19 October 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

Saturday, 13 July 2013 07:56

د اسعارو بيه:

کابل\باختر\دچنکاښ د مياشتې ٢٢:
دکابل دشهزاده سراى دصرافانو د رييس  دمعلوماتو له مخې، نن له غرمې مخکې دبهرنيو پيسو په مقا بل کې دافغانۍ ارزښت په دې ډول دى:
يوامريکايي ډالر پيرودل په 80 56/  افغانيو پلورل په  56/85افغانيو
يوانګليسي پونډ پيرودل په 00  84 /افغانيو پلورل په  84 /10افغانيو
داماراتو يو درهم پيرودل په 40/ 15 افغانيو پلورپه 45 / 15 افغانيو
يوه يورو پيرودل په 00 74/ افغانيو پلورل په   74 /10  افغانيو
يوسعودي ريال پيرودل په  10 15/پلورل 15/15 افغانيو
زرهندي کلدارې پيرودل په 960 افغانيو پلورل په 970 افغانيو
زرپاکستاني کلدارې پيرودل په  559افغانيو پلورل په 560 افغانيو
زر ايراني تومان پيرودل په 17/40  افغانيو پلورل په  17/50 افغانيو.

کابل\باختر\دچنکاښ د مياشتې ٢٢:
د افغانستان جمهوررئیس حامدکرزي د پوهنې د فعالې ملالې یوسفزۍ د زوکړې د شپاړسمې کالیزې له امله دې او د دې کورنۍ ته مبارکي وویله.
په ملاله یوسفزۍ تېرکال د سوات د مینګورې په سیمه کې هغه مهال چې له ښوونځي څخه د کور په لور روانه وه، د طالبانو له خوا بريد وشو او په سر او غاړه باندې سخته ټپي شوه.
ملالې یوسفزۍ پرون د ملګرو ملتونو د سازمان په مقرکې د خپلې زوکړې د شپاسمې کالیزې د لمانځنې پرمهال په خپله وینا کې وویل چې تروریزم او جګړه، ښوونځي ته د افغانستان او پاکستان د ماشومانو د تګ مخه نیسي. دې همدا راز وویل چې د افغانستان خلک له کلونوکلونو را په دیخوا د افراطیت قرباني دي.
ملالې زیاته کړه: یو ماشوم، یو ښوونکی، یو کتاب او یو قلم کولای شي نړۍ ته بدلون ورکړي او افراطیون زموږ په ټولنه کې له دغه بدلون څخه په ویره کې دي.
جمهوررئیس کرزي وویل چې په افغانستان او پاکستان کې پوهنې د تروریزم له اړخه ستر زیان لیدلی دی او په ځانګړي ډول د ډیورند د کرښې په دواړو غاړوکې له کلونوکلونو را په دیخوا د پوهنې  پرښوونکو، زده کوونکو او کارکوونکو باندې تروریستي بریدونه کیږي.
حامدکرزي پر پوهنې باندې برید د اسلام د سپیڅلي دین د دښمنانو کار وباله، وې ویل: یوازې هغه کسان په داسې جنایت لاس پورې کوي  چې د ډیورند د کرښې د دواړو غاړو د خلکو د پرمختګ او ودې مخالف دي.
جمهوررئیس یو ځل بیا ټینګار وکړ چې د سیاست د افزارو په توګه له تروریزم او افراطیت څخه استفاده کول د هیڅ هېواد په ګټه نه دی. افغانستان او پاکستان باید د تروریزم او افراطیت د ګډ ګواښ پر خلاف یو موټی شي، د هغه پرخلاف دې په صادقانه ډول کلکه مبارزه وکړي ځکه چې د تروریزم او افراطیت په مقابل کې بې تفاوتي به د دواړو هېوادونو راتلونکي نسلونه له لا ډیرو ګواښونو سره مخامخ کړي .#

.کابل باختر دچنګاښ يوويشتمه :
  دسولې دعالي شورا دنړيوالو چارو سلاکار دافغانستان دسولې دبهير په اړوند دافغانستان لپاره داروپا داتحاديې داستازي وروستى څرګندونې ، دده شخصي نظر وباله .
دافغانستان  لپاره داروپا داتحاديې  ځانګړى استازى چې په دې وروستيو وختو کې دى دژينو ښار دامنيتي پاليسۍ په مرکز کې خبرې کولې ويلي دي چې دافغانستان دسولې خبرې به تر ٢٠١٥ کال پورې کومه نتيجه ونه لري او داروپا اتحاديه دپخلاينې  او روغې جوړې په مقصد دافغانانو  په مشرۍ دخبرو له هرې لارې چې دوى انتخاب کړي ملاتړ کوي خوتر ٢٠١٥ کال پورې سولې ته رسيدل ناشونې دى  خو دسولې دعالي شورا دنړيوالو چارو سلاکار محمد اسمعيل قاسميار دافغانستان لپاره داروپا داتحاديې دځانګړي  استازي څرګندونې دده شخصي نظر بولي .
دباختراژانس دخبر له مخې، قاسميار پرون وويل باور لري چې ددولت وسله وال مخالفين به ددغې شورا غوښتنو ته پاملرنه وکړي .
ده وويل  دافغانستان دسولې عالي شورا خپلو رواغوښتنو ته په پاملرنې سره خپلو هڅو ته دوام ورکوي او هيله ده  چې وسله وال مخالفين  زموږ دبلنې په ريښتولۍ  په پوهيدو سره سولې ته غاړه کيږدي .
 

کابل باختر دچنګاښ يوويشتمه :
نن له غرمې مخکې دلسو بجو په شاوخوا کې دکابل ولايت په ميربچه کوټ ولسوالۍ کې چاودنه وشوه .
تراوسه پورې ددغې چاودنې دجزئياتو او له دې امله دسرداوښتو زيانونو په باب خبر نه دى ترلاسه  شوى خو عيني شاهدانو باختراژانس ته ويلي دي چې چاودنه په يوکرولا موټر کې له هغه وروسته وشوه چې ددغه موټر چلوونکي دپوليسو دپلټنې  لپاره ددريدو امر په پام کې ونه نيوه او دپوليسو دشک وړ وګرځيد . ويل کيږي چې په دې موټر کې په موټر چلوونکي سربيره  څو تنه نور هم سپاره وو .
تراوسه پورې ددغې پيښې له امله دمرګ ژوبلې په باب خبر نه دى ترلاسه شوى خو دميربچه کوټ  ولسوال ويلي دي چې چاودنه ددغې ولسوالۍ په بازار کې شوې ده او دسيمې دوه تنه اوسيدونکي ټپيان شوي دي او څو تنه نور چې په دې موټر کې وو سوځيدلي دي .
 

کابل باختر دچنګاښ يوويشتمه :
دافغانستان داسلامي جمهوريت دجمهور رييس حامدکرزي پنځلس ورځنۍ راډيويي وينا .
ګرانو هيوادوالو ، خويندو او ورونو !
اسلام عليکم ورحمت الله وبرکاتو .
دروژې مبارکه مياشت پيل شوه ، ددغې مياشتې له امله ټولو مسلمانانو او په تيره بيا ګرانو هيوادوالو ته مبارکي وايم هيله لرم زموږ مسلمان خلک دغه مبارکه مياشت دسولې او صفا په فضا کې په عباداتو ،خير اوعافيت کې تيره کړي .
ګرانو هيوادوالو !
  دروژې مبارکه مياشت دخير ، برکت ، فضيلتونو اوعباداتو مياشت ده له نورو سره مرسته اوهمکاري په هر وخت  اوزمان کې يو نيک عمل دى خو دروژې  په مبارکه مياشت کې  له بي وزلو او اړو کسانو سره مرسته او دهغوى داحوالو پوښتنه دديني ارشاداتو او دانساني عواطفو زيږنده ده او ددغې مبارکې مياشتې خصوصيتونه او فضيلتونه دي موږ په خپلو کليو اوښارونوکې داسې هيوادوال لرو چې په خپل ورځني ژوندانه کې له زياتو اقتصادي ستونزو سره لاس اوګريوان دي او آن په لازمه توګه دخپلو ماشومانو اوکورنۍ نقفه نه شي برابرولى په ټنګسيا او بي وزلۍ سره روژه نيسي او الهي اوامر پرځاى کوي ټولو هيوادوالو په تيره بيا شتمنو کسانو ته لازمه ده چې له خپلو اړو اوبي وزلو هيوادوالو سره مرسته وکړي چې دتاسو عزيزانوله مرستو او صدقې څخه په استفادې سره زموږ اړ هيوادوال دخپلې روژه ماتې لپاره يوه مړى  ډوډۍ برابره کړي .
دغه راز خيريه موسسې هم  دنده لري چې دبل هر وخت په نسبت په دې مبارکه مياشت کې خپلې زياتې اوښې مرستې  مستحقو کسانو ته ورسوي هيله لرم سږ کال هم دنورو کلونو په شان دخيريه موسسو  اومرکزونو له خوا په ښارونو او جوماتونوکې اړو او بي وزلو روژه تيانو ته دروژه ماتې ترتيبات  برابر شوي وي .
ګرانو سوداګرو او پلورونکو !
زياتره ليدل کيږي چې دروژې په مبارکه مياشت کې دپيردونکو په غوښتنه په بازارونوکې دلومړنيو اړتيا وړ توکو بيې لوړيږي او زموږ روژه تي خلک تل له دې پلوه سرټکوي  ، زه دهيواد له ټولو سوداګرو او پلورونو څخه غواړم چې دمناسبې ګټې په ترلاسه کولو سره دې دبيو دلوړيدوپه تيره بيا په دې مبارکه مياشت کې دلومړنيو اړتيا وړ توکو دبيې دلوړيدو مخه ونسي او په دې ترتيب  له روژه تي هيوادوالو سره  مرسته وکړي او ددغې مبارکې مياشتې له فضيلتونو او اجر څخه ګټه واخلي .
ګرانو ميندو او پلرونو !
ددغې اوونۍ دخبرو په پاى کې ميندو اوپلرونو په تيره بيا دکورنيو ميندو ته هم يادونه کوم څرنګه چې ددوبى په موسم کې هوا توده او لمر سوځنده دى له دې امله د ماشومانو لوبې او تګ راتګ بايد دکورنيو تر نظر لاندې وي ځکه که چيرې  ماشومان له اندازې زيات ترسوځنده لمر لاندې لوبې وکړي او يا هم تګ راتګ وکړي دلمر وړانګې دهغوى پوستکې ته زيان رسوي او دبدن اوبه يې هم کميږي دغه دوه عوامل زيادتره دتودخې په موسم کې دناروغۍ سبب کيږي  په تيره بيا زموږ ميندې دې دتودوخې  او دوبى په موسم کې دخپلو ماشومانو خوراک او څښاک ته ځير وي هغوى ته دې  پاکې اوبه ورکړي او دغير روغتيايي خوراک او څښاک مخه دې ونيسي .
ترراتلونکو خبرو پورې خداى پامان ښاد او روغ واوسئ .
 

-کابل باختر دچنګاښ يوويشتمه :
دافغانستان داسلامي جمهوريت جمهور رييس حامدکرزي په هيواد کې له شتمنو کسانو اوخيريه موسسو څخه وغوښتل چې دروژې دمبارکې دمياشتې په بهير کې دى له بي وزلو او اړو کورنيو سره مرسته وکړي .
دغه راز دهيواد جمهور رييس له سوداګرواو دتوکو له پلورونکو څخه هم وغوښتل  چې په دې مبارکه مياشت کې دې دتوکو دبيو دلوړيدو مخه ونيسي .
  باختراژانس خبر راکړ، دافغانستان داسلامي جمهوريت جمهور رييس  حامدکرزي چې دپنجشنبې په شپه يې دملي راډيو له لارې خبرې کولې درژوې دمبارکې مياشتې له امله يې ټولو مسلمانانو په تيره بيا زموږ ممسلمانو خلکو ته مبارکي وويله اوهيله يې وکړه چې زموږ ديندارخلک دغه مبارکه مياشت دسولې او امنيت په فضا کې په عباداتو او عافيت سره تيره کړي .
جمهور رييس په دې راډيويي وينا کې دروژې مبارکه مياشت دخير اوبرکت او دعباداتو مياشت وبلله اوزياته يې کړه له نورو سره مرسته په هروخت اوزمان کې نيک عمل دى خو دروژې په مبارکه مياشت کې له اړو او بي وزلو کسانو سره مرسته له ديني ارشاداتو ، انساني عواطفو او هم ددغې مبارکې مياشتې له فضيلتونو څخه دي .
حامدکرزي څرګنده کړه چې موږ په کليو اوښارونو کې داسې هيوادوال لرو چې له زياتو ستونزو اومشکلاتو سره لاس او ګريوان دي او سره له دې چې دخپلې کورنۍ نفقه نه شي برابرولى  روژه نيسي او الهي اوامر پرځاى کوي .
جمهور رييس وويل،  دټولو هيوادوالو  په تيره بيا شتمنو کسانو ته په کار دى چې له دغه شان اړو کسانو سره مرسته وکړي چې ددوى له صدقې اومرستې څخه په استفادې سره هغوى هم دخپلې روژه ماتې لپاره يوه مړى ډوډۍ  برابره کړي .
حامدکرزي له خيريه موسسو څخه وغوښتل چې خپلې زياتې مرستې دى په دې مبارکه مياشت کې په مستحقو کسانو وويشي .
جمهور رييس په دې راډيويي وينا کې څرګنده کړه، زياتره ليدل کيږي چې دروژې په مبارکه مياشت کې په بازارونوکې دلومړنيو اړتيا وړ توکو بيې لوړيږي اوزموږ روژه تي خلک تل له دې پلوه سرټکوي ،زه دهيواد له ټولو سوداګرو او پلورونکو څخه  غواړم چې دمناسبې ګټې په ترلاسه کولو سره دې دبيو د لوړيدو په تيره بيا په دې مبارکه مياشت کې داړتيا وړ توکو دبيو دلوړيدومخه ونيسي .
دغه راز حامدکرزي له ميندو اوپلرونو څخه هم وغوښتل چې دخپلو ماشومانو دروغتيا او سلامتيا لپاره دې تر سوځنده لمر لاندې دهغوى دلوبو مخه ونيسي او هم دى دقت وکړي چې خپلو ماشومانو ته غير روغتيايي خواړه اوڅښاک ورنه کړي .   

 .کابل باختر دچنګاښ يوويشتمه :
دغورولايت په مرکز چغچران ښار کې دسلطان شهاب الدين غوري ليسې دالحاقيه ودانۍ دبنسټ ډبره پرون  کيښودل شوه .
دغور دوالي ويندوى عبدالحي خطيبي باختراژانس ته وويل، دغه ودانۍ دجاپان ددولت په مرسته دڅه دپاسه نوولسو  مليونو  افغانيو په لګښت  په پاخه او اساسي ډول جوړيږي چې شپاړس درسي او اته اداري خونې اونور ضروري ملحقات پکې په پام کې نيول شوي دي .
  دغوردوالي ويندوى وويل چې ددغې ودانۍ په جوړيدو سره ددرسي خونو دنشتوالي له پلوه  دزده کوونکو ستونزې  لري کيږي .
 

-کابل باختر دچنګاښ يوويشتمه :
دفارياب  ولايت په ګرزيوان ولسوالۍ کې  دسيمه ئيزو پوليسو په ځواکونو تيره شپه دوسله والو طالبانو دبريد له امله څلور تنه سيمه ئيز پوليسان شهيدان او درې تنه نور پوليسان ټپيان شول .
  دګرزيوان  ولسوال عبدالرزاق کاکړ باختراژانس ته خبر ورکړ، وسله والو طالبانو ددغې ولسوالۍ په کيکک  سيمه کې دسيمه ئيزو پوليسو دځواکونو په پوستې بريد وکړ چې له امله يې څلور تنه پوليسان شهيدان او دپوستې دقوماندان په ګډون درې تنه نور پوليسان ټپيان شول .
دګرزيوان ولسوال زياته کړه، طالبانو  غوښتل چې په ولسوالۍ هم بريد وکړي خو دامنيتي ځواکونو له خوا له ماتې سره مخامخ شول .
دولسوال دڅرګندونو له مخې، دغه بريد دولسوالۍ په يو کيلومتري واټن کې شوى دى چې دانديښنې وړ دى .
ده په دغې ولسوالۍ کې دپوليسو دځواکونودکمښت يادونه هم  وکړه او ويې ويل چې دامنيت دساتنې په خاطر بايدپه دغې ولسوالۍ کې دپوليسو شمير زيات شي .
 

-کابل باختر دچنګاښ يوويشتمه :
دبغلان ولايت په بورکې  ولسوالۍ کې  تيره شپه دناټو دځواکونو دعملياتو له امله دوسله والوطالبانو دډلې ديو سيمه ئيز قوماندان په ګډون اووه تنه وسله وال طالبان ونيول شول .
ويل کيږي چې په دغو عملياتو کې دناټو يوه الوتکه هم له يو ډيوال سره دټکر له امله زيانمنه شوې ده .
  دبغلان ولايت دبورکې ولسوال عبدالجباراسلامي دباختراژانس خبريال ته وويل دناټو دځواکونو دغه عمليات دبغلان ولايت دبورکې ولسوالۍ په الف بيک کلي کې ترسره شول او له امله يې دوسله والو طالبانو دډلې ديو قوماندان مولوي شرف الدين په ګډون  اووه تنه وسله وال طالبان ونيول شول .
دبورکې ولسوال زياته کړه چې په دغو عملياتو کې دناټو دځواکونو يوې الوتکې له ديوال سره ټکر وکړ. او زيانمنه شوه خو سپرليو ته يې زيان نه دى اوښتى او دناټو ځواکونودغه الوتکه ديوې الوتکې په واسطه له ساحې څخه وليږدوله .
 

کابل_باخترد چنګاښ دمياشتې ٢٠مه:
د افغانستان جمهوررئیس حامدکرزي، د هرات په ولایت کې د سې شنبې د ورځې د تروریستې پیښې د شهیدانو د کورنیو له مشرانو سره، نن ټلیفوني خبرې وکړې.
دجمهوري رياست مطبوعاتي دفترباخترآژانس ته خبرورکړ:
حامدکرزي په دغو ټلیفوني خبروکې یو ځل بیا د شهیدانو کورنیو ته د خپلې ژورې خواخوږۍ او ډاډګیرنې مراتب وړاندې کړل او له هغوی سره  یې د هر ډول مرستې ژمنه وکړه.
د هېواد جمهوررئیس د شهیدانو وارثانو ته ډاډ ورکړ چې له دوی سره د غمشریکې په موخه به نغدي مرسته وشي، د سرپناه لپاره به ځمکه ورکړل شي او د دوی د کورنیو یو شمېر غړي به د حج لپاره بیت الله شریف ته واستول شي.
دغه راز حامدکرزي د هرات والي سید فضل الله وحیدي ته یو ځل بیا لارښوونه وکړه چې د هرات د وروستۍ تروریستي پیښې د شهیدانو له کورنیو سره دې ژرترژره  د ولایت له لوري هم لازمې مرستې وکړي.
د هرات والي د هېواد جمهوررئیس ته ډاډ ورکړ چې د ده د پرونۍ لارښوونې په اساس یې د شهیدانو کورنیو ته یوه اندازه نغدي مرسته او د هرات د سرې میاشتې، ولایتي شورا، ښاروالۍ  او سوداګرو مرستې رسولې دي.#