11 December 2019

RSS Facebook

سوداگریز


تازه خبرونه

فضل هادي مسلم یارپه کابل کې  دچګ جمهوريت  له سفير سره وکتل

فضل هادي مسلم یارپه کابل کې دچګ جمهوريت له سفير سره وکتل

کابل /دليندې ١٩مه /باختر : د مشرانوجرګې رئیس فضل هادي مسلم...

د( ګنج  قناعت)  دښکلې ليکنې داثارو نندارتون پرانستل شو .

د( ګنج قناعت) دښکلې ليکنې داثارو نندارتون پرانستل شو .

کابل /دليندې ١٩مه /باختر : داطلاعاتواوفرهنګ وزارت دفرهنګ او هنر معين...

Youtube Player

khantry design

سوداگریز

سوداگریز

کابل _ باختر دکب دمياشتې اتمه :
دجلال آباد ښار نن سهار د يوې چاودنې ډګر و، خو ويل کېږي چې په دې پيښه کې  د سر زيان نه دى اوښتى .
  دغه چاودنه نن سهار په پنځو بجو او ديرشو دقيقو د جلال آباد ښار د څارنوالۍ  د ادارې د څارنوال عصمت الله دکور د دروازې په وړاندې شوې ده .
د ننګرهار ولايت د امنيې قوماندانۍ ويندوى حضرت حسين مشرقي وال باختر آژانس ته وويل: دغه پيښه د يو ايښودل شوى بم د چاودنې زيږنده وه چې د سر زيان يې نه دى اړولى .
  سيمه ييز مقامات وسله وال طالبان د دغې پيښې مسوول بولي، خو لا تراوسه  پورې د دغې پيښې مسووليت چاپه غاړ ه نه دى اخستى او هم هدف يې نه دى مشخص شوى .
دغه چاودنه دجلال آباد ښار په بابريانو سيمه کې په هغه ځاى کې شوې ده چې هره ورځ د ترافيکو ګڼه ګوڼه پکې ده .
 

کابل _ باختر دکب دمياشتې اتمه :
وسله والوطالبانو تېره شپه د نورستان ولايت د وانټ وايګل د ولسوال پرکور، په بريد سره  هغه ته اور واچاو ه .
  په را رسيدلو خبرونوکې ويل شوي دي چې د دغه بريد په وخت کې رحمت الله په کورکې نه و .
دغه پيښه تېره شپه هغه وخت وشوه چې يوې ډلې وسله والو طالبانو د دغه سيمه ييز مقام په کور بريد وکړ .
د نورستان د وانټ وايګل ولسوال رحمت الله باختر آژانس ته وويل چې يرغلګرو لومړۍ د ده دکور ټول مالونه لوټ کړل او وروسته يې هغه ته اور واچاوه .
ويل کېږي، په دې اور لګيدنه کې د ولسوال رحمت الله دکور د مالونو په سوځيدو سربېره، څوټوکه قرآن عظيم الشان او نور اسلامي کتابونه هم سوځيدلي دي .
د وانټ وايګل د ولسوال دڅرګندونو له مخې: د دغې پيښې له امله  ده ته دڅه ناڅه درې سوه زرو افغانيو زيان اوښتى دى .
ديوکال په بهيرکې دا دويم ځل دى چې طالبان د نورستان د يو سيمه ييز مقام کور سوځوي .
  مخکې له دې د وانټ وايګل د پخوانى ولسوال مولوي حبيب الرحمان په کورهم د وسله والوطالبانو له خوا بريد شوى و او سوځول شوى و .
اوس د وانټ وايګل په زياترو سيموکې وسله وال طالبان شته.
نورستان دافغانستان په ختيځ کې له پاکستان سره دګدې پولې په لرلو سره، تل د وسله والوطالبانو له دې جملې څخه ددغې ډلې دپاکستاني جګړه مارانو دشتون او فعاليت ډګر دى .
 

کابل _ باختر دکب دمياشتې اتمه :
په جلال آباد ښارکې نن سهار چاودنه وشوه .
دغه چاودنه چې ويل کېږي د يو ايښودل شوى بم زيږنده ده؛ نن سهار د دغه ښار  د دريمې ناحيې په مربوطاتوکې وشوه .
تر اوسه پورې د دغې چاودنې له امله د سر د زيان په باب خبر نه دى ترلاسه شوى . 
د باختر آژانس خبريال وايي چې امنيتي ځواکونو د پيښې سيمه کلابنده کړې ده .
دپيښې جزئيات وروسته خپريږي .
 

کابل باختردکب دمياشتې ٧
د ميدان وردګو ولايت چارواکو او عامو اوسېدونکو د ولسمشر د هغې پرېکړې، چې تر دوو اونيو دې له دغه ولايته ځانګړي امريکايي ځواکونه ووځي، هرکلى وکړ.
باختراژانس دپژواک دخبرى اژانس د خبرله مخې خبرراکړ د وردګو اوسېدونکي له تېرو څو مياشتو راهيسې د ځانګړو امريکايي ځواکونو او د هغوى د نا معلومو افغان همکارانو له ځورونو، ربړونو او وژنو شکايتونه کوي.
د چارواکو او خلکو د شکايتونو په پايله کې د ولسمشر کرزي په مشرۍ د هېواد د ملي امنيت شورا پرون امريکايي ځواکونو ته امر وکړ، چې په دوو اونيو کې له وردګو څخه ووځي.
د سيداباد ولسوالۍ د شېخ اباد سيمې يوه مخور عبدالبصير د کب په ٧مه پژواک اژانس ته وويل، چې د ولسمشر د پروني ورځې پرېکړه د دغه ولايت د ولسونوبيابيا مکرره غوښتنه وه.
ده وويل، چې د بهرنيو ځانګړو ځواکونو ځورونو او خپلسرو عملياتو د دغه ولايت عامو وګړو ته رواني ناروغي پيدا کړې وه، نو له يادې پرېکړې سره اوس د ولسونو په منځ کې خوښي پيدا شوه.
هغه زياته کړه، چې د دغه ولايت ولسونه بايد اوس له خپلو افغان ځواکونو سره د امن په ټينګښت کې مرسته وکړي، څو بهرنيو ځواکونو ته د پاتې کېدو پلمه پاتې نه شي.
د چک ولسوالۍ اوسېدونکى او په تېره دوره کې د مشرانو جرګې غړي سمېع جان شېرزاد هم د ولسمشر د حکم هرکلى وکړ او هيله يې څرګنده کړه، چې دغه امر بايد پر خپل وخت پلى شي.
هغه وويل، چې له دغه ولايت څخه د بهرنيو ځواکونو وتل او امنيتي چارې يې افغان ځواکونو ته سپارل د دغه ولايت د خلکو غوښتنه ده؛ ځکه چې بهرني ځواکونه هلته امنيتي ستونزې جوړوي او خلک ځوروي.
شېرزاد زياته کړه، چې د ده په ګډون ځينو مشرانو څو ورځې مخکې له بهرنيو افغان ځواکونو ته د مسووليتونو د لېږد د پروسې مشر اشرف غني احمدزي ته د دغه ولايت د خلکو ستونزې وويلې.
ده له اشرف غني احمدزي مننه وکړه، چې دغه ستونزې يې له نورو چارواکو سره شريکې کړي او په پايله کې يې ولسمشر له دغه ولايت څخه د بهرنيو ځواکونو د وتلو امر وکړ.
په ولسي جرګه کې د ميدان وردګو د خلکو استازي عبدالاحمد دراني هم د ولسمشر د پرېکړې هرکلى وکړ او ويې ويل، چې دا د ولس او د وکيلانو پرله پسې غوښتنه وه.
د هغه په وينا، که چېرې ولسمشر دغه امر نه واى کړى، نو د ميدان وردګو خلکو به په نږدې راتلونکي کې د دغو ځورونو پر ضد پراخ لاريونونه کړي واى.
ده هيله څرګنده کړه، چې د ولسمشر دغه امر به ډيرژر پلى شي.
د قيوم په نوه د جلرېز ولسوالۍ يوه تېل پلورونکي پژواک اژانس ته وويل، کله چې تېره شپه دوى له رسنيو د ولسمشر دغه پرېکړه واورېده، نو دوى له ډېرې خوښۍ نورو خپلوانو ته د ټيلېفون په وسيله زيرى ورکړ.
ده زياته کړه: ((اېله مو تېره شپه د کورنۍ له ماشومانو سره په ارامه او ډاډه زړه خوب وکړ))
د حاجي قدوس په نومه د ميدان ښار يوه قومي مشر پژواک ته وويل، چې د ځانګړو بهرنيو ځواکونو د وتلو په اړه د ولسمشر کرزي پرېکړې د دغه ولايت خلکو ته خوښي وربښلې او د ولسونو د مهمې غوښتنې مطابق يې فيصله کړې ده.
دغه مخور وويل، چې د ولسمشر پرېکړه ډېره مهمه او په ښه وخت کې وشوه، که نه خلکو ته دوه لارې پاتې وې؛ چې يا کډې بارکړي او يا عمومي پاڅون وکړي، خو اوس به د بهرنيو ځواکونو له وتلو سره ولسونه د خپلو سيمو د امنيت ټينګښت ته جدي پام کوي.
د نرخ ولسوالۍ يو اوسېدونکى ښوونکى امين وايي، چې د ولسمشر د تېرې شپې پرېکړې د ده هغه اراده بدله کړه، چې غوښتل يې د بهرنيو ځواکونو د ځورونو له لاسه تقاعد واخلي.
ده زياته کړه، مخکې ځکه ده تقاعد اخيستو ته اراده کړې وه، چې ښوونځي ته د تلو ، نو په لار کې به بهرنيو ځانګړو ځواکونو له يو شمېر نورو هغو عامو وګړيو سره مخکې کړى و ، چې په لارو ، کوڅو او کروندو کې به يې نيولي وو او بيا به يې وهل ټکول او د ګوتو نښې به يې اخيستلې.
د وردګو د ولايتي شورا مرستيال حضرت محمد جان د ولسمشر د دغه امر د هرکلي ترڅنګ وويل، چې رسنيو او په ځانګړې توګه پژواک د خلکو دغه ستونزې تر چارواکو پورې په رسولو کې ډېره مرسته وکړه.
هغه زياته کړه، چې نن د دغه ولايت د بېلابېلو سيمو تر ٣٠ پورې قومي مشران ولايتي شورا ته راغلي وو او د ولسمشر د تېرې شپې د فرمان او امر هرکلى يې وکړ.
جانان پژواک اژانس ته وويل، د ملکي خلکو ځورول. چې د هر چا له خوا وي، دوى يې غندي او د ولسمشر د تېرې شپې اقدام يې پر وخت او پر ځاى اقدام وباله.
د ده په وينا، يو شمېر کورنيو چې د کډې کولو تکل يې کړى و، د ولسمشر د تېرې شپې تر اعلام وروسته يې خپله پرېکړه بدله کړې ده.
د ميدان وردګو د والي وياند عطاء الله خوږياڼي پژواک اژانس ته وويل، چې د ولسمشر د تېرې ورځې پرېکړې د ولايت خلکو ته خوښي ورپه برخه کړه.
هغه زياته کړه، چې په دې کار سره پر حکومت د خلکو باور نور هم زيات شو او دا د ولايت د مقام يوه لويه لاسته راوړنه ده، چې د خلکو ستونزو ته يې د اوارۍ لاره پيدا کړه.
د خوږياڼي په وينا، نور د ولايت مقام دا نه شوى زغملى، چې ولسونه يې وځورول شي، په دې اړه يې ټول معلومات ولسمشر ته وړاندې کړي وو او ولسمشر په دې اړه وروستۍ پرېکړه وکړه.
د والي وياند وايي، د ولايت مقام هر هغه پرېکړه، چې د ولسونو د خوښۍ وړ ګرځي، هرکلى کوي او زياته يې کړه، چې په دغه ولايت کې د امنيت د ټينګښت لپاره پياوړى ځواک لري او هغوى کولى شي د بهرنيانو ځاى ونيسي.
امريکا وايي، چې په ميدان وردګو کې د خلکو د ځورونې په اړه شوې ادعاوې جدي نيسي او په دې اړه له افغان چارواکو سره خبرې کوي.
 

کابل\  باختردکب  دمياشتې  ٧ :
دافغانستان داسلامي  جمهوريت دجمهوررييس  حامدکرزي په مشري د وزيرانو شورا نوبتي غونډه  نن له غرمې مخکې دجمهوري رياست دګلخانې په ماڼۍ کې  جوړه شوه.
دچارو دادارې او دوزيرانوشورا ددارلانشا لوى رياست باختراژانس ته خبرورکړ.
په پيل کې دوزيرانوشورا  له بهرنيو  مرستو  څخه داستفادې دڅرنګوالې په باب خبرې وکړې او دبهرنيو چارو او دماليې وزارتونه يې موظف کړل  چې  دخپلو همغږي دغونډو په ترڅ کې دې له دونرونو سره  تفاهم وکړي   چې خپلې مرستې  دې دافغانستان دملي واکمني اصل  او دنړيوالو کنفرانسونو اوغونډو په ترڅ کې  خپلو  ژمنو ته په پاملرنې سره  دملي بودجې له لارې ولګوي .
په همدې ترتيب ټول دولتي ارګانونه موظف کړاي شول چې تمويلوونکو هيوادونو او دنړيوالو سازمانونو دمرستو جذب اولګښت دافغانستان داسلامي جمهوريت دماليې وزارت له لارې ترسره کړي  اوله بهرنيو  تمويلوونکو سره  له مستقيمو خبرو څخه دې ډډه وکړي.
وروسته دوزيرانو شورا ، دبهرنيو چارو وزارت اود جمهوري رياست دمقام  دملي امنيت  سلاکار موظف کړل  چې دايران په اسلامي جمهوريت کې د شپږوتنو افغانانو  داعدام اودهيواد دهغو اتباعو موضوع چې ددغه هيواد په جيلونو کې  شپې سباکوي  اوداعدام  اويا داوږد بند په مجازاتو محکوم دي  دايران داسلامي جمهوريت له لورى سره دديپلوماتيکي لارې طرحه کړي اوپه حل کولو کې دې ټولې ممکنې هلې ځلې وکاروي .
وروسته دوزيرانو شورا  په پښتو او دري ژبو ددکتورا دپروګرام دجوړولو په باب دلوړو زده کړو دوزارت  دوړانديز هرکلي وکړ او دغه وزارت ته يې دنده وسپارله  چې په دغو پروګرامونو کې دې  نوى  اکاډميک اوڅيړنيز پروګرامونه په پام کې ونيسي او عملي يې کړي.
دغه راز داطلاعاتو اوفرهنګ ، لوړو زده کړو او دپوهنې وزارتونه موظف کړاي شول  چې دملي او تاريخي  وجيبې په پام کې نيولو سره دې   اړونده وزيران  او  متبوع مرکزونه يې  دملي ژبو  دلهجو ، خصوصيت  اوهويت ، اصالت  وساتي  او احيايې کړي ، په تيره بيا دراډيو ګانو او تلويزيونونو په خپرونو کې دې دملي  ژبو اصيلو لهجو ته خاصه پاملرنه وکړي  او دغير معياري لهجو ، نامانوسو کلمو له  خپرونو او له پرديو  ژبو او لهجو  څخه له استفادې څخه دې په کلکه ډډه وکړي .
له اجنداسره سم  دلوړو  زده کړو وزير دخصوصي لوړو زده کړو دموسسو دڅيړنې نتيجې غونډې ته داسې طرحه کړې :
دغه څيړنه  دهغو موسسو دمعياري کولو په باب چې  دتقنيني سندونو اود هيواد دلوړوزده کړو دپاليسو پرخلاف فعاليت کوي  اويا دهغوى دلوست  کيفيت معياري نه دي  دافغانستان داسلامي جمهوريت د  جمهوررييس د ١٣٩١ کال  دزمري دمياشتې د پنځمې  نيټې د  ٤٥ ګڼه فرمان له مخې  ترسره شوې ده . ددغې څيړنې په نتيجه کې دخصوصي لوړو زده کړو موسسې  د
( عالي ، ښه  ، قناعت بخښونکي او کمزوري ) په سويو  په څلورو ګټه ګوريو ويشلي شوي دي . چې له دې جملې څخه  دکابل ، بلخ ، هرات ، ننګرهار ، تخار ، سمنګانو ، کندز ، فارياب ،  جوزجان  اوبغلان په ولايتونو کې  دخصوصي لوړو زده کړو   د دوه شپيتو  فعالو موسسو له جملې څخه  دلوړو زده کړو څوارلس موسسې  په ښه  کټګوري کې ، څلورديرش په قناعت بخښونکي کټګوري کې   او څوارلس نورې په   کمزوري کټګوري کې بللي شوي دي .
ديادونې وړ ده چې دښې درجې لپاره  تشويقي زمينې  اودقناعت بخښونکواو  کمزورو درجو لپاره  په هغه صورت کې چې  تر نورو دوو مياشتو پورې  په توصيه شويو اصلاحاتو  لاس  پورې نه کړي  ، تاديبي  مويدات په پام کې نيول شوي دي .
دوزيرانوشورا دخصوصي لوړو زده کړو دموسسو دڅيړنې طرحه تصويب کړه او دلوړو زده کړو وزارت يې  ددغو موسسو په دايمي څيړنې اوتطبيق  موظف کړ.
وروسته  دبيا   جوړولو  دولايتي ټيمونو دړنګولو  چوکاټ دسيمه ييزو ارګانونو دخپلواکي ادارې  درييس له خوا  غونډې ته طرحه  او څرگنده شوه چې  د٤٥ ګڼه فرمان لارښوونې په رڼا کې  دغه  طرحه داقتصاد ، ماليې  او دکورنيو  چارو دوزارتونو  اودنورو اړوندو  مرکزونو  په  همکاري برابره شوې ده  چې مهم هدفونه يې   دسيمې په کچه  دامنيتي او پرمختيايي برياليتوبونو ساتنه  ، دبيا جوړولو دولايتي ټيمونو  له وتلو وروسته  دستونزو  دنه رامنځته کيدو په باب  دډاډ  ترلاسه کول  ، په دايمي  حکومتي  جوړښتونو ددغو سيستمونو بدلون   اوپه هغو ولايتي پروژو کې  دوزارتونو درول   مشخص کول  دي  چې دبنسټيزو پروژو ،دساتنې او څارنې او لوژستيک په برخه کې  دملاتړ ، تخنيکي  ملاتړونو   او دبيا  جوړولو دولايتي ټيمونو دوسايلو اواډو دليږدونې په ګډون  په څلورو   مهمو فعاليتونو متمرکز د ي .
دوزيرانو شورا دبيا جوړولو دولايتي ټيمونو دړنګولو د چوکاټ طرحه تصويب کړه  او دماليې اوداقتصاد وزارتونه  اودسيمه ييزو ارګانونو دخپلواکي ادارې لوى رياست يې دهغې په تطبيق موظف کړل .
وروسته   دوزيرانو شورا  داقتصادي  کميټې ١٩ _ ٢٠   او ٢١ ګڼه پريکړې په دې ډول غونډې ته طرحه شوې .
په پيل کې  دښار جوړولو دچارو وزير دکابل  ، هرات ، باميانو، جلال اباد، مزارشريف ، کندز  اودقندهار دښارونو ماسترپلان غونډې ته طرحه کړ  .
دوزيرانو شورا دماسترپلانونو طرحه او تطبيق دهيواد دراتلوونکي نسل  داقتصادي اوټولنيزې ودې لپاره مهمه  زمينه وبلله او دغه وزارت يې موظف کړ   چې دماسترپلانونو اساسي اړخونه  لکه  دشنو ساحو ساتنه پارکونه  ، دتجارتي او داستوګنې دساحو تفکيک  ، ترانسپورتي سيستمونه  ، کاناليزاسيون  ، اوبو رسول ، بريښنا په اوږدمهال کې د وګړو  وده ،  دتاريخي  اثارو ساتنه ،  دلوړ پوړيزو څرنګوالي اودخصوصي ښارګوټو شمير په ښاري ماسترپلانونو کې  مشخص کړي  او دهغو دارزښت په دليل خپلې طرحې دې  دوزيرانو شورا فوق العاده غونډې ته چې په راتلوونکي اوونۍ کې به جوړه شي ، وړاندې کړي .
وروسته  داقتصاد وزير  دروان  کال په نهو مياشتو کې دپرمختيايي پروژو دتطبيق څرنګوالي  غونډې ته داسې طرحه کړ  :
په  ١٣٩١ کال  کې  د اووه اويا  نويو پروژو او د څلور څلويښتو انتقالي پروژو په  ګډون  پنځه سوه شل پروژې   دشپږسوه شپږويشت اعشاريه  مليونو ډالرو اختياري بودجې  اود يوزرو څلور سوه اته پنځوس اعشاريه اوو  مليونو ډالرو  غيراختياري بودجې  په ګډون د دوه زره پنځه اتيا اعشاريه پنځومليونو ډالرو په پرمختيايي  بودجې په سرجمع چې  ډيره زياته پانګونه  دبنسټونو اودطبيعي منابعو اوکرکيلي اودکليو دپرمختيا په سکتورونو کې شوې ده ، طرحه  او برابرې شوي دي .
دروان کال دنهو مياشتو په بهيرکې  له ټولې پرمختيايي بودجې څخه يو زروپنځه
پنځوس اعشاريه  نهه مليونه ډالره يا له دريو برخو څخه دوه برخې بودجه دوزارتونو او ادارو  په پرمخيتايي پروژو کې لګول شوې ده   چې دپنځه ديرشو پروژو کار بشپړشوي دي   اود درې سوه نولسو پروژو کار دوام لري  او ديوسلو نهه ديرشو  پروژو کاردلازمو سندونو دنه بشپړيدو په نسبت تراوسه پورې نه دى پيل شوى  او اووه ويشت پروژې په هغو پروژو کې شاملې دي  چې په ١٣٩٠ کال کې بشپړې شوي دي خو مالي تصفيه يې دروان کال له بودجې څخه شوې ده .
له  ١٣٨٧ کال څخه تر ١٣٩١ کال پورې  دپرمختيايي بودجې لګښتونو صعودي تګلوري درلود چې دپروژو په تطبيق کې دظرفيتونو دلوړيدو اوپه دې برخه کې دادارو  دجدي پاملرنې څرگندوى دى .
له بلې خوا  له پرمختيايي بودجې څخه د زياتې استفادې په مقصد   دجمهوري رياست د حکم موظف کميسيون ، يولړمشخص پيشنهادونه برابرکړي دي چې  له  اوږدو خبرو وروسته  تائيد شول .
دغونډې دکار په دوام دماليې وزير له اقتصادي جرمونوسره دمبارزې  طرحه  غونډې ته وړاندې کړه او څرگنده يې کړه چې دغه طرحه دهغي ستراتيژي مسوده ده چې  دهغي په رڼاکې به افغانستان ددې وس ولري  چې  دپيچلو اقتصادي جرمونو دکشف  ، مخنيوي ، تحقيق  اوڅارنې ځواکمني پيداکړي.
ديادونې وړ ده  چې  په پيچلو اقتصادي  جرمونو کې بانکي تقلب ، دپيسو دله منځه وړلو اختلاس  ،  دمالياتو اود ګمرکي محصول له ورکړې څخه تيښته ، غير مجازه سوداګرۍ ، دتروريزم دتمويل  ،  اداري فساد او نورشامل دي .
دوزيرانوشورا له  اقتصادي  جرمونوسره دمبارزې طرحه تصويب کړه او دماليې وزارت يې موظف کړ چې دغه طرحه  دې  دکاري ډلې په همکاري تطبيق کړي.
ورپسې  کابل ښاروال  دپلورنې په وخت کې  دمکروريانونو داپارتمانونو دپلورنې په سلو کې   ديوې افغانۍ  اخيستل  غونډې ته طرحه کړل  چې دکافي قانوني دلايلو  دنه شتون په نسبت   دتصويب وړ ونه گرځيدل .
وروسته دعدليې وزير  دښاري خدمتونو دمحصول داخيستلو  پرځاى دتجارتي مالونو دګمرکي تعرفي په سلو کې  دصفر اعشاريه  پنځه ويشت زياتوالي  دبيا څيړنې په باب دموظف کميسيون نظر  غونډې ته طرحه کړ او زياته يې کړه  چې  دښاري خدمتونو دمحصول پرځاى  دګمرکي تعرفي په سلو کې دصفر اعشاريه پنځه ويشت  ټاکل دښاري خدمتونو دمحصولاتو له قانون سره سمون نه لري  له  دې امله ښاروالۍ کولاي شي  ددغه قانون له صراحت سره سم خپل محصول اوتهجايي په دې شرط چې   تجارتي مالونه  په اړوندو ښارونو کې يې خالي شي  ، واخلي .
ديادوني وړ ده  چې ښاروالۍ  له خپلو ښارونو څخه دترانزيتي مالونو دمحصول  داخيستلو  حق نه لري او کابل ښاروالۍ  موظفه ده  چې دښاروالۍ محصول  دکابل ښار په څلورو دروازو کې دښاروالۍ دکارکوونکو له لارې راټول کړي  اوله افرادو اواشخاصو سره  دهغو له قرارداد څخه ډډه وکړي.
دوزيرانوشورا  دښاري خدمتونو دمحصولاتو له قانون سره سم دښارواليو
دمحصول اوتهجايي داخيستلو په باب  دموظف کميسيون  نظر تصويب کړ 
اودمرکز اوولايتونو ښاروالۍ يې دکميسيون دنظر په تطبيق موظفي کړې.
وروسته  دمکروريانونو  ددوکانونو دمياشتني کرايې دبيې  دورکولو تثبيت  دکابل ښاروال له خوا غونډې ته داسې طرحه شو.
دغه دوکانونه له  ١٣٤٨ کال څخه تر ١٣٨٣ کال پورې  دداودطلبي  اودمزايدې له مخې دمستاجرينو په  واک کې و  خو  دمستاجرينو دزياتو عريضو په دليل داوطلبي وځنډول شوه او کرارکرار موضوع په يوې پيچلي شخړې بدله شوې ده . خوپه دې وروستيو وختو کې دسترې محکمې دعالي شور ا له پريکړې او دوزيرانو شورا د  ١٣٩٠ کال د مرغومي دمياشتې دپنځمې نيټې  د  ٣٨ ګڼه مصوبې له مخې  ددوکانونو دکرايې تثبيت   دمماثلو او ګاونډيو دوکانونوله مخې په دريو کټګوريو کې تثبيت  او مياشتني کرايه  ديومتر مربع ملکيت له مخې دمستاجرينو تراستفادې لاندې اټکل شوي دي. خو نوي بيې بيا هم د مستاجرينو له خوا غير عادلانه بللي شوي دي او څرگنده کړى يې ده چې دورکولو توان يې نه لري .
دوزيرانو شورا دمکروريانونو ددوکانونو په باب  دافغانستان داسلامي  جمهوريت دسترې محکمې تدقيقي نظر تائيد کړ او دعدليې  اوماليې  وزارتونه او کابل ښاروالۍ يې موظف کړل  چې تثبيت شوي کرايه  بيا وڅيړي  او د ١٣٩١ کال له پيل څخه دې   په تطبيق اقدام وکړي .
دغونډې په پاى کې دبهرنيو چارو دوزير  له خوا  دوه مورده نړيوال تړونونه غونډې ته طرحه شول  چې دتصويب وړ و گر.ځيدل .

کابل\  باختردکب  دمياشتې  ٧ :
دافغانستان داسلامي جمهوريت جمهوررييس حامدکرزي دافغانستان اوپاکستان لپاره دالمان له ځانګري مايکل کخ سره وکتل.
دجمهوري رياست مطبوعاتي دفتر باختراژانس ته خبرورکړ.
په دې کتنه کې چې نن غرمه په ارګ کې وشوه دواړولورودافغانستان دسولې دبهير اوپه بيلابيلو برخوکې ددواړوهيواونوترمنځ دهمکاريوپه باب خبرې وکړې.
دهيوادجمهوررييس په دې ترڅ کې چې المان يې دافغانستان هميشنى دوست وباله په بيلابيلو برخو کې يې ددواړو هيوادونو ترمنځ په همکاري باندې ټينکاروکړ.
 

کابل\  باختردکب  دمياشتې  ٧ :
دافغانستان داسلامي جمهوريت  دجمهوري رياست دويم مرستيال محمدکريم  خليلي  نن دجنوبي کوريا دمنتخبې جمهورې رييسې پارک جون هى دلوړې په مراسمو کې ګډون وکړ.
باختراژانس ته د جمهوري رياست دمطبوعاتي دفتر دمعلوماتوله مخې:
په  دغو مراسمو کې چې ديو زيات شمير  بهرنيو ميلمنو اوپه سيول کې دبهرنيو هيوادونو دسفيرانو په ګډون پرځاى شول   دترانسپورت او هوايي چلند وزير داودعلي نجفي اوپه سيول کې دافغانستان داسلامي  جمهوريت لوى سفير محمديونس فرمان هم ګډون کړي و.
دجمهوري رياست دويم مرستيال اوملګرو يې په هغې ماښامني ميلمستيا کې برخه  واخيسته چې دکوريا دنوى جمهورې رييسې له خوا جوړه شوې وه.
 

Monday, 25 February 2013 03:31

دمبارکي پيغام

کابل\  باخترد کب  دمياشتې  ٧ :
دافغانستان دبهرنيو چارو دوزير ډاکتر زلمى رسول له خوا دکويټ  ددولت دصدراعظم دمرستيال اودبهرنيو چارو دوزير ولاحضرت شيخ صباح خالد المحدالصباح  په نامه ددغه هيواد دملي ورځې له امله  په دې شرحه دمبارکي پيغام ليږل شوى دى .
په زياتي خوشحالي سره دکويټ ددولت دملي ورځې له امله دډيرو ښو مبارکيو مراتب تاسو اوستاسو له لارې ددغه هيواد ددوست او ورور ملت ته وړاندې کوم.
دافغانستان اسلامي جمهوريت ددواړو  وروڼو ملتونو ترمنځ دټينګو فرهنګي ، تاريخي ا وديني اړيکو په ډډې لګولو سره زموږ دهيوادونو ترمنځ  ددوستانه اړيکو  دودې اوټينګښت  اصل ته زيات ارزښت ورکوي چې هيله  لرو په ټولو برخو کې دلازياتي سمسورتيا اوپرمختيا شاهدان و اوسو.
 

کابل\  باختردکب  دمياشتې  ٧ :
دملي دفاع وزارت ويندوى له اسپيشل  فورس ځواکونو څخه  غوښتى دى چې په ټاکلي موده کې دميدان وردګو له ولايت څخه ووځي .
دجنرال محمد ظاهر عظيمي څرګندونې دهيواد دملي امنيت دشورا له پريکړې  وروسته کيږئ  چې پرون يې ټينګار وکړ چې خاص بهرني ځواکونه دى تردوو اوونيوپورې  له ميدان وردګو څخه ووځي.
جنرال عظيمي  دباخترا ژانس خبريال ته وويل ، دميدان وردګو   اودلوګر دولايتونو   خلکو ته دامنيت  تامينول  ، ښه حکومت والي له خلکو څخه دمخالفينو جلا کول  اودکار او ژوندانه دډاډمن فضا برابرول ، دافغانستان  داسلامي جمهوريت  ددولت  ، دملي دفاع  وزارت  اودهيواد او دنورو امنيتي ځواکونو په کاري لومړيتوب کې ځاى لري.
په همدې مقصد موږ تراوسه پورې څوځلې دغو ولايتونو ته هيئتونه استولي دي او هم دملي  دفاع وزارت دمشرتابه هيئت اودميدان وردګو اودلوګر  دولايتونو دملکي او نظامي  مسوولينو په ګډون په دغو ولايتونو اودملي دفاع وزارت په مقر کې يولړ غونډې جوړې کړې وې  چې محسوسي نتيجې  موترلاسه کړي دي.
د ١٣٩١ کال دکب دمياشتې  په شپږمه نيټه ديکشنبې په ورځ  ددغو دوو ولايتونو دامنيت  موضوغ وڅيړل شوه  چې په ترڅ کې يې دميدان وردګو والي وويل، که چيرې دامنيت د تامينولو موضوع افغان امنيتي ځواکونو ته وسپارل شي  دوى په ښه توګه کولاي شي دسولې اوثبات په ټينګښت کې اغيزمن لور ولوبوي.
دافغانستان  داسلامي جمهوريت جمهوررييس او دوسله وال پوځ اعلي سرقوماندان حامدکرزي دامنيت شورا له پريکړې سره سم  لارښوونه وکړه  چې تر راتلوونکو دوو اونيو پورې دې داسپيشل فورس بهرني ځواکونه له دغو سيمو څخه ووځي .
دملي دفاع وزارت دجمهوررييس اودوسله وال پوځ داعلي سرقوماندان دلارښوونې دتطبيق په خاطر دې په ټاکلي  موده کې دغه سيمې تشې کړي.
دافغان امنيتي ځواکونو دغونډو په ترڅ کې پريکړه وشوه  چې ملي اردو په ضروري وضع الجيشونو کې  ځاى پرځاى اوخپل چاڼيز عمليات اوګزمې دې ددغې سيمې له نوي امنيتي پلان سره سم اجرا کړي او دغه راز دښارونو او دلويو لارو امنيت دې پوليسو ته وسپارل شي .
 

کابل\  باختردکب  دمياشتې  ٧ :
داطلاعاتو اوفرهنګ وزير ډاکتر سيدمخدوم رهين له خبريالانو سره دننګرهار ولايت دامنيتي   ځواکونو ناوړه چلند په کلکه وغانده.
داطلاعاتو اوفرهنګ وزير چې په دې باب يې دباختراژانس له خبريال سره خبرې کولې  زياته کړه، په معلوماتو لاس بري  دخبريالانو دقانوني مکلفيتونو يوه برخه ده او بايد دغه حق ترپوښتنې لاندې ونه نيول شي .
ډاکتر رهين  دننګرهار ولايت له مقاماتو څخه  وغوښتل چې موضوغ وڅيړي  او امنيتي ځواکونو ته دې لارښوونه وکړي  چې له خبريالانوسره ناوړه چلند ونه کړي.
درارسيدلو خبرونوله مخې،  دپژواک دخبري اژانس ، داريانا ، هيواد ، شمشاد او دفرانسپرس دتلويزيونونو خبريالان هغه وخت ووهل شول او وډبول شول چې غوښتل يې په جلال اباد ښارکې دچاودنې يوه پيښه ترپوښښ لاندې ونيسي .
ډاکتر  رهين زياته کړه چې په دايکندي ولايت کې ددوو سيمه ييزو راډيو ګانو ستونزه هم څيړل شوې  ده.