17 January 2020

RSS Facebook

سوداگریز


تازه خبرونه

د سولې لپاره د ځوانانو ناسته» وشوه

د سولې لپاره د ځوانانو ناسته» وشوه

کابل /دمرغومي ٢٧مه /باختر د سولې لپاره د ځوانانو ناسته...

عبدالسلام رحیمي: د افغانستان خلک اوربند غواړي

عبدالسلام رحیمي: د افغانستان خلک اوربند غواړي

-کابل /دمرغومي ٢٧مه /باختر د سولې په چارو کې د...

Youtube Player

khantry design

سوداگریز

سوداگریز

فرهنگی

کابل/ د ليندۍ ٤مه/باختر
د اطلاعاتو او فرهنګ وزارت، د ښځو پرخلاف د تاوتريخوالي د له منځه وړلو ١٦ ورځنى کمپاين د " راځئ د متقابل درناوي فرهنګ د ښځو پرخلاف تاوتريخوالي ځاى ناستى کړو" په شعار سره نن د حکومت د رسنيو په مرکزکې په يوه غونډه کې پرانيست.
د باختر آژانس د خبرله مخې: په غونډه کې د اطلاعاتو او فرهنګ وزارت سرپرستې حسينې ساپۍ په دغه ١٦ ورځنى کمپاين کې د دغه وزارت د پروګرامونو خبر ورکړ        او ويې ويل: هر کال د ښځو پرخلاف د تاوتريخوالي د بندولو ١٦ ورځنى کمپاين په بېلابېلو دولتي او غير دولتي ارګانونو او بنسټونوکې ترسره کېږي او په دې اړوند د ښځو پر وړاندې د تاوتريخوالي د کمښت لپاره بېلابېل پروګرامونه طرحه او تطبيقېږي.
حسينې ساپۍ زياته کړه: تېر کال د تاوتريخوالي د بندولو او کمښت لپاره د اطلاعاتو او فرهنګ وزارت په منظم ډول زيات پروګرامونه عملي کړي دي.
د حسينې ساپۍ د څرګندونو مخې، د اطلاعاتو او فرهنګ وزارت دغه پروګرامونه، په دوه (کورني او بهرني) برخو کې شاملېږي.
ساپۍ زياته کړه چې له بهرنۍ برخې څخه موخه هغه ښځې دي چې په خصوصي برخه کې کار کوي او خپلې ستونزې يې تل د وزارت له مشرتابه سره شريکې کړې دي او د وزارت مشرتابه له اړوندو بنسټونو سره په تفاهم کې له ښځو سره يوځاى د هغوى ستونزې حل کړې دي.
د اطلاعاتو او فرهنګ وزارت سرپرستي زياته کړه چې په بهرنۍ برخه کې د هېواد د خپلواکۍ د سلمې کاليزې د نمانځلو په لړکې د اطلاعاتو او فرهنګ وزارت د روان کال د وږي په ٢٤مه (په وروستيو١٠٠ کلونوکې د افغان ښځو د حالت تحليل) په نامه  يو ورځنى سيمينار جوړ کړ.
هغې زياته کړه چې په سيمينارکې مخکښو ښځو، جګپوړو دولتي مسوولينو، په افغانستان کې د بهرنيو هېوادونو استازو، فرهنګيانو، ليکوالانو، علمي شخصيتونو او د مدني ټولنې فعالانو ګډون لاره.
په سيمينار کې په بېلابېلو برخوکې د ښځو د کارنامو په اړوند پرېکړه ليک تصويب شو چې په کې دغه مسايل ځاى کړاى شوي دي: د هېواد د تاريخ د نومياليو ښځو د کارنامو تحقيق، په اطلاعاتو او فرهنګ وزارت کې د آرشيف جوړول، د واټونو، څلورلارو او نورو ساحو د نومولو په وخت کې د نومياليو ښځو د نومونو په پام کې نيول او همدارنګه د دولتي مډالونو او نښانونو جوړول، د فرهنګي کور جوړول، د ښځو د ځانګړې ورځپاڼې تاسيس او د ښځو د مخصوصې ګالرۍ جوړول او داسې نور.
د اطلاعاتو او فرهنګ وزارت سرپرستې وويل چې د دغه پرېکړه ليک تطبيق به په راتلوونکي کال کې د دغه وزارت له لومړيتوبونو څخه وي.
د اطلاعاتو او فرهنګ وزارت مالي، اداري او د ګرځندوى معينې پوهنيارې سېدې مژګان مصطفوي په کورنۍ برخه کې د وزارت د دندو په اړه خبرې وکړې او ويې ويل: د اطلاعاتو او فرهنګ وزارت د دندو د لايحو له مخې، د پوهاوي ورکولو لپاره د باختر آژانس او ورځپاڼو له لارې د خبرونو په راټولولو، توليد او تکثير اقدام کړى او په روان کال کې يې د ښځو د ملاتړ طرزالعمل چمتو کړى دى چې په هغه کې د ښځو د ملاتړ په موخه د کمېټو او کمېسيونونو مسووليتونه او دندې مشخصې شوې دي. دغه راز د ښځو د ملاتړ په اړوند يې ټول نړيوال کنوانسيونونه په پام کې نيولي دي.
د غونډې پرېکړه ليک محبوبې بابکرخېل ولوست.
غونډه د پوښتنو په طرحه کولو او د ځوابونو په وړاندې کولو سره پاى ته ورسېده.
پاى \ ج\ ذ

کابل/ دليندۍ ٣مه/ باختر
د اطلاعاتو او فرهنګ وزارت سرپرستې حسينې ساپۍ پرون د دغه وزارت د فرهنګي برخې له مسوولينو سره په ناسته کې په هېواد کې د تاريخي آبداتو د ساتنې لپاره د پروژو پر تطبيق ټينګار وکړ.
په ناسته کې په داسې حال کې چې د اطلاعاتو او فرهنګ وزارت د فرهنګ او هنر معين پوهاند محمد رسول باوري هم ګډون لاره؛ د تاريخي آبداتو د ترميم او ساتنې رييس ډيپلوم مهندس عبدالاحد عباسي د غور، باميانو او لغمان د تاريخي آبداتو د وضعيت او د تاريخي آبداتو د ترميم او ساتنې لپاره د موجودو ستونزو په اړه رپوټ وړاندې کړ.
دغه راز د اطلاعاتو او فرهنګ وزارت د فرهنګ او هنر معين او د تاريخي آبداتو د ترميم او ساتنې رييس د موجودو ستونزو د لرې کولو او د هېواد د تاريخي آبداتو په اړوند د جمهور رييس د لارښوونو د تطبيق لپاره خپل مسلکي پيشنهادونه او نظريې  وړاندې کړې.
حسينې ساپۍ په يادو ولايتونوکې د تاريخي آبداتو په برخه کې د پروژو پر ډېر ژر  تطبيق او د موجودو ستونزو پر څېړنې ټينګار وکړ.
پاى/شکريه/اکرم

 کابل/ د لړم ٣٠ مه/ باختر
د لوګر د اطلاعاتو او فرهنګ رياست موزيم ته د لرغونو لوښو، لاسي صنايعو او تاريخي او فرهنګي آثارو د راټولولو بهير دوام لري.
د باختر آژانس خبريال د خبرله مخې: د لوګر په اطلاعاتو او فرهنګ رياست کې يو ابتدايي موزيم شته چې په کې څه دپاسه ١٠٠ قلمه لرغونې لوښې او لاسي صنايع دي چې خلکو دغه موزيم ته سپارلي دي.
د لوګر د اطلاعاتو او فرهنګ رييس عبدالرحمن تسل وايي چې د عينکو د مسو کان په ګډون د لرغونو ساحو شتون او نور ګران بيه آثار د دې ښکارندوى دى چې لوګر له  هغو ولايتونو څخه دى چې دفرهنګ او تمدن او د لوګر د لرغونو او تاريخي آثارو د لرلو په برخه کې په لوړو پوړيوکې دى.
تسل زياته کړه چې د لوګر د موزيم مسوولين دغه آثار په مسلکي ډول ساتي او په رسمي وخت کې موزيم د کتوونکو پرمخ پرانيستى دى.
هغه د لوګر له خلکو څخه وغوښتل چې د تاريخي هويت او د فرهنګي ميراثونو د تثبيت لپاره خپل لرغوني آثار او لاسي صنايع دغه موزيم ته وسپاري.
له بله پلوه د لوګر خلکو هم د اصيل افغاني او اسلامي فرهنګ د ساتنې  او د تاريخي آثارو د ساتنې په موخه او ددغه موزيم د بډاينې لپاره د اطلاعاتو اوفرهنګ  له رياست سره دهمکارۍ ژمنه کړې ده.
هغه زياته کړه چې اوس د لوګر په محمدآغې ولسوالۍ کې د يوسيمه ييز موزيم د ودانۍ د جوړولو کار هم دوام لري.
تسل زياته کړه چې د يو ملت تاريخ هغه وخت ژوند ساتل کېږي چې راتلوونکو نسلونو ته تاريخي آثار او فرهنګي ميراثونه پرېږدي.
پاى \ ج\ ذ

 

-کابل/ د لړم ۳۰ مه/ باختر
د میرزاخان انصاري د څلورسوم تلین په مناسبت د علومو اکاډمۍ علمي – څېړنیز سیمینار ته د اطلاعاتو او فرهنګ وزارت پیغام
افغانستان د خپل تاریخ له ډېر حساس او خورا پېچلي پړاوه تېرېږي. په هره برخه کې ګڼې ستونزې او ناخوالې تر سترګو کېږي او دا ستونزې او ناخوالې د افغانانو د نظام جوړونې ، اقتصادي، کلتوري او ټولنیز پرمختګ هوډ او یون ټکنی کوي. یوه له دغو ستونزو او ناخوالو زموږ د تېر تاریخ د تجربو، لوړو ژورو او په ځانګړي ډول کلتوري ارزښتونو بابیزه ګڼل او یا هم په بشپړ ډول د هغوی له پامه غورځول دي. په هر ډول سیاسي او ټولنیزو بدلونونو کې باید د تاریخي تسلسل اصل له پامه ونه لوېږي. له دې پرته، د نسلونو تر منځ اړیکې شلېږي، د ارزښتونو تشه رامنځ ته کېږي او نوی نسل د نړیوالتیا په اوسنیو شرایطو کې خپله لاره ورکوي او د ارزښتونو او ان هویت په لټه کې سرګردانه کېږي.
دا د افغانستان د ټولو پوهانو، څېړونکو، فرهنګیانو او سیاستوالو دنده او مسوولیت دی چې دغه مهم او برخلیک ټاکونکي  اصل ته کلکه پاملرنه وکړي، د افغانستان د تاریخ نومیالي، سیاسي او ټولنیز خوځښتونه، غورځنګونه او همدارنګه کلتوري ارزښتونه نوي نسل ته وروپېژني. په دې لړ کې، د روښاني غورځنګ، د دغه غورځنګ د نوښتګر اوبنسټګر بایزید روښان او د هغه د پلویانو او لارویانو او همدارنګه له هغوی د راپاتي ستر کلتوري او ادبي میراث هراړخیزه پېژندنه یوه ستره اړتیا ده. د روښانيانو یوه ستره ځانګړنه دا ده چې د دوی غورځنګ د نورو ګڼو حرکتونو په څېر یواړخیزنه و، بلکې ګڼ اړخونه یې لرل: سیاسي، عرفاني، تصوفي، فرهنګي، ادبي او همدارنګه پوځي. دغو ولسونو څلور څلورنیم سوه کاله وړاندې یو منسجم غورځنګ لاره چې د هغه مهال د ټولنې د ټولو برخو لپاره یې منظم هراړخیز پروګرام جوړ کړی و. همدغې بې سارې ځانګړتیا روښاني غورځنګ ته د افغان ولس په سیاسي او فرهنګي تاریخ کې ځانګړی ځای او مقام ورکړی دی. د هغه له مطالعې او پېژندنې پرته زموږ د ولسونو تاریخي او کلتوري تسلسل شلېږي او نیمګړی پاتې کېږي. د روښاني غورځنګ او د بایزید روښان د افکارو او باورونو د پېژندنې لپاره د مېرزاخان انصاري پېژندنه ضروري ده.  د دولت لواڼي په وینا (میا روښان د  پوهې ښهر، دی یې ورو).  مېرزا خان انصاري د روښاني غورځنګ یو بې جوړې مبلغ او د دولت خان لواڼي په وینا د خپل  وخت تر ټولو ښه شاعر و. د ده د افکارو او باورونو، فلسفي او عرفاني نظریاتو پېژندنه د روښانیانو په  هراړخیزه پېژندنه کې مرسته کوي.
د  ویاړ ځای دی چې د علومو آکاډمۍ د مېرزاخان انصاري د څلورسوم تلین په مناسبت دغه علمي – څېړنیز سیمینار رابللی دی. له شک پرته پوهان او د نظرخاوندان به په دغه سیمینار کې د مېرزاخان انصاري د ژوند او د هغه د فلسفي او عرفاني افکارو په اړه نوې موندنې وړاندې کړي او د روښانیانو د دغه ستر او ژمن استازي په اړه به ډېر هغه څه، چې لا  تیاره  پاتې دي، راڅرګند او رڼا کړي.
د اطلاعاتو او فرهنګ وزارت د علومو اکاډمۍ مشرتابه او غړیو ته د دغه سیمینار د جوړولو مبارکي وایي او د سیمینار ګډونوالو ته د علمي بریاوو هیله کوي.
پاى/ذ