15 July 2020

RSS Facebook

سوداگریز


تازه خبرونه

 حامدکرزي او ډاکټر عبدالله د سولې پر بهير وغږېدل

حامدکرزي او ډاکټر عبدالله د سولې پر بهير وغږېدل

کابل/ د چنګاښ۲۴ مه/ باختر د هېواد پخواني جمهور رييس حامد...

 عبدالسلام رحیمي: د سولې بهیر د بریا ضمانت یوازې د افغانستان خلک دي

عبدالسلام رحیمي: د سولې بهیر د بریا ضمانت یوازې د افغانستان خلک دي

کابل/ د چنګاښ ۲۴مه/ باختر د جمهور رئيس ځانګړي استازي او...

 جمهوررئیس محمد اشرف غني د امریکا د پوځ د مرکزي قومندانۍ له قومندان سره وکتل

جمهوررئیس محمد اشرف غني د امریکا د پوځ د مرکزي قومندانۍ له قومندان سره وکتل

کابل/ د چنګاښ ۲۴مه/ باختر د افغانستان د اسلامي جمهوریت جمهوررئیس...

Youtube Player

khantry design

سوداگریز

سوداگریز

کابل\باختر\دجوزا١٤
دمسکراتو او د نشه يي توکو له جرمونوسره د مبارزې د استيناف محکمې د ابتدائيه محکمې دپريکړې په تعقيب، څلور تنه د مسکراتو او نشه يي توکو دجرمونو په اړوند له دولسو کلونو څخه تر اوولسو کلونو پورې د تنفيذي بند په مجازاتو محکوم کړل.
دمسکراتو او د نشه يي توکو له جرمونو سره دمبارزې د استيناف محکمې ويندوى باخترآژانس ته وويل:
محکوم شوي کسان دپکتيا، ننګرهار، قندهار او د کابل د ولايتونو اوسيدونکي دي چې پوليسو دجلاجلا عملياتو په ترسره کولو سره له هغوى څخه په ټوليزه توګه څه دپاسه دوه سوه درې پنځوس کيلو ګرامه اپين ، يوسلو څوارلس کيلو ګرامه چرس او پنځه زره پنځه سوه نهه اتيا ليتره الکولي مشروبات کشف او ترلاسه کړي دي.
دمسکراتو او دنشه يي توکو د جرمونو پرخلاف د مبارزې د استيناف محکمې قضايي هيئت دغه کسان د قضيو د تعقيبي څارنوالانو او د مدافعو وکيلانو په وړاندې دقضايي غونډو په ترڅ کې هريو له دولسو کلونو څخه تر اوولسو کلونو پورې د تنفيذي بند په مجازاتو محکوم کړل.
د يادونې وړ ده چې د مسکراتو اود نشه يي توکو له جرمونو سره دمبارزې د استيناف محکمې د روان کال د وري د مياشتې په بهيرکې هم دعامه خدمتونو د دوو تنو موظفينو په ګډون شپږ څلويښت تنه په مجازاتو محکوم کړى دى. 

کابل\باختر\دجوزا١٤
په هيوادکې د ځمکې غصب په يوې پيچلې ټولنيزې ستونزې بدل شوى دى او له اقداماتو او تدبيرونو سره سره دولت په دې نه دى بريالى شوى چې دغه ستونزه حل کړي.
دباخترآژانس دخبر له مخې: د ولسي جرګې يوشمير استازي وايي، په تيرو دولسو کلونوکې يونيم مليونه جريبه ځمکه چې د زبرځواکو له خوا غصب شوې ده؛ يوه ځانګړى کميسيون چې په دې اړوند تحقيق کوي؛ ويلي دي: يو نيم مليونه جريبه دولتي ځمکه چې پولي ارزښت يې اوو ملياردو ډالرو ته رسيږي؛ د زبرځواکو له خوا غصب شوې ده او په زياترو دغو ځمکوکې د استوګنې ښارګوټي جوړ شوي دي.
ددغه کميسيون غړى زلمى مجددي وايي چې حکومت دځينو دغو زبرځواکو ملاتړ کوي.
دى وايي: داسې سندونه شته چې زياتره دغه غيرقانوني ښارګوټي د جګپوړو مقاماتو په لارښوونه جوړ شوي دي.
دکميسيون رئيس وايي چې دځمکې دغاصبانو لست په لاس کې لري؛ خو مجددي ددغه لست جزئيات په ډا ګه نه کړل .
زلمى مجددي په دې باور دى چې د ځمکې د غصب د مجازاتو د قانون نشتوالى، د دولتي ځمکو د غصب سبب شوى دى. د جمهور رييس د ساختماني پروژو د چارو سلاکارپه هيواد کې نا امنۍ د دولتي ځمکو د غصب علت بولي او وايي چې دځمکې غصب مافيا ډيرستر چنلج دى چى په نږدې شپاړسو زرو تنو د دولتي ځمکو د غصب تورلګول شوى دى چې څه د پاسه درې مليونه جريبه ځمکه د هغوى له خوا غصب شوې ده چې افرادو او اشخاصو ته د مفتو پيسو د ترلاسه کولو يوه وسيله ده.

کابل\باختر\دجوزا١٤
يوناما په پکتيا او لغمان کې د ملکي وګړو مرګ ژوبله وغندله.
يوناما په خپلې خبرپاڼه کې د دولت په وسله والو مخالفينو تور ولګاوه چې په قصدي ډول په ملکي وګړو بريدکوي.
په پکتيا ولايت کې د پرونى ځانمرګى بريد له امله لس تنه زده کوونکي شهيدان او يو شميرنورټپيان شول.
دا په داسې حال کې ده چې په لغمان ولايت کې په سړک کې د ښخ کړى شوى ماين د چاودنې له امله د ماشومانو په ګډون اووه تنه شهيدان شول.
دافغانستان د اسلامي جمهوريت جمهور رييس حامدکرزي او د آيساف قوتونوهم دغه بريدونه غندلي دي.

کابل\باختر\دجوزا١٤
د سترې محکمې عالي شورا نن له غرمې مخکې د افغانستان د اسلامي جمهوريت د قاضي القضات پو هاند عبدالسلام عظيمي په مشرۍ غونډه وکړه او په اجنداکې نيول شوې موضوعګانې يې وڅيړلې.
د سترې محکمې دخپرونو رياست باخترآژانس ته خبر ورکړ: عالي شورا لومړى د آسيا پاسفيک د ښځينه قاضيانو په کنفرانس کې د ښځينه قاضيانو د ټولنې د رييسې او د مشرتابه هيئت ګډون چې د نړۍ له شلو هيوادونو څخه د يوسلو څلويښتو تنو ښځينه قاضيانو په ګډون د روان کال د ثور د مياشتې له اوولسمې نيټې څڅه تر يو ويشتمې نيټې پورې د نوى زيلاند په هيوادکې جوړه شوى و، ارزښتناک وباله، په دې کنفرانس کې د افغانستان د ښځينه قاضيانوګډون او دهغو د ټولنې دمرکز د رئيسې له خواد وينا اورول چې د افغانستان په قوانينوکې د ښځو اوماشومانو د اساسي حقوقو د تامينولو او ملاتړ دڅرنګوالى په باب متمرکزه وه، د افغانستان د حقوقي او قانوني نظام څرګندويه او معرفي کوونکى وبلله، مثبت ارزيابي کړه.
وروسته د قضايي پلټنې د رياست رپوټونو اوهغو تدقيقي نظريو ته په پاملرنې سره چې د زا بل او ارزګان د ولايتونو د استيناف محکمو د قضايي او اداري اجرا اتو او په يوه جزايي قضيه کې د بد خشان ولايت دښاري ابتدائيه محکمې د عامه امنيت د ديوان د قاضيانو د سرغړونې د څيړنې په نتيجه کې، وړاندې شوې وې، د ارزګان د ښاري ابتدائيه محکمې د ديوان پخوانى رييس ته اخطار د بدخشان د ښاري ابتدائيه محکمې رييس اوغړو ته پنځه پنځه ورځې کسرمعاش او هم د ارزګان ولايت د استيناف محکمې دوو تنو قضايي او اداري منسوبينو  ته لا زمه توصيه تجويز شوه.
په همدې ترتيب د رسيدلو استهداګانو دڅيړنې په لاره کې په يوه املاکي قضيه کې دحکمونو په تنفيذ کې داشکالو دلرې کولو په باب دبدخشان ولايت د استيناف محکمې د رياست د استهدايې په وړاندې لارښوونه وشوه چې په املاکي دفترونو کې له قيد شوى مسا حت سره سم، د محکمو له خوا صادرشوي حکمونه دتطبيق وړ دي؛ خو د هغو دولتي ځمکو د حفاظت په مقصد چې دغې ساحې ته څېرمه  موقعيت لري؛ د کرنې او اوبو لګولو وزارت او د دولت د قضاياوو ادارې دې لازم قانوني اجرا ات مرعي کړي.
دغه راز په دې باب چې دښځو د چارو وزارت استهدايې ته په پاملرنې سره چې آياکيداى شي ددغه وزارت د غلا کړې شوې واسطې بيه له اړونده چلوونکي څخه ترلاسه شي؟ څرګنده شوه چې په دې قضيه کې د دولت د تاوان مسئله طرحه ده اود رسيدلى تاوان جبيره د لوى څارنوالى د ادارې له خوا د لازمو تحقيقاتو له ترسره کولو او د واکمنې محکمې د حکم له صادريدو وروسته کيداى شي ترلاسه شي.
سربېره پر دې په نننۍ غونډه کې د بيا کتنې درې مورده غوښتن ليکونه اوپه مدنې اوجزايي قضيوکې د محکمې د بدلون اته غوښتن ليکونه هم د اجندا يوه برخه وه چې د هغو په اړوند لازم تصميمونه ونيول شول.
ديو بل خبر له مخې: د قضايي سلوک او اجرااتو په اړوند د قاضيانو د لارښود کتاب چې د سترې محکمې او د حقوقو د نړيوال انکشاف د مرکز له خوا د هالند هيواد په مالي ملاتړ په پښتو او دري ژبو چاپ شوى دى؛ نن له غرمې وروسته سترې محکمې ته وسپارل شو.
په هغې غونډه کې چې له همدې امله د سترې محکمې په مقرکې جوړه شوې وه؛ د سترې محکمې د عالي شورا غونډه ډاکترعبدالمالک کا موي په کابل کې د هالند د سفيراو ددغه سفارت د قانون د واکمنۍ د برخې د مسوول او د آيدلو د حقوقو د انکشاف د نړيوال سازمان د رييسې راتګ ته هرکلى ووايه او په دې برخه کې يې د آيدلو موسسې د همکاريو او د هالند د مالي ملاتړ  له امله مننه او قدرداني وکړه.
د يو بل خبر له مخې:  د روان کال دغبرګولي د مياشتې په يوولسمه نيټه د سترې محکمې د قضايي کنترول او څارنې د لوى رياست د موظفينو د هڅو او هاند له امله دننګرهار ولايت د حقوقو د رياست يوکارکوونکى چې د يوملکيت د تشولو په برخه کې د سترې محکمې د ديوان د قضايي قرار د تطبيق په خاطر يې له محکوم څخه د بډې په توګه سل زره کلدارې غوښتې وې؛ د پيسو د اخيستلو په وخت کې لاس په لاس ونيول شو .
قضيه ترڅيړنې لاندې ده.

کابل_ باختر د غبرګولي دمياشتې١٤:
د افغانستان د اسلامي جمهوریت جمهوررئیس حامدکرزي د افغانستان لپاره د فنلند د نوي سفیر ښاغلي اري ماکي باورلیک د یو لړ تشریفاتي مراسمو په ترڅ کې ومانه.
د جمهور رييس د ويندوى دفترباخترآژانس ته خبرورکړ:
د باورلیک د وړاندې کولو له مراسمو وروسته چې نن غرمه په ارګ کې پرځای شول، په داسې حال کې چې د بهرنیو چارو وزارت سیاسي معین ارشاد احمدي هم حاضرو، د هېواد جمهوررئیس او د افغانستان لپاره د فنلند نوي سفیرد دواړو هېوادونو د اړیکو د لا پراختیا په باب خبرې وکړې.
حامدکرزي ښاغلي اري ماکي ته د ښه راغلاست د ويلو په ترڅ کې فنلند ته د خپل سفر پرمهال د فنلند د حکومت او خلکو د تودې میلمه پالنې له امله مننه وکړه، هیله یې وکړه چې فنلند له افغانستان سره په بېلابېلو برخو کې د اوږد مهال لپاره خپلو همکاریو ته دوام ورکړي.
د هېواد جمهوررئیس فنلند د پوهنې په برخه کې د ښې تجربې لرونکی هېواد وباله، د دغه هېواد له سفیر څخه یې وغوښتل چې فنلند دې له افغانستان سره د پوهنې په برخه کې هم همکاري وکړي.

په مقابل کې د افغانستان لپاره د فنلند نوي سفیر ښاغلي اري ماکي د افغانستان او فنلند ترمنځ موجودې اړیکې عالي وبللې، وې ویل چې هېواد به یې له افغانستان سره  په بېلابېلو برخوکې خپلو اوږد مهالو همکاریو ته دوام ورکړي.
د فنلند نوي سفیر په افغانستان کې شوي پرمختګونه وستایل، وې ویل چې د فنلند حکومت او خلک خوښ دي چې افغانستان په سم تګلوري کې د حرکت په حال کې دی. ده، زیاته کړه چې د فنلند خلک د افغانستان ښې راتلونکې ته خوش بین دي.
ده، همدا راز وویل، فنلند لیواله دی چې د کانونو د را ايستلو  لپاره د ظرفیتونو د لوړولو په برخه کې له افغانستان سره  همکاري وکړي.
 

کابل\باختر\دجوزا١٤
د انګلستان يوې خپرونې ويلې دي چې د انګلستان دولت له افغانستان څخه ددغه هيواد دپوځيانو د وتلو په درشل کې طالبانو ته بډې ورکوي.
د باخترآژانس دخبر له مخې: انګليسې ورځپاڼې اکسپرس په خپلې يوه تحليلي مقاله کې ليکلي دي: د افغانستان دولت په پام کې لري چې طالبانو ته د بډې په ورکولو سره دغه ډله په افغانستان کې له بهرنيو پوځيانو سره دجګړې له دوام څخه واړوي.
ددغې ورځپاڼې دخبر له مخې: د انګلستان دولت طالبانو ته په مليونونو يورو په پام کې نيولي دي چې خپلې وسلې په ځمکه کيږدي او له بهرنيو پوځيانو سره دجګړې له دوام څخه دې ډډه وکړي.
ددغې ورځپاڼې په ليکنه، د انګلستان دولت ددغې پروژې داجرا کولو لپاره شپږ مليونه اوشپږ سوه زره يورو اعتبار بيل کړى دى.
ددغې طرحې له مخې: هر وسله وال طالب چې له جګړې څخه لاس وا خلي؛ تريوکال پورې په ماشت کې سل يورو ورکول کيږي.
دا په داسې حال کى ده چې پخوا څو هيوادونو چې پوځونه يې په دغه هيوادکې وو؛ هلې ځلې کړې دي چې خپل پوځيان دطالبانو د ډلې د احتمالي بريدونو له خوا څخه خوندي کړي.
دغه راز يو شمېر هيوادونه د نشه يي توکو په سودا ګرۍ سره د طالبانو يو ډول مالي ملاتړ کوي.

کابل\باختر\دجوزا١٤
دکار او ټولنيزو چارو وزارت باخترآژانس ته د يوليک په ليږلو سره له هيوادوالو څخه غوښتي دي چې په سعودي عربستان کې د غيرقانوني استوګنې نيت ونه کړي.
په دغه ليک کې د سعودي عربستان د حکومت د بهرنيو اتباعو د ادارې د تصميم يادونه شوې ده چې بايد غير سعودي کارګران چې په غيرقانوني ډول په دغه هيواد کې استوګنه لري؛ نيول کيږي او د ګوتې د نښې له اخيستلو وروسته خپلو هيوادونو ته يې استول کيږي.
دکار او ټولنيزو چارو وزارت په دې ليک کې څرګنده کړې ده، هغه کسان چې د کار په نيت په غيرقانوني ډول او يا د حج له ويزې څخه په استفادې سره سعودي عربستان ته ځي او نه غواړي په ټاکلى وخت کې خپل هيوادته راستانه شي؛ په حالت پو هيدو سره له خپل تصميم څخه تيرشي.

کابل- باختر د غبرګولي څوارلسمه :
د نجونو د واليبال د ټيمونوسيالۍ نن د افغاني سرې مياشتې په جمنازيوم کې په دوو لوبو سره پيل شوې .
دباخترآژانس دخبر له مخې: دغه سيالۍ د مور د ورځې په درناوى پيل شوې دي او له کابل ښار څخه د نجونو د واليبال اتو ټيمونو پکې ګډون کړى دى .
د افغاني سرې مياشتې د عالي ټولنې ورزشي آمر احمدجاويد شرفي  دباخترآژانس خبريال ته وويل: دغه سيالۍ دغوره څيرو دپيژندنې په مقصد په دوو څلورټيمي ګروپونو کې پيل شوې دي او درې ورځې دوام کوي .
  ده وويل: ددغوسياليوپه لومړۍ لوبه کې د سنګر او د سرې مياشتې د واليبال ټيمونه مخامخ شول چې لوبه دصفر په مقابل کې په دوو سره د سرې مياشتې دټيم په ګټه پاى ته ورسيده .
دغه راز په بله لوبه کې د الزهرا ټيم د يوې په مقابل کې په دوو سره د استاد برهان الدين رباني د ښوونې او روزنې پوهنتون ټيم ته ماتې ورکړه .

کابل- باختر د غبرګولي څوارلسمه :
دکابل پولي تخنيک پوهنتون خبرتيا!
دکابل پولي تخنيک پوهنتون په دغو څانګوکې نوى علمي کادر ته اړتيا لري:
_ په لوڅ ډول دکانونو د را ايستلو ديپارتمنت ددوکتورا، ماسټري اويا ليسانس په سويه دوه بستونه .
_ تر ځمکې لاندې په ډول دکانونو د را ايستلو ديپارتمنت د دوکتورا، ماسټري اويا د ليسانس په سويه دوه بستونه .
  په شرايطو برابر مينه وال دې د روان کال دغبرګولي دمياشتې له څوارلسمې نيټې څخه تر څليرويشتمې نيټې پورې دخپلو غوښتن ليکونو پړاو ته دکابل پولي تخنيک پوهنتون د رياست له لارې بشپړ کړي او د خپلو نمرو ترانسکريپ او دتابعيت تذکره  له ځان سره ولري .

کابل- باختر د غبرګولي څوارلسمه :
دکندز ولايت په خان اباد ولسوالۍ کې د وريجې  د پروسس  يو کوپراتيف جوړ شو.
دغه کوپراتيف دکرنې او اوبو لګولو وزارت له پرمختيايي بودجې څخه دڅه دپاسه يو مليون افغانيو په لګښت جوړ شوى دى او تراوسه پورې پنځه اويا تنو بزګرانو پکې غړيتوب ترلاسه کړى دى چې د شولې څه دپاسه درې زره اووه سوه جريبه ځمکه هم پکې شامليږي .
  دکرنې او اوبو لګولو وزارت په هغې خبرپاڼه کې چې نن باختر آژانس ته رسيدلې ده؛ ويل شوي دي چې دغه وزارت هوډمن دى چې دکرنې ماشين آلات او د وريجې د پروسس د اړتيا وړ وسايل ددغه کوپراتيف  په واک کې ورکړي چې وريجه په معياري ډول پروسس شي .
د پروسس د نويو لارو چارو په پيل او عملي کيدو سره د افغانستان د وريجې په کيفيت کې د يادونې وړښه والى راځي او هم به دافغانستان وريجه ښه مارکيت ولري .