13 December 2017

RSS Facebook

سوداگریز


تازه خبرونه

جمهور رئیس غني دامریکا متحدو ایالاتو د نوي سفیر باورلیک ومانه

جمهور رئیس غني دامریکا متحدو ایالاتو د نوي سفیر باورلیک ومانه

کابل باختر دليندي يو ويشتمه د افغانستان د اسلامي جمهوریت...

 له دارالعلوم  څخه  څلور سوه پنځوس  تنه نجونې  فارغې شوې .

له دارالعلوم څخه څلور سوه پنځوس تنه نجونې فارغې شوې .

-کابل باختر دليندي يو ويشتمه : دبي بي عايشې...

Youtube Player

khantry design

سوداگریز

سوداگریز

کابل باختر دليندي  يو ويشتمه
د اقتصاد عالي شورا د پرېکړو د انعکاس او د پیسو نړیوال صندوق له لوري د افغان حکومت د مالي او اقتصادي اصلاحاتو د بریالۍ ارزونې په اړه خبري کنفرانس جوړ شو
د مالیې وزارت ویاند او عامه اړیکو رئیس اجمل حمید عبدالرحیمزي، نن د حکومت د رسنیو په مرکز کې د خبري کنفرانس له لارې د اقتصاد دعالي شورا د پریکړو د انعکاس او د پیسود نړیوال صندوق له لوري د افغان حکومت د مالي او اقتصادي اصلاحاتو د بریالۍ ارزونې په اړه له رسنیو سره معلومات شریک کړل.
په دې کنفرانس کې د مالیې وزارت ویاند او دعامه اړیکو رئیس ښاغلي اجمل حمید عبدالرحیمزي، د پیسو نړیوال صندوق له لوري د افغان حکومت د مالي او اقتصادي اصلاحاتو دبریالۍ ارزونې یادونه وکړه او ویې ویل: د پیسو نړیوال صندوق (IMF) اجرایوي بورډ د لېندۍ میاشتې په ۱۷مه نېټه د اعتباري اسانتیاوو د تمدید پروګرام (ECF) دویم پړاو په بریالیتوب سره بشپړ کړ او د مالي ثبات په ساتنه، اقصادي ودې، د لوی اقتصاد ثبات، په مالي سکټور کې د اصلاحاتو پلي کول، دپانکوالى سکټور، له فساد او پیسو وینځلو سره مبارزه او همدارنګه د کار موندنې د فرصتونو په برابرولو کې یې د افغان حکومت د مالي اقدامونو او ژمنو هر کلی وکړ. 
همدارنګه په دې کنفرانس کې عبدالرحیمزي، په بېلابیلو سکټورونو کې د اقتصاد دعالي شورا د موخو، دندو، پرېکړو او لاسته راوړنو څخه د یادونې تر څنګ وویل، چې د اقتصاد عالي شورا په خپلو دوامدارو غونډو کې د دافغانستان داسلامي جمهوريت دجمهوررييس په مشرۍ د افغانستان اقتصادي ځان بسیاینې، مالي ثبات او ملي ګټو لپاره په مهمو اقتصادي موضوعاتو او د پانګونې د جلب په موخه لازمې پرېکړې او هدایات د انرژۍ، اوبو، کرنې، سوداګرۍ، صنعت، پانګونې، مخابراتو او ټکنالوژي، ساختماني او نورو سکټورونو کې وزارتونو او دولتي ادارو ته صادر کړي دي.
ده د اقتصاد دعالي شورا د شپاړسمې غونډې د مصوبو په اړه چې پرون په ارګ کې جوړه شوه وویل، چې د اقتصاد عالي شورا د قیمتي او نیمه قیمتي ډبرو د پروسس، سوداګرۍ او مخنیوي په موخه د یو مرکز جوړول یې په پرنسیپ کې تائید کړل. پریکړه وشوه چې د خصوصي سکټور د هڅونې په موخه د کانونو په برخه کې مناسب رویالیټي (د امتیازحق) وټاکل شي او په دې برخه کې دې د ادارو اړتیاوې مشخصي شي. همداشان پریکړه وشوه چې د یوریا سرې د زيرمه کولو لپاره دې یوه کمېټه جوړه شي چې د یوریا سرې د کیفیت د مطالعې تر څنګ، د پلور او ګټې اخیستنې په برخه کې یې لازمې پریکړې وشي.
ده د کجکي بند د دویم فاز د پرانېستې په اړه د اقتصاد دعالي شورا د پریکړې په تړاو وویل: د کجکي بند د دویم فاز له پرانېستې سره به د دغه بند ظرفیت له ۵۱ څخه ۱۵۱ میګاواټ پوري لوړ شي. حکومت د دې قرارداد چارې د عامه او خصوصي مشارکت له لارې پر مخ وړي او تدارکاتې چارې به یې پیل شي.
د اقتصاد عالي شورا د افغان حکومت د پراختیایې ستراتیژۍ جوړونې او همغږۍ یوه برخه ده چې د طرحې او پالیسیو، د اقتصادي او پراختیایې اصلاحاتو د پروګرامونو پلي کېدو، د کورنیو او بهرنیو پانګه والو د کړنو د تنظیم او همغږۍ په موخه د ۱۳۹۴ کال د وږي دمياشتې په ۱۱ نېټه د کابینې په غونډه کې تصویب شو او د جمهوررييس د١٣٩٥ کال دوږي دمياشتې  نېټې د ۲٠ مې ګڼې فرمان له مخې جوړه شوه چې مالیې وزارت یې د دارلانشا دنده پر غاړه لري.
د یادونې وړ ده چې خلکو ته د موثقې اوباوري اطلاع رسونې په برخه کې د مالیې وزارت د نوې طرحې له مخې له دې وروسته د اقتصاد عالي شورا مهمې پرکړې او فیصلې به د مطبوعاتي کنفرانس له لارې د حکومت د رسنیو په مرکز کې له رسنیو او خلکو سره شریکي شي.پاى- ع

کابل باختر دليندي  يو ويشتمه
د افغانستان د اسلامي جمهوریت جمهور رئیس محمداشرف غني نن مازیګر د افغانستان لپاره د امریکا متحده ایالاتو د نوي سفیر جان آر باس باورلیک ومانه.
دجمهوررييس دوياند دفترباخترآژانس خبرورکړ
د باورلیک دوړاندې کولو له مراسمو وروسته چې په ارګ کې پرځاى شول، د امریکا متحده ایالاتو نوي سفیر  جمهور رئیس غني ته  د دواړو هېوادونو تر منځ د اړیکو د لا پراختیا په برخه کې د خپلو کوښښونو ډاډ ورکړ او وې ویل، د امریکا متحده ایالاتو او افغانستان تر منځ به په بېلابېلو برخو کې د لا زیاتو همکاریو د فضاد برابرولو کوښښ وکړي.
د هېواد جمهور رئیس د افغانستان لپاره د امریکا متحده ایالاتو نوي سفیر ته د نوې دندې مبارکي وویله او له افغانستان سره په بېلابېلو برخو کې یې د امریکا متحدو ایالتونو د همکاریو د قدردانۍ ترڅنګ نوموړي ته په دغه نوي ماموریت کې د بریالیتوب هیله وکړه. #پاى- ع

-کابل باختر دليندي  يو ويشتمه :
دبي بي  عايشې صديقه له دراالعلوم  څخه نن څلور سوه پنځوس تنه نجونې  فارغې شوې .
دغه نجونې  ددغه دارالعلوم له څوارلسم ټولګي څخه فارغې شوې دي او که چيرې دنمرو اوسط يې  په سلوکې له اتياڅخه لوړ وي کولاى شي دلوړو زده کړو موسسو ته لاره پيداکړي .
دباختراژانس دخبريال دخبرله مخې ، په هغې غونډه کې چې  په همدې مناسبت  جوړه شوې وه  دپوهنې وزارت  داسلامي تعليماتو معين ډاکتر شفيق صميم ،  په ولسي جرګه کې دخلکو استازي  عبدالستار  خواصي ، يوشمير عالمانو او ددارالعلوم استادانو او نجونو ګډون کړي و .
  لومړى  ډاکتر شفيق صميم  ددرسي کيفيت دکچې دلوړولو په لاره کې دبي بي عايشه صديقه   دارالعلوم  دچارواکو دهڅو او هاند له امله قدرداني وکړه او ويې ويل چې دهېواددپوهنې وزارت په مسووليتونو په پوهيدو سره  دټولنې ټولو قشرونو ته  د زياتو تعليمي زمينو  دبرابرولو  په لټه کې دى او دغه وزارت  له بل  هر څه څخه زيات  دلوست کيفيت ته  اهميت ورکوي  او په دې لټه کې دى  چې  د کيفيت کچه  له پخوا زياته لوړه شي .
  په ولسي جرګه کې  دخلکو استازي  عبدالستار  خواصي  هم په خبرو کې وويل  چې  داسلامي  علومو له مرکزونو څخه  د نجونو  فراغت  دهغو کسانو په  خولې ځپنده  سوک دى  چې ادعاکوي چې ګڼې  داسلام مبين دين  له نجونو څخه دتعليم او زده کړې  حق  سلب کړى دى .
په داسې حال کې چې دغه دين يو داسې دين دى  چې  دعلم زده کړه يې په ښځې او نارينه فرض کړى دى .
په پاى کې دبي بي عايشه صديقه دارالعلوم  دامرې  نظيفې  صديقې  دهڅو دستاينې په موخه دملالي  مډال  دعبدالستار خواصي له خوا دې ته ورکړى شو .
ختم _( ف  _ اکرم

 

کابل باختر دليندي  يو ويشتمه :
  د( افغانستان او وريښمو  لاره  )  علمي څيړنيز سيمينار  دجوړولو  دتياري دکميسيون درېمه غونډه  نن  داطلاعاتو اوفرهنګ وزارت دسرپرست  پوهاند محمد رسول باوري په مشرى   جوړه شوه .
  دباختراژانس  دخبرله مخې ،  په دې غونډه کې  وپتيله شوه  چې  دسيمينار  لومړى ورځ دې  په کابل کې او دوه نورې ورځې  په ننګرهار ولايت کې ترسره شي .
په همدې دليل  کميسيون پريکړه وکړه چې دچارو دښه تنظيم  په موخه دې  يو درې کسيز هيئت  دنننګرهار ولايت ته  سفر وکړي .
  په دې غونډه کې داطلاعاتو اوفرهنګ وزارت سرپرست  دکميټو  له مسوولانو خخه  وغوښتل  چې  په لاښه توګه  ددغه سيمينار  په جوړولو کې  لازمې هڅې وکړي  .
  ده وويل  څرنګه چې  روان مالي کال  مخ په پاى ته رسيدو دى له دې امله دسيمينار  لګښتونه دې  په دقيقه  او هراړخيزه توګه  محاسبه شي . 
  داطلاعاتو اوفرهنګ وزارت دسرپرست دڅرګندونوله مخې ،  ددغه  سيمينار تر څنګ به فرهنګي اوونۍ  او دتاريخي  او هنري اثارو نندارتون هم  په ننګرهار کې  جوړ شي .
  دغونډې په پاى کې  دکميټو رييسانو  خپل کاري رپوټونه وړاندې کړل .
  ختم_ ف _ اکرم

کابل باختر دليندي  يو ويشتمه :
دکار ټولنيزو چارو شهيدانو او معلولينو وزارت خبرتيا
  هغو متقاعدينو ته چې دهېواد په کليو، ولسواليو، ناحيو او ولايتونو کې استوګن دي او دبايمتريک  په سيتم کې  نه دي ثبت شوي  خبر ورکول کيږي چې ډير ژر کولاى شي دهېواد په مرکز اويا  دهرات ، بلخ ، ننګرهار ،  او قندهار په ولايتونوکې له ټاکل شوي  مهلت سره سم د ١٣٩٦ مالي کال دليندي دمياشتې تر پاى پورې مراجعه وکړي   چې ددوى د ١٣٩٧ مالي کال دحقوقو دورکولو په برخه کې لازمې اسانتياوې برابرې  شي .   ختم_  ف _ اکرم

کابل باختر دليندي  يو ويشتمه :
دسترې محکمې عالي شورا نن له غرمې مخکې دسترې محکمې درييس قانونپوه سيد يوسف  حليم په مشرۍ  غونډه وکړه او په اجندا کې  نيولې شوې موضوعګانې يې وڅيړلې .
  دسترې محکمې دخپرونو رياست باختراژانس ته خبرورکړ.  شورا لومړى دجزايي دعوا داقامه کولو او محکمې ته ددوسيې داحاله کولو په باب دجزايي اجرااتو دقانون دديارلسم فصل  دحکمونو پربنسټ ، څرګنده کړه ددغه بهير  قانونيت دڅارنوالۍ دادارې له خوا  دجزايي اجرااتو دقانون د ١٧٥ مادې په  حکم کې دليکل شويو  شرايطو درعايتولو غوښتنه کوي او څارنوال مکلف دى چې داتهام ليک دتاييد په صورت کې ددعوا داقامه کولو ، تورنو کسانو اويا دهغوى دمدافعو وکيلانو ته ددعوا دصورت دسپارلو ، په سمه توګه ددوسيې د پاڼو دتنظيم او تورن اومجني عليه ته دخبرورکولو او محکمې ته ددوسيې داحاله کولو په برخه کې لازم پروسيجري  اجراات ترسره کړي او دمحاکماتي څيړنو لازم قانوني  مقدمات برابر کړي  وروسته  په جزايي  قضيو کې دبيا کتنې يوشمير غوښتن ليکونه چې دوژنې ، غلا ،  انسان تښتونې ، هېواد ته دخيانت او د نشه يي توکو قضيې  پکې شاملې وې دلوى څارنوال دمرستيال  څارنپوه ډاکتر علامه  او دهغو دهمکارانو او دمحکومينو دنږدې خپلوانو په شتون دعالي شورا په دې غونډه کې وڅيړل  شول او دهغوى دغوښتنو  په باب  دجزايي  اجرااتو د قانون د ٢٨٢ مادې په حکم کې  دليکل شويو شرايطو په پام کې نيولو سره لازم تصميمونه ونيول شول .
  وروسته ديوشمير رسيدلو استهداګانو په باب خبرې وشوې او په يوه مدني دعوا کې د ذواليدي ستونزې په برخه کې دکابل  ولايت داستيناف  محکمې رياست داستهدايې  په وړاندې لارښوونه وشوه چې دسترې محکمې دمصوبو او متحد  المالونو له مخې هغه يد حادث  چې ددعوا په بهير کې په مدعي بها رامنځته  کيږي  اعتبار نه لري له دې امله  څرنګه چې ددعوا د شکلياتو او ماهيت  څيړنه دمحکمو له دندو څخه  دى   ښه به وي واکمنه محکمه ديد حادث دلرې کولو او حقيقي ذواليد ته  دهغه داعاده کولو په باب دقانون له حکمونو سره سم لازم تصميم  ونيسي .
په همدې ترتيب  په تنفيذ کې داشکالو ديوې موضوع په اړوند ددايکنډي  ولايت داستيناف محکمې رياست داستهدايې  په باب لارښوونه وشوه چې په بحث وړ پريکړه کې په دې دليل چې ابتداييه هيئت دځمکې اندازه مشخصه کړې ده او دهغې له مخې  دبېې ټاکنه او دمحصول اخستل ترسره  شوي دي له دې امله پريکړه په همدې  محدوده کې دتطبيق  وړ ده او په نوروساحو کې دې ددولت دقضايه او اداره دعامه حقوقو دساتندوى په توګه په واکمنه  محکمه کې دعوا اقامه کړي .
دغه راز په دې باب  چې يوشمير اشخاص او افراد دشهيدانو او معلولينو رياست له لارې  دخپلو پخوا برابرو شويو  وثيقو دتصحيح غوښتونکي  دي دنافذو قوانينو او تعليمات نامو دحکمونو په رڼا کې  څرګنده شوه چې دوثيقيې  تصحيح په داسې  حال کې  چې دجعل او تزوير  تر ادعا لاندې  نه وي او دوثيقې  په حقيقت او ماهيت کې  دبدلون سبب  نه شي کوم خنډ  شتون نه لري اوهم که چيرې دشهيدانو ځينې نفقه خور پاتې کسان په پخوانۍ  وثيقه کې  له ليکنې څخه پاتې شوې وي موضوع دنوي وثيقې  دبرابرولو غوښتنه کوي او سربيره پردې په هغه صورت کې چې دحصر  دوثيقې  سرپارچه  دشهيد نفقه خورپاتې کسان شتون ونه لري   داړتيا دلرې کولو په خاطر دې دکندې له مخې  مثنى برابره او که چيرې دوثيقې کنده دپيښو له امله له منځه تللي وي دهمسالو او نظايروملاحظې  سره دې سرپارچې  ته اعتبار ورکړى شي چې دشهيدانو نفقه خورو وارثانو ته اسانتيا برابر ه شي .
دغه راز دکابل ولايت داستيناف محکمې رياست دپيشنهاد په وړاندې  داستيناف  محکمو دمدني ديواونو دچارو زياتوالي ته په پاملرنې  سره دوصايت خط او قيم خط  دوثيقو دبرابرولو صلاحيت دحصر وراثت  دوثيقو  دبرابرولو تر څنګ د سندونو او وثيقو دثبت امريتونو ته ورکړى شو او دقضايي  مرافق دتوحيد په مقصد دارالانشا ته لارښوونه وشوه چې په دې برخه کې خواره واره تصويبونه دې راټول  او دسترې محکمې دعالي  شورا يوې غونډې ته دې وړاندې کړي .
سربيره پردې دسترې محکمې دعالي شورا په غونډه کې  په مدني او جزايي قضيو  کې دمحکمې دبدلون  اووه غوښتن ليکونه هم د اجندا برخه وه  چې په هر مورد کې لازم تصميمونه ونيول شول .
  ختم_ عطاالله _ اکرم

کابل باختر دليندي  يو ويشتمه :
  دوه تنه ډار اچوونکي پرون په کندز ولايت کې ووژل شول .
د ٢٠٩ شاهين قول اردو دمطبوعاتو مسوول جکړن نصرت الله جمشيدي باختراژانس ته وويل چې  دغه ډار اچوونکي دکندز – خان اباد د لوى لارې په اوږدو کې دادم خان دوکان په ساحه کې له افغان پوځيانو سره په نښته کې ووژل شول.
  ده زياته کړه چې په دې نښته کې  درې تنه نور ډار اچوونکي ټپيان او دوه موټرسايکلونه دپوځيانو لاس ته ورغلي دي . 
ديوبل خبرله مخې، دملا باالحق  په نامه د ډار اچوونکو يو کليدي غړى دکندز ښار دشرکت بڼ په ساحه کې ددفاعي او امنيتي ځواکونو دپلټنې په بهير کې  ونيول شو .
  ختم_ عطاالله _ اکرم

کابل باختر دليندي  يو ويشتمه
د افغانستان د اسلامي جمهوریت جمهوررئیس محمد اشرف غني نن غرمه د افغانستان لپاره د ترکیې د نوي سفیر اوزان ارتورول باور لیک ومانه.
دجمهوررييس دوياند دفترباخترآژانس خبرورکړ
د ترکیې نوي سفیر د خپل هېواد د رهبرۍ د نېکو هیلو د وړاندې کولو ترڅنګ خپل باور لیک هم جمهور رئیس ته وړاندې کړ او په افغانستان کې  یې پر خپل ماموریت خوښي وښوده.
هغه زیاته کړه، هېواد به یې د افغانستان  له دولت او خلکو  سره په بېلابېلو برخو کې د همکار په توګه پاتې شي او د دواړو هېوادونو ترمنځ د اړیکو د لا پیاوړتیا په برخه کې به هراړخیزې هڅې وکړي.
د افغانستان لپاره د ترکیې نوي سفیر وویل: یو له کاري لومړیتوبونو څخه یې په افغانستان کې د ترکي کمپینو د پانګونې جذبول دي.
د هېواد جمهوررئیس د افغانستان لپاره د ترکیې نوي سفیر ښاغلي اوزان ارتورول ته  د نوي دندې مبارکې وویله او له افغانستان سره په امنیتي، اقتصادي، تعلیمي او ټولو برخو کې یې د هغه هېواد د همکاریو قدرداني وکړه.
جمهوررئیس محمد اشرف غني هیله څرګنده کړه چې د ترکیې د نوي سفیر په حضور سره به د دواړو هېوادونو ترمنځ مناسبات لا ټینګ شي او ترکیه هېواد یې د افغانستان دوست او دوامدار همکار وباله.پاى- ع

کابل باختر دليندي  يو ويشتمه
له حکومت سره د تابعیت د تذکرې پر بنسټ د رأی ورکوونکو د نوملېکنې او د نوملړ چمتو کولو طرحه شریکه شوه
د ټاکنو کمیسیون تیرو ټاکنیزو ننګونو او قانوني مکلفیتونو ته په کتو، په شرایطو پوره رأی ورکوونکي ثبتوي او د رأی ورکوونکو نوملړ چمتو کوي چې هر رأی ورکوونکی د رأی اچونې له یوه ځانګړې مرکز سره تړاؤ ولري.
د ټاکنو خپلواک کمیسیون د ټولو سیاسي ګوندونو، مدني ټولنو، حکومت او نړیوال همکارو بنسټونو په مشورې او موافقې پریکړه کړې چې د رأی ورکوونکو نوملېکنه په لاسې ډول او د تابعیت د تذکرې پر اساس ترسره کړي، د ټاکنو کمیسیون د لیندۍ (قوس) په ۱۹ نېټه ۱۳۹۶ کال د اړتیا وړ بودجې او د نوملېکنې عملیاتي طرح له حکومت سره رسماً شریکه کړه.
ددې طرحې پر بنسټ د هیواد ټول وګړي چې د تابعیت تذکرې ولري او د ۱۸ کلنۍ عمر یی بشپړ کړۍ وي د رأی ورکوونکي په توګه ثبت او د رأی ورکوونکو په نوملړ کې شاملیږي. د رأی ورکوونکو نوملېکنه په مرحله وار شکل ترسره کیږي د ولایتونو له مرکزونو څخه پیل، د کلیو او بانډو په کچه به دوام کوي. د مهال وېش له مخې د نوملېکنې ټول ټیمونه، د رأی اچونې په ټولو (نژدې ۷۰۰۰ څخه زیات) مرکزونو کې به شتون ولري او د رأی اچونې په شرایطو پوره کسانو، نوملېکنه کوي.
د نوملېکنې په هر مرکز کې به د ښځو لپاره ځانګړې ځایونه رامنځته کیږي. د ټاکنو کمیسیون د نوملېکنې بهیر د پلان له مخې د راتلوونکې کال په حمل میاشت کې پیل کوي.
د رأی اچونې په شرایطو پوره کسان کولای شي د نوملېکنې تر ټولو نژدې مرکز ته لاړ شي او د تذکرې په وړاندې کولو سره، ځان ثبت کړي، د معلوماتو تر ثبت وروسته، د نوملېکنې تصدیق چې د ځانګړو امنیتي ځانګړنو او یوې واحدې شمېرې درلودونکی دی د تذکرې پر شا سلېښ کیږي او د رأی اچونې په ورځ، رأی ورکوونکی د تصدیق لرونکې تذکرې په وړاندې کولو سره کولای شي خپل د رأی ورکونې حق وکاروي.
د رأی ورکوونکو راټول شوي معلومات د ټاکنو کمیسیون معلوماتي بانک ته دننه کیږي او د رأی ورکوونکو نوملړ ورڅخه چمتو کیږي. د ټاکنو خپلواک کمیسیون د خلکو د عامه پوهاوي د کچې لوړولو په موخه د عامه پوهاوي هر اړخیزې برنامې په لاره اچوي.
د نفوسو د احوالو د ثبت اداره د هیواد ۱۰ میلیونه وګړو ته چې لا تر اوسه یی د تابعیت تذکره نه وي اخیستې، د نوملېکنې د بهیر د پیلولو څخه دمخه، د تابعیت تذکرې ورته ویشي. پاى- ع

 

کابل باختر دليندي  يو ويشتمه
د ټاکنو کمیسیون تیرو ټاکنیزو ننګونو او قانوني مکلفیتونو ته په کتو، په شرایطو برابر رأی ورکوونکي ثبتوي او د رأی ورکوونکو نوملړ چمتو کوي چې هر رأی ورکوونکی د رأی اچونې له یوه ځانګړې مرکز سره تړاؤ ولري.
د ټاکنو خپلواک کمیسیون د ټولو سیاسي ګوندونو، مدني ټولنو، حکومت او نړیوال همکارو بنسټونو په مشورې او موافقې پریکړه کړې چې د رأی ورکوونکو نوملېکنه په لاسې ډول او د تابعیت د تذکرې پر اساس ترسره کړي، د ټاکنو کمیسیون د١٣٩٦ کال د لیندۍ (قوس) په ۱۹ نېټه د اړتیا وړ بودجې او د نوملېکنې عملیاتي طرحه له حکومت سره په رسمي ډول شریکه کړه.
ددې طرحې پر بنسټ د هیواد ټول وګړي چې د تابعیت تذکرې ولري او د ۱۸ کلنۍ عمر یی بشپړ کړۍ وي د رأی ورکوونکي په توګه ثبت او د رأی ورکوونکو په نوملړ کې شاملیږي. د رأی ورکوونکو نوملېکنه په پړوايزډول ترسره کیږي د ولایتونو له مرکزونو څخه پیل، د کلیو او بانډو په کچه به دوام کوي. د مهال وېش له مخې د نوملېکنې ټول ټیمونه، د رأی اچونې په ټولو (نژدې ۷۰۰۰ څخه زیات) مرکزونو کې به شتون ولري او د رأی اچونې په شرایطو برابرو کسانو، نوملېکنه کوي.
د نوملېکنې په هر مرکز کې به د ښځو لپاره ځانګړې ځایونه رامنځته کیږي. د ټاکنو کمیسیون د نوملېکنې بهیر د پلان له مخې د راتلوونکې کال په وري میاشت کې پيلوي
د رأی اچونې په شرایطو برابر کسان کولای شي د نوملېکنې تر ټولو نژدې مرکز ته لاړ شي او د تذکرې په وړاندې کولو سره، ځان ثبت کړي، د معلوماتو تر ثبت وروسته، د نوملېکنې تصدیق چې د ځانګړو امنیتي ځانګړنو او یوې واحدې شمېرې درلودونکی دی د تذکرې پر شا سلېښ کیږي او د رأی اچونې په ورځ، رأی ورکوونکی د تصدیق لرونکې تذکرې په وړاندې کولو سره کولای شي خپل د رأی ورکونې حق وکاروي.
د رأی ورکوونکو راټول شوي معلومات د ټاکنو کمیسیون معلوماتي بانک ته دننه کیږي او د رأی ورکوونکو نوملړ ورڅخه چمتو کیږي. د ټاکنو خپلواک کمیسیون د خلکو د عامه پوهاوي د کچې دلوړولو په موخه د عامه پوهاوي هر اړخیزې پروګرامونه عملي کوي
د وګړو د احوالو د ثبت اداره د هیواد ۱۰ میلیونه وګړو ته چې لا تر اوسه یی د تابعیت تذکره نه وي اخیستې، د نوملېکنې د بهیر له پیلولو څخه دمخه، د تابعیت تذکرې ویشي.پاى- ع

Page 1 of 5870