17 November 2019

RSS Facebook

سوداگریز


تازه خبرونه

هره اداره دې خپلې دندې سرته ورسوي

هره اداره دې خپلې دندې سرته ورسوي

کابل/ د لړم ۲۵ مه/ باختر افغانانو تمه درلوده چې د...

جمهورريیس غني د چین د نوي استوګن سفیر باورلیک ومانه

جمهورريیس غني د چین د نوي استوګن سفیر باورلیک ومانه

کابل/دلړم۲۵مه/باختر د افغانستان د اسلامي جمهوریت جمهورريیس محمد اشرف غني نن...

دزابل په امنیت کې ښه والی راځي

دزابل په امنیت کې ښه والی راځي

کابل/دلړم۲۵مه/باختر د زابل د ولایتي ادارې چارواکي وايي چې په دغه...

Youtube Player

khantry design

سوداگریز

سوداگریز

فرهنگی

 کابل/ د تلې ١٨ مه/ باختر
د افغانستان د اسلامي جمهوریت جمهورريیس محمد اشرف غني نن له غرمې مخکې د سولې لپاره د هنر ګالرۍ په مراسمو کې چې په چهار چنار ماڼۍ کې جوړ شوي وو، ګډون او وینا وکړه.
د جمهوررييس د وياند دفتر باختر آژانس ته خبر ورکړ:
جمهورريیس نوښتګر انسان د دولت او مدني ټولنې د تشبث نښلوونکې کړۍ وبلله او له خالد دیاني او زهرا دیاني څخه یې د نوښتګرو په توګه مننه وکړه چې د خصوصي سکتور ساحه کې یې په رضاکارانه مدني فعالیتونو او په دولت کې په فعالې ونډې سره تشبث سره یو ځای کړل .
جمهورريیس هیله څرګنده کړه چې هېڅ افغان ځان له یوې ساحې پورې محدود نه کړي، بلکې څو بعدي فکر وکړي.
هغه زیاته کړه: تاوتریخوالي موږ احاطه کړو، خو د افغان فکر هېڅ وخت د تاوتريخوالي تابع نشو.
هغه زیاته کړه: نن د فضا د هغه  بدلون لیدو ته راټول شوي یوو چې هنر په کې د جنګ او تاوتریخوالي پر وړاندې ولاړ دی او دا پیغام ورکوي چې جنګ نه، بلکې تلپاتې سوله د حل لاره ده او په دې برخه کې موږ ابتکاري فکر ته اړتیا لرو.
د هېواد جمهورريیس وویل: وهل شوې لارې نتیجه نه ورکوي، هغه لاره انتخاب کړئ چې نورو نه ده انتخاب کړې. ابتکاري لاره خطر لري، خو په عین حال کې یې پایلې په مراتبو زیاتې دي. هیله ده چې ستاسو نسل د سولې په برخه کې نوښتګر نسل اوسئ.
محمد اشرف غني وویل: مسوول وطندار خپله دنده دولت، خصوصي سکتور او مدني ټولنې ته نه انتقالوي، بلکې ځان مسوول ګڼي او خپل شهروندي حقونه جدي نیسي. د شاهي او دیکتاتوري رژیمونو برعکس د جمهوریت او اساسي قانون مالکیت د خلکو دی او د افغانستان د اسلامي جمهوریت لومړۍ درجه مالکیت د افغانستان د مسوولو شهروندانو دی.
د ملي تدارکاتو ادارې عمومي ريیس الهام عمر هوتکي خصوصي سکتور، ملي تدارکاتو او د دوی د کارکوونکو د لاسته راوړنو د ملاتړ له امله د جمهورريیس مننه وکړه.
هغه وویل: د جمهورريیس په پاملرنه چې له هېواد څخه د جنګ د پاتې شونو او کباړ مخه ونیول شوه، نو له برکته یې څو فابریکې جوړې او داخلي تولیداتو ته ۲۵ سلنه ارزښت ورکول کېږي. 
نوموړي د جنګ له پاتې شونو څخه د ګټې اخیستنې په برخه کې د خالد دیاني د هنر، مهارت او هلو ځلو د ستاینې ترڅنګ په هیواد کې د جنګ پاتې شونو څخه د سولې او جمهوریت دېوال د جوړولو په ګډون په بهر کې د نوموړي د کړنو او هلوځلو یادونه وکړه.
وروسته د جمهورريیس غني په ګډون د کابینې غړو، دولتي اراکینو او د بهرنیو هېوادونو سفیرانو او کورډيپلوماتیک استازو د دلګشا ماڼۍ د ساعت برج ترڅنګ د سولې لپاره د هنر ګالرۍ نندارتون ننداره کړ.
خالد دیاني او زهرا دیاني د مراسمو ګډونوالو ته د ښه راغلاست او د جمهورريیس له پاملرنې څخه په مننې د خپل هنر، کړنو او لاسته راوړنو په اړه معلومات ورکړل او ويې ویل: د جنګ له پاتې شونو څخه د ګټه اخیستنې هنر د لا ځلولو لپاره هلې ځلې کوي او سوله یې یوازینۍ غوښتنه ده.
پاى – ج

-کابل/ د تلې ١٨مه/باختر
د خبريالانو د خونديتوب کمېتې په غونډه کې چې پرون په لوګرکې وشوه؛ د خبريالانو د ستونزو په اړوند خبرې وشوې.
د باختر آژانس د سيمه ييز خبريال د خبرله مخې: په هغې غونډه کې چې په همدې مناسبت جوړه شوه؛ د لوګر والي محمد انورخان اسحاقزي له رسنيو سره د همکارۍ ژمنه وکړه او د رسنيو له مسوولينو څخه يې وغوښتل چې په اوسنيو شرايطوکې دې  ملي ګټې په پام کې ونيسي.
د لوګر د اطلاعاتو او فرهنګ رييس عبدالرحمن تسل له سيمه ئيزو او ملي رسنيوڅخه په هېواد کې د جمهوري رياست انتخاباتو بهير د خبري پوښښ له امله قدرداني وکړه.
د لوګر د آزادو ژورناليستانو ټولنې رييس نورالله ستانکزي د رسنيو او خبريالانو د ستونزو په اړوند خبرې وکړې او زياته يې کړه چې په دغه ولايت کې رسنۍ سره له دې چې د ارزښتناکو پروګرامونو او خبرونو په خپرولوکې خلکو ته ارزښتناکې هڅې کوي؛ خو له اقتصادي ستونزو سره مخ دي.
هغه په لوګرکې له رسنيو سره د همکاريو غوښتنه وکړه.
ختم- سعيده - اکرم

کابل/ دتلې ١٨مه/ باختر
د لومړي ځل لپاره د هرات د «ښکلي ليکونکو ټولنې» يوه ډله استادان د نندارتون د ترسره کولو لپاره ايران ته لاړل.
د هرات ښکلي ليکونکو په ( تجلى خط هرات در تهران) تر عنوان لاندې د نندارتون په جوړولو سره د ښکلي ليکلو په برخه کې خپل هنري ځواکمنتيا نندارې ته وړاندې کړه.
د هرات د ښکلي ليکونکو ټولنې رييس او غړو څه موده مخکې د هرات له والي عبدالقيوم رحيمي سره په کتنه کې د زيات ملاتړ او د دغه سفر د ترسره کولو او د نندارتون د جوړولو لپاره يې د لازمو اسانتياوو غوښتنه کړې وه چې د هرات مشرتابه دغه وړانديز منظور او عملي کړ.
ختم- ج - اکرم

کابل/ دتلې ١٧مه / باختر:
داطلاعاتو ته دلاسرسي  کمېسيون ،اطلاعاتو ته دلاسرسي نړيواله ورځ نن په کابل کې ونمانځله .
دباختراژانس دخبريال دخبرله مخې ؛  په هغې غونډه کې چې په همدې مناسبت  داطلاعاتو اوفرهنګ وزارت دخپرونو دچارو دمعين  فاضل سانچارکي  ددولتي او   خصوصي رسنيزو بنسټونو ديوشمېر مسوولانو او دغه راز ديوشمېر بهرنيو  ميلمنو په  ګډون  د حکومت داطلاعاتو او رسنيو په مرکز کې جوړه شوه  اطلاعاتو ته دلاسرسي  دکمېسيون رييس عين الدين بهادري  ددغه کمېسيون د  جوړولو ، کړنو او فعاليتونو د اړتيا په اړوند معلومات ورکړل  او څرګنده يې کړه  چې دلومړي ځل لپاره   اطلاعاتو  ته دلاسرسي قانون دافغانستان داسلامي جمهوريت د جمهوررييس محمد اشرف غني په واسطه توشيح شو.
بهادري وويل چې اطلاعاتو ته دلاسرسي قانون دمحتوا له نظره په نړيوالې درجه بندۍ کې لومړى مقام خپل  کړى دى  اوپه دې برخه کې  يې  ديوشمېر جګپوړو  دولتي مسوولانوپه تېره بيا د هېواد  له جمهوررييس  او د جمهوري رياست له مرستيال  استاد  سرور دانش څخه مننه وکړه  .
داطلاعاتو اوفرهنګ وزارت دخپرونو دچارو معين فاضل سانچارکي په خبرو کې  ددې ترڅنګ  چې  اطلاعاتو دلاسرسي دنړيوالې ورځې له امله  رسنيزو کارکوونکو او دهېواد خلکو ته مبارکي وويله  زياته يې کړه :  په تېرو  پېنځو کلونو کې دملي يووالي  حکومت په دوران کې اطلاعاتو ته دلاسرسي لپاره دمناسبو زمينو او امکاناتو دبرابرولو ، دخبريالانو دحقوقو ددفاع ، دتاوتريخوالي ددوسيو دڅيړنې ، اواطلاعاتو ته دلاسرسي دتفسير لپاره د ټولو لازمو زمينو دبرابرولو په لاره کې ډير مهم  او اساسي ګامونه اخيستل شوي دي .
هغه اطلاعاتو ته دلاسرسي د قانون توشيح  او دغه راز دحکومت او رسنيو د ګډې کمېټې جوړول دنړۍ په ګوټ ګوټ کې ديو بې بديل بنسټ په توګه وباله .
وروسته په افغانستان کې دملګروملتودسازمان دسرمنشي  دځانګړي استازي مرستيال  توبي لنزر اطلاعاتو ته دلاسرسي په اړوند خبرې وکړې او ويې ويل ؛ چې معلوماتو ته لاسرسى يو بشري حق دى  او د روڼتيا او دموکراسۍ لپاره زمينه برابروي .
هغه دغه راز اطلاعاتو ته دلاسرسي له کمېسيون سره دملګروملتو دسازمان ملاتړ څرګند کړ.
دافغانستان دبشردحقوقو  دخپلواک کمېسيون مرستيال محمد نعيم نظري  او دافغانستان دروڼتيا دبنسټ دسازمان مرستيال  ناصرتيموري هم په ترتيب سره اطلاعاتو ته دلاسرسي دارزښت په باره کې معلومات ورکړل او ويې ويل ؛ چې اطلاعاتو ته دلاسرسي په نشتوالي کې دبيان ازادي بي مفهومه کېږي او نشو کولاى ددموکراسۍ خبرې وکړو.
هغوى ټينکاروکړ چې  اطلاعاتو ته دلاسرسي دخلکو ملکيت دى اوبايد خلک په هغو  لاسرسى ولري.
ددغې غونډې په دويمه برخه کې ،  دخليل جيحون  په چلوونې ، اطلاعاتو ته دلاسرسي کمېسيون دمرستيالې نجيبې مرام ، دنى  يا په افغانستان کې دآزادو رسنيو دملاتړې ادارې اجرايي رييس مجيب خلوتګر، له ژورناليستو ښځو سره د ملاتړ دمرکزمسوولې فريدې نيکزاد او دکرنې ، اوبولګولو او مالدارۍ وزارت  وياند اکبررستمي په  ترتيب سره  اطلاعاتو ته دلاسرسي فرهنګ په پياوړتيا، په اطلاعاتو دلاسرسي ، څيړنيز او دڅيړنيز ژورناليزم ، اطلاعاتو ته دلاسرسي فرهنګ په پياوړتياکې درسنيو درول ،  اطلاعاتو او څيړنيز ژورناليزم ته دلاسرسي ، اطلاعاتو ته دلاسرسي او دفرهنګي چلنجونو او دغه راز  داطلاع رسوني دمسوولو مراجعو درول او مسووليتونو په اړوند  توضيحات ورکړل.
پاى \ ف\ ذ

Page 9 of 482