13 December 2019

RSS Facebook

سوداگریز


تازه خبرونه

  دعامې روغتيا وزارت دټوليز روغتيايي پوښښ نړيواله ورځ ونمانځله

دعامې روغتيا وزارت دټوليز روغتيايي پوښښ نړيواله ورځ ونمانځله

کابل /دليندې ٢١مه / باختر : دعامې روغتيا وزارت...

په بدخشان کې  په هوايي عملياتو کې  ١٢  طالبان ووژل شول .

په بدخشان کې په هوايي عملياتو کې ١٢ طالبان ووژل شول .

کابل /دليندې ٢١مه / باختر : دوسله والو طالبانو...

Youtube Player

khantry design

سوداگریز

سوداگریز

کابل_ باختر دکب  دولسمه :
دميدان وردګو ولايت دامنيتي حالت دڅيړنې په مقصد نن په دغه ولايت کې يوه غونډه جوړه شوه .
په دې غونډه کې چې دملي دفاع وزارت د لوى درستيز ستر جنرال شيرمحمد کريمي په مشرۍ او دملي امنيت دلوى رياست  دمرستيال ، دميدان وردګو د والي عبدالمجيدخوږياڼي او ددغه ولايت د نورو اداري اونظامي منسوبينوپه ګډون جوړه شوه؛ دميدان وردګو والي  ددغه ولايت  دامنيتي حالت په باب دغونډې برخه والو ته معلومات وړاندې کړ .
خوږياڼي څرګنده کړه: په هغه صورت کې چې امنيت تامين شي؛ دبيا جوړولو  ښه شرايط اوزمينه برابريږي .
په دې غونډه کې دميدان وردګو ولايت د امنيتي حالت په باب هراړخيزې خبرې وشوې چې موظف هيئت ته يو لړ وړانديزونه  او مهم امنيتي مطالب پيشنهاد شول.
دغه راز  دملي دفا ع وزارت  لوى درستيز ستر جنرال شيرمحمد کريمي  وويل :  ستاسو نظريې اووړانديزونه دقدر وړ دي او زه ستاسو دغه نظريې او وړانديزونه  دافغانستان داسلامي جمهوريت له جمهور رييس حامدکرزي او دناتو له ځواکونوسره شريکوم .
  وروسته  د ناتو دځواکونو يو قوماندان جنرال تيري په خبرو کې وويل چې موږ دهر افغان غوښتنو ته  دقدر په سترګه ګورو ، موږ  څومره قرباني چې په افغانستان کې ورکړي دي؛  علت يې  دا وو چې  افغانان دتروريزم له شر څخه خوندي وي .
  تيري  زياته کړه : موږ دميدان وردګو له ولايت څخه له خپلو ځواکونو د ايستلو په برخه کې کومه ستونزه نه لرو .
په دې غونډه کې يوشمېر جګپوړوپوځي افسرانو او په ولسي جرګه کې دخلکو استازو هم برخه لرله .
 

کابل_ باختر دکب  دولسمه :
د افغانستان دعالمانو سراسري شورا دپاکستان دعالمانو د شورا وروستى څرګندونې  د اسلام د مبين دين د ارشاداتو پرخلاف  وبللې .
دافغانستان  دعالمانو  سراسري شورا په دې باب چې ځانمرګي بريد په پاکستان کې ناروا او په افغانستان کې جايز دى؛ دپاکستان دعالمانو شورا د رييس  د وروستيو څرګندونو پرخلاف غبرګون کې يوه اعلاميه خپره کړې ده.
  دباختراژانس دخبر له مخې: په دې اعلاميه کې ويل شوى دى چې دغه شان څرګندونې د قرانکريم د قطعي نصوصو او د نبوي احاديثو پرخلاف دي او د سياسي او استخباراتي لمسوونکوتبليغاتو يوه برخه ده چې نه يواځې هيڅ راز ستونزه نه حل کوي؛ بلکې دمسلمانانو ترمنځ د زياتې فتنې او ستونزو سبب کيږي.
ددغې اعلاميې په پاى کې ټينګار شوى دى چې دغه شان څرګندونې په هيڅ صورت کې  د قران عظيم الشان  او د نبوي سنت  پربنسټ  تکيه نه لري .

کابل_ باختر دکب  دولسمه :
د ترکيې د انرژي او دطبعي منابعو د وزير په مشرۍ ددغه هيواد هيئت نن له غرمې وروسته دجمهور رييس له مرستيال او داقتصادي کميټې له رييس  محمد کريم خليلي سره وکتل او په بېلابېلو برخوکې يې د دواړو هيوادونو  ترمنځ  د اړيکو دپراختيا د څرنګوالي په باب  خبرې وکړې .
  دجمهوري رياست مطبوعاتي دفتر باختراژانس ته خبر ورکړ:  په دې کتنه کې چې په کابل کې دترکيې جمهوريت د سفير په ګډون سربيره، يو شمېر دولتي مقاماتواو ددغه هيواد دخصوصي برخې سوداګرو او استازو هم برخه لرله، دترکيې جمهوريت د انرژي او دطبيعي منابعو وزير کابل ته دخپل سفر په بهيرکې له بېلابېلو افغاني مقاماتو سره خپلو ليدنو کتنو ته  د اشارې په ترڅ کې په  اقتصادي ، تجارتي او فرهنګي برخوکې د دوه اړخيزو اړيکو دپراختيا لپاره د دواړو هيوادونو ظرفيت  لوړ وباله او دافغانستان  په بيلابيلو برخوکې يې د زياتې پانګې اچونې لپاره  دخپل متبوع هيواد په علاقمندي باندې ټينګار وکړ.
ده دغه راز څرګنده کړه چې افغانستان تر ځمکې لاندې د بډايو سرچينوپه لرلو او دخپلو انساني ځواکونو په پالنې سره، داقتصادي ودې او پرمختيا په لاره کې ښه استعداد لري او کولى شي په تجارتي او اقتصادي برخوکې زيات برياليتوبونه  ترلاسه کړي .
  په دې کتنه کې چې دکانونو وزارت معين هم برخه لرله؛ دجمهور رييس مرستيال  او داقتصادي کميټې د رييس محمدکريم خليلي ددواړو هيوادونو اړيکې دوستانه  او تاريخي وبللې اوپه نوى فصل کې يې  په افغانستان کې دبيا جوړولو او ثبات په لاره کې د دوست هيواد ترکيې  دمرستو او همکاريو له امله مننه او قدرداني وکړه .
  دجمهور رييس  مرستيال هيله وکړه چې دترکيې د انرژي او دطبيعي منابعو د وزير سره د دواړو هيوادونو په اړيکو کې  نوى فصل پرانيزي .
ده  ترکيه د سيمې يومهم هيوادوباله اوڅرګنده يې کړه چې ترکيه په اسلامي نړۍ کې هم خپل ځانګړې ځاى لري چې هم له لويديځو هيوادونوسره دتعامل دڅرنګوالى او هم  ددموکراتيک نظام دټينګښت له پلوه کيداى شي دمسلمانو هيوادونو لپاره الګو او سرمشق وي .
دجمهور رييس مرستيال دغه راز په بېلابېلو برخو کې دترکيې د دولتي اوخصوصي سکتورونو دلازياتې پانګونې لپاره زموږ دهيواد دتيارى داعلامولو په ترڅ کې ، په افغانستان کې  د سولې امنيت او ثبات په ټينګښت او تامينولو کې  دترکيې رول ستر وباله او څرګنده يې کړه چې دواړه هيوادونه په اقتصادي او تجارتي برخوکې هم کولى شي د يوبل لپاره ښه بشپړونکى وي .
د يوبل خبر له مخې: دهيواد دلوړوزده کړو دموسسو يو شمېر استادانو نن له غرمې وروسته دجمهور رييس دمرستيال محمدکريم خليلي سره وکتل او د ښې رهبرى او حکومتوالى دمډال او دافتخاري دکتورا دترلاسه کولو له امله يې ده ته مبارکي وويله .
  په دې کتنه کې دهيواد دلوړو زده کړو دموسسو استادانو دجنوبي کوريا د سان مون پوهنتون  څخه دافتخاري دکتورا او د سولې د نړيوال فدراسيون دمشرتابه له خوا دښې رهبرى  اوحکومتوالى دمډال  ترلاسه کول، په هيواد کې د سياسي پراختيا او ددموکراسي دټينګښت په لاره کې دده دهڅو او هانداو دمخلصانه ژمنې او دغه راز خلکو ته دصادقانه خدمت نښه نښانه وبلله او څرګنده يې کړه چې دغه موضوع په  نړيواله کچه دافغانستان دملت د درناوى او د نړيوال اعتبار څرګندوي وي .
دغه راز دوى په هيواد کې  دلوړو زده کړو دپراختيا دڅرنګوالى په باب ځينې عمومي مسئلې اوهم اوسني ستونزې  دجمهور رييس له مرستيال سره طرحه کړې او په دې اړوند يې خپلې يو لړ نظريې اوپيشنهادونه وړاندې کړل .
په دې کتنه کې دجمهور رييس مرستيال محمد کريم خليلي جنوبي کوريا ته دخپل سفر دنتيجو دبيانولو په ترڅ کې څرګنده کړه چې دجنوبي کوريا له سان مون پوهنتون  څخه دافتخاري دکتورا ترلاسه کولوپه افغانستان کې دسياسي پراختيا او د سولې او ثبات دټينګښت په لاره کې  دده هوډ لاپسې پياوړي کړى دى .
  ده دغه راز دښې رهبرى  اوحکومتوالى مډال  هم دافغانستان په ټولو خلکو پورې اړوند وباله  او څرګنده يې کړه چې دغه موضوع  ددې ښکارندوى ده  چې دعمومي تصور پرخلاف افغانستان  د ښې حکومتوالى دتحقق په لاره کې اوچت ګامونه اخستي دي .
دجمهور رييس مرستيال  د زده کړې او تخصص له لارې دانساني ظرفيتونو په لوړولو باندې دټينګار په ترڅ کې څرګنده کړه چې دهيواد دپرمختګ يوه اساسي لاره د لوړو زده کړو پراختيا ته  پاملرنه ده  او په نوى فصل کې د زده کړې او تخصص لپاره  د افغانستان ټولو خلکو ته ښه فرصت برابر شوى دى .
 

کابل_ باختر دکب  دولسمه :
د ( سخن ) نندارتون نن داطلاعاتو او فرهنګ وزير ډاکتر سيد مخدوم رهين له خوا پرانيستل شو .
دباخترآژانس دخبريال دخبر له مخې: دغه نندارتون دافغانستان دماشومانو د تعليمي او روزنيز سرکس له خوا  داطلاعاتو  او فرهنګ  د وزير په همکارى په ملي نګارستان کې پرانيستل شو .
په دې نندارتون کې يوې ډلې ماشومانو خپلې ستونزې او د ژوندانه لارې چارې دعکسونو، فلمونو او ليکونو په واسطه  نندارې ته وړاندې کړې .
دغه راز دهيواد دبېلابېلو ولايتونو ماشومان سره راټول شوي دي چې خپلې ستونزې د يوبل په مرسته او د مشرانو په لارښوونه حل کړي اوماشومان په دې نندارتون کې هره ورځ بېلابېلې موضوعګانې له يوبل ، خلکو او رسنيو سره شريکوي .
ددغه  نندارتون د پرانيستلو په مراسموکې داطلاعاتو او فرهنګ وزير ډاکتر سيد مخدوم رهين خبرې وکړې او ويې ويل: ددغه شان پروګرامونوجوړول، د ماشومانو په وجودکې په نفس باور پياوړي کوي او په علمي او هنري برخوکې د هغوى د هڅونې او ودې زمينه برابروي .
ډاکتر رهين دنندارتون له جوړونکو څخه دقدردانۍ په ترڅ کې هيله وکړه چې دهيواد نور ماشومان هم په دغه شان امکاناتو برلاسي شي
د سخن د نندارتون د يو تن مسوول فردين بارکزى دڅرګندونو له مخې: دغه نندارتون د دريو نورو ورځو لپاره په ملي نګارستان کې د مينه والو پرمخ پرانيستى دى .
د غه راز په دې نندارتون کې د تعليمي او روزنيز سرکس د ماشومانو له خوا نمايشنامې اجرا کيږي .
 

کابل_ باختر دکب  دولسمه :
د جمهوري رياست لومړي مرستيال مارشال محمد قسيم فهيم په افغانستان کې دناټو دځواکونوله نوى قوماندان جنرال جوزف دانفورد سره وکتل .
دجمهوري رياست مطبوعاتي دفتر باختر آژانس ته خبر ورکړ: په دې کتنه کې چې نن له غرمې وروسته دصدارت په ماڼۍ کې ترسره شوه؛ دجمهوري رياست لومړي مرستيال په افغانستان کې اوسنۍ حالت ښه وباله او ويې ويل چې دافغانستان امنيتي ځواکونه په نږدې راتلوونکي کې دامنيتي مسووليتونو د ليږدونې د راتلوونکو پړاونو دتحقق موندلو په بهير کې ټول امنيتي مسووليتونه په غاړه اخلي او دا زموږ هيواد ته يو ستر برياليتوب دى .
دجمهوري رياست لومړي مرستيال دغه راز زياته کړه: اوس چې خلکو په هيواد کې په سياسي حالت باور پيداکړي دي؛ اقتصادي حالت ته پاملرنه مهمه ده او په دې لاره کې يون کولى شي په هيواد کې د ترقى او پرمختګ ضمانت وکړي .
په افغانستان کې  د ناټو دځواکونو  لوى قوماندان جنرال جوزف دانفورد هم په دغه هيواد کې د اوسنۍ حالت له امله خوښي څرګنده کړه او ويې ويل چې دافغانستان د اوسنيو حالاتو کتنې زه په دې باوري کړه يم چې په افغانستان کې اغيزمن ګامونه اخستل شوي دي اوموږ په برياليتوب هيله من کوي .
جنرال دانفورد وويل چې دافغانستان  خلک  له نړيوالې ټولنې سره په همکاري کې د زياتوهڅو او هاند په نتيجه کې ځلانده برياليتوبونه لري او اوس ددغو برياليتوبونو ساتنه او دفاع زموږ د ټولو دنده ده .
ده دافغانستان له خلکو سره دخپل هيواد دملاتړ د څرګندولو په ترڅ کې يادونه وکړه چې له  ٢٠١٤ کال وروسته به هم امريکا او نړيواله ټولنه ستاسو دخلکو ترڅنګ ولاړ وي او د ١٩٩٢ ميلادي کلونو تجربه به تکرار نه شي او د برياليتوب په لور به ګام واخلو .
 

کابل_ باختر دکب  دولسمه :
دجمهوري رياست لومړي مرستيال مارشال محمد قسيم فهيم نن مازيګر په ولسي جرګه او د قندهار په ولايتي شوراکې د استازو په ګډون، دقندهار ولايت له څو تنو مشرانو  سره د صدرات په ماڼۍ کې وکتل .
دجمهوري رياست مطبوعاتي دفتر باخترآژانس ته خبرورکړ: په دې کتنه کې دجمهوري رياست لومړي مرستيال د هيوادوالو ترمنځ دوستي او ورورولي، په ستونزو  د برياليتوب لپاره  لاره وبلله او زياته يې کړه چې موږ بايد په زغم او د يوبل په منلو سره يوبل لازيات تجربه کړو او په ياد ولرو چې په اوس وخت کې نړيوالو پرمختګونو ددغه چلند سموالې باندې دتاييد مهر لګولى  دى .
دقندهار ولايت دوو تنو مشرانو په دغه ولايت کې يو لړ موجودې ستونزې  دجمهوري رياست لومړي مرستيال ته  په ګوټه کړې .
دجمهوري رياست  لومړي مرستيال هغوى ته ډاډ ورکړ چې هره يوه به يې په ډير لنډ ممکن وخت کې د اړوندو مراجعو له لارې وڅيړل شي .
 

عشق اباد _ باختر دکب  دولسمه :
  دترکمنستان جمهور رييس قربان قلي بردي محمدوف د افغانستان، ايران ، تاجکستان ، آذربايجان ، ترکيې ، قرغزستان او د قزاقستان جمهورو رييسانو ته بلنه ورکړې ده چې دترکمنستان په پايتخت عشق آباد ښارکې د ١٣٩٢ هجري لمريز کال د وري د مياشتې د لومړۍ نيټې د نوروز د جشن  د نمانځنې په مراسمو کې ګډون وکړي.
ترکمنستان د ١٣٩٢ کال د ورې د مياشتې لومړۍ نيټه د لرغونې نوروز په توګه نمانځي.
په  ٢٠١٠ ميلادي کال کې دغو هيوادونو چې نوروز د دوى ترمنځ ګډ جشن دى؛ دملګروملتوله سازمان څخه غوښتي دي چې نوروز د نړيوالې ورځې په توګه وپيژندني او دملګروملتو سازمان هم د يو پريکړه ليک په ترڅ کې دغه ورځ د نوروز نړيواله ورځ ونوموله .
 

کابل_ باختر دکب  دولسمه :
دننګرهار ولايت دپوليسو مامورين د يوې شپږ کسيزې  ډلې ځانمرګو بريدکوونکو په نيولو بريالي شول چې ويل کيږي د جلال ابا-تورخم په لاره کې يې د يو لړ تروريستي بريدونو نيت درلود .
د را رسيدلوخبرونو له مخې: يو ديارلس کلن  پاکستاني ځانمرګې يرغلګر هم په نيول شويوکسانو کې شامل دى .
  دافغانستان په ختيځ کې د سرحدي پوليسو ويندوى ادريس مومند باختراژانس ته وويل چې د وسله والو طالبانو د يو قوماندان مقتدرالحسن په مشرۍ دغو يرغلګرو غوښتل دکابل-تورخم  په لويه لاره کې په ځينو دولتي تاسيساتو او دافغان پوځيانو او د ناټو دقوتونو په کاروان ځانمرګي او وسله وال بريدونه وکړي .
دغه ځانمرګي يرغلګر پرون مازيګر دسرحدي  پوليسو له خوا دغني خيلو ولسوالۍ دغني خيلو دګولايي په سيمه کې ونيول شول .
  ده تاييد کړه چې ددغو ځانمرګويرغلګرو ترمنځ دپاکستان دکوهات اوسيدونکى يو ديارلس کلن ماشوم هم شامل دى.
دغه ماشوم نن دخبريالانو په وړاندې وويل چې ده په پاکستاني مدرسوکې دځانمرګو بريدونو لارې چارې زده کړې دي او د طالبانو د سيمه ييز قوماندان مقتدر الحسن له خوا افغانستان ته راوستل شوى دى .
ده وويل چې دغه قوماندان او دپاکستان په خاوره کې يو شمېر کړيو دجلال اباد -تورخم په لويه لاره کې دځانمرګو بريدونو دترسره کولو نيت درلود .
له دغو ځانمرګو بريدکوونکو څخه دننګرهار ولايت په بېلابېلو سيموکې د وسله والو طالبانو د تروريستي بريدونو څو فلمونه ، يو لب ټاپ کمپيوټر او د دوو ځانمرګو واسکټونو په ګډون، څو جنګي وسايل ترلاسه شوي دي .
دافغانستان په ختيځ کې د سرحدي پوليسو ويندوى وايي چې دغه يرغلګر دپاکستان په خاوره کې دځينو ټولنوپه لارښوونه، دجلال اباد-تورخم په لويه لاره کې دځانمرګو او وسله والو بريدونو په ترسره کولو ګومارل شوى و .
 

کابل_ باختر دکب  دولسمه :
دترکيې جمهوريت د انرژي او دطبيعي منابعو وزير د افغانستان دکانونو له وزارت سره دخپل هيواد همکاري څرګنده کړه .
دباختراژانس دخبريال دخبر له مخې: په هغې کتنه کې چې نن دترکيې جمهوريت د انرژي او دطبيعي منابعو د وزير تانر يلدز او د افغانستان دکانونو د وزير وحيد الله شهراني ترمنځ په کابل کې وشوه؛ وحيدالله شهراني د بډايو کاني زيرمو ، برابروشويو اسانتياو، د کانونو په وزارت کې د رامنځته شويواصلاحاتو او په هيواد کې د بهرني پانګې اچونې دمصوونيت په باب خبرې وکړې .
  وروسته ترکي هيئت په افغانستان کې د پانګې اچونې د فرصتونو او دکانونو د را ايستلو په چارو کې د دواړو هيوادونو ترمنځ د اړيکو دپراختيا په باب خبرې وکړې.
دغه غونډه دکانونو وزارت په کوربه توب په کابل کې جوړه شوې وه چې په هغې  کې دکاري هيئت غړو، د رسنيو او د ترکيې د خصوصي سکټور دبرخې استازو ګډون کړي و .
  ديادونې وړ ده چې ترکيه په سيمه کې دکانونو د را ايستلو او د ظرفيت جوړولو په برخه کې کافي تجربه لري او افغانستان کولى شي د هغې له تجربو څخه دکانونو د را ايستلو په برخه کې استفاده وکړي او ددغه هيواد کاني زيرمو ته انکشاف ورکړي .
دترکيې جمهوريت د انرژي او دطبيعي منابعو وزير د يو هئيت په مشرۍ کابل ته سفر کړى دى او ټاکل شوې ده چې دافغانستان داسلامي جمهوريت له جمهور رييس حامدکرزي او دجمهور رييس له مرستيال محمد کريم خليلي سره هم وګوري. 
 

کابل_ باختر دکب  دولسمه :
  د اطلاعاتو او فرهنګ وزير ډاکتر سيد مخدوم رهين نن دهيواد دملي ژبو د هويت د ساتنې په باب  د وزيرانوشورا د وروستى پريکړې د تحقق په خاطر يوه غونډه جوړه  شوه .
  ددغې غونډې اساسي هدف چې د افغانستان د علومو اکاډمى،  دکابل پوهنتون، د پوهنې او د لوړو زده کړو د وزراتونو استازو پکې برخه لرله، دملي ژبو پياوړتيا اومعياري کول و .
دباخترآژانس دخبريال دخبر له مخې: ددغې غونډې په پيل کې ډاکتر سيد مخدوم رهين په لنډو خبروکې وويل: ((دهيواد د رسمي ژبو کارول له يو لړ خاصو ناخوالو او ګډوډيو سره مخامخ شوي دي. زموږ رسنۍ دې ته اړتيا لري چې دنظر خاوندان په دې برخه کې له هغوى  سره مرسته  وکړي. زموږ دوه رسمي ژبې منل شوي رسمي له جې لري چې اوياکاله مخکې تثبيتې شوې دي. بايد خپلو لهجو ته ځانګړې ارزښت ورکړو .))
ډاکتر رهين زياته کړه: ((هغه دوه کميسيونونه چې نن داطلاعاتو اوفرهنګ وزارت له خوا جوړ شوي دي؛ زموږ په رسمي ژبو او لهجو پورې د اړوندو چارو په څيړنې بوخت دي .))
داطلاعاتو او فرهنګ وزير زياته کړه چې هدف په هيڅ صورت کې رسنيو ته دمحدوديت پيداکول نه، بلکې له هغوى سره مرسته ده .
په دې غونډه کې دوه کميسيونونه، يو د دري ژبې د پياوړتيا لپاره او بل د پښتو ژبې د پياوړتيا لپاره جوړشول چې ددغو کميسيونونو په سرکې د دغه وزارت معينان پوهنمل نبي فراهي اومبارز راشدي وټاکل شول .
دغه کميسيونو نه به د هيواد په ملي ژبوکې د بهرنيو او واردو شويوکليمو دتشخيص او د دوو ژبو (پښتو او دري) د رسمي لهجو د پياوړتيا په خاطر کار وکړي او د دوى دکار حاصل به د رسنيو په واک کې ورکړى شي .