21 April 2019

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

Monday, 03 December 2012 11:04

داسعارو بيه:

کابل\باختر\دتلي دمياشتې ١٥ مه:
دکابل دشهزاده سراى دصرافانو درييس  دمعلوماتو له مخې : نن له غرمې مخکې دبهرنيو پيسو په مقا بل کې دافغا نۍ ارزښت په دې ډول دى:
يوامريکايي ډالر پيرودل په     51/40  افغانيو پلورل په   51/55افغانيو
يوانګليسى پونډ پيرودل په  81/90افغانيو پلورل په     81/91افغانيو
داماراتو يو درهم پيرودل په 90/ 13 افغانيو پلورپه 95 / 13 افغانيو
يوه يورو   پيرودل په     50 66/ افغانيو پلورل په      66 /60  افغانيو
يوسعودي ريال پيرودل په  50 13/پلورل    13/55 افغانيو
زرهندي کلدارى پيرودل په 960 افغانيو پلورل په 970 افغانيو
زرپاکستاني کلداري پيرودل په  535افغانيو پلورل په  536 افغانيو
او زر ايراني تو مان پيرودل په 17/70  افغانيو پلورل په   17/80 افغانيو.
 

بروکسل – باختر دليندۍ ديارلسمه
ټاکل شوې ده دناټو دغړو هيوادونو د بهرنيو چارو وزيران سبا په بروکسل کې غونډه وکړي او دافغانستان ،دموضوع په ګډون ديو لړ مهمو نړيوالو موضوعګانو په باب خبرې وکړي.
په دې غونډه کې به ددغې مسلې په باب هم خبرې وشي چې له ٢٠١٤ م کال وروسته له افغان امنيتي ځواکونو سره په کال کې د ژمنه شويو څلورو ملياردو ډالروڅخه څه ډول اداره او تنظيم شي.
دناټو يو ديپلو مات وويل چې  دافغانستان حکومت غواړي چې ددغو پيسو لګښت په خپله په لاس کې ولرلي خو په افغانستان کې دپراخ فشار دشتون په باب به دلويديځ انديښنې ددې سبب شي چې ناټو په خپله له ٢٠١٤ کال وروسته له افغان ځواکونو سره دنړيوالو مرستو په تنظيم کې مهم رول په لاس کې ولري.
ټاکل شوې ده دافغانستان دبهرنيو چارو  وزير ډاکتر زلمى رسول دناټو دسبا اوبل سبا په غونډو کې دافغانستان دحکومت استازيتوب وکړي په لويديڅ کې کورني فشارونه دافغانستان دجګړې دپاى ته رسيدو لپاره زيات شوي دي.
دهمدې خبر له مخې، دپاکستان دبهرنيو چارو وزيره به هم دناټو په دغو غونډوکې ګډون وکړي، ټاکل شوې ده دناټو دغړو هيوادونو دبهرنيو چارو دوزيرانو په راتلونکي غونډه کې دروسيې او امريکا دبهرنيو چارو وزيران له يوبل سره وکوري او دافغانستان دموضوع په ګډون ديولړ دوه اړخيزو موضوعګانو په باب خبرې وکړي چې دناټو دويندوى دڅرګندونو له مخې، ددغې کتنې هدف دروسيې داړيکو پياوړتيا اود سوريې په موضوع کې ددغه هيواد په همکارى او دغه راز له افغانستان څخه دناټو دځواکونو وتلو ته داسانتياو برابرول دي.
ډامريکا دبهرنيو چارو وزيره ميرمن هيلرى کلنتن دناټو په غونډه کې دګډون په مقصد اروپاته سفر کړى دى.
 

کابل\  باختردلندي دمياشتې  ١٣ :
دغورولايت ددولاينه ولسوالۍ په مربوطاتو کې  دموټر دتګ راتګ دوه ستر پلونه پرانستل شول او ګټې اخيستنې ته وسپارل شول.
دغور ولايت دکليو دبيا جوړولو اوپراختيا رييس انجينر تاج محمدزلال باختراژانس ته وويل: دغه پروژې تيرکال  دکليو دبيا جوړولو اوپراختيا وزارت  دسيمه ييزې ودې  دملي پراختيا  له پروګرام څخه ددغې ولسوالۍ  دقلعه نقشي   په کلي کې  دخلکو په تګ راتګ کې داسانتياو دبرابرولو په مقصد  دبنسټ ډبره ايښودل شوې وه او دجوړولو کار يې  دکليو دبيا جوړولو اوپراختيا رياست  دانجينرانو ترڅارنې لاندې بشپړ اوګټې اخيستنې ته وسپارل شول.
دغور ولايت  دکليو دبيا  جوړولو اوپراختيا رياست  دسيمه ييزې پراختيا دودې دملي پروګرام مسوول عبدالولي حبيبي وويل : دغه پلونه  هريو  لس متره اوږدوالي  او اووه متره سور لري   اودڅه دپاسه شپږو مليونو څلور سوه زرو افغانيو په لګښت دخلکو په سلو کې دلسو په ونډې سره جوړشوي دي.
له بلې خوا دغور ولايت  ددولاينه  ولسوالۍ دکليو دپرمختيايي شوراګانو رييسانو ددغه شان ټولګتو پروژو پرانستل  دامنيت په تامينولو  اودسولې  په ټينګښت کې  ګټور وبلل اوپه دغه ولايت کې يې دبيا جوړولو دزياتو پروژو دتطبيق غوښتنه وکړه.
 

کابل\  باختردلندي دمياشتې  ١٣ :
دځوانانو دملي ټيم سوک وهونکي دراتلوونکي پنجشنبې په ورځ په نړيوالو سياليو کې دګډون په مقصد قزاقستان ته ځي .
داولمپيک دملي کميټې دسوک وهلو فدراسيون سکرترجنرال هدايت الله مومند باختراژانس ته وويل، دځوانانو دملي ټيم اووه تنه سوک وهونکي  چې دوه تنه  سوک وهونکې پيغلې هم پکې شته  دسوک وهلو  په هغو سياليو کې برخه اخلي  چې په نږدي راتلوونکي کې دقزاقستان په الماتاښارکې ترسره کيږئ .
دمومنددڅرگندونوله مخې، دغه سيالۍ دروان ميلادي کال ددسمبر دمياشتې  له شپږمې  څخه ترلسمې نيټې پورې  دوام کوي .
ديادونې وړده چې  په دې سفرکې يو هيئت او دوه تنه ترينران  له افغان ورزشکارانوسره ملګرتياکوي .
 

کابل\  باختردلندي دمياشتې  ١٣ :
په نږدي راتلوونکي د وزلوبې  دملي ټيم انتخاباتي  سيالۍ ترسره کيږي.
دالمپيک دملي  کميټې دسياليو دترسره کولو آمر غلام غوث نيکبين  له باختراژانس سره په  خبرو کې  ددغو سياليو  دترسره کولو هدف دافغانستان دوزلوبې  ملي ټيم ته  دغوره څيرو انتخابول وبلل او ويې ويل   چې په دغو سياليو کې به  دهيواد له مرکز اوولايتونو څخه  شپاړلس ټيمونه ګډون وکړي   چې   يوزرو دوه سوه  څلور شپيته چاپ اندازان  کيږي .
 

کابل\  باختردلندي دمياشتې  ١٣ :
دهغوڅلوروتنو علني قضايي محاکمه چې  دوژنې تور پرې لګول شوي دي نن  دبغلان ولايت  داستيناف محکمې له خوا ترسره شوه.
دبغلان ولايت   داستيناف محکمې رييس  قضاوتمندميرويس باختراژانس ته وويل:  په يارخان ، آقامحمد، شمس الرحمن او عبدالخير تور لګل شوى دى چې يو قومي مخور  ملاخيرالله يې شپږمياشتې مخکې  دپل حصار ولسوالۍ  دآهنګرانو په کلي کې وژلى و.
يوه اړونده خبرځاى وويل:  دمحاکمې په بهيرکې  په تورنو کسانو دموظف څارنوال له خوا  له الزاماتو وروسته   اودتورنو کسانو دلومړنيو اعترافونو دبهير دسي ډي  دکسټ له ښودولو وروسته  تورنو کسانو اودهغوى مدافع وکيل  په دفاع لاس پورې کړ ..
وروسته د وژل شوى سړى مور  ، خور  او ميرمنې ددغه سړى په وژلو کې  ددغو کسانو دلاس  لرلو شواهد اودلايل  قضايي هيئت ته وړاندى کړل.
په پاى کې قضايي هيئت هريو تورن  په شل شل کاله تنفيذي بند محکوم کړ.
ددغو تورنو کسانو په باب دمحکمې دغه حکم په داسې حال کې صادر شو چې موظف څارنوال  اودمقتول کورنۍ دډيرو سختو مجازاتو يعنې اعدام دتطبيق  غوښتنه کوله  خو تورنو کسانو ځان بيګناه باله  او دبخښنې غوښتنه يې کوله او دمحکمې پريکړه يې له عدالت څخه  لري وبلله.
ديادونې وړ ده چې دمحکمې حکم وروستئ نه دى او دتورنو کسانو تميز غوښتنه محفوظ ده .
 

کابل\  باختردلندي دمياشتې  ١٣ :
په فراه ولايت کې  دچاڼيزو عملياتوپه بهيرکې اته تنه وسله وال طالبان ووژل شول.
په رارسيدلو خبرونو کې ويل شوي دي چې دغه کسان تيره شپه دبالابلوک ولسوالۍ  په مربوطاتو کې  په خپلو پټنځايونو کې  ووژل شول.
دفراه ولايت دامنيې قوماندانۍ دامنيت آمر  محمدغوث مليار باختراژانس ته وويل : افغان امنيتي ځواکونو په هغو چاڼيزو عملياتو کې  چې دبلابلوک ولسوالۍ په ناامنوساحو کې  ترسره کړل  اته تنه وسله وال طالبان ددوى په يو پټنځاى کې  له منځه يوړل .
يوه اړونده خبرځاى وويل:  دغه عمليات دطالبانو له شتون څخه دبالابلوک ولسوالۍ دناامنوساحو دپاکولو په مقصد  پيل شوي دي  اوتراوسه پورې  ددغې ولسوالۍ لس کلي دطالبانوله شتون څخه پاک شوي دي .
دمليار دڅرگندونوله مخې،  ددغو عملياتو په بهيرکې  يوه اندازه چاوديدونکي توکي ، څلور کلاشينکوفونه اويوه اندازه مهمات هم دامنيتي ځواکونولاسته ورغلي دي .
ده زياته کړه چې په دغو عملياتو کې افغان امنيتي ځواکونوته زيان نه دى اوښتى .
ديادونې وړ ده چې دغه عمليات به  په دغې ولسوالۍ کې دوروستي وسله وال طالب ترله  منځه وړلو پورې به دوام ومومي .
 

کابل -باختر دليندي دولسمه:
په نړیوالو اړیکو کې د افغانستان د اسلامي جمهوریت  د جمهور رئیس حامد کرزي سلاکار وزیر  ډاکټر یحیی معروفی، نن مازیګر د  پاکستان د اسلامي جمهوریت له ایالتي وزیر انجنیر شوکت الله سره وکتل.
د جمهوري رياست مطبوعاتي دفترباخترآژانس ته خبر ورکړ:
په دغه کتنه کې دواړو لورو د افغان مهاجرینو  پر داوطلبانه بیا راستنیدو او هغوی ته د لازمو اسانتیاوو د برابرولو په باب خبرې اترې وکړې.
ښاغلي معروفي پاکستاني پلاوي ته د ښه راغلاست په ترڅ کې د افغانستان د اسلامي جمهوریت د جمهور رییس حامد کرزي نیک هیلې وړاندې کړې او په داوطلبانه ډول یې د افغان ګډوالو د راستنیدو په  برخه کې له پاکستان سره د هر ډول همکارۍ،  ژمنه وکړه. 
ښاغلي معروفي د افغان ګډوالو د بیا راستنیدو لپاره پر اغېزمنې لارې باندې د ټینګار په ترڅ کې د پاکستان له هېواد او ولس نه مننه وکړه چې د کوربه هېواد په توګه یې د اوږدې مودې لپاره له افغان ګډوالو څخه صادقانه میلمه پالنه وکړه او دوی ته یې په خپل هېواد کې د اوسیدو شته امکانات برابر کړل.
د پاکستان ایالتي وزیر او د پاکستاني پلاوي مشر ښاغلي شوکت الله هیله څرګنده کړه چې د افغانستان د حکومت په همکارۍ او هڅونې له پاکستان څخه ګڼ شمېر افغان ګډوال په داوطلبانه توګه بیرته افغانستان ته راشي او د خپل هېواد  د پرمختیا او بیارغاونې په بهیر کې ونډه واخلي.
سلاکار وزیر یحیی معروفي د افغانستان او پاکستان ترمنځ اړیکو ته اشاره وکړه، وې ویل: افغانستان او پاکستان له یو بل سره کلتوري، تاریخي او ژبني پیوندونه او اړیکي لري او د افغان ګډوالو د بیا راستنیدو مساله د دوو وروڼو هېوادونو تر منځ یوه ګډه مساله ده چې د حل لپاره یې باید د اړوندو نړیوالو سازمانونو په ملاتړ او مرسته  عملي لارې چارې ولټول شي.
 

کابل -باختر دليندي دولسمه:
  هغه علمي-څيړنيز سيمينار چې د پښتونخوا د مشهور او وګړني شاعر، اديب، متفکر او ژورناليست ايوب صابر زوکړى د نوي يمې کاليزې له امله پرون په کابل کې جوړ شوى و؛ نن پاى ته ورسيد .
دغه سيمينارچې د سرحدونو قومونو او قبايلو د چارو وزارت له خوا جوړ شوى و؛ پرون دافغانستان داسلامي جمهوريت د جمهور رييس حامدکرزي د پيغام په لوستلو سره په کار پيل وکړ.
دباختر اژانس دخبريال دخبر له مخې: د سيمينار  په ننني کارکې چې په فرهنګي چاروکې د جمهوري رياست د سلاکار وزيرڅيړنپوه ډاکتر زلمى هيوادمل ، د اطلاعاتو او فرهنګ او د سرحدونو، قومونو او قبايلو د چارو د وزارتونو د معينانو ، دپارلمان د ځينو غړو او د بهرنيو ميلمنوپه ګډون جوړ شوى و؛ فرهنګيانو  ، پوهانو او ليکوالو د پښتونخوا د مشهور شاعر، اديب، متفکر او ژورناليست د شخصيت او ژوندانه په اړوند خپلې مقالې ولوستلې .
په رارسيدلو خبرونوکې ويل شوى دى: د سيمينار په علمي مجلس کې چې دڅيړنپوه عبدالواجد واجد په مشرۍ جوړ شو، د پښتونخوا پوهانو قيوم مروت ، صادق زيرک ، هارون رشيد خټک ، نعيم ازاد، سادات سحر خپلې څيړنيزې مقالې چې د ايوب صابر ټولنيز ، علمي او فرهنګي  شخصيت او ادبي اثار پکې منعکس  شوي و ، ولوستلې .
د سمينيار په کارکې د پښتونخوا ليکوال او اديب او د ايوب صابر د کاکا زوى محمد ظهور قريشي، د ده دکورنۍ په استازيتوب خبرې وکړې او د دغه سيمينار د جوړولوپه خاطر يې د افغانستان د اسلامي جمهوريت له دولت او د سرحدونو ، قومونو او قبايلو د چاروله وزارت څخه مننه وکړه .
د سمينيار دکار په پاى کې د افغانستان د علومو اکاډمى سلاکار څيړنپوه حبيب الله رفيع، د سمينار کار مثبت وباله اوغوښتنه يې وکړه چې د ايوب صابر ټول اثار دې راټول اوچاپ شي او هم دې په سمينارکې لوستل شوې مقالې په يوه ټولګه کې چاپ شي .
دسمينيار کار د مشاعرې په غونډې سره پاى ته ورسيد .
 

کابل- باختر دليندي دولسمه:
د افغانستان د اسلامي جمهوریت جمهوررئیس حامدکرزي د ملګرو ملتونو په عمومي اسمبله کې د څارونکي په توګه د فلسطین غړیتوب له امله خوښي څرګنده کړه او محمود عباس ته  یې مبارکي وویله.
د جمهوري رياست مطبوعاتي دفترباخترآژانس ته خبر ورکړ:
حامدکرزي د فلسطین د خپلواکې ادارې رئیس محمود عباس ته یو لیک استولی او په هغه کې یې ویلي دي: په خوښۍ سره مې خبر ترلاسه کړ چې غړو هېوادونو د ملګرو ملتونو په اسمبله کې په څرګند اکثریت، د فلسطین دوست دولت ته په دغه سازمان کې د څارونکي په توګه مثبته رایه ورکړه چې له شکه پرته دغه ستره بریا د فلسطین د خلکو او حکومت د پرله پسې او ګټورو هلو ځلو نتیجه ده.
حامدکرزي په دغه لیک کې ویلي دي: اجازه راکړی له دې لارې د افغانستان د خلکو په استازیتوب د فلسطین د خلکو د دغې سترې بریا له امله د خپلې مبارکۍ مراتب تاسو او ستاسو له لارې د فلسطین ورور ولس ته وړاندې کړم.
د هېواد جمهوررئیس هیله کړې چې دغه بریا د فلسطین د ځوریدلي او مقاوم ملت لپاره د خپلې خاورې د ګټلو او بشپړې خپلواکۍ پیلامه وي.#