14 October 2019

RSS Facebook

سوداگریز


تازه خبرونه

په اوسني پړاو کې د والیانو ستر مسوولیت

کابل/ د تلې ۲۲ مه / باختر ټول دا واقعیت مني...

په ننګرهارکې د نږدې دوو میلیونو افغانیو په لګښت استنادي دېوالونه جوړېږي

کابل/دتلې ۲۲ مه/باختر د ننګرهار د چپرهار ولسوالۍ په بانډې سيمه...

د طالبانو يو پټنځاى په لوګرکې له منځه يوړل شو

کابل/ د تلې٢٢مه / باختر د پوليسو د ځانګړو قطعاتو...

Youtube Player

khantry design

سوداگریز

سوداگریز

کابل باختر دسلواغي شپاړسمه
په کابل کې  دامريکا سفير نن دپروفيسر حضرت صبغت الله مجددي کورته لاړ او له ده سره يې دنظر وړ مسئلو په باب وکتل .
  دشخړو دحل کولو او له دولت سره دخلکو داړيکو دکميسيون ددفتر رييس باختر اژانس ته وويل په دې کتنه کې پروفيسر حضرت صبغت الله مجددي دافغانستان له خلکو سره دامريکا دمتحده ايالاتو دمرستو له امله قدرداني وکړه او دافغانستان دخلکو سره يې ددغه هيواد دلازياتو مرستو غوښتنه وکړه .  په دې کتنه کې امريکا ته دافغانستان دجمهور رييس دوروستي سفر په باب هم خبرې وشوې .
دامريکا سفير وويل: هيواد يې چمتو دى چې دافغانستان  دخلکو ددوست په توګه ددغه هيواد له خلکو سره هراړخيزې همکاري وکړي .
 

کابل باختر دسلواغي شپاړسمه
يوه پنځه ويشت کلنه ميرمن دغور ولايت په مربوطاتوکې د خپل ميړه له خوا ووژل شوه .
دغه پيښه تيره شپه دغور ولايت په تيوري ولسوالۍ کې رامنځته شوه او قاتل تښتيدلى دى .
دغور دوالي ويندوى عبدالحي خطيبي  باختر اژنس ته وويل چې تراوسه پورې ددغې پيښې  انګيزه نه ده معلومه شوې خو په دې اړوند څيړنې پيل شوي دي .
ددغې ميرمنې پلار ويلي دي چې لور يې په ډزو سره وژل شوې ده او ده کورني  ستونزې دخپلې لور وژل کيدو اصلي عامل بللى دى .
 

Monday, 04 February 2013 12:50

تبصره

کابل باختر دسلواغي شپاړسمه
  دافغانستان داسلامي جمهوريت جمهور رييس حامدکرزي  ديوې مقالې په ليکلو سره چې دبي بي سي  په پښتو ويب سايت کې  خپره شوه په هيواد کې دسياسي پرمختياوو څرنګوالي څيړلى دى او دسولې لرليد په باب يې څرګندونې کړي دي او په دې باب يې ټينګار کړى دى چې دغه بهير دې بايد په افغاني مديريت سره او له بهرني لاسوهنې پرته تعقيب شي .
  دباختر اژانس مبصر ليکي: حامدکرزي دغه مقاله دافغانستان ، پاکستان او دبريټانيا دمشرانو ددرې اړخيزې غونډې په درشل کې چې همدا اوس په لندن کې روانه ده ليکلې ده .
په دې غونډه کې په افغانستان کې دسولې بهير او سيمه ئيزې پرمختياوي اوهمکاري څيړل کيږي .
دافغانستان داسلامي  جمهوريت جمهور رييس په خپلې مقاله کې په تيرو ديرشو کلونوکې هغه وخت چې دپخواني شوروي سره پوځ دمنل شويو نړيوالو معيارونو په پام کې نيولو پرته په لنډ پارى سره او له سنجش پرته په افغانستان بريد وکړه  دافغانستان  حالات څيړلي دي او يادونه يې کړې ده چې دافغانستان دخلکو بدمرغي اومصيبت  دهمدغه تيري زيږنده دى او دبهرنيو لاس وهنو او تيريو په قالب کې دوام لري .
په دې موده کې دافغانستان خلکو ډول ډول تيري او لاسوهنې تجربه کړي او دزياتو سياسي لوبو ښکار شول .
سره له دې چې دبهرني تيري پرخلاف جهاد اومبارزه ددغه هيواد دخلکو مسلم حق وو خو دمجاهدينو په برياليتوب سره داسې زمينه برابره شوه چې ددوى برياليتوب او واکمني دخلکو دکړاو او درد سبب شي او دغه راز ديوبل جريان درامنځته کيدو لپاره زمينه مساعده شي .
  حامدکرزي  په دې مقاله کې دطالبانو د ډلې ظهور او پيدايښت  ته اشاره کړې ده چې پيدايښت يې هغه هم په هغه وخت کې چې خلک له جګړې او نا امنيو څخه په تنګ  شوي و دخلکو او دسياسيت والو له هرکلي سره مخامخ شو خو دغه غورځنګ دهغې ژمنې او شعار پرخلاف چې لرل يې دانحراف په لور ګام واخيست او په هيواد کې يې ديوې کورني جګړې لپاره زمينه برابره کړه .
سياسي کارپوهان وايي چې جمهور رييس کرزي په دې مقاله کې داټکۍ په ډاګه کړى دى چې په افغانستان  کې پيچلي پيښې او پرمختياوي له هيواد څخه په بهرکې دطرحه شوي سناريو او دسيسو په چوکاټ کې  رامنځته شوي دي چې ددغه شان لاسوهنو ددوام لپاره زمينه پراخه شي او ګټې غوښتونکي هيوادونه دافغانستان په وړاندې دمشخصو لوبو لاره غوره کړي .
حامدکرزي په دې مقاله کې د ٢٠٠١ کال دسپتمبر دمياشتې له يوولسمې نيټې وروسته بدلونونه څيړلي دي چې دامريکا په څو ښارونو کې دتروريستي بريدونو په تعقيب په افغانستان کې دبهرنيو پوځيانو دشتون لپاره زمينه برابره شوه .
دافغانستان خلکو چې کلونه کلونه په خپل هيواد کې دبهرنيو لاسوهنو له امله درامځته شويو کړاونو او ناخوالو شاهدان وو په دې هيله دبهرنيو ځواکونو او دنړيوالې ټولنې هرکلي وکړ چې دوى به دنړيوال ملاتړ تر چتر لاندې په سولې او سوکالي برلاسي شي خو له بده مرغه افغانستان يو ځل بيا دهغو ګټې غوښتونکو هيوادونو دسياليو  په ډګر بدل شوچې هريويې په دغه هيواد کې دخپلو ستراتيژيکي ګټو په لټه کې و .
دجمهور رييس کرزي دغه خبرې  ددقت وړ دي چې په هيواد کې روانې جګړې اوپيښې دبهرني لاسوهنې زيږنده  دي .  خو دلته دافغانانو رول څه دى ؟  ايا موږ دې ته سترګې په لاره واوسو چې سوله اوثبات بهرني هيوادونه موږ ته په سوغات راوړي ، په داسې حال کې چې هغوى دخپلو ګټو په شاوخوا څرخي او که چيرې خبره دسولې او تفاهم دي هغوى به بيا هم دخپلو ګټو په لټه کې وي نوضروري ده چې په هيواد کې دسولې او خبرو بهير په يو افغاني پروګرام بدل شي او داکار به هغه وخت شوني  دي چې افغانان د عمل نوښت په لاس کې واخلي او دغه بهير له بهرنيو لاس وهنو سره سره په يو پياوړي افغاني جريان بدل کړي چې دافغانانو له خوا يې مديريت شي .
په داسې حال کې چې يو شمير افغاني سياسي جريانونه او آن بهرني هيوادونه په خپلواک او خواره واره ډول په افغانستان کې دسولې لپاره کار کوي داکاربه يوازې دچارو دګډوډي او په پاى کې ددغه بهير دکمزورتيا سبب شي .
دکرزي دغه بلنه کيداي شي  دارزښت وړ وي چې دافغانستان روښانه  راتلونکي يوازې په ملي يو والي او اتفاق کې شونې ده .
دافغانستان دولت دهغو سوله ئيزو هڅو چې رښتينې  او له افغانانو سره دمرستې په مفکورې سره وي ملاتړ کوي خو په دې ټينګار کوي چې دسولې لپاره هلې ځلې دې له يوه محور څخه ترسره شي ځکه په څو وروستيو کلونو کې چې په هيواد کې دسولې دهڅو خبرې وې دتيرايستلو ، ناهمغږي او دسليقوي کار موارد تر سترګو کيږي چې بايد پاى ته ورسول شي .
 

کابل باختر دسلواغي شپاړسمه
په ننګرهار ولايت کې دنيالګيو دايښودلو پروګرام نن پيل شو .
ټاکل شوې ده  چې ددغه پروګرام په بهير کې او دپسرلي درارسيدو په درشل کې دننګرهار ولايت  په ګوټ ګوټ کې څه ناڅه درې مليونه  ميوه لرونکي او ډولي نيالګي کيښودل شي .
  دننګرهار ولايت مرستيال محمد حنيف ګرديوال نن  په اډې فارم کې ديو نيالګي په ايښودلو سره په دغه ولايت کې دنيالګيو دايښودلو پروګرام په رسمي  ډول پيل کړ .
ګرديوال  باختر اژانس ته وويل چې په ننګرهار کې دسلګونو زرو نيالګيو په ايښودلو سره به هلې ځلې وشي چې هم ددغه ولايت دبيلابيلو سيمو ښکلا زياته شي اوهم دهوا دککړتيا کچه ټيټه شي .
  دننګرهار دوالي مرستيال له خلکو څخه وغوښتل چې دڅه ناڅه يوه نيالګي په ايښودلو سره دخپلو سيمو په سمسورتيا او ښکلا کې ونډه واخلي .
دننګرهار ولايت دکرنې او اوبو لګولو رييس انجنير محمد حسين صافي وايي چې داځل به هر نيالګۍ دناڅيزو پيسو په بدل کې دننګرهاريانو په واک کې ورکړي شي .
دننګرهار ولايت دکرنې او اوبو لګولو درييس په باور خلک به دناڅيزو  پيسو په ورکولو سره دنيالګي په قدر زيات پوه  شي او دهغه په ساتنه او وده کې به هڅه او هاند وکړي .
ده وويل دهر نيالګي بيه به دبازار له بيې څخه څو برابره کمه وي .
خو په دولتي تاسيساتوکې به نيالګي په وړيا ډول وويشل شي .
هيله کيږي چې ددغه پروګرام په بهير کې درې مليونه ميوه لرونکي ، بې ميوې او ډولي نيالګي دپارکونو ، څلور لارو ، واټونو ، ښوونځيو ، ديني مدرسو، دولتي مرکزونو او دروغتيايي مرکزونو په ګډون  دننګرهار ولايت په مرکز او اړوندو ولسواليو کې کيښودل شي .
داپه داسې حال کې  ده چې تيرکال هم په زرګونو نيالګي دنه پاملرنې او نه ساتنې  له امله  بيا وچ شول .
په همدې حال کې دننګرهار ولايت دکرنې او اوبو لګولو درياست او دجلال اباد دښاروالۍ  مقامات وايي چې دوى به هم دخلکو تر څنګ ددغو نيالګيو دساتنې او ودې په لاره کې هڅه او هاند وکړي .
 

کابل باختر دسلواغي شپاړسمه
دهرات ولايت سيمه ئيز مقامات وايي چې دغوريانو په ولسواليو کې يې دشلو تنو بنديانو دتيښتې مخه نيولې ده .
په رارسيدلو خبرونوکې ويل شوي دي چې ديکشنبې  په شپه  دغوريانو ولسوالۍ دجيل يو ډيوال داورښتونو او دسيلاونو دراوتلو له امله ونړيد او دغې پيښې  دبنديانو دناکامې تيښتې لپاره زمينه برابره کړه خو دهرات ولايت دامنيې قوماندانۍ يو مقام عبدالحميد باختر اژانس ته وويل چې امنيتي مامورينو دخاصو تدبيرونو په نيولو سره دشلو تنو بنديانو دتيښتې  مخه ونيوله .
  ويل کيږي چې دوه تنه بنديان ټپيان شوي دي خو دهرات دپوليسو دغه مقام وايي چې په اوس وخت کې دغوريانو ولسوالۍ دجيل امنيت په دقيق ډول تامين شوى دى .
 

کابل – باختر دسلواغې شپاړلسمه :
دافغان امنيتي ځواکونو په يولړ عملياتو کې نهه تنه وسله وال مخالفين ونيول شول .دکورنيو چارو وزارت مطبوعاتي دفتر باختر آژانس ته خبرورکړ : نهه تنه وسله وال مخالفين دکابل ،بغلان ،ارزګان او دپکتيا د ولايتونو په مربوطاتو کې دافغان امنيتي ځواکونو په چاڼيزو عملياتو کې ونيول شول .
يوه اړونده خبرځاى وويل : ددغو عملياتو په بهير کې يوه پيکا ،دوه کلاشنکوفونه ،يو ماين ،د درندو وسلو دولس ګولۍ ،يوولس کيلوګرامه چرس اوسل کيلوګرامه امونيم نايتريت چې دبمونو په جوړولو کې کارول کيږي هم په عملياتوکې دشاملو ځواکونو لاس ته ورغلي دي .
 

کابل – باختر دسلواغې شپاړلسمه :
دوسله والو طالبانو د ډلې څلور تنه قوماندانان دملي اردو دځواکونو په خاصو عمليات کې ونيول شول .
دملي دفاع وزات دويندوى مطبوعاتي دفتر باختر آژانس ته خبرورکړ : دملي دفاع وزارت دخاصې قطعې منسوبينو دوسله والو طالبانو د ډلې ديو شمير مشرانو دافرادو د تعقيبولو په مقصد دقندهار ولايت دميوند او دهلمند ولايت دنادعلي دولسواليو په مربوطاتو کې عمليات ترسره کړل چې له امله يې دوسله والو طالبانو د ډلې څلور تنه قوماندانان چې دوسلو او مهماتو په بشړولو ،دځان مرګو او وسله والو بريدونو په پروګرام جوړو کې فعاله دنډه لرله ونيول شول .
 

کابل – باختر دسلواغې شپاړلسمه :
دفارياب ولايت دکانونو رييس او دوه تنه همکاران يې چې څه موده مخکې دوسله والو طالبانو له خوا تښتول شوي وو نن دتښتوونکو له منګولو څخه آزاد کړى شول.
دفارياب ولايت دملي امنيت درياست ويندوى اميد، باختر آژانس ته وويل :
دفارياب ولايت دکانونو رييس انجينير شاه ولي او دوه تنه همکاران يې دسپين ږيرو او قومي مخورو دمنځګريتوب له امله دتښتوونکو له منګولو څخه آزاد کړى شول دخبرځاى دڅرګندونو له مخې، دغه کسان څه موده مخکې دفارياب ولايت په دولت آباد ولسوالۍ کې وتښتول شول او ددغه ولايت په المار ولسوالۍ کې له معاملې پرته دتښتوونکو له منګولو څخه آزاد کړى شول.
 

کابل باختر دسلواغي شپاړسمه
  دهرات ولايت سيمه ئيز مسوولين وايي د هغو سختو اورښتونو له امله چې ديکشنبې  دورځې  دسهار له لومړيو شيبو څخه په دغه ولايت کې پيل شوي دي تر اوسه پورې داستوګنې ٧١٢ کورونه په بشپړه  توګه نړيدلي دي او په لومړنيو رارسيدلو خبرونوکې  دپښتون  زرغون ولسوالۍ په مربوطاتو کې  ديو تن دوژل کيدو خبرې هم شوي دي .
ديکشنبې  دورځې دسهار له لومړيو وختو  څخه تر نن سهار پورې په هرات کې تالندې اوبريښنا او سختو اورښتونو دوام درلود .
دچشت ، پښتون زرغون ، شينډنډ ، ګذرې ، کشک رباط سنګي ،  انجيل  او دغوريانو ولسوالۍ اودهرات ښار ددغو اورښتونو او دسيلاونو دراوتلو له امله زيانمن شوي دي .
دهرات  ولايت له پيښو سره دمبارزې دادارې رييس عبدالحميد مبارز  باختر اژانس ته وويل چې دهرات ولايت دچشت اوپښتون زرغون ولسواليو زيات زيان زغملي دي .
  دده دڅرګندونو له مخې، داستوګنې ٢٨٠ کورونه  په چشت ولسوالۍ کې او ٢٠٠  کورونه په پښتون زرغون ولسوالۍ کې  ويجاړ شوي دي .
دهرات ښار نهمې او لسمې ناحيې ته هم دسيلاونو له امله  زيانونه اوښتي دي .
  دهرات ولايت له پيښو سره دمبارزې دادارې مسوولين وايي چې ددغو سيلاونو دراوتلو له امله داوښتو تاوانونو دڅيړنې لپاره دوه  مرستندوي ټيمونه جوړ شوي  دي او دغه اداره به ډير ژر خپلې  بيړني مرستې دغو سيمو  ته وليږي .
داپه  داسې حال کې ده چې په هرات کې دسيلاونو له امله زيانمن شوي کسان وايي چې تراوسه پورې يې دحکومت او دنورو مرستندويومرکزونو له لارې هيڅ راز  مرسته نه ده ترلاسه کړې .
په رارسيدلو خبرونوکې ويل شوي دي هغه  په سلګونو  کورنۍ چې په دغو سيلاونو کې يې خپل کورونو له لاسه ورکړي دي همدا اوس په خواره واره ډول په جوماتونو ، ښوونځيو او په نورو دولتي تاسيساتو اوياهم دخپلو خپلوانو په کورونوکې شپې سبا کوي .
 

کابل باختر دسلواغي شپاړسمه
  په ننګرهار ولايت کې دواورې دسختواروښتونو له امله ددغه ولايت دحصارک ولسوالۍ ټولې مواصلاتي لارې دترافيکو پرمخ تړلي شوي دي .
باختر اژانس  ته په رارسيدلو خپرونوکې ويل شوي دي چې په حصارک ولسوالۍ کې په سلګونو کورنۍ په لويو لارو او سړکونو کې دواورې دزياتوالي له امله په خپلو کورونوکې بند پاتې دي .
ويل کيږي چې دحصارک ولسوالۍ په ګډون ددغه ولايت په زياترو سيمو کې واوره يو متر ته رسيدلې ده .
دحصارک ولسوالۍ دپرمختيايي شورا مسوول صنوبر خان  له باختر اژانس سره په تيلفوني اړيکه کې وويل چې  دواورې سخت اورښتونه اوپه لارو کې  دواورې  زياتوالي  ددېې سبب شوي دي چې له بازار او ددرملنې له مرکزونو سره ددغې ولسوالۍ دخلکو اړيکې وشليږي .
يوه اړونده خبرځاى وويل چې ددغې ولسوالۍ اوسيدونکي دخوراکي توکو او دسون دموادو له کمښت سره مخامخ دي .
صنوبر له  دولت اوله مرستندويو مرکزونو څخه وغوښتل چې ډير ژر دې دحصارک ولسوالۍ دمواصلاتي لاروپه پرانستلو او ددغه ځاى اوسيدونکو ته دخوراکي توکو او داړتيا وړ نورو مالونو ليږلو ته پاملرنه وکړي .
په رارسيدلو خبرونو کې په حصارک کې دواورې ښوييدنې دپيښو او دڅو کورونو دنړيدو له امله دسردرسيدلو زيانونو يادونه هم شوې ده خو شمير يې تراوسه پورې څرګند نه دى .
په همدې حال کې دننګرهار سيمه ئيز مقامات وايي چې ډير ژر دواورې ددغو اورښتونو له امله خلکو ته درسيدلو تاوانونواو دانساني زيانونو دکچې دمعلومولو لپاره څيړنې پيليږي .
دننګرهار دوالي ويندوى احمد ضيا  عبدالزي  باختر اژانس ته وويل چې دپيښو ضد ادارې دټيمونو له څيړنې وروسته به  ډير ژر بشري مرستې په حصارک او د ننګرهار په نورو سيمو کې زيانمنو شويو کسانو ته وليږل شي .
  دعبدالزي دڅرګندونو له مخې، په ننګرهار کې داورښتونو له دريدو وروسته به دترافيکو پرمخ ددغه ولايت دمواصلاتي  لارو دبيا پرانستلو لپاره هلې ځلې پيل شي .