22 May 2019

RSS Facebook

سوداگریز


تازه خبرونه

خلک : خداى دې هغو کسانو ته چې دلارو دبندښت سبب کېږي سزا ورکړي .

کابل باختر د غبرګولي لومړي : دغبرګولى دمياشتې لومړى نيټه...

اته کسيزه ډله شوکماران په کابل کې ونيول شول

کابل باختر د غبرګولي لومړي : دملي امنيت موظفينو په رييس...

دکابل واټونه بيا پرانستل شول

کابل باختر د غبرګولي لومړي : دکابل ښار هغه واټونه...

Youtube Player

khantry design

سوداگریز

سوداگریز

تل ابيب-باختر دتلې ١٦
د اسرائيلو يوه بې پيلوټه جنګي الوتکه چې د مديترانې له سمندر څخه د اسرائيلو هوايي حريم ته ننوتې و، راغورځول شوې ده.
په دغې الوتکې کې چاوديدونکې توکې نه و او ديوې غيراستوګنې سيمې دپاسه پرې ډزې وشوې.
د اسرائيلو يو اړوند خبرځاى ويلى دى چې دغه موضوع څيړل کيږي چې دغه الوتکه دپلټنې لپاره وه او يا دترورستي اقدام لپاره.
په څو وروستيو کلونوکې دا لومړۍ ځل دى چې يوه بې پيلوټه الوتکه اسرائيلو ته ننوځي . تراوسه پورې په ډاګه شوې نه ده چې الوتکې ته له کومه ځايه لارښوونه کېده.
 

طرابلس-باختر دتلې ١٦
د ايران دبهرنيو چارو وزير او دليبيا دکورنيو چارو وزير په ليبيا کې د اوو تنو ټښتول شويو ايرانيانو دخوشې کېدو خبرورکړ.
دغه کسان د ايران دسرې مياشتې کارکوونکې دي چې دوه مياشتې مخکې دليبيا دختيځ په بنغازي ښارکې ټښتول شوي وو.
د ايران دبهرنيو چارو وزير علي اکبر صالحي وويل چې دغه اووه تنه له خوشې کېدو وروسته په طرابلس کې د ايران سفارت ته وسپارل شول او له ليبيا څخه ترکيې ته روان شول.
دليبيا دسرې مياشتې يو اړونده خبرځاى ويلې و چې دغه ايرانيان دليبيا دسرې مياشتې په بلنه په رسمي توکه دغه ښار ته تللي وو.
 

کابل-باختر دتلې ١٦
د ناټو دوه تنه سرتيرې په افغانستان کې دياغي طالبانو دبريد له امله ووژل شول.
په دغو سرتيرو چې ويل کيږي امريکايي دي؛ پرون له غرمې وروسته کله چې دافغانستان په ختيځ کې په ګزمې بوخت وو، ياغيانو بريد وکړ او ووژل شول.
د امريکا ددفاع وزارت ديوې خبرپاڼې په خپرولو سره ددغو دووتنو سرتيرو وژل کېدل تاييد کړل، خو د قربانيانو نومونه او دپيښې د دقيقې ځاى نه دى په ډاګه کړى. دجمعې په ورځ هم يو امريکايي پوځي د افغانستان په جنوب کې له جګړه مارو سره په نښته کې ووژل شو.
د امريکا دجګپوړو پوځي مقاماتو له خوا د وړاندې شويو ارقامو له مخې، په افغانستان کې دناټو دځواکونو دځاى پرځاى کيدو له پيل څخه تراوسه پورې ددغه هيواد څه دپاڅه دوه زره تنه پوځيان له ياغيانو سره په نښته کې وژل شوي دي.
 

کابل- باختردتلې دمياشتې ١٥ :
دلوى څارنوالي دتشکيل اوصلاحيت دقانون طرحه ولسي جرګې ته معرفي شوه.
د ولسي جرګې مطبوعاتي دفتر باختراژانس ته خبرورکړ: په هغې غونډه کې چې د ولسي جرګې د رييس عبدالروف ابراهيمي په مشرۍ جوړه شوې وه. په پيل کې وکيلانو دهيواد دمهمو او اساسي موضوعاګانو په باب خبرې وکړې.
يوشميروکيلانو د ژمې د فصل رارسيدو ته په اشارې سره څرگنده کړه چې دهيواد دسړو سيمو دمواصلاتي لارو دبنديدو له امله به په دغوسيمو کې دخلکو اړتياوې په جدي توګه محسوسې شي او له دپيښو سره دمبارزې کميټه اودسوداګرۍ او صنايعو وزارت ستراتيژيکي زيرمې دې بايد مخکې له مخکې تدبيرونه ونيسي .
ځينو وکيلانو دهيواد د وګړو دشميرپه اړوند داحصايې دمرکزي ادارې دکړنو په څرنګوالې باندې انتقاد وکړ او دهيواد د وګړو دشميرپه تثبيتولو کې يې دمنل شويو نړيوالو اصولو اومعيارونو د رعايتولو غوښتنه وکړه.
دغونډې په دوام په ولسي جرګه کې دبدخشان وکيلې نيلوفر ابراهيمي دملي آرمان په ورځپاڼه کې ديوخبر په خپرېدو چې ګنې په  ځانمرګې  عمل يو تورن سړى د ولسي جرګې  د دغې غړى په وساطت  ازادشوى دى په هکله انتقاد وکړ. دغه خبريې بيخي درواغ وباله او له اداري هيئت څخه يې وغوښتل چې موضوع تعقيب کړي .
په همدې اړوند دديني ، فرهنګي ، پوهنې ، اودلوړو زده کړو دچارو  دکميسيون او د وکيلانو دمصوونيت اميتازونو او حقوقو کميسيون ته يې دنده وسپارله  چې موضوع وڅيړي .
وروسته له اجنداسره سم دلوى څارنوالي دتشکيل او صلاحيت دقانون طرحه چې په اتو فصلونو او په يوسلو څوارلسو مادوکې تدوين شوې ده
په پارلماني چاروکې د دولت وزارت دمرستيال محمدکريم باز له خوا معرفي شوه.
په همدې حال کې دعدليې وزير حبيب الله غالب ددغه قانون دطرحې په باب مفصل معلومات وړاندې کړل او دلوى څارنوالي اصلي اوفرعي دندې اوصلاحيتونه يې بيان کړل.
دلوى څارنوالي دتشکيل اوصلاحيت دقانون طرحه له معرفي کېدو وروسته په پارلماني چاروکې د دولت وزارت له مرستيال له خوا د ولسي جرګې ته وړاندې شوه.
د اجندا په دويمه برخه کې  چې دکونړ ولايت او د هيواد دنورو ولايتونو  نور امنيتي مسالې پکي شاملې وي او دملي دفاع د وزير جنرال بسم الله محمدي، دکورنيو چارو وزارت  د وزير جنرال غلام مجتبى پتنګ ، دملي امنيت دلوى رييس اسدالله خالد، دبهرنيو چارو وزارت دمعين،  دسرحدونو ، قومونو او قبايلو دچارو وزارت  دسرپرست  او دملي امنيت دشورا  داستازې په ګډون  پرې خبرې وشوې .
دمجلس پريکړه سري اعلام شوه .
 

کابل –باختر دتلې ١٥
دسرپل په ښارکې درې نيم کيلومتره سړک پخيږي. ددغه سړک دپخولو کار نن دسرپل د والي له خوا پرانيستل شو.
دسرپل له ولايت څخه دباختر آژانس دخبرپاڼې دخبر له مخې: ددغه سړک دپخولووکار په سرپل ښار د اسيا اباد له کلې د دسويډن په مرسته دڅه ناڅه څلور سوه پنځه اويا زرو ډالرو په لګښت په شپږوياشتوکې بشپړ شي.
دسرپل والي عبدالجبار حقبين په شمال کې دسويډن سفارت دپرمختيايي پروګرام دهمغږي له رييس څخه دمننې په ترڅ کې په دغه ولايت کې يې دجوړلو او بيا رغاونې بهير ډير مهم او ارزښتناک وباله.
 

کابل –باختر دتلې ١٥
دطالبانو ديو سيمه ييز قوماندان په کورکې ديو ماين دچاودنې له امله دده دکورنۍ يو تن غړى ووژل شو او درې تنه نور ټپيان شول.
دکاپيسا ولايت دمطبوعاتو مسوول قيس کامران باختر آژانس ته وويل: دغه ماين نن په تګاب ولسوالۍ کې دطالبانو دسيمه ييز قوماندان مولوي نصرالله په کورکې وچاوديد چې يو يوولس کلن ماشوم ووژل شو او دده کورنۍ دوه ښځې او يوماشوم ټپيان شول.
 

کابل- باختردتلې دمياشتې ١٥ :
دبدخشان ولايت د دروازو دسيمو په ولسواليو کې دکوکچې دسيند د پاسه دموټر دتګ راتګ پنځه پلونه پرانيستل شول.
ددغو پروژو دپرانيستلو په مراسموکې دکليو دبياجوړلو اوپراختيا وزير مهندس ويس احمدبرمک ، دماليې وزير داکترعمرزاخيل وال ،  د ژوندانه دچاپيريال ساتنې د ادارې لوى رييس مصطفى ظاهر ، د بدخشان والي اومشرتابه هيئت او په ملي شوراکې دخلکويوشمير استازو ګډون کړي وو.
دغه پلونه دکليو دبياجوړولو اوپراختيا وزارت له پرمختيايي بودجې څخه ديومليونو څلور سوه نولسو زرو امريکايي ډالرو په ټول لګښت او د جي ټي زيد او د آغاخان دټولنې په مالي مرسته په اتلسو مياشتوکې بشپړې شوي دى چې ددغه پروژو په بشپړيدو او دحلقوي سړک په جوړيدو سره دشغنان ، ماه مي  نسي  او شکي ولسوالۍ دکوفاب  ولسوالۍ له لارې دفيض اباد له ښارسره نښلول کيږي .
ديوبل خبرله مخې: له متمو ودانيو سره يې ديوسلو څلورو کيلومترو په اوږدوالې د دروازونو دسيمې د حلقوي سړک دجوړولو کار نن دکليو دبيا جودړولو اوپراختيا وزارت له بودجې څخه دڅه دپاسه څلورنيمومليونو ډالرو په لګښت پيل شو.
ددغې پرو ژې دکار په بشپړيدوسره داشکاشم، شغنان ، ماه مى ، نسي ، شکي، کوف آب  ، خواهان ، ياوان ، راغستان ، او د شهربزرګ  ولسوالۍ دبدخشان  ولايت له مرکز فيض اباد سره ونښلول شوى او دسړک له پلوه به ددغو سيمو د اوسيدونکو ستونزې لرې شي .
 

اسلام اباد\ بي بي سي نيوز\  دتلې دمياشتې ١٥ :
يوې ډلې اعتراض کوونکو دبې پيلوټه امريکايي الوتکو دبريدونو پرخلاف د اعتراض په توګه له اسلام اباد څخه ترقبايلي سيمو پورې لاريون وکړ.
دسولې په لسګونو تنه بريتانوي او امريکايي فعالين له دغه کاروان سره يوځاى شوي دي.
دکرکټ يوپخواني لوبغاړى عمران خان چې په پام کې لري ددغه کاروان ملګرتيا وکړي؛ دبي بي سي خبري شبکې ته ويلى دى چې دبې پيلوټه امريکايي الوتکو بريدونه غيرقانوني او بې گټې دى.
ده دخپلو خبرو په دوام وويل: دغه بريدونه دبشري قوانينو پرخلاف دى اوبايد چاته اجازه ورنکړو چې قاضي او حکم واوسي او ددغو بريدونو نتيجه دا ده چې ياغيان زيات کسان استخدام کړي.
 

کابل- باختردتلې دمياشتې ١٥ :
دمشرانو جرګې  رييس فضل الهادي مسلميار نن د نورستان ولايت دمرکز پارون ښار  له ځينو مشرانو اوسپين ږيرو سره دملي شورا په مقرکې وکتل.
دمشرانو جرګې مطبوعاتي دفتر باختراژانس ته  خبر  ورکړ:
په دې کتنه کې يو تن برخه وال د نورو په استازيتوب دخلکو دسيمه ييزو ستونزو په باب خبرې وکړې او ويې ويل چې دقوماندان مولوي صادق په نامه يو شخص له يوې مودې را په دې خوا د نورستان ولايت  په مربوطاتو کې ددغو سيمو دخلکو دځورونې سبب کيږي او خلک له خپلو کورونو څخه وتلو ته اړ باسي  او آن  نه پريږدي چې ددغو سيمو خلک  داستوګنې د کورونو په جوړولو اقدام وکړي  او زياته يې کړه:
سره له دې چې له دې پلوه يې څوځلې  په دغه ولايت کې حکومتي چارواکو ته شکايت کړى دى؛  خو په دې برخه کې  غور اوپاملرنه نه ده شوى .
دمشرانو جرګې رييس دخبرو په ترڅ کې دقانونيت دتطبيق او دخلکو دملکيتونو دساتنې  د اړتيا په باره کې رڼاواچوله اوټينګاريې وکړ: سيمه ييزې ادارې مکلفيت لري چې دخلکو عريضې دکشفي اوعدلي ارګانونوله لارې  وڅيړې  او د هغوى ستونزې حل کړي اوهم يې ژمنه وکړه چې د دوى دستونزو  د اوارولو په لاره کې به  دمشرانو جرګې  د اړوندو کميسيونونو له لارې عملي اقدامات وکړي .
 

کابل- باختردتلې دمياشتې ١٥ :
دکابل نوى والي نن  په ديني اوفرهنګي چاروکې دجمهوري رياست دستر سلاکار پوهاندنعمت الله شهراني له خوا ددغه ولايت منسوبينو ته ور وپيژندل شو.
عبدالجبارتقوا په دې وروستيو وختوکې دافغانستان داسلامي جمهوريت دجمهور رييس حامدکرزي له حکم سره سم دکابل د والي په توګه ټاکل شوى دى.  په هغې غونډه چې له همدې امله په پارلمان کې دخلکو دځينو استازو د ولايتي شورا دغړو، دځينو وزارتونو دمعينانو او د اداري اصلاحاتو اوملکي خدمتونو دخپلواک  کميسيون رييس په ګډون  جوړه شوې وه.
په پيل کې دسيمه ييزو ارګانونو دخپلواکې ادارې رييس عبدالخالق فراهي دعبدالجبار تقوا دټاکنې په باب دجمهور رييس حکم ولوست.
وروسته دکابل پخواني والي احمدالله علي زى ددغې ادارې ځينواقدماتو  اوبرياليتوبونه  چې دده دماموريت په دوران کې ترلاسه شوي دي؛  بيان کړل.
ورپسې دکابل د ولايتي شورا رييس ددغه ولايت دپخواني والي کړه وړو اوفعاليتونه وستايل  او نوى والي ته يې دبرياليتوب هيله وکړه.
دکابل نوى والي  عبدالجبار تقوا هم په خبروکې وويل:  زه ديو خدمتګار په توګه موظف شوى يم او د لوى خداى (ج)  څخه هيله کوم چې ستاسو په همکارى په دې لاره کې برياليتوب راپه برخه کړي .
په دې غونډه کې دجمهوري رياست دلومړي معاونيت د دفتر رييس محمديوسف اعتبار ، دکابل ښاروال ديپلوم انجينر محمديونس نو انديش او دچارو د اداري او د وزيرانو شورا  د دارلانشا دلوى رياست ستر سلاکار حبيب الله اصغري هم برخه لرله .