24 June 2018

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

فرهنگی

کابل \ باختر دغويي دمياشتې ١٦ نيټه :
د افغانستان د ژورنالېستانوشورا نن  د مطبوعاتو د نړيوالې ورځې د نمانځنې په ترڅ  کې د رسنيو يوشمېر کارکوونکي وستايل.
د باخترآژانس دخبريال دخبرله مخې ؛  په هغې غونډه کې چې له همدې امله  دحکومت درسنيو په مرکز کې جوړه شوې وه  لومړى  د ژورناليستانو د شورا   رئيس  حفيظ الله بارکزي خبري وکړې او د ثور د لسمې نېټې خونړۍ پېښې ته  د اشارې په  ترڅ کې  يې څرګنده کړه  چې حکومت  د خبريالانو امنيت او خونديتوب ته ،اطلاعاتو ته د لاسرسي او د رسنيو د کارکوونکو حقوقو ته پاملرنه نه ده کړې .
دغه راز په  دې غونډه کې د ولسي جرګې دشکايتونو د اوريدو دکمېسيون رئيس عبيدالله بارکزي هم خبري وکړې او ويې ويل چې؛ بايد د رسنيو دکارکوونکو  ملاتړ وشي  ځکه هغوى د دقيقې اطلاع رسونې په سنګرونو کې  جنګېږي.
په همدې حال کې  د جمهوري رياست  د وياند مرستيال  دواخان مينه پال بيا وويل چې ؛ حکومت  ځان مکلف بولي څو د بيان د ازادۍ   او د خبريالانو   ساتنه وکړي .
ده  دغه راز وويل چې؛ د هېواد دټولو ولايتونو امنيتي مسوولينو ته لارښوونه شوې ده چې  دګواښونوله څېړنې وروسته  د رسنيو د کارکوونکو د امنيت د تامينولو لپاره اساسي اقدامات ترلاس لاندې ونيسي  .
د غونډې په پاى کې د اړوندو مسوولينو له خوا  په يوشمېر خبريالانو ستاينليکونه ووېشل شول. پاى \ ج  \ذ

غزني  \ باختر دغويي دمياشتې ١٥ نېټه :
په غزني ولايت کې د الوګل  ادبي جشنواره   جوړه شوه .
د باختر آژانس د  خبرله مخې ؛ دغه جشنوار د  غزني ولايت  د اطلاعاتو او فرهنګ رياست ،د ښاروالۍ رياست ، مدني ټولنو ، ادبي ټولنو، او د شامير ځوانانو  او د ياران فلم د موسسې په هلوځلو  په غزني ښارکې جوړه شوه.
په دې    غونډه کې  د غزني ولايت د اطلاعاتو او فرهنګ ريېس بشيرمحمدي 
ژمنه وکړه  چې؛ د الوګل د ادبي جشنوارې د ثبت رسمي مراسم به رسما د اطلاعاتو اوفرهنګ په وزارت کې ثبت کړي  تر څودغه جشنواره هرکال په پرتمين ډول  ونمانځل شي.
په دې غونډه کې د ولايتي شورا منشي حميدالله  سروري ، د پوهنتون استادانو ،  شاعرانود سولې او د يو بل د منلو د روحيې د پياوړتيا  په خاطر  د الو ګل د فرهنګي مشاعرې او غونډې د  ارزښت په باب   خپل شعرونه واورول.پاى \ ذکرالله \  

 کابل باختر د ثور  ديارلسمه :
دروان کال دثور دمياشتې په لسمه نيټه ددوشنبې په ورځ تروريستانو مخکې له مخکې په يوه طرحه شوي برنامه کې درسنيو په يوشمير کارکوونکو او ملکي وګړو بريد وکړ هغه کسان چې بريد پرې وشو ديوې پيښې دپوښښ لپاره دکابل ښار دشش درک  ساحې ته ورغلي وو .
په دې پيښه کې دفرانسې دخبري اژانس عکاس  شاه مري  فيضي ، دطلوع نيوز تصوير اخستونکى  يار محمد توخي ، ديک تلويزيون دشبکې خبريال غازي رسولي ، ديک تلويزيون دشبکې  تصوير اخستونکى نوروز علي رجبي ، ازادى راډيو خبرياله ميرمن محرم درانۍ ،  دازادۍ راډيو خبريال  عبدالله  حنانزي ،  دمشعل دتلويزيوني شبکې  خبريال سليم تلاش ، دمشعل دتلويزيوني شبکې تصوير اخستونکى  علي سليمي او دزادى راډيو خبيريال سباوون کاکړ ووژل شول اوشپږ تنه نور خبريالان او تصوير اخستونکي ټپيان شول .
  دغه پيښه په خوست ولايت کې دبي بي سي  دخبريال احمد شاه له ترور او په قندهار ولايت کې ديوبل خبريال له وژل کيدو سره جوخته وه .
په افغانستان کې په رسانه يي کارکوونکو بريدونوچې داعش دهغو د مسووليت ادعاکړې ده  يولړغبرګونونه راپارولي دي .
جمهور رييس محمد اشرف غني دغه بريدونه جنګي جنايت بللى دى او ټينګار يې کړى دى  چې په ملکي وګړو  او خبريالانو  بريد نه بخښوونکي جنايت دى .
ده ويلي دي چې دبيان ازادۍ دافغانستان دخلکو او حکومت يوه مهمه لاس ته راوړنه ده  اوپه ټول  توان او قدرت سره به ددغې لاس ته راوړنې اوارزښت دفاع اوساتنه وشي .
اجراييه رييس ډاکتر عبدالله عبدالله هم ددغو بريدونو په غبرګون کې وايي چې دغه شان بريدونه ښيي  چې طالبان او نورې ورته ډلې په ټوليزه توګه دافغانستان له ټولنې سره کينه او دښمني لري په همدې دليل  په هيڅ ډلې او قشر رحم نه کوي .  په افغانستان کې  دملګروملتو دسازمان دمعاونيت دفتر يوناما دغه بريدونه چې دمطبوعاتو دنړيوالې ورځې په درشل کې وشول دبيان په ازادۍ بريدبولي او دعدالت ميز ته ددغه شان پيښو دعاملانو دراکښلو غوښتنه کوي .
په افغانستان کې دميشتو نړيوالو ځواکونو قوماندانۍ ددغې پيښې  په غبرګون کې ويلي دي چې دافغانستان دخلکو تر څنګ ودريږي  او دډار اچوونکو په وړاندې به دافغان امنيتي ځواکونوملاتړ وکړي .
دوى ټينګار کوي چې ډار اچوونکي په خپلو دغه شان  بريدونوسره بريالي کيداى نه شي .
په کابل کې دامريکا سفارت وايي  چې له خطر سره  دمطبوعاتو مخامخ کيدل دبشري حقوقو ترګواښ لاندې نيولو مانا لري  او امريکا له تروريزم  سره دمبارزې په کار کې دافغانستان  دخلکو تر څنګ دريږي .
دبخښنې نړيوال  سازمان دغه پيښه دجنګي جنايت په توګه بللې ده او ددغې پيښې دعاملانو په محاکمه کولو يې ټينګار کړى دى .
دامريکا دبهرنيو چارو وزارت ويلي دي چې دغه شان بريدونه دافغانستان دخلکو دغږ دغلي کولو په موخه ترسره کيږي او ښيي چې دافغانستان دخلکو پرخلاف  دامنيتي ګواښونوکچه هماغه شان له انديښنو ډکه ده او امريکا هماغه شان دافغانستان دخلکو  تر څنګ  پاتې کيږي .
دامريکا دبهرنيو چارو وزير مايک پومپيو ويلي دي چې ددغه جنايت  عاملان دې بايد محاکمه شي .
دملګروملتو دسازمان دمعاونيت  دهيئت دفتر يوناما په کابل ښار کې په ملکي سيمو ځانمرګي بريدونه وغندل .
دافغانستان لپاره دملګروملتو دسازمان دسرمنشي  ځانګړي استازي تداميچي ياماموتو په دې اړوند ويلي دي دغه بريدونه افغان کورنيو ته دزياتو مصيبتونو سبب شوي دي يوناما دغه بريدونه په کلکه غندي .
  دملګروملتو دسازمان سرمنشي  هم تينګار کړى دى چې ددغو پيښو  عاملان دې بايد دقانون منګولو ته وسپارل شي.
دبحرين دبهرنيو چارو وزارت هم ددغو پيښو دعاملانو په مجازاتو ټينګار کړى دى  او هغه يې دبشري جنايت  په توګه بللى دى په کابل کې داروپا داتحاديې سفير هم ددغه جنايت دعاملانو  دمجازاتو غوښتنه کړې ده .
دهند دبهرنيو چارو وزارت له ډار اچووني سره دمبارزې  په کار کې د نړيوالې اجماع  ټينګار کړى دى دغه راز له نړيوالو سازمانونو او هېوادونو څخه يې غوښتي دي چې د ډار اچوونکو د تمويل په سرچينو دې تمرکز ولري .
په افغانستان کې هم سياستوالو ، دبشردحقوقو ددفاع سازمانونو ، مدني فعالانو او دخبريالانو اتحاديو ددغو پيښو دعاملانو د مجازاتو غوښتنه کړې ده
  دازادو خبريالانو ملاتړى بنسټ  ( نى )  وايي چې دغه پيښې دې بايد ديوه بې پرې بنسټ له  خوا دجنګي جنايت په توګه تعقيب شي .
دغه بنسټ وايي چې دافغانستان دولت   ددغه شان پيښو دڅيړنې توان نه لري ضروري ده چې نړيوال بنسټونه  په دغه شان پيښو کې  مداخله وکړي .
په قندهار ، هرات ، غور ، ننګرهار ، بدخشان ،بلخ  او نورو ولايتونوکې هم خبريالانو ويلي دي چې بايد دخبريالانو دکارى مصوونيت لپاره ګټور او اغيزمن  پروګرامونه جوړ شي  او ددغه شان جنايتونو عاملان  دې مجازات شي .
  په همدې حال کې په کابل او دهېواد په ځينو نورو برخوکې يوشمير خبريالان په دې ټينګار  کوي چې يواځې غندنې اومحکوميت کافي نه دي چې بايد ددغه شان جنايت په عاملانو دلاسرسي اومحکمې  ته د هغو دمعرفي کولو لپاره په ملي او نړيواله کچه  قوي ژمنه او همکاري  رامنځته شي تر څو  هغه کسان چې خپلو موخو ته  درسيدو لاره تحجر او بربريت بولي په دې قانع کړى شي چې دعدالت لاس به دنړۍ په هر ګوټ کې ددوى  ګريوان ونيسي .
  ختم_  ف _ اکرم

-کابل باختر د ثور  ديارلسمه :
دهېواد اجراييه رييس  ډاکتر عبدالله عبدالله دمطبوعاتو دنړيوالې ورځې دنمانځنې  په غونډه کې وويل که چيرې دافغانستان ټول خلک په يو والي سره دښمن رد او ونه غندي ، دښمن دجنايت لپاره زيات مجال پيداکوي .
دباختراژانس دخبريال دخبرله مخې، دغه غونډه داجراييه ريس ډاکتر عبدالله عبدالله ،داطلاعاتو اوفرهنګ وزارت دسرپرست پوهاند محمد رسول باوري ، ددغه وزارت دمعينيانو اوسلاکار، جګپوړو دولتي چارواکو ، دبېلابېلورسينو  دمسوولانو  او استازو او دبهرنيو ميلمنو په ګډون جوړه شوه .
دهېواد اجراييه رييس ډاکتر عبدالله عبدالله ددې تر څنګ چې په کابل ، قندهار  او خوست کې دوروستيو  پيښو له امله دخبريالانو دشهادت ، او دکابل په پيښه کې زموږ دنورو هېوادوالو دشهادت له امله دهغوى کورنيو ته د ډاد ګيرنې مراتب څرګند کړل ، ويې ويل  دخبريالانو شهادت دافغانستان خلکو ته دخبر رسولو او دبيان دازادۍ او په اطلاعاتو دلاسرسي په برخه کې دافغانستان دخلکو دحقوقو دساتنې لپاره دخبر رسولو دائتلاف  په لومړى  ليکه کې دې ټولو هېوادوالو ته سخت تمام شو .
اجراييه رييس  زياته کړه هغه جنايت چې ترسره  شو دپرله پسې  جنايت دوام او په نتيجه کې  يې يو داسې ظلم  دى چې دافغانستان په خلکو ترسره شو او تروريزم  په هرنامه چې وي دافغانستان په خلکو  بريد کوي او دجنايت مرتکب کيږي  دهغو ترمنځ کوم  توپير  شتون نه لري .
ده زياته کړه چې تروريستان په هغه ځاى  بريد کوي چې دافغانستان دخلکو او رسانه يي  ټولنې ډير مهم او عصري محور اولاس ته راوړنه  ده او کله چې تاسو دمصيبت او تراژيدي  په وخت کې په پوره  ميړانې سره دجنايت پرځاى کې دافغانستان دخلکو دښمنانو ته پيغام  وليږه  چې جنايت ددې سبب نه کيږي چې دافغانستان دخلکو غږ غلى کړى شي .
ډاکتر عبدالله عبدالله په داسې حال کې چې درسنيو دکارکوونکو او خبريالانو دميړانې او اتلوالى له امله قدرداني وکړه  ټينګار وکړ چې دحکومت او درسنيو دګډې کميټې په غونډه کې داوسني حالت دڅيړنې او درسنيو دکارکوونکو اوخبريالانو دامنيت په تامينولو کې د رسنيو کارکوونکو او دخبريالۍ  ټولنې ته د ډاډ دورکولو او نورومواردو په اړوند خبرې وشوې او دملي يو والي دحکومت  مشرتابه نور طرحه شوي  موارد ومنل او  که دخداى رضا وي عملي اقدامات به وشي .
اجراييه رييس څرګنده کړه که چيرې  ديو موټي  افغانستان ټول خلک دښمن رد او ونه غندي،  دښمن دجنايت لپاره زيات مجال پيداکوي .
دغه راز داطلاعاتو اوفرهنګ وزارت سرپرست  پوهاند محمد درسول باوري په خبرو کې دکابل ، قندهار او خوست دوروستيو  پيښو  دشهيدانو درناوى وکړ او دخپلې غمشريکي او همدردى  مراتب يې دهغوى کورنيو ته  څرګند کړل .
ده زياته کړه په وروستيو ورځو کې موږ خپل يوشمير مخکښ خبريالان له لاسه ورکړل چې دهغوى اتلوالى او دوينې  هرڅاڅکې  موږ  ته الهام راکوي چې دژوندانه تګلورى بايد دروښنايي پرمختګ او انکشاف په لور برابر کړى شي .  باوري وويل چې زموږ دټولو هيله پرمختګ او ترقي ده او دتورتم دله منځه وړلو په خاطر له ټولو څخه ښه وسيله درسنيو همکاران دي .
داطلاعاتو اوفرهنګ وزارت سرپرست  څرګنده کړه چې موږ داساسي قانون له حکم  او دملي يو والي دحکومت دمشرتابه له ټينګار سره سم مکلف يو چې دبيان دازادى دودې لپاره لاښه شرايط برابر کړو او دمطبوعاتو ملاتړ وکړو .
ددغې غونډې په بهير کې دافغانستان داسلامي جمهوريت دجمهور رييس محمد اشرف غني پيغام دجمهوري رياست دوياند دمرستيال سيد شاه حسين مرتضوي  په واسطه ولوستل شو چې په يوه برخه  کې  يې ويل شوي دي .
دوروستۍ يوې اوونۍ په بهير کې دازادۍ  دښمنانو په کابل ، قندهار  او خوست  کې  په خبريالانو په بريد سره  دبيان له ازادۍ او درسنيو له ازاد فعاليت سره خپله دښمني  په ډاګه کړه .
جنايتکارو تروريستانو دبيان په ازادۍ  ، خبريالانو ، دانتخاباتو دبهير په شان په دموکراتيکو بهيرونو او دغه راز په ديني او روزنيزو مرکزونو په بريد سره په بشري ضد جنايتونولاس  پورې کړ چې دبشريت پرخلاف دجنايت څرګند او ستر مصداق دى .
تروريستو جنايتکارانو  په خپل وروستي بريد سره  وښودله چې په هيڅ انساني اواسلامي اصولو او معيار باور نه لري او په بې رحمى  سره دخلکو وژل  دهغو په اساسي موخو بدل شوي دي
دمطبوعاتو دازادۍ نړيواله ورځ په داسې حال کې نمانځو چې حکومتي چارواکي ، او دهېواد درسانه يي ټولنې کارکوونکي اوخلک دشهيدو خبريالانو په ماتم کې ناست دي .  په پيغام کې ويل شوي دي
دخبريالانو دمصوونيت دکميټې استازي  صديق  الله توحيدي هم په خپلو خبرو کې  دهغو خبريالانو  چې په کابل ، قندهار او خوست کې دوروستيو  پيښو  له امله  شهيدان شوي دي درناوى وکړ او دشهيدانو کورنيو  ته په پاملرنې  ، دتپيانو په درملنې او دغه راز دخبريالانو او رسنيو دامنيت اومصوونيت په تامينولو باندې ټينګار وکړ .
ده ددې تر څنګ چې دامنيتي ځواکونو دنه اغيزمنتوب له امله په حکومت نيوکې وکړې ،څرګنده کړه  چې حکومت زموږ په وړاندې مسوول   دى خو دادې مانانه لري چې دښمنان فکر وکړي چې خپلوموخو ته رسيدلي دي
موږ په حکومت نيوکې کوو خو دا داعش ، طالبانو او تروريستانو ته لاس ته راوړنه نه ده هغوى موږ دښمن او مرتد بولي موږ هم دبې پريتوب او انصاف په رعايتولو سره هغوى دښمن بولو .
توحيدي زياته کړه چې دقانون دمجري اودهېوادوالو دمصوونيت دتضمينوونکي ، دشهيدانوله کورنيو سره دمرستې دمکلف په توګه دافغانستان له حکومت څخه زموږ هيله او غوښتنه د ټپيانو درملنه او هغو خبريالانو دامنيت تامينول دي چې درپوټ ورکولو په خاطر دجګړې ساحې ته ځي اوموږ په دې لاره کې دحکومت عملي او چټکو اقداماتو ته سترګې پرلاره يو .
دغه راز په دې غونډه کې په کابل کې ديونسکو استازي هم ددغه سازمان پيغام ولوست او ويې ويل  چې ديونسکو  لوى رييس په افغانستان کې دتروريستانو وروستي بريدونه  چې دکابل ، قندهار ، او خوست په ولايتونوکې ديوشمير ژورناليستانو او دغه راز دګڼ شمير خلکو دمرګ ژوبلې سبب شوي دي غندي .
ده څرګنده کړه چې يونسکو دژورناليستانو دملاتړ او دهغوى د مصوونيت په لاره کې کارکوي اويوځل بيا په افغانستان کې دبيان له ازادى سره خپل ملاتړ اعلاموي .
  دغه راز ددغې غونډې په پاى کې دمولانا عبدالله ، داطﻻعاتو اوفرهنګ وزارت دخپرونو دچارو معين فاضل سانچارکي ، ديک ټلويزيون دمسوول عبدالله خنجاني ، دکابل نيوز ټلويزيون دمسوول ځواک او دژورناليستو ښځو دملاتړ دټولنې درييسې  شفيقې حبيبي په چلونه دخبريالانو او رسنيو دامنيت او مصوونيت دتامينولو په اړوند  خبرې  وشوې او يولړ نظريې  طرحې او پيشنهادونه وړاندې شول .     ختم_ ف _ اکرم

Page 10 of 376