12 July 2020

RSS Facebook

سوداگریز


تازه خبرونه

Youtube Player

khantry design

سوداگریز

سوداگریز

کابل باختر دوږي  نولسمه :
د سترې محکمې عالي شورا نن له غرمې مخکې د سترې محکمې د کفيل قضاوتپوه بهاءالدين بها په مشرۍ غونډه وکړه او په اجنداکې نيول شوې موضوعګانې يې وڅيړلې.
د سترې محکمې دخپرونو رياست باخترآژانس ته خبر ورکړ: عالي شورا لومړى  دهرات ولايت د غوريانو ولسوالۍ د ابتداييه محکمې د رييس  قاضي سيد احمد  خالصي شهادت چې د افغانستان د خلکو د سولي او ثبات د دښمنانو له خوا دندې ته د ورتګ په وخت کې ترسره شو، په کلکه وغانده او د دعا دکولو په ترڅ کې يې د رب العزت له دربارڅخه ارواښاد ته دفردوس جنت او کورنۍ او پاتې  کسانو ته يې  دجميل صبر هيله وکړه.
وروسته په جزايي، حقوقي او تجارتي مواردوکې  د وروستيو پريکړو پرخلاف د بيا کتنې دغوښتنو دمنلو په بهيرکې د زيات قانونيت د رعايتولو په مقصد،  دارالانشا ته لارښوونه وشوه چې ددغو غوښتنو دمقدماتي پړاونو په بشپړولوکې دې  دقضايه قوې د تشکيل او صلاحيت دقانون د شپږ ديرشمې مادې په پام کې نيولو سره چې د بياکتنې دغوښتنو قانوني موده يې  ټاکلې ده او هم دلنډ مهالو جزايي اجرااتو دقانون د٨١-٨٢او ٨٣ مادو له مخې چې په دغو غوښتنو پورې د اړوندو حالاتو، حق او اجرااتو څرګندوى دي، لازم اجراات وکړي چې د دعوا دخاوندانواوداړوندوقضايي ادارو دلالهاندي مخه ونيول شي .
وروسته د يو شمېر رسيدلو استهداګانوپه باب غور او څيړنه وشوه او د هغوى  په اړوند داسې لارښوونې  وشوې:
د دوو تجارتي پريکړوپه تنفيذکې د اشکالو په برخه کې د عدليې وزارت د حقوقو د رياست استهدا ته  په پاملرنې سره چې په يوه موضوع کې يې قطعيت پيداکړي دي، لارښوونه وشوه چې دغه ستونزه کيداى شي د١٣٥٠ کال په سيمينارکې په تصويب شوې تنفيذکې د اشکالو د قواعدو په رعايتولو سره هغې محکمې ته  چې مدعا بها د هغې په قضايي حوزه کې ده؛ وړاندې شي چې د اشکالوپه له منځه وړلو او د هغو نوروملاحظاتوپه حل کولکې چې شته له لازمې مطالعې او تحقيقاتو وروسته  لازم تصميم ونيول شي .
دغه راز محکموته د ماشومانو په جرمونو پورې د اړوندو دوسيو د احاله کولو د څرنګوالى په باب د لوى څارنوالۍ دکورني او بهرني امنيت پرخلاف له جرمونوسره د مبارزې د لوى څارنوالۍ د استهدايې په پام کې نيولو سره، څرګنده شوه په هغو ولايتونوکې چې د ماشومانو اختصاصي څارنوالۍ او محکمې شته، په حقيقت کې کومه ستونزه طرحه نه ده. خو په هغو ولايتونوکې چې دغه اختصاصي ارګانونه نه لري؛ د ماشومانودقضيودابتدايې او استنيافي څيړنې صلاحيت د سترې محکمې دعالي شورا له خوا ابتدائيه محکمو او د استيناف د جزا ديوانونو ته ورکړى شوى دى.
له دې امله  د ماشومانو جزايي دوسيي کيداى شي د جزا د څارنواليو اويا د هرې بلې څارنوالۍ له لارې چې د لوى څارنوالۍ له خوا د قانوني صلاحيتونوپه چوکاټ کې ، ورته صلاحيت ورکړى شوى وي؛ صلاحيت لرونکو محکمو ته وړاندې شي .
په همدې ترتيب له تفصيلي پلان سره سم، د استوګنې دساحې ديوې ځمکې د قبالې د حدودودنه سمون په اړوند د کابل ښاروالۍ د لسمې ناحيې  د استهدايې په باب لارښوونه وشوه چې د وثيقو دصحت او سموالۍ د څيړنې صلاحيت د وثيقو  د ليکنې له تعليمات نامې سره سم د واکمنې محکمې له دندو څخه دى؛ له دې امله موضوع دې محکمې ته رجعت ورکړى شي چې په دې باب له لازمو تحقيقاتو وروسته لازم تصميم ونيول شي .
دغه راز د مشروط خلاصون د حکم د صادرولو د څرنګوالى په برخه کې د هرات  د استيناف محکمې د رياست د استهدايې په اړوندو، څرګنده شوه چې د لنډ مهالو جزايي اجرااتو دقانون د٩٠ مادې پربنسټ د اټکل شويو قانوني شرايطو په رعايتولو سره د مشروط خلاصون تجويز د محکمې د تجويزي قرار په ترڅ کې  نيول کيږي او هغه محکمه چې د څارنوالۍ د غوښتنې له مخې دغه حکم صادروي؛ د هغه د لغوه کولو تصميم هم کولى شي ونيسي .
  دغه راز د صلاحيت د تنازع له موضوع په برخه کې د دغې محکمې د بلې استهدايې په وړاندې څرګنده شوه چې د قضايه قوې د محکمو د تشکيل او صلاحيت د نوى قانون له مخې چې د ١٣٩٢کال د چنګاښ د مياشتې په نهمه نيټه په رسمي جريده کې خپور شوى دى، د جزايي اجرااتو دقانون  د٢٧ مادې  دلومړي فقرې  حکم  لغوه بلل کيږي  او دمحکمو ترمنځ  د صلاحيت د تنازع څيړنه د سترې محکمې په عالي شورا پورې اړونده بلل شوې ده.
سربيره پردې، دعالي شورا په نننۍ غونډه کې دبيا کتنې دوه غوښتنې او په جزايي او مدني مسئلوکې د محکمې د بدلون  اته ويشت غوښتن ليکونه د قاضيانوله ځينو ذاتي مسئلو سره جوخت هم ترغورلاندې ونيول شول او د هغو په باب لازم تصميمونه ونيول شول.

کابل باختر دوږي  نولسمه :
په غزني کې نن سهار د ماين دچاودنې له امله اووه تنه ملکي وګړي شهيدان او اوولس تنه نور ټپيان شول .
دمقر ولسوال صاحب خان باخترآژانس ته وويل: دغه پيښه د غزني ولايت د مقر ولسوالۍ په لړم ساحه کې هغه وخت رامنځته شوه چې دملکي وګړو د سپرلۍ موټر په واټ کې په ښخ کړى شوى ماين وخوت چې له امله يې اووه تنه ملکي وګړي شهيدان او اوولس تنه نور ټپيان شول .
د صاحب خان دڅرکندونو له مخې: د دغې پيښې په ټپيانوکې ښځې او ماشومان هم شامل دي.
صاحب خان وويل: د پيښې ټپيان د مقر ولسوالۍ کلينک ته ليږدول شوي دي او دکلنيک د روغتيايي چارواکو د څرګندونو له مخې، پنځه تنه ټپيان د دوى د ټپونو د ژورتيا له امله دګيلان ولسوالۍ د پي آر ټي روغتون ته ليږدول شوي دي.

کابل باختر دوږي  نولسمه :
دبدخشان ولايت په وردوج ولسوالۍکې د طالبانو مهمه پوځي اډه د امنيتي ځواکونو لاس ته وراغله.
په بدخشان کې دملي اردو د خاصو ځواکونو دکنډک ويندوى جګړن جاويد سليم باخترآژانس ته وويل: د طالبانو ستره اډه دبسترکلى تيره شپه دملي اردو دځواکونو په عملياتوکې دطالبانو له منګولو څخه وايستل شوه.
دسليم دڅرګندونوله مخې: همدا اوس په وردوج ولسوالۍکې په سلوکې پنځه اتيا سيمې دطالبانوله منګولو څخه ايستل شوې او په بشپړه توګه تصفيه شوې دي او همدا اوس طالبان د باشند او صوفيانو په کليوکې پاتې دي چې په ډير لنډ ممکن وخت کې به دغه کلي هم تصفيه شي.
دجګړن سليم دڅرګندونو له مخې: وسله والوطالبانو د تيښتې لاره غوره کړې ده او له دغو سيمو څخه د وتلو په حال کې دي .
د بستر دکلي بشپړ نيول په وسله والو طالبانوکلک ګوزار دى او ټاکل شوې ده په نږدې راتلونکې کې د وردوج ولسوالۍ په بشپړه توګه دطالبانو له شتون څخه پاکه شي.

کابل باختر دوږي  نولسمه :
دملي دفاع وزارت يوه خبرځاى وويل: دملي اردو د منسوبينو په هغو چاڼيزو عملياتوکې چې د مستحکمو سرحداتو په نامه په قندهارکې ترسره شول؛ ديارلس تنه وسله وال طالبان ووژل شول .
دغه عمليات چې د وسله والومخالفينو له شتون څخه د سيمو د پاکولو په مقصد پرون دقندهار ولايت د ميوند ولسوالۍ په مربوطاتوکې ترسره شول؛ لاتراوسه پورې دوام لري .
دملي دفاع وزارت د ويندوى مطبوعاتي دفتر باخترآژانس ته خبرورکړ: په دغو عملياتوکې ديارلس تنه وسله وال طالبانو ووژل شول او د وسايطو ضد شپاړلس ماينونه او يوه اندازه سپک او درانده جنګي وسايل هم ترلاسه شوي دي .
ديوبل خبرله مخې: پنځه  تنه وسله وال طالبان چې دپکتيا ولايت دځدران ولسوالۍ په مربوطاتوکې په ورانکارواو تروريستي فعاليتونو بوخت وو؛ د نجات _٣ په نامه د ملي اردو دمنسوبينو د چاڼيزو عملياتو په بهيرکې ونيول شول.
په دغو عملياتوکې د دښمن د درندو او سپکو وسلو يوه اندازه مهمات او يو دادسن موټر هم ترلاسه شوي دي.

کابل باختر دوږي  نولسمه :
دوه تنه ځانمرګي يرغلګر هدف ته له رسيدومخکې د قندهار ولايت په پنجوايي ولسوالۍ کې دپوليسو له خوا وځپل شول.
دقندهار د والي ويندوى جاويدفيصل باخترآژانس ته وويل: دغه دوه تنه ځانمرګي يرغلګر دپوليسو له  يونيفورم څخه په دې بريالي شوي و چې د پنجوايي ولسوالۍ  د مقر انګړ ته ننوځي چې په ولسوالۍ کې په کارکوونکو بريد وکړي؛ خو دپوليسو له خوا وپيژندل شول او له پيښووغورځول شول.
خبرځاى زياته کړه چې پوليسو د ولسوالۍ له مقر څخه بهر په يو کرولا موټرکې بار چاوديدونکي توکي هم شنډکړي دي.

کابل باختر دوږي  نولسمه :

 په لغمان ولايت کې د ذوالفقار-١٠ په نامه عمليات پاى ته ورسيدل.

په دغو عملياتوکې لس تنه وسله وال طالبان ووژل شول او يو شمېر نور يې ټپيان شول .

 دلغمان د واالي ويندوى سرحدي ځواک باخترآژانس ته وويل: دغه عمليات د افغان ګډو ځواکونو له پرون سهارپيل او نن سهار پاى ته ورسيدل چې له امله يې لس تنه وسله وال طالبان ووژل شول او يو شمېرنور يې ټپيان شول چې دقيق شمېر يې تراوسه پورې معلوم نه دى .

 دځواک دڅرګندونو له مخې: دغه عمليات دلغمان ولايت په قرغيو ولسوالۍ پورې اړوند دکابل _ جلال آباد لوى لارې ته څيرمه د تورغر، لمي درې، چينو تاڼي  د شهيدانوکلي او دسنګ کلمه په ساحوکې ترسره شول چې له امله يې دغه ساحې په بشپړه توګه دطالبانو له شتون څخه پاکې شوې. 

 دځواک دڅرګندونو له مخې: ددغو عملياتو په بهيرکې د دښمن يوه اندازه جنګي وسايل هم د امنيتي ځواکونو لاس ته ورغلي دي. 

کابل باختر دوږي  نولسمه :
افغان امنيتي ځواکونو په تيرو څليرويشتو ساعتوکې د هيواد په ځينو ولايتونوکې يو لړ چاڼيز عمليات ترسره کړل چې په بهيرکې يې پنځه ويشت تنه وسله وال مخالفين ووژل شول.
دکورنيو چارو وزارت مطبوعاتي دفتر باخترآژانس ته خبر ورکړ: دغه عمليات د افغان امنيتي ځواکونو او د نړيوالو قوتونو له خوا د بدخشان، کاپيسا او د قندهار د ولايتونوپه مربوطاتو ترسره شول چې له امله يې پنځه ويشت تنه وسله وال طالبان ووژل شول، اته تنه يې ټپيان او اته تنه نوريې ونيول شول .
ديوبل خبر له مخې: ملي پوليسو پرون دننګرهار او فارياب د ولايتونو په مربوطاتو کې د امنيتي ګزمې په بهيرکې د وسله وال طالبانو له خوا درې ښخ کړاى شوي ماينونه کشف او شنډکړي دي .

کابل باختر دوږي  نولسمه :
په هلمند ولايت کې نن سهار د يوې چاودنې له امله پنځه تنه ملکي وګړي ټپيان شول .
دهلمند ولايت ويندوى عمر ځواک باخترآژانس ته وويل: په يو موټرسايکل کې دځاى پرځاى شوي چاوديدونکي توکي د لښکرګاه ښار په بولان ساحه کې  وچاوديدل چې له امله يې پنځه تنه ملکي وګړي ټپيان شول .
  ځواک وويل: د ډار اچوونکو هدف په ساحه کې د پوليسو په ځواکونو بريد و؛ خو دغو ځواکونوته زيان نه دى اوښتى.

کابل باختر دوږي  نولسمه :
شپږ تنه وسله وال طالبان  تيره شپه په فراه ولايت کې ووژل  شول .
په فراه ولايت کې دملي اردوددويمې پلي لوا د دفتر ويندوى محمد حنيف رضايي  باخترآژانس ته وويل: طالبانو دفراه ولايت دمرکز شمال ګاه په کلي کې د ملي اردو دځواکونو په پوستو بريدونه وکړل چې د نښتې په بهيرکې شپږ تنه  وسله وال طالبان ووژل شول.
د رضايي دڅرګندونو له مخې: د دغې نښتې په بهيرکې د طالبانوشيږ کلاشينکوفونه هم دملي اردودځواکونو لاس ته ورغلي دي .
په دې نښته کې دملي اردو ځواکونو ته زيان نه دى اوښتى.

کابل باختر دوږي  نولسمه :
دبدخشان ولايت په زيباک ولسوالۍ کې تېره شپه د سيلاوونو د راوتلو له امله د استوګنې په لسګونو کورونه ويجاړ شول.
د زيباک ولسوال مير احمد شاه زيغم باخترآژانس ته وويل: دغو سيلاوونو د زيباک ولسوالۍ د مرکز او د څوکليو ترمنځ مواصلاتي لارې ويجاړې کړې دي.
د زيباک ولسوال وايي: د آقاخان په ټولنې پورې اړوند د فوکس د دفتر او د نورو مرستندويومرکزونو استازي په پښو د پيښې سيمې ته رسيدلي دي .
ويل کيږي تراوسه پورې د دغې پيښې له امله د سر د زيان د دقيق شمېر او مالي زيانونو په باب خبر نه دى ترلاسه شوى.
  جزئيات وروسته خپريږي .