18 September 2019

RSS Facebook

سوداگریز


تازه خبرونه

انتخابات او امنیتي ګواښونه

کابل/ باختر/ د وږي ۲٧ مه د جمهوري ریاست راتلونکي انتخابات...

Youtube Player

khantry design

سوداگریز

سوداگریز

کابل- باختر دمرغومي دولسمه :
  دبغلان د غوري دسمنټو فابريکې د روان کال په نهو مياشتوکې شپږ زره اووه سوه نوي ټنه سمنت توليدکړې دي .
دبغلان ولايت د غوري سمنټو دفابريکې رييس ډيپلوم انجنير عبدالکريم خرم دباختر اژانس له خبريال سره په مرکه کې وويل: د روان کال په نهو مياشتوکې د سمنټو له نوى او پخوانى فابريکو څخه په استفادې سره، شپږ زره اووه سوه نوي  ټنه سمنټ  توليد شوى دى چې له دې جملې څخه ٤٦٣٧ټنه يې پلورل شوى دى چې له دې پلوه دولت ته دڅه دپاسه دولسو مليونو افغانيوګټه رسيدلې ده .
دفابريکې رييس په دې ترڅ کې چې د غوري سمنټو د فابريکو اوسنۍ توليدي ظرفيت په ورځ کې اووه سوه ټنه وبلل؛ څرګنده يې کړه چې د توليداتو دکچې په لوړولو سربېره دپخوانى فابريکې د دويم لمبر داش د درولو او مونتاژ کار هم ترلاس لاندې دى چې د ترميمولو کار به يې په نږدې راتلوونکې کې پيل شي .
ده دخپلو توليداتو د پلورنې لپاره د بازار موندلو له امله د خوښي دڅرګندولو په ترڅ کې د غوري سمنټو دفابريکې د ډبرو سکرو ورځني اړتيا شپږ سوه ټنه وبلل اوزياته يې کړه چې د توليد، د ډبرو سکرو دکمښت او د اړتياو د بريښنا انرژي دکمښت په لاره کې د پرتو ستونزو او خنډونو په لرې کولو سره په پام کې لرو چې په راتلوونکې کال کې د توليداتو کچه لوړه کړو .
عبدالکريم خرم زياته کړه چې د فابريکې د اړتيا وړ ډبرو سکرو او بريښنا په برابرولو او دغه راز د پخوانيو او نويو فابريکو د څلور واړو داشونو په فعالولو سره  به دغوري سمنټو د ورځني توليد ظرفيت له اووه سوه ټنو څخه يو زرو څلور سوه ټنو ته لوړکړو .
  دبغلان د افغان سمنټو دکمپنۍ عامل رييس انجنير اسلام الدين احمدي دغوري سمنټو دفابريکې د رييس دڅرګندونو د تاييدولو په ترڅ کې زياته کړه چې دکرکر، دودکش ، آهن درې او خورد درې په کانونوکې د ډبرو سکرو د را ايستلو دکچې په لوړولو سره ورځني توليدات پنځه شپيتو ټنو څخه يو سلو اويا ټنو ته او ديو ترانسفارمر په درولو او د بشري ځواک په زياتولوسره کولى شو په راتلوونکې کال کې دغوري سمنټو په فابريکوکې د سمنټو د توليداتو کچه له اووه  سوه ټنو څخه يو زرو څلور سوه ټنو ته  لوړه کړو .
 

کابل- باختر دمرغومي دولسمه:
  د بايسکل ځغلولو د اتلوالۍ په هغې سيالۍ کې به چې په نږدې راتلوونکې کې دهندوستان په ډيلي ښارکې ترسره کيږي؛ له افغانستان څخه شپږ تنه ورزشکارې نجونې او شپږ تنه ورزشکار ځوانان ګډون وکړي .
د المپيک دملي کميټې د بايسکل ځغلولوکميسيون رييس محمد صادق صادقي باختر اژانس ته وويل: دغه سيالۍ چې دنجونو اوهلکانو په څانګوکې ترسره کيږي، د يو څلويښتو آسيايي هيوادونو ورزشکاران به پکې ګډون وکړي .
د صادقي دڅرګندونو له مخې: دهيواد دنجونو او هلکانو د بايسکل ځغلولو د ټيمونو د فعال ګډون په مقصد، دبايسکل ځغلولو فدراسيون سر له اوسه تيارى  نيسي او يو لړ تمرينونه يې هلکانو ته په پاکستان کې او نجونو ته د افغانستان په دننه کې پيلوي .
صادقي وويل: په دغو سياليوکې به له افغانستان څخه شپږ تنه ورزشکاران  نجونې او شپږ تنه ورزشکار ځوانان ګډون وکړي .
 

کابل باختر دمرغومي دولسمه
په ارزګان ولايت کې دپوليسو يو مامور په  يو بې ساري اقدام کې په خپلې ميرمنې اوزوى ډزې وکړې.
دغه پيښه تيره شپه دترينکوټ ښار په پوته قلاچه  سيمه کې وشوه .
پوليس وايي چې محمد سرور په خپلې ځوانې ميرمنې او کوچني زوى له ډزو وروسته تښتيدلى دى.
ددغه مامور شيدى خور ماشوم ته په دې پيښه کې زيان نه دى اوښتى .
ويل کيږي چې ددغه پوځي د ډزو غږ ګاونډيانو اوريدلي دي او له ځنډ  پرته يې پوليسو ته خبر ورکړي دي .
دارزګان ولايت دامنيې قوماندانۍ دامنيت آمر محمد اسلم باختر اژانس ته وويل  چې دمحمد سرور دنيولولپاره پلټنې پيل شوي دي .
تراوسه پورې ددغې وژنې انګيزه نه ده روښانه شوې خو دپوليسو مقامات وايي چې ددوى دلومړنيو ترلاسه شويو نتيجو له مخې کورني شخړې ددغې خونړي پيښې عامل دى .
محمد سرور دارزګان ولايت دعملياتي ريزرف  دکنډک  پوليس و .
 

کابل – باختر د مرغومې دوه لسمه :
يوه اووه کسيزه ډله حرفوي وسله وال غله چې دپوليسو يو منسوب هم پکې ليدل کيږي دهرات دجنايي جرمونو پرخلاف دمبارزې پوليسو دپيچلو عملياتو په بهيرکې وپيژندل شول او وتښتيدل :
ددغې ډلې په غړو دخلکو داستوګنې له کورونو څخه دڅو مواردو وسله والو غلاوو تور لګول شوى دى.
دهرات ولايت دپوليسو مسولين چې ددغو کسانو په پيژندنې او نيولو بريالي شوي دي وايي له دغو غلو څخه څو ميله وسله ،يوه اندازه ګاڼه او دوه موټرونه چې په غلا کې کارول کيدل هم ترلاسه شوي دي.
دهرات ولايت دامنيې قوماندانۍ دامنيت آمر مل پاسوال عبدالحميد حميدى باختر آژانس ته وويل: دغو غلو په هرات او کابل کې دخلکو دکورونو په لوټولو او په ځينو نورو جنايي جرمونو کې په مستقيمه توګه لاس درلود.
ددغې ډلې کسان هغه وخت وپيژندل شول او ونيول شول چې لومړى فهيم په نامه يو سړى دهرات په خواجه قلعه سيمه کې له يوې اندازې غلا کړى شويو ګانو او نغدو پيسو سره ونيول شو او دپيښې له پرمختيا وروسته دتورن ٦ تنه ملګري دجنايي جرمونو پرخلاف دمبارزې دپوليسو دکشفى برخې له خوا په رنګين آسيا هوټل ،آرين مارکيټ او سخي هوټل کې ونيول شول.
دياودنې وړده چې ددغې ډلې دوه تنه نور غړي هم پيژندل شوي او دپوليسو ترڅارنې لاندې دي.
 

کابل باختر دمرغومي دولسمه
پاکستاني  مليشو دکونړ ولايت په سرحدي سيمو بيا دتوپونو ډزې پيل کړې .
  سيمه ئيزو مقاماتو ويلي دي چې په کونړ ولايت  دپاکستاني پوځيانو له خوا دلري واټن ويشتوونکو ټوپونو ددولسو  ګوليو دلګيدو له امله يوه ميرمن شهيده او درې تنه نورې ښځې  ټپيانې شوې .
  دشمشاد د٢٠٢ ساحوي زون دقوماندانۍ مطبوعاتي دفتر باختر اژانس ته خبر ورکړ: پاکستاني پوځيانو پرون له پولي اخوا څخه دسرکاڼو ولسوالۍ په مربوطاتو دلري واټن دټوپونو دولس ډزې وکړې چې يوه ګولۍ  يې په يو کور ولګيده او له امله يې يوه ميرمن شهيده او درې نورې ميرمنې ټپيانې شوې .
دپاکستاني پوځيانو له خوا د ټوپونو ډزې له نږدې دوو مياشتو وروسته بيا پيل شوې .
 

هرات– باختر د مرغومې دوه لسمه :
په هرات کې دترکمنستان قونسل وايي چې افغانستان ته دوارداتي بريښنابهيردفني ستونزو په دليل ځنډيدلى دى.
په هرات کې دافغانستان دبهرنيو چارو وزارت استازى عبدالناصر يوسفي دترکمنستان قونسلګرى له سرپرست الياس غيبواف سره په کتنه کې دترکمنستان دوارداتي بريښنا دبنديدو له امله را منځته شوې ستونزې بيان کړې.
يوسفي دغه راز دبريښنا دبنديدو د جدول چې دهرات دبريښنا شرکت رياست له خوا برابرشوى دى.
ددغه هيواد قونسل ته وسپاره او هيله يې وکړه چې دبريښنا دبنديدو ستونزه اوسني حالت ته په پاملرنې سره په ډير لنډ وخت کې حل شي.
په دې ترڅ کې دترکمنستان قونسل دبريښنا دبنديدو علت دماري ښار په ستيشنونو کې دتخنيکي ستونزوزيږنده وبلله او زياته يې کړه چې همدا اوس ددغو ستيشنونو په ترميمولو کار دوام لري.
دترکمنستان دقونسلګرى دچارواکو دڅرګندونو له مخې، دهرات ښاريانو بريښنا چې په عمده توګه له ترکمنستان څخه تامينيږي بند شوى دى او دغه ستونزه دخلکو دانتقاد سبب شوې ده.
 

واشنګتن– باختر د مرغومې دوه لسمه :
دامريکا دبهرنيو چارو وزيره هيلرى کلنتن چې دبيهوښى له امله په ځمکه لويدلې وه او په سر يې کلک کوزار شوى و په کوپړى کې  يې دوينې پرنډ کيدل ليدل شوي دي او روغتيايي حالت يې مخ په ښه والي دى.
دميرمن کلنتن معالج ډاکتران وايي چې دا به په بشپړه توګه بيا روغه شي او دوينې د نري کيدو د درملو له ترلاسه کولو وروسته به له روغتون څخه رخصته شي.
ميرمن کلنتن چې ٦٥ کلنه ده ديکشنبې په ورځ دنيويارک په يو روغتون کې بستره شوه.
درارسيدلو خبرونو له مخې، دا دبيهوښى له امله په ځمکه لګيدلې ده او په سرکې يې سخت ګوزار شوى دى.
ټاکل شوې ده ميرمن کلنتن دبارک اوباما دجمهورى رياست د دويمې دورې له رسمي پيل مخکې له خپلې دندې څخه ګوښه شي.
داسوشيتدپرس دخبرى آژانس دخبر له مخې، ميرمن کلنتن دخپل مسووليت په دوره کې دنړۍ ١١٢ هيوادونو ته سفر کړى دى او په دې ترتيب يې دامريکا دبهرنيو چارو دوزيرانو ترمنځ د ډيرو زياتو بهرنيو سفرونو ريکارد ترلاسه کړى دى.
په دې وروستيو وختو کې بارک اوباما ديموکرات سناتور جان کيرى دميرمن کلنتن دځاى ناستې لپاره معرفى کړى و.
دجان کيرى انتصاب چې په اوس وخت کې دامريکا دسنامجلس دبهرنيو اړيکو مشرتوب په غاړه لري بايد ددغه مجلس له خوا تصويب شي.
 

Tuesday, 01 January 2013 12:32

داسعارو بيه:

کابل\باختر\دمرعومى  دمياشتې ١٢ مه:
دکابل دشهزاده سراى دصرافانو درييس  دمعلوماتو له مخې : نن له غرمې مخکې دبهرنيو پيسو په مقا بل کې دافغا نۍ ارزښت په دې ډول دى:
يوامريکايي ډالر پيرودل په     52/05  افغانيو پلورل په   52/10افغانيو
يوانګليسى پونډ پيرودل په  83/50افغانيو پلورل په   83/60افغانيو
داماراتو يو درهم پيرودل په 10/ 14 افغانيو پلورپه 15 / 14 افغانيو
يوه يورو  پيرودل په    40 68/ افغانيو پلورل په   68 /50  افغانيو
يوسعودي ريال پيرودل په  75 13/پلورل  13/80 افغانيو
زرهندي کلدارى پيرودل په 960 افغانيو پلورل په 970 افغانيو
زرپاکستاني کلداري پيرودل په  531افغانيو پلورل په  532 افغانيو
اوزر ايراني تو مان پيرودل په 16/40  افغانيو پلورل په   16/50 افغانيو.
 

Tuesday, 01 January 2013 12:29

تبصره:

کابل – باختر د مرغومې دوه لسمه :
افغانستان به  په څو راتلوونکو ورځو کې په امنيتي برخه کې د يو بل بدلون ډګر وي.
د امنيتي مسووليتونو د ليږدونې د پروګرام د څلورم پړاو عملي کول، په ځان د ډډې لګولو د هيواد د امنيتي مرکزونو يوه بله نښه نښانه بلل کيږي چې ډېر ژر به پيل شي.
دباختر آژانس مبصر ليکي: ټاکل شوې ده له نړيوالو ځواکونو څخه افغان ځواکونو ته دامنيتي مسووليتونو د ليږدونې څلورم پړاو ته ورځو پورې په هيوادکې پيل شي.
تراوسه پورې ددغه پروګرام دوه پړاوونه چې په ١٣٨٨ کال کې دباميانو له ولايت څخه پيل شو، تطبيق شوى دى او دريم پړاو يې د بشپړېدو په حال کې دى.
د امنيتي مسووليتونو د ليږدونې پروګرام له هغه وروسته طرحه او عملي شو چې د ناټو دغړو هيوادونو مشرانو د پرتګال په لزبن ښارکې په خپلې غونډه کې د٢٠١٤ ميلادي کال تر پايه پورې له افغانستان څخه ددغه سازمان دځواکونو په وتلو رايه ورکړه.
د ناټو د مشرانو دغه پريګړه د افغان مقاماتو له تاوده هرکلى سره مخامخ شواو دافغانستان دولت د يو چوکات په طرحه کولو سره د امنيتي مسووليتونو دمنلو لپاره چمتو شو .
دغه طرحه په داسې حال کې رامنځته شوه چې يو زيات شمېر بهرنيو هيوادونو او سياسي ټولنو له ٢٠١٤ کال وروسته دافغانستان حالت له انديښنو ډک وباله او په دې نسبت بدبين و؛ خو په افغانستان کې مقاماتو له دغه هيواد څخه دبهرنيو هيوادونو وتل يو نيک فال وباله او د هيواد د حريم په دفاع او له امنيتي چلنجونو سره په مبارزه کې د افغان امنيتي ځواکونو په ځواکمنۍ باندې ټينګار وکړ او په دې اړوند يې خپل باور څرګند کړ.
دباميانو له ولايت څخه دامنيتي مسووليتونو دليږدونې پروګرام چې دهيواد يو آرام ولايت بلل کېده، پيل شو چې وروسته وروسته په دوو نورو پړاوونوکې دغه پروګرام يو شمېر نورو ولايتونو او سيمو ته چې نا امنې بلل کيدې؛ پراخ شو او نن دکونړ په ګډون، په يو شمېر ولايتونو کې هيڅ يو بهرني عسکر شتون نه لري او د قندهار، هلمند او ارزګان د ولايتونو زياترو برخو څخه د ناټوعسکر وتلي دي،  خو په دغو سيموکې امنيت له هغه څه څخه څو برابره ښه دى چې بهرنيو عسکر وپکې شتون درلود.
د امنيتي مسووليتونو د سپارلو د پروګرام په چوکات کې و چې نن ټول شپې عمليات دملي اردو له ځانګړو افرادو سره په بشپړ برياليتوب سره ترسره کيږي .په داسې حال کې چې پخوا د بهرنيو عسکرو له خوا ددغه شان عملياتو ترسره کول دملکي وګړو د سر له زيانونو ، غبرګونونو او اعتراضونو سره يو ځاى و.
د زمانې تګلورې ثابته کړه چې دامنيتي مسووليتونو د ليږدونې پروګرام يو افغاني پروګرام دى چې په برياليتوب سره دملي ګټو په تګلورې کې يون کوي او کولاى شي ښه لرليد ولري.
ددغه پروګرام په څلورم پروګرام کې به هيواد ٥٢ اداري واحدونه په دغه پروګرام کې شامل شي چې ددغه پړاو په تطبيق سره د ٣١٢ اداري واحدونو امنيتي مسووليتونه افغان ځواکونو ته سپارل کيږي او په دې ترتيب به افغانستان په سلو کې ٨٧ جغرافيا د امنيتي مسووليتونو د سپارلو دپروګرام تر اغيزې لاندې راشي.
په داسې حال کې چې په دريم پړاو کې د افغانستان په سلو کې ٧٥ خاوره په دې پروګرام کې شامله شوې وه.
په څلورم پړاو کې دهيواد زياتره سرحدي سيمې چې له جنوب څخه دصادرو شويو تروريستانو له ګواښ سره مخامخې دي؛ ددغه پروګرام ترپوښښ لاندې به ونيول شي.
دملي اردو لوى درستيز جنرال شيدمحمد کريمي وايي چې دامنيتي مسووليتونو سپارلو د څلورم پړاو دپيل وخت دهيواد دجمهور رييس له خوا اعلاميږي او زياتره سرحدي سيمې، نا امنې سيمې او هغه سيمې پکې شامليږي چې دښمن په يو ډول نه يو ډول پکې نفوذ لري.
دامنيتي  مسووليتونو منل د افغانستان دخلکو او دولت غوښتنه او اراده او يو نه په شا تلوونکي پروګرام دى او د هيواد امنيتي مرکزونه دهغو منلو ته چمتو دي اوله شک پرته ملموسې نتيجې به ولري.
 

کابل\  باختردمرغومي دمياشتې  ١٢ :
د سوداګرۍ او صنايعو وزارت مقامات وايي چې په ٢٠١٢ ميلادي کال کې د افغانستان صادرات يو زرو پنځه سوو ميليونو ډالروته رسيږي، په داسې حال کې چې دهيواد واردات ٤ ميلياردو ډالروته رسيږي.
دباختر آژانس دخبر له مخې: داپه داسې حال کې ده چې د اقتصادي چارو کارپوهان په دې باور دي چې افغانستان په ٢٠١٢ ميلادي کال کې ډېر زيات واردات لرل.
دوى وايي چې افغانستان په ٢٠١٢ کال کې څه دپاسه شپږ مليارده ډالره واردات لرل او افغانستان د خپلې اړتيا وړ زياتره مالونه له پاکستان څخه وارد کړی دی.
په داسې حال کې چې افغانستان له اقتصادي پلوه په ځانې د ډډې لګولو لپاره زيات امکانات لري، خو له دغو امکاناتو څخه کمه استفاده شوې ده.
يو شمېرکارپوهان وايي چې دافغانسان حکومت يو مشخصه اقتصادي او سياسي پاليسي نه لري او نن ورځ زياتو امکاناتو له شتون سره سره، بريښنا له بهرنيو هيوادونو څخه واردوي؛ په داسې حال کې چې دسمنټو دتوليد لپاره امکانات شته، افغانستان له پاکستان څخه د سمنټو په ډېر ستر واردونکى بدل شوى دى.
په همدې ترتيب سره له دې چې افغانستان دګازلرونکو نوشابو او د ميووو اوبو په توليد او لګښت کې په خپلو پښو دريدلى دى، خو له بهر څخه يې واردات شته او نورې خبرې .
داقتصادي چارو کاپوه آذرخش حافظي په دولت تورلګوي چې په اقتصادي بحران کې دى او په دې نه دى بريالى شوى چې داقتصادي تګلورې دټاکنې په مقصد يو ملي لارښود تدوين کړي. دغه اقتصادي کارپوه ټينګار کوي چې د افغانستان صادرات يوزرو پنځه سوه ميلونه ډالروته رسيږي، په داسې حال کې چې واردات يې شپږ ميليارده ډالره دى.
حافظى وايي چې دافغانستان خلک دکانونو له پلوه بډاى هيواد په واک کې لري؛ په داسې حال کې چې په خزانې ناست دي، له بې وزلى سره مخامخ دي.
دهيواد دپارلمان يوغړى چې نه غواړي نوم يې واخيستل شي؛ وايي: دا مناسبه نه ده چې زموږ تولې ستونزې په دولت پورې اړوندې وبولو. په دې کې شک نشته چې په اقتصادي مرکزونوکې د مديريت او ظرفيت نشتوالې د افغانستان خلکو ته ستونزې پيداکوي، خو دا هم يو حقيقت دى چې بهرنيان خپل پروګرامونه له خپلو ستراتيژيکي سياستونو او پالسي سره سم، وضح کوي.
د انرژي او اوبو وزارت د بريښنا او د اوبو د بندونو د جوړولو لپاره هر اړخيز پروګرامونه لري؛ خو هيڅکله مرستې د هغوى په واک کې نه دى ورکړى شوي، بلکې پلمې جوړونې او د ستونزو پيداکول شتون لري. داچې موږ بريښنا له بهر څخه وارده کړو په خپله يو بهرني سياست دى .
په دې ترتيب مرستندوى هيوادونه غواړي يوه اندازه پيسې د منځي آسيا په هيوادونو پورې اړه پيداکړي . دا د ستونزو د پيداکولو او د پيداکولو د نشتوالې يوه برخه ده .
دپارلمان دغه غړى دهيوادکاني زيرموته په اشارې سره زياته کړه: لويديځ هيوادونه په هيواد کې سترو کاني زيرمو د شتون خبرې کوي، خو هيڅکله يې دخپلو څيړنو او د سروې نتيجې او څيړنيز سندونه د اړونده افغان مرکز په واک نه دي ورکړي چې له هغو څخه استفاده وشي.
دا دافغانستان په دولت او خلکو پورې اړه پيدا کوي چې په کومو تدبيرونو او پروګرامونو سره کولى شي له دغې تړلتيا او ناخوالو څخه ځان وژغوري.
په داسې حال کې چې اقتصادي کارپوهان د اقتصادي پروګرامونو په لاره کې د دولت په کړنو نيوکې کوي او افغانستان دپاکستان لپاره ډېر ستر مستهلک هيواد بولي؛ افغان مقامات نورې خبرې لري.
دافغانستان د سوادګري او صنايعو د خونو مرستيال خانجان الکوزى په دې
اړوند دباختر آژانس خبريال ته وويل: په هيواد کې دصادراتو کموالې يوه اقتصادي نښه ده، نه يو اقتصادي ناتار.
الکوزى زياته کړه: دشپږوميلياردو ډالرو واردات يو رسمي شمېر دى چې د احصائيې دمرکزي ادارې له خوا وړاندې شوى دى .
په داسې حال کې چې غير رسمي شميرنې ښيي چې صادرات څه دپاسه يو ميلياردو دوه سوو ميليونو ډالروته رسيږي؛ دشپږو ميلياردو ډالرو واردات هغه شمير چې د احصائيې مرکزي ادارې له ګمرکاتو څخه ترلاسه کړى دى.
دسنګاپور په شان په نړۍ کې داسې هيوادونه شته چې هيڅ صادرات نه لري ، خو پرمختللي اقتصاد لري. که چيرې زموږ خصوصي سکتور له دولت سره په همکارى کې وکولاى شي د وارداتو او صاداراتو ترمنځ يو پولي بيلانس ټينګ کړي؛ يو ښه کار دى، خو د وارداتو او صادراتو ترمنح د ارقامو توپير يوه اقتصادي تشه ده، نه اقتصادي ناتار.
د سوداګرۍ او صنايعو وزارت ويندوى وحيدالله غازي خيل په دې اړوند باختراژانس ته وويل: زموږ صادرات په کال کې څه دپاسه يوزرو پنځه سوه مليونو ډالرو ته رسيږي او له شپږو ملياردو ډالرو واردتو څخه يواځې په دريو ملياردو ډالرو يې له بهرڅخه نفتي توکي وارديږي.
دى وايي چې دافغانستان واردات اوصادرات يواځې په پاکستان پورې اړه نه پيداکوي، موږ له هند، ايران او د منځني اسيا له هيوادونو اوله نورو هيوادونو سره تجارتي راکړې ورکړې لرو.
د اقتصادي کاروپوهانو په باور، پاکستان په افغانستان کې دخپلو غوښتنو په تپلو سره چې دافغانستان زياتره ترانزيتي تړلتياوې له دغه هيواد څخه سرچينه اخلي؛ ددغې سبب شوى دى چې پاکستان افغانستان ته ډېرزيات صادرات ولري. په داسې حال کې   چې افغانستان پخوا د ايران  په چاه بهارکې په افغاني مديريت سره  د يو بندر په جوړولو او د يو ازاد ترانزيت د يوې  لارې دجوړولو په باب له ايراني مقاماتوسره تفاهم ته رسيدلى دى؛ خو ددغه شان يو بندر دجوړولو لپاره کارچې پنځوس کاله اجرائيوي ضمانت لري، ترلاسه لاندې نه دې نيول شوى.
سياسي کارپوهان  چاه بهار او ورته بندرونه له پاکستان سره له ترانيزيتي تړلتيا څخه دخلاصون لپاره ښه فرصت بولي چې بايدورڅخه ګټه واخيستل شي .