19 October 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

 

کابل/ د تلې ۲۸مه/ باختر

د ازبکستان د صدراعظم مرستیال او د پانګونې او بهرنۍ سوداګرۍ وزیر سردار اوکتامویچ امورزاکوف د یو لوړپوړي دولتي پلاوي په مشرۍ سبا افغانستان ته راځي او د هېواد له چارواکو سره د همکاریو د پراختیا او کابل او تاشکند تر منځ د دوه اړخیزو اړیکو د پياوړتیا په هکله خبرې اترې کوي.

په دې سفر کې به  پلاوی د جمهوررييس له لومړي مرستیال امرالله صالح، د بهرنیو چاروله  سرپرست وزیر محمد حنیف اتمر، د جمهوررييس د دفتر له عمومي رییس محمد شاکر کارګر، د کار او ټولنیزو چارو له سرپرست وزیر بشیراحمد تینج، د سوداګرۍ او صنایعو له سرپرست وزیر نثار احمد غوریانی، ذ ټولګټو  چارو وزارت له سرپرست نجیب الله یمین، د ترانسپورت له سرپرست وزیر قدرت الله ذکی او همدارنګه درېل پټلۍ له عمومي رئیس محمد یما شمس او برښنا شرکت له عمومي رئیس احمد داود نورزي سره وګوري.

د دواړو هېوادونو چارواکي به د دوه اړخیزو سیاسي، اقتصادي، امنیتي او فرهنګي اړیکو د پياوړتیا او د سوداګرۍ او ترانزیت، سیمه ییز پیوستون او ګډو زيربنايي پروژو په برخه کې د همکاریو پر پراختیا خبرې وکړي. همداراز، تمه ده چې د همدې سفر په ترڅ کې به د افغانستان د کار او ټولنیزو چارو او دکرنې، مالدارۍ او اوبو لګولو وزارتونه  له پلاوي سره د همکارۍ تړونونه هم لاسلیک کړي.




 

 

کابل / د تلې ۲۸مه/باختر

د افغانستان بهرنیو چارو وزارت د دېورند فرضي کرښې له پورې غاړې د کونړ  پر مرورې  ولسوالۍ د پاکستان پوځ راکټي بریدونه په خورا سختو ټکو غندي او د دا ډول بریدونو د دوام په هکله خپله اندېښنه اعلانوي.

په دې برید کې چې د شنبې په شپه د تلې په ۲۷/۲۶ مه شپه د ۲۵ توغنديو په توغولو د مرورې ولسوالۍ پر مسکوني سیمو شوي، زموږ یو تن ملکي هېودوال شهید او درې تنه ماشومان ټپيان شوي دي.

د بهرنیو چارو وزارت زموږ د بې ګناه ملکي هېوادوالو پر شهادت او ټپي کېدوخپل د خواشینۍ ژور مراتب څرګندوي او اعلاموي چې په داسې حال کې چې افغانستان له پاکستان سره تل د نېکو اړیکو غوښتونکی دی، دافغانستان پر خاوره د دغه هېواد د راکټي بریدونو دوام د دواړو هېوادونو اړیکو ته سخت زیان رسوي. د دا ډول بریدونو دوام په افغانستان او پاکستان کې د سولي او ټيکاو په ګټه نه دی او دا بریدونه د پاکستان د هغو ژمنو خلاف عمل دی چې د افغانستان او پاکستان د دوه اړخیزو اړیکو د پیاوړتیا او پاللو په برخه کې یې کړې دي.




 

ګردیز دتلې ۲۸ باختر
په پکتیا کې د اوبو د یو کانال په جوړولو سره به د سلګونو جریبه کرنیزې ځمکې د اړتیا اوبه برابرې شي .
دغه کانال د ٧١٣ مترو په اوږدوالي د ګټې اخیستنې په حال کې دی .
د پکتیا د کلیو د بیا رغونې او پراختیا ریاست مسوول د باختر اژانس خبریال ته وویل ټاکل شوې ده د دغه کانال په ګټې اخیستنې سره په سلګونو جریبه کرنیزه ځمکه خړوبه شي.
د اریوب ځاځیو په ولسوالۍ کې بزګران وايي هغه ځاى کې چې دغه کانال جوړېږي اوبه به يې د دوی کرکیلې ته زیات ګټه ورسوي . پای - سعیده

کابل/ د تلې٢٨مه / باختر
استماعيه غونډې نن د ماليې  وزارت د ملي بودجې لوى رييس سيد نصيراحمد په مشرۍ د دغه وزارت په مقر کې جوړې شوې او د څو دولتي ادارو بودجوي اړتياوې واورېدل شوې.
د ماليې وزارت د خبرپاڼې له مخې : په دې غونډو کې  چې د مدني تولنې استازو هم ګډون کړي وو د ملي دفاع  او د کار او تولنيزو چارو وزارتونو د انتخاباتو د خپلواک  کمېسيون ، د ولسي جرګې د دارلانشا د لوى رياست د څېړنې د عالي ادارې او د اساسي قانون پرتطبيق د څارنې  خپلواک کمېسيون خپلې بودجوې اړتياوې غونډې ته وړاندې کړې  چې د بودجې د کميټې له  خوا  پرې خبرې وشوې.
د ماليې وزارت د بودجې لوى رييس وويل؛ چې دولتي ادارې دې بايد  خپلې بودجوي اړتياوې د حکومت د مالي امکاناتو په پام کې نيولو  او د غيرضروري لګښتونو د مخنيوي ، د شفافيت  د اصل د تامينولو ، د خلکو د ستونزو د څېړنې  او د پرمختيايي لومړيتوبونو  له مخې په پام کې ونيسي.
د يادونې وړده چې په دغوغونډو کې  دولتي ادارې خپلې بودجوي اړتياوې وړاندې کوي او د بودجې کمېټه هغه د مالي امکاناتو او د نافذو قوانيو له په پام ګې نيولو سره  د بودجې په طرحه کې شاملوي.
پاى \ج\  ذ


 

کابل/ د تلې٢٨مه / باختر
وسله والو طالبانو تېره شپه د بغلان د کيله ګې په مربوطاتو کې د امنيتي اودفاعي ځواکونو پرپوستو پراخ بريد وکړ چې د افغان ځواکونو له مقاومت سره مخ شول.
د بغلان د امنيې قوماندانۍ وياند جاويد بشارت و ويل چې امنيتي اودفاعي ځواکونه د دښمن  له دغه پروګرام څخه په خبرېدو سره د وسله والو طالبانو پرسنګرونو بريدونه وکړل چې په پايله کې ٧ وسله وال طالبان و وژل  شول  او  ٨ نور ټپيان شول.
هغه زياته کړه په نښته کې د دښمن يوه اندازه وسلې او مهمات د افغان ځواکونو لاسته ورغلي دي.
پاى  \ ذ

کابل/ د تلې٢٨مه / باختر
په پنجشيرکې د شلو پرمختيايي پروژو کار مخ په بشپړېدو دي او ډېر ژر به ګټې اخيستنې ته وسپارل شي.
د پنجشير د کليو د بيارغاونې او پرمختيا رييس ضياالدين اميري باختراژانس ته و ويل.
په دغو پروژو کې د اوبو کانالونه،  د اوبورسولو شبکه،  د کليوالي سړکونو،  پل او د استنادي ديوالونو جوړول شامل دي چې د دغه ولايت په ٧ ولسواليو کې د جوړولو په حال کې دي او ډېر ژر به پرانستل شي.
هغه وويل چې يادې پروژې د کليو د بيارغاوني او پرمختيا وزارت له بودجې څخه د ٧٠ ميليونو افغانيوپه لګښت جوړېږي او په بشپړېدوسره به يې  د پنجشيرخلکوته اسانتياوې برابرې شي.
پاى  \ ذ

 

کابل د تلې ۲۸ باختر
وسله والوطالبانو د بغلان په نهرین ولسوالۍ برید وکړچې د امنیتي او دفاعي ځواکونوله مقاومت سره مخ شول.
د بغلان د نهرین ولسوال فضل الدین مرادي باخترآژانس ته وویل: وسله والو طالبانو د نهرین ولسوالۍ د ودانۍ د نیولوپه خاطربرید وکړ.
هغه زیاته کړه: د دغې جګړې په پایله کې درې وسله وال طالبان و وژل شول او پنځه نورټپیان شول او له ساحې څخه وتښتېدل.
د یوبل خبرله مخې: یو وسله وال طالب پرون د نهرین په بزدرې کلي کې د پوځیانوپه هوايي برید کې و وژل شواو دوه نورټپیان شول.
پای -ع

تالقان دتلې ۲۸ باختر
د تخار پولیسو په دوو جلا جلا عملیاتو کې تېره شپه د تالقانو ښار په مربوطاتو کې د انسان تښتونې ،غلاو د انسان د قاچاقو په تور څلور تنه نیولي دي .
د تخار د امنیه قوماندان مل پاسوال اکرام الدین سریع د باختر اژانس خبریال ته وویل چې نیول شویو کسانو د انسان تښتونې ،غلاو د انسان د قاچاقو په څو پېښو کې لاس درلود .
د تخار امنیه قوماندان زیاته کړه چې له دې وروسته د مجرمینو او د امنیت ګډوډونکو په نیولو کې جدي اقدام کېږي . پای سعیده

 

کابل/ د تلې٢٨مه / باختر
د افغانستان د بشر د حقوقو خپلواک کميسيون  له حکومت څخه غوښتي چې د مجرمانو پروړاندې  د عادلانه عدالت اصول رعايت کړي.
د باختراژانش د خبرله مخې:  د بشر د حقوقو خپلواک  کميسيون  د يوې اعلاميې په خپرولو سره د دې ترڅنګ چې په هېواد کې مخ  په زياتېدونکي جرمونو د زياتوالي له امله اندېښنه څرګنده کړې ده  د افغانستان له امنيتي بنسټونو  غوښتي دي چې له جنايي جرمونو سره د مخامخ کېدو په وخت کې  د هغوى انساني  کرامت ته  درناوى وکړي.
دغه اعلاميه کېداى شي د افغانستان حکومت د دوو جګپوړو مقاماتو د څرګندونو پر وړاندې غبرګون وي  چې په مجرمينو يې د ډزو لارښونه کړې ده.
د بشر د حقوقو  خپلواک کميسيون په هېواد کې د جنايي جرمونو د زياتوالي له امله اندېښنه څرګنده کړه او ويلي يي دې چې د جنايي جرمونو زياتوالى  د خلکو جسمي او روحي امنيت له خطر سره مخ کړى دى.
دغه کميسيون د افغانستان حکومت څخه غواړي چې په هېواد کې د جنايي جرمونو د کچې د کمښت په خاطر جدي تدابير ترلاس لاندې ونيسي خو د مجرمينو د نيولو ترڅنګ بايد په هېواد کې  د جنايي جرمونو د رامنځته کېدو عوامل او جرړې وڅېړي.
دغه راز د دغه کميسيون په اعلاميه کې ويل شوي دي چې د هېواد امنيتي مسوولين دي بايد له جنايي مجرمينوسره د مخ کېدو په وخت کې د هغوى د انساني کرامت درناوى وکړي او د عادلانه عدالت اصول رعايت کړي.
پاى \ سعيده\ ذ

 

کابل/ د تلې ۲۸ / باختر
د هېواد د کرکټ بورد د پریکړې پربنسټ ، په نږدې راتلونکې کې به د ٢٣ کلنې څخه ښکته د کرکټ ټیم جوړ شي .
د کرکټ بورد ویاند فرید هوتک د باختر اژانس خبریال ته وویل چې د دغه ټیم په جوړولوسره د ٢٣ کلنې څخه ښکته د یو شمېر بهرنیو هېوادنو له ټیمونو سره به سیالۍ تر سره شي  .
دی دغه راز وایی په دغه ټیم کې د افغانستان د نولس کلنو ځوانانو د کرکټ ټیم پیاوړي لوبغاړي چې د تېر کال په نړیوال جام کې ګډون درلود هم شته .
کرکټ بورد وایي دغه کار په راتلونکې کې د ځوان ملي ټیم په موخه تر سره کېږي چې په ورزشي سیالیو کې پیاوړی ګډون ولري . پای سعیده
 

Page 1 of 9047