19 January 2020

RSS Facebook

سوداگریز


تازه خبرونه

د هېواد په بېلابېلو سیموکې ۲۱ ترهګر وژل شوي دي

د هېواد په بېلابېلو سیموکې ۲۱ ترهګر وژل شوي دي

کابل/د مرغومې۲۹مه/باختر د هېواد په بېلابېلو سیموکې په تېرو ۲۴ ساعتو...

جمهورريیس غني: د کابل ختیځ به په پرمختللې ساحه بدل شي

کابل / دمرغومي ٢٩مه / باختر د افغانستان د اسلامي جمهوریت...

Youtube Player

khantry design

سوداگریز

سوداگریز

کابل- باختر د غبرګولي څوارلسمه :
درې تنه وسله وال طالبان پرون دغزني ولايت په مربوطاتوکې د ملي اردو له ځواکونو سره په نښته کې ووژل شول او دوه تنه نور يې ټپيان شول .
  دملي دفاع وزارت مطبوعاتي دفترباخترآژانس ته خبر ورکړ: دملي اردومنسوبينو دغزني ولايت دګيرو ولسوالۍ په مربوطاتوکې د ډار اچوونکو دځپلو په مقصد چاڼيز عمليات ترسره کړل چې له امله يې درې تنه وسله وال طالبان ووژل شول او دوه تنه نوريې ټپيان شول او يوه اندازه سپکې او درندې وسلې هم دعملياتو د برخه والو لاس ته ورغلې دي .
  ديوبل خبر له مخې: دوه تنه وسله وال مخالفين دپکتيا ولايت په مربوطاتوکې دملي اردو دځواکونو دعملياتو په بهيرکې ووژل شول .
  دملي دفاع وزارت مطبوعاتي دفتر باخترآژانس ته خبر ورکړ: دوو تنووسله والو مخالفينوچې غوښتل يې دپکتيا ولايت د زرملى ولسوالۍ په مربوطاتوکې تروريستي بريدونه ترسره کړي؛ د ملي اردو دځواکونو دچاڼيزو عملياتو په بهير کې ووژل شول .
ددغوعملياتوپه بهيرکې يوه پيکا، دوه سپکې وسلي او يوه اندازه پوځي تجهيزات هم ترلاسه شوي دي .
په همدې حال کې د وسايطو ضدڅلور ديرش ماينونه چې په نږدې راتلونکي کې دهيواد د يو شمير ولايتونو په ځينو سيمو کې دتروريستي فعاليتونو دترسره کولو په مقصد ځاى پرځاى شوي و؛ د ملي اردو دمنسوبينو دامنيتي ګزمې په وخت کې کشف او شنډ کړى شول .

کابل -باختر د غبرګولي څوارلسمه :
دالقاعده شبکې درې تنه جګړه ماران او دوه تنه وسله وال طالبان په نورستان ولايت کې له افغان پوځيانو سره په نښتو کې ووژل شول .
په دغو جګړه مارانو تيره شپه دنورستان ولايت دسرحدي ولسوالۍ کامديش بازار ته څيرمه د دوى په پټنځي کې بريد وشو او ووژل شول .
دنورستان ولايت دکامديش ولسوالۍ يوه سيمه ئيز مقام باخترآژانس ته وويل چې دغو نښتو نيم ساعت دوام درلود او له امله يې د القاعده شبکې درې تنه جګړه ماران او دوه تنه وسله وال طالبان ووژل شول .
ده تاييدکړه چې په دې جګړه کې يو افغان پوځي هم شهيد شوى دى .
ويل کيږي، د القاعده شبکې او د وسله والوطالبانو د ډلې دغه غړى د يو لړ تروريستي بريدونوپه پلان جوړولو بوخت و چې بريد پرې وشو .
دافغانستان په ختيځ کې نورستان له پاکستان سره د اوږدې پولې په لرلو سره تل دالقاعده، طالبانو او په تيره بيا دپاکستاني جګړه مارانو په ګډون د تروريستي ډلو دشتون او فعاليت ډګر دى .
ددغه ولايت په زياترو سيموکې تروريستي ډلې د ملکي وګړو په ځورونې، د ښوونځيو د ښوونکو او زده کوونکو په وژنې، ښوونځيو ته په اور اچولو او دقومي مشرانو په ترور لاس پورې کوي اوخلک د زور له لارې دخپلو بنسټ  پالو افراطي لارښوونو او قوانينو اطاعت ته اړ باسي .

کابل -باختر د غبرګولي څوارلسمه :
د ناټو دوه تنه سرتيري په افغانستان کې د يوماين دچاونې له امله ووژل شول .
په دغو پوځيانو چې هويت يې نه دى په ډاګه شوى؛ پرون دګزمې په وخت کې بمي چاودنه وشوه او ووژل شول .
ناټو باخترآژانس ته ديوې خبرپاڼې په ليږلو سره په دې  چاودنه کې دخپلو دوو تنو پوځيانو وژل کيدل تاييد کړل . خو د وژل شويو سرتيرو هويت او دپيښې دقيق ځاى يې نه دى په ډاګه کړى .
تيره اوونۍ هم درې تنه بهرني پوځيان د افغانستان په جنوب او ختيح کې ووژل شول .

کابل -باختر د غبرګولي څوارلسمه :
په فراه ولايت کې نن سهار د ماين دچاودنې له امله د يوې کورنۍ څلور تنه غړي شهيدان شول .
  چاودنه هغه وخت وشوه چې ددغې کورنۍ د سپرلۍ موټر د جويند ولسوالۍ د زهک په ساحه کې په يوښخ کړاى شوى ماين وخوت .
د فراه د والي ويندوى عبدالرحمن ژوندي باخترآژانس ته وويل: په دې پيښه کې درې تنه ماشومان او يو سړى شهيدان شول .
ده وويل: دغه راز د دغې کورنۍ يوه ميرمن  هم سخته ټپي شوې ده. د درملنې لپاره د فراه ښار ملکي روغتون ته ليږدول شوې ده .
وسله وال طالبان زياتره په گڼ ميشتولارو کې ماينونه او بمونه ښخوي چې له امله يې زياتره ملکي وګړو ته د سر زيان اوړي .

Tuesday, 04 June 2013 09:54

د اسعارو بيه:

کابل\باختر\دغبرګولي د مياشتې ١٤:

دکابل دشهزاده سراى دصرافانو د رييس  دمعلوماتو له مخې، نن له غرمې مخکې دبهرنيو پيسو په مقا بل کې دافغانۍ ارزښت په دې ډول دى:

يوامريکايي ډالر پيرودل په 60 55/  افغانيو پلورل په  55/65افغانيو

يوانګليسي پونډ پيرودل په 20  84 /افغانيو پلورل په  84 /30افغانيو

داماراتو يو درهم پيرودل په 05/ 15 افغانيو پلورپه 10 / 15 افغانيو

يوه يورو پيرودل په 20 72/ افغانيو پلورل په   72 /30  افغانيو

يوسعودي ريال پيرودل په  75 14/پلورل 14/80 افغانيو

زرهندي کلدارې پيرودل په 990 افغانيو پلورل په 1000 افغانيو

زرپاکستاني کلدارې پيرودل په  554افغانيو پلورل په 555 افغانيو

زر ايراني تومان پيرودل په 15/60  افغانيو پلورل په  15/70 افغانيو.

کابل\  باخترد   جوزا  دمياشتې  ١٣ :
د افغانستان داسلامي جمهوريت جمهور رييس حامدکرزي دقطر د سوداګرو د اتحاديې د رييس شيخ فيصل بن قاسم آل ثاني  په مشرۍ د قطري سوداګرو او پانګه والو له هيئت سره وکتل.
دجمهوري رياست مطبوعاتي دفتر باخترآژانس ته خبرورکړ:
په دې کتنه کې چې نن مازيګر په ارګ کې وشوه او  دهيواد د ماليې او د سوداګرۍ  وزيرانو هم پکې ګډون کړى و؛ دواړو لورو د بريښنا انرژي، هوټلدارۍ، کورجوړولو ، بانکوالۍ، کرنې او روغتيايي خدمتونو په برخوکې  په افغانستان کې د پانګې اچونې د فرصتونوپه باب خبرې اترې وکړې.
جمهور رييس قطري سوداګرو او پانګه والو ته د ښه راغلاست او له هغوى سره  دکتنې له امله دخوښي په څرگندولو سره وويل چې موږ چمتويو تاسو او نورو پانګه والو ته په افغانستان کې دپانګې اچونې فرصتونه برابرکړو؛ ځکه دا زموږ دټولو په ګټه دى  .
حامدکرزي ًقطري سوداګراوپانګه وال په افغانستان کې دپانګې اچونې په لاره کې  وهڅول او ويې ويل چې افغانستان د پانګې اچونې ښه فرصتونه لري او د ترقي اوپرمختګ په حال کې هيواد دى.
په مقابل کې د قطري سوداګرو اوپانګه والو هيئت په بيلابيلو برخو اوپه تيره بيا دکور جوړولو، بانکوالۍ، هوټلدارۍ، کرنې او د روغتيايي خدمتونوپه برخوکې په افغانستان کې د پانګې اچونې لپاره خپله علاقمندي څرگنده کړه.
هغوى دغه راز وويل: سربيره پر دې چې ددغه سفر په بهيرکې به په افغانستان کې دپانګې اچونې زمينې وڅيړي؛ د روژې له مبارکې مياشتې وروسته به  ددغه هيواد دپانګې اچونې تخنيکي ټيم  د بريښنا انرژي په برخه کې دپانګې اچونې دفرصتونو دڅيړنې په  خاطر افغانستان ته سفروکړي.
په دې کتنه کې  د قطر د سوداګرو د اتحاديې له رييس شيخ فيصل بن قاسم آل ثاني  سربېره د سوداګرو د اتحاديې مرستيال او دقطر د امير د کاکا زوى شيخ علي بن عبدالله آل ثاني، يو قطري بانکوال شيخ ډاکتر خالد بن ثاني آل ثاني ، د دولت وزير شيخ حمد بن عبد آل ثاني، د اقتصادپخوانى وزير شيخ حمدبن فيصل آل ثاني او د قطر د ساختماني شرکتونو د اتحاديې عامل مديرعلي عبدالرحمن الهاشمي هم ګډون کړى و.

کابل\  باخترد    جوزا  دمياشتې  ١٣ :
څه دپاسه شپږسوه درې څلويښت مليونه افغانۍ مندرس بانکنوټونه نن د افغانستان بانک دهيئت له خوا په ننګرهار ولايت کې وسوځول شول.
دمرکزي بانک دويم مرستيال نثارخان تراب باخترآژانس ته وويل :
د افغانستان بانک دقانون او پاليسۍ له مخې:  په هرو  اوو  يا اتو مياشتوکې په ټول افغانستان کې دغه بهير تطبيقيږي .
ده وويل: هغه شمير بانکنوټونه چې ټاکلې موده يعنې درې کاله ورباندې تيرشي او  مندرس او د استفادې وړ نه وي؛ سوځول کيږي.
دغه بانکنوټونه د ولسي جرګې، مشرانو جرګې د استازو او د ننګرهار د والي د مرستيال محمدحنيف ګرديوال په وړاندې وسوځول شول.

کابل\  باخترد   جوزا دمياشتې  ١٣ :
دبهرنيو چارو وزير ډاکترزلمي رسول نن له غرمې وروسته له يوې ډلې قطري سوداګرو سره د بهرنيو چارو  وزارت په مقرکې وکتل.
دقطر د مشهورو سوداګرو او پانګه والو دغه اووه کسيز هيئت چې مشري يې دقطر د سوداګرو د اتحاديې رييس شيخ فيصل بن قاسم آل ثاني په  غاړه لري؛ کابل ته  يې دخپل دسفر هدف په افغانستان کې ددغه هيواد د سوداګرو دپانګې اچونې د بيلابيلو برخو څيړل  وبلل.
ډاکترزلمي رسول په افغانستان کې په بيلابيلو  برخوکې د پانګې اچونې په ﻻره کې دقطرد همکارى له امله دقدردانۍ په ترڅ کې دغه همکاري دافغانستان د بيارغاونې او بياجوړولو په برخو او د دواړو وروڼو هيوادونو د اړيکو د ژورتيا او پراختيا په لاره کې  د پيل ښه نښه نښانه وبلله.
دقطري سوداګرو هيئت چې د بانکوالۍ، هوټلدارۍ، ودانۍ جوړولو، انرژي،  تکنالوژي او ارتباطاتو د بيلابيلوبرخو ماهران پکې شامل دي؛ په دغو برخو کې دپانګې اچونې په لاره کې خپل تيارى څرگندکړ.
ټاکل شوې ده د قطري سوداګرو هيئت د هيوادله جمهور رييس، د کابينې له يوشمير غړو او د افغانستان له سوداګرو او خصوصي متشبثينو سره په جلاجلا ډول وګوري.

کابل- باختردجوزا ١٣
د افغانستان د اسلامي جمهوريت دجمهور رييس حامدکرزي په مشرۍ د وزيرانو شورا نو بتي غونډه نن له غرمې مخکې د جمهوري رياست د ارګ دګلخانې په ماڼۍ کې جوړه شوه.
دچارو د ادارې او د وزيرانو شورا د دارالانشا لوى رياست باخترآژانس ته خبر ورکړ:
په پيل کې دپوهنې وزيراو د١٣٩٣ کال د نوروز دجشن د جوړولو دکميسيون رييس د نوروز د جشن د جوړولو د ودانۍ وروستۍ نقشه چې د پغمان په غونډي کې جوړيږي؛ د١٣٩٣ کال د نوروز دجشن له پروګرامونو اوفعاليتونو سره جوخته غونډې ته طرحه کړه.
د وزيرانو شورا د١٣٩٣ کال د نوروز د ودانۍ د نقشې او پروګرامونو د تاييدولوپه ترڅ کې دپوهنې او د ماليې وزيران موظف کړل چې د دغې پروژې په لګښتونوکې د سپما په پام کې نيولو سره دې د ځينو اضافي لګښتونو له وضع کولو وروسته د دغې پروژې بيه بشپړه کړي او د ماليې وزارت دې موظف کميسيون ته د هغې په ورکولو اقدام وکړي.
له اجندا سره سم، دکرنې او اوبو لګولو وزير له خپل تخنيکي ټيم سره يوځاى په داسې حال کې چې د احصايې د مرکزي ادارې رييس هم حاضرو؛ ترکرکيلې لاندې ځمکو او په ١٣٩١ کال کې له هغه څخه د مخکې کلونو په پرتله دهيواد د کرنيزو محصولاتو د توليداتو د کچې په باب ددغه وزارت رپوټ په دې ډول غونډې ته طرحه کړ:
ده په وروستيو لسوکلونوکې يعنې له ١٣٨٢ کال څخه تر ١٣٩١ کال پورې دکرنيزو محصولا تو توليدات په مقايسوي ډول غونډې ته وړاندې کړل چې مهم ټکي يې په دې ډول دي :
• د آبي غنمو توليد په ١٣٨٢ کال کى له دوه اعشاريه پنځو مليو نو ټنو څخه په ١٣٩١ کال کې درې اعشاريه پنځو مليونو ټنوته؛
• د للمي غنمو توليد په ١٣٨٢ کال کې له نهه سوه پنځه ويشتو زرو ټنو څخه په ١٣٩١ کال کې يو اعشاريه شپږو مليونو ټنو ته ؛
• د آبي او للمي غنمو ټول توليد په ١٣٨٢ کال کې له درې اعشاريه پنځو مليونو ټنو څخه په ١٣٩١ کال کې پنځه اعشاريه صفر پنځو مليونو ټنو ته؛
• دغنمو ترکرکيلې لا ندې ساحه په ١٣٨٢ کال کې له دوه اعشاريه دريو مليونو هکتارو څخه په ١٣٩١ کال کې دوه اعشاريه پنځو مليونو هکتارو ته؛
• د انګورو توليد په ١٣٨٢ کال کې له درې سوه شپيتو زرو ټنو څخه په ١٣٩١ کال کې شپږ سوه پنځلسو زرو ټنو ته؛
• د وريجو توليد په ١٣٨٢ کال کې له دوه سوه شپيتو زرو ټنو څخه په ١٣٩١ کال کې پنځه سوه زرو ټنو ته؛
• د مڼو توليد په ١٣٨٢ کال کې له څلورپنځوسو زرو ټنو څخه په ١٣٩١ کال کې اويا زرو ټنو ته ؛
• د بادامو توليد په ١٣٨٢ کال کې له اوو زروټنو څخه په ١٣٩١ کال کې دوه شپيتو زرو ټنو ته ؛
• د پومبې توليد په ١٣٨٢کال کې له پنځه زره ټنو څخه په ١٣٩١ کال کې شپږ ديرش زرو ټنو ته؛
• د زعفرانو توليد په ١٣٨٩ کال کې له دوه زره پنځه سوه کيلو ګرامو څخه په ١٣٩١ کال کې څور زره کيلو ګرامو ته ؛
• دغه راز په دغو کلونوکې له يو کال څخه بل کال ته دپلورنې د بيې د نوسان په نسبت د پټاټو ، پيازو او انارو د کرکيلې د کمښت او دځينو نباتي ناروغيو د خپريدو په خاطر د انارو دحاصلاتو د کمښت په باب هم غونډې ته معلو مات ورکړل او زيا ته يې کړه:
•  د پټاټو توليد په ١٣٨٢ کال کې له درې سوه پنځو زروټنو څخه په ١٣٩١ کال کې دوه سوه ديرشو زرو ټنو ته ؛
• د پيازو توليد په ١٣٨٦ کال کې له يوسلو اته ديرشو زرو ټنو څخه په ١٣٩١ کال کې سلو زرو ټنو ته؛
• د انارو توليد په ١٣٨٦ کال کې له اتيا زروټنو څخه په ١٣٩١ کال کې دوه اتيا زرو ټنو ته ؛
په همدې ترتيب د کرنې او اوبو لګولو وزير په ١٩٩٣ کال کې له يو اعشاريه دريو مليونو هکتارو څخه په ٢٠١٠ کال کې يواعشاريه نهه شپيتو مليونو هکتاره ځمکې ته دځنګلونو د زياتوالى او د اوبو دکمښت، د زراعتي ماشين آلاتو د کمښت او د  توليد دعواملو د کمښت، د بشري قواوو دنشتوالى اود بازار دبيې په نسبت د توليد د تمامې شوې بيې دلوړوالى له امله له درې اعشاريه شپږو مليونو هکتاره څخه دوو مليونو هکتارو ته دکرکيلې وړ آبي ساحو کمښت هم غونډې ته معلومات وړاندې کړل.
دغونډې د کارپه دوام، ده د هيواد په کچه دځمکې ترپوښښ لاندې نقشې اخيستنې په اړوند غونډې ته معلو مات ورکړل او زياته يې کړه: دهيواد د ځمکې د پوښښ نوى ډيټابس له ٢٠١٠ کال څخه پيل شوى دى چې د٢٠١٣ کال په جنورى کې بشپړشوى دى.
د١٣٩٣ کال د نقشې اخيستنې په پرتله د نوى ډيټابس دقت له ديرشو مترو څخه لسو مترو ته د فضا له لارې ښه والى موندلى دى چې اصلي منابع يې د سينس او ناټو د هوايي عکس اخيستنې په کومکي منابعو سره دمصنوعي سپوږميو د عکسونو معلومات بشپړ شوي دي چې د هيواد ځمکه په پنځه ويشتو حوزو ويشل شوې ده او په هغوکې زراعتي ځمکې، بڼونه، ځنګلونه، د آبي کرکيلې، د ځمکې للمي کرکيله، تاکونه او د دايمې واورې ترپوښش لاندې ساحو شاړې ځمکې او دښتې په دقيق ډول مشخصې شوې دي.
د وزيرانو شورا د کرنې او اوبو لګولو د وزير د رپوټ د تاييدولو په ترڅ کې دغه وزارت مو ظف کړ چې دکرنې په ميکانيزه کولو، ددغه وزارت له خوا د اصلاح شويو تخمونو د روزنې، دکرنيزو محصولاتو دکيفيت په لوړولو، د اوبو لګولو د کانالونو په احياکولو، د هيواد بزګرانو ته په سيموکې دکرنيزو اسانتياوو په برابرولو او د پومبې، لمرګولۍ،جغندرو او د نورو د صنعت په ګډون د کرنيزو صنايعو د محصولا تو په زيا توالى کې عملي اقدام وکړي.
دغه راز د وزيرانو شورا په کرنيزو اوشنو ساحوکې د استوکنې د ساحو جوړول او پراختيا غيرمجازه وبلله او د ښارواليو په ګډون دکورنيو چارو، د ښارجوړولو د چارو او د کرنې او اوبولګولو و زارتونه او نور اړونده وزارتونه او دولتي اورګانونه يې د هغو په جدي مخنيوى مو ظف کړل.
دغه راز د ښارجوړولو د چارو وزارت اوکابل ښاروالۍ مو ظف کړاى شول چې ټولې ودانۍ په تيره بيا ښاري ودانۍ له افقي بڼې څخه په عمودي بڼې عيارې کړي چې په کمو ساحوکې زيات شمير خلک ځاى کړاى شي.
په همدې ترتيب د ښارجوړولو د چارو،کرنې او اوبو لګولو، د کليو د بياجوړولو او پراختيا او د فوايد عامې وزارتونه موظف کړاى شول چې د افغانستان دځمکې هراړخيزړ پلان بشپړ او وروستۍ کړي او د وزيرانو شورا ته دې وړاندې کړي او د عدليې وزارت دې د ښارجوړولو د قانون د پړاونو په بشپړ ولو اقدام وکړي.
وروسته د کانونو وزير دتخارولايت دنورابه او دسمتي د سرو زرو دکانونو دقرارداد د مادو د تعديل په باب چې په ١٣٨٧ کال کې له ويست لند جنرال ترينګ شرکت سره لاسليک شوى دى؛ ددغه  وزارت وړانديز څرګندکړ چې ددغه قرارداد په مادو کې د نواقصو په نسبت چې تعديل يې د کانونو په قانون کې د ليکل شوى د وزيرانو د کميټې له خوا هم تاييد شوى دى، غونډې ته طرحه کړ.
د  وزيرانو شورا له دغې کمپنۍ سره د نورابه او سمتي د سرو زرو دکانونو دقرارداد د مادو د تعديل په باب د کانونو وزات وړانديز تصويب کړ او د کانونوپه قانون کې د ليکل شويو وزيرانو کميټه او په ساختماني، تخنيکي،کانونو، انرژى او اوبو په چاروکې د جمهور رئيس سلاکار يې مو ظف کړل چې دغه قرارداد دې تصحيح او بشپړ کړي.
وروسته په ثابت ډول د نفتي توکو د محصول تعرفه د ماليې او د سوداګرۍ او صنايعو د  وزيرانو له خوا غونډې ته طرحه شوه چې د وزيرانوشورا له خوا تصويب شوه.
ورپسې له اې ،ډي ،پي کمپنۍ څخه د نفتي توکو د پيرودنې په لاره کې د سوداګرۍ او صنايعو وزارت له آر، ال، سي څخه د ماليې وزارت تضمين د سوداګرۍ او صنايعو او د ماليې وزيرانو له خوا غونډې ته طرحه شو او څرګنده يې کړه چې دغې کمپنۍ د قرارداد د منظورى له وخت څخه د يو کال لپاره چې د وزيرانو شورا د١٣٩٣ کال د تلي د مياشتې د لسمې نيټې په غونډه کې ترسره شوې ده؛ تراوسه پورې د قرارداد له مندرجاتو سره سم په خپلو ژمنو عمل نه دى کړى.
سربېره پر دې دغه کمپنۍ کوم مشخص بانکي حساب نه لري او د نفتي توکو د واردولو په برخه کې کاري سابقه نه لري چې د آر، ال ،سي د تضمين په باب د ماليې وزارت اعتماد ترلاسه کړي.
د وزيرانو شورا له هراړخيزو خبرو وروسته له ټا کلې مو دې سره سم د نفتي توکو په واردولوکې د دغې کمپنۍ د نه ځواکمنۍ له امله د دولس زره پنځه سوه ټنو ديزل تيلو او د دولس زره پنځه سوه ټنوپطرولو د پيرودنې د قرارداد فسخه چې له اې ډي پي کمپنۍ سره چې د يو کال لپاره لاسليک شوى و او تر اوسه پورې نه دى عملي شوى، تصويب کړه.
وروسته دجمهوري رياست د ارګ د مصئونيت او د امنيت د تامينولو په مقصد د جمهوري رياست ارګ ته څېرمه د اته سوه درې ويشت اعشاريه پنځه ويشت متره مربع په مساحت دمحترمې شريفې د عبدالکريم د لور د ملکيت د يوې حويلى استملاک د چارو د ادارې او د  وزيرانو شورا د دارالانشا د لوى رييس له خوا غونډې ته طرحه شو چې د تصويب وړ وګرځيد.
دغونډې په پاى کې د بهرنيو چارو د وزير له خوا څلورمورده نړيوال تړونونه غونډې ته طرحه شول چې له دې جملې څخه درې مورد يې په دې ډول تاييد شول.
1. د افغانستان د اسلامي جمهوريت د بلخ پو هنتون او د ترکيې جمهوريت د نجم الدين اربکان پو هنتون ترمنځ د همکارۍ موافقه ليک؛
2. دافغانستان د اسلامي جمهوريت او دسريلانکا دسوسيالستي دمو کراتيک جمهوريت د حکومت ترمنځ دفرهنګي همکارۍ تفاهم ليک؛
3. د افغانستان د اسلامي جمهوريت او د سريلانکا د سوسيالستي دموکراتيک جمهوريت ترمنځ په اقتصادي، تعليمي ، علمي اوتکنالوژيکي برخوکې د همکارۍ موافقه ليک؛
د وزيرانو شورا د بهرنيو چارو وزير او د ملي امنيت سلا کارموظف کړل چې د اوبو او بريښنا په برخه کې د افغانستان د اسلامي جمهوريت او د ايران د اسلامي جمهوريت  د همکاريو تفاهم ليک دې د هيواد د ملي ګټو په پام کې نيولو سره بيا وڅيړي او د نتيجې په باب دې د جمهوري رياست مقام ته رپوټ وړاندې کړي.

کابل\  باخترد   جوزا دمياشتې  ١٣ :
د ملي دفاع وزارت خبرتيا
دمرکز او ولايتونو د ژورناليزم، ادبياتو او دکامپيوټرسياينس د پوهنځيوهغو فارغانو ته چې پخوايې دملي دفاع وزارت دټولنيزو اړيکو، پارلماني اوعامه چارو په رياست کې يې نومونه ليکلي و اوټاکل شوې وه چې آزموينه دغبرګولي د مياشتې په ١٤نيټه واخيستل شي؛ خبرورکول کيږي چې دځينو موجودو معذرتونو له امله  د آزموينې اخيستل وځنډول شو .
فارغان دې خبر وي .