15 July 2020

RSS Facebook

سوداگریز


تازه خبرونه

 حامدکرزي او ډاکټر عبدالله د سولې پر بهير وغږېدل

حامدکرزي او ډاکټر عبدالله د سولې پر بهير وغږېدل

کابل/ د چنګاښ۲۴ مه/ باختر د هېواد پخواني جمهور رييس حامد...

 عبدالسلام رحیمي: د سولې بهیر د بریا ضمانت یوازې د افغانستان خلک دي

عبدالسلام رحیمي: د سولې بهیر د بریا ضمانت یوازې د افغانستان خلک دي

کابل/ د چنګاښ ۲۴مه/ باختر د جمهور رئيس ځانګړي استازي او...

 جمهوررئیس محمد اشرف غني د امریکا د پوځ د مرکزي قومندانۍ له قومندان سره وکتل

جمهوررئیس محمد اشرف غني د امریکا د پوځ د مرکزي قومندانۍ له قومندان سره وکتل

کابل/ د چنګاښ ۲۴مه/ باختر د افغانستان د اسلامي جمهوریت جمهوررئیس...

Youtube Player

khantry design

سوداگریز

سوداگریز

کابل\  باخترد   جوزا  دمياشتې  ١٣ :
دهرات دترافيکو پخوانى مدير د سندونو د تزوير په تور په اته کاله  او شپږمياشتې  تنفيذي بند محکوم شو.
دتورن دوسيه نن د اداري فساد جرمونو په ابتدائيه محکمه کې چې دقضاوتمند شيراقا منيب  په مشرۍ جوړه شوه؛ وڅيړل شوه.
د ترافيکو  د پخوانى مديرڅلور تنه جرمي شريکان هم له يو کال او شپږمياشتو څخه ترشلو کلونو پورې په بند محکوم شول.
په دې غونډه کې  د ٢٠٧ ظفر قول اردو شپږتنه افسران د تزوير او اختلاس په تورله څلورو څخه ترديارلسو کلونو پورې په بند محکوم شول.
دغه کسان دغه راز د ٨٩٤٥٨٥ افغانيو نغدي جريمې او د اختلاس  شويو پيسو  معادل په ورکولو هم مکلف شول.

کابل\  باخترد   جوزا  دمياشتې  ١٣ :
يوتن د خپلې نامزدې د وژلو په تور د لومړۍ ښاري حوزې د ابتدائيه محکمې له خوا په سخته سزا يعنې عدام محکوم شو.
تورن څه موده مخکې دهرات ښار دڅلورمې ناحيې په مربوطاتوکې خپله کوژدنه د چړو په  ګوزارونوسره وژلې وه چې د امنيتي ځواکونو له خوا لاس په لاس ونيول شو.
ددغه تورن دوسيه نن د ابتدائيه محکمې د جزا د ديوان په قضايي  غونډه کې چې د قضاوتمند غلام رسول منصور په مشرۍ جوړه شوه؛ وڅيړل شوه.
قضايي هيئت د سندونو اوشواهدو له څيړنې وروسته تورن په اعدام محکوم کړ .
تورن  دمحکمې حکم غيرعادلانه وباله او د استيناف غوښتنه يې وکړه.

Monday, 03 June 2013 13:24

تبصره:

کابل - دجوزا ١٣
په داسې حال کې چې په هيوادکې د امنيتي مسووليتونو د سپارلو پروګرام به تر يوې بلې مياشتې پورې بشپړ شي؛ دکابل په دوو ګاونډيو ولايتونوکې امنيتي انکشافات د دقت وړ دي چې بايد وڅيړل شي.
دباخترآژانس مبصر ليکي: د هيواد د ملي امنيت شورا په خپلې پرونى غونډه کې د ميدان وردګو او د لوګر د ولايتونو د امنيتي حالاتو په باب غور وکړ، د دغو دوو ولايتونو د امنيتي حالاتو په باب خبرې چې د هيواد د لويديځ اوجنوب په لور دکابل دروازې بلل کيږي، په داسې حال کې کيږي چې په دغو دوو ولايتونوکې جدي امنيتي ستونزې شته، آن چارواکو يې دپاکستانيانو په ګډون د څومليتي طالبانو د شتون خبرې کړې دي.
دملي امنيت شورا د موضوع دحساسيت په پام کې نيولو سره اړوندو ارګانونو ته دنده وسپارله چې په دغو دوو ولايتونو کې دې د امنيت د تامينولو په لاره کې بيړنۍ اقدام وکړي.
په دې کې د شک ځاى نشته چې دهيواد امنيتي ځواکونه له امنيتي چلنجونو سره د مقابلې توان لري او و به کولى شي د لوګراودميدان وردګو په ولايتونوکې امنيتي ګواښونه چې بهرنى عوامل لري؛ د هلمند د سنګين او دقندهارد پنجوايي په ولسواليو کې د  امنيتي ګواښونو په شان لرې کړي. خو په دې ځاى کې خبره په هيواد کې د امنيتي انکشافاتو او دهغو په نسبت د بهرنيو کړيو دغبرګون په باب ده.
تر يوې بلې مياشتې پورې به په هيوادکې د امنيتي مسووليتونو د سپارلو پروګرام بشپړ شي. په تيرو وختونوکې په هغو سيموکې چې امنيتي مسووليت يې له بهرنيو ځواکونو څخه افغانانو ته سپارل شوي دي؛ امنيتي حالت ښه والى موندلى دى او افغان ځواکونه په دې بريالي شوي دي چې ميړانه او زړورتيا وښيي.
په دغه شان حالت کې دى چې د سيمې استخباراتي کړۍ په تحرک لاس پورې کوي او ددغه پروګرام د سبوتاژ په لټه کې کيږي. له شک پرته په پاکستان کې د ديني مدرسو تعطيل او افغانستان ته ددغومدرسو د طالبانو استول په دغه هيوادکې له مثبتو امنيتي انکشافاتو سره تړاو لري.
طالبان په دې لټه کې دي په هغوسيمو کې نفوذ وکړي چې له تبليغاتي پلوه ور ته ارزښت ولري. دغه راز غواړي دا انګيزه پيدا کړي چې ګنې د بهرنيو ځواکونو په نه شتون کې هغوى اوچت لاس لري.
ميدان وردګ او لوګر هغه ولايتونه دي چې له جغرافيايي پلوه له پايتخت سره تړاو لري. دطالبانو او د هغوى د ملاتړو دپاملرنې په مرکزکې ځاى لري. دلته د افغان امنيتي ځواکونو هوښياري اومهارت په کار دى. هغوى دې په امنيتي مسووليت مننې سره په هره ساحه کې بايد ددغو سيمو زيان منوونکو اړخونو ته زياته پاملرنه و کړي او په دې فکر وکړي چې يوازې د امنيتي مسووليت سپارل او د يوې ساحې دفاع ، دکار پاى نه دى؛ بلکې افغان امنيتي ځواکونه دې بايد په بشپړې همغږۍ کې د امنيت د پراختيا په باب تمرکز ولري او د خپل مسووليت ساحه دې پراخه کړي .
هغه څه چې په لوګر اوميدان وردګوکې تيريږي اوپه لسګونو بهرنيو طالبانو په دغوکې نفوذ کړى دى؛ ناڅاپي خبره نه ده؛ بلکې دهغو امنيتي کړيو د تبليغاتي هلوځلو يوه برخه ده چې غواړي وښيي چې هغوى دپايتخت دګاونډيو سيمو په ګډون د افغانستان د هرې برخې دنا امن کولو توان لري او کولي شي کابل وګواښوي. خو هير دې نه شي چې د سياسي او امنيتي پيښو تګلوري طالبان له سياسي تنګسيا سره مخامخ کړى دى. د دغې ډلې زيات شميرکسان په تيره بيا د هغوى د ټيټې اومنځنۍ کچې افراد په دې پوه شوي دي چې جګړه يې د بهرنيانو په ګټه ده او دوى په عملي توګه دخپل هيواد دګټو پرخلاف دريدلي دي. هغه څه چې په وردوج ، سنګين او پنجوايي کې تيرشول؛ د دې کارڅرګندوى دي چې طالبانو هلې ځلې وکړي چې له خپلو امکاناتو څخه زياته استفاده وکړي اوځان ته فرصت او نوم وګټي چې په دې کار بريالي نه شول.
نن ورځ د وسله والو طالبانوترمنځ د افغان کليوالي ځوانانو شتون کمزورى دى؛ که  چيرې دغه شان نه دى؛ ولې په پاکستان کې ديني مدرسې رخصتيږي او طالبان يې افغانستان ته را استول کيږي؟
دا کار د دې څرګندوى دى چې په افغانستان کې د لاسوهنې او تيري اړخونه په بشپړه توګه بهرني عوامل دي. نو دا د افغانستان په دولت او په نړيوالې ټولنې پورې اړه پيدا کوي چې په افغانستان کې د روانو ستونزو بهرنيو اړخونو ته زياته پاملرنه وکړي.

کابل\  باخترد   جوزا  دمياشتې  ١٣ :
په لغمان ولايت کې نن سهار په واټ کې د ښخ کړاى شوي ماين دچاودنې له امله  اووه تنه ملکي وګړي ووژل شول.
دلغمان د والي ويندوى سرحدي ځواک باخترآژانس ته وويل: په وژل شويوکسانو کې څلور ښځې، دوه ماشومان او يوه نارينه شته .
ددغو کسانو د سپرلۍ موټر دحضرت ولي عزيز زيارت ته څېرمه دحکيم آباد په سيمه کې په واټ کې په ښخ کړاى شوى ماين وخوت چې د چاودنې له امله يې د موټر چلوونکى په ګډون اووه تنه چې د يوې کورنۍ غړي وو؛  ووژل شول  .
په همدې حال کې امنيتي ځواکونه ورسيدل او دلغمان  دمرکز په حکيم آباد ، ګل ارام او نورا په سيموکې دطالبانو له خوا په لسګونو ښخ کړاى شوي ماينونه يې کشف اوشنډکړي دي .
ځواک زياته کړه: امنيتي ځواکونه د دغو ماين ايښودنو دعاملينو دموندلو اونيولو په خاطر عمليات پيل کړي دي .

کابل\  باخترد   جوزا دمياشتې  ١٣ :
دبغلان ولايت په بورکې ولسوالۍ کې پرون د دوو تنو سرونه  د وسله والو طالبانو له  غوڅ  کړاى شول.
د بغلان ولايت په ولايتي شوراکې د بورکې دخلکو استازى حاجي محمد باختر آژانس ته وويل: دغه دوه تنه  چې يو يې دملي اردو سرتيرى او بل  يې د غيرمسوولو وسله والوکسانو  له جملې څخه و؛  د دغې ولسوالۍ په چشمه ماهيان سيمه کې  د استوګنې په يو کورکې د وسله والو طالبانو له خوا يې سرونه غوڅ  کړاى شول.

کابل\  باخترد   جوزا دمياشتې  ١٣ :
دکورنيو چارو وزارت ويندوى وايي: د امنيتي ځواکونو د تيرې اوونۍ دعملياتو په بهيرکې طالبانو ته د سر زيات زيان اوښتى دى.
  دباخترآژانس  دخبرله مخې: د کورنيو چارو وزارت ويندوى صديق صديقي نن په کابل دحکومت د رسنيو په دفترکې په يوه ګډه خبري غونډې کې  وويل:
طالبانو ته په تيره اوونۍ کې د سر زيات زيان اوښتى دى چې شمير يې يوسلو شپږنوي تنو ته رسيږي .
دغه راز ددغو عملياتو په بهيرکې اته شپيته تنه طالبان  ټپيان او يوسلو اوولس تنه نوريې نيول شوي دي .
صديقي دهلمند دسنګين، د نورستان په برګ متال اوکامديش، دبدخشان په وردوج او د بادغيس په غورماچ  دهغو سيمو په توګه وبللې چې طالبانو زيات زيان پکې درلود.
افغان امنيتي ځواکونه د هيواد د دفاع زياته ځواکمنتيا لري چې طالبان د هغه فکر نه شي کولاى هغوى چې هرڅومره دهيواد د نا امنه  کولو لپاره هلې ځلې وکړي؛ هدف ته به ونه رسيږي.
ده وويل: افغان امنيتي ځواکونه له بهيرنيو ځواکونو څخه دامنيتي مسووليتونو ليږدونې لپاره هر رازتيارى لري.
صديقي دغه راز وويل چې په کونړ ولايت باندې د پاکستاني پوځيانو د راکټي بريدونو له امله يو ملکي  وګړى شهيد شوى اوپنځه تنه نورملکي وګړي ټپيان شوي دي .
ده وويل:  په تيرو ٢٤ ساعتو کې  دکونړولايت د دانګام ولسوالۍ په ځينو سيمو ٨٥ توغندي لګيدلي دي.
ده وويل : راکټي بريدونه دحقاني، د ازبکستان  داسلامي غورځنګ ، لښکرطيبه  او په اسلامي ګوندکې دګلبدين حکمتيار پورې د تړلو تروريستي شبکو په ملاتړ  شوي دي چي دا نه يوازې دافغانستان  بلکې ټولې نړۍ ته يو ګواښ دى.
دغه راز په  افغانستان کې د ناټو ملکي استازى په دې غونډه کې وويل: دايساف
او د ناټو دغړو هيوادونو د دفاع وزيران به په  نږدې راتلوونکي  کې په بروکسل کې د افغانستان د دفاع له وزير او د ملګروملتو د سازمان  او اروپايي اتحاديې له استازوسره دامنيتي مسووليتونو د ليږدونې او په افغانستان کې د ناټو د اوسني ماموريت او راتلوونکي ماموريت په باب خبرې وکړي.
ده وويل: په همدې حال کې د ايساف اصلي هلې ځلې به له محاربوي رول څخه ملاتړيز رول ته بدلون ورکړي.

کابل -دجوزا ١٣
دمشرانو جرګې رييس فضل هادي مسلميارنن په کابل کې دتاجکستان جمهوريت له سفير شراف الدين امام سره وکتل.
دمشرانو جرګې مطبوعاتي دفتر باخترآژانس ته خبر ورکړ: دغه سفير مسلميارته د تاجکستان د جمهور رييس دسلامونو او پيغام په وړاندې کولو سره ددغه هيواد د وروستيو دوو لسيزو د برياليتوبونو په باب معلومات ورکړل او وې ويل چې په يولړ انکشافاتو سربېره نږدې څلور زره پنځه سوه جوماتونه او څه دپاسه يوزرو پنځه سوه ښوونځي په نړيوال معيار سره په تاجکستان کې جوړ شوي دي او د امام اعظم (رح) د ستر جومات د جوړيدو کار مخ په پاى ته رسيدو دى چې دهغه د پرانيستلو په مراسمو کې به د افغانستان او د سيمې عالمانو ته دګډون بلنه ورکړاى شي.
ده افغانستان يو ښه ګاونډى او باوري شريک وباله او د انرژي او د دواړو هيوادونو ترمنځ د څو پلونو دجوړولو په برخه کې يې د خپل هيواد د همکاريو يادونه وکړه.
دتاجکستان سفير زياته کړه: اته تنه تاجکان دافغانستان په  جيلونوکې بنديان دي چې د دوى د نسبتي دوسيو په بشپړيدو سره به له هغوسلو تنو بنديانو سره چې په تاجکستان کې بنديان دي ، د بنديانو د استرداد د موافقه ليک له مادو سره سم تبادله شي.
د مشرانو جرګې رييس د تاجکستان د همکاريو په ستاينې سره په دغه هيوادکې د بېلابېلو برخو د پرمختګونو له امله خوښي څرګنده کړه او وې ويل چې زموږ خلک او دولت د يو ښه ګاونډي په توګه د تاجکستان د آزادي او پرمختګ هرکلى کوي او ځينې ګاونډيان چې د افغانستان په کورنيو چاروکې لاس وهنه کوي؛ بايد له دې کار څخه لاس وا خلي. ځکه نارامۍ او بدمرغۍ د سيمې او نړۍ په ګټه نه ده او ټينګار يې وکړ چې تاجکستان د دريمګړى هيواد په توګه کولاى شي په افغانستان او سيمه کې د سولې په ټينګښت او تا مينولوکې اغيزمن رول ولوبوي.
د مشرانو جرګې رييس دغه راز دافغانستان له لارې د اوسپنې پټلۍ په غځولوسره د تاجکستان او ترکمنستان پيوستون د سيمې د هيوادونو په اقتصادکې ګټور وباله او ژمنه يې وکړه چې د سفير له خوا طرحه شوې موضوعګانې او دتاجکستان د اتباعو دنسبتي دوسيو دڅيړنې د کار ګړندي کول به د افغانستان له جمهور رييس او د دغه هيواد له سترې محکمې سره طرحه کړې.
دغه راز فضل هادي مسلميار د ملي اقتصادي، مالي او بودجې د کميسيون په وړانديز په داسې حال کې چې د دغه کميسيون رييس مولوي عبدالوهاب عرفان هم حاضرو؛ د سوداګرۍ اوصنايعو وزارت د نفتي توکو او اوبلن ګاز رييس فريدالله شيرزي يې د ستاين ليک په ورکولو سره وهڅاوه اودغه راز دشمال زون د حج او اوقافو رييس حيات الله قاري زاده ته يې د سنا مجلس ستاينليک ورکړ او د برياليتوب هيله يې ورته وکړه.
دغه راز د سنا مجلس لومړي نايب محمدعلم ايزديار دپوهنې وزارت د عمومي تعليماتو له رييس محمدنعيم بهين او ددغه وزارت له ځينو مسوولينو سره وکتل.
په دې کتنه کې دغو مسوولينو د پوهنې په برخه کې د پرمختګونو په يادونې سره وويل چې په دې وروستيو وختوکې د پوهنې وزارت له پرمختيايي بودجې او دجاپان له مالي مرستې څخه دپنځوسو مليونو په  لګښت  په کابل ښارکې پنځه ښوونځي جوړ او ګټې اخيستنې ته سپارل شوي دي او نږدې دولسو زرو تنو زده کوونکو چې ترخيمو لاندې يې زده کړه کوله ، له دې وروسته به په يو مناسب چاپيريال کې زده کړه وکړي.
دوى زياته کړه: همدا اوس په هيوادکې نږدې څوارلس نيم زره دولتي ښوونځي او څه ناڅه شپږ سوه خصوصي ښوونځي شته چې څه دپاسه اته مليونه تنه زده کوونکي پکې زده کړه کوي.
ايزديار د پوهنې وزارت دعمومي تعليماتو د رييس او دهغه د ملګرو د کړنو اوفعاليتونو دستاينې په ترڅ کې د يوې ټولنې ترقي اوپرمختګ د پوهنې دپراختيا او پرمختيا په کچې پورې اړوند وباله.
دغه راز دکابل د هوايي ډګر دلويديځې ساحې يو شمير سپين ږيرو خپلې سيمه ييزې ستونزې د مشرانو جرګې له لومړي نايب سره طرحه کړې او د هغوى دغوښتنو دڅيړنې او په تيره بيا په دغې ساحه کې د حضرت ادريس (ع) د جامع جومات د جوړولوپه لاره کې د مشرانو جرګې د همکاري غوښتنه وکړه.
دمشرانو جرګې لومړي نايب ژمنه وکړه چې د دغې ساحې د جومات د جوړولو او د دوى د نورو غوښتنو د پوره کولو په لاره کې به د مشرانو جرګې د کميسيونونو او د اړوندو مراجعو له لارې اقدام وشي.

کابل دجوزا ١٣
دملي شورا د مشرانو جرګې په خواشيني سره خبر ترلاسه کړ چې په ولسي جرګه کې د هرات د خلکو استازې شهنازهمتې په ايران کې د يوې ترافيکي پيښې له امله وفات شوې ده او د دې د کورنۍ ځينې غړي ټپيان شوي دي.
دمشرانو جرګه د دې د مړينې له امله ددې کورنۍ،خپلوانو، دهرات ولايت خلکو او د ملي شورا ولسي جرګې ته د ډاډ ګيرنې او خوا خوږۍ مراتب څرګندوي او مړينه يې د هيواد ملي شورا ته يوه ضايعه بولي او ارواښادې ته د لوى خداى (ج) له دربارڅخه د فردوس جنت او د پيښې ټپيانو ته د سملاسي روغتيا هيله کوي.

کابل- دجوزا ١٣
په غزني ولايت کې نن په دوو جلاجلا پيښوکې څلورتنه وسله وال طالبان ووژل شول.
دغزني ولايت دګيرو ولسوالۍ په پله کې دملي اردو دځواکونو او طالبانو ترمنځ په نښته کې درې تنه وسله ال طالبان ووژل شول.
د٢٠٣ تندرقول اردو د ديمې لوا يو مسوول قندآغا باخترآژانس ته وويل چې په دې پيښه کې دوه تنه نور وسله ال طالبان ټپيان اود هغوى دوه درندې وسلې ويجاړې شوې دي.
دغه راز د٢٠٣ تندرقول اردو د دريمې لوا ځواکونو يو وسله وال طالب د غزني ولايت د اجرستان ولسوالۍ د عثمان خيلو په کلي کې وژلى دى.
ددغو عملياتو په بهيرکې د ملي اردو ځواکونو او ملکي وګړو ته زيان نه دى اوښتى.

کاباختردجوزا ١٣
په بغلان ولايت کې نن سهار په يوه ترافيکي پيښه کې اووه تنه ووژل شول او يوتن بل ټپي شو.
دبغلان ولايت د ترافيکو مدير سمونمل سيدمحبوب سادات باخترآژانس ته وويل: يو سراچه ډوله موټر چې اته تنه پکې سپاره وو؛ د دوشي ولسوالۍ په زردسنګ ولسوالۍ کې له يو کرولا موټر سره ټکروکړ چې له امله يې سراچه موټر له واټ څخه واوښت او په سيندکې وغورځيد.
سادات زياته کړه: ددغه موټر له اتو تنو سپرليو څخه چې دبلخ ولايت ته روان وو؛ يوه دولس کلنه نجلۍ له مرګ څخه بچ شوې او ټپي شوې ده . خو دموټر چلوونکى په ګډون نورې سپرلۍ په سيندکې ډوبې شوې او وژل شوې دي.
ديو بل خبر له مخې: دبغلان ولايت د دوشي ولسوالۍ دغورځنګ په ساحه کې پرون د ترافيکې پيښې له امله دوه تنه ووژل شول اوڅلورتنه نورټپيان شول.
د دوشي ولسوال شمسالدين سرحدي باخترآژانس ته وويل چې دغه پيښه له يوهينو موټرسره دکرولا موټر د ټکر زيږنده ده .
دپلخمري روغتون د جراحۍ دڅانګې موظف ډاکترکريم داد سکندري د دغې پيښې د ټپيانو روغتيايي حالت خراب نه بولي.