیمې هیوادونو اوس درک کړې چې د دوی پر وړاندې پرتو ګډو ننګونو او په افغانستان او سیمه کې د سولې او ټیکاو د ټینګښت په برخه کې سره یو ځای کار کول د دوی ګډ مسوولیت دی.
په غونډه کې هوکړه وشوه چې ګډه مشران به د لوړ پوړو کارکوونکو د راتلونکې غونډې نه مخکې یو شمیر ځانګړې موضوعګانې د بحث په موخه له ګډونوالو سره شریکوي.
برخه والو همداراز د آسیا زړه سیمه کې د امنیتي، سیاسي او اقتصادي وضیعت د مهمو موضوعګانو او پرمختیاوو په اړه بحث وکړ.
په غونډه کې همداراز د باور جوړونې تدبیرونو د پلي کولو سره د مرستې په موخه د یوه تمویلي میکانیزم د غوراوي په برخه کې د یوې تخصصي مطالعې پایلې واوریدل شوې او هوکړه وشوه چې د دغسې یوه تمویلي میکانیزم په اړه پریکړه به د لوړو پوړو کارکوونکو په بله غونډه کې چې د ۱۳۹۲ لمریز کال د لیندۍ په ۱۵ نیټه په نوی ډیلي کې ترسره کیږي، وشي.
سفیر لو د استانبول بهیر د راتلونکې غونډې چې د راتلونکي کال د اوړي په میاشت چه د چیند تاین جین په ښار کې ترسره شي، په هکله د چین د تیاریو په اړه غونډې ته معلومات وړاندې کړل.

کابل باختر د تلي  دويمه :
دکاراتې انتخاباتي سيالۍ د ځوانانو، تنکيو ځوانانو او لويانو ملي ټيم ته د پنځه څلويښتو غوره څيرو په ټاکلو سره پاى ته ورسيدې.
دباخترآژانس دخبر له مخې: دغه سيالۍ چې دکاراتې کيوشين او ماستوى شيما په برخوکې پيل شوې وې؛ پکې دهرات، فراه، کاپيسا، کابل او په پاکستان کې د ميشتو افغان مهاجرينو يو سلو درې اوياتنو ورزشکارانو پکې ګډون درلود .
د المپيک دملي کميټې ويندوى مجيب الله رحماني دباخترآژانس خبريال ته وويل: دغه سيالۍ په لسو وزني  ډلو او د تنکيو ځوانانو، ځوانانو او لويانو په ګروپونوکې په دوو برخوکې پيل شوې وې چې په پاى کې د حکمانوله خوا پنځه څلويښت غوره څيرې د تنکيو ځوانانو، ځوانانو او د لويانو ملي ټيمونوته وټاکل شوې .
دغه راز د سياليو په پاى کې د هرات د ټيم ورزشکارانو لومړى مقام، د کاپيسا دويم مقام او دکابل ورزشکارانو دريم مقامونه وګټل .
دغه راز د اخلاقو کپ په پاکستان کې ميشتو افغان مهاجرينوته ورکړشو.
په همدې ترتيب د کاراتې دکيوکوشين کان د ملي ټيم انتخاباتي سيالۍ سبا په کابل کې پيليږي .

کابل باختر د تلي  دويمه :
د انتخاباتو دخپلواک کميسيون د دارالانشا رييس وايي: د رايې ورکولو د کارتونو پيرودل او پلورل يو ناوړه کار او د ملت د ارادې په وړاندې يوه جفا ده .
دغه څرګندونې په داسې حال کې چې کيږي؛ داسې رپوټونه شته چې ګنې په ځينو ولايتونوکې د رايې ورکولو کارتونه پيرودل او پلورل کيږي .
د انتخاباتو دخپلواکميسيون د دارالانشا رييس ضيا الحق امرخيل دباخترآژانس له خبريال سره په خبروکې وويل: د رايې ورکولو دکارتونو دپلورنې او پيرودنې  په باب دقيق اطلاعات نشته، خو د رسنيو  په رپوټونو کې ويل شوي دي چې په ځينو  ولايتونوکې د رايې ورکولوکارتونه چې د پيرودنې او پلورنې  په حال کې دي؛ يواځې د اشخاصوغولول دي اوبس او رايې ورکوونکو سره يوجفا ده .
امرخيل زياته کړه: هر شخص د رايې ورکولو ديو کارت مستحق دى او په انتخاباتو کې د يوې رايې د ورکولوحق لري.
امرخيل زياته کړه: دا ځل د انتخاباتو خپلواک کميسيون داسې تدبيرونه نيسي چې يوشخص يواځې يوه رايه ورکړي. په دې تدبيرونوکې د باکيفيته رنګونوڅخه د استفادې تدبيرونه هم شامل دي چې ژر د پاکولو وړ نه دي.
ده وويل چې د رايې ورکولو دکارتونو د ويشلو  بهير چې د روان کال په غبرګولي  په پنځمه نيټه پيل شوى دى؛ دوام لري او د دغې ادارې گرځنده ټيمونه کليو او لرو پرتو سيموته تللي دي چې په شرايطو په برابروکسانو د رايې ورکولوکارتونه وويشي.
په همدې حال کې د فيفا استازي ويلي دي چې د جمهوري رياست راتلوونکي انتخابات  به دافغانستان د آزادو اوعادلانه انتخاباتو د مرکز تر دقيقې اومنصفانه څارنې لاندې ترسره شي او په هغه کې به د درغلي او سرغړونې مخه نيول کيږي.
ده ويلي دي چې د انتخاباتو خپلواک کميسيون درې سوه زروتنو ته د څارنې کارتونه صادر کړي دي چې د انتخاباتوپه ورځ د رايې ورکولو په بهيرکې دقيقه څارنه ترسره شي ‌او هيڅوک  ونه شي کړى په درغلى لاس پورې کړي.

Tuesday, 24 September 2013 12:39

درې تنه پوليسان ټپيان شول

کابل باختر د تلي  دويمه :
دقندهار په ميوند ولسوالۍ کې نن د دوو جلا جلا چاودنو له امله درې تنه پوليسان ټپيان شول .
دقندهار د والي ويندوى جاويد فيصل باخترآژانس ته وويل: په لومړنۍ چاودنه کې چې نن د ارغستان ولسوالۍ د خاک چوپان په سيمه کې وشوه؛ يو پوليس ټپي شو.
په دويمه پيښه کې د قندهار ولايت د ميوند ولسوالۍ په مربوطاتوکې په واټ کې دښخ کړاى شوى ماين دچاودنې له امله دوه تنه پوليسان ټپيان شول .
د ميوند ولسوال صالح محمد نورزي باخترآژانس ته وويل: دغه پيښه د ميوند ولسوالۍ په مربوطاتوکې دپوليسو دکزمې په وخت رامنځته شوه .
دخبرځاى دڅرګندونو له مخې: د دغې پيښې ټپيان روغتون ته ليږدول شوي دي او دهغوى روغتيايي حالت مخ په ښه والي دى.

کابل باختر د تلي  دويمه :
د ايران دسرحدي  مامورينو د ډزو له امله يو افغان ځوان وژل شوى دى .
دغه ځوان پرون کله يې چې غوښتل په غير قانوني ډول ايران ته ننوځي؛ ددغه هيواد د سرحدي مامورينو له خوا په ډزوسره ووژل شو .
دنيمروز د والي ويندوى احمدعرب باخترآژانس ته وويل: دغه افغان ځوان دنيمروز دکنګ ولسوالۍ په احمدخان کلي کې دايران دسرحدي مامورينو له خوا ووژل شو .
دعرب دڅرګندونو له مخې: د وژل شوى مړى نن د ايران دسرحدي مامورينو له خوا د افغانستان سرحدي پوليسو ته وسپارل شو.

کابل باختر د تلي  دويمه :
نهه څلويښت تنه وسله وال طالبان دامنيتي ځواکونو دچاڼيزو عملياتو په بهيرکې ووژل شول.
دکورنيوچارو وزارت مطبوعاتي دفتر باخترآژانس ته د يوې خبرپاڼې په ليږلو سره ليکلي دي:
نهه څلويښت تنه وسله وال طالبان دهلمند، فراه، هرات ، لوګر ، ارزګان ، زابل ، بلخ ، بدخشان او دکندز د ولايتونو په مربوطاتوکې دامنيتي ځواکونو د چاڼيزو عملياتو په بهيرکې ووژل شول.
په دغوعملياتوکې يوه اندازه سپک او درانده وسلې يوه اندازه چاوديدونکي توکي او دوه سوه کيلوګرامه نشه يي توکي هم ترلاسه شوي دي.
د يوبل خبر له مخې: ملي پوليسو د وسايطو ضد څلور ماينونه د قندهار، بادغيس او د ننګرهار د ولايتونو په مربوطاتوکې چې د وسله والوطالبانو له خوا ښخ کړى  شوي و؛ کشف او شنډکړل .

Tuesday, 24 September 2013 08:54

يوتښتوونکى ونيول شو

کابل باختر د تلي دويمه :
هغه سړى چې په تخار ولايت کې د يو پنځه ويشت کلن هلک په تښتولو تورن و؛ نن دپوليسوله خوا ونيول شو.
د تخار ولايت د امنيې قوماندانۍ ويندوى خليل اسيرباخترآژانس ته وويل: دبدخشان ولايت دکشم ولسوالۍ د نوآباد د کلى اوسيدونکى شيخ تيمور دوه ورځې مخکې د تخار ولايت د آهن درې په جوغم کلى کې دکرامت الله په نوم يو پنځه ويشت کلن هلک تښتولى و .
دپوليسو دڅرګندونو له مخې: تښتوونکى سړى دبدخشان  ولايت په کشم ولسوالۍ کې دپوليسو له خوا ونيول شو .
  خبرځاى زياته کړه: کرامت الله خپلې کورنۍ ته وسپارل شو.
اسير زياته کړه چې تښتوونکى شيخ تيمور په خپلو لومړنيوتحقيقاتوکې دکرامت الله د تښتولو په اړوند اعتراف کړى دى.

کابل باختر د تلي  دويمه :
پنځه تنه پوليسان د دوو تنونوروپوليسانو له خوا په قندهار ولايت ديوې تروريستي توطيې له امله ووژل شول .
دغه پيښه پرون دقندهار په ژيړۍ ولسوالۍ کې هغه وخت رامنځته شوه چې د يوې امنيتي پوستې د وو تنو سيمه ئيزو پوليسانو پنځه تنه نور پوليسان په ډزو سره ووژل او وتښتيدل .
د ژيړۍ ولسوال جمال آغا باخترآژانس ته وويل چې د دغو دوو تنو سرتيرو د ډزو له امله پنځه تنه نور سرتيري ووژل شول او د دغو دوو تنو د نيولو لپاره اقدامات پيل شوي دي .