11 December 2019

RSS Facebook

سوداگریز


تازه خبرونه

فضل هادي مسلم یارپه کابل کې  دچګ جمهوريت  له سفير سره وکتل

فضل هادي مسلم یارپه کابل کې دچګ جمهوريت له سفير سره وکتل

کابل /دليندې ١٩مه /باختر : د مشرانوجرګې رئیس فضل هادي مسلم...

د( ګنج  قناعت)  دښکلې ليکنې داثارو نندارتون پرانستل شو .

د( ګنج قناعت) دښکلې ليکنې داثارو نندارتون پرانستل شو .

کابل /دليندې ١٩مه /باختر : داطلاعاتواوفرهنګ وزارت دفرهنګ او هنر معين...

Youtube Player

khantry design

سوداگریز

سوداگریز

کابل\  باختردکب دمياشتې  ٩ :
دولس تنه سيمه ييز پوليسان تېره شپه د وسله والو مخالفينو له خوا د غزني ولايت  په اندړو ولسوالۍ کې شهيدان شول.
دغه پيښه د اندړو ولسوالۍ په ګوداى کې  په يوه امنيتي پوسته کې رامنځته شوه .
دغزني د ولايتي شورامرستيال عبدالجامع جامع دباخترآژانس خبريال ته وويل:
د دولت وسله والو مخالفينو دولس تنه سيمه ييز پوليس د هغوى له څلورو تنو ميلمنوسره لومړۍ مسموم او وروسته يې دکلاشينکوف په ډزوسره شهيدان کړل.
د ولايتي شورا مرستيال څرگنده کړه چې وسله والو طالبانو د هغوى وسلې اومهمات هم له ځان سره وړي دي.
جامع زياته کړه: د دغې پيښې په اړونددوه تنه نيول شوي او په سيمه کې د وسله
والو  مخالفينو د موندلو په خاطر د پلټنې عمليات پيل شوي دي.
 

کابل\  باختردکب دمياشتې  ٩ :
دکابل دپوليسوخبرځايونه وايي چې د کابل د پل سوخته په ساحه کې د ځانمرګې بريد له امله اووه تنه ټپيان شول.
دکابل دپوليسو د ساحوي زون مطبوعاتي دفتر باخترآژانس ته  خبرورکړ:
نن سهار په  اوو بجو او لسو دقيقوکې يو ځانمرګې بريدکوونکى دپوليسو د دريمې امنيتي حوزې د پل سوخته د ساحې د دواخانې په ګولايي کې دملي دفاع وزارت دکارکوونکو د سپرلۍ په واسطې بريد وکړ او په ځان پورې تړلي چاوديدونکي توکي يې دغې واسطې ته څېرمه وچول چې له امله يې دملي دفاع وزارت شپږتنه کارکوونکي اويو ملکي وګړى يوڅه ټپيان شوي دي.
ټپيان ډير ژر دپوليسو له خوا روغتون ته وليږدول شول اوپه سيمه کې حالات عادي دي.
ويل  کيږي چې بريدونکى چاوديدونکي توکي يې په خپل بدن پورې تړلي وو او ترموټر لاندې په ننوتلو سره يې ځان وچاوه.
نننى پيښه په څه دپاسه يوه مياشت کې په کابل کې لومړني ځانمرګې بريد دى.
د سلواغې د مياشتې په ٩ نيټه يوه ډله يرغلګرله يوځانمرګي بريد وروسته، دکابل دترافيکو د ادارې ودانۍ ته ننوتل چې له امنيتي ځواکونوسره په نښته کې ووژل شول.
 

دوشنبه \ دويچه ويله \  باختردکب دمياشتې  ٩ :
تاجکستان په رسمي ډول وړانديز کړى دى چې په افغانستان کې د ناټوځواکونه دې دتاجکستان له لارې ووځي.
دباخترآژانس دخبرله مخې: دتاجکستان دبهرنيو چارو وزارت ويندوى دولت نذري يوف ويلى دى چې بريټانيا ته پخوا دغه شان وړانديز شوى دى.
په مقابل کې امريکا اعلام  کړى دى چې خپل ځواکونه د ازبکستان له لارې وباسي.
څرنګه چې د ايران له لارې د وتلو لاره نشي طرحه کيداى، دمرکزي آسيا هيوادونه غواړي چې له دې لارې زيات عوايد ترلاسه کړي.
په دغو هيوادونوکې له افغانستان څخه د بهرنيو ځواکونو تجهيزات به د اوسپنې د پټلي له لارې وليږدول شي، ځکه ډېره ارزانه ده .
 

برلين \ نړيوالې خبري منابع \  باختردکب  دمياشتې  ٩ :
د امريکا دبهرنيو چارو وزير جان کري د لومړي ځل لپاره له خپل روسي سيال سره  د آلمان په پايتخت  برلين  ښارکې کتلى دى.
د امريکا دبهرنيو چارو وزارت ويلى دي چې جان کري او سرګې لاوروف پرون د دوو ساعتو لپاره د تړلو دروازو ترشا وکتل او د سوريې دحالاتو په باب يې خبرې وکړې.
لاوروف چې له دغې کتني وروسته له خبريالانو سره يې خبرې کولې؛ د سوريې رژيم له مخالفينو څخه وغوښتل چې د بشارالاسد له حکومت سره خبرې وکړي.
دغه خبرې د سوريې په باب د ايټاليا د پايتخت روم کنفرانس له جوړولو دوه ورځې مخکې شوې دي.
اټکل کيږي چې د نړۍ دڅو هيوادونو استازي په روم کې غونډه وکړي او د سوريې  دکورني جګړې د پاى ته رسولو په باب خبرې وکړي.
 

کابل\  باختردکب دمياشتې  ٩ :
په باميانو کې نجونې د سکي د سيالۍ لپاره  تيارى نيسي .
ټاکل شوې ده د باميانو ١٥ تنه سکي بازې نجونې چې د سکي د ورزش په باب يې  زده کړې کړې دي؛ د روان کال دکب د مياشتې په ١٢ نيټه په دغه ولايت کې د سکي سيالۍ ترسره کړي.
په باميانوکې د آغاخان د دفتر د جنډر د برخې سلاکارې آمنې حسن پور د باخترآژانس خبريال ته وويل: دغه سيالۍ د مارچ داتمې نيټې دنړۍ دښځو دپيوستون دنړيوالې ورځې د هرکلي له امله د آغاخان  د دفتر په مرسته او د باميانو ولايت دښځو  دچارو د رياست په همغږى، ددغه ولايت دمرکز په نوى ښارګوټې کې ترسره کيږي .
تېرکال هم دغو سکي بازو نجونو په دغه ولايت کې د سکي د سياليو د لاښه ترسره کولو لپاره يې لازمې تيارى نيولي دي .
حسن پور د هيواد له نورو نجونو او ښځو څخه وغوښتل چې په دغو سياليوکې ګډون وکړي.
 

کابل\  باختردکب دمياشتې  ٩ :
د ميدان وردګو د قومونو او د ولايتي شورا پريکړه ليک
د ميدان وردګو ولايت اوسيدونکو د يو پريکړه ليک په صادرولو سره، دملي دفاع اودکورنيو چارو له وزارتونو او د ملي امنيت له لوى رياست څخه غوښتي دي چې د ميدان وردګو ولايت دمرکز او اړوندو ولسواليو بشپړامنيت ته جدي پاملرنه وکړي.
په دې پريکړه ليک کې دغه راز ويل شوى دى:
_موږ د ميدان ښار او د نرخ ، جلريز او چک د ولسواليو اوسيدونکي د ځانګړو امريکايي ځواکونو ( سپيشل فورس ) له خواظلم، انسان وژنه، وهل او ډبول ، ځورونې او په خپل سر دکورونولټول په کلکه غندو.
_  موږ د هغو نهو تنو په باب چې د سپيشل فورس د  ځواکونو له خوا د نرخ مرکز ته بيول شوي دي او برخليک يې تراوسه پورې معلوم نه دى؛ د معلوماتو غوښتنه کوو او د سيمې خلکو ته د هغوى او يا د هغوى د مړو د سپارلو غوښتنه کوو.
_ موږ دهغوکسانو  چې زموږ بيګناه خلک يې شهيدان کړي؛ د خلکو موټر او نور وسايط يې له منځه وړي دي؛ زموږ خلک يې وهلي او ډبولي او ټپيان کړي دي؛  د زيان دجبيره کولو او دعدلي او قضايي مرکزونو له خوا دهغوى دمحاکمې غوښتنه کوو.
_موږ د هيواد د جمهوري رياست او د ملي امنيت د شورا د پريکړې ملاتړکوو او  ددغې پريکړې دعملي کولو غوښتنه کوو.
_موږ د ملي دفاع ا و دکورنيو چارو له وزارتونو او دملي امنيت له لوى رياست  څخه په جدي توګه غوښتنه کوو چې د ميدان وردګو ولايت دمرکز او اړوندو ولسواليو د امنيت  تامينولو ته جدي پاملرنه وکړي.
_  که چيرې زموږ روا غوښتنو ته د جمهوري رياست او د ميدان وردګو د والي له خوا مثبت ځواب ونه ويل شي؛ موږ خپلو سوله ييزو غونډو اواحتجاجونو ته دوام ورکوو.
 

کابل\  باخترد کب  دمياشتې  ٩ :
د سالنګونو د ساتنې اوڅارنې آمر جنرال رجب تېره شپه د واورې ښوئيدنې له امله ټپي شو.
د فوايدعامې  وزارت خبرځايونو دغه خبرتائيدکړ.
دباختراژانس  دخبرله مخې:  جنرال رجب په داسې حال کې چې د سالنګ په لويه لاره کې د چارو د تنظيم لپاره يې هلې ځلې کولې، په خپله تر واورې لاندې شو او څه ناڅه ٤٠ دقيقې تر واورې لاندې پاتې شو او په دې پيښه کې د جنرال رجب دوه تنه ساتوونکي او د سالنګونو د ساتنې او څارنې يوه ليږدونکې واسطه هم بې درکه شوې ده.
دسالنګ لويه لاره او د ترافيکو پرمخ تړلې ده او مسوولين وايي: دوى د سالنګ په لويه لاره کې د واورې ښوئيدنې د څه ناڅه  څلويښتو پيښو اټکل کوي.
ټاکل شوې ده چې د فوايد عامې وزارت مقامات ترڅو ساعتو پورې په سالنګونو کې د تيرې شپې د پيښې د څرنګوالې په باب مطبوعاتو ته  څرګندونې وکړي.
 

کابل -باختر  دکب دمياشتې ٩:
د هوا پوهنې ادارې په راتلوونکوڅلور ويشتو ساعتوکې د هيواد د ځينوسيمو د هوا حالات د سانتي ګراد په حساب  په دې ډول اټکل کړې دي:
کابل د تودوخې لوړه درجه ١٠، ټيټه ٢- آسمان لمر
هرات لوړه ١٠،  ټيټه ١ آسمان لمر
جلال آباد لوړه ٢٠،  ټيټه ٥ آسمان لمر
قندهار لوړه ٢٠ ټيټه ٦ آسمان لمر
مزارشريف لوړه  ١٧، ټيټه ٢ آسمان لمر
کندز لوړه ١٨، ټيټه ٣  آسمان لمر
غزني لوړه ٥ ، ټيټه ٧-  آسمان لمر
باميان  لوړه ٤ ، ټيټه ٨- آسمان لمر
فيض ابادلوړه ٦، ټيټه  صفر  آسمان وريځ د وارې اورښت
  شمالي سالنګ لوړه ٢- ټيټه منفي ١٥- آسمان لمر
جنوبي سالنګ لوړه ٤- ، ټيټه ٩ – آسمان لمر
  شبرغان لوړه ١٨ ، ټيټه ٥- آسمان لمر
فراه لوړه ١٩ ټيټه ٣  آسمان لمر
خوست لوړه ١٦، ټيټه ١  آسمان لمر
ميمنه لوړه  ١٨ ، ټيټه ١ آسمان لمر
لښکرګاه لوړه ٢١ ، ټيټه ٥ آسمان وريځ
په کابل کې سبا لمر ٢٥/ ٦خيژي او د مازيګر په ٤٧/ ٥ولويږي .
 

انقره \ د ايران دولتي خبري آژانس \  باختردکب  دمياشتې  ٩ :
داسلامي هيوادونو د همکاريو د سازمان عمومي منشي اکمل الدين احسان اوغلو ددغه سازمان له خوا د مياشتني ټلويزيوني شبکې د جوړولو خبر ورکړ چې دده په خبره هدف يې نړيوالو ته د اسلام د سپيڅلۍ دين پيژندل دى.
د ترکيې د خبري  منابعو په ليکنه :  دغه ټلويزيوني شبکه به نړيوالو ته د اسلام د سپيڅلۍ دين د پيژندلو او د نړيوالې ټولنې سولې د تحقق په چوکاټ کې د فعاليتونو په لاره کې پروګرامونه  خپاره کړي.
احسان اوغلو ددې په يادونې سره چې د دغې مياشتني ټلويزيوني شبکې د جوړولو په لاره کې ځنډشوى دى؛  زياته کړه: موږ غواړو چې د دغې ټلويزيوني شبکې له لارې د اسلامي ارزښتونو بډاى او ژور پروګرامونه او هم د اسلام د ستر پيغمبر د پيغامونو لرونکي پروګرامونه توليد او نړيوالو ته يې خپاره کړو او اوس په دې برخه کې د پروګرام جوړولو په حال کې يو.
ده زياته کړه: د دغې ټلويزيوني شبکې د جوړولو په لاره کې د اسلامي همکاريو د سازمان يو هدف د هغو افراطي چلندونو اوخبرو مخنيوي دى چې د اسلامي نړۍ د څيرې د ويجاړتيا سبب شي .
 

کابل\  باختردکب  دمياشتې  ٩ :
د غور ولايت په مرکز چغچران ښارکې د طالبانو يوه سيمه ييز قوماندان خپله ځوانه
ميرمن ووژله. ځوانه ميرمن فاطمه چې نږدې ٢٠ کلنه وه؛ پرون ددغه قوماندان له خوا دکورني تاوتريخوالي له امله ووژل شوه.
د غور د والي ويندوى عبدالحى خطيبي رسنيو ته وويل چې دغه پيښه پرون دچغچران ښار په نيک سيدان کلي کې رامنځته شوه.
خطيبي  زياته کړه چې تراوسه پورې د دغې ځوانې ميرمنې د وژل کيدو د څرنګوالى په باب زيات جزئيات نه دي ترلاسه شوي، خو پوليسو په دې اړوند څيړنې پيل کړې دي .
د سيمې يوه اوسيدونکى چې د دغې ميرمنې له خپلوانو څخه دى؛ وويل چې دغه ميرمن دکورني تاوتريخوالي له امله وژل شوې ده.