26 March 2017

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل \ باختر د وري  دمياشتې  ٦
د پکتیکا ولایت د ارګون ولسوالۍ  سپین ږیرو، قومي مشرانو او ځوانانو د اجرائیه ریاست له لومړي مرستیال انجینیر محمد خان سره په مرمرینه ماڼۍ کې وکتل .
داجرائيه رياست لومړي مرستیال مطبوعاتي دفترباخترآژانس ته خبرورکړ.
د یاد ولایت د قومي مشرانو په استازیتوب قومي مشر ډاکتر شاه محمود خبرې وکړې او ويې ویل: له دې سره سره چې پکتیکا ولایت کې امنیتي حالت نسبتاُ ښه دی، خو بیا هم د حکومت له خوا ورته د رغونې او د ښې حکومت والۍ په برخه کې پاملرنه نه ده شوې. 
ده زیاته کړه: د پکتیکا ولایت قومي جوړښتونو او قومي مشرانو په دې ولایت کې تر ډیره حده د امنیتي ستونزو، قومي شخړو مخه نیولې ده، خو د حکومت له خوا د رغونې چارې په ټپه ولاړې دي.
دغه راز د ارګون ولسوالۍ د قومي شورا مشر ضابط محمد حضرت وویل: په دې ولایت کې خصوصا په ارګون ولسوالۍ کې د کرنې، روغتیا، پوهنې او بیارغونې په برخه کې هیڅ کار نه دې شوي چې ولس یې له ګڼو ستونزو سره مخ کړی دی.
د ارګون ولسوالۍ سپین ږیرو او قومي مشرانو په یوه خوله د ملي یووالي حکومت له مشرانو څخه غوښتنه وکړه چې د دوی ستونزو ته پاملرنه وکړي او د حل په برخه کې ورسره مرسته وکړي.
په پای کې د اجرائیه ریاست لومړي مرستیال انجینیر محمد خان د ارګون ولسوالۍ د مشرانو ستونزې پرځای وبللې او ډاډ یې ورکړ چې د یادو ستونزو د حل لپاره به کوټلي ګامونه پورته کړي او اړوندو ارګانونو ته به لارښوونه وکړي چې په دې برخه کې لاس په کار شي.

کابل \ باختر د وري  دمياشتې  ٦
د ترکیې دولت د کډوالۍ د ادارې عمومي رییس چې د یو پلاوي په مشرۍ یې کابل ته سفر کړی نن د کډوالو او راستنیدونکو چارو له وزیر سره په کتنه کې د کډوالۍ د ګډ مدیریت لپاره د یوه هوکړه لیک پر لاسلیکولو هوکړه وکړه .
د کډوالو او راستنیدونکو چارووزارت مطبوعاتي دفترباخترآژانس ته خبرورکړ.
په هغې غونډه کې چې د کډوالو او راستنیدونکو چارو په وزارت کې جوړه شوې وه د ترکیې دولت د کډوالۍ د ادارې عمومي رییس آتیلا توروز ، د دغې ادارې مرستیال او په کابل کې د ترکیې سفیر علي سید آکین ګډون درلود او دواړو لورو ترکیې ته په ناقانونه ډول د افغانانو د تګ د مخنیوي او د قانوني کډوالۍ پر لارو چارو خبرې وکړې .د کډوالو او راستنیدونکو چارو وزیر سید حسین عالمي بلخي د ترکیې له کوربتوب او د افغان کډوالو سره د دغه هیواد د نیک چلند څخه د مننې ترڅنګ زیاته کړه چې د کډوالۍ پدیده د داوړو هیوادو ترمنځ ګډ مدیریت ته اړتیا لري او په دې اړه باید کوربه هیوادونه ، مبدا او ترانزیټ هیوادونه او همدارنګه نړیوالې ادارې په ګډه کار وکړي .
د کډوالو وزیر وویل ترکیه د کډوالۍ د ترانزیټ او مقصد هیواد په توګه افغانستان لپاره ډیر مهم دی نوموړي هیله څرګنده کړه چې ترکیه دې د افغان کډوالو د ترانزیت په توګه وکارول شي نه د ا چې د افغانانو د اجباري ایستلو په یو هیواد بدل شي .
هغه له ترکیې سره د کډوالۍ د ګډ مدیریت په برخه کې  د افغان دولت د مذاکراتو د چمتووالي په اړه خبر وکړ او د یوې مشخصې آجندا غوښتنه یې وکړه .
وروسته بیا د ترکیې د کډوالۍ ادارې عمومي رییس آتیلا توروز په ناقانونه ډول ترکیې ته د افغانانو د تګ او په لاره کې د دوې  زیانونو او تلفاتو ته په اندیښنې سره وویل چې افغانان باید د ناقانونه کډوالۍ پر ځای په قانوني ډول ترکیې ته ولاړ شي او مونږ به په دې برخه کې له افغان حکومت سره مرسته وکړو .
د ناستې په پایله کې د دواړو لوریو ترمنځ د همکاریو په اړه د یو ګډ تخنیکي ټیم پر جوړلو هوکړه وشوه .

کابل \ باختر د وري  دمياشتې  ٦
دافغانستان داسلامي جمهوري دولت د عامې روغتیا وزارت د ۱۳۹۶ کال د پسرلي لومړنی د پولیو واکسین سراسري دورې کمپاین رسما پرانیست. دا کمپاین د یونیسف او د روغتیا د نړیوالې ادارې په همکارۍ صبا د روان کال د وري میاشتې له اتمې نيټې څخه پیلیږي او د دریو ورځو لپاره دوام مومي چې په ترڅ کې د پنځو کالو کم عمره نږدې ۸،۸ میلیونه ماشومان به د ګوزڼ ناروغۍ پروړاندې واکسين او د ۶ میاشتو نه تر ۵ کلونو ترمنځ  ټولو ماشومانو ته د ویتامین "A" کپسول د ناروغيو پر وړاندې د هغوی د بدن د ځواکمنتیا په خاطر ورکول کیږي. په دې کمپاین کې بامیان، دایکندی او غور ولایتونه  د اقلیمي ستونزو او دسړې هیوا  له امله ندي شامل.
دعامې روغتيا وزارت مطبوعاتي دفترباخترآژانس ته خبرورکړ.
دعامې روغتیا وزیر ډاکټر فیروزالدین فیروز نن د یولړ مراسمو په ترڅ کې، د یوه ماشوم په خوله کې د پولیو واکسين د دوو څاڅکو په څڅولو سره دغه ملي کمپاین رسماْ پرانیست او له ټولو ښکیلو خواوو څخه يې غوښتنه وکړه چې ددې پروګرام بې پرې توب ته جدي پاملرنه وکړي او د رضاکار واکسیناتورانو د سپیڅلې دندې د ترسره کولو لپاره ډاډمنه او مطمئنه فضا رامنځته کړي ترڅو هغو ی وکولای شي  د پوليو واکسين په سمه توګه د افغان کورنيو دروازو ته ورسوي او د دوو څاڅکو په ورکولو سره ګلالي ماشومان له دایمي فلج او معیوبيت څخه وژغوري.
دعامې روغتیا وزیر، د پولیو واکسين یې د ماشومانو د ګوزڼ ناروغي د مخنيوي او وقایې لپاره خورا مهم او اغیزمن وباله او زیاته یې کړه چې د نړۍ ګڼ شمیر هیوادونو دغه ناروغۍ په بشپړه توګه له منځه وړې ده او پولیو له هغو ناروغيو څخه ده چې په بشپړه توګه له منځه وړل کیدای شي.  لکه څنګه چېچک ناروغۍ یو مهال شتون درلود او د واکسين په تطبیق سره له منځه تللې ده او اوس څوک پرې نه اخته کیږي.
په دې کمپاین کې څه باندې ۶۵ زره روزل شوي روغتیايی کارکوونکي په ټول هیواد کې کور په کور ګرځي او د افغان کورنيو د دروازو په ټکولو سره،  دهغوی ماشومان ددې دایمي معیوبوونکي او آن وژونکي ناروغۍ پر وړاندې واکسين کوي. ددې دریو  پرله پسې ورځو سربیره د همدې اونۍ د جمعې ورځ  روغتیايي کارکوونکي د واکسين څخه پاتې شوي ماشومانو د واکسين کولو په خاطر بيا ځل کورنيو ته مراجعه کوي ترڅو هیڅ ماشوم له واکسين څخه بې برخې پاتې نشي.
پولیو درملنه نه لري او یوازې د واکسين له لارې وقایه کيږي. د پولیو واکسين په بشپړه توګه خوندي دی او آن د نوي زیږېدلې، ناروغ او  ویده ماشومانو لپاره کوم جانبی عوارض نلري او د شرعي پلوه د اسلامي نړۍ جیدو علماوو او په ټول هیواد کې د افغانی علماوو لخوا تائید شوی او تطبیق یې دماشومانو لپاره حتمي او ضروري بلل شوی دی.
په دې مراسمو کې مولوی سمع الله ریحان  او مفتی  شمس الرحمن فروتن د اسلامي شریعت له نظره د پولیو واکسین د اهمیت په باب خبرې وکړې او ویې ویل چې د ماشومانو د روغتیا د ودې او خوندي توب لپاره دا په کورنيو، میندو او پلرونو واجب او ضروري دی چې خپل ماشومانو د ناروغيو پر وړاندې او په تیر بیا د پولیو په وړاندې واکسين کړي.
همداراز د روغتیا نړیوالې ادارې استازي ډاکټر ریچارت پيپر کورن او د یونیسف ادارې استازي میرمن ادیلی خضر هم د موضوع په باب خبرې وکړې او د پولیو دله منځه وړلو په برخه کې د افغانستان حکومت سره د خپلو مرستو پر دوام یوځل بیا ټینګار وکړ او ددغې ناروغۍ له منځه وړل یې یو نړیوال روغتیايي لومړي توب وباله.
افغانستان، پاکستان او نایجیریا په نړۍ کې هغه درې هیوادونه دي چې تر اوسه پولیو په کې شتون لري. افغانستان د تیرهروخت په پرتله دامهال د پولیو له منځه وړلو ته ډیر نږدې شوی. د پولیو پيښې د پخوا په پرتله راټيټي شوي چي په ۲۰۱۵ کال کې يې شمير ۲۰ وو او په ۲۰۱۶ کال کې دا شمير ۱۳ پپښو ته راټيټ شو. يادي ۱۳ پيښي يواځي په څلور ولسواليو کي رامنځته شوي چي عبارت  ( ۷ پيښې د پکتیکا د برمل ولسوالۍ، ۴ پيښې د کنړ د شیګل ولسوالی، ۱ پيښه د هلمند د نوزاد ولسوالی او ۱ پيښه هم د کندهار د شاولي کوټ ولسوالۍ) دي. په  پاتې ۹۹ سلنه ولسواليو په تیر زیږدیز کال کې د پولیو کومه مثبته پيښه نه درلوده. په روان زیږدیز کال کې د پولیو دوه مثبتې پيښې د کندهار او هلمند ولایتونو څخه راپور شوي دي.
تیر کال د پولیو د له منځه وړلو پروګرام لپاره د لاسته راوړنو ډک کال وه. د کمپاینونه کچه هغو سیمو ته وغځول شوه کوم چې په تیرو وختونو کې لاسرسی ورته ناشونی وه،  د پولیو پروګرام ټول فعالیتونه د یوه چتر او یوې رهبرۍ لاندې راوړل شول، په مرکز او د پولیو د لوړ خطر سره مخ په سیمو کې بیړنۍ عملیاتي مرکزونه جوړ شول، د سرویلانس یا د پيښو موندنې سیستم په نړیوالو معیارونو برابر  شو، دغه پروګرام د حکومت د مشرانو د غوڅ ملاتړ څخه برخه من شو، د وزارتونو ترمنځ ګډه همکاری رامنځته شو، د ټولنې مشرانو، دیني عالمانو او د نړیوالو مرستندویه ادارو بیساري ملاتړ ددې پروګرام لپاره جلب شو، دعامه پوهاوي کچه د پولیو د واکسین د اهمیت په اړه لوړه شوه، د پولیو پروګرام بی پرې توب د ښکیلو خواوو ترمنځ خوندي وساتل شو او د پولیو کمپاینونو د کیفیت په ښه والي کې خورا زیات مثبت بدلونونه راغلي دي.
خو په عین حال کې، نا امني، د ګډوالو را ستنیدل، له غیر رسمي پولو څخه د کورنيو تګ او راتګ او داخلي بې ځایه شوي کورنۍ لاهم هغه ننګونې دي چې د ماشومانو ګوزڼ ویروس انتقال زمینه هغو سیمو ته مساعده وي کوم چې ددې ویروس څخه تراوسه خوندي پاته دي . د عامې روغتیا وزارت  د روغتيا په سکتور کي له خپلو کاري شريکانو سره په همکارۍ په دې اړه لازم تدابیر نويلي دي ترڅو د پوليو يا ګوزڼ ويروس د خپريدو مخه ونيسي.

کابل \ باختر د وري  دمياشتې  ٦ :
د افغانستان د اسلامي جمهوریت جمهوررئیس محمداشرف غني ملي شورا سره د مشورتي ناستو په لړ کې نن سهار د ولسي جرګې اداري پلاوي او د کمیسیونونو رئیسانو سره په ارګ کې وکتل.
د جمهور رييس د وياند دفتر باختر آژانس ته خبر ورکړ:
په دې کتنه کې د هېواد د امنیتي او اقتصادي وضعیت د لا ښه والي په اړه بحث او خبرې وشوې. جمهور رئیس غني د ملي مسایلو په اړه د ولسي جرګې د استازو د نظریاتو او مشورو ارزښت ته په اشارې سره وویل، موږ به د تل په څېر دمهمو مسایلو او ملي تصامیمو په اړه ستاسو مشوره او نظریات واخلو.
جمهور رئیس غني د ولسي جرګې او ولس له ملاتړ څخه په مننې وویل، د فساد پر ضد مبارزه سراسري کېږي او حکومت په دې برخه کې د خپل ټینګ تعهد ترڅنګ  د ولسي جرګې د استازو او خلکو ملاتړ هم حیاتي بولي.
د هېواد جمهور رئیس څرګنده کړه، موږ د ولسي جرګې د استازو قانوني واکونو ته درناوی لرو او درې ګونه قواوې چې په قانون کې پوره وضاحت لري یو له بل سره لازمې او ملزومې دي او د دغو قواو تر منځ همغږي او همکاري د افغانستان د ثبات او ښه راتلونکي لپاره ګټور دي.
د ولسي جرګې رئیس عبدالرووف ابراهیمي د ولسي جرګې او حکومت ترمنځ د همغږۍ او همکارۍ د رامنځته کولو او په مهمو ملي مسایلو کې د ولس له استازو سره د مشوروله امله له جمهور رئیس څخه مننه وکړه. هغه زیاته کړه، ولسي جرګه ستاسو د ملي تصامیمو او اصلاحي او انکشافي پروګرامونو بشپړه ملاتړې ده. 

کابل – باختر د وري دمياشتې ٦
داطلاعاتو اوفرهنګ وزارت فرهنګي معين اوسرپرست  پوهاند محمد رسول باوري نن دافغان فرهنګي ميراثونو دمشورتي موسسې  له سلاکارې  جولين لسلي سره په کتنه کې  ددغې  موسسې دفعاليتونو دپراختياغوښتنه وکړه .
دباختراژانس دخبرله مخې ،  په دې کتنه کې لومړى جولين لسلي  دافغان فرهنګي ميراثونو دمشورتي موسسې  دفعاليتونو په  باب معلومات وړاندې کړل او ويې ويل  چې دکابل  دمرنجانو په غوندۍ او دپروان ولايت دتوپ درې په سيمه کې او ځينونورو سيمو کې دفرهنګي ميراثونو او تاريخي ابداتو دترميمولواو بيا احيا کولو په برخه کې ددغې موسسې کار دوام لري  چې ډير ژربشپړ شي .
وروسته  پوهاند محمد رسول باوري  په هېواد کې دافغان فرهنګي ميراثونو  دمشورتي موسسې له خوا ترسره شوي فعاليتونه  ارزښتناک وبلل او له جولين لسلي  څخه يې دهېواد دتاريخي ابداتو اودفرهنګي ميراثونو دترميمولو او بيا احيا کولو په برخو کې ددغې موسسې دفعاليتونو دپراختيا غوښتنه وکړه او ويې ويل  چې دافغان فرهنګي ميراثونو مشورتي موسسه په افغانستان کې دخپلو فعاليتونو دترسره کولو په  برخه کې  داطلاعاتو اوفرهنګ وزارت له ملاتړ او همکارۍ څخه هم برخمنه ده  چې دهېواد بډاى فرهنګ  په بشپړه توګه  بيا احيا شي .   ده  له جولين لسلي څخه وغوښتل  چې خپل فعاليتونه په يوه  يا دوه ساحو کې متمرکز نه کړي . او زياتې سيمې او ساحې ترپوښښ لاندې ونيسي .

کابل – باختر د وري دمياشتې ٦
دسيمه ييزې غيږې نيونې سيالۍ دهرات ولايت دامنيې قوماندانۍ دسيمه ييزو پوليسو د ټيم په اتلوالۍ پاى ته ورسيدې.
دغه سيالۍ چې دوګړنيو پوليسو دعمومي مديريت له خوا دورزش د پرمختيايي سازمان درياست او دافغانستان دځوانانو په همکارۍ دشهيد ميرويس صادق په جمنازيوم کې په پيل شوې دي دهرات ولايت دامنيې قوماندانۍ دوګړنيو پوليسو دسيمه ييزې غيږې نيولو ټيم لومړى مقام وګاټه، داتحاد ټيم دويم او د نيرو ټيم دريم مقامونه وګټل.
دهرات دامنيې قوماندانۍ دوګړنيو پوليسو دعمومي مديريت مرستيال او سرپرست سيد عزيز احمد اميني دباختر آژانس خبريال ته وويل.
ددغو سياليو دترسره کولو هدف دپوليسو او خلکو ترمنځ دتفاهم ،اعتماد،همکارۍ او ښو اړيکو ټينګښت وباله.
په همدې حال کې دورزش آمر حميد الله کبير هم له پوليسو سره دخلکو له همکارۍ څخه ستاينه وکړه.
ددغه شان سياليو ترسره کول دپوليسو او خلکو ترمنځ داعتماد د لا ودې سبب کيږي.په پاى کې مډالونه او د اتلوالۍ کپونه د اړوندو چارواکو له خوا وويشل شو. 

کابل – باختر د وري دمياشتې ٦
دبنګله ديش دشمال ختيځ په سيهلت ښارکې په بيلابيلو دوو چاودنو له امله درې تنه امنيتي ځواکونه او درې تنه ملکيان ووژل شول او څلويښت تنه نور ټپيان شول.
دبنګله ديش دولتي ټلويزيون دسيلهت ښار دپوليسو قوماندان له خولې وويل : لومړۍ چاودنه هغه وخت وشوه چې سيمه ييز خلک يو ناپيژاند سړى چې پلاستيکي کڅوړې انتقالوه ودراوه.
دسيمه ييزو مقاماتو دڅرګندونو له مخې : دويمه چاودنه هغه وخت چې پوليسو او د چټک غبرګون ځواکونه په سيمه کې حاضر شو رامنځته شوه دغې دوې چاودنې دبنګله ديش داردو دوياند دويناو له خپرولو څو ساعته وروسته په تيره بيا په سيلهت ښارکې دامنيتي ځواکونو دعملياتو په دوام رامنځته شوې.
پرون هم د داعش په ډلې پورې اړوند يو ځانمرګى بريد کوونکى ځان د داکې دنړيوالې هوايي ډګرته څيرمه دپوليسو په وړاندې وچاوه.
دغه بم ايښودنه دبنګله ديش دامنيتي او پوځي مرکزونو پرخلاف ديوې مياشتې دځنځيروي بريدونو په دوام شوې ده .
د داعش تروريستي ډله په بنګله ديش کې دزياترو تروريستي بريدونو مسووليت په غاړه اخيستې ده.

کابل – باختر د وري دمياشتې ٦
په پنجشير ولايت کې دسيمه ييزو مقاماتو په شتون نن دنيالګيو د ايښودلو په وخت کې په داسې حال کې چې د دولتي ادارو يو شمير رييسان شتون درلود خبرې وکړې او ويې ويل: ټولوته لازمه ده چې ديوې نيالګيو په ايښودلو سره د زموږ دهيواد په سمسورتيا کې ونډه واخلو.
په همدې حال کې دپنجشير ولايت دکرنې او اوبو لګولو رييس عبدالروف يعقوبي وايي .اداره يې په پام کې لري چې څه دپاسه پنځه سوه ډولي نيالګي ددغه ولايت دمرکز د بازارک په مربوطاتو کې کښينوي.

کابل – باختر د وري دمياشتې ٦
دفوټبال سيالۍ نن په پنجشير ولايت کې دلسو ټيمونو په ګډون پيل شوه.
دغه يو اوونيزې سيالۍ دپنجشير ولايت دفوټبال فدراسيون له خوا ددغه ولايت دمرکز د بازارک په شاهي ډګر کې پيل شوې دي.
دپنجشير ولايت دفوټبال فدراسيون مسوول احمد احمدي دباختر آژانس خبريال ته وويل چې ددغو سياليو دترسره کولو موخه دغورو څيرو انتخابول دي.
احمدي وويل : په دغو سياليو کې دپنجشير ولايت له مرکز او اوو ولسواليو څخه لس ټيمونه ګډون لري.

کابل – باختر د وري دمياشتې ٦
په هغه سړي چې په  تيرو  انتخاباتو  کې  د پنځو تنو  رايې  ور کوونکو  د ګوتو  د
غوڅو لو تور لګول شوى دى دهرات دښارې محکمې له خوا دپنځو کلونو بند په سزا محکوم شو.
تورن نن دهرات دښارې محکمې دکورني او بهرني امنيت پرخلاف د جرمونو دڅيړنې د ديوان په علني قضايي غونډه کې په مجازاتو محکوم شو.
دښارى ابتداييه محکمى سرپرست قضاوتمند ګل اقا اوبه وال وايي دغه سړى چې د ١٣٩٣ کال په انتخاباتو کې د رايې ورکوونکو دګوتو دغوڅولو او په قضيه کې لاس او دملا حيات الله په ډله کې غړيتوب لري.ونيول شو او په ابتدايي تحقيقاتو کې په خپل جرم اعتراف کړى و او نن په پنځو کلونو تنفيذي بند محکوم شو.
په همدې حال کې يو تن د دولت وسله والو مخالفينو ته دپيسو د راټولولو په تور په پنځو کلونو او يوې مياشتې بند محکوم شو.
دغه راز دوه تنه دورانکارو فعاليتونو او د ډار اچوونکو فعاليتونو دترسره کولو او ډار اچوونکو موضوعګانو ته دځوانانو دجذبولو په تور يو تن په اتو کلونو او بل يې په دريو کلونو بند محکوم شو دتورنو کسانو داستيناف غوښتنې حق خوندي دى.

Page 1 of 5033