26 May 2020

RSS Facebook

سوداگریز


تازه خبرونه

د کرونا په اړه بې پروا چلند ستر ناورین رامنځ ته کولای شي

د کرونا په اړه بې پروا چلند ستر ناورین رامنځ ته کولای شي

کابل / د غبرګولي ۶ مه / باختر د کروناویروس خپرېدا...

د ملي امنيت شورا سلاکار پکتيا ته سفر وکړ

د ملي امنيت شورا سلاکار پکتيا ته سفر وکړ

- کابل / د غبرګولي ٦ مه / باختر د ملي...

Youtube Player

khantry design

سوداگریز

سوداگریز

کابل / د غبرګولي ۶ مه / باختر

د کروناویروس خپرېدا د مخنیوي لپاره د ګڼو هېوادونو کوښښونو لا کومه مثبته پایله نه ده ورکړې. د درېمې نړۍ هېوادونه خو د خیر پر غوڼدۍ ناست دي او منتظر دي چې  پرمختللي هېوادونه د کرونا ویروس واکسین اوهمدارنګه د کوویډ-۱۹ ناروغۍ درمل جوړ کړي او بیا یې دوی ته هم ورکړي. له بده مرغه د وروسته پاتي هېوادونو برخلیک همداسې دی. په دغه راز حالت کې باید څه وشي؟

د باختر آژانس مفسر دې پوښتنې ته د ځواب موندلوکوښښ کړی دی او لیکي:

ترهغو چې د کرونا ویروس واکسین او درمل جوړېږي، د دغه سترآفت پر وړاندې د  درېدو او مقابلې مسوولیت د هرهېواد حکومت او خلکو ته متوجه دی. کله چې په هرات کې د کرونا ویروس مثبتې پېښې ثبت شوې، حکومت او خلکو سملاسي غبرګون وښود او اړین تدابیر یې ونیول. په کابل او همدارنګه یو شمېر نورو ښارونوکې قرنطین نافذ شو، د ماسکونو او دستکشو کارول ډېر شول، ټولنیز واټن رعایت کېده او نور اړین تدابیر هم عملي کېدل؛ خو له بده مرغه دغو تدابیرو ډېر دوام ونه موند او په روژه کې خلکو له رسمی اعلان پرته قرنطین مات کړ. حکومت هم د روژې په درناوي د قرنطین پر ماتېدو سترګې پټې او غوږونه کاڼه کړل، چې نه څه ګوري او نه څه اوري. پایله دا شوه چې کرونا په چټکۍ خپره شوه. که پخوا به د ورځې لس ګونه مثبتې پېښې ثبتېدې، اوس دا شمېر سل ګونو ته رسېدلی دی.

د رپوټونو له مخې د افغانستان په ختیځو ولایتونو کې کرونا دومره خپره شوېده چې په هر کور کې دوه او درې پرې اخته دي. دا چې د کرونا په اړه تبلیغاتو یو ډول منفي ذهنیت رامنځ ته کړ، نو هلته خلک وایي چې په محرقه اخته شوي دي. په داسې حال کې چې د ډاکټرانو په وینا د خپرې شوې ناروغۍ ټولې نښې د کرونا دي، خو خلک له ټولنیز شرمه هغه کرونا نه بولي او وایي محرقه ده.

که حالت همداسې دوام ومومي، نو شک نشته چې یو ستر بشري ناورین د پېښېدو په  درشل کې دی. د افغانستان سیاسي، پوځي، ټولنیز او اقتصادي وضعیت د دغه راز ناورین زغم نه لري او که خدای مه کړه دا ناورین رامنځ ته شو، نو هېواد به مو د تباهۍ کندې ته ولوېږي.

 اوس هم وخت شته چې موږ د دغه راز ناورین مخه ونیسو. هر څه زموږ په خپل لاس  کې دي. لکه په پيل چې وویل  شول هم حکومت مسوولیت لري او هم خلک. دا د حکومت مسوولیت دی چې خلک مجبور کړي قرنطین رعایت کړي، ټولنیز واټن وساتي او د عامې روغتیا وزارت لارښوونې عملي کړي.

همدارنګه  خلک باید له خپل ژوند سره لوبې ونه کړي او د قرنطین په رعایتولو کې له حکومت سره مرسته او همکاري وکړي. د هغو پرخلاف غوڅ چلند ته اړتیا ده چې کرونا لا ټوکې ګڼي، یوه جوړه شوې ډرامه یې بولي او د قرنطین شرایط نه رعایتوي. موږ باید دغه راز بې پروا خلکو ته اجازه او فرصت ورنه کړو چې د ټول ملت ژوند له ګواښ سره مخ کړي.

ن.ش.

 

 کابل / د غبرګولي ٦ مه / باختر
د هرات د عامې روغتيا رياست، په دغه ولايت کې نن کرونا ويروس د اخته کسانو د ٨٥ نويو مواردو د ثبت خبر ورکړ.
د باختر آژانس د خبر له مخې؛ د هرات د عامې روغتيا رياست په خبرپاڼه کې ويل شوي دي چې په تېرو ٢٤ ساعتو کې په دغه ولايت د کرونا ويروس ٨٥ مثبتې پېښې  ثبت شوې دي.
د دغې خبرپاڼې د معلوماتو له مخې؛ د دغو پېښو په ثبت سره په هرات کې په کرونا ويروس د ټولو اخته کسانو شمېر يو زرو ٨٥٨ ته ورسېد.
ختم - ج -اکرم

- کابل / د غبرګولي ٦ مه / باختر
د ملي امنيت شورا سلاکار ډاکټر حمدالله محب نن سهار پکتيا ته سفر وکړ.
د باختر آژانس د سيمه ييز خبريال د خبرله مخې؛ په دغه سفرکې ټاکل شوې ده د ملي امنيت شورا سلاکار د پکتيا له پوځي او ملکي مسوولينو، د ولايتي شورا له غړو، يوشمېر قومي مشرانو، د ځوانانو له استازو او د دغه ولايت د امنيتي او دفاعي ځواکونو له سرتېرو سره په دغه ولايت کې د روان حالت په اړوند ليده کاته او خبرې اترې وکړې.
په دې کتنه کې دغه راز د دغه ولايت د ملکي او پوځي برخو ستونزې څېړل کېږي او د هغو د څېړنې په خاطر عملي لارې چارې مشخصې کېږي.
ختم - ج - اکرم

 کابل / د غبرګولي ٦ مه / باختر
د فارياب په پښتون کوټ ولسوالۍ کې د وسله والو طالبانو د يوه قوماندان په کورکې  تېره شپه د ماين چاودنو له امله د هغه د کورنۍ پنځه تنه غړي ووژل شول.
باختر آژانس د شاهين قول اردو د خبرپاڼې له مخې چې نن خپره شوه؛ خبر راکړ چې دغه چاودنه د فارياب د پښتون کوټ ولسوالۍ په تيلان کلي کې د وسله والو طالبانو د سيمه ييز قوماندان محمد ظاهر په کورکې رامنځته شوه چې په پايله کې د دغه قوماندان دوه زامن، دوه لورګانې او مېرمن ووژل شول.
ختم - ج - اکرم

 کابل / د غبرګولي ٦ مه / باختر
د بلخ د عامې روغتيا رياست په کرونا ويروس د دغې ادارې د ٧٠ روغتيايي کارکوونکو د اخته کېدو خبر ورکړ.
باختر آژانس د بلخ د عامې روغتيا رياست د خبرپاڼې له مخې خبر راکړ؛ تراوسه د ٤٢ ډاکټرانو او د لابراتوار د ١٧ کارکوونکو، ٤ نرسان او د ٤ روغتياپالانو او د روغتيايي برخې د درېيو نورو روغتيايي کارکوونکو په ګډون د دغې ادارې ٧٠ کارکوونکي په کرونا ويروس اخته شوي دي.
د دغې ادارې په خبرپاڼه کې چې نن خپره شوه؛ ويل شوي دي چې په تېرو ٢٤ ساعتوکې په بلخ کې د کرونا ويروس ٧٧ نوې پېښې ثبت شوې دي چې په دې سره، په دغه ولايت کې په کرونا ويروس د اخته کسانو شمېر ٨٥٧ ته ورسېد.
ختم - ج -اکرم

 کابل / د غبرګولي ٦ مه / باختر
وسله والو طالبانو تېره شپه د بدخشان د خواهان ولسوالۍ د حوض شاه پر سيمې بريد وکړ چې د تلفانو په ورکولو سره تېښتې ته اړ شول.
د بدخشان د والي وياند نېک محمد نظري د باختر آژانس سيمه ييز خبريال ته وويل: د طالبانو ډله سره له دې چې د نېکمرغه کوچني اختر په درېيو ورځوکې اوربند اعلام کړى دى؛ خو د دې پرخلاف له درېيو شپو راپدېخوا هغوى د خواهان ولسوالۍ د حوض شاه پر سيمو بريدونه ترسره کړل چې د امنيتي او دفاعي ځواکونو له مقاومت سره مخ شول او د تلقاتو په ورکولو سره وتښتېدل.
هغه زياته کړه: په بريدونو کې ١٥ يرغلګرو طالبانو ته مرګ ژوبله واوښته او يو سيمه ييز پوليس هم شهيد شو او دوه نور يې ټپيان شول.
نظري وويل چې دغه راز  وسله والو طالبانو يوه شپه مخکې د راغستان ولسوالۍ پر امنيتي پوستو بريدونه وکړل چې د امنيتي ځواکونو له مقاومت سره مخ شول او په پايله کې درې تنه طالبان ووژل شول او پنځه نور يې ټپيان شول.
ختم - ج - اکرم

 کابل / د غبرګولي ٦ مه / باختر
سره له دې چې خلکو اختر د کرونا ويروس د خپرېدو له امله په سختو شرايطو کې  تېر کړ؛ خو د طالبانو او حکومت ترمنځ اوربند د خوښي وړ وباله او د هغه د دوام غوښتنه يې وکړه.
د ولايتونو يوشمېر اوسېدونکو د باختر آژانس له سيمه ييزو خبريالانو سره په اړيکه کې د دغه اوربند هرکلى وکړ او ويلي يې دي چې که څه هم د قرنطين په شرايطوکې په خپلو کورونوکې دي؛ خو له رواني پلوه په آرام حالت او د جګړې او ټوپک د ډزو له اندېښنې پرته په خپلو کورونو کې وو او له دې پلوه آرامه وو.
د پلخمري ښار اوسېدونکى حسام الدين د باختر آژانس خبريال ته وويل چې ژوند ډېر ښکلى دى؛ که چېرې خلک له جګړې او وينې توييدنې څخه آرامه وي او نور جګړه د خلکو روح او روان ګډوډ نه کړي.
هغه وويل: د اختر درې ورځې که څه هم د کرونا ويروس د خپرېدو د اندېښنو تر اغېز لاندې تېرې شوې؛ خو خلک له اوربند څخه خوشحاله و او اوربند د خلکو لپاره يوه هيله ده.
د لغمان د مهترلام ښار اوسېدونکى عبدالمالک په دې باور دى: که چېرې اوربند دوام وکړي؛ د جګړې د ښکيلو لورو ترمنځ باور زياتېږي او د ښکيلو لورو ترمنځ د باور او اعتماد په فضا کې قضيې ډېر ژر حل کېږي او په هېواد کې سوله تامنېږي.
د مهترلام دغه اوسېدونکى چې ځان ښوونکي معرفي کړ؛ وويل: ٤٠ کاله جګړه زموږ هېواد په تېره بيا د ښوونې او روزنې، علم او پوهنې برخې زيانمنې کړې دي او زموږ هېواد د پرمختګ له کاروان څخه ډېر وروسته پاتې دى.
د لوګر د پل علم اوسېدونکى احمد الله وويل چې اوربند د خوښۍ خبر و چې د روژې  په وروستۍ شپه مې واورېد او دغه د خوښۍ خبر د اختر خوشحالي دوه برابره کړه.
هغه وويل: د هېوادوالو ترمنځ سوله او روغه جوړه خوند لري او بايد دواړه لوري د دين په امر جګړه په داسې شرايطو کې چې د کرونا ويروس زموږ د خلکو لمنه نيولې ده؛ له لوړتيا غوښتنې څخه تېر شي او د هېواد او خلکو ګټې په پام کې ونيسي او سوله وکړي.
په همدې ترتيب د باختر آژانس د سيمه ييزو خبريالانو د خبرونو له مخې؛ د هېواد ټول اوسېدونکي په تېره بيا د طالبانو تر ادارې لاندې  سيموکې خلکو د دغه اوربند هرکلى  او ملاتړ وکړ او د هغه د دوام غوښتنه يې وکړه.
د طالبانو مشرتابه د روژې مياشتې په وروستي ماښام د اختر په درېيو ورځوکې اوربند اعلام کړ چې د هېواد جمهوررييس د هغه هرکلى وکړ او د باور فضا د رامنځته کولو په خاطر يې د ١٠٠٠ بندي طالبانو د خلاصون فرمان صادر کړ.
باختر آژانس ته د رارسېدلو خبرونو له مخې؛ د اختر په درېيو ورځوکې په ټول افغانستان کې اوربند تر زياتې اندازې پورې رعايت شوى دى.
ختم - ج - اکرم

 کابل / د غبرګولي ٦ مه / باختر
يوه مور او د هغه درې بچيان پرون د قندهار په ميانشين ولسوالۍ کې د ماين په چاودنه کې شهيدان شول.
باختر آژانس د قندهار د والي دفتر د خبرپاڼې له مخې خبر ورکوي چې د دغو ملکي کسانو د سپرلۍ موټر د قندهار د ميانشين ولسوالۍ په مربوطاتوکې په ماين وخوت چې د چاودنې په پايله کې يې يوه مور له خپلو درېيو بچيانو سره شهيده شوه او د دغې کورنۍ يوبل غړى چې موټر چلوونکى و؛ ټپى شو.
دغې کورنۍ غوښتل د روزګان ترينکوټ ښار ته لاړ شي.
ختم - ج -اکرم

 کابل / د غبرګولي ٦ مه / باختر
د کابل ښاروالۍ د ټولنيزو او فرهنګي خدمتونو معين څېړنوال محمد فاضل شريفي په کابل ښارکې پر مستحقو کسانو د وچې ډوډۍ د وېش بهير وڅېړه.
د باختر آژانس د خبر له مخې؛ د دغې څېړنې په بهيرکې د کابل ښاروالۍ معين د ډودۍ د وزن او کيفيت، فردي روغتيا، په ليکوکې د درېدو او نور ضروري مواردو څرنګوالى وڅېړه.
هغه څرګنده کړه چې نانوايي ګانې بايد د ډوډۍ د ټاکلي وزن او کيفيت د په پام کې نيولو ترڅنګ، د کرونا ويروس د خپرېدو د مخنيوي په موخه د عامې روغتيا وزارت روغتيايي لارښوونو ته جدي پاملرنه وکړي او خلکو ته ښه خدمتونه وړاندې کړي.
ختم- ج - اکرم

 کابل / د غبرګولي ٦ مه / باختر
د ملي امنيت شورا اعلام کړى دى چې د طالبانو ٩٠٠ بنديان آزادېږي.
د باختر آژانس د خبر له مخې؛ د ملي امنيت شورا ټينکار ګړى دى چې د طالبانو دغه بنديان د سولې، د جګړې د پاى ته رسولو، د اوربند د دوام او د مستقيمو خبرو د پيل لپاره د هڅو د برياليتوب په موخه له بند څخه آزادېږي.
د يادونې وړ ده چې حکومت تراوسه د طالبانو ١٢٠٠ بنديان آزاد کړي دي.
ختم- ج - اکرم

Page 1 of 8773