06 December 2019

RSS Facebook

سوداگریز


تازه خبرونه

څوارلس تنه دجنايي جرمونوپه تور ونيول شول

څوارلس تنه دجنايي جرمونوپه تور ونيول شول

کابل / د ليندۍ دمياشتې ١٤ مه / باختر...

دجوزجان بڼوالو دکار وسايل ترلاسه کړل

دجوزجان بڼوالو دکار وسايل ترلاسه کړل

کابل / د ليندۍ دمياشتې ١٤ مه / باختر...

يو قاتل ونيول شو

يو قاتل ونيول شو

کابل / د ليندۍ دمياشتې ١٤ مه / باختر : دکابل...

Youtube Player

khantry design

سوداگریز

سوداگریز

 

کابل\  باخترد  وري  دمياشتې  ١٧ :

دسمنګانو د لوړو زده کړو د موسسې په چوکاټ کې داقتصاد پوهنځى جوړشو.

د سمنګانو ولايت دلوړو زده کړو دموسسې رييس احمدنقيب مسلميار دباخترآژانس له خبريال سره دمرکې په ترڅ کې وويل: ددغه ولايت دخلکو او د مشرتابه هيئت په غوښتنې، ددغه پوهنځى جوړول دلوړو زده کړو وزارت له خوا منظور شوى دى .

پخوا د لوړو زده کړو موسسې، دکرنې او دښوونې او روزنې پوهنځي درلودل او اوس په دغه نوى جوړشوى پوهنځى کې دوه سوه تنه محصلان چې دکانکور په آزموينه کې بريالي شوي دي؛ شامل شوي دي.

مسلميار وويل: ددغه پوهنتون په سلو کې پنځوس محصلان له نورو ولايتونو څخه دي او دغه محصلان دليليې د ودانۍ د نشتوالى له امله په کرايي کورونو او خونو کې شپې سباکوي.

 

کابل\  باخترد وري  دمياشتې  ١٧ :

دهلمند ولايت يوسيمه ييز مسوول ددغه ولايت د کجکي ولسوالۍ ته د يو زيات شمېر بهرنيوطالبانو د رسيدو خبره کوي او له امنيتي مقاماتو څخه غواړي چې په دغې ولسوالۍ کې حالت تر زياتې څارنې لاندې ونيسي .

دکجکي ولسوال عبدالرزاق مجنون يار رسنيو ته ويلي دي چې له دووګاونډيو هيوادونو څخه څه ناڅه درې سوه بهرني طالبان کجکي ته راغلي دي او دسيمه ييزوطالبانو په مرسته هلې ځلې کوي چې د کجکي د بريښنا د بند د بيارغاونې بهير ګډوډ کړي .

دغه راز دغه طالبان په پام کې لري چې دکوکنارو او د حاصلاتو د راټولولوپه درشل کې له بزګرانو سره مرسته وکړي او هغو سرتيرو ته  ستونزې رامنځته کړي چې په هلمندکې دکوکنارو د اړولو دنده لري .

اوس دکجکي د بريښنا دبند د بيارغاونې بهير د امريکا په مرسته ترلاس لاندې دى، خو دومره چټک نه دى .

له بله پلوه دکورنيو چارو وزارت  دنشه يي توکو پرخلاف د مبارزې ځانګړى قطعه دکوکنارو د اړولو پروګرام ترلاس لاندې نيولى دى او دغه پروګرام په برياليتوب سره د پراختيا په  حال کې دى.

دکجکي ولسوال، دکجکي بند په شاوخوا کې د بهرنيو طالبانو شتون او دافغان طالبانو راټوليدل او دکوکنارو د اړولو دبهير ګډوډول، په دغې ولسوالۍکې دامنيت په وړاندې جدي خطر بولي او خبردارى ورکوي: که چيرې په  کجکي سيمه کې پوليس پياوړى نه شي او ريزرفي ځواکونه دغې ولسوالۍ ته ونه ليږل شي؛ په  کجکي کې به بد حالت رامنځته شي .

يو امنيتي  مقام چې نه غواړي نوم يې واخيستل شي وايې: هغه څه  چې په کجکي  کې د بهرنيوطالبانو په شتون پورې اړه لري؛ کيداى شي  د انديښنې وړ وي. موږ په کجکي  او د هلمند په نورو سيموکې امنيتي  مسئلو ته متوجه يو .

کجکي په هيواد کې ستره بنسټيزه پروژه ده او موږ دهغې د ساتنې په خاطرپه کجکي کې دميشتو امنيتي ځواکونوپه پياوړتيا حساب کوو.

دکجکي  اويا په هيواد کې د نورو اقتصادي  پروژو پرخلاف  ګواښ نوى خبره نه ده، څرنګه چې ددغه شان پروژو پرخلاف ګواښونه دوامداره دي؛ زموږ تدبيرونه به هم دوامداره وي.

 دکورنيو چارو وزارت د ويندوى مرستيال داکترنجيب الله دانش دکجکي د ولسوال  دڅرگندونو په اړوند دباخترآژانس خبريال ته وويل: لکه څنګه چې ويل کيږي په کجکي کې امنيت له ګواښ سره مخامخ نه دى؛ موږ  په دې باب اطلاعاتو لرو، موږ دغه  اطلاعات څيړو، خو دکجکي د بريښنا بند د امنيت په تامينولوکې هم غافل نه يو.

 

د افغانستان د اسلامي جمهوریت د مالیې وزارت د چارشنبې په ورځ د فراه ولایت پرمحکمې باندې هغه وحشیانه برید چې زموږ نظامي او ملکي افغانانو ته پکې مرګ ژوبله واوښته، په کلکه غندي. د پیښې قربانیانو ته د فردوس جنت هيله کوي.

د شهیدانو کورنیو ته  د لوی خدای (ج) له دربار څخه د جمیل صبر غوښتنه کوي، ټپیانوته د عاجل صحت دعا کوي او په راتلونکي کې د دا ډول پيښو د مخنیوي هیله کوي.

 

کابل\  باخترد وري  دمياشتې  ١٧ :

د امريکا د اردو د لويو درستيزانو رييس نن افغانستان ته راورسيد.

دباخترآژانس دخبرله مخې: دملي دفاع وزارت خبرځايونو تائيدکړه چې دامريکا دمتحده ايالاتو د لويو درستيزانو رييس جنرال مارتين ديمپسي د يولړ خبرو لپاره افغانستان ته راغلى دى.

دنړيوالو قوتونو خبرځايونو ويلي دي چې له افغانستان څخه دبهرنيو ځواکونو وتل او دافغانستان امنيتي ځواکونو پياوړتياهغه مسئلې دي چې جنرال ديمپسي په افغانستان کې دخپلې استوګنې په بهيرکې هغه له افغان مقاماتو په دغه هيواد کې د نړيوالو ځواکونو له قوماندانانوسره طرحه کوي .

کابل\  باخترد  وري  دمياشتې  ١٧ :
دقندهارولايت د ژيړۍ او ميوند ولسواليوپه مربوطاتوکې په دوه سوه پنځوس  جريبه ځمکه کې کرل شوي کوکنار واوړل شول.
د قندهار د والي ويندوى جاويدفيصل باخترآژانس ته وويل: څه دپاسه  يوڅلويښت   جريبه ځمکه دماماکاريز په ساحه کې او يوسلو پنځلس جريبه ځمکه د ژيړۍ ولسوالۍ په تانکري دره کې  له کرل شويو کوکنارو څخه پاکه شوه.
ده وويل: په دغو دوو ساحوکې دکوکنارو د اړولو دپروګرام په بهيرکې  څوماينونه  چې دطالبانو له خوا دکوکنارو د اړولو د پروګرام دګډوډولو په مقصد ځاى پرځاى شوي وو؛ د امنيتي ځواکونو  له خوا کشف اوترلاسه شوي دي .
دغه پروګرام په قندهار کې له يوې مياشتې را په دې خوا پيل شوى دى اوپه بشپړه توګه دکوکنارو  تر اړولو پورې به دوام وکړي .

کابل\  باخترد وري دمياشتې  ١٧ :
د آسيا د ملتونو د جام  په مقدماتي سياليوکې دهيواد تنکيو ځوانانو دفوټبال ټيم نن دتاجکستان د ټيم په وړاندې ماتې وخوړه.
د فوټبال  فدراسيون  دخپرونو آمر مرتضى دانش دباخترآژانس خبريال ته وويل: دغه سيالۍ چې نن سهار په نيپال کې ترسره شوه؛ دهيواد دتنکيوځوانانو ټيم د يوې په مقابل کې په دوو سره دتاجکستان ټيم په وړاندې ماتې وخوړه اوبل  پړاو ته له لوړيدو څخه پاتې شو.
دخبر ځاى دڅرګندونو له مخې: دافغانستان دتنکيو ځوانانو دفوټبال ټيم په دوو لوبوکې دنيپال ټيم ته ديوې په مقابل کې په دوو سره او بوتان ته يې دصفر په مقابل کې په  څوارلسو سره ماتې وکړه.
د يادونې وړ ده چې د آسيا دملتونو دجام مقدماتي سيالۍ دشپږڅلويښتو هيوادونو دټيمونو په ګډون، د روان ميلادي کال د اپريل دمياشتې له دويمې نيټې  څخه په نيپال کې پيل شوې وې چې افغانستان په سي ګروپ کې دنيپال ، بوتان او دتاجکستان له ټيمونوسره لوبې وکړې.

کابل\  باخترد وري  دمياشتې  ١٧ :
د روغتيايي خدمتونو او درملو د وړاندې کولو دوه ديرش خصوصي مرکزونه  له روغتيايي قوانينو څخه د سرغړونې له امله په کابل ښارکې وتړل شول.
دعامې روغتيا وزارت د روغتيايي قوانينو د تطبيق اوڅيړنې رييس ډاکتر سيدابراهيم کامل باخترآژانس  ته وويل: دوه ويشت درملتونونه، يو لابراتوار ، د ټلويزيوني کتنو يو کلينيک او د ډاکترانو  اته کتنځي چې له روغتيايي قوانينو څخه يې سرغړونه کړې وه؛ د ټاکلي مودې لپاره ددغه رياست  دموظف هيئت له خوا وتړل شول.
ډاکترکامل څرگنده کړه:ترهغه وخته چې ددغومرکزونومتصديان خپلې نيمګړتياوې اوسرغړونې اصلاح نه کړي؛ د بيافعاليت اجازه به ترلاسه نه کړي.
ده د روغتيايي  خدمتونو او درملو  وړاندې کولو دخصوصي مرکزونو دڅيړنې  پردوام باندې ټينګار وکړ او ددغو مرکزونو له متصديانو څخه يې وغوښتل چې دعامې روغتيا له مقرراتو سره سم خپل فعاليتونه عيارکړي .

کابل\  باخترد وري دمياشتې  ١٧ :
دملي اردو اوملي پوليسو منسوبينو نن په بادغيس ولايت کې دګډو عملياتوپه بهيرکې دوه تنه وسله وال مخالفين ووژل ، درې تنه يې ټپيان او يوتن يې ونيوه.
دملي دفاع وزارت مطبوعاتي دفتر باخترآژانس ته خبرورکړ: دغه عمليات دبادغيس ولايت د مقر ولسوالۍ په مربوطاتوکې ترسره شول  چې له امله يې دوه تنه مخالفين  ووژل شول ،  درې تنه  ټپيان اويو تن يې ونيول شو.
د يوبل خبرله مخې: دملي اردو منسوبينونن دفراه ولايت دبالابلوګ ولسوالۍپه مربوطاتو کې له يوسراچه موټر سره شل کيلوګرامه نشه يي توکي کشف اوترلاسه کړي دي خو دهغو دليږدونکي په باب څه نه دى ويل شوى .

کراچي \ فرانتيرپست \  باخترد وري  دمياشتې  ١٧ :
دپاکستان په کراچي ښارکې د تاوتريخوالي په دوام څه ناڅه پنځه تنه نور ووژل شول.
دپاکستان د رسنيو دخبرله مخې: دغه پنځه تنه په تيرو ٢٤ساعتو کې دکراچي ښار په بېلابېلو ناحيوکې په ډزوسره وژل شوي دي.
د دوو تنو وژل شويوکسانو مړي په واټونوکې ترلاسه شوي دي او د يوې ښځې په ګډون، درې تنه نور د موټرسايکل سپرلو له خوا په جلاجلا بريدونوکې وژل شوي دي او ددغي ميرمني ميړه ټپي شوي دي.
د دووتنو وژل شويوکسانو هويت څرگند شوى دى .
له بلې خوا د پوليسو ځواکونو د کراچي په جناح کالوني کې د قصدي وژنو د يرغل ګرو د موندلو په عملياتوکې څه ناڅه نهه ويشت تنه نيولي دي.
په داسې حال کې چې د کراچي ښار امنيتي ځواکونه تل د فرقه يي بريدونو او د قصدي وژنو د بندولو لپاره هلې ځلې کوي؛ خو هره ورځ ددغه شان تاوتريخوالي خبرونه رارسيږي.

 مسکو\ دروسيي غږ\  باخترد وري  دمياشتې  ١٧ :
د روسيي د وسله والو ځواکونو د قوماندان مرستيال پرون خبريالانو ته وويل چې روسيه په افغانستان کې دپوځي اډې د جوړولو لپاره کومه  طرحه نه لري. 
دده دڅرګندونوله مخې: يواځې دغه امکان شته چې روسيه د هليکوپټرو دفني خدمتونو دمرکز دجوړولو لپاره د ناټوله مسوولينوسره خبرې وکړي.
د روسيې د وسله والو ځواکونو دقوماندان مرستيال دغه راز زياته کړه چې روسيه  دافغانستان د دولت په غوښتنه دهيواد دکورنيو امنيتي ځواکونو د پياوړتيا اوپه دغه هيواد کې د ثبات او امنيت د تامينولو ته درناوى کوي.