26 May 2020

RSS Facebook

سوداگریز


تازه خبرونه

د کرونا په اړه بې پروا چلند ستر ناورین رامنځ ته کولای شي

د کرونا په اړه بې پروا چلند ستر ناورین رامنځ ته کولای شي

کابل / د غبرګولي ۶ مه / باختر د کروناویروس خپرېدا...

د ملي امنيت شورا سلاکار پکتيا ته سفر وکړ

د ملي امنيت شورا سلاکار پکتيا ته سفر وکړ

- کابل / د غبرګولي ٦ مه / باختر د ملي...

Youtube Player

khantry design

سوداگریز

سوداگریز

کابل_  باختر دزمري شلمه :
دملي دفاع وزارت ويندوى جنرال عظيمي وايي چې د لوګر ولايت د اذرې او دننګرهار ولايت دحصارک په ولسواليوکې د سيمرغ د عملياتو دويم پړاو په برياليتوب سره  پاى ته ورسيد او ددغو عملياتو  دريم پړاو  دوام لري .
دباخترآژانس دخبر له مخې: دملي دفاع وزارت د ويندوى دڅرګندونوله مخې: په دريم پړاوکې زياته پاملرنه د سيمو پاکولو، دحکومتوالۍ ټينګښت او بيا جوړولو ته متمرکزه ده .
  دملي دفاع وزارت د ويندوى د څرګندونوله مخې: عمليات مهم و او ډار اچوونکو دپاکستاني، عربي او چيچيني جګړه مارانو په شتون باندې زيات حساب کاوه . خو د ملي اردو د ځواکونو  په هوايي او توپچي بريدونوکې وځپل شول .

کابل_  باختر دزمري شلمه :
دغزني ولايت دملي پوليسودميړانې عالي مډال د ستر پاسوال عبدالرحمن رحمن له خوا دغزني ولايت امنيې قوماندانۍ ته ورکړى شو .
  دکورنيوچارو وزارت مطبوعاتي دفترباخترآژانس ته خبر ورکړ:دمډال د ورکولو په مراسموکې چې دغزني ولايت دمشرتابه هيئت، د امنيې قوماندانۍ منسوبينو، د ولسواليو امنيه قوماندانانو او د خلکوګڼ شمېر استازو او مخوروبرخه لرله؛  دکورنيوچارو وزارت ستر امنيتي معين ستر پاسوال  عبدالرحمن رحمن  دشهيدانو پاک روح ته ددعا دکولوپه ترڅ کې دافغانستان داسلامي جمهوريت دجمهور رييس حامدکرزى ښې هيلې  او تاوده سلامونه دغزني ولايت  مشرتابه هيئت  او په دغه ولايت کې دميشتو امنيتي ځواکونو او دملي پوليسو افسرانو او سرتيرو ته  ورسول .
وروسته  دميړانې عالي مډال چې د کورنيو چارو وزارت په و ړانديز د هيواد دجمهوري رياست له خوا دغزني ولايت دملي پوليسو قطعاتو او جزوتامونو ته منظور شوى و؛ د ستر امنيتي معين له خوا د غزني ولايت د امنيې قوماندانۍ په مبارک علم کې وټمبل شو .
د مراسمو په پاى کې دغزني ولايت امنيه قوماندان مل پاسوال زړور زاهد د افغانستان داسلامي جمهوريت دجمهور رييس او دکورنيو چارو وزارت د مقام  دمشرتابه هيئت دشفقت اومهربانۍ له امله مننه وکړه .

کابل_  باختر دزمري شلمه :
په افغانستان کې د نړيوالو ځواکونو لوى قوماندان يوځل بيا دافغانستان او امريکا ترمنځ  دامنيتي همکارۍ په باب دخبرو دبشپړيدو مسئله وړاندې کړې ده  او هغه يې په افغانستان کې د ثبات لپاره  اغيزمنه بللې ده .
جنرال جوزيف دانفورد يوې لويديځې رسنۍ ته ويلي دي چې دافغانستان او امريکا ترمنځ د امنيتي همکاريو دسند لاسليک د افغانستان لپاره يوه باثباته راتلوونکي تضمينوي .
دغه امريکايي جنرال زياته کړې ده: سره له دې چې افغان امنيتي ځواکونو دوه مياشتې مخکې دپوځي عملياتو مسووليت په غاړه اخستې ده او د دې ځواکمنۍ لري چې په مستقل ډول دنده ترسره کړي؛ خو دغه ځواکونه لاتراوسه پورې هم  مرستې او سمبالولو ته  اړتيا لري .
  جنرال دانفورد په دې عقيده دى چې د امنيتي همکاريو د سندپه لاسليک سره کولى شو دافغانستان خلکو ، نړيوالو او طالبانو ته يو روښانه پيغام واستو چې نړيواله ټولنه په سرکې يې امريکا په افغانستان کې دثبات دساتنې او پراختيا لپاره  ژمنه ده .
يو شمېر سياسي کارپوهان دامنيتي همکاريو دسند دلاسليک  په وړاندې دجنرال جوزيف دانفورد په ګډون دامريکايي مقاماتو وروستۍ څرګندونې ددغه هيواد  د بيړې زيږنده بولي، ځکه امريکا لا تراوسه پورې هم دالقاعده په ګډون د ډار اچوونکو ډلو دفعاليت له امله انديښنه لري چې په پاکستان کې خوندي پټنځايونه لري او په دې ترتيب وايي چې  په افغانستان کې خپل شتون توجيه کړي. په داسې حال کې چې دافغانستان دولت دغبرګولي دمياشتې په وروستيو وختو کې ټيک  هغه وخت چې د امنيتي همکاريو د سند دلاسليک کولو په باب دخبرو څلورم پړاو پيل شوى و؛ دغه خبرې په قطرکې دطالبانو د ډلې د دفتر دفعاليت دغير شفاف والى په دليل وځنډولې او ټينګار يې وکړ: ترهغه وخته پورې چې افغانستان  ډادمن نه شي چې د امنيتي همکاريو سند د افغانانو ملي ګټې تمثيلوي او په راتلونکي کې ورڅخه ګټه اخلي؛ دغو خبرو ته ستون نه شي .

کابل_  باختر دزمري شلمه :
په فراه ولايت کې دناټو دجنګي الوتکو دهوايي بريدونو له امله  د وسله والو طالبانو د ډلې د دوو تنو ايراني جګړه مارانو په ګډون پنځلس تنه وسله وال طالبان ووژل شول .
  په دې بريدکې  چې تيره شپه  ترسره شو؛ دوه تنه  ځانمرګي يرغلګر هم وژل شوي دي .
ويل کيږي چې د وسله والو طالبانو د ډلې يو سيمه ئيز قوماندان  ملا ملوک هم په وژل شويو کسانو کې  شامل دى.
  دفراه ولايت امنيه قوماندان جنرال آقا نور کينتوز باخترآژانس ته وويل چې دغه وسله وال طالبان د پشت رود ولسوالۍ په برجک سيمه کې په يوه پټنځي کې ديو لړ تروريستي بريدونو په پلان جوړولو بوخت ووچې دناټو له خوا هوايي بريد پرې وشو او ووژل شول .
  دپوليسو دغه مقام تاييد کړه چې په وژل شويو کسانوکې د وسله والو طالبانو  د ډلې د دوو تنو ايراني  جګړه مارانو په ګډون دطالبانو يو سيمه ئيز قوماندان ملا ملوک او دوه تنه ځانمرګي يرغلګر هم شامل دي .
خوپه پشت رود ولسوالۍ کې  يو سيمه ئيز مسوول وايي چې  دناټو په دغوبمباريو کې د وسله والوطالبانو د ډلې د څلوروتنوايراني جګړه مارانو په ګډون شل تنه وسله وال طالبان وژل شوي دي .
ده وويل چې دغو طالبانو د فراه ولايت په ځينو نظامي او دولتي تاسيساتو د هر اړخيز تروريستي بريد د ترسره کولو نيت درلود . 

کابل_  باختر دزمري شلمه :
دافغانستان داسلامي جمهوريت جمهور رييس حامدکرزي په مشرۍ دملي امنيت د شورا غونډه نن له غرمې مخکې جوړه شوه .
  دجمهور رييس د ويندوى دفتر باخترآژانس ته خبر ورکړ: په دې غونډه کې چې په ارګ کې جوړه شوه؛ لومړى دملي دفاع وزير ستر جنرال بسم الله محمدي  او دکورنيو چارو وزارت سرپرست ستر پاسوال غلام مجتبى پتنګ، د لوګر ولايت د اذرې،  د ننګرهار ولايت د حصارک او دپکتيا ولايت د آريوب ځاځي په ولسواليو کې دچاڼيزو عملياتو دنتيجوپه اړوند خپل رپوټونه وړاندې کړل .
دوى دعملياتو په بهيرکې د افغانستان د امنيتي ځواکونو د همغږۍ او د خلکو دملاتړ يادونه وکړه او څرګنده يې کړه چې ددغو ولسواليوټولې ساحې د افغانستان د اردو او پوليسو د قطعاتو تر کنترول لاندې دي. دخلکو د ژوندانه حالت د پخوا په نسبت څو برابره ښه شوى دى او له امنيتي ځواکونو سره په دغو ولسواليوکې  دخلکو بشپړ او بې غرضه ملاتړ شته .
  دملي دفاع وزير او دکورنيوچارو وزارت سرپرست  زياته کړه چې دغو ولسواليو ته  له رسيدو سره سم د افغانستان امنيتي ځواکونه د سيمې د اوسيدونکوله تاوده هرکلى سره  مخامخ شول .
دملي امنيت شورا له خپلو امنيتي ځواکونو سره د سيمې د خلکوملاتړ او ښه هرکلى وستايه او دملي دفاع وزير، دکورنيو چارو او د سرحدونو او قبايلو  د چارو د وزارتونو سرپرستانو او د سيمه ئيزو ارګانونو دخپلواکې ادارې  لوى رييس ته يې  دنده وسپارله چې د اذرې،  حصارک او د آريوب ځاځي په ولسواليوکې د ډاډمن امنيت دتامينولو په مقصد له قومي مشرانو اومخورو سره  دنږدې اړيکې له لارې دهغوى سيمه ئيزو ستونزو وڅيړل شي او حل شي.
دغه راز  د سيمه ئيزو ارګانونو دخپلواکې ادارې لوى رييس ته  لارښوونه وشوه چې د لوګر ولايت  د اذرې ولسوالۍ  اوسيدونکو ته دبشري مرستو د رسولو په برخه کې  بيړنۍ اقدام وکړي .
  دوى وويل چې ددغو چاڼيزو عملياتو په بهيرکې د دښمن زياتره وژل شوي  کسان او ټپيان بهرني اتباع  په تيره بيا پنجابيان او چيچينيان  وو چې په ځينو مواردوکې له هغوى څخه  مصنوعي ږيرې هم ترلاسه شوې دي.
وروسته  د امنيتي مسووليتونو دليږدونې دبهير  د تنظيم دکميسيون رييس ډاکتر اشرف غني احمدزي، دملي دفاع وزيرسترجنرال بسم الله محمدي او دکورنيوچارو وزارت سرپرست ستر پاسوال  غلام مجتبى پتنګ دنيکمرغه کوچني اختر  په ورځو کې دملي اردو او دملي پوليسو د قطعاتو او جزوتامونو د ستاينې په باب خپل رپوټونه غونډې ته وړاندې کړل .
  دملي دفاع وزير دخپل رپوټ  په يوه برخه کې  داسې وويل: دافغانستان داسلامي جمهوريت دجمهور رييس له حکم او لارښوونې سره سم، دهيواد په ګوټ ګوټ کې دملي اردو دوه څلويښتو قطعاتواوجزوتامونو ته د امنيت دتامينولو او دهيواد د دفاع په لاره کې د دوى د سرښندنو ، ځان تيريدنو او هلوځلو په خاطر دافغانستان داسلامي جمهوريت مډالونه ورکړى شول چې دې کار د ملي اردو دمنسوبينو د روحيې او مورال په لوړولوکې مثبته اغيزه کړې ده .
دغه راز دکورنيو چارو وزارت سرپرست دملي پوليسو د قطعاتود ستاينې په باب غونډې ته رپوټ وړاندې کړ .
  دملي امنيت شورا  د افغانستان دامنيتي مرکزونومسوولينو ته دنده وسپارله چې په دايمي توګه دې د امنيتي ځواکونو ميړانه او  سرښندنې وستايل شي .
  دملي امنيت د شورا دغونډې په پاى کې دکابل _ قندهار په لويه لاره کې  دناامنيو موضوع  وڅيړل شوه .
دملي امنيت شورا دملي دفاع وزير، دکورنيوچارو وزارت سرپرست او دملي امنيت دلوى رياست سرپرست ته دنده وسپارله چې دلويو لارو دامنيت دتامينولو په لاره کې دې  لازم تدبيرونه ونيسي  او په دې  باب دې  په بشپړې همغږۍ کې په ګډه  کار وکړي .

کابل_  باختر دزمري شلمه :
دکابل ولايت دپغمان او شکردرې د ولسواليوپه مربوطاتوکې دوروستيو سيلاوونو  د راوتلو له امله د سر د زيان شمېر دوه ويشتو تنو ته رسيدلى دى.
  دباخترآژانس دخبر له مخې: له پيښو سره دمبارزې د ادارې رييس دايم کاکړ رسنيو ته ويلي دي چې دکابل ولايت په مربوطاتوکې پرون دسيلاونو دراوتلو له امله شل تنه دکابل ولايت دشکردرې ولسوالۍ په غازه کې او دوه تنه دپغمان ولسوالۍ په مربوطاتو کې له منځه تللي دي .
په کابل کې  وروستيو سيلاوونو  د سر ډير درانده زيانونه اړولي دي .
ددغوسيلاوونوله امله په سلګونو جريبه کرنيزه ځمکه هم  ويجاړه شوې ده .
څه موده مخکې دکابل ولايت د سروبي ولسوالۍ په مربوطاتوکې د اورښتونو او د سيلاوونو د راوتلو له امله د سردرانده زيانونه  او زيات مالي تاوانونه اوښتي و .

کابل_  باختر دزمري شلمه :
دافغانستان دبهرنيو چارو وزارت ويندوى جانان موسي زي نن په يوه خبري غونډه کې وويل چې پاکستان ته دافغانستان داسلامي جمهوريت دجمهور رييس حامدکرزي دسفر په اجندا باندې کار دوام لري .
دباخترآژانس خبريال خبر راکړ: دپاکستان صدراعظم نوازشريف په دغه مقام دټاکل کيدوپه لومړيو ورځوکې دافغانستان داسلامي جمهوريت جمهور رييس حامدکرزي ته بلنه ورکړه چې پاکستان ته سفر وکړي. خو د افغانستان لوري ددغه سفر د ترسره کولو په خاطر  له پاکستاني مقاماتو څخه وغوښتل چې جمهور رييس به هغه وخت پاکستان ته سفر وکړي چې دغه هيواد د افغانستان له لوري سره عملي ژمنې وکړي او د سولې دتامينولو او د سولې دخبرو دبهير دپرمختګ په لاره کې عملي اقدامات  وکړي.
جان موسي زي په دې باب وويل چې لا تراوسه پورې پاکستان ته دافغانستان دجمهور رييس دسفر دهراړخيزې اجندا په برابرولوباندې کار دوام لري .
دافغانستان د اسلامي جمهوريت جمهور رييس حامدکرزي د نيکمرغه کوچني اختر په لومړۍ ورځ د نوازشريف سره دټيلفوني خبرو په ترڅ کې ددغه هيواد په صادقانه  همکارۍ او د ډار اچونې پرخلاف د  مبارزې په لاره کې د نږدې  همکارۍ اوهمغږۍ په اړتيا باندې ټينګار وکړ .

کابل_  باختر دزمري شلمه :
دبهرنيو چارووزارت ويندوى جانان موسي زي نن په يو خبري کنفرانس کې وويل چې له امريکا سره د امنيتي همکاريو د تړون د لاسليک کولو په باره کې په غير رسمي خبرو کې ښه پرمختګونه شوي دي .
  دباخترآژانس دخبريال دخبر له مخې: د بهرنيو چارو وزارت ويندوى وويل چې د امنيتي همکاريو د موافقه ليک د لاسليک کولو په خاطر مخکې له دې چې د افغانستان له لوري وځنډولى شي؛ درې ځلې رسمي خبرې ترسره شوې دي. خو په دې باب غير رسمي خبرو هماغه  شان دوام درلود .
د ده دڅرګندونوله مخې: په دې اړوند ښه پرمختګونه شوي دي .
ده څرګنده کړه چې په دې پرمختګ کې دموافقه ليک په باب دمسودې دګډمتن برابرول شامل دى.
ده يوځل بيا ټينګار وکړ: هغه څه چې د افغانستان لپاره د زيات ارزښت  وړ دي؛ دموافقه ليک محتوا او د افغانستان د امنيت ، سولې، ثبات او د دولتي مرکزونو د پرمختيا او په هيواد کې دامنيتي ځواکونو او د دموکراسى د پياوړتيا په وړاندې ضمانتونه دي .
ده وويل: د افغانستان دولت له امريکا سره د امنيتي موافقه ليک د لاسليک علاقمند دى. خو دغه موافقه ليک بايد يو داسې سند وي چې د دواړو هيوادونوګټې تامين کړي .

کابل_  باختر دزمري شلمه :
دافغانستان دخلکو دجهاد او دملي مقاومت ديو پخوانى قوماندان ارواښاد جنرال عبدالرزاق د مړينې په مناسبت د جمهوري رياست د لومړى مرستيال مارشال محمدقسيم فهيم  د ډاډګيرنې او خواخوږۍ پيغام!
دافغانستان دخلکو دجهاد او دملي مقاومت ديو پخوانى قوماندان ارواښاد جنرال عبدالرزاق  مړينه زما د ژور خپګان  او خواشينۍ سبب شوه .
انالله وانااليه راجعون
په دې مناسبت د خپلې ډاډګيرنې او خواخوږۍ  مراتب د متوفى کورنۍ، دوستانو او دکابل ولايت د قره باغ مجاهدو خلکو ته وړاندې کوم. دلوى خداى ( ج ) له دربار څخه دغه ارواښاد ته د مغفرت او د فردوس جنت هيله کوم .
ارواښاد جنرال عبدالرزاق دافغانستان دخلکو دجهاداو دملي مقاومت يو مشهور اوپياوړى قوماندان و چې په دواړو پړاونوکې يې په سر ښندنې او ځان تيريدنې سره مبارزه وکړه .
ده په اونسۍ دوره کې هم د افغانستان په ملي پوليسوکې په بېلابېلو پستونوکې دنده لرله اوپه خپل ګران هيوادکې د سولې اوثبات د ټينګښت لپاره يې هلې ځلې  وکړې .

کابل_  باختر دزمري شلمه :
افغان امنيتي مامورينو دبغلان ولايت دمرکز پلخمري  ښار په يوه ډيره ګڼ ميشته سيمه کې د يوې چاودنې مخه ونيوله .
د را رسيدلو خبرونوله مخې: وسله والوطالبانود سيمه ئيزو پوليسو يوې قرارګاه ته  څيرمه د مزارشريف دموټرو تم ځاى ته نږدې يو ماين ښخ کړى و چې دغه ماين له چاودنې وروسته نن غرمه د امنيتي مامورينو له خوا کشف او وچول شو .
  دبغلان ولايت د امنيې قوماندانۍ ويندوى احمد جاويدبشارت دباخترآژانس خبريال ته وويل چې وسله والو طالبانو په دغه بمي بريد سره غوښتل چې دافغان پوځيان  او دملکي وګړو په وړاندې يوه خونړۍ تروريستي پيښه رامنځته کړي؛ خوپه دې کار بريالي نه شول.
له بلې خوا په بغلان ولايت کې يو سيمه ييز مسوول وايي چې ددغه بمي بريد هدف دسيمه ئيزو پوليسو يو قوماندان ملا علم و .
هغه ځاى چې وسله والو طالبانو ماين پکې ښخ کړى و؛ په پلخمري ښارکې ډيره ګڼ ميشته ساحه بلل کيږي.
په دې ځاى کې په يوې پوځي قرارګاه سربيره د مزارشريف د موټرو تم ځاى شته او هره ګړۍ سپرلۍ پکې شته .
په بغلان ولايت کې سيمه ييز مقامات وايي چې د چاودنې په صورت کې زيات شميرملکي وګړوته مرګ ژوبله واوښته .
ويل کيږي چې دغه ماين نن غرمه ښخ کړى شوى و، خو سيمه ئيز مقامات وايي چې افغان ځواکونو هغه له سيمو څخه دخلکو له ايستلو وروسته نن له غرمې وروسته د دوه نيمو بجو په شاوخوا کې چولى دى .
وسله وال طالبان زياتره په افغانستان کې په ګڼ ميشتوسيموکې دبمونو او ماينونو په ښخولو لاس پورې کوي. هغه اقدام چې زياتره ملکي وګړي پکې زيانمن کيږي .