21 January 2020

RSS Facebook

سوداگریز


تازه خبرونه

  د مشرانو جرګې فوق العاده غونډه جوړه شوه

د مشرانو جرګې فوق العاده غونډه جوړه شوه

کابل/ دمرغومې۳۰مه / باختر د مشرانوجرګې نننۍ فوق العاده غونډه کې...

خبرتيا

خبرتيا

کابل/ دمرغومې۳۰مه / باختر د شهيد ستر پاسوال عبدالرازق د ملي...

پنځه طالبان په نيمروز کې ونيول شول

پنځه طالبان په نيمروز کې ونيول شول

کابل/ دمرغومې۳۰مه / باختر د نيمروز پوليسو نن پنځه وسله وال...

Youtube Player

khantry design

سوداگریز

سوداگریز

کابل\  باخترد وري  دمياشتې  ٢٧ :
د سترې محکمې عالي شورا نن له غرمې مخکې د قاضي القضات پوهاندعبدالسلام عظيمي په مشرۍ غونډه وکړه.
د سترې محکمې د خپرونو رياست باخترآژانس ته خبر ورکړ: په غونډه کې لومړۍ دسترې محکمې د قطعي او وروستيوحکمونو پرتطبيق باندې د څارنې د لوى رئيس رپوټ چې د جمهوري رياست د ١٣٩١ کال د زمري د مياشتې دپنځمې نيټې د٤٥ ګڼه او د ١٣٩١ کال دکب د مياشتې د٢٧ نيټې د١٢٩ ګڼه  فرمانونو دعملي کولو او د سترې محکمې د پاليسي د رعايتولوپه لاره کې له مختلط هيئت سره يو ځاى د وري د مياشتې په ٢٦ نيټه دبګرام جيل ته رسيدلي وو ، واوريدل شو.
د وړاندي شوى رپوټ له مخې: هيئت په دغه جيل کى د يوشمېربنديانو اومحجوزينو د سندونو له څيړنې وروسته، دغو يوسلو نهه ديرشو تنو په خلاصون چې د پروان ولايت د ابتدا ئيه او استيناف محکمو له خوا بري الذمه پيژندل شوي وو اويا تيربند د دوى په حال کافي بلل شوى و، خو د قانون پرخلاف په بند کى ساتل شوي دي، تجويز ونيوه او دجيل قوماندانۍ هم د لازمو مراتبو له بشپړ ولو وروسته د هغوى په سملاسي خلاصون ژمن وکړه.
وروسته دقضايي سرغړونو د څيړنې په لاره کې په ١٣٩١کال کې د سمنګانو ولايت د استيناف محکمې د قضايي اجرااتو د څيړنې په اړوند د قضايي پلټنې د رياست رپوټ اوهم دننګر هار د شخصيه احوالو د ابتدا ئيه محکمو او د زا بل دښاري ابتدا ئيه محکمې د دوو تنو پخوانيوقاضيانو د سرغړونو په باب دڅيړنې د هيئت له خوا د دوو نورو وړاندې شويو رپوټونو په باب غور او څيړنه وشوه او د رپوټونو مثبتو او منفي ټکو ته په پا ملرنې سره ، لازم تصميمونه ونيول شول او هغو قاضيانوته چې دمسووليت توجيه شوي وو؛ لازمې تاديبي جزاګانې تجويز شوې.
وروسته د محررينو دستاژ د پروګرام ددرسي نصاب مقرره چې دمحکمو دمحررينو دظرفيت دلوړولو او په ټاکلو قانوني اوقضايي زده کړو سره د هغوى دسمبالولوپه مقصد تدوين شوې ده او د قوانينو ، قضايي تعليمات نامو، حقوقي مضمونونو تدريس او سيمينارونه او مسلکي توضيحات په کې شا مل دي، تصويب شوه او د قضايه قوې د ادارې عمومي آمريت ته لارښوونه وشوه چې ددغه پروګرام په عملي کولوکې دې را تلوونکي اجرا ات ترسره کړي.
وروسته د يو شمېر رسيدلواستهدا ګانو په باب غور وشو او د فوايدعامې وزارت د جايدادونو دملکيت دسند د برا برولو دڅرنګوالى په باب ددغه وزارت دغوښتنې له امله دکابل ولايت داستيناف محکمې درياست د استهدايې په وړاندې څرګنده شوه.
په هغه صورت کې چې د نظر وړ جايدادونه  له اشخاصو څخه استملاک شوي وي؛ دقبالې لمبر، نيټه او د هغې اجرا کوونکې محکمه دې په ډا ګه شي چې محکمه د هغو له مخې د مثنى په اجرا کولواقدام و کړي، له دې پرته دولتي جايدادونه يوازې د جمهوري رياست د حکمونو له ترلاسه کولووروسته په اړوندو املاکي دفترونوکې د قيديت مستلزم وي.
دغه راز د سرپرستى او په هغې پورې له اړوندو پوښتنو، له حق څخه دميندو اوپلرونو د تيريدو په برخه کې د بهرنيو چارو وزارت د قونسلي چارو د رياست د حقوقو د برخې د استهدا، د حج او اوقافو وزارت په واک کې د وقفې ځمکې د ورکولو په باب د پوهنې وزارت د غوښتنې په برخه کې د حج او اوقافو وزارت د استهدايې، د تحصيلي لګښتونو د زيان د جبيره کولو، د تحصيل د څرنګوالى په اړوند دملي دفاع وزارت د استهدايې او د يوې مدنې ستونزې په اړوند دبدخشان ولايت د استيناف محکمې د رياست د استهدايې په باب خبرې وشوې او د هرې موضوع په باره کې د نافذو قوانينو د مصرحاتو په رڼاکې لازمې لار ښوونې وشوې.
سر بېره پردې، د عالى شورا په غونډه کې د وروستيو پريکړو په باب دبيا کتنې او غوښتنې او په جزايي اومدني موضوعګانوکې د محکمې د بدلون ٢٥ غوښتنې چې د لوى څارنوالى او د دعوا د خاوندانوله خوا طرحه شوې وې؛ هم وڅيرل شوې او په هر موردکې لا زم تصميمونه ونيول شول.

کابل\  باخترد وري  دمياشتې  ٢٧ :
دقوماندان عبدالقدير په مشرۍ يوه اته کسيزه وسله واله ډله نن  په کونړ ولايت کې د سولې له بهيرسره يوځاى شوه.
دکونړوالي سيدفضل الله واحدي باخترآژانس ته وويل  چې دغه کسان پخوا د کونړ ولايت دغازي آباد ولسوالۍ په مربوطاتوکې په دولتي ضدفعاليتونو بوخت وو  او دملي روغې جوړې د تګلارې په رښتينولى باندې په پوهيدوسره له دولت سره يوځاى شول.
قوماندان عبدالقدير چې ددغوکسانو مشرتوب په غاړه درلود؛ وويل: له يولسو کلونو راپه دې خوا له دولت سره په مخالفت  کې وم  او اوس له دولت سره يوځاى شوى يم  او غواړم  چې د امنيت په تامينولو کې  له دولت سره همکاري وکړم.
ده له مسوولينو څخه وغوښتل چې له دولت سره يوځاى شويوکسانو ته دکار په برابرولوکې هلې ځلې وکړي.

کابل\  باخترد وري  دمياشتې  ٢٧ :
په بادغيس ولايت کې يوې اتلس کلنې ښځې  ځان ته  اور  واچاوه.
د بادغيس ولايت د ښځو د چارو رييسې مونسې قادر باخترآژانس ته وويل چې دغې ښځې دجبري واده په دليل  په ځان وژنې لاس پورې کړى دى .
دې زياته کړه: دغه ښځه څلور مياشتې مخکې  د دې دکورنۍ له خوا د دې له خوښې پرته واده شوې وه چې دهمدې مودې په بهيرکې يې څوځلې په ځان وژنې لاس پورې کړى دى، خو بريالې شوې نه وه .
د ښځو د چارو رييسې وويل چې دغې ميرمنې د تيلوپه کارولو سره په ځان سوځونې لاس پورې کړى دى.
دغه ميرمن د بادغيس ولايت د قلعه نو ملکي روغتون ته ليږدول شوې وه او د روغتون د مسوولينو دڅرگندونوله مخې، د دې په سلوکې اته نوي بدن سوځيدلى دى او د ژوندى پاتې کيدو احتمال يې ډير کم دى .

کابل\  باخترد وري  دمياشتې  ٢٧ :
په قندهار ولايت کې د سوک وهلو سيالۍ ددغه ولايت د ورزشکارانو په اتلوالى  سره پاى ته ورسيدې.
دقند هار ولايت ورزشي آمر احمد الله ګلا لى باختر آژانس ته وويل: دغه سيالۍ چې د قندهار او هلمند د ولايتو نو  د ورزشکارانو ترمنځ دوه ورځې مخکې په چمن ښارکې پيل شوې وې؛ په پاى کې د قندهار ولايت ورزشکارانو د سرو زرو د څلورو مډالونو په ترلاسه کولو سره لومړۍ مقام، د چمن ورزشکارانو د سرو زرو د دريو مډالونو په ترلاسه کولو سره دريم مقام او د هلمند ولايت ورزشکارانو د سرو زرو د دوو مډالو نو په ترلاسه کولو سره دريم مقام وګاټه.
په دغوسياليوکې ٥٠ تنو ورزشکارانو ګډون کړي وو او په اتو وزنونوکې يې سيالۍ وکړې.

کابل\  باخترد وري  دمياشتې  ٢٧ :
دکابل ښار د فوټبال دغوره ليک سياليو پرون مازيګر په دوو لوبو سره دوام وکړ.
دکابل د فوټبال فدراسيون مرستيال عبدالبصيرقيومي باخترآژانس ته وويل: په لومړۍ سيالۍ کې د اردو ټيم د يوې په مقا بل کې په دوو سره د کابل دځوانانو پرټيم بريالى شو او په بله لو به کې د آزادي او د بيګ بير ټيمونولو به د يوې په مقابل کې په يوې سره برابره پاى ته وسوله
دغه سيالۍ د١٤ ټيمونوترمنځ د المپيک دملي کميټې په ورزشي لوبغالى کې پيل شوې دي او ټاکل شوې ده نن د استقلال او ميوند ټيمونه او د سباوون او شيوا ټيمو نه لو بې وکړي

کابل\  باخترد وري  دمياشتې  ٢٧ :
ټاکل شوې ده د واليبال اتلوالى د ليګ سيالۍ بل سبا په کابل کې تر سره شي. د المپيک د ملي کميټې د خپرونو  آمر سميع دره يي د دغو سياليو دتر سره کولو هدف د هيواد دملي ټيم ته  د واليبال دغوره ورزشکارانو پيژندنه او انتخاب و باله او ويې ويل:
په دغوسياليوکې له کابل څخه پنځه ټيمونه دبلخ له ولايت څخه دوه ټيمونه دننګر هار له ولايت څخه دوه ټيمونه اودغه راز دجوزجان ، تخار،خوست ،هرات ، فراه او د لغمان د ولايتونو ټيمونه ګډون کوي
د يادونې وړ ده چې دغه سيالۍ د المپيک د ملي کميټې په ورزشي لوبغالى کې ترسره کيږي.

کابل\  باخترد وري  دمياشتې  ٢٧ :
دملي امنيت يوکارکوونکى په پکتيا ولايت کې له وسله والو طالبانوسره په نښته کې شهيد شو .
په دې جګړه کې چې نن سهاردګرديزښار په رباط سيمه کې ونښته، دوه تنه وسله وال طالبان هم ووژل شول
دپکتيا ولايت د امنيې قو ما ندانۍ ويندوى محمدعظيم باختر آژانس ته وويل:
په دې نښته کې ددغه ولايت دملي امنيت يو منسوب شهيد شوى او دوه تنه وسله وال طالبان هم وژل شوي دي.
ده وويل: په سيمه کې نښته دوام لري. نورجزئيات وروسته خپريږي

کابل\  باخترد وري  دمياشتې  ٢٧ :
دملي اردو  درې تنه عسکر پرون دهرات ولايت  په مربوطاتوکې شهيدان شول.
دملي دفاع وزارت  د ويندوى مطبوعاتي دفتر باخترآژانس ته خبر ورکړ:
دملي اردو درې تنه سرتيري د هرات ولايت د شينډنډ ولسوالۍ په مربوطاتوکې  د امنيتي دندو د ترسره کولو په بهيرکې په واټونوکې په ښخ کړى شوي ماينونو د ختلو له امله شهيدان شول او يوبل سرتيرى ټپي شو.
دغه راز دملي اردو يوبل عسکر نن سهار د لوګر ولايت د مرکــــز پل علم په مربوطاتوکې په واټ کې په ښخ کړاى شوى ماين دختلو له امله شهيد شو او ددغو ځواکونو يو بل عسکر دننګرهار ولايت دبټي کوټ  ولسوالۍ په مربوطاتوکې په سړک کې د ښخ کړاى شوي ماين د چاودنې له امله ټپي شو.

کابل\  باخترد وري  دمياشتې  ٢٧ :
دوه تنه وسله وال مخالفين دهلمند ولايت په  مربوطاتوکې دعقاب په نامه عملياتو کې ووژل شول.
دملي دفاع وزارت د ويندوى مطبوعاتي دفتر باخترآژانس ته خبر ورکړ: دغه عمليات نن دهلمند ولايت د ناوې او ګرشک د ولسواليو په مربوطاتوکې ترسره شول  چې له امله يې دوه تنه وسله وال مخالفين ووژل شول او يوبل مخالف ټپي شو.
ويل کيږي چې د دغو عملياتو په بهيرکې د دښمن د وسايطو ضد يوولس ماينونه کشف او شنډکړى شوي دي او دوه ايکم مخابرې، د درندو اوسپکو وسلويوه اندازه مهمات، يو موټر سايکل اويو موټر ترلاسه شوى دى.

کابل\  باخترد وري دمياشتې  ٢٧ :
د افغانستان د عالمانو سراسري شوری د خپلو نوبتي غونډو په لړ کې نن د دې شوری د رئیس قضاوتپوه مولوی قیام الدین کشاف په مشرۍ غونډه وکړه او په ډېرو مهمو موضوعاتو لکه د اسلام له نظره ځان وژنې، بمي بریدونو، په ناحقه مسلمان وژنې، د جوماتونو ، مدرسو او ښوونځیو تخریب، په ظلم او ناروا توګه د مسلمانانو د مالونو خوړلو، د نشه یي توکو په خاص ډول د شرابو او د سرکوزي د غوښې د واردولو، له پولې آخوا څخه د افغانستان د کونړ ولایت پر خاورې د بریدونو، د ننګرهار ولایت د ګوشتې ولسوالۍ پر محاذ د افغانستان خاورې ته د پاکستان وړاندې راتګ، له ۲۰۱۴ کال څخه وروسته د افغانستان د حالت د خرابېدو په هکله د لویدیزو رسنیو تخریبي خپرونو او یو شمېر نورو موضوعاتو په باب بحثونه او خبرې اترې وشوې، چې تفصیلات به یې په مصوبه کې راشي.
همدا رنګه عالمانو پرېکړه وکړه، چې یو شمېر نور موضوعات چې په سملاسي توګه د دولت د اړوندو ادارو له خوا باید کړنې ترسره شي، د افغانستان د اسلامي جمهوریت جمهور رئیس ته دې په لیکلي ډول وړاندیز وشي، ترڅو د هغو په هکله حکم صادر کړي.  د عالمانو شوری غونډې به د پنجشنبې تر ورځې دوام کوي.