20 January 2019

RSS Facebook

سوداگریز


تازه خبرونه

د علامه نيک محمد علمي - تحقيقي سيمينار په پروان کې جوړ شو

د علامه نيک محمد علمي - تحقيقي سيمينار په پروان کې جوړ شو

کابل باختر د مرغومي ۲۹ مه د «علامه قاري نيک محمد...

Youtube Player

khantry design

سوداگریز

سوداگریز

کابل باختر د مرغومي ۲۹ مه
د اسلامي ګونډ د يوه جناح مشر ګلبدين حکمتيار نن د انتخاباتو خپلواک کميسيون ته په ورتګ سره د جمهوري رياست په راتلوونکو انتخاباتوکې د نوماند په توګه نوم ليکنه وکړه .
د باختر آژانس د خبر له مخې:
حکمتيار ډاکتر فضل هادي وزين او مفتي حفيظ الرحمن نقي چې د اسلامي  ګوند غړي دي، د خپلو مرستيالانو په توګه معرفي کړل .
د ګلبدين حکمتيار په انتخاباتي ټيم کې د لومړي او دويم معاونيت پست نشته  بلکې دواړه به د جمهوري رياست د مرستيالانو په توګه ياد شي .
حکمتيار له نوم ليکنې وروسته وويل چې د واک په ويشلو باور نه لري او د ايتلافي حکومت جوړول يې د هېواد په زيان بولي او له رياستي څخه  صدارتي ته  د نظام له بدلولو سره خپل مخالفت بيان کړ.
ده دغه راز وويل: که چيرې بريالی شي، په اساسي قانون کې پراخ اصلاحات رامنځته کړي او د دولت شورا به جوړه کړي چې د جمهوري رياست له مرستيالانو څخه به زيات صلاحيت ولري .
حکمتيار په داسې حال کې سياسي ايتلافونه ردوي چې د ده په ګوند پورې تړلو خبرځايونو پخوا ويلي و چې د ديرشو ګوندونو او سياسي بهيرونو په مشارکت سره به  انتخاباتي مبارزې پيل کړي .
ويل شوي دي چې اسلامي ګوند ( د حکمتيار جناح) د جنرال دوستم په مشرۍ له اسلامي غورځنګ او د اسلامي وحدت د ګوند له يوشمېر نورو سره اړيکې نيولې دي، خو نتيجې ته نه دي رسيدلي.
خو بيا هم د ګلبدين حکمتيار انتخاباتي ټيم له نورو انتخاباتي ټيمونو څخه توپير لري او د خپل ګوند د غړو په ترکيب سره انتخاباتي کمپاين پيل کړى دى.
د افغانستان د جمهوري رياست انتخابات د راتلوونکي هجري لمريز کال د چنګاښ د مياشتې په وروستيوکې پلان شوي دي.
  ختم_ج_ اکرم

کابل باختر د مرغومي ۲۹ مه
د افغانستان د هنر د عالي شورا د اووه ګونو کمېټو د رييسانو غونډه نن د اطلاعاتو او فرهنګ وزارت د فرهنګ او هنر د معين پوهاند محمد رسول باوري په مشرۍ  جوړه شوه.
د باختر آژانس د خبريال د خبرله مخې:
د دغې غونډې په پيل کې پوهاند باوري په لنډو خبروکې وويل چې د هنر په وده کې، د هنر عالي شورا ارزښتناک رول لري .
ده دغه راز د کمېټو له مسوولينو څخه وغوښتل چې د زيانونو په پېژندنې سره  هغه ستونزې تشخيصې کړي چې د هنر د ودې په لاره کې د چلنج په توګه منفي اغېزه کوي .
د ده د څرګندونوله مخې: په هغه صورت کې کيداي شي ځينې ستونزې حل شي. په دې غونډه کې تيمور شاه حکميار د شورا د ترسره شويو کارونو رپوټ وړاندې کړ.
وروسته د دې ترڅنګ چې د رپوټ په باب هر اړخيزې خبرې وشوې، د غونډې برخه والو د رپوټ په باب خپلې نظريې او پيشنهادونه وړاندې کړل.
  ختم_  ج _ اکرم

 

کابل باختر د مرغومي ۲۹ مه
د «علامه قاري نيک محمد د علمي او ټولنيزو کارونو د څيړنې علمي - تحقيقي سيمينار» پرون  په پروان ولايت کې جوړ شو .
دباختر آژانس د خبرله مخې:
دغه سيمينار د پروان ولايت د اطلاعاتو او فرهنګ رياست له خوا د دغه ولايت د سيمه ييزې ادارې او د هېواد د علومو اکاډمۍ په همکارۍ په چاريکارو ښارکې جوړ شو .
  د پروان ولايت د اطلاعاتو او فرهنګ رييس عبدالواحد هاشمي د «علامه قاري نيک محمد» د علمي او ټولنيزو کارنامو په باب  خبرې وکړې  او د پروان د سيمه ييزې ادارې، د اطلاعاتو او فرهنګ وزارت او د علومو اکاډمۍ د همکاريو له امله يې چې د دغه سيمينار د جوړولوپه لاره کې کړې دي، مننه وکړه .
د پروان والي فضل الدين عيار وويل: د ليکوالو تاريخ ليکوونکو او د پوهانو  د شخصيتونو  ملاتړ  زموږ مسووليتونه دي او موږ بايد تل د هغوى يادونه وکړو.
  وروسته د اطلاعاتو او فرهنګ وزارت د فرهنګ او هنر معين پوهاند محمد رسول باوري د پروان ولايت د اطلاعاتو او فرهنګ د رياست او د سيمه ييزې ادارې د دغه نوښت له امله مننه وکړه او ويې ويل: «علامه قاري نيک محمد»  د هېواد د تاريخ او پوهنې د بنسټ ايښودونکو له مخکښانو څخه دى او د دغه سيمينار جوړول د عامه افکارو او ذهنونو د روښانه کولو په لاره کې ارزښتناک او ګټور رول لري .
وروسته د افغانستان د علومو اکاډمۍ پيغام د يو تن څيړونکي ډاکتر نورالله کوثر له خوا ولوستل شو.
دغه سيمينار په يوولسو مادوکې د يوه پريکړه ليک په صادرولو سره پاى ته ورسيد .
  د دغه پريکړه ليک په يوه برخه کې ويل شوي دي: «يو ښوونځى، يو جومات، يو سړک، د اطلاعاتو او فرهنګ رياست د مطبوعاتو تالار او د دانش پوهنتون د تحقيقاتو مرکز د علامه قاري نيک محمد په نامه ونومول شي او دغه ر از د ده له علمي آثارو څخه د هېواد د لوړو زده کړو او د پوهنې په تعليمي نصاب کې استفاده وشي».
ويل کيږي چې «علامه قاري نيک محمد» د شيخ حاجي محمد زوی او د عطامحمد خوشنويس لمسی په ١٢٢٩ لمريز کال کې وږيږيد او خپلې زده کړې د مصر، هند، ترکيې، سوريې او د منځنۍ آسيا په زياترو هېوادونوکې بشپړې کړې دي او په هېوادکې د پوهنې له بنسټ ايښودونکو څخه شمېرل کيږي .
   ختم_ ج _ اکرم

 

Saturday, 19 January 2019 12:29

د اسعارو بيه

کابل\باختر\ د مرغومي د مياشتې۲۹
د کابل د شهزاده سراى د صرافانو د رييس د معلوماتو له مخې، نن له غرمې مخکې د بهرنيو پيسو په مقابل کې د افغانۍ ارزښت په دې ډول دى:
يو امريکايي ډالر پيرودل په 75/35  افغانۍ
يوانګليسي پونډ پيرودل په 30/96افغانۍ
يوه يورو پيرودل په 60/85 افغانۍ 
د اماراتو يو درهم پيرودل په 45/20  افغانۍ
يو سعودي ريال پيرودل په  00/20افغانۍ
زرپاکستانۍ کلدارې پيرودل په 536 افغانۍ
زر هندۍ کلدارې پيرودل په 1075 افغانۍ
زر ايراني تومان پيرودل په 90/07 افغانۍ
يو روسي روبل پيرودل په 10\01 افغانۍ        
پاى-سعيده

کابل\باختر\ د مرغومي د مياشتې۲۹
نن د وږي د مياشتې۱۰ نيټه د کابل ښار په بازارونوکې د اړتيا وړلومړنيو توکو بيې په دې ډول دي:
يوه ٢٥کيلويي بورۍ اعلى وريجې  ۲۲۵٠ افغانۍ
يومن شوله يي وريجې    ۳۷۰ افغانۍ
يو من بوره       ۲۶۰ افغانۍ
يو من وطنى مى      ۴۵۰ افغانۍ
  يو شپاړلس  ليتره پيپ غوړي    ۱۰۴۰ افغانۍ
يوه پنځوس کيلويي بورۍ اوړه    ۱۳۳۰ افغانۍ
يو من وطنى لوبيا     ۶۵۰ افغانۍ
يو من وطنى نخود      ۵۴۰ افغانۍ
دغه راز، يو کيلوګاز ۶۰ افغانۍ، يو ليتر پترول ۵۵ افغانۍ او يو ليتر ديزل په۴۷ افغانۍ پلورل کيږي.   
پاى-سعيده

کابل\باختر\ د مرغومې د مياشتې۲۹
په نړيوالو بازارونوکې نن يو انس سره زرپه ۱۲۸۱ډالرو وړاندې کېږي.
د پښتنې بانک د سرو زرو د مارکيټ يوه پلورونکي قاهرخان نن ددغه خبرپه تاييدولو سره باختر آژانس ته وويل چې نن د کابل په بازارونوکې يو ګرام مصري سره زر په۳۱۰۰ افغانيو، کويټي په۲۵۰۰ افغانيو،سنګاپوري په۲۵۰۰ افغانيو،  بحريني په۲۴۵۰ افغانيو، عربي په۲۴۰۰ افغانيو، ايراني په۲۲۰۰ افغانيو او يو ګرام روسي په ۲۰۰۰افغانيو پلورل کېږي.     
پاى / سعيده

قندهار باختر د مرغومې ۲۹ مه
په قندهار ولایت کې د ملي پولیسو په لیکو کې د شهیدانو له ۹۰۱ کورنیو سره د غنمو مرسته وشوه.
ځايي چارواکي وايي چې په دې مرسته کې هرې کورنۍ ته د غنمو څلورـ څلور اومنۍ بوجۍ ورکول شوې.
د باختر اژانس د خبر له مخې؛
د قندهار د والي مرستیال عبدالحنان منیب که څه هم د د ملي پولیسو د قربانیو په بدل کې دغې مرستې ناڅیزې وبللې، خو ډاډ یې ورکړ چې ولایتي اداره به د شهیدو شویو پولیسو له کورنیو سره په بېلابېلو برخوکې د مرستو پيل شوې لړۍ ته دوام ورکړي.
پای/وصال

 

قندهار باختر د مرغومې ۲۹ مه
د قندهار ولایت د بېلابېلو سیمو له ۷۲۱ داخلي بې ځایه شویو کورنیو سره نغدي مرسته کېږي.
ځايي چارواکي وايي چې دغه مرسته له هغو کورنیو سره کېږي چې په دغه ولایت کې د جنګ جګړو او وچکالۍ له امله له خپلو سیمو څخه نورو سیمو ته بې ځایه شوې دي.
د قندهار د والي مرستیال عبدالحنان منیب د باختر اژانس سیمه یيز خبریال ته وویل چې په یاده مرسته کې به هرې بې ځایه شوې کورنۍ ته ۱۵ - ۱۵ زره افغانۍ ورکول شي.
د یادونې وړ ده چې د جمهور رئيس محمد اشرف غني په ځانګړې لارښوونه د هېواد په کچه له څه د پاسه ۱۰۰ زره بې ځایه شویو کورنیو سره نغدي مرسته کېږي چې د مرستو په دې لړۍ کې د قندهار ۷۲۱ بې ځایه شوې کورنۍ هم شاملې دي.
پای/وصال

 

قلات باختر د مرغومې ۲۹ مه
د زابل ولایت د ارغنداب ولسوالۍ په سرخ سنګ سیمه کې د افغان ځواکونو او وسله والو طالبانو ترمنځ نښته شوې چې له امله یې دواړو لورو ته مرګ ژوبله اوښتې ده.
ځايي چارواکي وايي چې تېره شپه وسله والو طالبانو د ارغنداب ولسوالۍ په سرخ سنګ سیمه کې د افغان ځواکونو په امنیتي پوستو ډله یېز بریدونه کړي.
د زابل د والي ویاند ګل اسلام سیال د باختر آژانس سیمه یيز خبریال ته وویل چې په دغو نښتو کې ۷ تنه وسله وال طالبان وژل شوي او ۱۲ تنه نوريې ټپيان شوي دي.
سرچینه زیاتوي چې په دغو نښتوکې دوه تنه ملي پولیسان هم شهیدان شوي او درې تنه نور ټپیان شوي دي.
پای/وصال


 

مهترلام باخترد مرغومې ۲۹ مه
د لغمان ولایت په قرغیو ولسوالۍ کې په درې جریبه غصب شوې ځمکه کې جوړ شوي تاسیسات ړنګ کړی شول .
د قرغیو ولسوال نصیر احمد همت باختر اژانس ته وویل چې پرون یې د غصب پر وړاندې د مخنیوي کمېسیون په ملتیا د دغې ولسوالۍ اړوند د شهیدانو او معلولینو په ښارګوټي کې غصب شوې ځمکه د غاصبینو له منګولو خلاصه کړه.
هغه وایي، هڅې یې پیل کړي ترڅو په نورو سیمو کې هم دولتي ځمکې د غاصبینو له منګولو خلاصې او غاصبین د قانون منګولو ته وسپاري.
پای/وصال

Page 1 of 7288