28 January 2020

RSS Facebook

سوداگریز


تازه خبرونه

يو انس سره زر په ١٥٨٢ډالرو وړاندې کېږي

يو انس سره زر په ١٥٨٢ډالرو وړاندې کېږي

کابل/ د سلواغې ٨مه/ باختر په نړيوالو بازارونوکې نن يو انس...

  څلور طالبان په هلمند کې ووژل شول

څلور طالبان په هلمند کې ووژل شول

کابل/ د سلواغې ٨ مه/ باختر د ملي دفاع وزارت مسوولین...

د هېواد په ختیځ کې د کرکټ سیالۍ پیلېږي

د هېواد په ختیځ کې د کرکټ سیالۍ پیلېږي

کابل/ د سلواغې ٨ مه/ باختر د ننګرهار د ١٦ ولسوالیو...

Youtube Player

khantry design

سوداگریز

سوداگریز

Thursday, 06 December 2012 12:52

د جمهور رييس حکم

کابل باختر د ليندي شپاړسمه
دافغانستان داسلامي جمهوريت جمهور رييس دانيسې په نامه په کاپيسا ولايت کې ديوې  ځوانې نجلۍ دوژل کيدو دعلتونو او عواملو دڅيړنې لپاره  دهيئت دموظف کولو په باب يو حکم صادر کړى دى .
دچارو دادارې او دوزيرانو شورا ددارالانشا لوى رياست باختر اژانس ته خبرورکړ:
  جمهور رييس په کاپيسا ولايت کې ديوې ځوانې نجلۍ انيسې د امير محمد دلور دوژل کيدو دعلتونو او عواملو دجرړو د موندلو په مقصد په دې ترکيب يو واکمن دولتي هيئت موظف کړ .
په قومي چاروکې دافغانستان داسلامي جمهوريت دجمهور رييس سلاکار عبدالهادي صافي درييس په توګه .
دسيمه ئيزو ارګانونو دخپلواکې ادارې واکمن استازي خواجه ابومسلم صديقي دغړى په توګه .
دکورنيو چارووزارت واکمن استازي سمونيار شفيق الله دغړى په توګه.
دملي امنيت دلوى رياست واکمن استازي ډګروال معروف دغړى په توګه.
دلوى څارنوالي دادارې واکمن استازي حبيب الرحمن دغړى په توګه.
دحکم له لارښوونې سره سم هيئت دنده لري چې دکاپيسا ولايت ته لاړ شي او ددغه ولايت له مقام ، او ولايتي شورا سره په همغږي کې او په دغه ولايت کې دمسوولو دولتي مرکزونو په جدي همکارۍ سره قضيه په هراړخيزه توګه وڅيړي، علتونه او عوامل يې تشخيص او دڅلورو ورځو په بهير کې دى دافغانستان داسلامي جمهوريت جمهوري رياست ته رپوټ وړاندي کړي .
 

کابل باختر د ليندي شپاړسمه
د کورنیو چارو وزارت د پاسپورت ریاست منسوبانو د بشري حقونو اود قانون ټینګښت ترعنوان لاندې څلور ورځني ښوونیز سیمینار له بشپړیدو ورسته خپل د فراغت سندونه ترلاسه کړل.هغه غونډه چې په همدې موخه د پاسپورت په ریاست کې جوړه شوې وه لومړی د کورنیو چارو وزارت د بشرد حقوقو او جندر رییسې سمونوال حکمت شاهي د بشري حقونو له خپلواک کمیسون څخه مننه وکړه چې د کورنیو چارو وزارت د بشري حقونو په سیمینارونو او ورکشاپونو کې یې خپله پوره ونډه او همکاري ښودلې ده.د بشري حقونو او جندر رییسې د بشري حقونو څخه ملاتړ د هېواد د ټولو ملي پولیسو دنده وبلله او زیاته یې کړه چې د پاسپورت ټول مسوولین باید د خپلو شته تجربو او ښونیزو زده کړو په ترلاسه کولو سره خلکوته په نرمه لهجه، پاک لاس او پاک زړه سره د پاسپورتونو ویشنه ترسره کړي ترڅو د خلکو حقوق تر پښو لاندې نه شي.وروسته د پاسپورت رییس پاسوال سید احمد ناصر هاشمي او په کابل کې د بشري حقونو خپلواک کمیسون ساحوي رییس شمس الله احمدزي د دغه سیمینار په ارزښت او نوښت خبرې وکړې او د پاسپورت په برخه کې یې دغه ښونیز سیمینار ډېر ارزښت مند وباله.په دغه څلور ورځینی ښوونیز سیمینار کې چې د افغانستان د بشري حقونو خپل واک کمیسون پیژندنې، د بشري حقونو نړیوالو اسنادو پیژندنې، دندې او د دندو مسولیتونو، د ماشومانو حقوق، د ښځو پروړاندې د تاوتریخوالو د مخنیوي، د زورزیاتي پروړاندې موضوعاتو، د قانون پلي کولو لپاره نړیوالو معیارونو، او اداري فساد د مخنیوي په موخه درسونو ورکول کیدل، د سندونو په ویشلو سره پای ته ورسید.
 

د ۱۳۹۱ کال د لېندۍ د میاشتې ۱۵ مه- بروسلز
سرمنشي راسموسن،
جلالتمآبانو، آغلو او ښاغلو:
اجازه راکړۍ چې له سر منشي څخه د ناټو د بهرنيو چارو وزیرانو په غونډه کې زما د بلنې لپاره په مننې سره خپلې خبرې پېل، تر څو د افغان دولت لید لوری له تاسو سره شریکه کړم. دا د خوښۍ ځای دى چې یو ځل بیا په عین میز کې د افغانستان د ثابت ګام او د باور وړ ملګرو او متحدینو سره یو ځای یو.
یوولس کاله وړاندې افغانستان د جګړې او ورانیو تیاره پړاو یې تېر کړ، او د سولې، هوساینې، ولسواکۍ او عدالت لور ته یو نوی سفر پېل کړ. د وروستي لسیزې په بهیر کې مونږ ډېرې لاسته رواړنې درلودې، چې د ملتونو استازې چې دلته سره را ټول شوي دي په مېړانه او سخاوت سره په دغو لاسته راوړنو کې همکاري کړي دي او پرې ویاړلي شي.
مونږ په افغانستان کې د تحول په اړه چې زمونږ د خلکو د قربانیو او همکاریو په مرستې سره لاسته راغلی، د ریښتنې  ویاړ احساس کوو. موږ په واقعي توګه پر خپلې ځوانې ولسواکۍ ویاړو، نن موږ یو ټاکل شوی جمهوررييس، یو ټاکل شوی پارلمان، او په ۳۴ ولایتونو کې ټاکل شوي ولایتي شوراګانې لرو.
زموږ ۸ ملیونه ماشومان بېرته ښوونځیو ته ځي، چې په هغو کې څه کم ۴۰ سلنه یې نجوني دي او په ټول هېواد کې په لس ګونو زره  محصلین نارینه او ښځینه پوهنتونونو ته ځي. موږ د خپلو فزیکي زیربناوو مهمې برخې بېرته ودانې کړي دي، چې زرګونه کیلومتره سړکونه او پلونه پکې شامل دي.
همدارنګه موږ د دولتي بنسټونو په جوړلو کې مهم ګامونه پورته کړي دي، چې د افغان ملي اردو او ملي پولیس چې د خلکو له ځواکمن او زیاتېدونکي ملاتړ او باور څخه خوند اخلي، پکې شامليږي. زمونږ توانمنېدونکي او مسلکي اردو او پولیس زمونږ په سیمه کې زموږ له متحدینو سره په ګډه توګه د تروریزم او افراط پالنې پر وړاندې ، چې د افغانستان، سیمي او ټولې نړۍ لپاره یو خطر دی، مبارزه کوي.
آغلو او ښاغلو:
د افغانستان خلک د تروریزم او افراط پالنې د استبداد او ظلم پر وړاندې په مبارزه کې تر ټولو زیات قربانۍ او د ژوند په چارو کې ستونزې ګاللي دي. زموږ لس ګونو زرو نارینه و ښځو او ماشومانو خپل ژوند له لاسه ورکړي دي، چې ډېری یې د تروریستانو د بمونو او مرمیو له کبله او ځېنی یې هم د تروریزم پر وړاندې د جګړو پر مهال د ملکي قربانیانو په توګه خپل ژوند له لاسه ورکړي دي. په دې جګړه کې افغان سرتیري او پولیسو تر ټولو زیات زیانونه ګاللي دي. یواځې د سږ کال په بهیر کې د تروریزم پر وړاندې جګړه کې او د هېواد د امنیت په تامینولو کې له ۲۱۰۰ تنو څخه زیات افغان سرتېرو، پولیسو او امنیتي ځواکونو خپل ژوند له لاسه ورکړي دي او له ۴۶۰۰ څخه زیات نور کسان یې سخت ټپیان شوي دي.
زموږ په ګډه جګړه کې ائتلافي هېوادنو هم ډېر لوی ځاني او مالي قربانیانې ګاللي دي. اجازه راکړئ چې دلته یو وار بیا دا ووایم چې: موږ ستاسو قربانیو ته درناوی کوو، موږ به ستاسو ملګرتیا په یاد کې ساتو او ستاستو څخه د دې لپاره چې زموږ د تاریخ په دې بحراني وخت کې له افغان ملت سره ودریدی، مننه کوو.
موږ په ګډه توګه د اضافي تدبیرونو یوه لویه ټولګه جوړ کړی تر څو له داخلي ګواښونو څخه مخنیوی وکړي چې دغه تدبیرونه د دښمن د بریدونو په کچه کې په لویه کچه لږوالی راوستې ده.
آغلو او ښاغلو،
زموږ ملګرتیا اوس پیاوړې ده. او د هغه خواري او نه ستړیکېدونکي کار لپاره چې موږ په ګډه توګه ترسره کړې دي، مننه. افغان ځواکونو ته د امنیتي مسؤلیتونو د لېږد بهیر په وخت سره روان دی او په ښه توګه پرمختګ کوي، چې په پایله کې د لېږد بهیر په دواړو، ستراتیژیکو او تخنیکي کچو کې بریالیتوب ثابتوي. د افغانستان خلکو د لېږد بهیر د یوې ستراتیژکي اړتیا په توګه منلې دى او زموږ ملي امنیتي ځواکونه په ثابت ګړندیتوب سره هغه پلي کوي. او د افغانستان د ۷۵ سلنې وګړو امنیت، د بهرنيو ځواکونو له خوا نه، بلکې د افغان سرتېرو او پولیسو دافسرانو له خوا تامینیږي. په هغو ښارونو او کلیو کې چې د لېږد بهیر ترسره شوي دي، د لېږد له بهیر څخه د وړاندې په پرتله تاوتریخوالي لږ تر لږه ۲۰ سلنه لږوالی موندلی دی. او زه خوشحاله یم چې تاسو ټولو ته ووایم چې جمهور رئیس کرزی به د لېږد بهیر څلورم پړاو د دې میاشتې په وروستو کې اعلام کړي، چې دا به د هېواد تر ټولو ننګوونکو او ستونزمنو سیمو د امنیتي مسؤلیتونو لېږد په بر کې ونیسي.
آغلو او ښاغلو،
د لېږد بهیر د یو خپلوک، واکمن افغانستان او دهغه د نړیوالو همکارانو ترمنځ د پراخېدونکي ملګرتیا یو مهم عنصر دی.
موږ له ناټو، آیساف او د ناټو او آیساف غیر هېوادونو څخه د هغوی د مهم او اوږدمهال ۴.۱ ملیار ډالري کلنۍ مالي مرستو څخه چې له ۲۰۱۴ کال څخه وروسته د افغان ملي امنیتي ځواکونو د تمویل، روزنې او سمبالولو لپاره کوي، مننه کوو. افغانستان به خپل د ۵۰۰ ملیونو امریکایې ډالرو کلنۍ لمړني رقم ونډه په ثابته توګه تر هغه کچه زیاته کړي، چې  موږ و توانیږو خپلې امنیتي او دفاعي اړتیاوې په بشپړه توګه له خپلو کورنيو عوایدو څخه د ۲۰۲۴ کال تر ټاکل شوي نېټې پورې، تمویل کړو. موږ باور لرو چې دا مناسب وخت دی تر څو د دې مرستو لپاره د یو میکانیزم د جوړلو په ټول اړخیزه بحث کې ګډون وکړو. زه تاسو ته ډاډ ورکولی شم، چې دا زموږ لپاره په افغانستان کې یو مهم لومړيتوب دی.
اجازه راکړئ چې د روڼوالي او حساب ورکونې د اصولو په اړه د افغانستان د دولت پر ژمنو یو وار بیا ټینګار وکړم.
له دې سره او په ځانګړي توګه د افغانستان او دهغه د نړیوالو ملګرو ترمنځ د پراخېدونکو اړیکو په برخه کې، موږ هیله من یو چې دا ښکاره او جوته ده چې په دې برخه کې تر ټولو مهم اصل باید د افغانستان واکمني وي او هر هغه میکانیزم چې زموږ له خبرو اترو څخه منځته راځي، باید افغانستان د هغه مالکیت ولري. د افغانستان واکمني ته د درنښت بنسټیز اصل سربیره، د افغانستان مالکیت به د دې پیسو اغیزمن، کاري او دوامداره لګښت یقیني کړي او همدارنګه د افغانستان په ملي ادارو کې د اړتیا وړ ظرفیتونه لا پیاوړی کړي.
د افغانستان د ملي ځواکونو جوړل چې په ملي کچه ورته درناوی او په مسلکي او دیموکراتیکه توګه مسؤل شمېرل کېږي، او همدارنګه د یو باثباته، با امنه او ولسواک افغانستان بنسټ ایښودل، افغانستان ته د نړیوالې ټولنې له مهمو همکاریو څخه شمېرل کېږي. د افغان ملي امنیتي ځواکونو راتلونکي ته په پاملرنې سره، د افغانستان د خلکو لپاره د هغوی د امنیتي ځواکونو تر څنګ د مالکیت حس لرل، ډېر مهم شمېرل کېږي. نو د همدې لپاره د هغوی د اعتبار او مشروعیت د پیاوړي کولو لپاره موږ باید ډاډ ترلاسه کړو هغه بنسټونه او بهیرونه چې د افغان ملي امنیتي ځواکونو له راتلونکي سره مرسته کوي، د افغانستان د دولت تر لارښوونې او مالکیت لاندې دی.
البته په هغو برخو کې چې موږ سره هوکړه لرو چې افغان ملي امنیتي ځواکونه د افغانستان د بشپړ مالیک د تحقق وړتیا نه لري، موږ باید تر ۲۰۱۴ کاله پورې او له هغه څخه وروسته سره په ګډه توګه کار وکړو تر څو هغه وړتیاوې را منځته کړو.
په دې برخه کې، د افغانستان د دولت لید لوری په دې توګه دی چې ملي بودجه چې، د مجموعي وړاندیز شوي بودجو په ګډون د نړیوالې ټولنې د میکانیزمونو له لورې ورڅخه ملاتړ کېږي، او دا به افغان ملي امنیتي ځواکونو ته د مرستندویو هېوادونو د مرستو د هدایت کولو په ګډون، د افغان ملي امنیتي ځواکونو د ملاتړ لپاره تر ټولو اغیزمن، اقتصادي او د مسؤلیت وړ وسیله وي.
دا هم پرېکنده ده چې ډاډ ورکړو چې افغان دولت به لومړیتوبونه جوړوي، پلانونو ته پراختیا ورکوي، بودجي ځانګړی کوي او اړونده پرېکړې چې د ملي امنیتي ځواکونو د بڼې او د تجهیز څرنګوالي پورې تړلي وي، نیسي.
سربېره پر دې، څرنګه چې موږ دې خبرو اترو ته دوام ورکوو، دا موږ ټولو ته به ټاکونکی وي چې له ۲۰۱۴ کال څخه وروسته د افغان ملي امنیتي ځواکونو کمیت باید د مالي محدویتونو ته پاملرنې سره نه، بلکې اوسنيو شرایطو ته په پاملرنې سره و ټاکل شي.
آغلو او ښاغلو،
امنیتي مسؤلیتونو د لېږد بهیر به د یو سیاسي لېږد سره جوخت ترسره شي او د یو ولسواک افغانستان پراختیا د اهمیت وړ دی. د ۱۳۹٣ کال د وري په میاشت کې به افغانان د خپل راتلونکي جمهوررييس د انتخاباتو لپاره د ټاکنو حوزو ته ځي. افغان دولت د یو منصفانه، ټول شموله او رڼو انتخاباتو د ترسره کولو څخه د ډاډ ترلاسته کولو او همدارنګه راتلونکي جمهوررييس ته په سوله ییزه توګه د واک د لېږد لپاره،  هر شوني ګام ترسره کوي. موږ به پرخپلو نړیوالو ملګرو پر ملاتړ باندې اتکا وکړو تر څو موږ سره مرسته وکړي چې له دې د بدلون له دې حساسه موقعیت څخه په بریالي توب سره ووځو او له ټولو څخه مهم دا چې ډاډ ورکړو چې د انتخاباتو بهیر په آزاده توګه او د بهرنیو له لاسوهنو څخه پرته ترسره کېږي.

آغلو او ښاغلو،
موږ ژمن یو چې له ناټو سره خپله ملګرتیا پیاوړی کړو او په دې برخه کې له ۲۰۱۴ کال څخه وروسته د ناټو د موخې او د مامورت تعریفولو او افغانستان سره د هغه ګټورو مشورو ته سترګې په لاره یو.
څرنګه چې خبر یاست، سږ کال د افغانستان دولت د امریکي متحدو ایالتونو، آلمان، هندوستان، آسترالیا، ایتالیا، فرانسې او د بریتانیې په ګډون له خپلو ځینو کلیدي متحدینو سره د همکاریو اوږد مهال دوه اړخیز موافقه لیکونه لاسلیک کړل.
موږ ورته موافقه لیکونه له ناروې، اروپایې ټولنې، ترکیې، دنمارک، فنلنډ، پولنډ او د عربي متحدو اماراتو سره لاسلیک کړي او یا هم په اړه یې سره خبرې اترې کوو. همدارنګه زه خوشحاله یم چې تاسو ته خبر ورکړم چې د لړم په ۲۵ مه نېټه موږ د امریکې له متحدو ایالتونو سره د امنیتي دوه اړخیز موافقه په اړه په کابل کې خبرې اترې پېل کړې. دا موافقه لیک به له ۲۰۱۴ کال څخه وروسته د امریکي متحدو ایالتونو د پوځیانو د شونې حضور په ګډون، د دواړو هېوادونو ترمنځ راتلونکي دفاعي همکارۍ ټاکې.
آغلو او ښاغلو،
د سولې بهیر همدارنګه د یو عاجل لومړیتوب په توګه د افغانستان دولت لپاره اهمیت لري او موږ هغه د یوې نوي قوت سره هغه تعقیبوو. د سولې د عالي شورا د سفر پایلې چې د نوامبر په نیمایې کې ترسره شو او همدارنګه په وروستي اوونۍ کې اسلام آباد ته زما سفر، زموږ د سولې هڅو ته یو نوی ځواک و بخښه. همداسې مې چې خپلو پاکستانې همکارانو ته وویل، اوس د سولې د بهیر لپاره د یو عملي ګام وخت دی. په راتلونکو اوونیو او میاشتو کې د سولې د بهیر په لاره کې موږ د لا ټینګو ګامونو پورته کولو ته څرنګه چې موږ له پاکستان سره شریکه کړل، سترګې په لاره یو. چې دا به په پاکستان د ټولو طالب بندیانود خوشې کېدو، د طالبانو له مشرانو سره د خبرو اترو لپاره د مخامخو خبرو اترو لپاره اسانتیاوې برابرول، د طالبانو مذاکره کوونکو ته د با امنه سفر برابرول، او په نهایت کې د افغانستان دولت، طالبان او نورو وسله والو ډلو ترمنځ د یو اوږدمهال مذاکراتو د پړاو سبب وګرځي.
موږ همدارنګه د ملګرو ملتونو له امنیت شورا سره په خبرو اترو بوخت یو، تر څو ډاډ تر لاسه کړو چې د طالبانو پر وړاندې د بندیزونو د کمیټي بیا کتل شوی پرېکړه لیک د افغانستان د دولت د غوښتنو په اړه چې د طالبانو نومونه له تور لست څخه ایستل او د سفر اجازه ورکول دي، د یو مسؤل، اغیزمن او انعطاف غوښتونکی اقدام سبب و ګرځي. دا ډول هڅې به زموږ د سولې له هڅو سره په مثبته توګه مرسته وکړي او د سولې له بهیر څخه د نړیوالې ټولنې د بشپړ ملاتړ یو قوي پیغام ورکوي.
څرنګه چې پخوا مو هم ویلې وو، د افغانستان دولت به اساسي قانون ته د درناوي، د ورستي لسیزي د دیموکراتیکو لاسته راوړنو خوندي توب، د وګړو او ښځو حقوق او له نړیوالو تروریستانو سره د اړیکو پریکړه کولو په ګډون، د سولې د بهیر قوانین او اصولو باندې به ټینګ ولاړ وي.
آغلو او ښاغلو:
موږ د کلونوکلونو په اوږدو کې په افغانستان کې یوه اوږده لاره تېره کړی. څرنګه چې موږ د ۲۰۱۵ – ۲۰۲۴ کلونو تر منځ د بهیر د لېږد او د تحول د لسیزې د اجنډا د بشپړ پلي کېدو په موخه اوچت ګامونه پورته کوو، هڅه به وکړو چې خپلې تاریخي لاسته راوړنې خوندي، او هغو ته ډېروالی وبخښو. خپل دیموکراتیک سیستم ته ښه والی و بخښو او د یو خپلواک ملت په توګه له نړیوالې ټولنې سره خپلو همکاریو ته پراختیا ورکړو. او زه باوري یم چې دې موخې ته د رسېدو لپاره، د خپلو ملتونو د فداکاریو ته د درناوی کولو تر ټولو ښه لاره ده.

کابل باختر د ليندي شپاړسمه
  دننګرهار ولايت دنازيانو ولسوالى دنوى لندي دمنځني ښوونځى نوى ودانۍ ګټې اخستنې ته وړاندې شوه .
  دباختر اژانس دخبر له مخې، دغه ودانۍ دجرمن اګرواکشن موسسي  په مالي مرسته په يو کال کې جوړه شوې ده اوشپږ درسي او درې اداري خونې او نور ضروري ملحقات لري .
په هغې غونډه کې چې ددغې ودانۍ دپرانستلو له امله ديو شميردولتي  چارواکو اودننګرهارولايت دقومي مخورو په ګډون ددغه ښوونځي په انګړ کې جوړه شوې ده ،ددغه ولايت دپوهنې رييس دښوونې اوروزنې او دمناسبې روزنيزې فضا دارزښت  په اړوند معلومات وړاندي کړل او وي ويل چې پخوا ددغه ښوونځي زده کوونکي ددرسي خونو له کمښت سره مخامخ و چې ددغې ودانۍ په جوړيدو سره ددرسي خونو دکمښت له پلوه ددغه ښوونځي دپنځه سوه تنو زده کوونکو ستونزه لرې شوې ده .
 

کابل باختر د ليندي شپاړسمه
دناټو يو سرتيري په افغانستان کې دوسله والو طالبانو په بريد کې ووژل شو .
په دغه بهرني پوځي چې هويت يې نه دى په ډاګه شوى پرون کله چې دافغانستان په جنوب کې په ګزمې بوخت و دوسله والو طالبانو له خوا بريد وشو او ووژل شو .
ناټو باختر اژانس ته ديوې خبرپاڼې په ليږلو سره دخپل دغه سرتيري وژل کيدل  تاييد کړل خو دده دهويت او دپيښې ددقيق ځاى په باب يې څه  نه دي ويلي .
دسه شنبې په ورځ هم  دناټو دوه تنه پوځيان په افغانستان کې په ورته پيښه کې ووژل شول .
  دنه تاييد شويو شميرنو له مخې، دروان ميلادي کال له پيل څخه تراوسه پورې څه دپاسه پنځه سوه پنځوس تنه بهرني پوځيان په افغانستان کې له جګړه مارانو سره په نښتو کې وژل شوي دي په داسې حال کې چې دتيرميلادي کال په بهير کې دغه شميرپنځه سوه شپږ نوي  تنو ته رسيدلي وو .
 

کابل باختر د ليندي شپاړسمه
د ګذرې ولسوالۍ  دبازار  او دکرنيزو محصولاتو دپلورنې دمرکز د تاسيساتو دبنسټ ډبره نن دهرات دوالي ډاکتر داود شاه صبا له خوا کيښودل شوه .
دګذرې ولسوالۍ چارواکي وايي ددغه مرکز په تاسيساتو کې دستر پارکينګ او دکرنيزو او دبزګري دمحصولاتو  دپلورنې او وړاندې کولو دسيمو جوړول شامل دي چې ټاکل شوې ده په دريو مياشتو کې بشپړ شي .
دهرات ولايت دګذرې ولسوال نثار احمد پوپل باختر اژانس ته وويل:  ددغې پروژې په بشپړيدو سره به دګذرې ولسوالۍ اوسيدونکي وکولي شي خپل کرنيز محصولات په مناسب چاپيريال کې بازار ته وړاندې کړي .
په همدې حال کې دهرات والي ډاکتر داود شاه  صبا هم دهرات ښار دوردي دروازې په توګه دګذرې ولسوالۍ دبازار دبڼې لازيات ښه والي او بدلون مهم وباله اوله خلکو څخه  يې هم  وغوښتل چې دګذرې ولسوالۍ دبازار دښکلي کولو او ددوکانونو په رنګولو  کې همکاري وکړي .
په هرات کې دايتاليا دبيا رغونې  دولايتي ټيم قوماندان وايي چې ددغه بازار  دتاسيساتو داړتياوړ نږدې اتيا زره يورو ددوى له خوا ورکول کيږي .
دسرجنګل  په سيمه کې دګذرې ولسوالۍ دنوى بازار دبنسټ ډبره په داسې حال کې ايښودل کيږي چې مخکې له دې هم په همدې سيمه کې دسدو زو دشهزاده ګانو ارامکاه دهرات  دوالي په شخصي مرسته  په اساسي ډول بيا رغول شوې وه .
له بلې خوا دګذرې ولسوالۍ دښاروالۍ مسوولين وايي چې همدا اوس دهرات ښار ته دغزيدلي واټ دجوړولو او رنګولو په  ګډون څو عمراني طرحې چې ددغې ولسوالۍ له مرکز څخه تيريږي  دهرات قندهار دلويې لارې  دپاسه دلومړني هوايي پله د جوړولو دپروګرام  او څو نورې پراختيايي طرحې  په دغې ولسوالۍ کې دوام لري .
داووه سوه پنځه اويا مترو په اوږدوالي او داووه مترو په سور  دګذرې ولسوالۍ نوى بازار اوپارکينګ  ټاکل شوې ده دښار جوړولو له معيارونوسره سم جوړ شي .
 

کابل باختر د ليندي شپاړسمه
  دغزني ولايت دامنيې قوماندانۍ ددروازې په وړاندې دچاودنې له امله درې تنه افغان پوځيان او درې تنه ملکي وګړي ټپيان شول .
دغه چاودنه تيرماښام هغه وخت وشوه چې څو تنه پوځيان دغزني ولايت دامنيې قوماندانۍ دروازې ته څيرمه راټول شوي و .
دغزني ولايت امنيه قوماندان زړور زاهد باختر اژانس ته وويل چې په دې چاودنه کې درې تنه امنيتي مامورين او درې تنه ملکي وګړي  ټپيان شوي دي .
دپوليسو ددغه مقام دڅرګندونو له مخې،  بم په يو بايسکل  کې ځاى پرځاى شوى و او له لري واټن څخه  کنتروليده .
دچاودنې ځاى ته څيرمه دباختر بانک دنمايندګي په ګډون څو نور تاسيسات هم شته .
عيني شاهدان وايي چې په ښکاره ډول دوه تنه يرغلګر طالبان هم دچاودنې په وخت کې په ساحه کې و خو هغوى له ډيل پرته تښتيدلي دي .
په همدې حال کې دغزني  دملکي روغتون ډاکتران ددغې چاودنې دټپيانو روغتيايي حالت مخ په  ښه والي بولى .
دغزني ولايت امنيه قوماندان ، وسله وال طالبان ددغې پيښې مسوول بولي .
 

کابل باختر د ليندي شپاړسمه
  درې تنه ياغيان چې درباط سنګي ولسوالۍ په مربوطاتو کې په ماين ښخولو بوخت و داردو له ځواکونوسره په نښته کې  له مرګ ژوبلې سره مخامخ شول .
دظفر قول اردو چارواکو باختر اژانس ته ويلي دي په ياغيانو پرون کله چې دکشک ولسوالۍ په لاره کې په ماين ښخولو بوخت و دافغان پوځيانو له خوا بريد وشو چې له امله يې يو تن ووژل شو او دوه تنه نور يې ټپيان شول .
په همدې حال کې ويل  شوى دى هغه ماينونه چې دياغيانو له خوا ښخ کړي شوي و هم دملي اردو دپرسونل له خوا کشف او شنډ کړي شول .
په يوبل  خبر کې ويل شوى دى، دوه ماينونه چې په ملکي او نظامي وسايطو دبريد په مقصد دهرات تورغندي په لاره کې ښخ کړاي شوي و دظفر قول اردو دځواکونو له خوا کشف او شنډ کړي شول .  دوسايطو ضد ددغو ماينونو تخريبي قدرت  زيات اعلام شوى دى.
څلور ورځې مخکې هم څلور  ماينونه چې دوسله والوطالبانو له خوا دهرات _ دلارام  په لاره کې ښخ کړي شوى  و  دملي اردو دمنسوبينو له خوا کشف او شنډ کړي شول .
 

کابل باختر د ليندي شپاړسمه
دافغانستان بانک باختراژانس ته ديوې خبرپاڼې په ليږلو سره دسلو مليونو امريکايي ډالرو دليلام خبر ورکړى دى .
  په خبرپاڼه کې ويل شوى دى چې دافغانستان بانک دروان کال  دليندي دمياشتې  داتلسمې او يوويشتمې نيټې  دشنبې او سه شنبې دورځو په داوطلبو کې سل مليونه امريکايي ډالره دليلام په ډول پلوري .
او په شرايطو برابر له ټولو صرافانو او تجارتي بانکونوڅخه چې لس زره امريکايي ډالره پخوا دتضمين په ډول دافغانستان بانک دبازار دعملياتو په لوى مديريت کې تحويل کړي وي  غوښتل شوي دي  چې په دغو داوطلبيو کې دې  ګډون وکړي .
  دغه راز  له ګډون کوونکو څخه غوښتل شوي دي  چې دداوطلبي فورمې دسه شنبې دورځې دسهارترلسو بجو پورې  دبازار دعملياتو له مديريت څخه ترلاسه کړي او ترلسو بجو او ديرشو دقيقو پورې دې بيرته وسپارى .
  په خبرپاڼه کې له هغو صرافانو او تجارتي بانکونو څخه چې تراوسه پورې يې لس زره امريکايي ډالره  دتضمين په ډول نه دي تحويل کړي غوښتنه شوې ده چې دغه  پيسې دى  دتضمين په ډول تحويل کړي او په راتلونکو ليلامونوکې دې  ګډون وکړي .
  دغه راز  ويل شوي دي  چې  په قسمي ډول دمعاماتو ترسره کول مجاز نه دى او دليلام ګټوونکي دې دخپل پور پيسې يو ځاى تحويل کړي .   ختم_ ف _ اکرم
قوماندان نصر الله  ووژل شو او دازبکستان  داسلامي تحريک قوماندان ونيول شو  ٢-کابل باختر د ليندي شپاړسمه
  دملي اردو منسوبينو دهيواد په بيلابيلو ساحوکې دعملياتو په ترسره کولو سره ديو قوماندان په ګډون شپږ تنه وسله وال مخالفين ووژل او دازبکستان  داسلامي تحريک  قوماندان يې  نيولى دى .
  په دغو عملياتو کې دغه راز څو تنه وسله وال مخالفين نيول شوي او جنګي وسايل يې هم ترلاسه شوي دي .
دملي دفاع وزارت مطبوعاتي دفتر باختر اژانس ته خبر ورکړ ،  په  هغو عملياتو کې  چې دملي اردو  او دائتلاف دځواکونو له خوا دبلخ ولايت دچاربولک  ولسوالۍ په مربوطاتو کې  ترسره شول ، قوماندان ملانصر الله له يو بل تن سره  وژل شوى او دوسله والو مخالفينو  يوه اندازه جنګي وسايل هم ترلاسه شوي دي .
  په خبر کې ويل شوي دي، په هغو عملياتو کې چې دملي اردو او دائتلاف ځواکونو په کندز ښار پورې اړوند د چهل دختران په کلي کې ترسره کړل، دازبکستان  داسلامي تحريک قوماندان  محمد امين  ونيول شو .
ويل کيږي چې ده زموږ په هيوادکې دچاودنو او دتروريستي بريدونو په ترسره کولو کې  کارنده رول درلود .
دغه راز  په خبر کې ويل شوى دى چې ددولت يو وسله وال مخالف  د٢٠١ سيلاب قول اردو دمنسوبينو له خوا  دننګرهار ولايت دبټي کوټ ولسوالۍ په مربوطاتو کې  دعملياتو په ترڅ کې  ووژل شو او يو توغندي ويشتونکي  ترلاسه شوى دى .
ديوبل خبر له مخې،  دزابل ولايت  دميزان ولسوالۍ  په مربوطاتو کې  د٢٠٥ اتل قول اردو  دمنسوبينو په عملياتو کې دوه تنه  له يوې پيکا او يو کلاشينکوف سره  ونيول شول .
  په خبر کې ويل شوى دى  چې دقندهار ولايت  په ژيړي ولسوالۍ کې دملي اردو دځواکونو او دوسله  والو طالبانو ترمنځ  نښته کې درې تنه وسله وال طالبان وژل شوي دي .
  دغه راز په خبر کې په واټونوکې  دماينونو دچاودنې له امله  دغزني ولايت  په مربوطاتو کې  دملي اردو ددوو تنو منسوبينو او دهلمند ولايت په مربوطاتو کې دملي  اردو ددريو تنو منسوبينو دټپي کيدو خبر ورکړ شوى دى .
 

کابل\  باختردلندي دمياشتې  ١٥ :
د ډسمبر د دريمې، د معلولينو  د نړيوالې ورځې د نمانځنې په غونډه کې، د هيواد له جمهور رييس څخه وغوښتل شول چې د معلولينو او د شهيدانو د وارثانو دحقوقو او امتيازونو قانون توشيح کړي .
په دې غونډه کې چې د مشرانو جرګې د شهيدانو، د وارثانو او د معلولينو دچارو دکميسيون له خوا د افغانستان د پارلمان د پياوړتيا د پروژې په همکارى  او دسنامجلس د لومړي نايب محمدعلم ايزديار، د ملي شورا په دواړو مجلسونو کې  د خلکو د استازو، د ښځو د چارو او د شهيدانو، معلولينو، کار او د ټولنيزو چارو وزارتونو دمعينانو، د افغاني سرې مياشتې د ټولنې د رييسې او دمعلولينو دمرکزونو اواتحاديو د رييسانو په ګډون، دملي شورا په الحاقيه تالار کې جوړه شوې وه .
د مشرانو جرګې لومړي نايب د معلولينو د ستونزو په باب خبرې وکړې او څرگنده يې کړه: هغو کسانو چې د اسلام ، آزادى  او د خپلې خاورې او ناموس د دفاع په لاره کې د خپل بدن غړي له لاسه وکړي دي؛ نه يواځې نه دې ستايل شوي، بلکې  د اړوندو چارواکو او د مرستندويو مرکزونوله خوا هغوى ته ډېره کمه لازمه پاملرنه هم نه ده شوى .
په غونډه کې ايزديار په هيوادکې د جګړې اوبې ثباتى دوام، بهرني لاسوهنې ، د يوې اغيزمنې ستراتيژى نه شتون او ځينې نور موارد زموږ د ټولنې معلول قشرته دپاملرنې خنډوباله او زياته يې کړه چې د معلولينو د حقوقو  په ورکولوکې د تعادل  او انډول نه رعايتول، د دغه قشر نورې ستونزې دي او څرګنده يې کړه چې په ملي شوراکې دخلکو استازى به په خپلو ټولو قانوني  واکونوسره د قانون جوړولوڅارنې او دخلکو د استازيتوب په برخو کې دمعلولينو ملاتړې وي.
دغه راز په ولسي جرګه کې دخلکواستازى سيدحسين عالمي بلخي د معلولينو د دقيقې احصاييې او تفکيک نه شتون په افغاني ټولنه کې ستره ستونزه وبلله او معلولينو ته دخدمتونو د وړاندې کولو په وړاندې دحکومتي مسوولينو په کمې پاملرنې باندې يې انتقاد وکړ او زياته يې کړه چې د معلولينو دحقوقو  اوامتيازونو قانون چې په هغه کې د هيواد د پارلمان له خوا د معلولينو مياشتنى حقوق پنځه زره افغاني تصويب شوى دى، خو تراوسه پورې د هيواد جمهور رييس له خوا دغه قانون نه دې توشيح شوى اوڅرگنده يې کړه:
که چيرې ددغه قانون انفاذ همدغه شان وځنډول شي، ولسي جرګه به دهغه د نافذولو په مقصدله خپلو قانوني واکونو څخه کار واخلي.
وروسته نفيسې سلطاني د مشرانوجرګې دمعلولينو د چارو دکميسيون په استازيتوب  د خبرو په ترڅ کې دمعلولينو د نړيوال کنوانسيون په تطبيق باندې  چې افغانستان له هغه سره الحاق شوى دى؛ ټينګار وکړ او له اړوندو مراجعو څخه يې وغوښتل چې په دې اړوند دې  جدي هلې ځلې وکړي .
دغه راز دافغاني سرې مياشتې د ټولنې رييسې او د دغو وزارتونو معينانو  د معلولينو د ستونزو د څيړنې په باب دخپلو کړو وړو په اړوند خبرې وکړې او غونډه  په اوو فقرو کې د يو پريکړه ليک په صادرولوسره  پاى ته ورسيده چې په هغه کې  د معلولينو له استازوسره د جمهور رييس دکتنې د زمينې د برابرولو، معلولينو ته  د ١٣٩٢ کال په پرمختيايي اوعادي بودجه کې له زياتوالې سره دملي شورا دملاتړ، د معلولينو د اساسي ستونزو د اورېدو په لاره کې د وزيرانو شورا په يوه غونډه کې  دملي شورا په دواړو مجلسونوکې دمعلولينو داستازو په ګډون، د معلولينو  د واکمنو استازو د برخې اخيستنې ، په ټولنه کې معلول قشرته د درناوى د فرهنګ  د رواجوولو، د معلولينو د نړيوال کنوانسيون دعملي تطبيق چې افغانستان  ورسره الحاق شوى دى او هغو ته دکار د زمينې د برابرولو يادونه شوې ده او هم د رسنيو له مسوولينو څخه وغوښتل شول چې د معلولينو ستونزې دې دخپلو خپرونو په بهيرکې په دايمي ډول منعکسې کړي.