15 December 2019

RSS Facebook

سوداگریز


تازه خبرونه

 د واټونو د نومولو کمېسيون ناسته وکړه

د واټونو د نومولو کمېسيون ناسته وکړه

کابل/دلیندۍ۲۴مه/باختر د اطلاعاتو او فرهنګ وزارت د سرپرستې حسينې ساپۍ په...

د ملي شورا پلاوي د فراه پوځي حالت وڅېړه

د ملي شورا پلاوي د فراه پوځي حالت وڅېړه

کابل/دلیندۍ۲۴مه/باختر د مشرانو جرګې يو شمېر غړو پرون د فراه له...

د هېواد په لوېديځ کې د پانګونو د جواز ليکونو د وېش دېرش سلنه زياتوالى

د هېواد په لوېديځ کې د پانګونو د جواز ليکونو د وېش دېرش سلنه زياتوالى

کابل/دلیندۍ۲۴مه/باختر د هرات د صنعت او سوداګرۍ ادارې مسوولينو د تېرکال...

Youtube Player

khantry design

سوداگریز

سوداگریز

کابل\  باخترد وري  دمياشتې  ٢٩ :
د ښځوپرخلاف دتاوتريخوالى ډرامو دخپرولو په باب دنظر سنجونې ترعنوان لاندې کارګاه نن په پنجشير ولايت کې جوړه شوه.
دپنجشيرولايت مطبوعاتي مسوول  محمدجاويد راهب باخترآژانس ته وويل:
د امريکا د بيارغاونې پرمختيايي موسسې نن دهغو ډرامو دخپرولو په باب دنظر سنجونې ترعنوان لاندې کارګاه چې په افغانستان کې د ښځو پرخلاف  د تاوتريخوالى منعکس کوونکى دى  او د رسنيو له لارې خپريږي؛ د يوې ورځې لپاره په پنجشنيرولايت کې يوه کارګاه جوړه کړه.
د دغې کارګاه يوتن مسوول ولي احمد شيرزاد باخترآژانس ته وويل چې موږ  د دغې کارګاه په جوړولو سره غواړو د دغو ډرامو په باب د بېلابېلو مرکزونو نظريې ترلاسه کړو او د هغو تاوتريخوالوپه باب چې تراوسه پورې ورته پاملرنه نه ده شوې؛  معلومات ترلاسه کړو چې له دې لارې وکولاى شو د ښځو پرخلاف د تاوتريخوالى په کمښت کې ښه کارونه ترسره کړو.
د يادونې وړ ده چې په دې کارګاه کې د سيمه ييزو ادارو او مرکزونو يو شمېر مسوولينو ګډون کړي وو.

کابل\  باخترد وري دمياشتې  ٢٩ :
دملي امنيت د لوى رياست موظفينو پرون د يوې تروريستي پيښې عامل په هرات ولايت کې ونيوه چې دهرات ښار په يوه ګڼ  ميشته سيمه کې د ماين په ايښودلو سره زموږ د زيات شمېر هيوادوالو دشهادت سبب شوى و .
دملي امنيت د لوى رياست  مطبوعاتي دفتر باخترآژانس ته  خبرورکړ:
په نيول شوى سړى تورلګول شوى دى چې څه موده مخکې يې د هرات ښاروالۍ په وړاندې يو ماين ځاى پرځاى کړى و چې د چاودنې له امله يې يوشمېرکسان شهيدان اوټپيان شول.
نيول شوى سړى په هرات کې دطالبانو د يوقوماندان قاري خليل په ډلې پورې مربوط دى .

کابل\  باخترد وري دمياشتې  ٢٩ :
د فوايدعامې وزارت نن دشلو کيلومترو په اوږدوالى د يو سړک د جوړولو تړون له يو افغاني شرکت سره لاسليک کړ.
دباخترآژانس دخبرله مخې: دفوايدعامې وزارت نن دارزګان ولايت دترينکوټ _ دهراود د سړک د جوړولو تړون د افغان-صداقت  له يو افغاني شرکت سره لاسليک کړ.
ټاکل شوې ده دغه شرکت د شلو کيلومترو په اوږدوالى د ترينکوټ  _ دهراود سړک  د جوړولوکار په  اتو مياشتوکې بشپړکړي .
د فوايد عامې وزير انجينر نجيب الله اوژن په داسې حال کې چې ددغه وزارت يوشمېر مسوولين او د ارزګان ولايت سيمه ييز مقامات هم حاضر وو؛ دغه تړون د افغان-صداقت  د افغاني شرکت له رييس سره لاسليک کړ.
د دغې پروژې لګښت څلور سوه څوارلس مليونه افغانۍ کيږي چې د فوايد عامې وزارت له بودجې څخه تمويليږي.
د فوايدعامي وزير د قرارداد د لاسليک کولو په وخت کې ددغه شرکت دکار په کيفيت تينګار وکړ او ژمنه يې وکړه چې ددغه وزارت د سړک جوړولو انجينران به هم ددغې پروژې دکارڅارنه وکړي.

کابل\  باخترد وري دمياشتې  ٢٩ :
دتخار ولايت د تالقانو ښار د بي بي هاجرې د ښوونځى يوشمېر زده کوونکي نن مسمومې شوې.
دتالقانو ښار دملکي روغتون سرطبيب ډاکتر عبدالجميل باخترآژانس ته وويل : د تالقانو ښار د بي بي هاجرې د ښوونځى اوولس تنه زده کوونکي له مسموميت وروسته دغه روغتون ته ليږدول شوې دي.
ده زياته کړه چې د يوشمېر مسموم شويو زده کوونکو روغتيايي حالت ښه دى.
ده ددغه ښوونځى د زده کوونکو د مسموميت علت څرگند نه کړ.
دا په داسې حال کې ده چې تېرکال هم د همدې ښوونځى دوه سوه تنه زده کوونکي مسمومې شوې وې اوپه ټوليزه توګه دتالقانو ښار په څو ښوونځيوکې اووه سوه تنه زده کوونکي مسموم شوي وو.
امنيتي مقاماتو تراوسه پورې په دې باب نظر نه دى څرگندکړى.

کابل\  باخترد وري دمياشتې  ٢٩ :
دبدخشان ولايت دکوکچې راډيو مسوول مديرپرون ديو غيرمسوول وسله وال سړى له خوا ټپي شو.
دبدخشان ولايت امنيه قوماندان جنرال امام الدين مطمئن باخترآژانس ته وويل چې  دکوکچې راډيوپه مسوول مدير عبدالملک خراساني هغه وخت بريدوشوچې  دسيمې خلکو  پرې شک وکړ چې دى له طالبانوسره همکاري لري اوطالبانوته وسلې ليږدوي .
خراساني د جرم ولسوالۍ دملي امنيت دمنسوبينوله خوا وژغورل شول او روغتون ته وليږدول شو .
دغه راز دبدخشان د ژورنالستانو د اتحاديې رييس عبدالبصير حقجو وايي: که چيرې له طالبانوسره د عبدالملک خراساني د همکارى په اړوند سندونه وړاندې شي دغه اتحاديه کوم اعتراض نه لري اوکه چيرې سندونه اوشواهد نه وي؛ دغه اتحاديه د خراساني د حيثيت د اعاده کولو غوښتنه کوي او د هغه له حقوقوڅخه  دفاع کوي .

کابل\  باخترد وري  دمياشتې  ٢٩ :
د وسله والوطالبانو يو مشهور قوماندان ملاظاهر له يوبل وسله وال طالب سره په نورستان ولايت کې ووژل شو.
د نورستان ولايت د امنيې قوماندانۍ د امنيت آمر مل پاسوال محمدفاروق  باخترآژانس ته وويل: دغه دوه تنه پرون مازيګر دنورستان ولايت په وايګل ولسوالۍ کې د ناټو دځواکونو د بريدله امله ووژل شول .
ده زياته کړه چې ملاظاهرپه نورستان کې دطالبانو مشهور قوماندان و چې دملکي وګړو په تښتولو او وژنوکې يې لاس درلود.

کابل\  باخترد وري دمياشتې  ٢٩ :
دکابل _ قندهار په لويه لاره کې د عامه نظم دپوليسو يوموټر په سړک کې په ښخ کړاى شوى ماين وخوت چې د چاودنې له امله يې پنځه تنه پوليسان شهيدان او دوه تنه نور ټپيان شول.
دغزني د والي ويندوى فضل احمدسباوون باخترآژانس ته وويل: دغه پيښه پرون مازيګر د قره باغ او د اندړو ولسواليو په تګلورى کې رامنځته شوه چې له امله يې دعامه نظم پنځه تنه پوليسان شهيدان او دوه تنه نورټپيان شول. دټپيانو روغتيايي حالت ښه بلل شوى دى .
سباوون ددغې پيښې عاملين وسله وال طالبان وبلل.

کابل\  باخترد وري دمياشتې  ٢٩ :
په فارياب ولايت کې په يوې وسله واله نښته کې دوه تنه وسله وال طالبان ووژل  شول اوپنځه تنه نور يې ټپيان شول.
دغه نښته تېره شپه دفارياب ولايت د پشتون کوټ ولسوالۍ په ناموساى کلى کې رامنځته شوه.
د پشتون کوټ ولسوال عبدالقدير قادري باخترآژانس ته وويل: دغې نښتې څه ناڅه يو ساعت دوام درلود چې له امله يې دکمال الدين په نامه د سيمه ييزو پوليسو يو تن قوماندان هم ټپي شو.
د پشتون کوټ د ولسوال دڅرګندونوله مخې: د وژل شويو طالبانو مړي دجگړې په ډګرکې پاتې دي او دجګړه مارو طالبانو يوه اندازه جنګي وسايل هم په عملياتوکې دشاملوځواکونولاسته ورغلي دي .

کابل\  باخترد  وري  دمياشتې  ٢٩ :
د افغانستان د اسلامي جمهوريت جمهور رييس حامدکرزي له سلاکارو وزيرانوسره د کتنې په بهيرکې  د افغانستان او امريکا ترمنځ د امنيتي تړون اودجمهوري رياست د راتلوونکو انتخاباتو په ګډون، د هيواد د مهمو مسئلو په باب خبرې وکړې.
دجمهوري رياست مطبوعاتي دفتر باخترآژانس ته خبرورکړ:
په دې کتنه کې چې پرون له غرمې وروسته په ارګ کې وشوه؛ جمهور رييس  د امنيتي تړون په باب خبرې مهمې وبللې او ويې ويل چې افغانستان په دې وروستيو وختوکې دامنيتي موافقه ليک دطرحې  له مطالعې وروسته چې دامريکا دمتحده ايالاتوله خوا ليږل شوې وه؛ خپلې نظريې د هيواد د ملي ګټواو د افغانستان دخلکو دخير پربنسټ د امريکا لورى ته وړاندې کړې دي.
جمهور رييس وويل: افغانستان د امنيتي تړون  د لاسليک کولو لپاره بيړه نه لري  او غواړي چې د هيوادګټې په بشپړ دقت سره د تړون په متن کې په پام کې ونيول شي.
حامدکرزي وويل چې د امريکا او افغانستان ترمنځ امنيتي تړون بايد د دوو  خپلواک هيوادونوسره وي او د سولې او امنيت،  ملي يو والى، ځمکنۍ بشپړتيا  او د امنيتي ځواکونو د پياوړتيا د تامينولو په ګډون، دافغانستان ګټې پکې وساتل شي .
جمهور رييس وويل چې له امريکا سره د امنيتي موافقه ليک له لاسليک کولوسره د افغانستان موافقه په هيوادکې د سولې او امن  د تامينولو سبب شي .
حامدکرزي د انتخاباتو په باب وويل چې د جمهوري رياست راتلوونکي انتخابات خامخاترسره کيږي او د افغانستان ملت هرچاته چې رايه ورکړه؛ هغه بايد  دبدخشان له لوړو غړو څخه د نيمروز تر دښتو پورې د افغانستان ټول خلک دځان وګڼي، غچ اخيستونکي نه وي ، پراخ ټټر ولري او د خپلوخلکو په وړاندې برده بار او متواضع  وي.
جمهور رييس د٢٠١٤ کال په باب انديښنې ذهني اوتبليغاتي وسيله وبلله او ويې ويل چې هلې ځلې کيږي له دغه شان تبليغاتوسره  زموږ  ذهن مصروف وساتل شي.

کابل\  باخترد وري  دمياشتې  ٢٩ :
د افغانستان داسلامي جمهوريت جمهور رييس حامدکرزي په هرات ولايت کې  ماين ايښودونه چې زموږ د يوشمېر بيګناه هيوادوالو د مرګ ژوبلې سبب شوه؛ په کلکه وغانده.
دجمهوري رياست مطبوعاتي دفتر باخترآژانس ته خبرورکړ:
د کورينو چارو وزارت د معلوماتوله مخې: پرون سهار يو مازدا ډوله بار وړونکى  موټر د شينډنډولسوالۍ د علي آباد د سيمې په تګلورى کې په يو ماين چې نوى  د تروريستانو له خوا ځاى پرځاى شوى و؛ د چاودنې له امله يې د يو ماشوم په ګډون اووه تنه  ملکي وګړي شهيدان اوڅلور تنه نور ټپيان شول.
د افغانستان داسلامي جمهوريت جمهور رييس حامدکرزي ددغه تروريستي عمل  دسختې غندنې په ترڅ کې هغه يې د دين د دښمنانو او د پرديو د مزدورانو له خوا د مسلمان وژنې دوام وباله.
دافغانستان داسلامي جمهوريت جمهور رييس د شهيدانوکورنيو ته دخپلې ژورې  خواخوږۍ او ډاډګيرنې مراتب څرگندوي او د لوى خداى (ج) له دربارڅخه  هغوى ته  د صبر او زغم او ټپيانوته  د سملاسي روغتيا هيله کوي.