15 September 2019

RSS Facebook

سوداگریز


تازه خبرونه

د خواجه ملک سبزعلي تاريخي څلى بيا رغاول کېږي

د خواجه ملک سبزعلي تاريخي څلى بيا رغاول کېږي

کابل/ باختر/ د وږي٢٣مه په لوګرکې د خواجه ملک...

په بغلان کې له ازبکستان څخه د وارداتي برېښنا د ستنې ويجاړېدل

په بغلان کې له ازبکستان څخه د وارداتي برېښنا د ستنې ويجاړېدل

کابل/باختر/ د وږي ۲۳ مه وسله والو طالبانو بيا هم تېر...

Youtube Player

khantry design

سوداگریز

سوداگریز

کابل/باختر/ د وږي ۲۳ مه
په ننګرهار کې له څو ورځو کار بندیز وروسته نن يوځل بیا روغتیاپالانو په کار پیل وکړ.
په دغه ولایت کې له هغې وروسته روغتیاپالانو د کار بندیز اعلام کړ چې په جلال آباد ښارکې د ډاکټرانو اتحاديې رييس ډاکټر نوروز شینواری په بمي چاودنه کې شهيد کړاى شو.
دوی وایي: د مافیایي کړیو له لوري ترې باج غوښتل کېږي او که یې ورنه کړې په مرګ یې ګواښي. دوی امنیتي مسوولین د ښار د امنیت په ټینګښت کې پر پاتې راتلو تورنوي.
ویل کېږي روان کال په ننګرهارکې ۸۳ روغتیاپالان له بېلابېلو ګواښونو سره مخ شوي دي. درې تنه یې شهيدان شوي، ١١ یې تښتول شوي د روغتیاپالانو ٩ کتنځي په بمونو الوزول شوي او پنځه روغتیا پالان له هېواد څخه بهرنیو هېوادونو ته تللي دي .
په همدې حال کې د ننګرهار ولایتي اداره د روغتیاپالانو کاربندیز د حل لار نه ګڼي او زیاتوي چې د روغتیاپالانو د خونديتوب لپاره يې هڅې روانې دي.
د ننګرهار د والي  ویاند عطاالله خوږیاڼی وایي: د روغتیاپالانو پر وړاندې یې ستونزې له پامه نه دي غورځول شوې او هڅې پيل شوې چې له دوی سره له سلامشورې وروسته ورته د حل لار پیدا کړي.
ټاکل شوې ده د ننګرهار د والي په وړانديز او د ملي امنيت شورا په همغږۍ روغتیاپالان نن د ويډيو کنفرانس له لارې، د حل په موخه خپلې ستونزې له جمهوررییس سره شريکې کړي.
پای/وصال


 

کابل/باختر/ د وږي٢۳ مه
پوځيانو د غزني ولايت په مقر ولسوالۍ کې په عملياتو کې د وسله والو طالبانو د ماين جوړولو يوه کارخانه او جنګي وسايل له منځه يوړل.
په عملياتوکې ١٨ وسله وال طالبان هم وژل شوي دي.
د  ٢٠٣ تندر قول اردو د مطبوعاتي دفتر سرپرست ايمل مومند باختر آژانس ته وويل  چې د پوځيانو دغه عمليات د غزني ولايت د مقر ولسوالۍ په زرداد کلي کې د ائتلاف هوايي حواکونو په ملاتړ وشول چې په پايله کې د وسله والو طالبانو د زياتو جنګي وسايلو په ګډون د هغوى د ماين جوړولو يوه کارخانه له منځه وړل شوې ده او ١٨ طالبان هم وژل شوي دي.
هغه زياته کړه چې په عملياتوکې ١٦٠ ماينونه، يو زرو ٥٠٠ کيلوګرامه چاوديدونکي توکي، ٢٦ موټرسايکلونه، يو فولډر موټر، پنځه کلاشينکوفونه، دوه پيکا ماشينګڼې، يو توغندى ويشتوونکى، د توغندي ويشتوونکي ١٥ ماينونه، د داشکې ٥٠٠ ګولۍ، دپيکا  ١٠ زره ګولۍ، ٢٠ جوړې پوځي جامې او پنځه مخابرې له منځه وړل شوې دي.
د يو بل خبر له مخې:
د غزني د والي وياند وايي چې درې وسله وال طالبان تېره شپه د دغه ولايت د اندړو ولسوالۍ په مربوطاتوکې د ائتلاف هوايي ځواکونو په بريدکې ووژل شول.
ختم-ج – اکرم

کابل/باختر/ د وږي٢۳ مه
د پاکستان د لښکر طيبه تروريستي ډلې د استخباراتو يو مهم غړى په ننګرهارکې  ونيول شو.
امنيتي ځواکونو ملا ابرار په روداتو ولسوالۍ کې له پېژندلو وروسته کله يې چې غوښتل مقاومت وکړي؛ په ډزو سره ټپي کړ او و يې نيو.
د ننګرهار د والي وياند عطاالله خوږياڼي وويل چې ملا ابرار په ننګرهارکې د نويو ډار اچوونکو بريدونو په سازمان ورکولو بوخت و.
هغه د امنيتي ځواکونو په لومړنيو تحقيقاتوکې د طالبانو په ډله کې په غړيتوب او په ننګرهارکې د لسګونو ډار اچوونکو بريدونو په سازمان ورکولو اعتراف کړى دى.
ختم- ج - اکرم

 

کابل/باختر/ د وږي٢۳ مه
د داعش دوه غړي په ننګرهارکې په هوايي بريدکې ووژل شول.
پر دغو داعشيانو تېره شپه په خوږياڼيو ولسوالۍ کې بريد وشو.
د ننګرهار د والي وياند عطاالله خوږياڼي باختر آژانس ته وويل چې په بريدکې د داعش دوه غړي وژل شوي دي.
په يو بل خبرکې ويل شوي دي چې د داعش يو غړى په ننګرهارکې نيول شوى دى.
دغه ډار اچوونکي نن سهار کله يې چې غوښتل پاکستان ته لاړ شي، ونيول شو.
نيول شوى ډار اچوونکى د امنيتي ځواکونو په لومړنيو تحقيقاتو کې ويلي دي چې د لارښوونې د ترلاسه کولو لپاره پاکستان ته روان و.
ختم- ج - اکرم

کابل/باختر/ د وږي٢۳ مه
د افغانستان د کرکټ ملي ټيم نن د زېمبابوى له ټيم سره ۲۰ آوريزه لوبه کوي.
د افغانستان د کرکټ بورد د مطبوعاتو مسوول فريد هوتک د دغې لوبې په اړوند باختر آژانس ته وويل: ټاکل شوې ده د کابل په وخت نن مازيګر پنځه بجې د افغانستان او زېمبابوې د کرکټ ټيمونو ترمنځ لوبه شي.
هوتک وويل: دغه سيالۍ پرون د بنګله دېش او زېمبابوې ټيمونو په لوبې سره پيل شوې.
هغه وويل چې د افغانستان د کرکټ ملي ټيم د دغې لوبې لپاره بشپړ تيارى لري.
د هوتک د څرګندونو له مخې: درې واړه ټيمونه له يوبل سره دوه دوه لوبې ترسره  کوي او دغه لوبې د سپټمبر په ۲۴مه پاى ته رسېږي.
له دې مخکې د افغانستان د کرکټ ملي ټيم په ټسټ لوبه کې د بنګله دېش ټيم ته ماتې ورکړې وه.
ختم- ج -اکرم

کابل/باختر/ د وږي٢۳ مه
د بغلان ټولې لويې لارې د پوځيانو د ګډو چاڼيزو عملياتو په پایله کې پرانیستل شوې دي.
د ملي دفاع وزارت درستيزوال او د هوايي ځواکونو مرستيال ډګرجنرال محمد شعيب پيلوټ پرون په بغلان کې په يوه خبري کنفرانس کې رسنيو ته وويل چې تېره شپه د پغلان په نا امنو او زيانمنونکو سيموکې د چاڼيزوعملياتو په پایله کې د پلخمري - کندز او پلخمري - دوشي په ګډون ټولې لويې لارې د طالبانو له شتون څخه پاکې شوې دي، څه دپاسه ۵۰ دښمنان وژل شوي او ۶۸ يې ټپيان شوي او نور يې غرونو ته تښتېدلي دي.
هغه زياته کړه چې په عملياتوکې ټول هغه ماينونه چې وسله والو طالبانو په دغو لويو لاروکې ښخ کړي وو او دوه بمي موټرونه کشف او شنډ کړاى شوي، خنډونه له منځه وړل شوي او د دښمن د سوق او ادارې ۸ سيمې هم ويجاړې شوې دي.
هغه زياته کړه: پر دې د مخکنیو پوستو په ټينګښت سربېره، دپلخمري - دوشي او پلخمري - کندز دلويو لارو په اوږدو کې ۱۶ نوي امنيتي پوستې جوړې شوې دي او اوس په دغو لويو لاروکې د وسايطو دتګ راتګ لپاره امنيتي شرايط برابر شوي دي.
په کنفرانس کې د طالبانو په ځپلوکې د خلکو رول مهم وبلل شو او له پوځيانو څخه په خپل وخت د بغلانيانو همکاري او ملاتړ ستايل شوي دي. 
په دغه خبري کنفرانس کې د کورنيو چارو وزارت د ستر امنيتي معينيت لومړي مرستيال، دځانګړو عملياتو دقول اردو قوماندان او د ملي امنيت د لوى رياست استازي هم ګډون کړی و او په بغلان کې د دښمن پر سنګرونو د بريدونو پر زياتوالي ټينګار وشو.
ختم- ج - اکرم


 

کابل/باختر/ د وږي٢۳ مه
د افغانستان د اسلامي جمهوریت جمهورریيس محمد اشرف غني پرون ماخوستن د هېواد د نومیالي شاعر او لیکوال سلېمان لایق چې د کابل ښار د شش درک په وروستۍ تروریستي پېښه کې ټپي شوی و او اوس په غازي امان الله خان روغتون کې تر درملنې لاندې دی، پوښتنه وکړه.
د جمهوررییس د ویاند دفتر باختر آژانس ته خبر ورکړ:
د پوښتنې پرمهال معالجو ‌‌‌‌‌‌ډاکترانو جمهوررييس ته د سلېمان لایق د روغتیایي وضعیت او د نوموړي د درملنې د څرنګوالي په اړه معلومات ورکړل.
جمهوررييس غني د خدای تعالی (ج) په دربار کې سلېمان لایق ته د بشپړې روغتیا هیله وکړه او د غازي امان الله خان روغتون مسوولینو ته یې لارښوونه وکړه چې د نوموړي د مراقبت او جدي درملنې په برخه کې له ټولو شته امکاناتو څخه ګټه واخلي.#
پای – ذ

کابل/باختر/ د وږي٢۳ مه
د تخار په ورسج ولسوالۍ کې د وسله والو طالبانو يو قوماندان له  ٢٣ ملګرو سره یې د هېواد له دفاعي او امنيتي ځواکونو سره يوځاى شول.
د تخار د امنيې قوماندانۍ وياند خليل اسير دباختر آژانس خبريال ته وويل: دغه وسله وال طالبان چې په کران او منجان ولسوالۍ کې د دولت پرخلاف وو او د تخار په ورسج ولسوالۍ راغلي وو؛ پرون له خپلو جنګي وسايلو سره له پوځيانو سره يوځاى شول.
ختم- عطاالله – اکرم
 

کابل/باختر/ د وږي٢۳ مه
درې ځوان ورزشکاران په کاپيسا کې د ماين په چاودنه کې ووژل شول.
د کاپيسا د امنيې قوماندانۍ وياند عبدالشايق شورش باختر آژانس ته وويل چې چاودنه پرون د کاپيسا د تګاب ولسوالۍ په کرکرشاه کوټ سيمه کې هغه وخت وشوه چې دغه ځوانان په واليبال بوخت وو چې په پایله کې یې درې تنه ورزشکاران ووژل شول او دوه نوريې ټپيان شول .
خبرځاى زياته کړه چې د يوه ټپي حالت خراب بلل شوى دى.
ختم- عطاالله- اکرم

 

کابل/باختر/ د وږي٢۳ مه
د خوست د فوټبال سيالیو د اسماعيل خېلو کاروان د فوتبال ټيم په اتلوالي سره پاى ته ورسيدې.
د باختر آژانس د خبرله مخې: دغه سيالۍ د څلويښتو ټيمونو ترمنځ پيل شوې وې او په پايلوبه کې د اسماعيل خېلو کاروان او د متون بابا د فوټبال ټيمونو سره مخ شول چې لوبه د صفر په وړاندې په دوو سره د اسماعيل خېلو کاروان ټيم په ګټه پاى ته ورسېده.
دغه سيالۍ د خوست د فوټبال فدراسيون پيل کړې وې.
ختم- ج - اکرم

Page 2 of 8049