25 February 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل\  باختردسلواغې دمياشتې  ١٩
د افغانستان د اسلامي جمهوریت جمهوررئیس حامدکرزی او ملګری پلاوی یې د بریتانیا، ناروې او مصر هېوادونو ته له سفر وروسته، نن سهار هېواد ته راستون شو.
دجمهوري رياست مطبوعاتي دفترباختراژانس ته خبرورکړ.
د هېواد جمهوررئیس د خپل پینځه ورځني سفر په لړکې د لندن په ښارکې د افغانستان، پاکستان او بریتانیا د هېوادونو د مشرانو په دریمه درې اړخیزه ناسته کې ګډون وکړ او د ناروې پلازمېنې اوسلو ته د سفر پر مهال یې د افغانستان او ناروې ترمنځ د اوږد مهالو ستراتیژیکو همکاریو موافقه لیک د دغه هېواد له صدراعظم سره لاسلیک کړ او همدا راز یې د اسلامي همکاریو د سازمان د سرمشریزې په دولسمه غونډه کې چې د مصر په پلازمېنې قاهره کې جوړه شوې وه، ګډون وکړ.
 

کابل\  باختردسلواغې دمياشتې  ١٩ :
دبادغيس ولايت شپږتنه کونډې ا وبيوزلې ښځې له يوې روزنيزې دورې له تيرولو وروسته دغالۍ اوبدلو له کورس څخه فارغې شوې.
دبادغيس ولايت دکليو دبيا جوړولواوپراختيا رييس سيدرسول اکبري باختراژانس ته وويل  چې دغه پروژه دکليو دبيا جوړولو اوپراختيا دوزارت له خوا  داووه پنځوسو زرو ډالرو په لګښت په خپلو پښو ددريدو په لاره کې ددوه شپيتو تنو بيوزلو اوګونډو ښځو ته جوړه شوې وه.
ددغه کورس  يوې برخه والې امنې وويل، زه پخوا په کور کې ناسته وم او ددغه کورس په جوړيدو سره مې وکولاي شول غالۍ اوبدل زده کړم او اوس کولاي شم خپله کورنۍ اعاشه کړم.
دبادغيس ولايت دکليو دبيا جوړولو اوپراختيار رييس وويل چې ددغه کورس په پاى کې  دکورس برخه والو ته دغالۍ اوبدلو يوه دستګاه او نور ضروري لوازم چې په غالۍ اوبدلو کې کارول کيږي په فارغانو وويشل شول .
 

کابل\  باختردسلواغې دمياشتې  ١٩ :
دکندزولايت ددشت ارچي ولسوالۍ دلايقه سرخ په سيمه کې دوه تنه شپانه دځمکې ښوييدنې له امله ووژل شول.
ددشت ارچي ولسوال شيخ صدرالدين وويل، دغه دوه تنه شپانه پرون کله چې په يوه دره کې يې  خپل څاروي پرځاى کړي  دځمکې دښوئيدوله امله ووژل شول.
ده زياته کړه چې خلکو ددغو شپنو مړي له  خاورو څخه ايستلي دي .
دا په داسې حال کې ده چې په دې وروستيو وختو کې درې تنه په سمنګانو کې دواورې دښوئيدنې له امله وژل شوي و.
 

کابل\  باختردسلواغې دمياشتې  ١٩ :
دهرات ښار ابتدائيه  محکمې  يو تن دتروريستي اوانسان تښتونې په جرم په اعدام محکوم کړ.
دهرات ولايت دابتدائيه محکمې رييس غلام رسول منصور باختراژانس ته وويل په هغې علني قضايي غونډه  کې چې پرون ددغه ولايت داستيناف  په محکمه کې جوړه شوه دکورني او بهرني امنيت پرخلاف دجرمونو درې قضيې وڅيړل شوې .
منصور زياته کړه: له دغو دريو تنو څخه يوتن يې په انسان تښتونې ، ترور او چاودنو کې چې په شينډنډولسوالۍ کې دبيګناه خلکو دوژنې سبب شوى و په سخته سزا يعنې  اعدام محکوم شو.
دهرات دښاري محکمې  رييس ټينګار وکړ چې دوه تنه نور دتښتونې په تور،
دتښتونې او دانسان دقاچاقو پرخلاف  دجرايمو  دشپږمې مادې ددويمې فقرې له  مخې هريو يې په پنځلس کاله تنفيذي بند محکوم شول.
دمجرمينو داستيناف غوښتنې حق خوندى دى.
 

کابل\  باختردسلواغې دمياشتې  ١٩ :
پنځه اويا تنه بنديان پرون دحضرت محمد (ص) دنيکمرغه ميلاد په  مناسبت دافغانستان داسلامي جمهوريت دجمهوررييس دفرمان له مخې  دهرات له جيل څخه ازاد شول.
دهرات جيل دافغانستان له سترو جيلونو څخه دى چې اوس درې زره نارينه او ١٥٠ تنه ښځې پکې شپې سباکوي.
دهرات دمرکزي جيل سرپرست غلام محي الدين حميدي باختراژانس ته وويل  چې دهيواد دجمهوررييس د ١١٤ ګڼه فرمان له مخې  پنځه اويا تنه بنديان له دغه جيل  څخه ازاد شول چې  څوارلس تنه يې ښځې دي.
دهرات دجيل مسوولين وايي اوس څه دپاسه درې زره تنه بنديان د هرات په جيل کې شپې سباکوي.
ديوبل خبرله مخې ،  دسرپل ولايت له جيل څخه شپږتنه بنديان ازاد شول .
دسرپل ولايت دڅارنوالي رييس باختراژانس ته وويل په  خوشي شويو بنديانو کې يوه ښځه هم شته.
دسرپل ولايت په جيل کې د اوولسو تنو ښځو په ګډون  دوه سوه اوولس تنه بنديان شپې سباکوي .
 

کابل\  باختردسلواغې دمياشتې  ١٩ :
دماين دشارتولو يوه دستګاه اويوه اندازه مهمات دباميانو ولايت د کهمرد ولسوالۍ له يوپټنځاى څخه ترلاسه شول.
دباميانو ولايت دامنيې قوماندانۍ ددفتر آمر څارمن احمدعلي يازاده  باختراژانس  ته وويل چې له دغه پټنځاى  څخه دماين دشارتولو يوه دستګاه ، دپرسونل ضد اووه ماينونه ، دآر پي   جي _ ٧  اووه  ماينونه ، دهاوان او اګه اس   سل ماينونه اويوه تومانچه ترلاسه شوې ده ، دماين دشارتولو دستګاه داسې يوه دستګاه ده چې دانډل وهلو په واسطه بريښناتوليدوي اوماينونه  چوي.
ده وويل ،دغه مهمات  چې دورانکارو عملونو دترسره کولو په مقصد باميانو ته ليږدول شوي  و ددغه ولايت  دامنيې قوماندانۍ داستخباراتو مديريت  دپرسونل له  خوا کشف شول  خوپه دې  تور څوک نه دى نيول شوى او څيړنې دوام لري.
امنيتي مسوولين وايي چې ځينې وختونه دکهمرد ، سيغان او شيبر ولسوالۍ دبغلان ولايت له لارې دمخالفانو تر امنيتي ګواښ لاندې نيول کيږي.
 

کابل- باختر  دسلواغي اتلسمه:
په هلمند ولايت کې دکرنې لومړني انستيتوت نن پرانيستل شو .
سيمه ئيز مقامات وايي چې دغه علمي ، روزنيز مرکز به په هلمندکې د کرنې له ودې او د دغه سکتور له بيا جوړولو سره مرسته وکړي .
  د دغه انستيتوت تاسيسات د انګلستان له خوا د نږدې يو مليون ډالرو په لګښت جوړ شوې دي .
د پوهنې وزير فاروق وردک وايي چې دغه انستيتوت به ډير ژر د افغانستان په جنوب کې دکرنې د پراختيا په لاره کې په ډير ستر علمي ، روزنيز مرکز بدل شي
ددغه انستيتوت په تاسيساتو کې تدريسي  برخې ، سمبال لابراتوار، دکنفرانسونو سالون، د ډوډۍ خوړلو خونه ، جومات، کتابتون او محصلانو ته ليليه په پام کې نيول شوې ده .
دپوهنې وزير ددغه انستيتوت د پرانيستلو په مراسموکې وويل چې دغه علمي _ روزنيز مرکز به ځوانان دکرنې په برخه کې تر څوارلسم ټولګي پورې وروزي .
  دغه انستيتوت به د راتلونکې هجري لمريز کال له لومړيو وختو څخه په هلمند کې دکرنې په پراختيا کې د علمي ، روزنيز مرکز په توګه خپل فعاليت پيل کړي .
  په هلمند ولايت کې په سلو کې څه دپاسه اويا خلک په کرکيله بوخت دي .
   د هلمند والي محمدنعيم له باختر اژانس سره په خبرو کې هيله وکړه چې انستيتوت وکولى شي د دکرکيلې د ودې او په دغه ولايت کې دنشه يي توکو دتوليد دکچې دکمښت لپاره  زمينه برابره کړي .
د ولسي جرګې دويم نايب نعمت الله غفاري د دغې انستيتوت دپرانيستلو په مراسمو کې له انګلستان څخه وغوښتل چې دافغانستان دکرکيلې د ودې لپاره خپلې مرستې پراخې کړي .
 

کابل -باختر  دسلواغي اتلسمه:
دافغانستان دکرکټ ټيم دکرکټ د پريم ليګ په سياليوکې چې په متحده عربي اماراتو کې ترسره شوې وې؛ لومړۍ مقام وګاټه .
دکابل له نړيوال هوايي ډګرڅخه د باختر اژانس د خبريال دخبر له مخې: ددغه ټيم  غړي چې د لوبو د ترسره کولو لپاره متحده عربي اماراتو ته  تللي و؛  نن  هيواد ته راستانه  شول .
دکابل دکرکټ زون رييس عزيز الله فضلي او دکابل کندز دټيم ښوونکى وويل چې دغه سيالۍ دافغانستان ، هندوستان ، کويټ ،بنګله ديش، سريلانکا ، متحده عربي اماراتو او د پاکستان له هيوادونو څخه د دوه ديرشو ټيمونو په ګډون پيل شوې وې چې په نتيجه کې يې  د افغانستان  دکرکټ ټيم  لومړۍ مقام ، هندوستان دويم مقام او پاکستان دريم مقام وګاټه .
 

کابل- باختر  دسلواغي اتلسمه:
د تورغندي _ هرات په لويه لاره کې د نفتي موادو په کاروان د وسله والوطالبانو د بريد له امله  يو تن ووژل شواو درې تنه نور ټپيان شول .
په دې پيښه کې په نفتي توکو بار درې ټانکرونه هم سوځيدلې دي .
دغه پيښه پرون دتورغندي _ هرات په لويه  لاره کې دکشک رباط سنګي ولسوالۍ  په خواجه جيرسيمه کې له هغه وروسته رامنځته شوه چې يوې ډلې وسله والوطالبانو د نفتي موادو په کاروان بريد وکړ .
   دهرات ولايت  د امنيې قوماندانۍ ويندوى نورخان نيکزاد باختر اژانس ته وويل  چې په دې پيښه کې دنفتي موادو ديو ټانکر چلوونکى ووژل شو او درې تنه نور يې  ټپيان شول .
  عيني شاهدان وايي چې طالبانو لومړۍ دنفتي موادو کاروان چې د هرات ښار ته روان و ،  ودراوه او وروسته يې په سوځولو لاس پورې کړ .
نيکزاد تاييدوي چې د نفتي موادو ددغه کاروان يو موټرچلوونکى د وسله والوطالبانو  د ډزو له امله  ووژل شو او درې تنه نور يې ټپيان شول .
  په همدې حال کې په  هرات کې د يوروغتيايي مرکز ډاکترانو د دغې پيښې د دوو تنو  ټپيانو روغتيايي حالت خراب وباله .
د تورغندي بندر له ترکمنستان سره په پوله کې په هغه ځاى کې دى چې زياتره لګښتي نفتي مواد له دغه ځاى څخه وارديږي .
 

کابل- باختر  دسلواغي اتلسمه:
دافغانستان داسلامي جمهوريت دجمهور رييس حامدکرزي په ګډون داسلامي هيوادونو د مشرانو دولسمه غونډه نن په قاهره کې جوړه شوه .
  دباختر اژانس دخبر له مخې: داسلامي هيوادونو دمشرانودولسمه غونډه په داسې حال کې جوړيږي چې دغړو هيوادونو مسلمانان له ګڼو ستونزو سره لاس او ګريوان دي .
دمصر جمهور رييس محمد مرسي د دغې غونډې د پيلوونکى په توګه په خپلو خبروکې په نړۍ کې د اسلامي ټولنې ستونزې په ګوته کړې او په دغو ستونزو د برياليتوب لارې چارې يې مشخصې کړې .
دمصرجمهور رييس محمد مرسي طرحه کړه چې بايد د اسلام رښتينې څېره  نړيوالو ته معرفي شي . ډاراچوونه او ترور له اسلام سره هيڅ راز اړيکې نه لري .
ده له برخه والو څخه وغوښتل چې د اسلام په باب خپل برداشت او فهم سم کړي او پرې نه ږدي چې نامسلمانان له اسلام څخه ناوړه استفاده وکړي .
  په دې غونډه کې به دافغانستان داسلامي جمهوريت جمهور رييس حامدکرزي هم وينا وکړي .
په مسلمه توګه دهيواد جمهور رييس به په دې وينا کې دهغو مصيبتونو او کړاونو په  باب  رڼا واچوي چې د افغانستان دخلکو دښمنان له اسلام څخه په ناوړه تعبير سره په ځانمرګو او چاوديدونکو بريدونوکې د دغه هيواد په ملکي وګړو يرغل کوي .
دافغانستان اسلامي جمهوريت په سيمه کې له ډار اچونې څخه د رامنځته شوى بحران او شر څخه د سيمې د خلاصون په خاطر د اسلامي هيوادونو د ديني عالمانو دکنفرانس جوړول طرحه کړل او دپاکستان جمهور رييس په لندن کې  دافغانستان ، پاکستان او دانګلستان  دهيوادونو د مشرانو په دريمه غونډه کې د هغې ملاتړ وکړ.
نن د سنيګال هيواد په رسمي ډول د اسلامي هيوادونو دکنفرانس مشرتوب دمصر هيواد ته وسپاره .
داسلامي هيوادونوکنفرانس دملګروملتوله سازمان وروسته د دولتونو ترمنځ  دويم نړيوال سازمان دى چې له څلورو وچو څخه اووه پنځوس هيوادونه ددغه سازمان  غړي دي .
  د اسلامي هيوادونو دکنفرانس سازمان  د١٩٦٩ کال دسپټمبر د مياشتې په پنځه ويشتمه نيټه په اشغالي بيت المقدس کې د اقصى جومات له جنايي اور اخيستنې وروسته د المغرب په رباط ښار کې جوړ شو .