22 January 2020

RSS Facebook

سوداگریز


تازه خبرونه

د ملي موزيم د نوې ودانۍ د ډيزاين د پرمختيا قرارداد لاسليک شو

کابل/ دسلواغې لومړۍ/ باختر د اطلاعاتو او فرهنګ وزارت د سرپرستې...

د ټوليزو رسنيو دپاليسۍ د مسودې په اړوند د نظرغوښتنې، مشورتي غونډه جوړه شوه

کابل/ دسلواغې لومړۍ/ باختر د اطلاعاتو او فرهنګ وزارت د سرپرستې...

د فارياب د کوهستاناتو مواصلاتي لاره پرانيستل کېږي

د فارياب د کوهستاناتو مواصلاتي لاره پرانيستل کېږي

کابل/ دسلواغې لومړۍ/ باختر د فارياب له مرکز سره د کوهستاناتو...

Youtube Player

khantry design

سوداگریز

سوداگریز

کابل/ دسلواغې لومړۍ/ باختر
د اطلاعاتو او فرهنګ وزارت د سرپرستې حسينې ساپۍ په شتون، نن د ملي موزيم د نوې ودانۍ د ډيزاين د پرمختيا قرارداد د ښار جوړولو او ځمکو وزارت سرپرست محمد جواد پيکان او د مهندسۍ شرکت AV62 رييس لاسليک کړ.
د باختر آژانس خبريال د خبرله مخې: د دغه قرارداد د لاسليک کولو په مراسموکې په داسې حال کې چې د جمهوري رياست ستر سلاکار او د کابل پوهنتون رييس حميد الله فاروقي، په کابل کې د اسپانيا سفير، د دارالامان د اداري کمپلکس پروګرام رييس ډاکټرشکيب رفعي او يوشمېر مسوولينو هم ګډون لاره؛ لومړى د مهندسۍ شرکت AV62 رييس د ملي موزيم د نوې ودانۍ د ډيزاين د پرمختيا په اړه معلومات ورکړل  او د کار د ښه اجرا په خاطر يې د دغه شرکت د هڅو او هاند ډاډ ورکړ.
وروسته د اطلاعاتو او فرهنګ وزارت سرپرستې حسينې ساپۍ په خپلو خبروکې د دې پروژې د تدارکاتي کار د ترسره کولو په خاطر د ښار جوړولو او ځمکو له وزارت څخه مننه وکړه او ټينګار يې وکړ چې بايد د ملي موزيم د نوې ودانۍ د ډيزاين د کار هر پړاو د ملي موزيم له مسوولينو سره په همغږۍ کې پرمخ يوړل شي.
دغه راز  د ملي موزيم رييس  محمد فهيم رحيمي وويل: ټاکل شوې ده د ملي موزيم د نوې ودانۍ د ډيزاين پرمختيا په راتلونکو اتو مياشتوکې پاى ته ورسېږي او وروسته به  د ملي موزيم د نوې ودانۍ د جوړولو کار پيل شي.
ختم-ف – اکرم

کابل/ دسلواغې لومړۍ/ باختر
د اطلاعاتو او فرهنګ وزارت د سرپرستې حسينې ساپۍ په شتون نن د ټوليزو رسنيو د پاليسۍ د مسودې په اړوند د نظرغوښتنې، مشورتي غونډه جوړه شوه.
د باختر آژانس خبريال د خبرله مخې: په دې غونډه کې چې د بېلابيلو رسنيزو بنسټونو د يوشمېر مسوولينو او استازو، د نظرخاوندانو او د رسنيو د کارکوونکو په شتون  جوړه شوه؛ برخه والو د ټوليزو رسنيو د پاليسۍ د مسودې په اړه خپلې نظريې او وړانديزونه بيان کړل.
په غونډه کې د اطلاعاتو او فرهنګ وزارت سرپرستې حسينې ساپۍ د بېلابېلو  رسنيزو بنسټونو د مسوولينو له شتون او د ټوليزو رسنيو د پاليسۍ د مسودې په اړوند  د نظريو او وړانديزونو له وړاندې کولو څخه په  مننې سره، څرګنده کړه چې د هغوى نظريې او وړانديزونه به د ټوليزو رسنيو په پاليسۍ کې ځاى کړى شي.
حسينې ساپۍ ټينګار وکړچې دغه نظريې او وړانديزونه په ليکلي ډول هم بايد د اطلاعاتو او فرهنګ وزارت او د رسنيو عالي شورا ته ولېږل شي.
دغه راز د اطلاعاتو او فرهنګ وزارت سرپرستې د رسنيو د عالي شورا د واکونو او کړو وړو په اړوند معلومات ورکړل او ويې ويل چې له دوو کلونو څخه په لنډه موده کې دغې شورا څه دپاسه ٣٧غونډې جوړې کړې دي چې فوق العاده غونډې هم پکې شاملې دي. په همدې ترتيب د رسنيو د دغې عالي شورا د غړو له کړنو او هڅو څخه چې د بېلابېلو بنسټونو استازي پکې شامل دي، هم قدرداني وکړه.
په غونډه کې د اطلاعاتو او فرهنګ وزارت ستر حقوقي سلاکار دلاور نذير زوى د ټوليزو رسنيو د پاليسۍ د طرحې په اړه معلومات ورکړل او ويې ويل چې د دغې پاليسۍ مسوده په لسو برخو کې د اطلاعاتو او فرهنګ وزارت او د رسنيو عالي شورا برابره کړې ده چې عموميات، د ټوليزو رسنيو فعاليت، د ټوليزو رسنيو مالي او عايداتي سرچينې، د ژورناليزم د مسلکي معيارونو رعايتول، نشراتي محتوا،  د انتخاباتو د بهير پوښښ، ډول ډول مطالب، د اعلانونو خپرول او چاپول، د ژورناليستانو او رسانه يي کارکوونکو ملاتړ او متفرقه مواد پکې شامل دي.
وروسته فريدې نېکزاد د افغانستان د ژورناليستانو فدراسيون په استازيتوب خبرې وکړې او ويې ويل چې د فدراسيون د ټوليزو رسنيو د پاليسۍ په اړوند خه دپاسه ٢٠ نظريې او وړانديزونه په ليکلي ډول د رسنيو عالي شورا ته وړاندې کوي چې د ټوليزو رسنيو په پاليسۍ کې په پام کې ونيول شي.
وروسته د دې غونډې برخه وال په درېيو کاري ډلو ووېشل شول او د ټوليزو رسنيو د پاليسۍ د هرې برخې د مادو په اړه خپلې نظريې او پيشنهادونه وړاندې کړل.
دغه راز د لومړۍ ډلې په استازيتوب خپلواک ساپي، د دويمې ډلې په استازيتوب عبدالقهار جواد او د درېيمې ډلې په استازيتوب هوسۍ  ظهوري د خپلو ډلو نظريې او پيشنهادونه وړاندې کړل.
په همدې ترتيب د حکومت او رسنيو د ګډې کمېتې مرستيال ضيا بوميا هم د ټوليزو رسنيو د پاليسۍ په اړوند يو لړ نظريې او پيشنهادونه وړاندې کړل.
دغه پاليسۍ به له نظرغوښتنې وروسته د ټوليزو رسنيو د عالي شورا له لوري  تصويب شي.
ختم- ف-اکرم


 

کابل/ دسلواغې لومړۍ/ باختر
د فارياب له مرکز سره د کوهستاناتو ولسوالۍ د مواصلاتي لارې د پرانيستلو لپاره هڅې دوام لري.
د باختر آژانس دسيمه ييز خبريال دخبرله مخې: دغه لاره له اورښتونو وروسته له تېرې شپې راپدېخوا د ترافيکو او د خلکو دتګ راتګ پرمخ تړل شوې ده.
د فارياب له طبيعي پېښو سره د مبارزې د همغږۍ د اړيکو مدير وايي چې ددغې مواصلاتي لارې په تړل کېدو سره تراوسه پورې ٣٠٠ کورنۍ زيانمنې شوې دي او دغه راز په پښتونکوټ او ګرزيوان ولسواليوکې هم ٤١ کورنۍ زيانمنې شوې دي او د دغوکورنيو څه دپاسه ٢١ څاروي هم له منځه تللي دي.
يوې اړوندې سرچينې وويل چې د کوهستاناتو ولسوالۍ د مواصلاتي لارې د پرانيستلو لپاره د اړوندو مسوولينو هڅې دوام لري، خو د نورو ولسواليو مواصلاتي لارې تراوسه پرانيستې دي او د واورې اورښت دوام لري.
ختم- عطاالله- اکرم

کابل/ دسلواغې لومړۍ/ باختر
د ٣٥ کيلو ولټ برېښنا په ظرفيت په بلخ کې د ٢٠٩ شاهين قول اردو د برېښنا سب سټېشن نن پرانيستل شو.
د برېښنا دغه سب سټېشن د ٣٥ ميليونو ډالرو په لګښت جوړ شوى دى چې نن د مسوولينو په وړاندې پرانيستل شو.
د٢٠٩شاهين قول اردو د برېښنا سب سټېشن مسوول انجنير سخي سنګر باختر آژانس ته وويل چې د سب سټېشن ددغې قول اردو د برېښنا په تامين سربېره، د بلخ د امنيې قوماندانۍ او د عامه نظم پوليسو او د دغې قوماندانۍ شاوخوا د استتوګنې د ساحو د برېښنا د تمويل ظرفيت هم لري.
د ٢٠٩ شاهين قول اردو چې د مزارشريف ښار د شمال ختيځ په ٢٠ کيلومتري واټ کې موقعيت لري؛ له لسو کلونو وروسته له ٣٥ کيلوولټه سټېشن څخه په ګټې اخيستنې سره له عمومي برېښنا سره ونښلول شوه.
ختم- ف - اکرم

 

کابل/ دسلواغې لومړۍ/ باختر
د اطلاعاتو او فرهنګ وزارت د سرپرستې حسينې ساپۍ په مشرۍ پرون د رسنيزو شکايتونو او سرغړونو د څېړنې کمېسيون غونډه جوړه شوه.
د باختر آژانس خبريال د خبر له مخې: په دې غونډه کې اووه رسنيز شکايتونه او سرغړونې چې يوشمېر دولتي او خصوصي بنسټونو او انفرادي اشخاصو کمېسيون ته لېږلې وې، وڅېړل شوې.
په غونډه کې د شکايتونو او قضيو يوشمېر لورو هم ګډون وکړ او د کمېسيون د غړو پوښتنو ته يې ځواب ووايه.
د کمېسيون غړو له خبرو او څېړنې وروسته د هر مورد په اړوند لازمې پرېکړې وکړې.
ختم- عطاالله -اکرم

 

کابل/ دسلواغې لومړۍ/ باختر
د بدخشان په وردوج ولسوالۍ کې د پوځيانو پر پوستو د وسله والو طالبانو د نن سهار ډله ييز بريد له ماتې سره مخ شو.
د بدخشان د امنيې قوماندانۍ وياند ثناالله روحاني د باختر آژانس خبريال ته وويل چې وسله والو طالبانو له څو استقامتونو څخه د دغه ولايت د وردوج ولوسالۍ د پل سنګاني په مربوطاتوکې د پوځيانو پر پوستو بريدونه وکړل چې له سختې ماتې سره مخ شول.
هغه وويل چې په نښتو کې درې وسله وال طالبان ووژل شول او لسګونه نوريې ټپيان شول او د دښمن څو جنګي وسايل هم د پوځيانو لاس ته ورغلل.
ختم- عطاالله -اکرم

 

کابل/ دسلواغې لومړۍ/ باختر
د پروان پوليسو پنځه وسله وال کسان تېره شپه د غلا په تړاو په دغه ولايت کې ونيول.
د پروان د امنيې قوماندانۍ د مطبوعاتي دفتر مسوول محمد سليم نوري باختر آژانس ته وويل چې د دغه ولايت پوليسو درې تنه د بګرام ولسوالۍ په مربوطاتوکې او دوه تنه نور يې د دغه ولايت د مرکز چاريکارو ښار په مربوطاتو کې د يوه کور دمالونو د لوټولو په وخت کې ونيول.
هغه زياته کړه چې نيول شويو کسانو د لارې په اوږدو کې مسافر وړونکي وسايط  درول او د سپرليو پيسې او مالونه يې له ځان سره وړل او له نيول شويو کسانو څخه دوه تومانچې او يو موټر هم د پوليسو لاس ته ورغلي دي.
ختم- ف - اکرم

 

کابل/ دسلواغې لومړۍ/ باختر
طالبانو نن سهار يو روغتيايي کارکوونکى په پکتيا کې په ډزو سره وواژه.
يرغلګرو پر بخت وزير نن سهار کله چې د فلج ناروغۍ په وړاندې د ماشومانو د واکسين لپاره روان و؛ د آريوب ځاځي ولسوالۍ بازارته څېرمه ډزې وکړې او ووژل شو.
د پکتيا د امنيې قوماندانۍ وياند سردار ولي تبسم باختر آژانس ته ويل چې د طالبانو په ډلې پورې اړوند يرغلګر په دغه روغتيايي کارکوونکي له ډزو وروسته وتښتېدل او د هغوى د موندلو او نيولو لپاره هڅې دوام لري.
طالبانو په وروستيوکې په پکتيا کې د پوليو واکسين د کمپاين د تطبيق په نسبت خبر دارى ورکړى و.
په پکتيا کې يوه سيمه ييزه سرچينه چې ويې نه غوښتل نوم يې واخيستل شي؛ وايي چې طالبان له حکومت څخه داسې غوښتنې لري چې تراوسه په ښکاره نه دي منل شوې.
هغه وويل: طالبان د دوى غوښتنو ته د دولت د نه رسېدګۍ په غبرګون کې غواړي د پوليو واکسين د کمپاين د تطبيق په ګډون د روغتيايي فعاليتونو مخه ونيسي.
تراوسه له دولت څخه د طالبانو غوښتنه په ډاګه شوې نه ده.
په همدې حال کې په پکتيا کې د پوليو واکسين کمپاين هماغه شان دوام لري.
مسوولين په پکتيا کې د پوليو کمپاين د نه تطبيق له احتمال څخه انديښمن دي؛ هغه اقدام چې په زرګونو ماشومان به د فلج ناروغۍ په وړاندې له واکسين څخه بې برخې کړي.
  ختم- عطاالله- اکرم

 

کابل/ دسلواغې لومړۍ/ باختر
طالبانو څلور کسبه کاران پرون مازيګر په سرپل ولايت کې ټپيان کړل.
د سانچارک ولسوال نقيب الله دقيق باختر آژانس ته وويل چې دغه کسان ددغې ولسوالۍ د توپخاني کلي په تګلوري کې د ګنجوا په دو سرکه سيمه کې د دښمن له کمين سره مخ او ټپيان شول.
سرچينې زياته کړه: دغه کسان هغه وخت ټپيان شول چې له خپلو دُکانونو څخه کورونو ته ستنيدل.
ويل کېږي له ټپيانو څخه د دوو تنو حالت خراب دى.
د يوبل خبر له مخې:
د سرپل پوليسو تېره شپه يو تن د سوزمه قلعه ولسوالۍ په تګلوري کې د نشه يي توکو د قاچاقو په اړوند ونيو.
سرچينې زياته کړه چې له نيول شوي سړي څخه يو کيلوګرام ښيښه ډوله نشه يي توکو ترلاسه شوي او د هغه سراچه ډوله موټر هم ضبط شوى دى.
ختم-ف - اکرم

 

کابل/ دسلواغې لومړۍ/ باختر
د " افغاني ټولنې د دودونو د پېژندنې او څېړنې" علمي - څېړنيز سمينار پرون د افغانستان د اسلامي جمهوريت د جمهوررييس محمد اشرف غني د پيغام په لوستلو سره په کابل کې خپل کار پيل کړ.
د باختر آژانس خبريال د خبرله مخې: په دغه سمينارکې چې د افغانستان د علومو اکاډمۍ په اهتمام جوړ شو؛ د هېواد يوشمېر څېړونکو، پوهانو او فرهنګيانو ګډون لاره.
د سمينار برخه والو د افغاني ټولنې د دودونو، عنعناتو او رواجونو بېلابېلې څنډې تحليل او تفسير کړې.
جمهوررييس د سمنيار په نامه خپل پيغام کې د سياسي، ټولنيز او فرهنګي ژوندانه په بېلابېلو برخوکې د افغانستان د خلکو د غوره دودونو اغېزمن بېلابېل اړخونه تحليل او څېړلې دي او د دغه شان ارزښتناک سمينار د جوړولو لپاره يې د افغانستان له علومو اکادمۍ څخه مننه کړې ده.
د افغانستان د علومو اکاډمۍ سرپرست څېړنوال ډاکټر عبدالظاهر شکيب په خپلې پرانيستونکې وينا کې افغانستان يو داسې هېواد وباله چې د ملي او اسلامي ارزښتونو دودونه په هغه کې اغېزمن دي او بايد په ژوره توګه ورته وګورو.
په سمينارکې د چارو ادارې د لوى رياست د مطالعاتو او پاليسۍ رياست د څېړنې ماهر مبارز احمد ځدران د موضوع او سمينار د جوړولو د اهميت په اړوند خبرې وکړې.
وروسته د باختر خبري آژانس رييس نجيب الله شينواري د اطلاعاتو او فرهنګ وزارت د سرپرستې حسينې ساپۍ پيغام ولوست.
د اطلاعاتو او فرهنګ وزارت د سرپرستې په پيغام کې ويل شوي دي: " د افغاني ټولنې فرهنګ د ديني او دوديزو ارزښتونو پر بنسټ تکيه لري او دا دواړه د افغاني فرهنګ محتوا او د دغه هېواد فرهنګي محور او وده جوړوي."
په پيغام کې دغه راز ويل شوي دي چې ديني او دوديزو ارزښتونو په پرانیستي غيږ سره يو بل منلي دي او داسې پيوند يې خوړلى دى چې کله ناکله د هغوى بيلتون ناشونى کوي.
وروسته د قومونو او قبايلو چارو وزارت د مطالعاتو رييس جاوېد وفا د سمينار په نامه د دغه وزارت پيغام ولوست چې په هغه کې په هېوادکې د ټولنيزو او سياسي شخړو په حل کې د جرګو پر اهميت زيات ټينګار شوى دى.
د عدليې وزارت مسلکي معين مولوي محمد قاسم حليمي، د پوهنې وزارت د اسلامي تعليماتو د معينيت سرپرست مولوي محمدعارف ملکيار، دحج او اوقافو وزارت مسلکي معين ډاکټر امين الدين مظفري، د افغانستان د عالمانو شورا غړي مولوي شهزاده شاهد، د عالمانو شورا غړي او د کابل پولي تخنيک پوهنتون استاد مولوي سعيد الرحمن احساس او د ننګرهار دارالمعلمين استاد مولوي محمد ناصر حليمي د سمينار نورو برخه والو د موضوع په اړه په تفصيل خبرې وکړې او پر هغو دودونو او رواجونو يې نيوکې وکړې چې په زياترو مواردوکې يې د افغاني ټولنې د ښځو او نجونو د ژوندانه پر حريم سيورى غوړولى دى.
هغوى د دغه بحث په اړوند اجباري او له وخت څخه مخکې ودونو، په بدو ورکولو او نورو مواردو ته اشاره وکړه او ويې ويل چې دغه ټولې ناخوالې د افغاني ټولنې له ديني ارزښتونو سره اړخ نه لګوي.
د سيمينار په علمي غونډه کې څېړنوال سېد عمر اعزامي، څېړنپوه ډاکټر محمد شريف ځدران، څېړنوال برهان الله  نيازي، څېړنپوه سېد حبيب شاکر، قاري سميع الله  صاحبزاده، څېړنوال محمد آصف احمدزي، څېړنوال عبدالرحمن حامد، څېړنپوه عبدالکريم فضلي، څېړنوال محمد يوسف حازمي، څېړونکي محمد امان رسولي، څېړنپوه نورالحق عزيزي او څېړنوال فريدالله انوري خپلې علمي او څېړنېزې مقالې  غونډې ته وړاندې کړې.
د سمينار کار پر هغو مقالو چې ولوستل شوې؛ له زياتو خبرو وروسته د پرېکړه ليک په صادرولو سره پاى ته ورسېد.
ختم- عطاالله -اکرم

Page 1 of 8475